ନୂଆଦିଲ୍ଲୀ: କେନ୍ଦ୍ର ଗୃହ ତଥା ସମବାୟ ମନ୍ତ୍ରୀ ଅମିତ ଶାହ ଦେହରାଦୁନଠାରେ ଆୟୋଜିତ ଉତ୍ତରାଖଣ୍ଡ ରାଜ୍ୟ ପ୍ରତିଷ୍ଠା ଦିବସ ସମାରୋହକୁ ସମ୍ବୋଧିତ କରିଛନ୍ତି। ଏହି ଅବସରରେ ଉତ୍ତରାଖଣ୍ଡର ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମୀଙ୍କ ସମେତ ଅନେକ ବିଶିଷ୍ଟ ବ୍ୟକ୍ତିବିଶେଷ ଉପସ୍ଥିତ ଥିଲେ।
ଏହି ଅବସରରେ ଜନସମାବେଶକୁ ସମ୍ବୋଧିତ କରି ଅମିତ ଶାହ କହିଥିଲେ ଯେ, ଆଜି ଆମର ଶ୍ରଦ୍ଧେୟ ସ୍ୱର୍ଗତ ନେତା ଅଟଳ ବିହାରୀ ବାଜପେୟୀଙ୍କୁ ସ୍ମରଣ କରିବା ସହ ତାଙ୍କ ପ୍ରତି କୃତଜ୍ଞତା ଜଣାଇବାର ଦିନ। ଦୀର୍ଘ ବର୍ଷ ଧରି ଏହି ଅଞ୍ଚଳର ଜନସାଧାରଣ ସ୍ୱତନ୍ତ୍ର ଉତ୍ତରାଖଣ୍ଡ ରାଜ୍ୟ ଗଠନ ପାଇଁ ସଂଘର୍ଷ କରିଆସୁଥିଲେ। କିନ୍ତୁ ବିରୋଧୀ ଦଳର ସରକାରମାନେ ରାଜ୍ୟ ଗଠନ ଦାବିକୁ ପୂରଣ ହେବାକୁ ଦେଇନଥିଲେ। ଶେଷରେ ତତ୍କାଳୀନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ୯ ନଭେମ୍ବର ୨୦୦୦ରେ ଉତ୍ତରାଖଣ୍ଡ ରାଜ୍ୟ ଗଠନ କରି ଲୋକଙ୍କ ଦୀର୍ଘଦିନର ଏହି ଦାବି ପୂରଣ କରିଥିଲେ।
ଅମିତ ଶାହ କହିଛନ୍ତି ଯେ, ଅଟଳ ବିହାରୀ ବାଜପେୟୀ ଉତ୍ତରାଖଣ୍ଡ ରାଜ୍ୟ ଗଠନ କରିଥିବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହାର ରୂପାନ୍ତରଣ ଓ ବିକାଶ ଦିଗରେ କାର୍ଯ୍ୟ କରିଛନ୍ତି। ବିକଶିତ ଉତ୍ତରାଖଣ୍ଡ ହେଉଛି ବିକଶିତ ଭାରତ ଗଠନ ଯାତ୍ରାର ପ୍ରଥମ ମାଇଲଖୁଣ୍ଟ। ସେ କହିଛନ୍ତି ଯେ, ଆମ ସରକାର ଉତ୍ତରାଖଣ୍ଡ ରାଜ୍ୟ ପ୍ରତିଷ୍ଠା ଦିବସକୁ ଗର୍ବ, ଉପଲବ୍ଧି ଓ ସଂକଳ୍ପର ଅବସର ଭାବେ ପାଳନ କରିବାକୁ ନିଷ୍ପତ୍ତି ନେଇଛନ୍ତି। ଆମେ ଉତ୍ତରାଖଣ୍ଡର ଏହି ଦିବ୍ୟଭୂମି ଏବଂ ଆମର ଶ୍ରଦ୍ଧେୟ ଅଟଳ ବିହାରୀ ବାଜପେୟୀଙ୍କ ଦ୍ୱାରା ରାଜ୍ୟ ଗଠନ ପାଇଁ ନିଆଯାଇଥିବା ନିଷ୍ପତ୍ତିକୁ ନେଇ ଗର୍ବିତ।
ସେହିପରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମୀଙ୍କ ନେତୃତ୍ୱରେ ବିକଶିତ ଉତ୍ତରାଖଣ୍ଡ ଗଠନ ଦିଗରେ ହେଉଥିବା ପ୍ରଗତି ପାଇଁ ମଧ୍ୟ ଆମେ ଗର୍ବିତ। ସେ ଆହୁରି କହିଛନ୍ତି ଯେ, ୨୦୪୭ ସୁଦ୍ଧା ବିକଶିତ ଭାରତ ଗଠନ ଯାତ୍ରାରେ ଦେବଭୂମି ଉତ୍ତରାଖଣ୍ଡକୁ ପ୍ରଥମ ବିକଶିତ ରାଜ୍ୟ ଭାବେ ଗଢ଼ି ତୋଳିବା ପାଇଁ ଆମେ ସଂକଳ୍ପବଦ୍ଧ।
କେନ୍ଦ୍ର ଗୃହମନ୍ତ୍ରୀ ଆହୁରି କହିଛନ୍ତି ଯେ, ଆଜି ହେଉଛି ଭାରତମାତାଙ୍କ ସେବା ଓ ସୁରକ୍ଷା ପାଇଁ ସର୍ବୋଚ୍ଚ ବଳିଦାନ ଦେଇଥିବା ଦେବଭୂମିର ଲୋକମାନେ ଏବଂ ଯୁବପିଢ଼ିଙ୍କ ସ୍ୱପ୍ନ ପୂରଣ କରିବା ପାଇଁ ସଂକଳ୍ପ ନେବାର ଦିନ। ଉତ୍ତରାଖଣ୍ଡକୁ ଏକ ବିକଶିତ ରାଜ୍ୟରେ ପରିଣତ କରିବା ସହ ଏହାର ସାଂସ୍କୃତିକ ଐତିହ୍ୟ ଓ ପରିବେଶର ସୁରକ୍ଷା ପାଇଁ ଆମକୁ ସଂକଳ୍ପ ନେବାକୁ ହେବ। ଏଥିସହ ଦେଶପ୍ରେମ ଓ ବୀରତ୍ୱର ପଥ ଅନୁସରଣ କରିବା ପାଇଁ ଯୁବପିଢ଼ିଙ୍କୁ ପ୍ରେରିତ କରିବାକୁ ମଧ୍ୟ ସଂକଳ୍ପବଦ୍ଧ ହେବା ଆବଶ୍ୟକ।
ଅମିତ ଶାହ କହିଛନ୍ତି ଯେ, କେନ୍ଦ୍ରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଉତ୍ତରାଖଣ୍ଡରେ ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମୀଙ୍କ ନେତୃତ୍ୱରେ ରାଜ୍ୟର ବିକାଶ ପାଇଁ ପ୍ରୟାସ ଜାରି ରହିଛି। ଗତ ୧୦ ବର୍ଷ ଧରି ଉତ୍ତରାଖଣ୍ଡର ବିକାଶ ଯେପରି ନିରବଚ୍ଛିନ୍ନ ଭାବେ ଜାରି ରହିବ, ଆମ ସରକାର ତାହା ସୁନିଶ୍ଚିତ କରିଛନ୍ତି। ସେ କହିଛନ୍ତି ଯେ, ଆଜି ଏହି ତୁଳନାତ୍ମକ ଭାବେ ଛୋଟ ରାଜ୍ୟରେ ମୋଟ ୧,୫୦୮ କୋଟି ଟଙ୍କା ବ୍ୟୟରେ ୬୩ଟି ବିକାଶମୂଳକ ପ୍ରକଳ୍ପର ଶିଳାନ୍ୟାସ ଓ ଉଦ୍ଘାଟନ କରାଯାଇଛି। ସେ ଆହୁରି କହିଛନ୍ତି ଯେ, ଆଜି ୧୫ ଜଣ ବ୍ୟକ୍ତିଙ୍କୁ ‘ଉତ୍ତରାଖଣ୍ଡ ଗୌରବ ସମ୍ମାନ’, ୬ ଜଣଙ୍କୁ ‘ରାଜ୍ୟ ବୀରତ୍ୱ ପୁରସ୍କାର’ ଏବଂ ୨ ଜଣଙ୍କୁ ‘ଜୀବନବ୍ୟାପୀ ସାଧନା ସମ୍ମାନ’ ପ୍ରଦାନ କରାଯିବ। ଉତ୍ତରାଖଣ୍ଡକୁ ଏକ ମହାନ ରାଜ୍ୟ ଭାବେ ଗଢ଼ି ତୋଳିବାରେ ଉଲ୍ଲେଖନୀୟ ଅବଦାନ ରଖିଥିବା ବ୍ୟକ୍ତିବିଶେଷଙ୍କୁ ଚିହ୍ନଟ କରି ସମ୍ମାନିତ କରିବାରେ ଆମ ସରକାର ଗର୍ବ ଅନୁଭବ କରେ ବୋଲି ଏହି ସମ୍ମାନଗୁଡ଼ିକ ପ୍ରତିଫଳିତ କରୁଛି।
କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ, ୨୦୨୨ ମସିହାଠାରୁ ଉତ୍ତରାଖଣ୍ଡର ମୋଟ ରାଜ୍ୟ ଘରୋଇ ଉତ୍ପାଦ (ଜିଏସ୍ଡିପି) ୫୦ ପ୍ରତିଶତ ବୃଦ୍ଧି ପାଇଛି। ଜିଏସ୍ଡିପି ଏକ ରାଜ୍ୟର ଅର୍ଥନୈତିକ ଅଭିବୃଦ୍ଧିର ସୂଚକ ହୋଇଥିବା ବେଳେ ରାଜ୍ୟର ବିକାଶ ସହିତ ଏହାର ନାଗରିକମାନଙ୍କ ସମୃଦ୍ଧି ମଧ୍ୟ ବୃଦ୍ଧି ପାଇବା ଆବଶ୍ୟକ। ଉତ୍ତରାଖଣ୍ଡର ମୁଣ୍ଡପିଛା ଆୟ ୪୦ ପ୍ରତିଶତ ବୃଦ୍ଧି କରିବା ଦିଗରେ ଆମ ସରକାର କାର୍ଯ୍ୟ କରିଛନ୍ତି। ସେ କହିଛନ୍ତି ଯେ, ଗ୍ଲୋବାଲ୍ ଇନଭେଷ୍ଟମେଣ୍ଟ ସମିଟ୍ ଜରିଆରେ ଉତ୍ତରାଖଣ୍ଡକୁ ୩.୫୬ ଲକ୍ଷ କୋଟି ଟଙ୍କାର ନିବେଶ ପ୍ରସ୍ତାବ ମିଳିଛି। ଏଥିମଧ୍ୟରୁ ୧ ଲକ୍ଷ କୋଟି ଟଙ୍କାର ଶିଳ୍ପ ପ୍ରକଳ୍ପ ଏବେ ସୁଦ୍ଧା ବାସ୍ତବ ରୂପ ନେଇଛି ଏବଂ ସେଗୁଡ଼ିକରେ କାର୍ଯ୍ୟ ଆରମ୍ଭ ହୋଇଛି। ସୀମିତ ସମୟ, ରାଜ୍ୟର ତୁଳନାତ୍ମକ ଭାବେ ଛୋଟ ଆକାର ଏବଂ ଶିଳ୍ପ ବିକାଶ ସହ ଜଡ଼ିତ ଅନେକ ଆହ୍ୱାନ ସତ୍ତ୍ୱେ ଧାମୀ ସରକାର ୧ ଲକ୍ଷ କୋଟି ଟଙ୍କାର ନିବେଶକୁ ବାସ୍ତବ ଶିଳ୍ପ ପ୍ରକଳ୍ପରେ ପରିଣତ କରିବାରେ ସଫଳ ହୋଇଛନ୍ତି।
ଅମିତ ଶାହ କହିଛନ୍ତି ଯେ, ଉତ୍ତରାଖଣ୍ଡ ହେଉଛି ଦେଶର ପ୍ରଥମ ରାଜ୍ୟ ଯେଉଁଠାରେ ସମାନ ନାଗରିକ ସଂହିତା (ୟୁସିସି) ତ୍ରୂଣମୂଳସ୍ତରରେ ଲାଗୁ କରାଯାଇଛି। ସେ କହିଛନ୍ତି ଯେ, ଏହା କାର୍ଯ୍ୟକାରୀ ହେବା ପରେ, ଉତ୍ତରାଖଣ୍ଡରେ କେହି ଏବେ ଏକାଧିକ ବିବାହ କରିପାରିବେ ନାହିଁ ଏବଂ କୌଣସି ମହିଳାଙ୍କୁ ତିନି ତଲାକର ଅପମାନ କରାଯାଇପାରିବ ନାହିଁ। ସେ ଆହୁରି କହିଛନ୍ତି ଯେ, ଉତ୍ତରାଖଣ୍ଡର ଉଦାହରଣକୁ ଅନୁସରଣ କରି, ଦେଶର ୧୫ଟି ରାଜ୍ୟ ଏବେ ୟୁସିସି ଲାଗୁ କରିବା ଦିଗରେ ଆଗକୁ ବଢ଼ିଛନ୍ତି। ଆମ ସରକାର ଆମ ଦଳ ଦ୍ୱାରା ଶାସିତ ସମସ୍ତ ରାଜ୍ୟରେ ୟୁସିସି ଲାଗୁ କରିବ।
ସେ କହିଛନ୍ତି ଯେ, ଉତ୍ତରାଖଣ୍ଡରେ ଏପରି ଏକ କଠୋର ନକଲ ବିରୋଧୀ ଆଇନ ପ୍ରଣୟନ କରାଯାଇଛି, ଯାହା ଅନୁଯାୟୀ ପରୀକ୍ଷାରେ ନକଲ କରୁଥିବା, ନକଲ କରିବାରେ ସହାୟତା କରୁଥିବା କିମ୍ବା ପ୍ରଶ୍ନପତ୍ର ଲିକ୍ରେ ସମ୍ପୃକ୍ତ ଥିବା ବ୍ୟକ୍ତିଙ୍କୁ ଅଦାଲତ ତ୍ୱରିତ ଦଣ୍ଡିତ କରିପାରିବେ। ସେ ଆହୁରି କହିଛନ୍ତି ଯେ ୩୫,୦୦୦ ଲୋକଙ୍କୁ କୌଣସି ସୁପାରିଶ କିମ୍ବା ପକ୍ଷପାତିତା ବିନା ସରକାରୀ ଚାକିରି ଯୋଗାଇ ଦିଆଯାଇଛି। ସେ ଏହା ମଧ୍ୟ କହିଛନ୍ତି ଯେ, ଉତ୍ତରାଖଣ୍ଡରେ ଧର୍ମାନ୍ତରୀକରଣ ବିରୋଧୀ ଆଇନ ମଧ୍ୟ ଲାଗୁ କରାଯାଇଛି, ଯାହା ଫଳରେ ରାଜ୍ୟରେ ଧର୍ମ ପରିବର୍ତ୍ତନ ଅସମ୍ଭବ ହୋଇପଡ଼ିଛି।
କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ, ଗତ ୧୦ ବର୍ଷ ମଧ୍ୟରେ ଆମ ସରକାର ଉତ୍ତରାଖଣ୍ଡରେ ଅନେକ ପ୍ରମୁଖ ବିକାଶମୂଳକ ପଦକ୍ଷେପ ଗ୍ରହଣ କରିଛନ୍ତି। ଏଥିମଧ୍ୟରେ ଦିଲ୍ଲୀ-ଡେରାଡୁନ୍ ଇକୋନୋମିକ୍ କରିଡର, ଚାରଧାମ ଅଲ୍ ୱେଦର ରୋଡ୍ ପ୍ରକଳ୍ପ, ଋଷିକେଶ-କର୍ଣ୍ଣପ୍ରୟାଗ ରେଳପଥ, ଟନକପୁର-ବାଗେଶ୍ୱର ରେଳପଥ ଏବଂ କେଦାରନାଥ ଓ ହେମକୁଣ୍ଡ ସାହିବରେ ରୋପୱେ ପ୍ରକଳ୍ପ ଅନ୍ତର୍ଭୁକ୍ତ। ସେ ଅନ୍ୟାନ୍ୟ ଅନେକ ପଦକ୍ଷେପ ସମ୍ପର୍କରେ ମଧ୍ୟ ଉଲ୍ଲେଖ କରିଛନ୍ତି।
ସେଗୁଡ଼ିକ ମଧ୍ୟରେ ସୋଙ୍ଗ, ଜମରାଣୀ ଓ କିଶାଉ ବହୁମୁଖୀ ନଦୀବନ୍ଧ ପ୍ରକଳ୍ପ, ଅନେକ ପାନୀୟ ଜଳ, ଜଳସେଚନ ଓ ଶକ୍ତି ପ୍ରକଳ୍ପ, ସରକାରୀ ଚାକିରିରେ ମହିଳାଙ୍କ ପାଇଁ ୩୦ ପ୍ରତିଶତ ସଂରକ୍ଷଣ, ସମବାୟ ସମିତିଗୁଡ଼ିକରେ ମହିଳାଙ୍କ ପାଇଁ ୩୩ ପ୍ରତିଶତ ସଂରକ୍ଷଣ, ୩ ଲକ୍ଷରୁ ଅଧିକ ଲକ୍ଷପତି ଦିଦି ସୃଷ୍ଟି, ହୋମ୍ଷ୍ଟେ ଯୋଜନା, ରାଜ୍ୟ ଗଠନ ଆନ୍ଦୋଳନକାରୀଙ୍କ ପାଇଁ ୧୦ ପ୍ରତିଶତ ସଂରକ୍ଷଣ ଏବଂ ସହିଦଙ୍କ ପରିବାରକୁ ଦିଆଯାଉଥିବା ଅନୁକମ୍ପାମୂଳକ ସହାୟତା ରାଶି ୧୦ ଲକ୍ଷ ଟଙ୍କାରୁ ୫୦ ଲକ୍ଷ ଟଙ୍କାକୁ ବୃଦ୍ଧି ଆଦି ଅନ୍ତର୍ଭୁକ୍ତ। ସେ ଆହୁରି କହିଛନ୍ତି ଯେ, ସରକାର କିଚ୍ଛାଠାରେ ଏମ୍ସର ଏକ ସାଟେଲାଇଟ୍ କେନ୍ଦ୍ର ପ୍ରତିଷ୍ଠା କରିବା ସହ ଏକ ଶିଳ୍ପ ସ୍ମାର୍ଟ ସିଟି ବିକଶିତ କରିଛନ୍ତି। ଭାଇବ୍ରାଣ୍ଟ ଭିଲେଜେସ୍ କାର୍ଯ୍ୟକ୍ରମ ଅଧୀନରେ ୫୧ଟି ସୀମାନ୍ତବର୍ତ୍ତୀ ଗ୍ରାମରେ ୨୭୦ କୋଟି ଟଙ୍କାର ବିକାଶମୂଳକ କାର୍ଯ୍ୟ କରାଯାଇଛି। ସେହିପରି ସ୍ଥାନୀୟ ଭାବେ ଉତ୍ପାଦିତ ହିମାଳୟ ଓ ପାରମ୍ପରିକ ପାହାଡ଼ିଆ ଉତ୍ପାଦଗୁଡ଼ିକୁ ଦେଶର ପ୍ରତ୍ୟେକ କୋଣରେ ପହଞ୍ଚାଇବା ପାଇଁ ‘ହାଉସ୍ ଅଫ୍ ହିମାଳୟାସ୍’ ଏବଂ ‘ମିଲେଟ୍ ମିଶନ’ ଭଳି ପଦକ୍ଷେପ ଆରମ୍ଭ କରାଯାଇଛି। ସେ କହିଛନ୍ତି ଯେ, ବିରୋଧୀ ଦଳର ସରକାର କେବଳ ଗୋଟିଏ କାର୍ଯ୍ୟ କରିଥିଲେ, ତାହା ହେଉଛି ଉତ୍ତରାଖଣ୍ଡ ରାଜ୍ୟ ଗଠନକୁ ରୋକିବା।
ଅମିତ ଶାହ କହିଛନ୍ତି ଯେ, ଆଗାମୀ ନିର୍ବାଚନରେ ଉତ୍ତରାଖଣ୍ଡବାସୀଙ୍କୁ ନିଷ୍ପତ୍ତି ନେବାକୁ ହେବ ଯେ, ସେମାନେ ବିକାଶମୂଳକ କାର୍ଯ୍ୟ କରୁଥିବା ଆମ ଦଳର ନେତୃତ୍ୱାଧୀନ ସରକାର ଚାହୁଛନ୍ତି ନା ଦୁର୍ନୀତିରେ ଲିପ୍ତ ବିରୋଧୀ ଦଳର ନେତୃତ୍ୱାଧୀନ ସରକାର ଚାହୁଛନ୍ତି। ସେ କହିଛନ୍ତି ଯେ, ଦୀର୍ଘ ବର୍ଷ ଧରି ମୁଖ୍ୟ ବିରୋଧୀ ଦଳ ଉତ୍ତରାଖଣ୍ଡକୁ ‘ମନି ଅର୍ଡର ଅର୍ଥନୀତି’ ଏବଂ ପ୍ରବାସ ଉପରେ ନିର୍ଭରଶୀଳ କରି ରଖିଥିଲା। ପାହାଡ଼ିଆ ଅଞ୍ଚଳର ଜଳ ସମ୍ପଦରୁ ସେଠାକାର ଲୋକମାନେ ଯେପରି କୌଣସି ଲାଭ ପାଇପାରିବେ ନାହିଁ, ସେହିଭଳି ନୀତି ପ୍ରଣୟନ କରାଯାଇଥିଲା। ସେ କହିଛନ୍ତି ଯେ, ଆମ ସରକାର ପ୍ରବାସ ରୋକିବା ସହ ‘ମନି ଅର୍ଡର ଅର୍ଥନୀତି’ ବଦଳରେ ରାଜ୍ୟ ମଧ୍ୟରେ ସମ୍ପଦ ସୃଷ୍ଟି ଓ ଆର୍ଥିକ ସୁଯୋଗ ପ୍ରଦାନ କରୁଥିବା ଶିଳ୍ପଭିତ୍ତିକ ଅର୍ଥନୀତି ପ୍ରତିଷ୍ଠା ପାଇଁ ସମସ୍ତ ପ୍ରକାର ପ୍ରୟାସ କରିଛନ୍ତି। ସେ ଆହୁରି କହିଛନ୍ତି ଯେ, ଉତ୍ତରାଖଣ୍ଡରେ ପର୍ଯ୍ୟଟନ କ୍ଷେତ୍ରରେ ୩୮୦ ପ୍ରତିଶତ ଅଭିବୃଦ୍ଧି ଘଟିଛି।
କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ, ବିରୋଧୀ ଦଳର ସରକାର ଉତ୍ତରାଖଣ୍ଡରେ ରାସ୍ତା ନିର୍ମାଣ କରିନଥିଲେ। ସେମାନଙ୍କ ଯୁକ୍ତି ଥିଲା ଯେ, ରାସ୍ତା ନିର୍ମାଣ ଦ୍ୱାରା ଶତ୍ରୁ ଦେଶ ଭିତରକୁ ପ୍ରବେଶ କରିବାର ସୁଯୋଗ ପାଇବ। ଆମ ସରକାର ରାସ୍ତା ନିର୍ମାଣ କରିଛନ୍ତି ଏବଂ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଦେଶକୁ ଏତେ ସୁଦୃଢ଼ କରିଛନ୍ତି ଯେ, ଏବେ ଭାରତର ସୀମାକୁ ଉଲ୍ଲଂଘନ କରିବାକୁ କେହି ସାହସ କରୁନାହାନ୍ତି। ସେ କହିଛନ୍ତି ଯେ, ଯେତେବେଳେ ବି କେହି ଭାରତର ସୀମା ଉଲ୍ଲଂଘନ କରିବାକୁ ଉଦ୍ୟମ କରିଛନ୍ତି, ମୋଦୀ ସରକାର ସର୍ଜିକାଲ୍ ଷ୍ଟ୍ରାଇକ୍, ଏୟାର ଷ୍ଟ୍ରାଇକ୍ ଏବଂ ‘ଅପରେସନ୍ ସିନ୍ଦୂର’ ମାଧ୍ୟମରେ ଶତ୍ରୁ ଦେଶର ସୀମା ଭିତରେ ପ୍ରବେଶ କରି ଆକ୍ରମଣର ଆଶଙ୍କାକୁ ନିପାତ କରି ଏହାର ଜବାବ ଦେଇଛନ୍ତି।
ସେ ଆହୁରି କହିଛନ୍ତି ଯେ, ପୂର୍ବତନ ବିରୋଧୀ ଦଳର ସରକାରମାନେ ଶତ୍ରୁ ଦେଶର ଭୟରେ ଉତ୍ତରାଖଣ୍ଡକୁ ମୌଳିକ ଭିତ୍ତିଭୂମି ଓ ସୁବିଧାସୁଯୋଗରୁ ବଞ୍ଚିତ କରି ରଖିଥିଲେ। ପୂର୍ବ ସରକାରମାନେ ସୀମାନ୍ତବର୍ତ୍ତୀ ଗ୍ରାମଗୁଡ଼ିକୁ ଦେଶର ଶେଷ ଗ୍ରାମ ଭାବେ ବିବେଚନା କରି ସେଗୁଡ଼ିକୁ ସେମାନଙ୍କ ଭାଗ୍ୟ ଉପରେ ଛାଡ଼ି ଦେଇଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ସୀମାନ୍ତବର୍ତ୍ତୀ ଗ୍ରାମଗୁଡ଼ିକୁ ଦେଶର ‘ପ୍ରଥମ ଗ୍ରାମ’ ଭାବେ ନୂତନ ପରିଚୟ ଦେବା ସହ ‘ଭାଇବ୍ରାଣ୍ଟ ଭିଲେଜେସ୍ କାର୍ଯ୍ୟକ୍ରମ’ ଆରମ୍ଭ କରିଥିଲେ। ଏହି କାର୍ଯ୍ୟକ୍ରମ ଅଧୀନରେ ୨୭୦ କୋଟି ଟଙ୍କା ବିନିଯୋଗରେ ୫୧ଟି ସୀମାନ୍ତବର୍ତ୍ତୀ ଗ୍ରାମରେ ବିକାଶମୂଳକ ପଦକ୍ଷେପ ଗ୍ରହଣ କରାଯାଇଛି। ଏହା ଫଳରେ ଯୁବପିଢ଼ି ନିଜ ଗ୍ରାମକୁ ଫେରିବା ପାଇଁ ଉତ୍ସାହିତ ହୋଇଛନ୍ତି।
ଅମିତ ଶାହ କହିଛନ୍ତି ଯେ, ବର୍ତ୍ତମାନ ଏସ୍ଆଇଆର୍ (ସ୍ୱତନ୍ତ୍ର ସଘନ ସଂଶୋଧନ) ପ୍ରସଙ୍ଗକୁ ନେଇ ଚର୍ଚ୍ଚା ଚାଲିଛି। ସେ ଅଭିଯୋଗ କରିଛନ୍ତି ଯେ, ବିରୋଧୀ ଦଳର ନେତାଙ୍କ ଅଭିଯାନ ‘ଭୋଟ୍ ବଞ୍ଚାଅ ଅଭିଯାନ’ ନୁହେଁ, ବରଂ ‘ଅନୁପ୍ରବେଶକାରୀ ବଞ୍ଚାଅ ଅଭିଯାନ’। ସେ ଉତ୍ତରାଖଣ୍ଡବାସୀଙ୍କୁ ପ୍ରଶ୍ନ କରିଛନ୍ତି ଯେ, ଭୋଟର ତାଲିକାକୁ ଅନୁପ୍ରବେଶକାରୀଙ୍କ ମୁକ୍ତ କରାଯିବା ଉଚିତ କି ନୁହେଁ ଏବଂ ଦେବଭୂମି ଉତ୍ତରାଖଣ୍ଡ ତଥା ଭାରତରୁ ପ୍ରତ୍ୟେକ ଅନୁପ୍ରବେଶକାରୀଙ୍କୁ ବହିଷ୍କାର କରାଯିବା ଉଚିତ କି ନୁହେଁ। ବିରୋଧୀ ଦଳର ନେତା ପ୍ରଚାର କରୁଥିବା ମିଥ୍ୟା ବୟାନକୁ ଦେଶବାସୀ ଗ୍ରହଣ କରିବେ ନାହିଁ ବୋଲି ସେ କହିଛନ୍ତି।
ସେ ଆହୁରି ଅଭିଯୋଗ କରିଛନ୍ତି ଯେ, ବିରୋଧୀ ଦଳଗୁଡ଼ିକ ସେମାନଙ୍କର ତୁଷ୍ଟୀକରଣ ରାଜନୀତି ପରିତ୍ୟାଗ କରିବାକୁ ଚାହୁନାହାନ୍ତି। ସେମାନେ ରାମ ମନ୍ଦିର ନିର୍ମାଣକୁ ବିରୋଧ କରୁଥିଲେ, ଅନୁପ୍ରବେଶକୁ ପ୍ରଶ୍ରୟ ଦେଉଥିଲେ ଏବଂ ଜନସଂଖ୍ୟାଗତ ପରିବର୍ତ୍ତନକୁ ପ୍ରୋତ୍ସାହନ ଦେଉଥିବା ନୀତି ଅନୁସରଣ କରୁଥିଲେ। ଆମ ଦଳର ସରକାର ଏହି ସମସ୍ତ ପ୍ରଥାର ଅନ୍ତ ଘଟାଇଛନ୍ତି ବୋଲି ସେ କହିଛନ୍ତି।
ଅମିତ ଶାହ କହିଛନ୍ତି ଯେ, ଗତ ୧୦ ବର୍ଷ ଧରି ଆମ ଦଳର ସରକାର ଉତ୍ତରାଖଣ୍ଡରେ ଦୁର୍ନୀତିମୁକ୍ତ ଶାସନ ପ୍ରଦାନ କରିଆସିଛନ୍ତି। ସେ ପୂର୍ବତନ ବିରୋଧୀ ଦଳର ସରକାରଙ୍କ ଅମଳରେ ଅନେକ ଦୁର୍ନୀତି ଅଭିଯୋଗ ହୋଇଥିବା କହିଛନ୍ତି। ଏଥିମଧ୍ୟରେ ପୂର୍ବତନ ମୁଖ୍ୟମନ୍ତ୍ରୀଙ୍କୁ ନେଇ ଷ୍ଟିଙ୍ଗ୍ ବିବାଦ, ସଚିବାଳୟକୁ ଦଲାଲଙ୍କ ଆଡ୍ଡାସ୍ଥଳୀରେ ପରିଣତ କରାଯାଇଥିବା ଅଭିଯୋଗ, ଏସ୍ସି-ଏସ୍ଟି ଛାତ୍ରବୃତ୍ତି ଦୁର୍ନୀତି, ମଦ ନୀତି ସମ୍ପର୍କିତ ଷ୍ଟିଙ୍ଗ୍ ଅପରେସନ୍ ଏବଂ କୁମାଓଁ ଖାଦ୍ୟଶସ୍ୟ ଦୁର୍ନୀତି ଆଦି ଅନ୍ତର୍ଭୁକ୍ତ। ଶେଷରେ ସେ କହିଛନ୍ତି ଯେ, ଦେବଭୂମି ଉତ୍ତରାଖଣ୍ଡର ଲୋକଙ୍କ ନିକଟରେ ପ୍ରତ୍ୟେକ ଟଙ୍କା ପହଞ୍ଚାଇବା ସୁନିଶ୍ଚିତ କରିବା ଦିଗରେ ଆମ ଦଳର ସରକାର କାର୍ଯ୍ୟ କରିଛନ୍ତି।
କେନ୍ଦ୍ର ଗୃହମନ୍ତ୍ରୀ କହିଛନ୍ତି ଯେ, ଆସାମ, ଗୁଜରାଟ, ହରିୟାଣା ଏବଂ ମଧ୍ୟପ୍ରଦେଶ ସମେତ ଅନେକ ରାଜ୍ୟରେ ଆମ ଦଳ କ୍ରମାଗତ ତୃତୀୟ ଥର ପାଇଁ ନିର୍ବାଚନୀ ବିଜୟ ହାସଲ କରି ହ୍ୟାଟ୍ରିକ୍ ଅର୍ଜନ କରିଛି। ଏବେ ଦେବଭୂମି ଉତ୍ତରାଖଣ୍ଡର ପାଳି ଆସିଛି, ଯେଉଁଠାରେ ଆମ ଦଳ କ୍ରମାଗତ ତୃତୀୟ ଥର ବିଜୟ ହାସଲ କରିବାକୁ ଲକ୍ଷ୍ୟ ରଖିଛି।
ସେ ସ୍ମରଣ କରାଇ ଦେଇଛନ୍ତି ଯେ, ୨୦୧୭ ବିଧାନସଭା ନିର୍ବାଚନରେ ଆମ ଦଳ ୪୬ ପ୍ରତିଶତ ଭୋଟ୍ ପାଇ ୫୭ଟି ଆସନରେ ବିଜୟୀ ହୋଇଥିଲା। ୨୦୨୨ରେ ଦଳ ୪୪ ପ୍ରତିଶତ ଭୋଟ୍ ପାଇ ୪୭ଟି ଆସନ ଜିତିଥିଲା। ୨୦୨୭ ରେ ଉତ୍ତରାଖଣ୍ଡବାସୀ ୫୦ ପ୍ରତିଶତରୁ ଅଧିକ ଭୋଟ୍ ଏବଂ ୬୦ରୁ ଅଧିକ ଆସନରେ ବିଜୟୀ କରାଇ ରାଜ୍ୟରେ ଆମର ‘ଡବଲ୍ ଇଞ୍ଜିନ୍’ ସରକାରକୁ ପୁନର୍ବାର କ୍ଷମତାକୁ ଆଣିବା ଉଚିତ ବୋଲି ସେ କହିଛନ୍ତି।
ସେ ଆହୁରି କହିଛନ୍ତି ଯେ, ଆମ ଦଳ ଏହି ସୀମାବର୍ତ୍ତୀ ରାଜ୍ୟକୁ ସୁରକ୍ଷିତ ଓ ସମୃଦ୍ଧ କରିବା ସହ ଏହାକୁ ଦେଶର ସାଂସ୍କୃତିକ ରାଜଧାନୀରେ ପରିଣତ କରିବାକୁ ଚାହୁଛି। ଏହି ତିନୋଟି ଲକ୍ଷ୍ୟ ହାସଲ କରିବା ପାଇଁ କ୍ରମାଗତ ତୃତୀୟ ଥର କ୍ଷମତାକୁ ଆସିବା ନିମନ୍ତେ ଆମେ ଜନସାଧାରଣଙ୍କ ଜନାଦେଶ ଓ ଆଶୀର୍ବାଦ କାମନା କରୁଛୁ।