ନୂଆଦିଲ୍ଲୀ : କରୋନା ଭାଇରସ୍ କାରଣରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶବ୍ୟାପୀ ଲକ୍ଡାଉନ୍ ଘୋଷଣା କରିଥିବା ବେଳେ ଏହାଦ୍ୱାରା ଦେଶର ଅର୍ଥନୀତି ବ୍ୟାପକ ଭାବରେ କ୍ଷତିଗ୍ରସ୍ତ ହେଉଥିବା ନେଇ ଏକ ରିପୋର୍ଟ ପ୍ରକାଶିତ ହୋଇଛି । ଅର୍ଥନୈତିକ ସର୍ବେକ୍ଷଣ ସଂସ୍ଥା ଆକ୍ୟୁଟି ପକ୍ଷରୁ କରାଯାଇଥିବା ଏହି ସର୍ବେକ୍ଷଣ ଅନୁଯାୟୀ ଭାରତୀୟ ଅର୍ଥନୀତି ଦୈନିକ ହାରାହାରି ୪.୬୪ ବିଲିୟନ୍ ଡଲାର ବା ୩୫୦୦ କୋଟି ଟଙ୍କାର କ୍ଷତି ସହୁଛି । ଏହା ଦ୍ୱାରା ଦେଶର ଜିଡିପରେ ହାରାହାରି ୯୮ ବିଲିୟନ୍ ଡଲାରର ହ୍ରାସ ଦେଖିବାକୁ ମିଳିବ ବୋଲି କମ୍ପାନୀ ପକ୍ଷରୁ ବୁଧବାର ପ୍ରକାଶ କରା ଯାଇଛି । ସେହିପରି କରୋନା ଭାଇରସ୍ ପ୍ରଭାବରେ ସମଗ୍ର ବିଶ୍ୱର ଅର୍ଥନୀତି ୨୨ ପ୍ରତିଶତ ତଳକୁ ଖସିଯିବ ବୋଲି ଆକ୍ୟୁଟି ରିସର୍ଚ୍ଚ ପକ୍ଷରୁ ପ୍ରକାଶ କରାଯାଇଛି ।
