ସମୀକ୍ଷା ବ୍ୟୁରୋ
ଭୁବନେଶ୍ବର : ସମଗ୍ର ବିଶ୍ବ କରୋନା ଦ୍ବାରା ପ୍ରଭାବିତ ହୋଇଥିବା ବେଳେ ମୁମ୍ବାଇରେ ଫସି ରହିଥିବା ରାଜ୍ୟ 25 ଜଣ ବରିଷ୍ଠ ନାଗରିକଙ୍କୁ ସହାୟତା କରିଛି ଓଡିଶା ମୋ ପରିବାର । ଗୁଜରାଟ ଏବଂ ରାଜସ୍ଥାନକୁ ତୀର୍ଥଯାତ୍ରାରେ ଯାଇଥିବା ଏହି ବରିଷ୍ଠ ନାଗରିକଙ୍କ ମୁମ୍ବାଇରେ ଫସି ରହିଥିବା ନେଇ କଟକ ବରିଷ୍ଠ ନାଗରିକ ମହାସଭାର ଚେୟାରମ୍ୟାନ୍ ବିଷ୍ଣୁ ଦାସ ସାମନ୍ତ ପର୍ଯ୍ୟଟନ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡାଙ୍କୁ ସୂଚନା ଦେଇଥିଲେ । ଏହି ଯାତ୍ରୀ ମାନଙ୍କ ମଧ୍ୟରୁ 17 ଜଣ ବିମାନ ଟିକଟ କରି ସାରିଥିଲେ ମଧ୍ୟ ଲକ୍ଡାଉନ୍ କାରଣରୁ ଅଟକି ରହିଥିଲେ । ମୁଖ୍ୟମନ୍ତ୍ରୀ ଏବଂ ମୋ ପରିବାର ଆବାହକ ଅରୂପ ପଟ୍ଟନାୟକଙ୍କ ଦୃଷ୍ଟି ଆକର୍ଷଣ ପରେ ସେ କୁର୍ଲା ଷ୍ଟେସନ୍ର ପୋଲିସ୍ ଅଧିକାରୀଙ୍କୁ ସମ୍ପର୍କ କରିଥିଲେ । କୁର୍ଲା ଷ୍ଟେସନ୍ର ବରିଷ୍ଠ ଇନ୍ସପେକ୍ଟର ତେଜାଲେଙ୍କ ସହଯୋଗରେ ଉକ୍ତ 17 ଜଣଙ୍କୁ ବିମାନବନ୍ଦରରେ ପହଞ୍ଚାଇବା ସହିତ ବାକି ଯାତ୍ରୀଙ୍କ ପାଇଁ ଲଜ୍ରେ ରହିବାର ବନ୍ଦୋବସ୍ତ କରିଥିଲେ । ଏହି ଘଟଣା ପରେ ମୋ ପରିବାର ଆବାହକ ଅରୂପ ପଟ୍ଟନାୟକଙ୍କ, ପର୍ଯ୍ୟଟନ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା ଏବଂ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ବରିଷ୍ଠ ନାଗରିକଙ୍କ ପକ୍ଷରୁ ଧନ୍ୟବାଦ ଜ୍ଞାପନ କରାଯାଇଛି ।
