Author: Samikhsya Bureau

ଭାରତୀୟ ସେନା ଏହାର ବୀର ନାରୀ ଏବଂ ଶହୀଦ ମାନଙ୍କ ବିଧବା ପତ୍ନୀ ମାନଙ୍କୁ ଭେଟିଛନ୍ତି। ଏହି କାର୍ଯ୍ୟକ୍ରମରେ ପେନ୍‌ସନ୍‌ ସମସ୍ୟା, ସ୍ବାସ୍ଥ୍ୟ ସେବା ପ୍ରଦାନ, ହ୍ବିଲ୍‌ ଚେୟାର ପ୍ରଦାନ ଏବଂ ଅନ୍ୟାନ୍ୟ ଔଷଧପତ୍ର ପ୍ରଦାନ କରାଯାଇଥିଲା। ସେନାର ବ୍ଲାକ୍‌ ଏରୋ ବ୍ରିଗେଡ୍‌ ଜରିଆରେ ପଞ୍ଜାବର ପଠାନକୋଟରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ବ୍ଲାକ୍‌ ଏରୋ ବିଗ୍ରେଡ୍‌ର କମାଣ୍ଡର ୮୦ ବୀର ନାରୀ ଏବଂ ଶହୀଦ ପରିବାରକୁ ଭେଟି ଭାରତୀୟ ସେନା ପକ୍ଷରୁ ସମସ୍ତ ପ୍ରକାର ସହାୟତା ପ୍ରଦାନ କରାଯିବ ବୋଲି କହିଛନ୍ତି। ଦେଶର ସୀମାରେ ସେନାର ଉଦ୍ୟମକୁ ପ୍ରଶଂସା କରିବା ସହିତ ଶହୀଦ ପରିବାରର ଅସୁବିଧା ଉପରେ ସ୍ବତନ୍ତ୍ର ଧ୍ୟାନ ଦିଆଯିବ ବୋଲି ବ୍ଲାକ୍‌ ଏରୋ ବିଗ୍ରେଡ୍‌ କମାଣ୍ଡର ପ୍ରକାଶ କରିଥିଲେ।

ଆଇପିଏଲ୍‌ର ୧୨ତମ ସଂସ୍କରଣ ଉଦ୍‌ଘାଟିତ ହୋଇଯାଇଛି । ପ୍ରଥମ ଥର ନିମନ୍ତେ ଏହି ଟୁର୍ଣ୍ଣାମେଣ୍ଟ ନିରାଡମ୍ବର ଭାବେ ଉଦ୍‌ଘାଟନୀ ଉତ୍ସବରେ ଆୟାେଜିତ ହୋଇଛି । ଉଦ୍‌ଘାଟନୀ ଉତ୍ସବର ସମ୍ପୂର୍ଣ୍ଣ ବଜେଟ୍‌କୁ ସଶସ୍ତ୍ର ବଳକୁ ପ୍ରଦାନ କରାଯାଇଛି । ପୁଲଓ୍ବାମା ଆକ୍ରମଣରେ ଶହୀଦ ଯବାନଙ୍କ ନିମନ୍ତେ ଏହି ଅର୍ଥ ପ୍ରଦାନ କରାଯାଇଛି । ଏହି ଆକ୍ରମଣରେ ୪୦ ଯବାନ ଶହୀଦ ହାେଇଥିଲେ । ଏହି ଅର୍ଥରାଶିରୁ  ୧୧କୋଟି ଭାରତୀୟ ଆର୍ମିକୁ ମିଳିଛି । ସିଆରପିଏଫ୍‌କୁ ୭ କୋଟି ମିଳିଥିବା ବେଳେ ନୌସେନା ଏବଂ ବାୟୁସେନାକୁ ୧ କୋଟି ଲେଖାଏଁ ମିଳିଛି । ସିଓଏ ମୁଖ୍ୟ ବିନୋଦ ରାୟ ମଧ୍ୟ ଏହି ପଦକ୍ଷେପକୁ ପ୍ରଶଂସା କରିଛନ୍ତି । ଆରସିବି ଏବଂ ଚେନ୍ନାଇ ମଧ୍ୟରେ ଖେଳାଯାଇଥିବା ଏହି ପ୍ରଥମ ମ୍ୟାଚ୍‌ର ଟିକଟ୍‌ରୁ ମିଳିଥିବା ସମସ୍ତ ଅର୍ଥ ଚେନ୍ନାଇ ଟିମ୍‌ ନିର୍ଦ୍ଦେଶକ ରାକେଶ ସିଂ ସେନାକୁ ପ୍ରଦାନ କରିଛନ୍ତି ।

ଆଜି ଭୁବନେଶ୍ୱରସ୍ଥିତ କଂଗ୍ରେସ ଭବନରେ ପିସିସି  ସଭାପତିଙ୍କ ଉପସ୍ଥିତିରେ ବିଧିବଦ୍ଧ ଭାବରେ ଡାକ୍ତର ଅଶ୍ୱିନୀ ପୂଜାହାରୀ କଂଗ୍ରେସ ପାର୍ଟିରେ ଯୋଗ ଦେଇଛନ୍ତି। ସମ୍ବଲପୁର ଜିଲ୍ଲାର କୌଣସି ଏକ ଆସନରୁ ସେ ନିର୍ବାଚନ ଲଢ଼ିବାର ସମ୍ଭାବନା ରହିଛି। ଚାକିରିରୁ ଇସ୍ତଫା ଦେବା ପରେ ‘ଭିମ୍‌ସାର୍‌’ର ବହୁଚର୍ଚ୍ଚିତ ପୂର୍ବତନ ନିର୍ଦେଶକ ଡାକ୍ତର ପୂଜାହାରୀ ରାଜନୀତିରେ ଯୋଗ ଦେବା ନେଇ ଚର୍ଚ୍ଚା ହେଉଥିଲା । ଶେଷରେ ସେ କଂଗ୍ରେସ ପାର୍ଟିରେ ଯୋଗ ଦେଇଛନ୍ତି । ଡାକ୍ତର ପୂଜାହାରୀ ‘ଭୀମ୍‌ସାର୍‌’ରେ ନିର୍ଦେଶକ ଥିବାବେଳେ ଲୁଣ ଥେରାଫି ଓ ଷ୍ଟିଙ୍ଗ୍‌ ଅପରେସନ୍‌ ପାଇଁ ଲୋକଲୋଚନକୁ ଆସିଥିଲେ। ତାଙ୍କ ନାମରେ ଲୁଣ ଚିକିତ୍ସା ଅଭିଯୋଗ ଉଠିବା ପରେ ସରକାର ତାଙ୍କୁ ଅନିର୍ଦ୍ଦିଷ୍ଟ କାଳ ଯାଏଁ ଛୁଟିରେ ରହିବାକୁ ନିର୍ଦେଶ ଦେଇଥିଲେ। ଏହାର ଅଳ୍ପ କିଛି ଦିନ ପରେ ଡାକ୍ତର ପୂଜାହାରୀ ନିଜ ତରଫରୁ ଚାକିରିରୁ ଇସ୍ତଫା ଦେଇଥିଲେ।

ନିର୍ବାଚନ ଆଚରଣ ବିଧି ଉଲଂଘନ ଅଭିଯୋଗରେ ନିର୍ବାଚନ କମିଶନଙ୍କ ନିକଟରେ ଅଭିଯୋଗ ଆଣିଛି ତ୍ରିପୁରା ରାଜ୍ୟ ବିଜେପି କମିଟି। ମାର୍ଚ୍ଚ ୨୦ ରେ ଖମଲଙ୍ଗରେ ଏକ ରାଲି ଅବସରରେ ରାହୁଲ ଆଚରଣବିଧି ଉଲଂଘନ କରିଥିବାର ଅଭିଯୋଗ ହାେଇଛି। କଂଗ୍ରେସ ଦଳ ବିପକ୍ଷରେ ମନ୍ତବ୍ୟ ପାଇଁ  ମୁଖ୍ୟମନ୍ତ୍ରୀ ବିପ୍ଲବ ଦେବଙ୍କ ନିକଟରୁ କ୍ଷମାପ୍ରାର୍ଥନା ଦାବି କରିବା ପରେ ବିଜେପି ରାହୁଲଙ୍କ ବିପକ୍ଷରେ ଅଭିଯୋଗ ବାଢିଛି। ବିଜେପି ମୁଖପାତ୍ର ନବେନ୍ଦୁ ଭଟ୍ଟାଚାର୍ଯ୍ୟ କହିଛନ୍ତି ରାହୁଲ, ନିଜ ରାଲିରେ ବିଜେପି ସଭାପତି ଅମିତ ଶାହଙ୍କୁ ହତ୍ୟାକାରୀ ବୋଲି କହିଥିଲେ। ଶାହଙ୍କ ମାମଲା ଟ୍ରାଏଲ୍‌ କୋର୍ଟରେ ଖାରଜ ହୋଇଥିଲେ ମଧ୍ୟ ରାହୁଲଙ୍କ ଏପରି ଅଭିଯୋଗକୁ ସମାଲାେଚନା କରିଛି ବିଜେପି । ରାଫାଲେ ବିମାନ ମାମଲାରେ ଅନୀଲ ଅମ୍ବାନୀ ୩୦ ହଜାର କୋଟିର ଉତ୍କାେଚ ନେଇଥିବାର ଅଭିଯୋଗ ଆଣିଥିଲେ। ଶ୍ରୀ ଭଟ୍ଟାଚାର୍ଯ୍ୟ କହିଛନ୍ତି ୟୁପିଏ ସରକାର ଅମଳରେ ରାଫାଲେ ଚୁକ୍ତି ହୋଇଥିଲା ତେଣୁ ରାହୁଲଙ୍କ ଅଭିଯୋଗ ଭିତ୍ତିହୀନ। ସେହିପରି ଉକ୍ତ ରାଲିରେ ରାହୁଲ କହିଥିଲେ ଯେ ତ୍ରିପୁରାରେ ସରକାର ନାଗପୁରରେ ବସିଥିବା ଜଣେ ବ୍ୟକ୍ତି ଚଳାଉଛନ୍ତି। ଏକ ରାଷ୍ଟ୍ରୀୟ ଦଳର ସଭାପତିଙ୍କ ନିମନ୍ତେ ଏପରି ମନ୍ତବ୍ୟ ଆଦୌ ସମୀଚୀନ ନୁହେଁ ବାେଲି ଶ୍ରୀ ଭଟ୍ଟାଚାର୍ଯ୍ୟ କହିଛନ୍ତି।

ଗତକାଲି କଂଗ୍ରେସ ସଭାପତି ରାହୁଲ ଗାନ୍ଧୀ ଚଳିତ ନିର୍ବାଚନରେ ୟୁପିର ଆମେଥି ଓ କେରଳର ଓ୍ବାୟନାଡ ଆସନରୁ ପ୍ରାର୍ଥୀ ହେବା ନେଇ ଘୋଷଣା କରିବା ପରେ ଏହାକୁ ସମାଲୋଚନା କରିଛନ୍ତି ବିଜେପି କେନ୍ଦ୍ର ମନ୍ତ୍ରୀ ସ୍ମୃତି ଇରାନୀ । ସ୍ମୃତି କହିଛନ୍ତି ଯେ, ଆମେଥିର ଲାେକ ବତ୍ତର୍ମାନ କଂଗ୍ରେସକୁ ପ୍ରତ୍ୟାଖ୍ୟାନ କରିବା ଆରମ୍ଭ କରିଦେଇଛନ୍ତି ତେଣୁ ରାହୁଲ ଆମେଥୀରୁ ବାହାରେ ନିଜର ପ୍ରାର୍ଥୀପତ୍ର ଦାଖଲ କରିଛନ୍ତି । ନିଜ ଟ୍ବିଟ୍ଟର ପେଜ୍‌ରେ ରାହୁଲ୍‌ଙ୍କୁ ସମାଲୋଚନା କରିବା ସହିତ କହିଛନ୍ତି : ‘ପ୍ରଥମେ ଆମେଥିରୁ ଲୋକ ବାହାର କଲେ, ବର୍ତ୍ତମାନ କେରଳବାସୀଙ୍କ ପାଳି’ #ଭାଗ୍‌ ରାହୁଲ୍‌ ଭାଗ୍‌ ବୋଲି ସେ ଟୁଇଟ କରିଛନ୍ତି ।  ତେବେ ଏହି  ଟୁଇଟ୍‌କୁ ନେଇ ରାହୁଲ ନୀରବତା ଅବଲମ୍ବନ କରିଛନ୍ତି । ମାତ୍ର କଂଗ୍ରେସ ଦଳର ମୁଖପାତ୍ର ରଣଦୀପ୍‌ ସୁର୍ଜେଓ୍ବାଲା ସ୍ମୃତିଙ୍କୁ କଡା ଜବାବ ଦେଇଛନ୍ତି । ଅନ୍ୟ ଏକ ଟ୍ବିଟ୍‌ ଜରିଆରେ ସେ ଲେଖିଛନ୍ତି ‘ପ୍ରଥମେ ଚାନ୍ଦିନୀଚୌକରୁ  ବାହାର କଲେ, ଆମେଠୀ ମଧ୍ୟ ବାହାର କରିଥିଲା ପରିଶେଷରେ ରାଜ୍ୟସଭା ସଦସ୍ୟ ଭାବେ ସଂସଦରେ ପ୍ରବେଶ କରିଥିଲେ’ ଏବେ ତୃତୀୟ ଥର ହାରି ଅମେଥିରେ ହ୍ୟାଟ୍ରିକ ବନାଇବେ  । #ଭାଗ୍‌ ସ୍ମୃତି ଭାଗ୍‌  ବୋଲି ଟୁଇଟ୍ କରିଛନ୍ତି ସୁର୍ଜେଓ୍ବାଲା ।

ସାନ୍‌ଫ୍ରାନ୍‌ସିସ୍‌କୋରେ ଗୁଳିକାଣ୍ଡ ଘଟି ଜଣେ ବ୍ୟକ୍ତି ନିହତ ହୋଇଥିବା ବେଳେ ୩ ଜଣ ବ୍ୟକ୍ତି !ହତ ହାେଇଛନ୍ତି ।ପଶ୍ବିମ ଆମେରିକାର ଫିଲ୍‌ମୋର ସହରରେ ଏହି ଗୁଳିକାଣ୍ଡ ଘଟିଛି । ସନ୍ଧ୍ୟା ୮.୪୦ ମିନିଟ୍‌ରେ ବ୍ଲକ୍‌ ୧୩୦୦ରେ ଏହି ଘଟଣା ଘଟିଥିଲା ।  ୩ ଆହତଙ୍କୁ ଡାକ୍ତରଖାନାକୁ ନିଆଯାଇଥିବା ବେଳେ ତା ମଧ୍ୟରୁ ଜଣଙ୍କ ଅବସ୍ଥା ସଙ୍କଟାପନ୍ନ ରହିଥିବା ସୂଚନା ମିଳିଛି । ଆାମେରିକୀୟ ଅଧିକାରୀ ଘଟଣାର ତଦନ୍ତ ଜାରି କରିଛନ୍ତି । ଘଟଣା ପରେ ଫିଲ୍‌ମୋରର ଓ ଫାରେଲ୍‌ ରୁ ଟର୍କ ଷ୍ଟ୍ରିଟ୍‌ ରାସ୍ତାକୁ ବନ୍ଦ ରଖାଯାଇଛି । ଏହି ଆକ୍ରମଣ ନିମନ୍ତେ କୌଣସି ଆତଙ୍କୀ ସଙ୍ଗଠନ କିମ୍ବା ବ୍ୟକ୍ତିବିଶେଷ ନିଜକୁ ଦାୟୀ କରି ନାହାନ୍ତି ।

ଭାରତୀୟ ଟେନିସ୍‌ ଖେଳାଳି ଏନ୍‌ ଶ୍ରୀରାମ ବାଲାଜୀ ଏବଂ ମେକ୍ସିକୋର ହାନ୍ସ ହାଚ୍‌ ଭର୍ଡୁଗୋଙ୍କ ଯୋଡି ୫୪୧୬୦ ଡଲାର ପୁରସ୍ଚାକାର ରାଶି ବିଶିଷ୍ଟ ଏଟିପି ଚ୍ୟାଲେଞ୍ଜର୍ସ ଡବଲ୍ସ ଫାଇନାଲ୍‌ରେ ପରାଜିତ ହାେଇଛନ୍ତି । ଅଷ୍ଟ୍ରେଲିଆନ୍‌ ଯୋଡି ମ୍ୟାକ୍ସ ପୁରସେଲ୍‌ ଏବଂ ଲୁ୍ୟକ୍‌ ସାଭିଲେଙ୍କ ନିକଟରୁ ସିଧାସଳଖ ୬-୨  ଏବଂ  ୭-୬(୫)ରେ ପରାସ୍ତ ହାେଇଥିଲେ ଏହି ଯୋଡି । ବାଲାଜୀ-ଭର୍ଡୁଗୋ ଏହି ଟୁର୍ଣ୍ଣାମେଣ୍ଟରେ ଚତୁର୍ଥ ସିଡ୍‌ର ମାନ୍ୟତା ପାଇଥିବା ବେଳେ ମ୍ୟାକ୍ସ – ସାଭିଲେ ତୃତୀୟ ସିଡ୍‌ ରହିଥିଲେ । ବାଲାଜୀ ଏବଂ ଭର୍ଡୁଗୋ୧୮୦୦ଡଲାରର ପୁରସ୍କାର ରାଶି ସହିତ ୪୮ ଏଟିପି ପଏଣ୍ଟ ହାସଲ କରିଥିବା ବେଳେ ପୁରସେଲ୍‌ ଏବଂ ସାଭିଲେ ୩୧୦୦ ଡଲାରର ପୁରସ୍କାର ରାଶି ସହିତ ୮୦ ଏଟିପି ପଏଣ୍ଟ  ହାସଲ କରିଛନ୍ତି ।

ବିଜେପି ବିଧାୟକ ଦୁର୍ଯ୍ୟୋଧନ ମାଝୀ ବିଜେପିରୁ ଇସ୍ତଫା ଦେଇଛନ୍ତି । ସେ ଦଳର ପ୍ରାଥମିକ ସଦସ୍ୟ ପଦରୁ ମଧ୍ୟ ଇସ୍ତଫା ଦେଇଛନ୍ତି। ସେ ତାଙ୍କର ଇସ୍ତଫା ପତ୍ର ଦଳର ରାଜ୍ୟ ସଭାପତି ବସନ୍ତ ପଣ୍ଡାଙ୍କ ନିକଟକୁ ପଠାଇ ଦେଇଛନ୍ତି। ଶ୍ରୀ ମାଝୀ ଏବେ ଖଡ଼ିଆଳ ବିଧାନସଭା ଆସନରୁ ପ୍ରତିନିଧିତ୍ୱ କରୁଛନ୍ତି। ସେ ୨୦୧୪ ମସିହାରେ ବିଜେଡି ଛାଡ଼ି ବିଜେପିରୁ ପ୍ରାର୍ଥୀ ହୋଇଥିଲେ। ଚଳିତ ଥର ବିଧାୟକ ଶ୍ରୀ ମାଝୀଙ୍କ ବଦଳରେ ପୂର୍ବତନ ବିଧାୟକ ହିତେଶ ବଗର୍ତ୍ତୀଙ୍କ ପତ୍ନୀ ରୀତାରାଣୀଙ୍କୁ ବିଜେପି ତରଫରୁ ପ୍ରାର୍ଥୀ କରାଯାଇଛି। ଏହାକୁ ବିରୋଧ କରି ଦଳରୁ ଶ୍ରୀମାଝୀ ଇସ୍ତଫା ଦେଇଛନ୍ତି। ଶ୍ରୀ ମାଝୀ ଏଥର ନିଜ ପୁଅଙ୍କୁ ବିଜେପିରୁ ପ୍ରାର୍ଥୀ କରିବାକୁ ଚାହୁଁଥିଲେ। ତେବେ ଦୁର୍ଯ୍ୟୋଧନଙ୍କୁ ଟିକେଟ ନ ଦେବା ପ୍ରସଙ୍ଗରେ ରାଜ୍ୟ ସଭାପତି ବସନ୍ତ ପଣ୍ଡା କହିଛନ୍ତି ଯେ, ଦଳ ତରଫରୁ ୮୦ ବୟସରୁ ଅଧିକ ବୟସ୍କଙ୍କୁ ଟିକେଟ ନ ଦେବାର ନିଷ୍ପତ୍ତି କରାଯାଇଛି  ।

ବୋହୂକୁ ନେଇ ଉତ୍ତେଜନା ।  ଭଦ୍ରକ ଜିଲ୍ଲା ବାସୁଦେବପୁରର କଷିଆ ସାମୁଦ୍ରିକ ଥାନାରେ ପଶି ଉତ୍ତ୍ୟକ୍ତ ଲୋକମାନେ ଭଙ୍ଗାରୁଜା କରିଛନ୍ତି। ସେମାନେ ପୁଲିସ୍‌ର ପାଟ୍ରୋଲିଂ ଗାଡ଼ିକୁ ଭାଙ୍ଗି ଦେଇଛନ୍ତି। ଏହାସହ ଥାନା ଭିତରେ ଥିବା ଆସବାବପାତ୍ର ଭାଙ୍ଗିବା ସହ କାଗଜପତ୍ର ଓ କମ୍ପ୍ୟୁଟର ଫିଙ୍ଗା ଫୋଫଡ଼ା କରିଛନ୍ତି। ବାପଘରୁ ବୋହୂ ନ ଫେରିବାକୁ କେନ୍ଦ୍ର କରି ଏହି ଗଣ୍ଡଗୋଳ ହୋଇଛି। ଗତ ଛଅ ମାସ ତଳେ ପାରାପୋଖରୀ ଗାଁର ଝିଅ ବିନୋବାଭାବେ ନଗରର ଜଣେ ପୁଅକୁ ପ୍ରେମ ବିବାହ କରିଥିଲେ। ଏହି ପ୍ରେମ ବିବାହକୁ ନେଇ ଦୁଇ ଗାଁ ମଧ୍ୟରେ ତିକ୍ତତା ସୃଷ୍ଟି ହୋଇଥିଲା। ପୁଲିସର ମଧ୍ୟସ୍ଥତାରେ ଦୁଇ ଗାଁର ଗଣ୍ଡଗୋଳ ଥାନାରେ ସମାଧାନ ହୋଇଥିଲା। ଗତକାଲି ଝିଅ ବାପ ଘର(ପାରାପୋଖରୀ)କୁ ଯାଇଥିଲା। ହେଲେ ରାତିରେ ଶ୍ଵଶୁର ଘରକୁ ଫେରିଲା ବେଳେ ବିଳମ୍ବ ହୋଇଥିଲା। ଏହାକୁ ନେଇ ଶଶୁର ଘର ଲୋକେ ଅସନ୍ତୋଷ ପ୍ରକାଶ କରିଥିଲେ। ଏହି କଥାକୁ ଉଭୟଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା।  ଆଜି ପୁଣି ପୂର୍ବ ତିକ୍ତତାକୁ ନେଇ ଉଭୟଙ୍କ ଗାଁ ମଧ୍ୟରେ ଗଣ୍ଡଗୋଳ ହୋଇଥିଲା। ପୁଲିସ୍‌ ମାମଲା ବୁଝିବାରେ ବିଳମ୍ବ କରିଥିବା ନେଇ ବିନୋବାଭାବେ ନଗର ଗାଁର ଲୋକେ ଥାନାରେ ପଶି ଭଙ୍ଗାରୁଜା କରିଥିଲେ।