ନୂଆଦିଲ୍ଲୀ: ଦୁବାଇ ଇଣ୍ଟରନ୍ୟାସନାଲ ଷ୍ଟାଡିୟମରେ ଖେଳାଯାଇଥିବା ଟି-୨୦ ମହିଳା ଏସିଆ କପ୍ ମ୍ୟାଚରେ ଭାରତୀୟ ମହିଳା କ୍ରିକେଟ ଦଳ ନିଜର ଶ୍ରେଷ୍ଠତା ପ୍ରତିପାଦିତ କରି ପାକିସ୍ତାନକୁ ୭ ୱିକେଟରେ ସୋଚନୀୟ ଭାବେ ପରାସ୍ତ କରିଛି। ମ୍ୟାଚରେ ପାକିସ୍ତାନ ଦଳ ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲେ ହେଁ ଭାରତୀୟ ବୋଲରଙ୍କ ମାପପୁପା ବୋଲିଂ ଆଗରେ ମାତ୍ର ୫୫ ରନରେ ଅଲଆଉଟ୍ ହୋଇଯାଇଥିଲା, ଯାହାକି ଟି-୨୦ ଆନ୍ତର୍ଜାତୀୟ କ୍ରିକେଟରେ ପାକିସ୍ତାନର ସବୁଠାରୁ କମ୍ ସ୍କୋର ଭାବେ ରହିଛି। ଜବାବରେ ଭାରତୀୟ ଦଳ ମାତ୍ର ୮.୪ ଓଭରରେ ୩ ୱିକେଟ ହରାଇ ଏହି ସହଜ ଲକ୍ଷ୍ୟକୁ ସଫଳତାର ସହ ହାସଲ କରିନେଇଥିଲା। ଭାରତୀୟ ଅଧିନାୟିକା ହରମନପ୍ରୀତ କୌର ଏକ ଦମଦାର ଛକା ମାରି ଦଳକୁ ବିଜୟୀ କରାଇଥିଲେ।
ଏହି ମ୍ୟାଚ୍ ଭାରତୀୟ ଅଧିନାୟିକା ହରମନପ୍ରୀତ କୌରଙ୍କ ପାଇଁ ଏକ ଐତିହାସିକ ମାଇଲଖୁଣ୍ଟ ସାବ୍ୟସ୍ତ ହୋଇଛି, କାରଣ ସେ ଅଧିନାୟିକା ଭାବେ ନିଜର ୧୫୦ତମ ମ୍ୟାଚ୍ ଖେଳି ଟି-୨୦ ଆନ୍ତର୍ଜାତୀୟ କ୍ରିକେଟରେ ଏହି ସଫଳତା ହାସଲ କରିବାରେ ବିଶ୍ୱର ପ୍ରଥମ ମହିଳା କ୍ରିକେଟର ହୋଇଛନ୍ତି। ମ୍ୟାଚରେ ଭାରତ ପକ୍ଷରୁ ଶ୍ରୀ ଚରଣୀ ଏବଂ ପ୍ରେମା ରାୱତ ଚମତ୍କାର ବୋଲିଂ ପ୍ରଦର୍ଶନ କରି ୩-୩ଟି ୱିକେଟ ଅଖତିୟାର କରିଥିବା ବେଳେ ଦୀପ୍ତି ଶର୍ମା ୨ଟି ୱିକେଟ ହାସଲ କରିଥିଲେ। ପାକିସ୍ତାନର ୮ ଜଣ ବ୍ୟାଟର ଦୁଇ ଅଙ୍କ ଛୁଇଁବାକୁ ସକ୍ଷମ ହୋଇନଥିବା ବେଳେ ଶୱାଲ ଜୁଲଫିକାର ସର୍ବାଧିକ ୧୪ ରନ୍ ସଂଗ୍ରହ କରିଥିଲେ।
ମ୍ୟାଚର ଆରମ୍ଭରୁ ପୁଣି ଥରେ ‘ହାତ ନ ମିଶାଇବା’ ନୀତି ଦେଖିବାକୁ ମିଳିଥିଲା। ଟସ୍ ସମୟରେ ଭାରତୀୟ ଅଧିନାୟିକା ହରମନପ୍ରୀତ କୌର ପାକିସ୍ତାନୀ ଅଧିନାୟିକା ଫାତିମା ସନାଙ୍କ ସହ ହାତ ମିଶାଇ ନଥିଲେ। ଗତ ୨୦୨୫ ଏପ୍ରିଲ ୨୨ର ପହଲଗାମ ଆତଙ୍କବାଦୀ ଆକ୍ରମଣ ପରଠାରୁ ଭାରତ-ପାକିସ୍ତାନ ମ୍ୟାଚରେ ଏହି ନୀତି ଆପଣାଯାଉଛି। ଏହି ବିଜୟ ସହ ଭାରତୀୟ ଦଳ ନିଜର ବିଜୟ ଧାରା ବଜାୟ ରଖିଛି। ଟି-୨୦ ଆନ୍ତର୍ଜାତୀୟ କ୍ରିକେଟରେ ଦୁଇ ଦଳ ମଧ୍ୟରେ ଖେଳାଯାଇଥିବା ୧୭ଟି ମ୍ୟାଚ ମଧ୍ୟରୁ ଭାରତ ୧୪ଟିରେ ବିଜୟୀ ହୋଇଥିବା ବେଳେ ପାକିସ୍ତାନ ମାତ୍ର ୩ଟି ମ୍ୟାଚରେ ବିଜୟ ହାସଲ କରିପାରିଛି।