ଭୁବନେଶ୍ୱର: ଖୋର୍ଦ୍ଧା ଜିଲ୍ଲାରେ ଅଣୁ, କ୍ଷୁଦ୍ର ଓ ମଧ୍ୟମ ଉଦ୍ୟୋଗ ପ୍ରତିଷ୍ଠା ଦିଗରେ ରହିଥିବା ସମସ୍ୟାର ସମାଧାନ ସକାଶେ ଆଜି ଗୀତଗୋବିନ୍ଦ ସଦନଠାରେ ‘ଇଣ୍ଡଷ୍ଟ୍ରି କେୟାର’ ବୈଠକ ଅନୁଷ୍ଠିତ ହୋଇଯାଇଛି। ମୁଖ୍ୟମନ୍ତ୍ରୀଙ୍କ ପ୍ରମୁଖ ପରାମର୍ଶଦାତା ଶ୍ରୀ ଅସିତ କୁମାର ତ୍ରିପାଠୀଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ ୮୭ ଜଣ ଉଦ୍ୟୋଗୀ ଯୋଗଦେଇ ସେମାନେ ସମ୍ମୁଖୀନ ହେଉଥିବା ସମସ୍ୟାଗୁଡ଼ିକ ସଂପର୍କରେ ମୁହାଁମୁହିଁ ଆଲୋଚନା କରିଥିଲେ ।
ବିଶେଷଭାବେ କୋଭିଡ୍ ପରବର୍ତ୍ତୀ ସମୟରେ ପ୍ରଭାବିତ ଉଦ୍ୟୋଗଗୁଡ଼ିକ କିପରି ପୁଣିଥରେ ସ୍ୱାଭାବିକ ଭାବେ କାର୍ଯ୍ୟକ୍ଷମ ହୋଇପାରିବ ସେ ନେଇ ବିଭିନ୍ନ ଦିଗ ଉପରେ ଆଲୋଚନା କରାଯାଇଥିଲା। ଉଦ୍ୟୋଗ ନିମନ୍ତେ ଆବଶ୍ୟକତା ରହୁଥିବା ବିଦ୍ୟୁତ ଯୋଗାଣ, ବ୍ୟାଙ୍କଋଣ, ଅନ୍ତଃକରଣର ବିକାଶ ପ୍ରଭୃତି ସମ୍ବନ୍ଧରେ ବ୍ୟକ୍ତିଗତ ଭାବେ ଉଦ୍ୟୋଗୀମାନଙ୍କ ସହ କଥାବାର୍ତ୍ତା କରି ସମସ୍ୟାର ସମାଧାନ କରାଯାଇଥିଲା।
ଏହା ବ୍ୟତିତ ଅନ୍ୟାନ୍ୟ ସମସ୍ୟାଗୁଡ଼ିକ ଉପରେ ମଧ୍ୟ ଦୃଷ୍ଟି ନିକ୍ଷେପ କରାଯାଇଥିଲା। ଆଜିର ଏହି ବୈଠକରେ ଏମ୍ଏସ୍ଏମ୍ଇ ବିଭାଗ ପ୍ରମୁଖ ଶାସନ ସଚିବ ଶ୍ରୀମତୀ ରଞ୍ଜନା ଚୋପ୍ରା, ଇଡ୍କୋର ପରିଚାଳନା ନିର୍ଦ୍ଦେଶକ ଶ୍ରୀ ଭୂପେନ୍ଦ୍ର ସିଂ ପୁନିଆ, ଶ୍ରମ କମିଶନର ଶ୍ରୀ ତିରୁମାଲା ନାଏକ, ଏମ୍ଏସ୍ଏମ୍ଇ ବିଭାଗର ବରିଷ୍ଠ ଅଧିକାରୀ ରାଜ୍ୟସ୍ତରୀୟ ବ୍ୟାଙ୍କର୍ସ କମିଟି ସଦସ୍ୟ ଉପସ୍ଥିତ ଥିବାବେଳେ ଶିଳ୍ପ ନିର୍ଦ୍ଦେଶକ ମହମ୍ମଦ ସାଦ୍ଦିକ ଆଲାମ୍ ଏହି କାର୍ଯ୍ୟକ୍ରମର ସଂଯୋଜନା କରିଥିଲେ। ପୂର୍ବରୁ ଅନୁରୂପ କାର୍ଯ୍ୟକ୍ରମ ୧୫ଟି ଜିଲ୍ଲାରେ ଅନୁଷ୍ଠିତ ହୋଇସାରିଛି।