ଭୁବନେଶ୍ବର: ଓଡ଼ିଶା ରାଜନୀତିରେ ଏବେ ଆରୋପ-ପ୍ରତ୍ୟାରୋପର ପର୍ବ ତୀବ୍ର ରୂପ ଧାରଣ କରିଛି। ବିଜୁ ଜନତା ଦଳର ଜନସମ୍ପର୍କ ପଦଯାତ୍ରା ଅବସରରେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦେଇଥିବା ବିବୃତ୍ତିକୁ ନେଇ ଭାରତୀୟ ଜନତା ପାର୍ଟି କଡ଼ା ଶବ୍ଦରେ ପ୍ରତିକ୍ରିୟା ପ୍ରକାଶ କରିଛି। ବିଜେପି ସାଧାରଣ ସମ୍ପାଦକ ବିରଞ୍ଚି ନାରାୟଣ ତ୍ରିପାଠୀ ପୂର୍ବତନ ବିଜେଡି ସରକାରର ଦୀର୍ଘ ଚବିଶ ବର୍ଷର ଶାସନକାଳକୁ ନେଇ ଗମ୍ଭୀର ପ୍ରଶ୍ନ ଉଠାଇବା ସହ ନବୀନଙ୍କୁ ତୀବ୍ର ସମାଲୋଚନା କରିଛନ୍ତି।
ସମ୍ପ୍ରତି ରାଜ୍ୟରେ ବିଜେପି ପୂର୍ଣ୍ଣ ବହୁମତ ସହ ସରକାର ଗଠନ କରିଥିବା ବେଳେ ନବୀନ ପଟ୍ଟନାୟକ ନିଜର ପୂର୍ବ କାର୍ଯ୍ୟର ସମୀକ୍ଷା ନ କରି କେବଳ ଅମୂଳକ କଥା କହୁଛନ୍ତି ବୋଲି ବିଜେପି ସାଧାରଣ ସମ୍ପାଦକ କହିଛନ୍ତି। ସାଧାରଣ ଜନତା କାହିଁକି ବିଜେଡିକୁ କ୍ଷମତାରୁ ପ୍ରତ୍ୟାଖ୍ୟାନ କଲେ, ସେ ନେଇ ଚିନ୍ତା କରିବା ପରିବର୍ତ୍ତେ ନବୀନ ବାବୁ ଏବେ କୁମ୍ଭୀର କାନ୍ଦଣା କାନ୍ଦୁଛନ୍ତି। ରାଜ୍ୟବାସୀ ଏହିସବୁ ଅସତ୍ୟ କଥାକୁ କେବେହେଲେ ଗ୍ରହଣ କରିବେ ନାହିଁ ବୋଲି ସେ ସ୍ପଷ୍ଟ କରିଛନ୍ତି।
ନବୀନଙ୍କ ଶାସନକାଳର ତଥ୍ୟ ଉପସ୍ଥାପନ କରି ବିଜେପି ନେତାଜଣଙ୍କ କହିଛନ୍ତି ଯେ ବିଜେଡି ସରକାର ସମୟରେ ନାରୀ ନିର୍ଯାତନା ଏବଂ ଭୟଙ୍କର ଖଣି ଦୁର୍ନୀତିରେ ଓଡ଼ିଶା ସାରା ଦେଶରେ ଶୀର୍ଷରେ ଥିଲା। ସେହିପରି ଚାଷୀ ସମସ୍ୟା, ଦାଦନ ନିର୍ଯାତନା ଏବଂ ଶିଶୁମୃତ୍ୟୁ ହାର ରୋକିବାରେ ମଧ୍ୟ ନବୀନ ସରକାର ସମ୍ପୂର୍ଣ୍ଣ ବିଫଳ ହୋଇଥିଲେ। ବିଭିନ୍ନ ସଂବେଦନଶୀଳ ଘଟଣା ଏବଂ ସରକାରୀ ଦୁର୍ନୀତିର ତଦନ୍ତକୁ ଚାପି ଦେବାରେ ବିଜେଡି ସରକାର ସଦାସର୍ବଦା ନମ୍ବର ୱାନ୍ ଭୂମିକା ଗ୍ରହଣ କରିଥିଲା।
ଏହା ସହିତ ନବୀନ ପଟ୍ଟନାୟକଙ୍କ ସମୟରେ ଓଡ଼ିଶାର ଅର୍ଥନୀତି ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇ ତଳକୁ ଖସିଥିବା କଥା ବିଜେପି ସାଧାରଣ ସମ୍ପାଦକ ମନେ ପକାଇ ଦେଇଛନ୍ତି। ପୂର୍ବରୁ ବିଜେଡି ପଦଯାତ୍ରାରେ ନବୀନ ପଟ୍ଟନାୟକ କହିଥିଲେ ଯେ ବିଜେଡି ଶାସନରେ ଓଡ଼ିଶାର ବିକାଶ ପ୍ରଥମ ଏଜେଣ୍ଡା ଥିଲା, ମାତ୍ର ବର୍ତ୍ତମାନର ସରକାରରେ କେବଳ ଦଳର ବିକାଶ ଉପରେ ଧ୍ୟାନ ଦିଆଯାଉଛି ଏବଂ ମାଆ, ଚାଷୀ ଓ ଯୁବପିଢ଼ିଙ୍କ ଭବିଷ୍ୟତ ଅନ୍ଧାରକୁ ଠେଲି ହୋଇଯାଇଛି। ନବୀନଙ୍କ ଏହି ଟିପ୍ପଣୀକୁ ଭିତ୍ତିହୀନ ଆଖ୍ୟା ଦେଇ ବିଜେପି ଏବେ ନବୀନଙ୍କ ବିଫଳତାର ଚିଠା ଖୋଲିବା ଆରମ୍ଭ କରିଛି।