ସମୀକ୍ଷା ବ୍ୟୁରୋ
ବ୍ରହ୍ମପୁର: ବହୁ ପ୍ରତୀକ୍ଷିତ ଗୋପାଳପୁର ବେଳାଭୂମି ମହୋତ୍ସବ ଉଦ୍ଘାଟିତ ହୋଇଯାଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଧିବଦ୍ଧ ଭାବେ ଏହାକୁ ଉଦ୍ଘାଟନ କରିଥିଲେ। ମୁଖ୍ୟମନ୍ତ୍ରୀ ସନ୍ଧ୍ୟା ୪ ଘଣ୍ଟା ସମୟରେ ଗୋପାଳପୁରଠାରେ ଥିବା ଅସ୍ଥାୟୀ ହେଲିପେଡ଼ରେ ଅବତରଣ କରି ସେଠାରୁ ସିଧା କାର୍ଯ୍ୟକ୍ରମ ସ୍ଥଳକୁ ଯାଇଥିଲେ। ଉପସ୍ଥିତ ନେତା, ଅଧିକାରୀଙ୍କ ଗହଣରେ ଗୋପାଳପୁର ମହୋତ୍ସବକୁ ଲୋକଙ୍କ ଉଦ୍ଦେଶ୍ୟରେ ଉଦ୍ଘାଟିତ କରିଥିଲେ। ଏହା ସହ ହର୍ବାଲ ମେଳା ଏବଂ ପଲ୍ଲିଶ୍ରୀ ମେଳାକୁ ମଧ୍ୟ ମୁଖ୍ୟମନ୍ତ୍ରୀ ଉଦ୍ଘାଟନ କରିଛନ୍ତି। ମୁଖ୍ୟମନ୍ତ୍ରୀଙ୍କ ସହ ବାଚସ୍ପତି ସୂର୍ଯ୍ୟନାରାୟଣ ପାତ୍ର ମଧ୍ୟ ଉପସ୍ଥିତ ଥିଲେ।
ସମ୍ମାନିତ ଅତିଥି ରୂପେ ଜଂଗଲ ଓ ପରିବେଶ, ସଂସଦୀୟ ବ୍ୟାପାର ମନ୍ତ୍ରୀ ବିକ୍ରମ କେଶରୀ ଆରୁଖ, ରାଷ୍ଟ୍ରମନ୍ତ୍ରୀ (ସ୍ୱାଧୀନ) ଅଶୋକ ଚନ୍ଦ୍ର ପଣ୍ଡା, ପୋଲସରା ବିଧାୟକ ତଥା ଗଂଜାମ ଯୋଜନା ବୋର୍ଡ଼ ଅଧ୍ୟକ୍ଷ ଶ୍ରୀକାନ୍ତ ସାହୁ, ବ୍ରହ୍ମପୁର ସାଂସଦ ଚନ୍ଦ୍ରଶେଖର ସାହୁ, ଆସିକା ସାଂସଦ ପ୍ରମିଳା ବିଷୋୟୀ, କବିସୂର୍ଯ୍ୟନଗର ବିଧାୟିକା ଲତିକା ପ୍ରଧାନ, ଛତ୍ରପୁର ବିଧାୟକ ସୁବାଷ
ଚନ୍ଦ୍ର ବେହେରା, ପୂର୍ବତନ ଉପବାଚସ୍ପତି ରାମଚନ୍ଦ୍ର ପଣ୍ଡା, ଏମ୍.ଓ. କଲେଜ ଚେୟାରମ୍ୟାନ ଆକାଶ ଦଶନାୟକ, ପୂର୍ବତନ ମନ୍ତ୍ରୀ ତଥା ଚିକିଟି ବିଧାୟିକା ଉଷା ଦେବୀ, ବ୍ରହ୍ମପୁର ବିଧାୟକ ବିକ୍ରମ କୁମାର ପଣ୍ଡା, ଖଲିକୋଟ ବିଧାୟିକା ସୂର୍ଯ୍ୟମଣି ବୈଦ୍ୟ ପ୍ରମୁଖ ଉପସ୍ଥିତ ଥିଲେ।
ପ୍ରଥମ ଦିନରେ ବ୍ରହ୍ମପୁରର ଓଡ଼ିଶୀ ଡ଼୍ୟାନସ, ୱାଉ ଡ଼୍ୟାନସ ଏକାଡ଼େମୀ ବ୍ରହ୍ମପୁରର ମଡ଼ର୍ନ ଡ଼୍ୟାନସ, ହିଂଜିଳିକାଟୁର ଲକ୍ଷ୍ମୀନୃଶିଂହ କଳା ମନ୍ଦିର ପକ୍ଷରୁ ଡ଼୍ୟାନସ, ପ୍ରାରମ୍ଭିକ ସଂଗୀତ ଓଡ଼ିଶୀ ସଂଗୀତ ପରିଷର ବ୍ରହ୍ମପୁରର କଳାକାରମାନେ। ନରେନ୍ଦ୍ରପୁରର ଯୋଡ଼ିଶଂଖ, ବ୍ରହ୍ମପୁର ଗଂଜାମ କଳା ପରିଷଦର ଫକ୍ ଡ଼୍ୟାନସ, ମତ୍ସ୍ୟଜୀବୀଙ୍କ ଲୋକକଳା ପରିବେଷିତ ହୋଇଥିଲା। ଗଂଜାମ ତଥା ଓଡ଼ିଶାର କଳାସଂସ୍କୃତି ସହ ରାଜ୍ୟ ବାହାରୁ ମଧ୍ୟ ଉଚ୍ଚକୋଟିର କଳାସଂସ୍କୃତିକୁ ନିମନ୍ତ୍ରିତ କରାଯାଇଛି। ଯାହାକି ଦର୍ଶକ ଭରପୁର ଉପଭୋଗ କରିବାର ଯୋଜନା ରହିଛି। ଏଠାରେ ସୂଚନାଥାଉକି କୌଣସି କାରଣବଶତଃ ଦୈବ୍ୟଦୁର୍ବିପାକ ପାଇଁ ଗତ ତିନିବର୍ଷ ହେଲା ଏହି ବେଳାଭୂମି ମହୋତ୍ସବ ବନ୍ଦ ଥିଲା। ଯାହାକି ଏହିବର୍ଷ ମୁଖ୍ୟ ଆକର୍ଷଣକୁ ନେଇ ଅତି ସରଗରମ ରୂପେ ଏହି ମହୋତ୍ସବର ଚେୟାରମ୍ୟାନ ତଥା ପୂର୍ବତନ ମନ୍ତ୍ରୀ ତଥା ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀଙ୍କ ତତ୍ତ୍ୱାବଧାନରେ ଗତ ୧୫ ଦିନ ହେଲା ତର୍ଜମା କରି ଏହାର ରୂପରେଖ ଦିଆଯାଇଛି।
ଏହି କାର୍ଯ୍ୟକ୍ରମରେ ବଲିଉଡ଼ର ବହୁ ନାମୀ କଳାକାର ତଥା ଗାୟକ ମାନେ ଆସୁଥିବା ଯୋଗୁଁ ଜିଲ୍ଲା ଏବଂ ଜିଲ୍ଲା ବାହାରୁ ଦର୍ଶକମାନଙ୍କର ସୁଅ ଛୁଟିବାର ଆଶା ରଖାଯାଇଛି। ଜିଲ୍ଲା ପ୍ରଶାସନ ଏବଂ ପୋଲିସ୍ ପ୍ରଶାସନ ଏହି ମହୋତ୍ସବକୁ ପୁଙ୍ଖାନୁପୁଙ୍ଖ ଭାବରେ ନିରୀକ୍ଷଣ କରି ଏକ ସଫଳ ଉତ୍ସବରେ ଭେଟିଦେବା ପାଇଁ ଆଗ୍ରହ ପ୍ରକାଶ କରିଛନ୍ତି। ଉଦ୍ଘାଟନୀ ଉତ୍ସବର ମୁଖ୍ୟ ଆକର୍ଷଣ ବଲିଉଡ଼୍ ଗାୟକ ସୋନୁ ନିଗମ୍ ନିଜର ସଂଗୀତ ମାଧ୍ୟମରେ ଲୋକଙ୍କୁ ମତୁଆଲା କରିଥିଲେ। ସେ ନିଜେ ଗାଇଥିବା ବିଭିନ୍ନ ପ୍ରକାର ଗୀତରେ ଲୋକଙ୍କୁ ବାନ୍ଧି ରଖିଥିଲେ। ପ୍ରବଳ ଶୀତ ସତ୍ତ୍ୱେ ପ୍ରାୟ ୫୦ ହଜାରରୁ ଉର୍ଦ୍ଧ୍ଵ ଦର୍ଶକଙ୍କ ଭିଡ଼ ଜମିଥିବା ଦେଖିବାକୁ ମିଳିଥିଲା।
ମୁଖ୍ୟମନ୍ତ୍ରୀଙ୍କ ଗସ୍ତକୁ ନେଇ ଗୋପାଳପୁର ଅଂଚଳ ପୋଲିସ୍ ଛାଉଣିରେ ପରିବର୍ତ୍ତନ ହୋଇଥିଲା। ପୋଲିସ୍ ବିଭାଗ ପକ୍ଷରୁ ୧୯ ଟି ପାର୍କିଂ ସ୍ଥାନ ଚିହ୍ନଟ କରାଯାଇଛି। ସେ ୧୯ଟି ପାର୍କିଂ ସ୍ଥାନରେ କିଛି ବସ୍ ରହିଥିବାବେଳେ କିଛି ସ୍ଥାନ ହାଲୁକା ଗାଡ଼ି ଯଥା କାର୍ ରହିଥିଲା ଏବଂ ଅନ୍ୟ କିଛି ପାର୍କିଂ ସ୍ଥାନରେ ଦୁଇଚକିଆ ଯାନ ରହିଛି। ପ୍ରତ୍ୟେକ ପାର୍କିଂ ସ୍ଥାନରେ ବୋର୍ଡ଼ ଲଗାଯାଇଛି। ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଥିବା ଏସ୍.ପି ସୂଚନା ଦେଇଥିଲେ। ସମୁଦାୟ ୩୦ ପ୍ଲାଟୁନ୍ ପୋଲିସ୍ ଫୋର୍ସ ନିୟୋଜନ ରହିଛନ୍ତି। ୨୫ ପ୍ଲାଟୁନ୍ ଫୋର୍ସ ବାହାରୁ ଆସିଛନ୍ତି ଏବଂ ୫ ପ୍ଲାଟୁନ୍ ଫୋର୍ସ ଗଂଜାମ ଜିଲ୍ଲାରୁ ରହିଛନ୍ତି। ୨୦୦ ହୋମ୍ଗାର୍ଡ଼କୁ ମଧ୍ୟ ନିୟୋଜିତ କରାଯାଇଛି। ୪ ଜଣ ଅତିରିକ୍ତ ଏସ୍ପି, ୧୦ ଜଣ ଡ଼ିଏସ୍ପି ରହିଛନ୍ତି। ସମୁଦାୟ ରୁଟ୍ କୁ ୮ଟି ସେକ୍ଟରରେ ବିଭକ୍ତ କରାଯାଇଛି। ପ୍ରତି ସେକ୍ଟରର ଗେଟ୍ ପୋଷ୍ଟରେ ଜଣେ ଜଣେ ଇନିସ୍ପେକ୍ଟର ନିୟୋଜିତ ରହି ଆଇନଶୃଙ୍ଖଳା ଏବଂ ଟ୍ରାଫିକ୍ ବ୍ୟବସ୍ଥା ଦେଖିବେ। ପ୍ରତି ଜଙ୍କସନ, ଭିଡ଼, ଛକ, ପାର୍କିଂ ସ୍ଥଳ ଅଂଚଳରେ ୨୦୦ ଟି ସିସି ଟିଭି ମାଧ୍ୟମରେ ଅନୁଧ୍ୟାନ କରାଯାଉଛି। ୧୦ ମୋଟର ସାଇକେଲ୍ ପେଟ୍ରୋଲିଂ ଟିମ୍ ସହ ସାଧା ପୋଷାକରେ ୨୦ ଜଣ କର୍ମଚାରୀ ନିୟୋଜିତ ରହିଛନ୍ତି ଯେଉଁମାନେ କି ଆସାମାଜିକ ତତ୍ତ୍ୱକୁ ଚିହ୍ନଟ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ମହିଳାଙ୍କ ସୁରକ୍ଷା ପାଇଁ ମହିଳା ଫୋର୍ସ ରହିଛନ୍ତି।
ଏହି ମହୋତ୍ସବ ସହିତ ପଲ୍ଲିଶ୍ରୀ ମେଳା ଏବଂ ହର୍ବାଲ ମେଳା ମଧ୍ୟ ଉଦ୍ଘାଟିତ ହୋଇଯାଇଛି। ପଲ୍ଲିଶ୍ରୀ ମେଳାର ମୁଖ୍ୟ ଆକର୍ଷଣ ରାଜ୍ୟତଥା ରାଜ୍ୟ ବାହାର ପୁରପଲ୍ଲୀରୁ ଆସିଥିବା ବିଭିନ୍ନ ସାମଗ୍ରୀକୁ ଲୋକେ ଦେଖିବା ସହିତ ବିକ୍ରୀବଟା ହେବ। ହର୍ବାଲ ମେଳା ଦୀର୍ଘ ଦିନ ପରେ ହେଉଥିବା ଯୋଗୁଁ ଏହାର ଚାହିଦା ମଧ୍ୟ ଆୟୁର୍ବେଦିକ କ୍ଷେତ୍ରରେ ପ୍ରଚାର ଏବଂ ପ୍ରସାର ଉତ୍ତମ ରୂପେ ହୋଇପାରିବ ବୋଲି ଆଶା କରାଯାଉଛି। କାରଣ ଜିଲ୍ଲା ଏବଂ ଜିଲ୍ଲା ବାହାରୁ ବହୁ ଆୟୁର୍ବେଦ ବିଶେଷଜ୍ଞ ଏବଂ ଜଡ଼ିବୁଟି ଚାଷ କରୁଥିବା ଚାଷୀ, ବିଭିନ୍ନ ବୈଦ୍ୟ ଏହି ମେଳାକୁ ଆସିବାର ବ୍ୟବସ୍ଥା କରାଯାଇଛି। ଯାହାଫଳରେ ଆୟୁର୍ବେଦ କ୍ଷେତ୍ରରେ ଯାହାକି ପୃଥିବୀର ଏକ ପୁରାତନ ଚିକିତ୍ସା ପଦ୍ଧତି ବିଷୟରେ ଲୋକେ ଅବଗତ ହେବା ସହ ଏହାର ଲାଭ ଉଠାଇପାରିବେ। ପ୍ରବଳ ଶୀତ ସତ୍ତେ୍ୱ ଲୋକଙ୍କ ଜନଗହଳି ଲାଗି ରହିଛି। ଏହି ମହୋତ୍ସବ ଡ଼ିସେମ୍ବର ୨୪ରୁ ୨୮ ତାରିଖ ପର୍ଯ୍ୟନ୍ତ ଚାଲିବ।