Tag: ବ୍ରହ୍ମପୁର

ବ୍ରହ୍ମପୁର: ବ୍ରହ୍ମପୁରରେ ନକଲି ସସ୍ କାରଖାନା ଠାବ ହୋଇଛି। ବ୍ରହ୍ମପୁର ପୋଲିସ ଏହି ନକଲି କାରଖାନାକୁ ଠାବ କରିଛି। ବ୍ରହ୍ମପୁର ବଡବଜାର ଥାନା ଅନ୍ତର୍ଗତ ଗଣେଶ ବଜାରର ପ୍ରଥମ ଲେନରେ ଏହି କାରଖାନାକୁ ଠାବ କରାଯାଇଛି। ଏହି କାରଖାନାରେ ନକଲି ଟମାଟ, ସୋୟା ସସ୍ ପ୍ରଭୃତି ପ୍ରସ୍ତୁତ କରାଯାଉଥିଲା। ତେବେ ଏହି ଘଟଣାରେ ଜଣଙ୍କୁ ଅଟକ ରଖିଛି ପୋଲିସ।

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଦୀର୍ଘ ୯ ମାସରୁ ଅଧିକ ସମୟ ଧରି କରୋନା ସଂକ୍ରମଣ ଯୋଗୁଁ ସିନେମା ହଲ୍ ସପିଂ ମଲ୍ ଇତ୍ୟାଦିକୁ ବନ୍ଦ କରିଦିଆଯାଇଥିଲା। ଦୀର୍ଘଦିନ ପରେ ସଂକ୍ରମଣର ମାତ୍ରା ଧିରେ ଧିରେ କମିବା ଆରମ୍ଭ ହୋଇଛି। ଫଳରେ ଏହିସବୁକୁ ପର୍ଯ୍ୟାୟକ୍ରମେ ଖୋଲିବାକୁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି। ତେଣୁ ରେଶମ ସହର ବ୍ରହ୍ମପୁରରେ ମଧ୍ୟ ସିନେମା ହଲ୍ ଖୋଲିବାକୁ ଜିଲ୍ଲା ପ୍ରଶାସନ ନିର୍ଦ୍ଦେଶନାମା ଜାରି କରିଛନ୍ତି।

ସମସ୍ତେ ସିନେମା ହଲ୍ ମଧ୍ୟକୁ ପ୍ରବେଶ ପାଇଁ କୋଭିଡ଼୍ ନିୟମ ମାନିବାକୁ ବାଧ୍ୟତାମୂଳକ କରାଯାଇଛି। ପ୍ରତ୍ୟେକ ଶୋ ପରେ ଗୃହକୁ ସାନିଟାଇଜିଂ କରାଯିବ। ଦର୍ଶକ ମାସ୍କ ପିନ୍ଧିବା ବାଧ୍ୟତାମୂଳକ। ପ୍ରବେଶ ସ୍ଥାନରେ ଥର୍ମାଲ ସ୍କିନିଂ ସହିତ ସାନିଟାଇଜର ବ୍ୟବସ୍ଥା ରହିବ। ଯଦି କେହି ଏଭଳି ନିୟମକୁ ଉଲ୍ଲଂଘନ କରନ୍ତି ତେବେ ସରକାରୀ ନିୟମ ଅନୁସାରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜିଲ୍ଲା ପ୍ରଶାସନ କହିଛି। ଏହି ସବୁ ନିୟମ ଜାନୁୟାରୀ ୩୧ ତାରିଖ ପର୍ଯ୍ୟନ୍ତ ବଳବତ୍ତର ରହିବ ବୋଲି ବ୍ରହ୍ମପୁର ମହାନଗର ନିଗମ କମିଶନର ସିଦ୍ଧେଶ୍ୱର ବଳିରାମ ବନ୍ଦାର ଚିଠି ମାଧ୍ୟମରେ ଜଣାଇଛନ୍ତି।

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଗତକିଛି ଦିନ ହେଲା ବ୍ରହ୍ମପୁର ଭିଜିଲାନସ ବିଭାଗ ସଂପୂର୍ଣ୍ଣ ଏକ୍ସନ ମୋଡ଼୍‌ରେ ଅଛି। ଗତକିଛି ଦିନ ମଧ୍ୟରେ ଆୟ ବର୍ହିଭୂତ ସଂପତ୍ତି ଠୁଳ ଅଭିଯୋଗରେ ଚାରିଚାରି ଜଣଙ୍କ ଘରେ ଭିଜିଲାନସ ଚଢ଼ାଉ ହେବା ଏହାକୁ ସ୍ପଷ୍ଟ ପ୍ରମାଣିତ କରୁଛି। ଆଜି ମଧ୍ୟ ସେସ୍ପାଲ୍ ୱାରେଣ୍ଟ ବଳରେ ବ୍ରହ୍ମପୁର ଭିଜିଲାନସ ବିଭାଗ ପକ୍ଷରୁ ଚିକିଟି କଲେଜରେ କାର୍ଯ୍ୟରତ ଲାବ୍ରୋଟରୀ ସହାୟକ କୈଳାସ ଚନ୍ଦ୍ର ମହାନ୍ତିଙ୍କ ଘର ଏବଂ ଅନ୍ୟାନ୍ୟ ସ୍ଥାନରେ ସକାଳୁ ସକାଳୁ ଚଢ଼ାଉ ହୋଇଥିଲା।

ଅଧିକାରୀମାନେ ଏକକାଳୀନ ବ୍ରହ୍ମପୁର ଶ୍ରୀଟାୱାର ଷଷ୍ଠ ଫ୍ଲୋର୍‌ରେ ଥିବା ଫ୍ଲାଟ୍‌, ଗାନ୍ଧିନଗର ପଞ୍ଚମଗଳି ସ୍ପେକ୍ଟ୍ରମ କଲେଶନୀ ସରୋବର ଆପାର୍ଟମେଣ୍ଟରେ ଥିବା ଫ୍ଲାଟ୍‌, ଭୁବନେଶ୍ୱର ବିଜେପି ନଗର ପ୍ରନଥ ଏନ୍‌କ୍ଲେଭ୍‌ରେ ଥିବା ଫ୍ଲାଟ୍‌, ଚିକିଟି ଗଡ଼ରେ ଥିବା ପୈତୃକ ଘର, ଚିକିଟି ଗଡ଼ରେ ଥିବା ଶ୍ୱଶୁର ଘର, ଚିକିଟି କଲେଜର ଅଫିସ୍ ଚାମ୍ବରରେ ଚଢ଼ାଉ ହୋଇଥିଲା। ଚଢ଼ାଉ ପରେ ପ୍ରାୟ ଏକକୋଟିର ଉର୍ଦ୍ଧ୍ୱ ସ୍ଥାବର ଅସ୍ଥାବର ସଂପତ୍ତି ଠାବ କରାଯାଇଛି।

ଶ୍ରୀଟାୱାର ଥିବା ଫ୍ଲାର୍ଟର ମୂଲ୍ୟ ୨୦ଲକ୍ଷ ୬୨ହଜାର ୫୪୭ ଟଙ୍କା, ସେକ୍ଟ୍ରମ କଲୋନୀ ସରବୋର ଆପାର୍ଟମେଣ୍ଟରେ ଥିବା ଫ୍ଲାଟର ମୂଲ୍ୟ ୧୨ଲକ୍ଷ ୫୦ହଜାର ୧୮୧ ଟଙ୍କା, ଭୁବନେଶ୍ୱର ବିଜେପି ନଗରରେ ଥିବା ଫ୍ଲାର୍ଟର ମୂଲ୍ୟ ୩୧ ଲକ୍ଷ ୧୦ହଜାର ୭୫୭ଟଙ୍କା, ୩ଟି ସ୍ଥାନରେ ଜାଗା, ଯାହାର ମୂଲ୍ୟ ୧୩ ଲକ୍ଷ ୭ହଜାର ୫୭୫ଟଙ୍କା, ଚିକିଟି ଗଡ଼ରେ ଥିବା ପୈତୃକ ଘର ଯାହାର ମୂଲ୍ୟ ୨୬ ଲକ୍ଷ ୨୫ହଜାର ଟଙ୍କାର ସ୍ଥାବର ସଂପତ୍ତି ରହିଛି। ସେହିପରି ଘର ପ୍ରସାଦ ସାମଗ୍ରୀ ଯାହାର ମୂଳ୍ୟ ୬ଲକ୍ଷ ୬୨ହଜାର ୭୨୩ ଟଙ୍କା, ନଗଦ ୨୦,୫୭୦ଟଙ୍କା, ୨ଲକ୍ଷ ୧୯ହଜାର ୨୨୯ ଟଙ୍କା ସୁନା ଓ ରୂପା ଅଳଙ୍କାର, ବିଭିନ୍ନ ବ୍ୟାଙ୍କରେ ଥିବା ୮ଲକ୍ଷ ୭୨୫୫ ଟଙ୍କାର ଡ଼ିପୋଜିଟ୍‌, ଆଇ-୧୦ କାର୍ ଯାହାର ମୂଲ୍ୟ ୪ଲକ୍ଷ, ହୋଣ୍ଡା ୟୁନିକନ୍ ଯାହାର ମୂଲ୍ୟ ୬୫ହଜାର, ହୋଣ୍ଡା ଏଭିଏଟର ଯାହାର ମୂଲ୍ୟ ୬୫ହଜାର, ଗୋଟିଏ ଟ୍ରିପର ଟ୍ରକ ଯାହର ମୂଲ୍ୟ ୧୩ ଲକ୍ଷ ୫୦ହଜାର ଟଙ୍କା, ଗୋଟିଏ ଟ୍ରାକ୍ଟର ଯାହାର ମୂଲ୍ୟ ୫ଲକ୍ଷ ୫୫ହଜାର ଟଙ୍କା। ମୋଟ ୧ କୋଟି ୪୫ ଲକ୍ଷ ୮୩୭ ଟଙ୍କାର ସ୍ଥାବର ଓ ଅସ୍ଥାବର ସଂପତ୍ତି ଠାବ କରାଯାଇଛି।

କୈଳାସ ଚନ୍ଦ୍ର ମହାନ୍ତି ୨୦୦୮ ମସିହାରେ ଲାବ୍ରୋଟରୀ ଆସିଷ୍ଟାଷ୍ଟ ରୂପେ କଣ୍ଟ୍ରାଚୁଆଲ୍‌ରେ ରହିଥିଲେ। ପରେ ୨୦୧୪ରେ ତାଙ୍କର ରେଗୁଲାର ହୋଇଥିଲା। ଅଧିକ ଅନୁସନ୍ଧାନ ଜାରି ରହିଥିବାବେଳେ କାଲି ମୋଟ ସଂପତ୍ତିର ଆକଳନ କରାଯିବ ବୋଲି ଭିଜିଲାନସ ଏସ୍‌ପି ସୂଚନା ଦେଇଛନ୍ତି।

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ବ୍ରହ୍ମପୁର ସହରର ଦୁଇ କୃତି ପ୍ରତିଯୋଗୀ ସୌମ୍ୟଜିତ୍ ପଟ୍ଟନାୟକ (୧୩) ଏବଂ ସୋନିଆ ସାହୁ (୧୭) କରୋନା ସମ୍ବନ୍ଧୀତ ଦୁଇଟି ପୁସ୍ତକ ରଚନା କରିଛନ୍ତି। ସୌମ୍ୟଜିତ୍‌ଙ୍କ ରଚିତ ପୁସ୍ତକ “କୋଭିଡ଼୍ ୧୯ ଏ ବ୍ଲେସିଂ ଇନ୍ ଡ଼ିସ୍‌ଗ୍ୟୁସ” ଓ ସୋନିଆଙ୍କ ରଚିତ ପୁସ୍ତକ “ଦି ଗୁଡ଼୍‌, ଦି ବେଡ଼୍ ଆଣ୍ଡ ଦି ଅଗ୍‌ଲି” ଲାଇଫ୍ ଡ଼ିଉରିଂ ପାଣ୍ଡାମିକ୍ ରହିଛି।

ପାଞ୍ଚଦିନିଆ ଲେଖକ ପ୍ରତିଯୋଗିତାରେ ବରିଷ୍ଠ ଲେଖକ ଅଂଶୁମାନ ପାତ୍ରଙ୍କ ତତ୍ତ୍ୱାବଧାନରେ ସୌମ୍ୟଜିତ ଓ ସୋନିଆ ଅଂଶଗ୍ରହଣ କରି ମାତ୍ର ସାତଦିନରେ ନିଜ ନିଜର ପ୍ରଥମ କରୋନା ସମ୍ବନ୍ଧୀୟ ପୁସ୍ତକ ରଚନା କରିଛନ୍ତି। ଏହି ଦୁଇଟି ପୁସ୍ତକ ବର୍ତ୍ତମାନ ଆମାଜନ୍‌ରେ ଉପଲବ୍ଧ ହୋଇ ବେଷ୍ଟ ସେଲର ବୁକ୍‌ର ମାନ୍ୟତା ପାଇଛି।

ସେହିପରି ୟାସ୍ ତିୱାରୀ (୧୮) ଏସିଆ ବୁକ୍ ଅଫ୍ ରେକର୍ଡ଼ରେ ସର୍ବକନିଷ୍ଠ ଲେଖକର ମାନ୍ୟତା ପାଇଛନ୍ତି। ବର୍ତ୍ତମାନ ବ୍ରହ୍ମପୁର ସହରର ଏହି ଦୁଇ କୃତି ପ୍ରତିଯୋଗୀ ମଧ୍ୟ ଏସିଆ ବୁକ୍ ଅପ୍ ରେକର୍ଡ଼ରେ ସ୍ଥାନ ପାଇବା ପାଇଁ ଆବେଦନ କରିଛନ୍ତି। ସେମାନେ ଯଦି ସ୍ଥାନ ପାଆନ୍ତି ଏହା ବ୍ରହ୍ମପୁର ଓ ଓଡିଶା ପାଇଁ ଗର୍ବ ଓ ଗୌରବର ବିଷୟ ହେବ।

ସୌମ୍ୟଜିତ ଡ଼ିଏଭି ସ୍କୁଲର ଅଷ୍ଟମ ଶ୍ରେଣୀ ଛାତ୍ର ଥିବାବେଳେ ସୋନିଆ ଖଲିକୋଟ କଲେଜର ଯୁକ୍ତ ୨ ବିଜ୍ଞାନ ଶ୍ରେଣୀ ଛାତ୍ରୀ। ସୌମ୍ୟଜିତଙ୍କ ପିତା ସୁନିଲ ପଟ୍ଟନାୟକ ଅତିରିକ୍ତ ବିିଡ଼ିଓ ଥିବାବେଳେ ମା’ ବ୍ରହ୍ମପୁର ମେଡ଼ିକାଲ୍ କଲେଜର ଅତିରିକ୍ତ ପ୍ରଫେସର ଡା. ସଂଗୀତା ଦାସ ଅଟନ୍ତି। ସେହିପରି ସୋନିଆଙ୍କ ପିତା ମନୋଜ କୁମାର ସାହୁ ଓ ମା’ ଯାଜ୍ଞସେନୀ ସାହୁ ଅଟନ୍ତି।

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଗତ ତିନିଦିନ ମଧ୍ୟରେ ବ୍ରହ୍ମପୁର ଭିଜିଲାନସ ବିଭାଗ ପକ୍ଷରୁ ଆୟ ବର୍ହିଭୂତ ସଂପତ୍ତି ଠୁଳ ଅଭିଯୋଗରେ ଦୁଇଜଣଙ୍କ ଘରେ ଚଢ଼ାଉ ହୋଇଛି। ଦୁଇଦିନ ପୂର୍ବରୁ କୋଟିପତି ଅଙ୍ଗନୱାନି ଘରେ ଚଢ଼ାଉ ହୋଇଥିବାବେଳେ ଗତକାଲି ଆର୍‌ଆଣ୍ଡଡ଼ି ଗୁଣପୁର ସବ୍‌ଡ଼ିଭିଜନର ଡ଼େପୁଟି ଏକଜ୍ୟୁକୁଟିଭ୍ ଇଂଜିନିୟର ଉଦ୍ଧବ ପାଢ଼ୀଙ୍କ ଘରେ ଏବଂ ବିଭିନ୍ନ ସ୍ଥାନରେ ଚଢ଼ାଉ ହୋଇଛି।

ଗତକାଲି ସକାଳୁ ସକାଳୁ ସ୍ପେଶାଲ୍ ୱାରେଣ୍ଟ ବଳରେ ବ୍ରହ୍ମପୁର ଭିଜିଲାନସ ବିଭାଗ ପକ୍ଷରୁ ଉଦ୍ଧବଙ୍କ ବ୍ରହ୍ମପୁର କମାପଲ୍ଲୀ ଆର୍‌ସି ଲେନ୍‌ର ତିନିମହଲା କୋଠାଘରେ, ଗୁଣପୁର କାର୍ଯ୍ୟାଳୟର ଅଫିସ ରୁମ୍‌, ଗୁଣପୁରଠାରେ ଥିବା କ୍ୱାଟର ଏବଂ ଧରାକୋଟ ବ୍ଲକ୍‌ର ଦୁର୍ଗାମାଧବପୁରଠାରେ ଚାଲିଥିବା ତାଙ୍କ ପୁଅ କାହ୍ନୁଚରଣ ପାଢ଼ୀଙ୍କ ଷ୍ଟୋନ୍ କ୍ରସର ମିଲ୍ ଉପରେ ଚଢ଼ାଉ ହୋଇଛି। ଚଢ଼ାଉରେ ତାଙ୍କର ଅସ୍ଥାବର ଓ ସ୍ଥାବର ସଂପତ୍ତିର ମୂଲ୍ୟ ୧ କୋଟି ଟଙ୍କାରୁ ଉର୍ଦ୍ଧ୍ୱ ହେବ ବୋଲି କୁହାଯାଇଛି।

ବ୍ରହ୍ମପୁର କମାପଲ୍ଲୀ ଆର୍‌ସିଲେନ୍‌ରେ ଥିବା ଘରର ମୂଲ୍ୟ ୪୩ ଲକ୍ଷ ୬ହଜାର, ପୁଅ କାହ୍ନୁଚରଣ ପାଢ଼ୀଙ୍କ ନାମରେ ଦୁର୍ଗାମାଧମପୁର ଗ୍ରାମରେ ବିଭିନ୍ନ ସ୍ଥାନରେ ଥିବା ତିନୋଟି ଜାଗା ଯାହାର ମୂଲ୍ୟ ୩ଲକ୍ଷ ୯୨ହଜାର ୭୭୦ ଟଙ୍କା, ସ୍ତ୍ରୀ ମଧୁମଂଜରୀ ପାଢ଼ୀ ନାମରେ ଥିବା ୫ଟି ଜାଗା, ପୁଅ ନାମରେ ଥିବା ୧୫ଟି ଜାଗା, ଅନ୍ୟ ପୁଅ ନାମରେ ଥିବା ୪ଟି ସମୁଦାୟ ୨୪ଟି ଜାଗାର ମୂଲ୍ୟ ୧୬ ଲକ୍ଷ ୭ହଜାର ୨୩୦ ଟଙ୍କା, କ୍ରସର ଫେକ୍ଟ୍ରିର ମୂଲ୍ୟ ୭ଲକ୍ଷ ୧୧ହଜାର ୫୬୨ ଟଙ୍କାର ସ୍ଥାବର ସଂପତ୍ତି ଠାବ କରାଯାଇଛି।

ସେହିପରି ଅସ୍ଥାବର ସଂପତ୍ତି ମଧ୍ୟରେ ଘରକରଣା ସାମଗ୍ରୀ ଯାହାର ମୂଲ୍ୟ ୧୧ଲକ୍ଷ ୭ହଜାର ୩୭୫, ଗୋଟିଏ ୫ଲକ୍ଷ ୫୦ହଜାର ୬୫୪ ଟଙ୍କାର କାର୍‌, ଗୋଟିଏ ରୟଲ୍ ଇନ୍‌ଫିଲ୍ଡ ଯାହାର ମୂଲ୍ୟ ୧ ଲକ୍ଷ, ଗୋଟିଏ ଷ୍ଟନ କ୍ରସର ମେସିନ୍ ଯାହାର ମୂଲ୍ୟ ୪୦ ଲକ୍ଷ, ସୁନା ଅଳଙ୍କାର ଏବଂ ଲକରରେ ରଖିବା ସୁନା ସମୁଦାୟ ୭୧୮ ଗ୍ରାମ ଯାହାର ମୂଲ୍ୟ ୨୦ଲକ୍ଷ ୬୨ହଜାର ୨୬୦ଟଙ୍କା, ବିଭିନ୍ନ ବ୍ୟାଙ୍କରେ ଡ଼ିପୋଜିଟ୍ ୩୨ ଲକ୍ଷ ୨ହଜାର ୦୬୮ ଟଙ୍କା, ନଗଦ ୨ଲକ୍ଷ ୯୫ହଜାର ୭୦ ଟଙ୍କା, ଫେକ୍ଟ୍ରି ମଧ୍ୟରେ ରଖାଯାଇଥିବା ଚିପ୍‌ସର ମୂଲ୍ୟ ୩୦ ହଜାର ଟଙ୍କା। ୭୦ଲକ୍ଷ ୧୭ହଜାର ୫୬୨ ସ୍ଥାବର ଓ ୧ କୋଟି ୧୩ ଲକ୍ଷ ୪୭ହଜାର ୪୩୦ ଅସ୍ଥାବର, ଏହିପରି ସମୁଦାୟ ୧ କୋଟି ୮୩ ଲକ୍ଷ ୬୪ହଜାର ୯୯୨ ଟଙ୍କାର ସଂପତ୍ତି ଠାବ କରାଯାଇଛି।

ଶ୍ରୀ ପାଢ଼ୀ ଗତ ୧୯୯୧ରେ ଜୁନିୟର ଇଂଜିନିୟର ଭାବେ କାର୍ଯ୍ୟରମ୍ଭ କରିଥିଲେ। ବର୍ତ୍ତମାନ ସେ ରାୟଗଡ଼ା ଗୁଣପୁର ଆର୍‌ଆଣ୍ଡବି ଡ଼ିଭିଜନ-୨ରେ ଡ଼େପୁଟି ଏକଜିକୁଟିଭ୍ ଇଂଜିନିୟର ଭାବେ କାର୍ଯ୍ୟରତ ଅଛନ୍ତି। ସମସ୍ତ ସଂପତ୍ତିର ମୋଟ ଆକଳନ କରାଯାଉଥିବା ବେଳେ ଗତକାଲି ସମସ୍ତ ସଂପତ୍ତିର ପରିମାଣ ଏବେ କେତେ ସେ ଅୟ ବର୍ହିଭୂତ ସଂପତ୍ତି ଠୁଳ କରିଛନ୍ତି ତାହା ଜଣାପଡ଼ିବ ବୋଲି ଭିଜିଲାନସ ଏସ୍‌ପି ସୂଚନା ଦେଇଛନ୍ତି।

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଆୟ ବର୍ହିଭୂତ ସଂପତ୍ତି ଠୁଳ ଅଭିଯୋଗରେ ବ୍ରହ୍ମପୁର ଭିଜିଲାନସ ବିଭାଗ ପକ୍ଷରୁ ପୁରୁଣା ବ୍ରହ୍ମପୁର ଗଣେଶନଗର ମଙ୍ଗଳାବରମ ପେଟା-୨ର ଅଙ୍ଗନୱାଡ଼ି କର୍ମୀ ନମିତା ଦଳାଇଙ୍କ ବାସଗୃହ ଏବଂ ଅନ୍ୟାନ୍ୟ ଘରେ ଚଢ଼ାଉ ହୋଇଥିଲା। ଚଢ଼ାଉ ପରେ ତାଙ୍କର ସ୍ଥାବର ଓ ଅସ୍ଥାବର ସଂପତ୍ତି ସମୁଦାୟ ଦୁଇକୋଟିରୁ ଉର୍ଦ୍ଧ୍ୱ ଠାବ କରାଯାଇଥିଲା। ମୋଟ ସଂପର୍ତ୍ତି ଆୟ-ବ୍ୟୟକୁ ବାଦ୍ ଦେଲେ ଅଧିକା ୨୯୫ ପ୍ରତିଶତ ଆୟ କରିଥିବାରୁ ଆୟବର୍ହିଭୂତ ସଂପତ୍ତି ଠୁଳ ଅଭିଯୋଗରେ ତାଙ୍କୁ କୋର୍ଟଚାଲଣ କରାଯାଇଥିଲା।

ଜାମିନ ଅଭାବରୁ ଜେଲ୍ ହାଜତକୁ ଯାଇଛନ୍ତି କୋଟିପତି ଅଙ୍ଗନୱାଡ଼ି କର୍ମୀ। ଭିଜିଲାନସ ଏସ୍‌ପିଙ୍କ ସୂଚନା ପ୍ରକାରେ ଗତ ୨୭.୧୧.୧୯୯୦ରୁ ୨୨.୧୨.୨୦୨୦ ମଧ୍ୟରେ ସେ ବିଭିନ୍ନ ଆୟ ବାବଦରେ ୭୪ଲକ୍ଷ ୬୩ ହଜାର ୧୯୫ ଟଙ୍କା ଆୟ କରିଛନ୍ତି। ଏହି ସମୟ ମଧ୍ୟରେ ତାଙ୍କର ୬୨ ଲକ୍ଷ ୭୯ହଜାର ୮୬୪ ଟଙ୍କା ଖର୍ଚ୍ଚ ମଧ୍ୟ ହୋଇଛି  । କିନ୍ତୁ ତାଙ୍କର ସଂପତ୍ତିର ପରିମାଣ ୨ କୋଟି ୩୨ ଲକ୍ଷ ୨୯ହଜାର ୯୧୬ ରହିଥିବାବେଳେ ଖର୍ଚ୍ଚକୁ ବାଦ୍ ଦେଇ ଅଧିକା ୨ କୋଟି ୨୦ ଲକ୍ଷ ୪୬ହଜାର ୫୮୫ (୨୯୫%) ପ୍ରତିଶତ ଆୟ କରିଥିବାରୁ ତାଙ୍କୁ ଗିରଫ କରାଯାଇଛି।

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଆୟ ବର୍ହିଭୂତ ସଂପତ୍ତି ଠୁଳ ଅଭିଯୋଗରେ ବ୍ରହ୍ମପୁର ଭିଜିଲାନସ ବିଭାଗ ପକ୍ଷରୁ ବଡ଼ ବଡ଼ ଅଧିକାରୀଙ୍କ ଉପରେ ଚଢ଼ାଉ ହୋଇ କୋଟି କୋଟି ଟଙ୍କାର ସଂପତ୍ତି ଠାବ ହୋଇଥିବାବେଳେ ଆଜି ଜଣେ ଅଙ୍ଗନୱାଡ଼ି କର୍ମୀଙ୍କ ଘରୁ ଦୁଇକୋଟି ଟଙ୍କାର ସଂପତ୍ତି ଠାବ ହେବା ସମସ୍ତଙ୍କୁ ଆଶ୍ଚର୍ଯ୍ୟଚକିତ କରିଦେଇଛି।

ଆଜି ଆୟ ବର୍ହିଭୂତ ସଂପତ୍ତି ଠୁଳ ଅଭିଯୋଗରେ ବ୍ରହ୍ମପୁର ଭିଜିଲାନସ ବିଭାଗ ପକ୍ଷରୁ ପୁରୁଣା ବ୍ରହ୍ମପୁର ଗଣେଶନଗର ମଙ୍ଗଳାବରମ ପେଟା-୨ର ଅଙ୍ଗନୱାଡ଼ି କର୍ମୀ ନମିତା ଦଳାଇଙ୍କ ବାସଗୃହ ଏବଂ ଅନ୍ୟାନ୍ୟ ଘରେ ଚଢ଼ାଉ ହୋଇଥିଲା। ସକାଳୁ ସକାଳୁ ସେ ରହୁଥିବା ହରିଡ଼ାଖଣ୍ଡି ଲକ୍ଷ୍ମୀନୃସିଂହ ପ୍ରଥମ ଗଳି ସାହିର ତିନିମହଲା ଘର, ଏହି ସାହିରେ ଥିବା ଦୁଇମହଲା କୋଠାଘର, ଗଣେଶ ନଗରରେ ଥିବା ଘର, ଗୌତମ ନଗର ଶ୍ରୀ ଏନକେଭ୍‌ରେ ୨ ବିଏଚ୍‌କେ ପ୍ଲାଟ୍‌, ଭୁବନେଶ୍ୱର ସୁନ୍ଦରପଡ଼ା ହାଇଟେକ୍ ପ୍ଲାଜାର ଫ୍ଲାଟ୍‌, ସିଟି ହସ୍‌ପିଟାଲ୍ ପଛଭାଗ ଦଳୁଆ ସାହିରେ ଥିବା ଘର ଏବଂ ସେ କାର୍ଯ୍ୟ କରୁଥିବା ଅଫିସ ଚାମ୍ବରରେ ଏକକାଳୀନ ଚଢ଼ାଉ ହୋଇଥିଲା। ଚଢ଼ାଉ ପରେ ତାଙ୍କର ମୋଟ ସଂପତ୍ତିର ପରିମାଣ ଦୁଇକୋଟିରୁ ଉର୍ଦ୍ଧ୍ୱ ଆକଳନ କରାଯାଇଛି।

ହରିଡ଼ାଖଣ୍ଡି ଲକ୍ଷ୍ମୀନୃସିଂହ ସାହିର ତିନିମହଲା ଘରର ମୂଲ୍ୟ ୮୩ଲକ୍ଷ ୪୪ହଜାର ୩୪୮ ଟଙ୍କା, ସେହି ସାହିର ଦୁଇମହଲା ଘରର ମୂଲ୍ୟ ୨୨ଲକ୍ଷ ୧୩ହଜାର ୪୦୦ ଟଙ୍କା, ଗଣେଶ ନଗରରେ ଥିବା କୋଠାର ମୂଲ୍ୟ ୧୧ଲକ୍ଷ ୬୩ହଜାର ୦୮୮ ଟଙ୍କା, ଗୌତମ ନଗର ଫ୍ଲାଟର ମୂଲ୍ୟ ୪୫ ଲକ୍ଷ ୨୧ହଜାର ୮୦୦ ଟଙ୍କା, ସୁନ୍ଦରପଡ଼ା ହାଇଟେକ୍ ପ୍ଲାଜାରେ ଥିବା ଫ୍ଲାଟର ମୂଲ୍ୟ ୨୭ ଲକ୍ଷ ୬୮ହଜାର ଟଙ୍କା, ଲକ୍ଷ୍ମୀନୃସିଂହ ସାହି ୧୨ ଗଳିରେ ଥିବା ଘରର ମୂଲ୍ୟ ୫ଲକ୍ଷ ୨୮ହଜାର ୨ଶହ ଟଙ୍କା, ୦.୦୦୧୫ ଡ଼େସିମିଲ୍ ଗୋଟିଏ ପ୍ଲଟ୍ ଯାହାର ମୂଲ୍ୟ ୧୮୦୦ ଟଙ୍କା, ସମୁଦାୟ ୧ କୋଟି ୯୫ ଲକ୍ଷ ୪୦ହଜାର ୬୩୬ ସ୍ଥାବର ସଂପତ୍ତି ରହିଛି। ସେହିଭଳି ଅସ୍ଥାବର ସଂପତ୍ତି ମଧ୍ୟରେ ୩ଲକ୍ଷ ୩୫୦ ଟଙ୍କାର ଘର ଉପକରଣ, ଇଣ୍ଡିଗୋ କାର୍ ଯାହାର ମୂଲ୍ୟ ୬ଲକ୍ଷ ୧୯ହଜାର ୭୪୬ ଟଙ୍କା, ଗୋଟିଏ ହିରୋ ମେଷ୍ଟୋ ସ୍କୁଟି ଯାହାର ମୂଲ୍ୟ ୪୯ ହଜାର ୬୧୪ ଟଙ୍କା, ଛତୁଆ ତିଆରି କରିବା ମେସିନ୍ ଯାହାର ମୂଲ୍ୟ ୪ ଲକ୍ଷ ୭୦ ହଜାର ଟଙ୍କା, ୨୮୭୨ ନଗଦ ଟଙ୍କା, ୩ ଲକ୍ଷ ୩୪ ହଜାର ୩୫୩ ଟଙ୍କା ସୁନା ଏବଂ ରୂପା ଅଳଙ୍କାର, ବିଭିନ୍ନ ବ୍ୟାଙ୍କରେ ଥିବା ୧୨ ଲକ୍ଷ ୭୯ହଜାର ୭୬ଟଙ୍କା, ସମୁଦାୟ ଅସ୍ଥାବର ସଂପତ୍ତି ୩୦ ଲକ୍ଷ ୫୬ହଜାର ୧୧ ଟଙ୍କା।

ସ୍ଥାବର ଓ ଅସ୍ଥାବର ସଂପତ୍ତି ମିଶାଇଲେ ସମୁଦାୟ ୨କୋଟି ୨୫ ଲକ୍ଷ ୯୬ହଜାର ୬୪୭ ଟଙ୍କାର ସଂପତ୍ତି ଠାବ କରାଯାଇଛି। ନମିତା ଦଳେଇ ୧୯୯୦ ମସିହାରେ ଅଙ୍ଗନୱାଡ଼ି କର୍ମୀ ଭାବେ ଚାକିରି ପାଇଥିବାବେଳେ ସେ ଏତେ ଟଙ୍କାର ଅଧିକାରୀ କିପରି ହେଲେ ସମସ୍ତଙ୍କୁ ଆଶ୍ଚର୍ଯ୍ୟ ଚକିିତ କରିଛି।

ତେବେ ନମିତା କହିଛନ୍ତି ଏହି ସବୁ ତାଙ୍କର ସଂପତ୍ତି ନାହିଁ। ସବୁ ସଂପତ୍ତି ତାଙ୍କ ସ୍ୱାମୀଙ୍କର ଏବଂ ସେ ସ୍ୱର୍ଗବାସ ହେବା ପରେ ସବୁ ସଂପତ୍ତି ତାଙ୍କ ନିକଟକୁ ଆସିଛି। ତେବେ ଅଧିକ ଅନୁସନ୍ଧାନ ଜାରି ରହିଥିବା ଭିଜିଲାନସ ବିଭାଗ କହିଛି। ତଦନ୍ତ ପରିସରକୁ ବ୍ୟାପକ କଲେ ଏହି ଦୁର୍ନୀତିରେ ଲିପ୍ତ ବଡ଼ ବଡ଼ ମାଛମାନେ ମଧ୍ୟ ଲୋକଲୋଚନକୁ ଆସିପାରିବେ।

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର‌: ବେପାରୀଙ୍କ ପାଇଁ କୌଣସି ଶାସନ ନାହିଁ କି ଦଣ୍ଡ ନାହିଁ। ସହର ସାରା ଯିଏ ଯେଉଁଠି ଯେମିତି ସ୍ଥାନଟିଏ ପାଇଛି ପସରା ମେଲାଇ ବେପାର କରିବ ଏପରି ଦୃଶ୍ୟ ବ୍ରହ୍ମପୁର ସହରରେ ଦେଖିବାକୁ ମିଳିଛି।

ମହାନଗର କମିଶନରଙ୍କ ହାତରେ ଏ ସହରର ସବୁ ଶୃଙ୍ଖଳା ବ୍ୟବସ୍ଥା ହେଲେ ଯେଉଁ ବିଶୃଙ୍ଖଳା ଚରିତ୍ରଙ୍କ ପାଇଁ ସହରବାସୀ ଘୋର ଦୁର୍ଦ୍ଦଶା ଭୋଗୁଛନ୍ତି ସେମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନହେବା ନିହାତି ଚିନ୍ତାର ବିଷୟ। ବ୍ରହ୍ମପୁର ରଜପଥ କେବଳ ବାଦ ପଡ଼ୁନି ବରଂ ସହରର ଆଇନ ଶୃଙ୍ଖଳାକୁ ଟ୍ରାଫିକ୍ ସୁଧାରିବାର ସରକାରୀ ବାବୁଙ୍କ ଦପ୍ତର ଆଗରେ ମଧ୍ୟ ରୁଣ୍ଡ ହୋଇ ଯେଉଁ ପ୍ରକାର ବେପାରୀମାନେ ଦୈନିକ ହାଟ ବସାନ୍ତି ଏହାକୁ ନେଇ ସରକାରୀ ବାବୁ ପୋଲିସ୍ ଅଧିକାରୀ ମଧ୍ୟ ନିଷ୍କ୍ରିୟତା ପ୍ରକାଶ କରୁଛନ୍ତି।

ବ୍ରହ୍ମପୁର ସହର ସାରା ହାଟର ଭ୍ରମ। ସକାଳୁ ସକାଳୁ ରାଜପଥ ପାଶ୍ୱର୍ରେ ଜଳଖିଆ ଦୋକାନ, ପାଚିଲା ଫଳ, ସବୁଜ ପନିପରିବା ସମ୍ଭାର ସୂଚାଇ ଦିଏ ଏଠାରେ କିଏ କାହାକୁ ଖାତିର କରିବାର ନା ଗନ୍ଧ ନାହିଁ। ମହାନଗର ବ୍ରହ୍ମପୁର କହୁଛି ଆମେ ଯୋଗୁଁ ସହର ସ୍ୱଚ୍ଛତା ଓ ପରିବେଶ ସଫାସୁତୁରା। ପୋଲିସ୍ କହୁଛନ୍ତି ଆମ ପାଇଁ ଟ୍ରାଫିକ୍ ରାସ୍ତାଘାଟ। କିନ୍ତୁ ବେପାରୀ ମାଳ ମାଳ ବସି ରାତିରୁ ରାତି ଯାଏଁ କେଉଁ ଗଳାବାଟ ଦେଇ ସାହସ କରି ପଥରୋଧ କରୁଛନ୍ତି ଏହା ପ୍ରଶ୍ନ ତିଆରି କରିବା ସ୍ୱାଭାବିକ।

ବଡ଼ ଅସ୍ୱାଭାବିକ ଚରିତ୍ରଙ୍କ ଆଡ୍ଡା ଜମିଛି ସହରରେ। ବଡ଼ବଡ଼ ଆଇଏଏସ୍ ଅଫିସରଙ୍କ ହାତରେ ସହର ସରସ ସୁନ୍ଦର ସ୍ୱଚ୍ଛ ହେବ ନାହିଁ। ବରଂ ନିଷ୍ଠାପର କର୍ତ୍ତବ୍ୟନିଷ୍ଠ ପ୍ରଶାସନ ଆବଶ୍ୟକ। କମାପଲ୍ଲୀରୁ ଗଜପତିନଗର, ଇଂଜିନିୟରିଂ ସ୍କୁଲ ଛକ, ଗେଟ୍‌ବଜାରରୁ ସିଟି ହସ୍ପିଟାଲ୍‌, ଗିରି ମାର୍କେଟ ଛକରୁ ଗିରିଜା ଛକ, ବିଜିପୁର ଷ୍ଟେସନ ରୋଡ଼୍‌ରୁ ନେହେରୁ ପାର୍କ ଦେଇ ଯେଉଁ ଦୃଶ୍ୟ ରାତି ପାହିଲେ ପୁଟି ଉଠୁଛି ସବୁ ଆଇନ୍ ରାସ୍ତା ଟ୍ରାଫିକ୍ ବ୍ୟବସ୍ଥାକୁ ଫୁ କରି ବେପାରୀଙ୍କ ପାଇଁ ସହରର ପ୍ରତିପଥ ଯେପରି ଗୋଟିଏ ଗୋଟିଏ ହାଟ ଓ ସଉଦାର ଖୋଲା ବଜାର।

ଏପରି କାହିଁକି ଓ କେତେଦିନ। କେବେ ଚେତିବ ମହାନଗର ନିଗମ। ପନିପରିବା ବେପାରୀଙ୍କ ପାଖରେ ଗାଡ଼ି ଥୋଇ ପନିପରିବା କିଣୁଥିବା ମଣିଷଙ୍କୁ ଦେଖି ପିସିଆର୍ ଭେନ୍‌ରେ ବସିଥିବା ପୋଲିସ୍ ବାବୁ ମଧ୍ୟ ନୀରବ। ପଛଗେଟ୍ ଦେଇ କିଛି ପରିବା ବୋଝ ଥୋଇ ଦେଲେ ତୁନିପଡ଼ନ୍ତି ପୋଲିସ୍ ବୋଲି ଚର୍ଚ୍ଚା। ଏହାକୁ ନେଇ ପ୍ରଶ୍ନ କେବଳ ଉଠୁନି ବର୍ତ୍ତମାନ ବ୍ରହ୍ମପୁର ସତେ ଯେମିତି ଅଭିଭାବକ ଶୂନ୍ୟ। ସ୍ୱଚ୍ଛତାର ଦ୍ୱାହିି ଦେଇ ସମ୍ମାନ ଗୋଟାଇ ଆସୁଥିବା ମହାନଗର ପ୍ରଶାସନକୁ ଲଜା ଲାଗିଲା ଭଳି ଚିତ୍ର ଫୁଟି ଉଠୁଛି।

ସ୍ୱଚ୍ଛତାର ଆଳ ଦେଖାଇ ଲକ୍ଷଲକ୍ଷ ଟଙ୍କା ଖର୍ଚ୍ଚ ହେଉଥିବା ସହରରେ ଡ଼୍ରେନ୍ ଉପରେ ଖାଦ୍ୟ ଥୋଇ ଗରାଖଙ୍କୁ ସନ୍ତୁଷ୍ଟ କରୁଥିବା ବେପାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ କାହିଁକି ହେବନି। ସବୁ ଡ଼୍ରେନ୍ ଉପରେ ଠେଲାଗାଡ଼ି ଅସ୍ଥାୟୀ ଘର ଟେକି ହୋଟେଲ୍ ବେପାରୀଙ୍କ ରାଜୁତି ଚାଲିଛି। ଅଥଚ କାର୍ଯ୍ୟାନୁଷ୍ଠାନ ନାହିଁ। ମୋ ସହର ମୋ ସରକାରର ଏଜେଣ୍ଡାରୁ ବାଦ ଦେଇ ସହରରେ ସ୍ୱଚ୍ଛତାର ପରିକଳ୍ପନା ସମ୍ଭବ ନୁହେଁ। ବଡ଼ବଡ଼ କଥା କହି ରାଜନେତା ଜନପ୍ରତିନିଧି କେତେ ଲୁଟିଲେ କେତେ ଭଣ୍ଡିଲେ କେତେ ଠକିଲେ ତାର ତାଲିକା ଲମ୍ବା।

ଏଇ ସହରରେ ରାହାଗିରି ପଥ ଉତ୍ସବ ଚାଲିଥିଲା। ଆଜିର ନେତାମାନେ ସେଇ କାର୍ଯ୍ୟକ୍ରମର ମୁଖ୍ୟ ଆକର୍ଷଣ ଥିଲେ। ସଦୟ ମହାନଗର ମଧ୍ୟ ପୁଳା ପୁଳା ଟଙ୍କା ଖର୍ଚ୍ଚ କରି ଇଭେଣ୍ଟ ସଂସ୍ଥାକୁ ଉପକୃତ କରିଲା। ହେଲେ ସହରର ପାଶ୍ୱର୍ଚିତ୍ରରେ ରାଜନୀତି ଓ ପ୍ରଶାସନର ପ୍ରକୃତ ଚରିତ୍ରଙ୍କ ଦାୟିତ୍ୱହୀନ ରାଜୁତି ଆଜି ଫୁଟି ଉଠୁଛି। କହିବାକୁ ଗଲେ ବ୍ରହ୍ମପୁର ସହରର ମହାନଗର ଅପାରଗତାର ଶୀର୍ଷରେ ଥାଇ ମଧ୍ୟ ସମ୍ମାନ ଓ ସମ୍ବର୍ଦ୍ଧନାର ପାତ୍ର ଏହା ସମ୍ମାନକୁ ମଧ୍ୟ ଅପମାନ ଏବଂ ଜନସାଧାରଣଙ୍କ ଭାବାବେଗ ସହ ଖେଳ ବୋଲି କୁହାଯିବ।

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଦିଲ୍ଲୀରେ ସଂଘର୍ଷରତ କୃଷକମାନଙ୍କ ଆନ୍ଦୋଳନ ପ୍ରତି ସଂହତି ଜଣାଇ ବ୍ରହ୍ମପୁର ସ୍ଥିତ କମାପଲ୍ଲୀ ଛକ ଠାରେ ଓଡ଼ିଶା କୃଷକ ସଭା, ସିଟୁ, କ୍ଷେତ ମୁଲିଆ ସଂଗଠନ ପକ୍ଷରୁ ପ୍ରତିବାଦ ଆନ୍ଦୋଳନ ସଂଗଠିତ ହୋଇଥିଲା।

ଦିଲ୍ଲୀରେ ସଂଘର୍ଷରତ କୃଷକ ମାନଙ୍କର ଆନ୍ଦୋଳନକୁ ଦମନ କରିବା ବନ୍ଦ କର, ମୋଦି ସରକାରଙ୍କ କୃଷି ଓ କୃଷକ ସର୍ବନାଶକାରୀ କୃଷି ଆଇନ ୨୦୨୦ ପ୍ରତ୍ୟାହାର, କୃଷକ ଓ ଜନବିରୋଧୀ ନୂତନ ବିଦ୍ୟୁତ ଆଇନ ରବ୍ଦ କର, କୃଷି କ୍ଷେତ୍ରରୁ କର୍ପୋରେଟ ହଟାଅ, ଅତ୍ୟାବଶ୍ୟକୀୟ ସାମଗ୍ରୀ ସଂଶୋଧନ ଆଇନ ବାତିଲ କର, ପ୍ରାଇଭେଟ୍ ମଣ୍ଡି ଆଇନ ରବ୍ଦ କରିବା, କୃଷକମାନଙ୍କ ଏକକାଳୀନ ଋଣ ଛାଡ଼ କରିବା ଇତ୍ୟାଦି ରହିଛି। କୃଷକମାନଙ୍କ ଦବାିକୁ ଗ୍ରହଣ କରିବା ପରିବର୍ତ୍ତେ କୃଷକ ଆନ୍ଦୋଳନକୁ ଦମନ କରିବା ପାଇଁ ଷଡ଼ଯନ୍ତ୍ର ଚଳାଇଛନ୍ତି ବୋଲି ନିନ୍ଦା କରାଯାଇଛି।

ଏଥିରେ ବସନ୍ତ ନନ୍ଦ, ଗୋପାଳ ପାଣିଗ୍ରାହୀ, ଯୁଧିଷ୍ଠିର ବେହେରା, ପ୍ରତାପ ଚୌଧୁରୀ, ଶିବ ପ୍ରସାଦ ମହାପାତ୍ର, ପଂଚାନନ ଜେନା, ଯୁଧିଷ୍ଠିର ସାହୁ, କୃଷ୍ଣ ନାୟକ, ଚିଟି ବାବୁ, ପୁରୁଷୋତ୍ତମ ସାହୁ, ଶିଶିର ବେହେରା ପ୍ରମୁଖ ନେତୃତ୍ୱ ନେଇଥିଲେ।