Tag: ଖୋର୍ଦ୍ଧା ଜିଲ୍ଲା

ଭୁବନେଶ୍ୱର: ଖୋର୍ଦ୍ଧା ଜିଲ୍ଲାକୁ ସବୁଜ, ସୁନ୍ଦର ଓ ପ୍ରଦୂଷଣମୁକ୍ତ କରିବା ଅଭିଯାନକୁ ଖୋର୍ଦ୍ଧା ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର ଖୋର୍ଦ୍ଧା ଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରେ ଜାତିର ଜନକ ମହାତ୍ମା ଗାନ୍ଧୀଙ୍କ ନାମରେ ଏକ ବୃକ୍ଷରୋପଣ କରିବା ସହିତ ଜିଲ୍ଲା ସଂସ୍କୃତି ଭବନ ପରିସରରେ ଏହି ସମ୍ପର୍କିତ ଲୋଗୋକୁ ଉନ୍ମୋଚନ କରି ଉଦ୍‌ଘାଟନ କରିଛନ୍ତି। ସାମାଜିକ ଅନୁଷ୍ଠାନ ପ୍ରେରଣା ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ ଖୋର୍ଦ୍ଧା ବିଧାୟକ ଜ୍ୟୋତିନ୍ଦ୍ରନାଥ ମିତ୍ର ପାଇକ ବିଦ୍ରୋହର କର୍ଣ୍ଣଧାର ବକ୍ସି ଜଗବନ୍ଧୁଙ୍କ ନାମରେ, ଆନ୍ତର୍ଜାତିକ ଖ୍ୟାତିସମ୍ପନ୍ନ ପରିବେଶବିତ୍ ଡଃ ଭଗବାନ ପ୍ରକାଶ ଜୟୀରାଜ ଗୁରୁଙ୍କ ନାମରେ, ଖୋର୍ଦ୍ଧା ଜିଲ୍ଲା ଆରକ୍ଷୀ ଅଧୀକ୍ଷକ ଅଲେଖ ଚନ୍ଦ୍ର ପହି ଦଳବେହେରା ମାଧବ ଚନ୍ଦ୍ର ରାଉତରାୟଙ୍କ ନାମରେ, ବିଶିଷ୍ଟ ଶିକ୍ଷାବିତ୍ ତଥା ମହାବୀର ଗ୍ରୁପ୍ ଅଫ ଶିକ୍ଷାନୁଷ୍ଠାନର ଅଧ୍ୟକ୍ଷ ଡଃ ଗନ୍ଧର୍ବ ଚନ୍ଦ୍ର ନାୟକ ପିଣ୍ଡିକି ବାହୁବଳେନ୍ଦ୍ରଙ୍କ ନାମରେ, ପ୍ରେରଣାର ଅଧ୍ୟକ୍ଷ ତଥା ପୂର୍ବତନ ବିଧାୟକ ଡଃ ଦିଲ୍ଲୀପ ଶ୍ରୀଚନ୍ଦନ କୃତିବାସ ପାଟ୍ଟଶାଣୀଙ୍କ ନାମରେ, ନିୟୁ ଥିଙ୍କିଙ୍ଗ ଫୋରମର ସଭାପତି ନରେନ୍ଦ୍ର ପୃଷ୍ଟି ଓ ସିଗ୍‌ମା ପବ୍ଲିକ ସ୍କୁଲ୍ ଗ୍ରୀନ୍ ଆର୍ମି ଶାଖାର ଛାତଛାତ୍ରୀମାନେ ମହାପୁରୁଷମାନଙ୍କ ନାମରେ ଜିଲ୍ଲାପାଳଙ୍କ କାର୍ଯ୍ୟାଳୟରେ ବୃକ୍ଷରୋପଣ କରିଥିଲେ।

ଏହା ପରେ ଏକ ଶୋଭାଯାତ୍ରା ଖୋର୍ଦ୍ଧା ଜିଲ୍ଲାପାଳଙ୍କ କାର୍ଯ୍ୟାଳୟରୁ ସଂସ୍କୃତି ଭବନ ପର୍ଯ୍ୟନ୍ତ ଖୋର୍ଦ୍ଧା ଜିଲ୍ଲାକୁ ସବୁଜ, ସୁନ୍ଦର ଓ ପ୍ରଦୂଷଣମୁକ୍ତ କରିବା ତଥା ବୃକ୍ଷରୋପଣ କରିବା ସମ୍ପର୍କରେ ନାରା ଦେଇ ପହଞ୍ôଚବା ପରେ ସେଠାରେ ଏକ ସାଧାରଣ ସଭା ଅନୁଷ୍ଠିତ ହୋଇଥିଲା। ଏହି ସଭାରେ ଜିଲ୍ଲାକୁ ସବୁଜ ସୁନ୍ଦର ଓ ପ୍ରଦୂଷଣମୁକ୍ତ କରିବା ଅଭିଯାନର ଲୋଗୋକୁ ଉନ୍ମୋଚନ କରି ଖୋର୍ଦ୍ଧା ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର କହିଲେ, ଖୋର୍ଦ୍ଧା ଜିଲ୍ଲାରେ ରାଜ୍ୟ ରାଜଧାନୀ ଭୁବନେଶ୍ୱର ସମ୍ପୃକ୍ତ ଥିବାରୁ ଏହାର ଜନସଂଖ୍ୟା, କଳକାରଖାନା, ମଟରଗାଡ଼ି ଆଦି ଦିନକୁ ଦିନ ବଢିବାରେ ଲାଗିଛି। ତେଣୁ ସେହି ଅନୁପାତରେ ବ୍ୟାପକ ବୃକ୍ଷରୋପଣ କରାନଗଲେ ଜିଲ୍ଲାର ସବୁଜିମା ତଥା ପରିବେଶ ସୁରକ୍ଷା ହୋଇପାରିବ ନାହିଁ। ଏଥିପାଇଁ ସେ ନିଜ ଛାତ୍ର ଜୀବନରୁ ନିଜ ଗାଁରେ ସବୁଜ କ୍ଲବ ଗଠନ କରି କିପରି ବୃକ୍ଷରୋପଣ ମହାପୁରୁଷ ମାନଙ୍କ ନାମରେ କରୁଥିଲେ ତାହାର ଉଦାହରଣ ଦେବା ସହିତ ଜିଲ୍ଲାର ସମସ୍ତ ସ୍କୁଲ୍‌, କଲେଜ, ମହିଳା ସମିତି, କ୍ଲବ, ସାମାଜିକ ଅନୁଷ୍ଠାନ ତଥା ସାଧାରଣ ଜନତା ଏହି ମହାନ୍ ଅଭିଯାନରେ ସାମିଲ୍ ହେବାକୁ ସେ ଆହ୍ୱାନ ଦେଇଥିଲେ।

ଏଥିରେ ପ୍ରେରଣାର ଅଧ୍ୟକ୍ଷ ଡଃ ଶ୍ରୀଚନ୍ଦନ ବକ୍ତବ୍ୟ ପ୍ରଦାନ କରି କହିଲେ, ଖୋର୍ଦ୍ଧା ଜିଲ୍ଲାର ସମସ୍ତବର୍ଗର ଜନସାଧାରଣ ତଥା ବିଭିନ୍ନ ସାମାଜିକ ତଥା ସାଂସ୍କୃତି ଅନୁଷ୍ଠାନର ଏହି ଅଭିଯାନକୁ ସଫଳ କରିବା ପାଇଁ ସହଯୋଗ କରିବା ନିମନ୍ତେ ସେ ଆହ୍ୱାନ କରିଥିଲେ। ଅନ୍ୟମାନଙ୍କ ମଧ୍ୟରେ ଡଃ ଭଗବାନ ପ୍ରକାଶ, ଖୋର୍ଦ୍ଧା ଆରକ୍ଷୀ ଅଧୀକ୍ଷକ ଶ୍ରୀ ପାହି, ଖୋର୍ଦ୍ଧା ବିଧାୟକ ଶ୍ରୀ ମିତ୍ର, ଶିକ୍ଷାବିତ୍ ଡଃ ଗନ୍ଧର୍ବ ନାୟକ, ନିୟୁ ଥିଙ୍କିଙ୍ଗ ଫୋରମର ସଭାପତି ନରେନ୍ଦ୍ର ପୃଷ୍ଟି ପ୍ରମୁଖ ବକ୍ତବ୍ୟ ପ୍ରଦାନ କରି ଏହାକୁ ଏକ ଗଣଆନ୍ଦୋଳନରେ ପରିଣତ କରିବାକୁ ପ୍ରସ୍ତାବ ଦେଇଥିଲେ।

ଏହି ଅବସରରେ ଡଃ ଗନ୍ଧର୍ବ ନାୟକଙ୍କୁ ସବୁଜ ସଂଗ୍ରାମୀ ସମ୍ମାନ, ଡଃ ଶ୍ରୀନିବାସ ଘଟୁଆରୀଙ୍କୁ ଗ୍ରୀନ୍ ଆର୍ମି କମାଣ୍ଡାଣ୍ଟ, ସିଗ୍‌ମା ପବ୍ଲିକ ସ୍କୁଲ୍‌କୁ ଶ୍ରେଷ୍ଠ ଗ୍ରୀନ୍ ଆର୍ମି ସ୍କୁଲ୍‌, ଆସ୍‌ମା ସାମାଜିକ ଅନୁଷ୍ଠାନକୁ ସବୁଜ କ୍ଲବ ସମ୍ମାନ, ଇଦ୍‌ରିସ୍ ଖାନ ଓ ଦେବାଶିଷ ମହାନ୍ତିଙ୍କୁ ଗ୍ରୀନ ଆର୍ମି କମାଣ୍ଡାଣ୍ଟ ସମ୍ମାନ, ଖୋର୍ଦ୍ଧା ବିକାଶ ମଞ୍ଚର ନାରୀ ସମାଜସେବିକା ମାନଙ୍କୁ ଗ୍ରୀନ୍ କ୍ୟାପଟେନ ସମ୍ମାନ ତଥା ମହାବୀର ଗ୍ରୁପ୍ ଶିକ୍ଷାନୁଷ୍ଠାନର ଅଧ୍ୟକ୍ଷ ପ୍ରଫେସର ଅଜୟ ସ୍ୱାଇଁଙ୍କୁ ବୃକ୍ଷପ୍ରେମୀ ଭାବେ ସମ୍ମାନିତ କରାଯାଇଥିଲା।

ସୀତାରାମ ଅଗ୍ରୱାଲ

ଚିଲିକା: ଖୋର୍ଦ୍ଧା ଜିଲ୍ଲା ବାଲୁଗାଁ ନିକଟସ୍ଥ ଚାଷଙ୍ଗରା ଗ୍ରାମର କୁନି ବାଳକ (୫ ବର୍ଷ) ଆଶିଷ କୁମାର ରଣସିଂହଙ୍କୁ ଏକ ବଡ ସଫଳତା ମିଳିଛି। ନିଜ ଦକ୍ଷତା ବଳରେ ଆଶିଷ ଇଣ୍ଡିଆ ବୁକ୍ ଅଫ୍ ରେକର୍ଡ଼ରେ ସ୍ଥାନ ପାଇଛନ୍ତି।

ପ୍ରସନ୍ନ କୁମାର ରଣସିଂହ ଓ ଗୀତାଞ୍ଜଳିଙ୍କ ପୁଅ ଆଶିଷ ୧୧ ସେକେଣ୍ଡରେ ୩୦ ଜିଲ୍ଲା, ୨୮ ରାଜ୍ୟ ଓ ରାଜଧାନୀର ନାମ ନିର୍ଭୁଲ୍ ଭାବେ କହିପାରୁଛନ୍ତି। ଏଥିସହିତ ବାରମାସର ନାମ, ୬ ଋତୁ, ସାତ ବାର, ୨୫ଟି ଜାତୀୟ ସଙ୍କେତ, ୫ ମହାଦେଶ, ୭ ମହାସାଗର, ୮ ଉପଗ୍ରହର ନାମ କହିବା ସହ ୭୦ ଟି ସାଧାରଣଜ୍ଞାନର ଉତ୍ତର ଅତି ନିର୍ଭୁଲ ଭାବରେ ଆଶିଷ ଦେଇପାରୁଛନ୍ତି। ପ୍ରସନ୍ନ ଜଣେ ଜିଆରଏସ୍ ଭାବେ କାର୍ଯ୍ୟରତ ଏବଂ ପତ୍ନୀ ଗୃହିଣୀ ଅଟନ୍ତି।

ଅବସର ସମୟରେ ପୁଅକୁ ଅନ୍‌ଲାଇନ୍‌ ମାଧ୍ୟମରେ ଶିକ୍ଷା ପ୍ରଦାନ କରନ୍ତି। ଜାନୁଆରୀ ୧୭ ତାରିଖରେ ଅନ୍‌ଲାଇନ୍‌ ମାଧ୍ୟମରେ ଇଣ୍ଡିଆ ବୁକ୍ ରେକର୍ଡ଼କୁ ସମସ୍ତ ଭିଡିଓ ପଠାଯାଇଥିଲା। ମାତ୍ର ଜାନୁଆରୀ ୨୨ ତାରିଖରେ ଇଣ୍ଡିଆ ବୁକ୍ ଅଫ୍ ରେକର୍ଡରେ ଆଶିଷ କୁମାର ରଣସିଂହ ସ୍ଥାନ ପାଇଥିବା ସୂଚନା ମିଳିଥିଲା।

ଖୋର୍ଦ୍ଧା: ଖୋର୍ଦ୍ଧା ଜିଲ୍ଲାରେ ପଞ୍ଚାୟତରାଜ ଅନୁଷ୍ଠାନ ନିର୍ବାଚନ ପରିଚାଳନା ପାଇଁ ନିଯୁକ୍ତ ସାଧାରଣ ନିର୍ବାଚନ ପର୍ଯ୍ୟବେକ୍ଷକ ଧନଞ୍ଜୟ ସ୍ୱାଇଁ ଓ ଖର୍ଚ୍ଚ ପର୍ଯ୍ୟବେକ୍ଷକ ପ୍ରଶାନ୍ତ କୁମାର ମହାକୁଡ଼ ଆଜି ଅପରାହ୍ନରେ ଖୋର୍ଦ୍ଧା ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମିଳନୀ କକ୍ଷରେ ଅନୁଷ୍ଠିତ ବୈଠକରେ ଯୋଗ ଦେଇଥିଲେ। କୋଭିଡ ନିୟମ ଅନୁପାଳନ କରି ତ୍ରିସ୍ତରୀୟ ପଞ୍ଚାୟତରାଜ ନିର୍ବାଚନ କାର୍ଯ୍ୟକ୍ରମ ପରିଚାଳନା କରିବା ପାଇଁ ସାଧାରଣ ନିର୍ବାଚନ ପର୍ଯ୍ୟବେକ୍ଷକ ଧନଞ୍ଜୟ ସ୍ୱାଇଁ ଗୁରୁତ୍ୱ ଦେଇଥିଲେ। ସବୁ ପୋଲିଂ ଷ୍ଟେସନ ବିଶୋଧନ କରିବା, ସାମାଜିକ ଦୂରତ୍ୱ ରଖିବା ଓ ମାସ୍କ ବ୍ୟବହାର କରିବା ନିର୍ବାଚନରେ ନିୟୋଜିତ କର୍ମଚାରୀମାନେ ଓ ପୋଲିଂ ଏଜେଣ୍ଟମାନେ କୋଭିଡ଼ ନିୟମମାନ କାର୍ଯ୍ୟକରିବେ।

ପଞ୍ଚାୟତରାଜ ଅନୁଷ୍ଠାନ ନିର୍ବାଚନକୁ ମୁକ୍ତ, ଅବାଧ ଓ ଶାନ୍ତିପୂର୍ଣ ଭାବେ କରିବାକୁ ଆଲୋଚନା ହୋଇଥିଲା। ଆଦର୍ଶ ନିର୍ବାଚନ ଆଚରଣ ଵିଧି ପାଳନ କରାଯିବ।  କୌଣସି ଧାର୍ମିକ ଅନୁଷ୍ଠାନ, ସରକାରୀ କୋଠାବାଡ଼ରେ କୌଣସି ପ୍ରାର୍ଥୀ ନିର୍ବାଚନ ପ୍ରଚାର କରିପାରିବେ ନାହିଁ। ପ୍ରାର୍ଥୀମାନେ ହିଂସାତ୍ମକ କାର୍ଯ୍ୟକଳାପରେ ଲିପ୍ତ ରହିବେ ନାହିଁ। ଡାକବାଜି ଯନ୍ତ୍ର ବ୍ୟବହାର ପାଇଁ କର୍ତ୍ତୃପକ୍ଷଙ୍କ ଠାରୁ ପୂର୍ବରୁ ଅନୁମତି ନେବେ।  ରାତି ୮ ଘଣ୍ଟା ପରେ ଓ ସକାଳ ୭ ଘଣ୍ଟା ପୂର୍ବରୁ ମାଇକ ବାଜିବ ନାହିଁ। ସରକାରୀ କୋଠାବାଡ଼ିରେ ପ୍ରଚାରପତ୍ର ଲାଗିବ ନାହିଁ। ସମସ୍ତ ପ୍ରଚାର ପତ୍ରରେ ମୁଦ୍ରାକର ଓ ପ୍ରକାଶକଙ୍କ ନାମ ଉଲ୍ଲେଖ ରହିବ। ଭୋଟ ଗ୍ରହଣ ଆରମ୍ଭର ୩୬ ଘଣ୍ଟା ପୂର୍ବରୁ କୌଣସି ପ୍ରଚାର ହେବନାହିଁ।

ନିର୍ବାଚନ ପରିଚାଳନା ପାଇଁ ସମସ୍ତେ ସହଯୋଗ କରିବାକୁ ଆଲୋଚନା ହୋଇଥିଲା। ନିର୍ବାଚନ ଖର୍ଚ୍ଚ ପର୍ଯ୍ୟବେକ୍ଷକ ପ୍ରଶାନ୍ତ କୁମାର ମହାକୁଡ଼ ନିର୍ବାଚନ ଖର୍ଚ୍ଚ ପରିଚାଳନା ନିୟମ ସମ୍ପର୍କରେ କହିଥିଲେ। ଜିଲ୍ଲା ପରିଷଦ ପ୍ରାର୍ଥୀଙ୍କ ପାଇଁ ନିର୍ବାଚନ ଖର୍ଚ୍ଚ ସୀମା ୫ ଲକ୍ଷ ଟଙ୍କା ରଖାଯାଇଛି। ସେମାନେ ୫ ଟି କାର ବା ଜିପ ଓ ୧୦ ଟି ୨ ଚକିଆ ଯାନ ନିର୍ବାଚନ କାର୍ଯ୍ୟ ପାଇଁ ବ୍ୟବହାର କରିପାରିବେ। ସରପଞ୍ଚ ଓ ପଞ୍ଚାୟତ ସମିତି ସଭ୍ୟ ପ୍ରାଥୀଙ୍କ ନିର୍ବାଚନ ଖର୍ଚ୍ଚ ସୀମା ୨ ଲକ୍ଷ ଟଙ୍କା ରଖାଯାଇଛି। ସେମାନେ ନିର୍ବାଚନ କାର୍ଯ୍ୟରେ ୨ ଟି ଜିପ ବା କାର, ୫ ଟି ୨ ଚକିଆ ଯାନ ବ୍ୟବହାର କରିପାରିବେ। ନିର୍ବାଚନରେ ପ୍ରତିଦ୍ବନ୍ଦିତା କରୁଥିବା ପ୍ରାର୍ଥୀ ଦୈନନ୍ଦିନ ଖର୍ଚ୍ଚର ବିବରଣୀ ନିର୍ଦ୍ଧାରିତ ଫର୍ମରେ ଲେଖିବେ ଓ ଖର୍ଚ୍ଚ ହିସାବ ରେଜିଷ୍ଟର ରଖିବେ।

ଖୋର୍ଦ୍ଧା ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର ସରକାରଙ୍କ କୋଭିଡ଼ କଟକଣା ମାର୍ଗଦର୍ଶିକା ସମସ୍ତେ ପାଳନ କରିବା ପାଇଁ କହିଥିଲେ। ନିର୍ବାଚନ ଆଚରଣ ବିଧି ଖିଲାପ କଲେ କାର୍ଯ୍ୟାନୁଷ୍ଠାନ ହେବ। ଉକ୍ତ ବୈଠକରେ ଖୋର୍ଦ୍ଧା ଆରକ୍ଷୀ ଅଧିକ୍ଷକ ରାଜକିଶୋର ଦୋରା, ଅତିରିକ୍ତ ଜିଲ୍ଲାପାଳ ମନୋଜ କୁମାର ପାଢ଼ୀ, ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦେଶକ ଦିଗନ୍ତ ରାଉତରାୟ, ଜିଲ୍ଲା ପଞ୍ଚାୟତ ଅଧିକାରୀ ଓ ବିଭିନ୍ନ ରାଜନୈତିକ ଦଳର କର୍ମକର୍ତାମାନେ ଯୋଗ ଦେଇଥିଲେ।

ଖୋର୍ଦ୍ଧା: ଖୋର୍ଦ୍ଧା ଜିଲ୍ଲାପାଳଙ୍କ ଅଧ୍ୟକ୍ଷତାରେ ନିକଟରେ ଲଘୁ ଖଣିଜ ଦ୍ରବ୍ୟ ଚୋରା ଚାଲାଣକୁ ରୋକ ଲଗାଇବା ନିମନ୍ତେ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଥିଲା। ଏହାକୁ କଡ଼ାକଡି ଭାବେ କାର୍ଯ୍ୟକାରୀ କରିବାକୁ ଜିଲ୍ଲାପାଳ ପୋଲିସ ଓ ତହସିଲ ପ୍ରଶାସନକୁ ନିର୍ଦେଶ ଦେଇଥିଲେ।

ସେହି ଅନୁସାରେ ଜିଲ୍ଲା ଆରକ୍ଷୀ ଅଧିକ୍ଷକ ରାଜକିଶୋର ଦୋରାଙ୍କ ନିର୍ଦ୍ଦେଶକ୍ରମେ ବିଗତ ଦୁଇ ଦିନ ହେଲା ଖୋର୍ଦ୍ଧା ଜିଲ୍ଲାର ବିଭିନ୍ନ ଥାନା ମାନଙ୍କ ତରଫରୁ ବେଆଇନ ଚୋରା ମାଙ୍କଡା ପଥର ଚାଲାଣ କରୁଥିବା ଖଣିମାନଙ୍କ ଉପରେ ପୋଲିସ ଚଢ଼ାଉ ଜାରିରହିଛି । ତେବେ ଗତକାଲି ରାତି ଏବଂ ଆଜି ପୂର୍ବାହ୍ନ ସୁଦ୍ଧା ଚଢ଼ାଉ ସମୟରେ ଚୋରା ଚାଲାଣ କରୁଥିବା ମୋଟ ୧୧ ଗୋଟି ମାଙ୍କଡା ପଥର ଗାଡିକୁ ପୋଲିସ ଜବତ କରିବା ସହ ୭ ଗୋଟି ମାମଲା ରୁଜୁ କରି ୬ ଜଣ ଡ୍ରାଇଭରଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି।

ଜବତ ହୋଇଥିବା ମୋଟ ମାଙ୍କଡା ପଥରର ଆନୁମାନିକ ମୂଲ୍ୟ ୧ ଲକ୍ଷ ୨୦ ହଜାର ଟଙ୍କା ହେବ ବୋଲି ଜଣାପଡିଛି। ତେବେ ଜବତ ସମୁଦାୟ ୧୧ ଗୋଟି ଗାଡ଼ି ମଧ୍ୟରୁ ନିରାକାରପୁର ଥାନା ଚାରି ଗୋଟି, ଜଙ୍କିଆ ଥାନା ତିନି ଗୋଟି, ଟାଉନ ଥାନା ତିନି ଗୋଟି ଏବଂ ବେଗୁନିଆ ଥାନା ଗୋଟାଏ ଗାଡ଼ି ଜବତ କରିଛି।

ଅନୁରୂପ ଭାବେ ଗିରଫ ୬ ଡ୍ରାଇଭର ମଧ୍ୟରୁ ନିରାକାରପୁର ଥାନା ଦୁଇ ଜଣଙ୍କୁ, ଜଙ୍କିଆ ଥାନା ତିନି ଜଣଙ୍କୁ ଏବଂ ବେଗୁନିଆ ଥାନା ଜଣଙ୍କୁ ଗିରଫ କରିଛି।

ସେହିପରି ଭାବେ ଭୁବନେଶ୍ୱର ଉପଖଣ୍ଡ ଅଧିନସ୍ଥ ବାଲିପାଟଣା ତହସିଲ ଅଞ୍ଚଳରେ ଆଜି ତିନି ଗୋଟି ବେଆଇନ ବାଲି ବୋଝେଇ ଟ୍ରକ ଜବତ ହେବା ସହ ଏକ ଗୋଟି ମାମଲା ରୁଜୁ କରାଯିବା ସହ ଜଣେ ଡ୍ରାଇଭରକୁ ଗିରଫ କରାଯାଇଛି l ଏବଂ ଉକ୍ତ ତିନି ଟ୍ରକରୁ ତିନି ଲକ୍ଷ ଟଙ୍କା ଜରିମାନା ଆଦାୟ କରାଯାଇଥିବାର ଖୋର୍ଦ୍ଧା ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର ସୂଚନା ଦେଇଛନ୍ତି । ଆଗକୁ ମଧ୍ୟ ଏହିପରି ଚଢ଼ାଉ ଜିଲ୍ଲାରେ ଜାରିରହିବ ବୋଲି ଉଭୟ ଜିଲ୍ଲାପାଳ ଏବଂ ଏସପି କହିଛନ୍ତି l

ଖୋର୍ଦ୍ଧା: ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟର ଖବରକାଗଜ ହକରମାନଙ୍କ ପାଇଁ ଆଜି ସ୍ୱତନ୍ତ୍ର କୋଭିଡ ସହାୟତା ପ୍ରଦାନର ଶୁଭାରମ୍ଭ କରିଛନ୍ତି। ଏଥି ସହିତ ଖବରକାଗଜ ହକରମାନଙ୍କୁ ଅଣ ସଂଗଠିତ କ୍ଷେତ୍ର ସାମାଜିକ ସୁରକ୍ଷା ଯୋଜନାରେ ସାମିଲ କରାଯାଇଛି। ଏହି ସହାୟତା ନିମନ୍ତେ ରାଜ୍ୟର ୭୩୦୦ ହକରମାନଙ୍କ ପାଇଁ ସୂଚନା ଓ ଲୋକସମ୍ପର୍କ ବିଭାଗ ପକ୍ଷରୁ ଡିଜିଟାଲ ଡାଟା ବେସ ପ୍ରସ୍ତୁତ କରାଯାଇ ପଞ୍ଜୀକୃତ କରାଯାଇଛି। ପ୍ରତ୍ୟେକ ପଞ୍ଜୀକୃତ ହକର ୬୦୦୦ ଟଙ୍କା ଲେଖାଏଁ ସହାୟତା ପାଇଛନ୍ତି।

ଏହି ଅର୍ଥ ସେମାନଙ୍କ ବ୍ୟାଙ୍କ ଆକାଉଣ୍ଟକୁ ପଠାଯାଇଛି। ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ଏହି ସହାୟତା ରାଶି ପ୍ରଦାନ କରାଯାଇଛି। କୋଭିଡ ମହାମାରୀ ସମୟରେ ମଧ୍ୟ ହକରମାନେ ପାଠକମାନଙ୍କୁ ଖବରକାଗଜ ଯୋଗାଇଛନ୍ତି। ଖବରକାଗଜ ହକର ମାନଙ୍କୁ ଅଣ ସଂଗଠିତ ସାମାଜିକ ସୁରକ୍ଷା ଯୋଜନାରେ ସାମିଲ କରାଯାଇ ଦୁର୍ଘଟଣାଜନିତ ମୃତ୍ୟୁ, ସ୍ୱାଭାବିକ ମୃତ୍ୟୁ ଓ ଦୁର୍ଘଟଣାରେ ଅକ୍ଷମ ହୋଇଥିବା ହକରମାନଙ୍କ ପାଇଁ ମଧ୍ୟ ସହାୟତା ବ୍ୟବସ୍ଥା କରାଯାଇଛି।

ଜିଲ୍ଲାପାଳ, ଖୋର୍ଦ୍ଧାଙ୍କ କାର୍ଯ୍ୟାଳୟ ଓସୱାନ ହଲଠାରେ ଭିଡିଓ କନଫରେନସିଂ ମାଧ୍ୟମରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଖୋର୍ଦ୍ଧା ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର, ଅତିରିକ୍ତ ଜିଲ୍ଲାପାଳ ମନୋଜ କୁମାର ପାଢ଼ୀ, ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ମାନସ ରଞ୍ଜନ ବିଶ୍ୱାଳ, ସହକାରୀ ଜିଲ୍ଲା ଶ୍ରମ ଅଧିକାରୀ ଓ ଖବରକାଗଜ ହକର ପ୍ରମୁଖ ଯୋଗ ଦେଇଥିଲେ। ଖୋର୍ଦ୍ଧା ଉପଖଣ୍ଡର ୧୬୭ ଜଣ ଖବରକାଗଜ ହକରଙ୍କର ଡାଟାବେସ ପ୍ରସ୍ତୁତ କରାଯାଇ ତାଲିକାଭୁକ୍ତ କରାଯାଇଛି। ଏହି ତାଲିକାଭୁକ୍ତ ଖବରକାଗଜ ହକରମାନଙ୍କର ବ୍ୟାଙ୍କ ଆକାଉଣ୍ଟକୁ ୬୦୦୦ ଟଙ୍କା କୋଭିଡ ସହାୟତା ବାବଦରେ ପଠାଯାଇଛି।

ଖବରକାଗଜ ହକରମାନେ ଏହା ଦ୍ୱାରା ବିଶେଷ ଭାବେ ଉପକୃତ ହେବେ ବୋଲି ଜିଲ୍ଲାପାଳ ଆଶାପ୍ରକାଶ କରିଛନ୍ତି। ଖବରକାଗଜ ହକରମାନଙ୍କର ବ୍ୟାଙ୍କ ଆକାଉଣ୍ଟକୁ ସହାୟତା ଅର୍ଥ ପଠାଯାଇଥିବାରୁ ସେମାନେ ଆନନ୍ଦିତ ହେବା ସହ ମାନ୍ୟବର ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜ୍ଞାପନ କରିଛନ୍ତି।

ଖୋର୍ଦ୍ଧା: ଆଜି ଖୋର୍ଦ୍ଧା ଜିଲ୍ଲାରେ ୫୯ ତମ ଗୃହରକ୍ଷୀ ପ୍ରତିଷ୍ଠା ଦିବସ ପାଳନ ହୋଇଯାଇଛି। ଜିଲ୍ଲା ପୋଲିସ ରିଜର୍ଭ ଗ୍ରାଉଣ୍ଡ, ତରତୁରା ଠାରେ ଉକ୍ତ କାର୍ଯ୍ୟକ୍ରମ ପାଳିତ ହୋଇଯାଇଅଛି। କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଖୋର୍ଦ୍ଧା ଏସପି ତଥା ଜିଲ୍ଲା ଗୃହରକ୍ଷୀ କାମାଣ୍ଡାଣ୍ଟ, ରାଜକିଶୋର ଦୋରା ଯୋଗଦେଇଥିଲେ।

କରୋନା କଟକଣାକୁ ଦୃଷ୍ଟିରେ ରଖି ଉକ୍ତ କାର୍ଯ୍ୟକ୍ରମ ନିରାଡ଼ମ୍ବର ଭାବେ ପାଳନ ହୋଇଅଛି।  ଗୃହରକ୍ଷୀମାନେ ଅଭ୍ୟନ୍ତରୀଣ ନିରାପତ୍ତା, ଆଇନ ଶୃଙ୍ଖଳା, ଟ୍ରାଫିକ ପରିଚାଳନା ତଥା ବିପର୍ଯୟ ପ୍ରଶମନ କ୍ଷେତ୍ରରେ ପୋଲିସ, ଅଗ୍ନିଶମ ବାହିନୀ ତଥା ଜିଲ୍ଲା ପ୍ରଶାସନକୁ ସହଯୋଗ କରି ଜନସାଧାରଣଙ୍କୁ ଉତ୍ସର୍ଗୀକୃତ ସେବା ଦେବାରେ ଗୁରୁତ୍ୱପୂର୍ଣ ଭୂମିକା ବହନ କରିଆସୁଥିବାର ଏସପି ତାଙ୍କ ଅଭିଭାଷଣରେ କହିଥିଲେ।

ଅନୁରୂପ ଭାବେ କୋଭିଡ ମହାମାରୀ ସମୟରେ ମଧ୍ୟ ଗୃହରକ୍ଷୀ ମାନେ ନିସ୍ଵାର୍ଥପର ଭାବେ ଜନସାଧାରଣଙ୍କ ସେବା କରି ଆସୁଥିବାର କହିଥିଲେ ଏସପି ଶ୍ରୀ ଦୋରା। ଏହି ଅବସରରେ କରୋନା କାଳରେ ଟାଙ୍ଗୀ ଥାନା ଅଞ୍ଚଳର ଜଣେ କୋଭିଡ ଆକ୍ରାନ୍ତଙ୍କ ଶବଦାହ କାର୍ଯ୍ୟରେ ସହଯୋଗ କରିଥିବାରୁ ଟାଙ୍ଗୀ ଥାନା ଗୃହ ରକ୍ଷୀ ସୂର୍ଯ୍ୟକାନ୍ତ ମହାପାତ୍ରଙ୍କୁ ଏସପି ମାନପତ୍ର ଓ ପଦକ ଦେଇ ସମ୍ମାନିତ କରିଥିଲେ।

ଉକ୍ତ କାର୍ଯ୍ୟକ୍ରମରେ ଜିଲ୍ଲା ଅତିରିକ୍ତ ଏସପି, ଖୋର୍ଦ୍ଧା ଏସଡ଼ିପିଓ, ସମସ୍ତ ଡ଼ିଏସପି, ଟାଉନ ଥାନା ଆଇଆଇସି, ଜଙ୍କିଆ ଥାନା ଆଇଆଇସି, ବିଭିନ୍ନ ଥାନାର ହୋମଗାର୍ଡ ଏବଂ ଅନ୍ୟାନ୍ୟ ପୋଲିସ କର୍ମଚାରୀମାନେ ଉପସ୍ଥିତ ଥିଲେ।

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର ତହସିଲରେ ଆଜି ନୂତନ ତହସିଲଦାର ଭାବେ କାର୍ଯ୍ୟରେ ଯୋଗଦେଇଛନ୍ତି ଓଏଏସ ଅଧିକାରୀ କୁଞ୍ଜବିହାରୀ ବଡ଼ଜେନା। ଶ୍ରୀ ବଡ଼ଜେନା ଏହା ପୂର୍ବରୁ ନୟାଗଡ଼ ଜିଲ୍ଲାରେ ସହକାରୀ ଜିଲ୍ଲାପାଳ ଭାବେ କାର୍ଯ୍ୟରତ ଥିଲେ। ତେବେ ବାଣପୁର ତହସିଲ ଖୋର୍ଦ୍ଧା ଜିଲ୍ଲାର ଏକ ଗୁରୁତ୍ୱପୂର୍ଣ୍ଣ ତହସିଲ ହୋଇଥିବାବେଳେ ଏଠାରେ ଜନସାଧାରଣଙ୍କ ଅଭିଯୋଗକୁ ପ୍ରାଥମିକତା ଭିତ୍ତିରେ ସମାଧାନ କରିବେ ବୋଲି ତହସିଲଦାର ଆମ ପ୍ରତିନିଧିଙ୍କୁ କହିଛନ୍ତି।

ଅନୁରୂପ ଭାବେ ମ୍ୟୁଟେସନ, ଜମି ପଟ୍ଟା ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ କାର୍ଯ୍ୟଗୁଡିକୁ ଏକ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ଆବେଦନକାରୀଙ୍କୁ ପ୍ରଦାନ କରାଯିବ ବୋଲି ଶ୍ରୀ ବଡ଼ଜେନା କହିଛନ୍ତି। ବେଆଇନ ଲଘୁ ଖଣିଜ ଦ୍ରବ୍ୟ ଚୋରାଚାଲାଣକୁ ଆଦୌ ପ୍ରଶ୍ରୟ ଦିଆଯିବନାହିଁ ଏବଂ ସରକାରୀ ରାଜସ୍ୱ ଲୁଟୁଥୁବା ଚୋରା ଲଘୁ ଖଣିଜଦ୍ରବ୍ୟ ମାଫିଆଙ୍କୁ ଦୃଢ଼ହସ୍ତରେ ଦମନ କରାଯିବ ବୋଲି ତହସିଲଦାର କହିଛନ୍ତି।

ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ସୋସିଆଲ ମିଡ଼ିଆ ‘ଟ୍ୱିଟର’ ଦ୍ୱାରା ଜନସାଧାରଣଙ୍କ ଅଭିଯୋଗକୁ ସମାଧାନ କରିବାକୁ ପ୍ରାଥମିକତା ଦିଆଯିବ ବୋଲି ତହସିଲଦାର କହିଛନ୍ତି।  ତେବେ ଆଜି କାର୍ଯ୍ୟଭାର ସମ୍ଭାଳିବା ପରେ ତହସିଲର ସମସ୍ତ କର୍ମଚାରୀମାନେ ନୂତନ ତହସିଲଦାରଙ୍କୁ ପୁଷ୍ପଗୁଚ୍ଛ ଦେଇ ସ୍ୱାଗତ କରିବା ସହ ଶୁଭେଚ୍ଛା ଜଣାଇଥିଲେ।

ସୂଚନା ଥାଉକି ଗତ ଜୁନ ମାସ ୩୦ ତାରିଖରେ ପୂର୍ବତନ ତହସିଲଦାର ମନ୍ମଥ ବେହରାଙ୍କ କାର୍ଯ୍ୟକାଳ ସରିବା ପରଠାରୁ ଦୀର୍ଘ ଚାରି ମାସ ହେଲା ଉକ୍ତ ଗୁରୁତ୍ୱପୂର୍ଣ୍ଣ ପଦବୀ ଖାଲି ପଡିଥିଲା।

ଭୁବନେଶ୍ବର: ରାଜ୍ୟ ସରକାର ବର୍ତ୍ତମାନ ପଞ୍ଚାୟତ ନିର୍ବାଚନ ପାଇଁ ବେଶ ତତ୍ପର ହୋଇ ଉଠିଛନ୍ତି। ତେବେ ଏହି ନିର୍ବାଚନ ପୂର୍ବରୁ ସଂରକ୍ଷଣ ତାଲିକା ପ୍ରସ୍ତୁତ କରିବା ପାଇଁ ଜିଲ୍ଲାପାଳଙ୍କୁ ନିର୍ଦ୍ଦେଶ ଦିଆଯାଇଛି। ସେହି ଅନୁସାରେ ଖୋର୍ଦ୍ଧା ଜିଲ୍ଲାପାଳ ବିଭିନ୍ନ ପଞ୍ଚାୟତ ସମିତ ଏବଂ ଜିଲ୍ଲାପରିଷଦ ଆସନ ପାଇଁ ସଂରକ୍ଷଣ ତାଲିକା ଘୋଷଣା କରିଛନ୍ତି। ତେବେ ଏହା ଚୁଡାନ୍ତ ତାଲିକା ନୁହେଁ। ଜିଲ୍ଲା ଲୋକଙ୍କର ଅଭିଯୋଗ ପରେ ଏଥିରେ ସଂଶୋଧନ କରାଯିବ।

ସେଥିପାଇଁ ଏହି ତାଲିକା ଜିଲ୍ଲାର ସମସ୍ତ ବ୍ଲକ, ଉପଜିଲ୍ଲାପାଳ ଏବଂ ଜିଲ୍ଲାପାଳ କାର୍ଯ୍ୟାଳୟରେ ସମସ୍ତଙ୍କ ଅବଗତି ପାଇଁ ମରାଯିବ। ଏହି ସଂରକ୍ଷଣ ଉପରେ କାହାର ଅଭିଯୋଗ ଥିଲେ ସେମାନେ 16 ତାରିଖ ସୁଦ୍ଧା ଲିଖିତ ଭାବେ ଜଣାଇବେ। ଏହି ଅଭିଯୋଗ ଖୋର୍ଦ୍ଧା ଜିଲ୍ଲା ପଞ୍ଚାୟତ ଅଧିକାରୀଙ୍କୁ ଡାକଯୋଗେ କିମ୍ବା ଇମେଲ କରିପାରିବେ। ତେବେ ଯେଉଁ ସଂରକ୍ଷଣ ତାଲିକା ପ୍ରକାଶ ହୋଇଛି ତାହା ହେଲା…

ପଞ୍ଚାୟତ ସମିତି ସଂରକ୍ଷଣ ତାଲିକା ଖୋର୍ଦ୍ଧା

ଖୋର୍ଦ୍ଧା- ପଛୁଆବର୍ଗ , ଚିଲିକା-ଅନୁସୂଚିତ ଜାତି ମହିଳା, ଜଟଣୀ- ଅଣସଂରକ୍ଷିତ, ଟାଙ୍ଗି-ମହିଳା, ବାଣପୁର-ଅସଂରକ୍ଷିତ, ବାଲିଅନ୍ତା-ମହିଳା, ବାଲିପାଟଣା-ଅନୁସୂଚିତ ଜାତି, ବେଗୁନିଆ-ଅନୁସୂଚିତ ଜନଜାତି ମହିଳା, ବୋଲଗଡ- ପଛୁଆବର୍ଗ ମହିଳା , ଭୁବନେଶ୍ବର – ଅଣସଂରକ୍ଷିତ

ଜିଲ୍ଲା ପରିଷଦ ଜୋନ ସଂରକ୍ଷଣ ତାଲିକା ଖୋର୍ଦ୍ଧା

ଖୋର୍ଦ୍ଧା 1- ଅସଂରକ୍ଷିତ, ଖୋର୍ଦ୍ଧା 2- ଅନୁସୂଚିତଜାତି ମହିଳା, ଖୋର୍ଦ୍ଧା 3 – ମହିଳା, ଚିଲିକା 4- ମହିଳା, ଚିଲିକା 5- ଅନୁସୂଚିତ ଜାତି ମହିଳା, ଚିଲିକା 6- ମହିଳା, ଜଟଣୀ 7 – ପଛୁଆବର୍ଗ ମହିଳା, ଜଟଣୀ 8 – ମହିଳା. ଟାଙ୍ଗୀ 9 – ଅଣସଂରକ୍ଷିତ

ସୀତାରାମ ଅଗ୍ରୱାଲ

ବାଣପୁର: ଶାଳିଆ ନଈରେ ଭାସିଯାଇ ନିଖୋଜ ଥିବା ଖୋର୍ଦ୍ଧା ଜିଲ୍ଲା ମାଣିକପୁର ଗ୍ରାମର ଚରଣ ବେହେରାଙ୍କ ମୃତ ଶରୀରକୁ ଅଗ୍ନିଶମ ବାହିନୀ ଠାବ କରିଛି। ଦୀର୍ଘ ଦୁଇ ଦିନ ହେବ ଉଭୟ ବାଣପୁର ଓ ବାଲୁଗାଁ ଅଗ୍ନିଶମ ବାହିନୀ, ସ୍ଥାନୀୟ ଜନସାଧାରଣ ଏବଂ ପୋଲିସ ଅକ୍ଲାନ୍ତ ପରିଶ୍ରମ କରିଥିଲେ ସୁଦ୍ଧା ନିଖୋଜ ଚରଣଙ୍କ ପତ୍ତା ମିଳିପାରିନଥିଲା। ଶେଷରେ ଆଜି ପୂର୍ବାହ୍ନରେ ବାଣପୁର ଏବଂ ବାଲୁଗାଁ ଅଗ୍ନିଶମ ଅଧିକାରୀଙ୍କ ଦ୍ୱାରା ଗଠିତ ଟିମ ସର୍ଚ୍ଚ ଅପେରସନ କରୁଥୁବା ବେଳେ ବେଙ୍ଗରାଜପଲ୍ଲୀ ଗ୍ରାମ ନିକଟସ୍ଥ ନଦୀରୁ ଚରଣଙ୍କ ମୃତ ଦେହ ଉଦ୍ଧାର ହୋଇଥିବାର ସୂଚନା ଦେଇଛନ୍ତି ଉଭୟ ଅଗ୍ନିଶମ ଅଧିକାରୀ।

ଉଲ୍ଲେଖ ଯୋଗ୍ୟ ଯେ, ଗତ ୨୦ ତାରିଖ ସକାଳ ୬ ଘଟିକାରେ ଚରଣ ବେହେରା (୬୦) ଶୌଚ୍ଚ ନିମନ୍ତେ ମାଣିକପୁର ଗ୍ରାମର ଜାମୁଆ ତୁଠ (ଶାଳିଆ ନଈ) ମଧ୍ୟକୁ ଯାଇଥିବାବେଳେ ଜଳର ପ୍ରଖର ସ୍ରୋତରେ ଭାସିଯାଇଥିଲେ। ଖବର ପାଇ ବାଣପୁର ଅଗ୍ନିଶମ ବାହିନୀ ସକାଳ ୭ ଘଟିକାରୁ ଉଦ୍ଧାର କାର୍ଯ୍ୟ ଜାରି ରଖିଥିଲେ ମଧ୍ୟ ସନ୍ଧାନ ମିଳିପାରିନଥିଲା। ପରବର୍ତ୍ତୀ ସମୟରେ ବାଲୁଗାଁ ଅଗ୍ନିଶମ ବାହିନୀ, ବାଣପୁର ପୋଲିସ ଏବଂ ସ୍ଥାନୀୟ ଲୋକଙ୍କ ସାହାଯ୍ୟରେ ଉଦ୍ଧାର କାର୍ଯ୍ୟ ଜାରି ରହିଥିଲା। କିନ୍ତୁ ଦୀର୍ଘ ୨ ଦିନର ଅକ୍ଲାନ୍ତ ପରିଶ୍ରମ ପରେ ଚରଣଙ୍କ ମୃତ ଦେହ ଉଦ୍ଧାର ହୋଇପାରିଛି।