ଗଞ୍ଜାମ: ଗଭୀର ଅବପାତ ପ୍ରଭାବରେ ଗଞ୍ଜାମ ଜିଲ୍ଲାରେ ତୁହାକୁ ତୁହା ଲଗାଣ ବର୍ଷା ଜାରି ରହିଛି। ଲଗାଣ ବର୍ଷା ଯୋଗୁଁ ଜିଲ୍ଲାର ପ୍ରମୁଖ ନଦୀ ଋଷିକୁଲ୍ୟା, ବଡ଼ନଦୀ, ବାଘୁଆ ଓ ଘୋଡ଼ାହାଡ଼ରେ ଜଳସ୍ତର କ୍ରମାଗତ ଭାବେ ବଢ଼ୁଛି। ବିଶେଷ କରି ଗଞ୍ଜାମର ଲାଇଫଲାଇନ୍ ଭାବେ ପରିଚିତ ଋଷିକୁଲ୍ୟା ନଦୀରେ ବନ୍ୟା ଆଶଙ୍କା ବଢ଼ିଛି।
ଋଷିକୁଲ୍ୟା ନଦୀର ଉପରମୁଣ୍ଡରେ ଥିବା ଜାନିବିଲି ଆନିକଟରେ ବିପଦ ସଙ୍କେତ ୧୪ ଫୁଟ ରହିଥିବାବେଳେ ରାତିରେ ସେଠାରେ ୧୩ ଫୁଟ ୪ ଇଞ୍ଚ ବନ୍ୟାଜଳ ପ୍ରବାହିତ ହେଉଥିଲା। ସେହିପରି ଆସିକାରେ ବିପଦ ସଙ୍କେତ ୬ ଫୁଟ ୭ ଇଞ୍ଚ ଥିବା ବେଳେ ୪ ଫୁଟ ଉଚ୍ଚତାରେ ଜଳ ପ୍ରବାହିତ ହେଉଛି । ତେବେ ଆସିକାର କିଛି ଅଞ୍ଚଳରେ ଋଷିକୁଲ୍ୟା ନଦୀର ପାଣି ପଶିଥିବା ସୂଚନା ମିଳିଛି।
ଅନ୍ୟପଟେ ବଡ଼ନଦୀ, ବାଘୁଆ ଓ ଘୋଡ଼ାହାଡ଼ ନଦୀରେ ମଧ୍ୟ ଜଳସ୍ତର ବଢ଼ିବାରୁ ସ୍ଥିତି ଜଟିଳ ହେବା ଆଶଙ୍କା ଦେଖାଦେଇଛି। ସେରଗଡ଼ କୁମାରପାଣି ସ୍କୁଲ ପରିସରରେ ନଦୀପାଣି ପଶିଥିବା ବେଳେ ସେରଗଡ଼ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ପରିସରରେ ମଧ୍ୟ ପାଣି ଜମିଛି।
ଲଗାଣ ବର୍ଷାରେ ଧରାକୋଟ ବ୍ଲକର ଅନେକ ଉପାନ୍ତ ଗାଁର ଲୋକେ ଦୁର୍ଦ୍ଦଶା ଭୋଗୁଛନ୍ତି। କେତେକ ଗାଁର ଲୋକଙ୍କୁ ପ୍ରଶାସନ ପକ୍ଷରୁ ଆଶ୍ରୟସ୍ଥଳୀକୁ ସ୍ଥାନାନ୍ତର କରାଯାଇ ରନ୍ଧାଖାଦ୍ୟ ଯୋଗାଇ ଦିଆଯାଉଛି।
ଭଳିଆଗୁଡ଼ା ଗାଁରେ ଗର୍ଭବତୀ ମହିଳା ଓ କିଛି ଶିଶୁ ଅସୁସ୍ଥ ଥିବା ଖବର ପାଇବା ପରେ ଧରାକୋଟରୁ ଏକ ଡାକ୍ତରୀ ଦଳ ଗାଁରେ ପହଞ୍ଚି ଚିକିତ୍ସା ଯୋଗାଇଛନ୍ତି। ଏହାସହ ଆବଶ୍ୟକ ସ୍ୱାସ୍ଥ୍ୟସେବା ପାଇଁ ପ୍ରଶାସନ ଓ ସ୍ୱାସ୍ଥ୍ୟ ବିଭାଗ ନଜର ରଖିଛି।
ସେପଟେ ଋଷିକୁଲ୍ୟା ନଦୀର ଉପରମୁଣ୍ଡରେ ଏବେ ବି ବର୍ଷା ଜାରି ରହିଥିବାରୁ ଯେକୌଣସି ସମୟରେ ବନ୍ୟାଜଳ ଗାଁ ଭିତରକୁ ପଶିବା ଆଶଙ୍କା ରହିଛି। ଏହାକୁ ନଜରରେ ରଖି ସେରଗଡ଼ ବ୍ଲକ ବ୍ରାହ୍ମଣଛାଇ ଗାଁର ଲୋକେ ରାତି ଅନିଦ୍ରା ହୋଇ ପାଳି କରି ଜଗି ରହିଛନ୍ତି। ନଦୀର ଜଳସ୍ତର ଓ ବର୍ଷା ପରିସ୍ଥିତି ଉପରେ ପ୍ରଶାସନ ନଜର ରଖିଥିବା ବେଳେ ଲୋକଙ୍କ ମଧ୍ୟରେ ବନ୍ୟା ଭୟ ବଢ଼ିଛି।