ଭୁବନେଶ୍ବର: ବର୍ତ୍ତମାନ ରାଜ୍ୟସଭାକୁ ଅଶ୍ବିନୀ ବୈଷ୍ଣବ ଯିବା ପରେ ସେ କଟକରୁ ଲଢିବେ ବୋଲି ଯେଉଁ କଳ୍ପନାଜଳ୍ପନା ପ୍ରକାଶ ପାଇଥିଲା ତାହାର ଅନ୍ତ ଘଟିଛି। କାରଣ ଅଶ୍ବିନୀ ସେଠାରୁ ପ୍ରାର୍ଥୀ ହେବେ ବୋଲି ଲଗାତର କଟକ ଗସ୍ତ କରୁଥିଲେ। ବିଭିନ୍ନ ଉନ୍ନୟନ କାମର ଭିତ୍ତି ପ୍ରସ୍ତର ଉଦଘାଟନ ମଧ୍ୟ କରିଥିଲେ। ମନ୍ଦିର ଯାଇ ପ୍ରାର୍ଥନା କରୁଥିଲେ। ହେଲେ ପୁରା ଗଣିତ ଓଲଟି ଗଲା।
ସେ ରାଜ୍ୟସଭାକୁ ଯିବା ପରେ ବର୍ତ୍ତମାନ କଟକ ଲୋକସଭାରୁ କିଏ ପ୍ରାର୍ଥୀ ହେବ ସେ ନେଇ ଚର୍ଚ୍ଚା ଆରମ୍ଭ ହୋଇଯାଇଛି। କାରଣ ଗତ ନିର୍ବାଚନରେ କଟକ ଲୋକସଭା ପାଇଁ ବିଜେପିରୁ ପ୍ରାର୍ଥି ହୋଇଥିଲେ ଅବସରପ୍ରାପ୍ତ ଆଇପିଏସ ପ୍ରକାଶ ମିଶ୍ର। ହେଲେ ନିର୍ବାଚନରେ ହାରିବା ପରଠାରୁ ସେ ଆଉ ଦଳୀୟ କାର୍ଯ୍ୟରେ ଯୋଗ ଦେଉ ନାହାଁନ୍ତି। ଏପରିକି ସେ ଲୋକସଂପର୍କ ମଧ୍ୟ ରଖି ନାହାଁନ୍ତି।
ପ୍ରକାଶ ମିଶ୍ରଙ୍କ ହାବଭାବ ଦେଖି ସ୍ପଷ୍ଟ ହୋଇଛି ଯେ, ସେ ନିଜେ ପ୍ରାର୍ଥୀ ହେବା ପାଇଁ ଇଚ୍ଛୁକ ନାହାଁନ୍ତି ଅନ୍ୟପଟେ ଦଳ ମଧ୍ୟ ତାଙ୍କୁ ପ୍ରାର୍ଥୀ କରିବ ନାହିଁ। ସେଥିପାଇଁ କଟକ ଲୋକସଭା ଅଞ୍ଚଳରେ ଅଶ୍ବିନୀଙ୍କ ଆର୍ବିଭାବ ଦେଖିବାକୁ ମିଳିଥିଲା। ତେବେ ତା ପୂର୍ବରୁ ଏକ ଚର୍ଚ୍ଚା ଚାଲିଥିଲା ଯେ, କଟକ ସାଂସଦ ଭର୍ତ୍ତୁହରି ମହତାବ ବିଜେଡି ଛାଡି ବିଜେପିରେ ଯୋଗଦେବେ। ତାଙ୍କୁ ବିଜେପି କଟକ ଲୋକସଭା ପ୍ରାର୍ଥୀ କରିବ। ହେଲେ ସେଥିରେ ମଧ୍ୟ ଏ ପର୍ଯ୍ୟନ୍ତ କୌଣସି ସମ୍ଭାବନା ପରିଦୃଶ୍ୟ ହେଉ ନାହିଁ।
ତେବେ ବର୍ତ୍ତମାନ କଟକ ପାଇଁ ଯେଉଁ ନାମଟି ଚର୍ଚ୍ଚା ହେଉଛି ସେ ହେଲେ କଟକର ପ୍ରସିଦ୍ଧ ଡାକ୍ତର ପୂର୍ଣ୍ଣଚନ୍ଦ୍ର ମହାପାତ୍ର। ସେ ବର୍ତ୍ତମାନ ଦଳର ଉପସଭାପତି ଏବଂ ମହିଳା ମୋର୍ଚ୍ଚାର ପ୍ରଭାରୀ ଅଛନ୍ତି। ଆଶ୍ଚର୍ଯ୍ୟର କଥା ସେ କେବେ ଦଳରେ ଥିଲେ କି ନ ଥିଲେ କାହା ପାଖରେ ଖବର ନ ଥିଲା। ହେଲେ ହଠାତ ତାଙ୍କ ନାମ କେନ୍ଦ୍ର ବିଜେପିରୁ ଘୋଷଣା ହେଲାଯେ, ସେ ହେଉଛନ୍ତି ରାଜ୍ୟର ଉପସଭାପତି। ଏହାପରେ ତାଙ୍କୁ କାଁ ଭାଁ ଦଳୀୟ କାର୍ଯ୍ୟରେ ଦେଖିବାକୁ ମିଳୁଛି।
ତାଙ୍କ ନାମ ପୂର୍ବରୁ ଯାହା ଚର୍ଚ୍ଚା ହେଉଥିଲା ତାହା ଆହୁରି ଜୋର ଧରିବାରେ ଲାଗିଛି। କାରଣ ନିକଟରେ କଟକ ଗସ୍ତରେ ଆସିଥିଲେ ମଧ୍ୟ ପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଶିବରାଜ ସି ଚୌହ୍ବାନ। ସେ କଟକ ଜନସମାବେଶକୁ ଉଦବୋଧନ ଦେଇଥିଲେ। ସେହି ସଭାର ମୁଖ୍ୟ ପୁରୋଧା ସାଜି ଥିଲେ ପୂର୍ଣ୍ଣଚନ୍ଦ୍ର। ଏପରିକି ସେ ଦିଲ୍ଲୀ ଯାଇ କେନ୍ଦ୍ରର ବରିଷ୍ଠ ଅଧିକାରୀଙ୍କ ସହିତ ଯୋଗାଯୋଗ କରି ଆସିଛନ୍ତି ବୋଲି କୁହାଯାଉଛି। ତେଣୁ ସେ ହିଁ ବର୍ତ୍ତମାନ କଟକ ଲୋକସଭା ପ୍ରାର୍ଥୀ ହେବେ ବୋଲି ଅନୁମାନ କରାଯାଉଛି।
