ଡକାର: ସେନେଗାଲ ରାଜଧାନୀ ଡକାରରେ ଅନୁଷ୍ଠିତ ୟୁଥ୍ ଅଲିମ୍ପିକ୍ ଗେମ୍ସ ଉଦ୍ଯାପିତ ହୋଇଛି। ଏହି ପ୍ରତିଯୋଗିତାରେ ଭାରତୀୟ ଖେଳାଳିମାନେ ଅତ୍ୟନ୍ତ ଚମତ୍କାର ପ୍ରଦର୍ଶନ କରି ଦେଶ ପାଇଁ ଗର୍ବ ଓ ଗୌରବ ଆଣିଛନ୍ତି। ମାତ୍ର ୧୭ ଜଣିଆ ଛୋଟ ଭାରତୀୟ ଟିମ୍ରୁ ୯ ଜଣ ଖେଳାଳି ୨ଟି ସ୍ୱର୍ଣ୍ଣ, ୩ଟି ରୌପ୍ୟ ଏବଂ ୫ଟି ବ୍ରୋଞ୍ଜ୍ ସହ ମୋଟ ୧୦ଟି ପଦକ ହାସଲ କରିଛନ୍ତି। ୟୁଥ୍ ଅଲିମ୍ପିକ୍ସ ଇତିହାସରେ ଏହା ଭାରତର ଦ୍ୱିତୀୟ ସର୍ବଶ୍ରେଷ୍ଠ ପ୍ରଦର୍ଶନ ଅଟେ। ଏହି ସଂସ୍କରଣରେ ଭାରତୀୟ କ୍ରୀଡ଼ାବିତ୍ମାନେ ଅନେକ ନୂତନ କୀର୍ତ୍ତିମାନ ସ୍ଥାପନ କରିଛନ୍ତି। ବକ୍ସିଂରେ ଭାରତକୁ ପ୍ରଥମ ଥର ପାଇଁ ଦୁଇଟି ସ୍ୱର୍ଣ୍ଣ ପଦକ ମିଳିଥିବା ବେଳେ ବାଳିକା ୪୮ କେଜି ବର୍ଗରେ ଗୁଞ୍ଜନ ଏବଂ ବାଳକ ୫୦ କେଜି ବର୍ଗରେ ଆମ୍ବେକର ମିତେଇ ସ୍ୱର୍ଣ୍ଣ ପଦକ ଅର୍ଜନ କରିଛନ୍ତି। ସେହିପରି ସନ୍ତରଣରେ ଧୀନିଧି ଦେସିଂଘୁ (୧୦୦ ଓ ୨୦୦ ମିଟର ଫ୍ରିଷ୍ଟାଇଲ୍) ଦୁଇଟି ବ୍ରୋଞ୍ଜ୍ ପଦକ ଜିତି ଗୋଟିଏ ସଂସ୍କରଣରେ ଡବଲ୍ ପଦକ ହାସଲ କରିବାରେ ପ୍ରଥମ ଭାରତୀୟ ହୋଇଛନ୍ତି। ଓଡ଼ିଆ ଝିଅ ତନ୍ୱୀ ପତ୍ରୀ ପ୍ରଥମ ମହିଳା ବ୍ୟାଡ୍ମିଣ୍ଟନ ଖେଳାଳି ଭାବେ ସିଙ୍ଗଲ୍ସ ଇଭେଣ୍ଟ୍ରେ ରୌପ୍ୟ ପଦକ ଜିତି ରାଜ୍ୟ ଓ ଦେଶ ପାଇଁ ଗୌରବ ଆଣିଛନ୍ତି। ଅନ୍ୟମାନଙ୍କ ମଧ୍ୟରେ ବିଚ୍ କୁସ୍ତିରେ ତାନିୟା ରୌପ୍ୟ ପଦକ ଏବଂ ଦୌଡ଼କୁଦର ମହିଳା ୧୦୦ ମିଟର ବାଧାଦୌଡ଼ରେ ଶୌର୍ଯ୍ୟା ଅମ୍ବୁରେ ବ୍ରୋଞ୍ଜ୍ ପଦକ ଜିତି ପ୍ରଥମ ହୋଇଛନ୍ତି। ପ୍ରକାଶଯୋଗ୍ୟ ଯେ, ଏଥର ୨୦୭ଟି ଦେଶରୁ ୧୫ରୁ ୧୮ ବର୍ଷ ବୟସର ୨୭୦୦ରୁ ଊର୍ଦ୍ଧ୍ୱ ପ୍ରତିଭାବାନ ଖେଳାଳି ୨୫ଟି କ୍ରୀଡ଼ା ଇଭେଣ୍ଟ୍ରେ ଅଂଶଗ୍ରହଣ କରିଥିଲେ।
