Tag: ଜାତୀୟ ରାଜପଥ

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଦିନକୁ ଦିନ ବ୍ରହ୍ମପୁର ସଂଲଗ୍ନ ଜାତୀୟ ରାଜପଥରେ ଅସାମାଜିକ କାର୍ଯ୍ୟକଳାପମାନ ବୃଦ୍ଧି ପାଉଥିବାରୁ ରାଜପଥରେ ପାଟ୍ରୋଲିଂ କଡ଼ାକଡ଼ି କରିବାକୁ ବହୁଦିନ ହେଲା ଦାବି ହୋଇ ଆସୁଥିଲା। ଯାହାକୁ ଦେଖି ଗତକାଲିଠାରୁ ବ୍ରହ୍ମପୁର ପୋଲିସ୍ ଜିଲ୍ଲା ପକ୍ଷରୁ ଏକ ଜାତୀୟ ରାଜପଥ ପାଟ୍ରୋଲିଂ ଗାଡ଼ିକୁ ବ୍ରହ୍ମପୁର ଏସ୍‌ପି ପିନାକ ମିଶ୍ର ମାଣ୍ଡିଆପଲ୍ଲୀ ଛକଠାରେ ପତାକା ଦେଖାଇ ଶୁଭ ଉଦ୍‌ଘାଟନ କରିଥିଲେ।

ଏହି ପାଟ୍ରୋଲିଂ ଗାଡ଼ିଟି ଗୋପାଳପୁର-ଗୋଳନ୍ଥରା ମଧ୍ୟବର୍ତ୍ତୀ ଅଂଚଳରେ ପାଟ୍ରୋଲିଂ କରି ସମସ୍ତ ଆସାମାଜିକ ଗତିବିଧି, ଦୁର୍ଘଟଣା ଏବଂ ଅନ୍ୟାନ୍ୟ ସମସ୍ୟାମାନ ବିଷୟରେ ତତ୍‌କାଳ ପଦକ୍ଷେପ ଗ୍ରହଣ କରିବ। ଏହି ଗାଡ଼ିଟି ସପ୍ତାହକୁ ସାତଦିନ ୨୪ ଘଣ୍ଟା କାର୍ଯ୍ୟକ୍ଷମ ହେବ ବୋଲି ଏସ୍‌ପି ଶ୍ରୀ ମିଶ୍ର କହିଛନ୍ତି। ସେହିପରି ଜିଲ୍ଲାର ରମ୍ଭାଠାରୁ ଛତ୍ରପୁର ଏବଂ ଛତ୍ରପୁରଠାରୁ ଗିରିସୋଲା ମଧ୍ୟରେ ବି ପାଟ୍ରୋଲିଂ କରାଯିବା ନେଇ ଗତକାଲି ଶୁଭ ଉଦ୍‌ଘାଟନ ଅନୁଷ୍ଠିତ ହୋଇଛି।

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଛତ୍ରପୁର ଜାତୀୟ ରାଜପଥରେ ଆଜି ପୃଥକ ପୃଥକ ଦୁର୍ଘଟଣାମାନ ଘଟି ଜଣଙ୍କର ମୃତ୍ୟୁ ହୋଇଥିବାବେଳେ ୫ଜଣ ପୋଲିସ୍ କର୍ମଚାରୀ ଆହତ ହୋଇଛନ୍ତି। ଜାତୀୟ ରାଜପଥର ତାମ୍ପରା ନିକଟରେ ଘନ କୁହୁଡ଼ି ଯୋଗୁଁ ଆଜି ଏକ ଗ୍ୟାସ ଟ୍ୟାଙ୍କର ଭାରସାମ୍ୟ ହରାଇ ଓଲଟି ପଡ଼ିବା ଦ୍ୱାରା ଛତ୍ରପୁର ଅଂଚଳରେ ଭୟର ବାତାବରଣ ଖେଳିଯାଇଥିଲା। ପ୍ରଶାସନ ତତ୍ପରତା ଦେଖାଇ ପ୍ରଥମେ ଅଂଚଳର ବିଦ୍ୟୁତ ସରବରାହକୁ ବନ୍ଦ କରିବା ସହ ରାଜପଥର ଦୁଇପାଶ୍ୱର୍ଠାରୁ ଗଂଜାମ ପର୍ଯ୍ୟନ୍ତ ଉଭୟ ପାଶ୍ୱର୍ରେ ଗାଡ଼ିଚାଳନାକୁ ବନ୍ଦ କରିଦିଆଯାଇଥିଲା।

ଘଟଣାସ୍ଥଳରେ ଅଗ୍ନିଶମ ବିଭାଗ ପହଞ୍ଚି ସ୍ପ୍ରେ କରିଥିବାବେଳେ ଟ୍ୟାଙ୍କର ନିକଟକୁ ଯିବା ରାସ୍ତାକୁ ସିଲ୍ କରି ଦିଆଯାଇଥିଲା। ଘଟଣସ୍ଥଳରେ ଛତ୍ରପୁର ଉପଜିଲ୍ଲାପାଳ ପ୍ରିୟସ ରଂଜନ ପୃଷ୍ଟି, ଅତିରିକ୍ତ ଏସ୍‌ପି ଠାକୁର ପ୍ରସାଦ ପାତ୍ର, ତହସିଲ୍‌ଦାର ନୀଳମାଧବ ଭୋଇ, ଥାନାଧିକାରୀ ପ୍ରିୟସ ରଜନ ଛୋଟରାୟ ଉପସ୍ଥିତ ରହି କାର୍ଯ୍ୟ ପରିଚାଳନା କରିଥିଲେ। ଏହି ଗ୍ୟାସ ଟ୍ୟାଙ୍କର ଉଦ୍ଧାର କାର୍ଯ୍ୟ ପାଇଁ ଆସୁଥିବା ଏକ ପୋଲିସ୍ ଭ୍ୟାନ ମଧ୍ୟ ରାସ୍ତାରେ ଓଲଟି ପଡ଼ିଥିଲା। ଭ୍ୟାନ ମଧ୍ୟରେ ଥିବା ଚାଳକ ସୁଲେଖ ପ୍ରଧାନ, ଗୋପାଳ ସେଠୀ, ଘନଶ୍ୟାମ ରେଡ଼ି, ସଂଜୟ ବାରିକ, ସରଜେଣ୍ଟ ସଂଜୟ ଆହତ ହୋଇଥିଲେ। ସଂଗେ ସଂଗେ ଆହତଙ୍କୁ ବ୍ରହ୍ମପୁର ମେଡ଼ିକାଲ୍ ନିଆଯାଇଥିବାବେଳେ ଜଣକର ଅବସ୍ଥା ଗୁରୁତର ରହିଛି।

ଏହାର କିଛି ସମୟ ପରେ ଏହି ଦିଗରେ ଆସୁଥିବା ଏକ ଟ୍ରକ ରାସ୍ତାରେ ସାଇଡ଼୍ କରିବା ବେଳେ ଖାଲ ମଧ୍ୟକୁ ପଶିଯାଇଥିଲା। ଫଳରେ ଗାଡ଼ିର ଡ଼୍ରାଇଭରଙ୍କ ଶୋଚନୀୟ ମୃତ୍ୟୁ ଘଟିଛି। ଅଂଚଳରେ ସକାଳୁ ସକାଳୁ ଘନକୁହୁଡ଼ି ହୋଇଥିବାରୁ ରାସ୍ତା ଦେଖାଯାଉନଥିବାରୁ ଏଭଳି ଦୁର୍ଘଟଣାମାନ ଘଟିଥିବା କୁହାଯାଉଛି। ଆଗାମୀ କିଛିଦିନ ମଧ୍ୟ ଏଭଳି କୁହୁଡ଼ି ଦେଖାଯିବାରୁ ସାବଧାନାରେ ଗାଡ଼ି ଚଳାଇବାକୁ ପ୍ରଶାସନ ପକ୍ଷରୁ କୁହାଯାଇଛି। ତେବେ ଗ୍ୟାସ ଟ୍ୟାଙ୍କର ଓଲଟିବା ଏହା ପ୍ରଥମ ଘଟଣା ନୁହେଁ। ଗତ କିଛି ବର୍ଷ ତଳେ ଛତ୍ରପୁର କଲେଜ ଛକ ନିକଟରେ ମଧ୍ୟ ଏକ ଗ୍ୟାସ ଟ୍ୟାଙ୍କର ଓଲଟି ଯିବାରୁ ଅଂଚଳର ପ୍ରାୟ ସମସ୍ତ ଘରର ରୋଷେଇ କାର୍ଯ୍ୟ ବନ୍ଦ କରିବାକୁ ପଡ଼ିଥିଲା। ଆଜିର ଟ୍ୟାଙ୍କର ଓଲଟିବା ପରେ ଅଂଚଳରେ ପୁରୁଣା ଭୟ ଦେଖିବାକୁ ମିଳିଥିଲା।

ଚାନ୍ଦପୁର: ୧୬ ନମ୍ବର ଜାତୀୟ ରାଜପଥରେ ଆଉ ଏକ ସଡକ ଦୁର୍ଘଟଣା। ଚାନ୍ଦପୁର ନିକଟସ୍ଥ ଓସକେଇ ଖୋଲ ଛକରେ ଏହି ମର୍ମନ୍ତୁଦ ସଡକ ଦୁର୍ଘଟଣା ଘଟିଛି। କାର ସହିତ ମୋପେଡ୍ ବାଇକ ମଧ୍ୟରେ ଘଟିଥିବା ଏହି ଦୁର୍ଘଟଣାରେ ମୋପେଡ୍ ଆରୋହୀଙ୍କ ମୃତ୍ୟୁ ହୋଇଛି।

ଘଟଣାରୁ ପ୍ରକାଶ ଯେ, ଔରଙ୍ଗା ବାଦରୁ  ଏକ ପରିବାର  କାର୍ ଯୋଗେ  ପୁରୀ ଵୁଲିବାକୁ ଯାଉଥିବା ବେଳେ ମୋପେଡ୍ ବାଇକକୁ ଓସକେଇ ଖୋଲ ଛକ ନିକଟରେ ଧକ୍କା ଦେଇଥିଲା। ଧକ୍କା ଏତେ ଭୀଷଣ ଥିଲା ଯେ ମୋପେଡ୍ ଆରୋହୀ ପ୍ରାୟ ୧୦ ଫୁଟ ଉପରକୁ ଉଠି ଯାଇଥିଲେ। ଯାହାଫଳରେ ମୋପେଡ୍ ଆରୋହୀଙ୍କ ଘଟଣା ସ୍ଥଳରେ ମୃତ୍ୟୁ ହୋଇଥିଲା। ମୃତ ଆରୋହୀ ଜଣଙ୍କ ଚାନ୍ଦପୁର ଥାନା  ଓସ୍ତପଡା ଗ୍ରାମର ବୋଲି ଜଣାପଡିଛି।

ଏହି ଦୁର୍ଘଟଣା ପରେ ସ୍ଥାନୀୟ ଲୋକ ଉତ୍ୟକ୍ତ ହୋଇ ରାସ୍ତା ଅବରୋଧ କରିଛନ୍ତି। ରାସ୍ତାର ଉଭୟ ପାର୍ଶ୍ଵରେ ଶହ ଶହ ଗାଡି ଅଟକ ରହିଥିବା ଖବର ମିଳିଛି। ଘଟଣା ସ୍ଥଳରେ ଚାନ୍ଦପୁର ପୋଲିସ ପହଞ୍ଚି ଗାଡ଼ିକୁ ଜବତ କରିବା ସହ ତଦନ୍ତ ଆରମ୍ଭ କରଛି।

ସୀତାରାମ ଅଗ୍ରଓ୍ବାଲ

କୁହୁଡି: ୧୬ ନଂ ଜାତୀୟ ରାଜପଥ କୁହୁଡି ନିକଟରେ ଭାରସାମ୍ୟ ହରାଇ ଓଲଟିଲା ମାଲ ବୋଝେଇ ଟ୍ରକ୍। ଟ୍ରକ୍ ଧକ୍କାରେ ଗୋଟିଏ ଘର ସଂପୁର୍ଣ ଭାଙ୍ଗି ରୁଜି ଯାଇଥିବାବେଳେ  ଗୋଟିଏ ଟାଟା ଏସି ଗାଡି ମଧ୍ୟ୍ୟ  ଭାଙ୍ଗି ରୁଜି ଯାଇଥିବା ଜଣା ପଡିଛି। ଏହି  ଦୁର୍ଘଟଣାରେ ଟ୍ରକ୍ର ହେଲପର ଗୁରୁତର ଆହତ ହୋଇଥିବାବେଳେ  ଏକ ପୋଷା କୁକୁର  ମଧ୍ୟ୍ୟ ମୃତ୍ୟୁବରଣ କରିଛି।

ଗତକାଲି ରାତିରେ  ଆନ୍ଧ୍ରପ୍ରଦେଶରୁ ଟମାଟୋ ବୋଝେଇ କରି ଏକ ଟ୍ରକ କୋଲକତା ଅଭିମୁଖେ ଯାଉଥିଲା। ହଠାତ୍ କୌଣସି କାରଣରୁ ଟ୍ରକଟି ଭାରସାମ୍ୟ ହରାଇ ରାସ୍ତା କଡରେ ଥିବା ଏକ ଘର ଭିତରକୁ ପଶି ଯାଇ ଓଲଟି ପଡିଥିଲା। ଏହି ଘଟଣାରେ ଟ୍ରକର ଚାଳକ ସୁରକ୍ଷିତ ଥିବା ବେଳେ ହେଲପର ଜଣକ ଟ୍ରକ୍‌ ଓ ଘର କାନ୍ଥ ମଧ୍ୟ୍ୟରେ ଚାପି ହୋଇ ରହିଥିଲା। ଟାଙ୍ଗୀ   ଓ ବାଲୁଗାଁ  ଅଗ୍ନିଶମ ବାହିନୀ ର ଅକ୍ଳାନ୍ତ ପ୍ରଚେଷ୍ଟା ଫଳରେ  ଟ୍ରକ୍ ର ହେଲପର କୁ ଗୁରୁତର ଅବସ୍ଥାରେ ଉଦ୍ଧାର କରା ଯାଇଥିଲା। ହେଲପରକୁ ଗୁରୁତର ଅଵସ୍ଥାରେ ଟାଙ୍ଗୀ ସରକାରୀ ମେଡିକାଲରେ ଭର୍ତ୍ତି କରା ଯାଇଛି। ଟ୍ରକ ହେଲପର ନାମ ଏ ରାମ ଓ ତାର ଘର ଆନ୍ଧ୍ର ପ୍ରଦେଶର ବିଜୱାଡା ବୋଲି ଜଣା ପଡିଛି। ଟ୍ରକ୍ ଧକ୍କା ଦେବା ଯୋଗୁଁ   ଜଗନ୍ନାଥ ବିଶ୍ୱାଳଙ୍କର ଗୋଟିଏ ବଖରା ଆଜଵେଷ୍ଟସ ଘର ଓ ଗୋଟିଏ ଟାଟା ଏସି ଗାଡି ସଂପୂର୍ଣ୍ଣ ଭାଙ୍ଗି ଯାଇଛି। ଏହା ସହ ଗୋଟିଏ ପୋଷା କୁକୁର ମରି ଯାଇଛି। ତେବେ ଏଥିରେ ଅନ୍ୟ କେହି ଆହତ ହୋଇ ନଥିବା ଖବର ମିଳିଛି। କୁହୁଡି ଫାଣ୍ଡି ପୋଲିସ୍ ଘଟଣାର ତଦନ୍ତ କରୁଛି।

ସମୀକ୍ଷା ବ୍ୟୁରୋ

ନାଚୁଣୀ, ୨/୧: ନାଚୁଣୀ ନିକଟସ୍ଥ କହ୍ନେଇପୁର ଛକଠାରେ ଗତକାଲି ଜାତୀୟ ରାଜପଥଠାରେ ଏକ ସଡକ ଦୁର୍ଘଟଣା ଘଟିଛି। ଏହି ଦୁର୍ଘଟଣାରେ ଏକ ବାଇକ୍‌ ଓ କାର୍‌ ଉଭୟ ଭାରସାମ୍ୟ ହରାଇ ଦୁର୍ଘଟଣାଗସ୍ତ ହୋଇଥିବାର ସୂଚନା ମିଳିଛି। ତେବେ ଭାରସାମ୍ୟ ହରାଇ ଗାଡ଼ି ଦୁଇଟି ଓଲଟି ପଡ଼ିଥିବାବେଳେ ଏଥିରେ ଥିବା ଯାତ୍ରୀମାନେ ଆହତ ହୋଇଛନ୍ତି। ଆହତଙ୍କୁ ନିକଟସ୍ଥ ଘରୋଇ ଡାକ୍ତରଖାନାରେ ଚିକିତ୍ସା କରାଯିବା ପାଇଁ ଭର୍ତ୍ତି କରାଯାଇଥିଲା।

ସୂଚନାରୁ ପ୍ରକାଶ ଯେ,  ଦ୍ରୁତ ଗତିରେ ବାଇକ୍‌ ଚାଳକଜଣକ କାର ସମ୍ମୁଖରେ ଆସି ଯିବାରୁ ହଠାତ୍‌ କାର୍‌ ଜଣକ ଦୁର୍ଘଟଣାକୁ ଏଡାଇବାକୁ ଯାଇ ବ୍ରେକ୍‌ ଦେଇଥିଲେ। ଯାହାଫଳରେ ଉଭୟ ବାଇକ୍‌ ଏବଂ କାର୍‌ ନିକଟସ୍ଥ ରାସ୍ତା ପାର୍ଶ୍ବରେ ପାଣି ଜମିଥିବା ଏକ ବିଲରେ ପଡିଥିଲେ। ଏହି ଦୁର୍ଘଟଣାରେ ଉଭୟ ଗାଡ଼ି ବହୁ କ୍ଷତିଗ୍ରସ୍ତ ହୋଇଥିଲେ ମଧ୍ୟ ସୌଭାଗ୍ୟବଶତଃ ଏଥିରେ ଥିବା ଯାତ୍ରୀମାନଙ୍କର ବିଶେଷ କିଛି କ୍ଷତି ହୋଇନାହିଁ। ଘଟଣାସ୍ଥଳରୁ ନାଚୁଣୀ ଫାଣ୍ଡି ପୋଲିସ୍‌ ଗାଡ଼ି ଦୁଇଟିକୁ ଜବତ କରି ଏହି ଘଟଣାର ତଦନ୍ତ କରୁଛି। ଦୁର୍ଘଟଣାଗସ୍ତ ହୋଇଥିବା କାର୍‌ଟି ବ୍ରହ୍ମପୁରର ହୋଇଥିବାବେଳେ ବାଇକ୍‌ଟି ଖୋର୍ଦ୍ଧା ଅଞ୍ଚଳର ବୋଲି ଜଣାପଡିଛି।

ରିପୋର୍ଟର : ସୀତାରାମ ଅଗ୍ରଓ୍ବାଲ