ନୂଆଦିଲ୍ଲୀ: ଗ୍ରୀଷ୍ମ ପ୍ରବାହରେ କୃଷି କ୍ଷତି କମାଇବା ଓ ପାଣିପାଗ ଯୋଜନାକୁ ତୃଣମୂଳରେ ପହଞ୍ଚାଇବା ଉପରେ ଜୋର
କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ ନୂଆଦିଲ୍ଲୀରେ ଆୟୋଜିତ ଏକ ଗୁରୁତ୍ୱପୂର୍ଣ୍ଣ ଉଚ୍ଚସ୍ତରୀୟ ବୈଠକରେ ସମ୍ଭାବ୍ୟ ବନ୍ୟା ଏବଂ ଗ୍ରୀଷ୍ମ ପ୍ରବାହ ମୁକାବିଲା ପାଇଁ ଦେଶର ପ୍ରସ୍ତୁତିର ବିସ୍ତୃତ ସମୀକ୍ଷା କରିଛନ୍ତି।
ଏହି ବୈଠକକୁ ସମ୍ବୋଧିତ କରି କେନ୍ଦ୍ର ଗୃହମନ୍ତ୍ରୀ କହିଥିଲେ ଯେ ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (ଏନଡିଏମଏ) ର ସହାୟତାରେ ଜାମ୍ମୁ-କାଶ୍ମୀର, ଲଦାଖ, ଉତ୍ତରାଖଣ୍ଡ, ହିମାଚଳ ପ୍ରଦେଶ, ଅରୁଣାଚଳ ପ୍ରଦେଶ ଏବଂ ସିକିମର ୩୦ଟି ଅଧିକ ରିସ୍କ ଥିବା ହ୍ରଦ ପାଇଁ ଆଗୁଆ ଚେତାବନୀ ବ୍ୟବସ୍ଥା ବିକଶିତ କରିବାର ଯୋଜନାରେ ଅତିକମରେ ୬୦ ଟି ହ୍ରଦକୁ ସାମିଲ କରାଯିବା ଉଚିତ। ଶ୍ରୀ ଶାହ ଏହା ମଧ୍ୟ କହିଥିଲେ ଯେ ଉଭୟ କେନ୍ଦ୍ର ଏବଂ ରାଜ୍ୟ ସ୍ତରରେ ବନ୍ୟା ପୂର୍ବାନୁମାନ ପାଇଁ ଏକ ସମନ୍ୱିତ ବ୍ୟବସ୍ଥା ରହିବା ଉଚିତ।
ଶ୍ରୀ ଶାହ କହିଛନ୍ତି ଯେ ଦେଶର ପ୍ରତ୍ୟେକ ରାଜ୍ୟରେ ବନ୍ୟା ସଙ୍କଟ ପରିଚାଳନା ଦଳ (ଏଫସିଏମଟି) ଗଠନ କରାଯିବା ଉଚିତ ଏବଂ ଏହାକୁ ସକ୍ରିୟ କରାଯିବା ଉଚିତ। ସେ କହିଛନ୍ତି ଯେ ବିପର୍ଯ୍ୟୟ ପାଇଁ ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (ଏନଡିଏମଏ) ଦ୍ୱାରା ଜାରି କରାଯାଇଥିବା ନିର୍ଦ୍ଦେଶାବଳୀ ଉନ୍ନତ ସଚେତନତା ଏବଂ “ସମ୍ପୂର୍ଣ୍ଣ ସରକାର” ଆଭିମୁଖ୍ୟର ବିକାଶକୁ ଆଗେଇ ନେଇଛି, କିନ୍ତୁ ରାଜ୍ୟ, ଜିଲ୍ଲା ଏବଂ ପୌରାଞ୍ଚଳ ସ୍ତରରେ ଏହି ନିର୍ଦ୍ଦେଶାବଳୀର ଅନୁପାଳନକୁ ସମୀକ୍ଷା କରିବା ସେମାନଙ୍କ କାର୍ଯ୍ୟକାରିତାକୁ ଆହୁରି ମଜବୁତ କରିପାରିବ। ସେ ଏହା ମଧ୍ୟ କହିଛନ୍ତି ଯେ ଜଙ୍ଗଲ ନିଆଁ, ଗ୍ରୀଷ୍ମ ପ୍ରବାହ ଏବଂ ବନ୍ୟା ମୁକାବିଲା ପାଇଁ କେତେ ରାଜ୍ୟ ଗୃହ ମନ୍ତ୍ରଣାଳୟର ନିର୍ଦ୍ଦେଶାବଳୀ ଏବଂ ଏନଡିଏମଏ ନିର୍ଦ୍ଦେଶାବଳୀ ଅନୁସରଣ କରୁଛନ୍ତି ତାହା ଆକଳନ କରିବା ପାଇଁ ଏନଡିଏମଏ ଏକ ଅଧ୍ୟୟନ କରିବା ଉଚିତ୍।
କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଶୂନ୍ୟ କ୍ଷୟକ୍ଷତି ବିପର୍ଯ୍ୟୟ ପରିଚାଳନା ଦୃଷ୍ଟିକୋଣକୁ କାର୍ଯ୍ୟକାରୀ କରିବା ପାଇଁ ପ୍ରୟାସ କରାଯିବା ଆବଶ୍ୟକ। ସେ କହିଥିଲେ ଯେ ଜଳ ସଂରକ୍ଷଣ ଏବଂ ଭୂତଳ ଜଳସ୍ତରରେ ଉନ୍ନତିର ଅଧିକ ସମ୍ଭାବନା ଜଳ ସଂରକ୍ଷଣ ଏବଂ ଚେକ୍ ଡ୍ୟାମ୍ ପ୍ରକଳ୍ପ ଜରିଆରେ ଅନ୍ୱେଷଣ କରାଯିବା ଉଚିତ। ନଦୀ ଉପରେ ଚେକ୍ ଡ୍ୟାମ୍ ନିର୍ମାଣ କରି ଜଳ ସଂରକ୍ଷଣ କରିବା ସହିତ ଗ୍ରୀଷ୍ମ ପ୍ରବାହର ପ୍ରଭାବକୁ ମଧ୍ୟ କମ୍ କରିବା ଆମର ଉଦ୍ଦେଶ୍ୟ ହେବା ଉଚିତ। ସେ ଆହୁରି ମଧ୍ୟ କହିଛନ୍ତି ଯେ ପରିବେଶ ସନ୍ତୁଳନକୁ ଅଧିକ ବହୁମୁଖୀ ରଖିବା ଉଦ୍ଦେଶ୍ୟରେ ପ୍ରୟାସ କରିବା ପାଇଁ କାମ୍ପା ପାଣ୍ଠିର ଉପଯୋଗ କରାଯିବା ଉଚିତ।
ଅମିତ ଶାହ କହିଥିଲେ ଯେ ଜଳବାୟୁ ପରିବର୍ତ୍ତନ କାରଣରୁ ପାଣିପାଗ ଢାଞ୍ଚାରେ ହେଉଥିବା ପରିବର୍ତ୍ତନ ଏବଂ ସେଥିରୁ ସୃଷ୍ଟି ହେଉଥିବା ବିପର୍ଯ୍ୟୟ ସମ୍ବନ୍ଧୀୟ ଆହ୍ୱାନର ମୁକାବିଲା ପାଇଁ ‘ସମ୍ପୂର୍ଣ୍ଣ ସରକାର ’ ଏବଂ ‘ ସମ୍ପୂର୍ଣ୍ଣ ସମାଜ’ ଆଭିମୁଖ୍ୟ ଗ୍ରହଣ କରି ଏକ ମାଷ୍ଟରପ୍ଲାନ ପ୍ରସ୍ତୁତ କରାଯିବା ଉଚିତ। ସେ ବୈଠକରେ ଉପସ୍ଥିତ ଥିବା ମନ୍ତ୍ରଣାଳୟ ଏବଂ ବିଭାଗର ଅଧିକାରୀମାନଙ୍କୁ ନୂତନ ଆପ୍ ଏବଂ ପୋର୍ଟାଲ ସୃଷ୍ଟି କରିବା ପରିବର୍ତ୍ତେ ବିଦ୍ୟମାନ ଆପ୍ ଏବଂ ପୋର୍ଟାଲକୁ ଏକତ୍ର କରିବା ଏବଂ ଉନ୍ନତ କରିବା ଉପରେ ଧ୍ୟାନ ଦେବାକୁ କହିଥିଲେ। ସେ ଏହା ମଧ୍ୟ କହିଛନ୍ତି ଯେ ପାଣିପାଗ ପୂର୍ବାନୁମାନ ଏବଂ ଚେତାବନୀ ବ୍ୟାପକ ଏବଂ ପ୍ରଭାବଶାଳୀ ଭାବରେ ପ୍ରସାରିତ ହେବା ଉଚିତ୍।
କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ ମୌସୁମୀ ଋତୁରେ କ୍ଷୟକ୍ଷତି, ଆମର ପୂର୍ବାନୁମାନର ସଠିକତା ଏବଂ କୃଷି କ୍ଷେତ୍ରକୁ ହୋଇଥିବା କ୍ଷୟକ୍ଷତିର ଅଧ୍ୟୟନ କରି ଆଗାମୀ ମୌସୁମୀ ବିଷୟରେ ଆମର ମୂଲ୍ୟାଙ୍କନକୁ ଆହୁରି ଉନ୍ନତ କରିବା ପାଇଁ ପ୍ରୟାସ କରାଯିବା ଉଚିତ।
ବୈଠକରେ ଅଂଶଗ୍ରହଣ କରୁଥିବା ମନ୍ତ୍ରଣାଳୟ ଏବଂ ବିଭାଗଗୁଡ଼ିକ ଦ୍ୱାରା କରାଯାଉଥିବା କାର୍ଯ୍ୟ ତଥା ସେମାନଙ୍କ ମଧ୍ୟରେ ସମନ୍ୱୟକୁ ଅମିତ ଶାହ ପ୍ରଶଂସା କରିଥିଲେ। ସେ କହିଥିଲେ ଯେ ବର୍ତ୍ତମାନ ସମୟ ଆସିଛି ଯେ ଆମର ପାଣିପାଗ ସମ୍ବନ୍ଧୀୟ ଯୋଜନାଗୁଡ଼ିକ ତୃଣମୂଳ ସ୍ତରରେ ପହଞ୍ଚିବ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଶ୍ରୀ ଶାହ ବନ୍ୟା ଏବଂ ଅନ୍ୟାନ୍ୟ ପ୍ରାକୃତିକ ବିପର୍ଯ୍ୟୟର ପ୍ରଭାବ ହ୍ରାସ କରିବା ଲାଗି ପ୍ରସ୍ତୁତିକୁ ସର୍ବାଧିକ ପ୍ରାଥମିକତା ଦେଇଛନ୍ତି। ପ୍ରତିବର୍ଷ କେନ୍ଦ୍ର ଗୃହ ମନ୍ତ୍ରୀ ବନ୍ୟା ପୂର୍ବର ପ୍ରସ୍ତୁତିର ବିସ୍ତୃତ ସମୀକ୍ଷା କରିଥାନ୍ତି ଏବଂ ତାଙ୍କ ନିର୍ଦ୍ଦେଶ ଅନୁଯାୟୀ ଅନେକ ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରାଯାଇଛି। ଏଥିରେ ଭାରତୀୟ ପାଣିପାଗ ବିଭାଗ (ଆଇ. ଏମ୍. ଡି.) ଏବଂ କେନ୍ଦ୍ରୀୟ ଜଳ ଆୟୋଗ (ସି. ଡବ୍ଲ୍ୟୁ. ସି.) ଦ୍ୱାରା ବର୍ଷା ଏବଂ ବନ୍ୟା ପୂର୍ବାନୁମାନ ପାଇଁ ଆଗୁଆ ଅବଧିକୁ ୩ ଦିନରୁ ୭ ଦିନକୁ ବୃଦ୍ଧି କରିବା ସହିତ ଗ୍ରୀଷ୍ମ ପ୍ରଦାହ ପୂର୍ବାନୁମାନ ପାଇଁ ମାନକରେ ଉନ୍ନତି ଆଣିବା ଅନ୍ତର୍ଭୁକ୍ତ।
ଏହି ବୈଠକରେ କେନ୍ଦ୍ର ଜଳ ଶକ୍ତି ମନ୍ତ୍ରୀ ସି. ଆର୍. ପାଟିଲ୍, କେନ୍ଦ୍ର ଗୃହ ସଚିବ, ସଚିବ ଏବଂ ବିଭିନ୍ନ ମନ୍ତ୍ରଣାଳୟର ବରିଷ୍ଠ ଅଧିକାରୀମାନେ, ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (ଏନ୍. ଡି. ଏମ୍. ଏ.) ର ସଦସ୍ୟ ଏବଂ ବିଭାଗୀୟ ମୁଖ୍ୟ, ଜାତୀୟ ବିପର୍ଯ୍ୟୟ ପ୍ରଶମନ ବଳ (ଏନ୍. ଡି. ଆର୍. ଏଫ୍.) ଏବଂ ଭାରତୀୟ ପାଣିପାଗ ବିଭାଗ (ଆଇ. ଏମ୍. ଡି.) ର ମହାନିର୍ଦ୍ଦେଶକ, ଭାରତୀୟ ଜାତୀୟ ରାଜପଥ ପ୍ରାଧିକରଣ (ଏନ୍. ଏଚ୍. ଏ. ଆଇ.) ଏବଂ କେନ୍ଦ୍ରୀୟ ଜଳ ଆୟୋଗ (ସି. ଡବ୍ଲ୍ୟୁ. ସି.) ର ଅଧ୍ୟକ୍ଷ, ତଥା ଜାତୀୟ ରିମୋଟ ସେନ୍ସିଂ ସେଣ୍ଟର (ଏନ୍. ଆର୍. ଏସ୍. ସି.) ଏବଂ ଅନ୍ୟାନ୍ୟ ସମ୍ପୃକ୍ତ ବିଭାଗର ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ।