ନୂଆଦିଲ୍ଲୀ: ଆହ୍ଲାବାଦ ହାଇକୋର୍ଟର ଅବସରପ୍ରାପ୍ତ ବିଚାରପତି ପ୍ରଦୀପ କୁମାର ଶ୍ରୀବାସ୍ତବ ଲକ୍ଷ୍ମୀପୁର ମାମଲାର ତଦନ୍ତ କରିବେ। ରାଜ୍ୟପାଳ ଆନନ୍ଦିବେନ୍ ପଟେଲ ତଦନ୍ତ ପାଇଁ ପ୍ରଦୀପ କୁମାର ଶ୍ରୀବାସ୍ତବଙ୍କୁ ନିଯୁକ୍ତ କରିଛନ୍ତି। କେବଳ ଗୋଟିଏ କମିଶନ ଏହି ଘଟଣାର ଅନୁସନ୍ଧାନ କରିବେ। ଅନୁସନ୍ଧାନ ଆୟୋଗର ମୁଖ୍ୟାଳୟ ଲକ୍ଷ୍ମୀପୁରରେ କରାଯିବ। ଆୟୋଗକୁ ଏହାର ଯାଞ୍ଚ ୨ ମାସ ମଧ୍ୟରେ ଶେଷ କରିବାକୁ ପଡିବ।
ଆଜି ସୁପ୍ରିମକୋର୍ଟର ଶୁଣାଣି:
ଅନ୍ୟପକ୍ଷରେ ସୁପ୍ରିମକୋର୍ଟ ଏହି ପ୍ରସଙ୍ଗରେ ନିଜେ ସଜ୍ଞାନକୁ ନେଇଛନ୍ତି। ପ୍ରଧାନ ବିଚାରପତି ଏନ.ଭି ରମନାଙ୍କ ନେତୃତ୍ୱରେ ତିନିଜଣିଆ ଖଣ୍ଡପୀଠ ଆଜି ଏହି ମାମଲାର ଶୁଣାଣି କରିବେ। ଜଷ୍ଟିସ ସୂର୍ଯ୍ୟକାନ୍ତ ଏବଂ ହିମା କୋହଲି ମଧ୍ୟ ଏହି ବେଞ୍ଚର ସଦସ୍ୟ ଅଟନ୍ତି। ଏହି ମାମଲାରେ ଏପର୍ଯ୍ୟନ୍ତ କୌଣସି ଗିରଫଦାରୀ ହୋଇନାହିଁ।
ସୂଚନାଯୋଗ୍ୟ ଯେ, ରବିବାର ଦିନ ଲକ୍ଷ୍ମୀପୁର ଖେରୀ ଜିଲ୍ଲାର ତିକୋନିଆ ଅଞ୍ଚଳରେ ଘଟିଥିବା ହିଂସା ଘଟଣାରେ ୪ ଜଣ ଚାଷୀଙ୍କ ସମେତ ୮ ଜଣଙ୍କର ମୃତ୍ୟୁ ଘଟିଛି। ଏହି ମାମଲାରେ କେନ୍ଦ୍ର ଗୃହମନ୍ତ୍ରୀ ଅଜୟ ମିଶ୍ରଙ୍କ ପୁଅ ଆଶିଷଙ୍କ ସମେତ ଅନେକ ଲୋକଙ୍କ ବିରୋଧରେ ମାମଲା ରୁଜୁ ହୋଇଛି। ତେବେ କାହାକୁ ଗିରଫ କରାଯାଇ ନାହିଁ। ବାସ୍ତବରେ ଅଜୟ ମିଶ୍ରଙ୍କ ଜନ୍ମ ଗ୍ରାମରେ ବିଜେପି ପକ୍ଷରୁ ଏକ କାର୍ଯ୍ୟକ୍ରମର ଆୟୋଜନ କରାଯାଇଥିଲା। ଏହି କାର୍ଯ୍ୟକ୍ରମରେ ୟୁପି ଉପମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ଯୋଗଦେବାର ଥିଲା।
