Tag: ପ୍ରଧାନମନ୍ତ୍ରୀ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ସ୍ୱଚ୍ଛ ଭାରତ ମିଶନ ସହରାଞ୍ଚଳ ୨.୦ ଏବଂ ଅଟଳ ମିଶନ ଫର ରିଜୁଭେନେସନ ଆଣ୍ଡ ଅର୍ବାନ ଟ୍ରାନ୍ସଫର୍ମେସନ –ଅମୃତ ମିଶନ ୨.୦ର ଶୁଭାରମ୍ଭ କରିଛନ୍ତି । କେନ୍ଦ୍ର ମନ୍ତ୍ରୀ ଶ୍ରୀ ହରଦୀପ ସିଂ ପୁରୀ, ଶ୍ରୀ ଗଜେନ୍ଦ୍ର ସିଂ ଶେଖାୱତ, ଶ୍ରୀ ପ୍ରହ୍ଲାଦ ସିଂ ପଟେଲ, ଶ୍ରୀ କୌଶଳ କିଶୋର, ଶ୍ରୀ ବିଶ୍ୱେଶ୍ୱର ଟୁଡୁ, ବିଭିନ୍ନ ରାଜ୍ୟର ମନ୍ତ୍ରୀଗଣ, ମହାନଗର ନିଗମ, ପୌରପାଳିକାର ମେୟର ଓ କମିଶନରମାନେ ଏହି କାର‌୍ୟ୍ୟକ୍ରମରେ ଅଂଶଗ୍ରହଣ କରିଥିଲେ ।

ପ୍ରଧାନମନ୍ତ୍ରୀ ଏହି ଅବସରରେ କହିଥିଲେ ଯେ, ୨୦୧୪ରେ ଦେଶକୁ ଖୋଲା ଶୌଚମୁକ୍ତ କରିବା ଲାଗି ଦେଶବାସୀ ସଂକଳ୍ପ ନେଇଥିଲେ ଏବଂ ଏହି ସଂକଳ୍ପକୁ ପୂରଣ କରି ଆଜି ଦେଶରେ ୧୦ କୋଟି ଶୌଚାଳୟ ନିର୍ମାଣ କରାଯାଇସାରିଛି । ବର୍ତ୍ତମାନ ‘ସ୍ୱଚ୍ଛ ଭାରତ ମିଶନ-ସହରାଞ୍ଚଳ ୨.୦’ର ଲକ୍ଷ୍ୟ ହେଉଛି ସହରଗୁଡ଼ିକୁ ଆବର୍ଜନାମୁକ୍ତ, ସମ୍ପୂର୍ଣ୍ଣ ଆବର୍ଜନାମୁକ୍ତ କରିବା ।

ପ୍ରଧାନମନ୍ତ୍ରୀ ଗୁରୁତ୍ୱାରୋପ କରି କହିଥିଲେ ଯେ, ମିଶନ ଅମୃତ ପରବର୍ତ୍ତୀ ପର‌୍ୟ୍ୟାୟର ଲକ୍ଷ୍ୟ ହେଉଛି ଦେଶରେ ବର୍ଜ୍ୟ ଏବଂ ପ୍ରଦୂଷିତ ଜଳ ପରିଚାଳନାରେ ସୁଧାର ଆଣିବା ଏବଂ ଆମ ସହରଗୁଡ଼ିକୁ ଜଳ-ସୁରକ୍ଷିତ ସହରରେ ପରିଣତ କରିବା ସହିତ ଆମ ନଦୀଗୁଡ଼ିକୁ ବର୍ଜ୍ୟ ଜଳମୁକ୍ତ କରିବା । ଆମ ନଦୀଗୁଡ଼ିକରେ ଯେପରି ଆଦୌ ବର୍ଜ୍ୟ ଜଳ ନିଷ୍କାସିତ ହେବ ନାହିଁ ତାହା ସୁନିଶ୍ଚିତ କରିବା ଏହି ଅଭିଯାନର ଲକ୍ଷ୍ୟ ।

ସହରାଞ୍ଚଳର ପୁନର୍ଗଠନ ଏବଂ ସ୍ୱଚ୍ଛତାରେ ଏହି ପରିବର୍ତ୍ତନର ଏହି ସଫଳତାକୁ ପ୍ରଧାନମନ୍ତ୍ରୀ ମହାତ୍ମା ଗାନ୍ଧୀଙ୍କ ଉଦ୍ଦେଶ୍ୟରେ ଉତ୍ସର୍ଗ କରିଥିଲେ । ସେ କହିଥିଲେ ଯେ, ଏହିସବୁ ଅଭିଯାନ ମହାତ୍ମା ଗାନ୍ଧୀଙ୍କ ଦ୍ୱାରା ଅନୁପ୍ରାଣିତ ଏବଂ କେବଳ ତାଙ୍କରି ଆଦର୍ଶରେ ସାକାର ରୂପ ନେଉଛି। ସେ ମଧ୍ୟ ଶୌଚାଳୟ ନିର୍ମାଣ କାରଣରୁ ମା’ ଓ ଝିଅମାନଙ୍କର ସୁବିଧା ବିଷୟରେ ଉଲ୍ଲେଖ କରିଥିଲେ ।

ଦେଶର ଭାବନାକୁ ସଲାମ କରି, ପ୍ରଧାନମନ୍ତ୍ରୀ ମତବ୍ୟକ୍ତ କରିଥିଲେ ଯେ, ବର୍ତ୍ତମାନ ସ୍ୱଚ୍ଛ ଭାରତ ଅଭିଯାନ ଏବଂ ଅମୃତ ମିଶନର ଯାତ୍ରା ପ୍ରତ୍ୟେକ ଦେଶବାସୀଙ୍କୁ ଗର୍ବିତ କରୁଛି ।
ପ୍ରଧାନମନ୍ତ୍ରୀ ନିଜର ଭାବନାକୁ ବ୍ୟକ୍ତ କରି କହିଥିଲେ ଯେ, ସ୍ୱଚ୍ଛ ଭାରତ ଅଭିଯାନ ଏବଂ ଅମୃତ ମିଶନର ଯାତ୍ରାରେ ଗୋଟିଏ ଦେଶର ଲକ୍ଷ୍ୟ, ସମ୍ମାନ, ଗାରିମା ଏବଂ ଆକାଂକ୍ଷା ରହିଛି; ଏଥିସହିତ ମାତୃଭୂମି ପାଇଁ ଅତୁଳନୀୟ ଭଲ ପାଇବା ରହିଛି ।

ଆମ୍ବେଦକର ଅନ୍ତର୍ଜାତୀୟ କେନ୍ଦ୍ରରେ ଆଜିର କାର‌୍ୟ୍ୟକ୍ରମ ଆୟୋଜନ କରାଯାଇଥିବା ସମ୍ପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ, ବାବା ସାହେବ ଆମ୍ବେଦକର ସହରାଞ୍ଚଳ ବିକାଶକୁ ଅସମାନତା ଦୂର କରିବାର ଏକ ଶ୍ରେଷ୍ଠ ମାଧ୍ୟମ ଭାବେ ବିଶ୍ୱାସ କରୁଥିଲେ । ଏକ ଉନ୍ନତ ଜୀବନର ଆଶା ନେଇ ଗାଁରୁ ବହୁ ସଂଖ୍ୟକ ଲୋକ ସହରକୁ ଚାଲି ଆସିଥାନ୍ତି । ସେମାନେ ନିଯୁକ୍ତି ପାଇଯାଆନ୍ତି, କିନ୍ତୁ ଗାଁ ଅପେକ୍ଷା ମଧ୍ୟ ଅତି କଷ୍ଟକର ସ୍ଥିତିରେ ଜୀବନଧାରଣ କରିଥାନ୍ତି। ଏହା ସେମାନଙ୍କୁ ଦ୍ୱୈତ ସମସ୍ୟାରେ ପକାଇଥାଏ, ଗୋଟିଏ ପଟେ ସେମାନେ ଘର ଠାରୁ ଦୂରରେ ରହିଥାନ୍ତି ଏବଂ ଅନ୍ୟପଟେ ସହରରେ କଷ୍ଟକର ପରିସ୍ଥିତିରେ ରହିବାକୁ ପଡ଼ିଥାଏ । ଅସମାନତା ଦୂର କରି ଏହି ପରିସ୍ଥିତି ବଦଳାଇବା ଲାଗି ବାବା ସାହେବ ଗୁରୁତ୍ୱାରୋପ କରୁଥିଲେ । ସ୍ୱଚ୍ଛ ଭାରତ ଅଭିଯାନ ଏବଂ ଅମୃତ ମିଶନର ପରବର୍ତ୍ତୀ ପର‌୍ୟ୍ୟାୟ ବାବା ସାହେବଙ୍କ ସ୍ୱପ୍ନକୁ ପୂରଣ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ପ୍ରଧାନମନ୍ତ୍ରୀ କହିଥିଲେ ।

ଆଜି ଆମେ ପାଖାପାଖି ୭୦ ପ୍ରତିଶତ ଦୈନିକ ବର୍ଜ୍ୟ ପରିଚାଳନା କରୁଛୁ । ବର୍ତ୍ତମାନ ଆମକୁ ଏହା ୧୦୦ ପ୍ରତିଶତ ପର‌୍ୟ୍ୟନ୍ତ ନେବାକୁ ହେବ । ସହରାଞ୍ଚଳ ବିକାଶ ମନ୍ତ୍ରଣାଳ ପାଇଁ ବର୍ଦ୍ଧିତ ଆବଣ୍ଟନ ସମ୍ପର୍କରେ ମଧ୍ୟ ପ୍ରଧାନମନ୍ତ୍ରୀ ସୂଚନା ଦେଇଥିଲେ । ସେ କହିଥିଲେ ଯେ ୨୦୧୪ ପୂର୍ବବର୍ତ୍ତୀ ପାଞ୍ଚ ବର୍ଷରେ ମନ୍ତ୍ରଣାଳୟକୁ ପାଖାପାଖି ୧.୨୫ ଲକ୍ଷ କୋଟି ଟଙ୍କା ଆବଣ୍ଟନ କରାଯାଇଥିଲା, ଅନ୍ୟପକ୍ଷରେ ୨୦୧୪ ପରବର୍ତୀ ୭ ବର୍ଷରେ ମନ୍ତ୍ରଣାଳୟକୁ ପ୍ରାୟ ୪ ଲକ୍ଷ କୋଟି ଟଙ୍କା ଆବଣ୍ଟନ କରାଯାଇଛି ।

ସହରାଞ୍ଚଳ ବିକାଶ ସଂକ୍ରାନ୍ତ କୌଣସି କାର‌୍ୟ୍ୟକ୍ରମରେ ଉଠାଦୋକାନୀ ଏବଂ ବୁଲାବିକାଳୀମାନଙ୍କୁ ଯେକୌଣସି ସହରର ଗୁରୁତ୍ୱପୂର୍ଣ୍ଣ ଅଂଶୀଦାର ଭାବେ ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ । ପ୍ରଧାନମନ୍ତ୍ରୀ ଦୋହରାଇଥିଲେ ଯେ ଏମାନଙ୍କ ପାଇଁ ପ୍ରଧାନମନ୍ତ୍ରୀ ସ୍ୱନିଧି ଯୋଜନା ଏକ ଆଶାର ଆଲୋକ ନେଇ ଆସିଛି । ୪୬ ଲକ୍ଷରୁ ଅଧିକ ଉଠାଦୋକାନୀମାନଙ୍କୁ ସ୍ୱନିଧି ଯୋଜନାର ଲାଭ ମିଳିଛି । ୨୫ ଲକ୍ଷରୁ ଅଧିକ ଲୋକ ୨.୫ ହଜାର କୋଟି ଟଙ୍କା ପାଇଛନ୍ତି । ପ୍ରଧାନମନ୍ତ୍ରୀ କହିଥିଲେ ଯେ ଏହି ଉଠାଦୋକାନୀମାନେ ଡିଜିଟାଲ କାରବାରକୁ ପ୍ରୋତ୍ସାହିତ କରୁଛନ୍ତି ଏବଂ ସେମାନେ ଋଣ ପରିଶୋଧ କରିବାରେ ଏକ ଭଲ ରେକର୍ଡ ବଜାୟ ରଖିଛନ୍ତି । ଏହି ଯୋଜନା କାର‌୍ୟ୍ୟକାରୀ କରିବା କ୍ଷେତ୍ରରେ ଉତର ପ୍ରଦେଶ ଏବଂ ମଧ୍ୟପ୍ରଦେଶ ଭଳି ବଡ଼ ରାଜ୍ୟ ନେତୃତ୍ୱ ନେବା ଖୁସିର ବିଷୟ ବୋଲି ସେ କହିଥିଲେ ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ସ୍ୱତନ୍ତ୍ର ଗୁଣବତ୍ତା ସମ୍ପନ୍ନ ୩୫ଟି ବିଭିନ୍ନ ପ୍ରଜାତିର ଶସ୍ୟକୁ ଆଜି ଦେଶ ଉଦ୍ଦେଶ୍ୟରେ ଉତ୍ସର୍ଗ କରିଛନ୍ତି । ଭିଡିଓ କନଫରେନ୍ସିଂ ଜରିଆରେ ଅନୁଷ୍ଠିତ ସମାରୋହରେ ଶ୍ରୀ ମୋଦୀ ନବନିର୍ମିତ ରାୟପୁର ସ୍ଥିତ ଜାତୀୟ ବାୟୋଟିକ ଷ୍ଟ୍ରେସ ମ୍ୟାନେଜମେଂଟ ପ୍ରତିଷ୍ଠାନକୁ ମଧ୍ୟ ଦେଶ ଉଦ୍ଦେଶ୍ୟରେ ସମର୍ପଣ କରିଥିଲେ ।

ଏହି ଅବସରରେ ପ୍ରଧାନମନ୍ତ୍ରୀ କୃଷି ବିଶ୍ୱବିଦ୍ୟାଳୟ ଗୁଡିକୁ ଗ୍ରୀନ୍ କ୍ୟାମ୍ପସ ସମ୍ମାନ ମଧ୍ୟ ପ୍ରଦାନ କରିଥିଲେ । ନୂଆ ନୂଆ ପଦ୍ଧତି ଅନୁସରଣ କରୁଥିବା ଚାଷୀମାନଙ୍କ ସହ ମତ ବିନିମୟ କରିବା ଲାଗି ସେ ସମବେତ ଜନତାଙ୍କୁ ମଧ୍ୟ ଉଦ୍ବୋଧନ ଦେଇଥିଲେ ।
ଜମ୍ମୁ ଓ କଶ୍ମୀର ରାଜ୍ୟର ଗନ୍ଦରବାଲସ୍ଥିତ ଶ୍ରୀମତୀ ଜୟତୁନ ବେଗମଙ୍କ ସହ କଥାବାର୍ତ୍ତା କାଳରେ ପ୍ରଧାନମନ୍ତ୍ରୀ ଶ୍ରୀମତୀ ବେଗମ୍ କିପରି ଅତ୍ୟାଧୁନିକ କୃଷି ପଦ୍ଦତି ପ୍ରୟୋଗ କରି ଅନ୍ୟାନ୍ୟ ଚାଷୀମାନଙ୍କୁ ତାଲିମ ଦେବା ସହ ଉପତ୍ୟକାରେ ବାଳିକା ଶିକ୍ଷାକୁ ଆଗେଇ ନେବା ବିଷୟ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ କ୍ରୀଡାରେ ମଧ୍ୟ ଜମ୍ମୁ ଓ କଶ୍ମୀରର ଝିଅମାନେ ଉନ୍ନତ ପ୍ରଦର୍ଶନ କରୁଛନ୍ତି । ସେ କହିଥିଲେ ଯେ ଅଳ୍ପ ଜମି ଥିବା ଚାଷୀମାନଙ୍କ ପ୍ରତି ସରକାର ଅଗ୍ରାଧିକାର ଦେଉଛନ୍ତି ଓ ସେମାନେ ଏହାର ସୁବିଧା ସିଧାସଳଖ ପାଉଛନ୍ତି । ଉତ୍ତରପ୍ରଦେଶ ବୁଲନ୍ଦ ସହରର ଜନୈକ ଚାଷୀ କୁଲୱନ୍ତ ସିଂଙ୍କୁ ପ୍ରଧାନମନ୍ତ୍ରୀ ସେ ଦିଗରେ କିପରି ବିଭିନ୍ନ କିସମର ବିହନ ଉତ୍ପାଦନ କରୁଛନ୍ତି ବୋଲି ପଚାରିଥିଲେ । ପ୍ରଧାନମନ୍ତ୍ରୀ ତାଙ୍କୁ କୃଷି ପ୍ରତିଷ୍ଠାନ ପୁଷାର ବୈଜ୍ଞାନିକମାନଙ୍କ ସହ ଆଲୋଚନା ଯୋଗୁଁ କି ପ୍ରକାର ସଫଳତା ହାସଲ ହୋଇଛି ପଚାରିଥିଲେ । ଚାଷୀଙ୍କ ଦ୍ୱାରା ନିଜ ଶସ୍ୟର ପ୍ରକ୍ରିୟାକରଣ ପାଇଁ ଏହାର ପ୍ରଶଂସା କରିଥିଲେ। ବଜାର ସୁବିଧା, ଉନ୍ନତ ମାନର ବିହନ, ମୃତ୍ତିକା ସ୍ୱାସ୍ଥ୍ୟକାର୍ଡ ଇତ୍ୟାଦି ଦ୍ୱାରା ସରକାର ଚାଷୀମାନଙ୍କ ଉତ୍ତମ ମୂଲ୍ୟ ଦେବା ପାଇଁ ଉଦ୍ୟମ କରୁଛନ୍ତି ବୋଲି ପ୍ରଧାନମନ୍ତ୍ରୀ କହିଛନ୍ତି ।

ପ୍ରଧାନମନ୍ତ୍ରୀ ଗୋଆ, ବାର୍ଡେଜର ଶ୍ରୀମତୀ ଦର୍ଶନା ପେଦେଙ୍କରଙ୍କୁ ସେ କିପରି ବିବିଧ ଫସଲ ଉତ୍ପାଦନ କରିବା ସହ ପଶୁପାଳନ କରୁଥିବା ପଚାରିଥିଲେ । ସେ ନଡିଆ ଚାଷୀଙ୍କ ଲାଭ ଉପରେ ମଧ୍ୟ ପଚାରିଥିଲେ । ମହିଳା ଚାଷୀ ଉଦ୍ୟୋଗପତି ଭାବେ ଉଭା ହେଉଥିବାରୁ ଶ୍ରୀ ମୋଦୀ ଏଥିରେ ସନ୍ତୋଷବ୍ୟକ୍ତ କରିଥିଲେ ।

ମଣିପୁରର ଶ୍ରୀ ଥୋଇବା ସିଂଙ୍କ ସହ କଥାବାର୍ତ୍ତାବେଳେ ପ୍ରଧାନମନ୍ତ୍ରୀ ସଶସ୍ତ୍ର ସେନାରୁ ଅବସର ଗ୍ରହଣ ପରେ ଚାଷରେ ମନୋନିବଶେ କରିଥିବାରୁ ତାଙ୍କୁ ଧନ୍ୟବାଦ ଦେଇଥିଲେ । ସେ କୃଷି ସହ ମତ୍ସ୍ୟପାଳନ ଓ ଅନ୍ୟାନ୍ୟ କୃଷି କାର‌୍ୟ୍ୟ କରୁଥିବାରୁ ପ୍ରଧାନମନ୍ତ୍ରୀ ତା’ର ପ୍ରଶଂସା କରି ଜୟଜବାନ, ଜୟକିଶାନ, ଜୟ ବିଜ୍ଞାନର ଉଦାହରଣ ଦେଇଥିଲେ ।
ପ୍ରଧାନମନ୍ତ୍ରୀ ଉତ୍ତରାଖଣ୍ଡ ଉଦାମସିଂହ ନଗରର ଶ୍ରୀ ସୁରେଶ ରାଣାଙ୍କୁ କିପରି ସେ ଫସଲ ଆରମ୍ଭ କଲେ ପଚାରିଥିଲେ ।

ପ୍ରଧାନମନ୍ତ୍ରୀ ଉତ୍ତରାଖଣ୍ଡର ଚାଷୀମାନେ କୃଷି ଉତ୍ପାଦକ ସଂଘ(ଏଫପିଓ) ପରାମର୍ଶ ମାନି କାର‌୍ୟ୍ୟ କରୁଥିବାରୁ ଅଭିନନ୍ଦନ ଜଣାଇବା ସହ କୃଷକମାନେ ମିଳିମିଶି କାମ କଲେ ଲାଭାନ୍ୱିତ ହେବେ ବୋଲି କହିଥିଲେ। ସରକାର କୃଷକଙ୍କୁ ସମସ୍ତ ଅର୍ଥ ଓ ଭିତ୍ତିଭୂମି ଯୋଗାଇବାକୁ ଚେଷ୍ଟା କରୁଛନ୍ତି ବୋଲି କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଗତ ଛଅ-ସାତବର୍ଷ ମଧ୍ୟରେ କୃଷିରେ ଥିବା ଆହ୍ୱାନଗୁଡିକର ମୁକାବିଲା ନିମନ୍ତେ ବିଜ୍ଞାନ ଓ ବୈଷୟିକ ଜ୍ଞାନର ବହୁଳ ଉପଯୋଗ କରାଯାଉଛି । ଆମେ ନୂତନ ପରିସ୍ଥିତିକୁ ସୁହାଇଲା ଭଳି ଅଧିକ ପୌଷ୍ଟିକ ବିହନ, ବିଶେଷକରି ଜଳବାୟୁ ଭିତ୍ତିକ ପରିବର୍ତ୍ତନରେ ଦେବା ପାଇଁ ପ୍ରାଧାନ୍ୟ ଦେଉଛି ବୋଲି ପ୍ରଧାନମନ୍ତ୍ରୀ କହିଥିଲେ ।
କରୋନା ବୈଶ୍ୱିକ ମହାମାରୀ କାଳରେ କିପରି ଗତବର୍ଷ ଅନେକ ରାଜ୍ୟରେ ପଙ୍ଗପାଳ ଆକ୍ରମଣ ହୋଇଥିଲା ତାହାର ସ୍ମୃତିଚାରଣ କରିଥିଲେ । ଚାଷୀମାନେ ଘୋର କ୍ଷତିର ସମ୍ମୁଖୀନ ହେବା ପୂର୍ବରୁ ଭାରତ ପ୍ରଗାଢ ଉଦ୍ୟମ କରି ଏହି ପରିସ୍ଥିତିରୁ ଚାଷୀମାନଙ୍କୁ ରକ୍ଷା କରିପାରିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଯେତେବେଳେ ଚାଷ ଏବଂ ଚାଷୀ ସୁରକ୍ଷା ଜାଲ ଭିତରେ ରହନ୍ତି ସେତେବେଳେ ସେମାନଙ୍କ ଅଭିବୃଦ୍ଧି ମଧ୍ୟ ଦୃତ ହୋଇଥାଏ । ଜମିର ସୁରକ୍ଷା ପାଇଁ ୧୧କୋଟି ମୃତ୍ତିକା ସ୍ୱାସ୍ଥ୍ୟ କାର୍ଡଜାରୀ କରାଯାଇଛି । ଚାଷୀଙ୍କୁ ସୁହାଇଲା ଭଳି ଶହେଟି ବାକି ପଡିଥିବା ଜଳସେଚନ ପ୍ରକଳ୍ପ କାର‌୍ୟ୍ୟ ଶେଷ କରି ଚାଷୀମାନଙ୍କୁ ପାଣି ଯୋଗାଇବା ସହ, ଶସ୍ୟ ସୁରକ୍ଷା କରି ଅଧିକ ଅମଳ ପାଇବା ପାଇଁ ଉନ୍ନତ କିସମର ବିହନ ଯୋଗାଇ ଦିଆଯାଉଛି ।

ନ୍ୟୁନତମ ସହାୟକ ମୂଲ୍ୟ ବୃଦ୍ଧି ସହ ଶସ୍ୟ ସଂଗ୍ରହ ପ୍ରକ୍ରିୟାକୁ ମଧ୍ୟ ଅଧିକ ଉନ୍ନତ କରାଯାଇଛି । ଏହା ଚାଷୀଙ୍କୁ ବେଶ୍ ସୁହାଉଛି । ରବି ଋତୁରେ ୪୩୦ ଲକ୍ଷ ଟନ୍ ଗହମ ସଂଗ୍ରହ କରାଯାଇ ଚାଷୀମାନଙ୍କୁ ୮୫ହଜାର କୋଟିରୁ ଅଧିକ ଟଙ୍କା ପ୍ରଦାନ କରାଯାଇଛି । ବୈଶ୍ୱିକ ମହାମାରୀ କାଳରେ ଗହମ ସଂଗ୍ରହ କେନ୍ଦ୍ର ତିନିଗୁଣ ବୃଦ୍ଧି କରାଯାଇଥିବା ପ୍ରଧାନମନ୍ତ୍ରୀ ପ୍ରକାଶ କରିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଚାଷୀମାନଙ୍କୁ ପ୍ରଯୁକ୍ତିଜ୍ଞାନ ଓ ସହ ଯୋଡିବା ଯୋଗୁଁ ସେମାନେ ବ୍ୟାଙ୍କରୁ ଋଣ ପାଇପାରୁଛନ୍ତି । ଆଜିକାଲି ଚାଷୀମାନେ ପାଣିପାଗ ଖବର ମଧ୍ୟ ସହଜରେ ପାଇପାରୁଛନ୍ତି । ନିକଟରେ ଦୁଇକୋଟିରୁ ଅଧିକ ଚାଷୀ ପରିବାଙ୍କୁ କିଶାନ କ୍ରେଡିଟ୍ କାର୍ଡ ଯୋଗାଇ ଦିଆଯାଇଛି ପ୍ରଧାନମନ୍ତ୍ରୀ କହିଥିଲେ ଯେ ଜଳବାୟୁ ପରିବର୍ତ୍ତନ ଯୋଗୁ ନୂଆ ନୂଆ ରୋଗ, କୀଟପତଙ୍କ ଓ ମହାମାରୀଦେଖାଦେଉଛି । ଯାହାକି ମାନବ ସମାଜ ସହିତ ଗୃହପାଳିତ ପଶୁ ଓ ଫସଲ ପାଇଁ ଚିନ୍ତାର କାରଣ ପାଲଟିଛି । ଏଥିନେଇ ସୁଦୀର୍ଘ ଗବେଷଣାର ଆବଶ୍ୟକତା ରହିଛି । ଯେତେବେଳେ ବିଜ୍ଞାନ ଓ ସମାଜ ଏକାଠି କାର‌୍ୟ୍ୟ କରିବେ ଫଳାଫଳ ମଧ୍ୟ ଭଲ ହେବ । କୃଷକ ଓ ବିଜ୍ଞାନୀଙ୍କ ଯୋଗସୂତ୍ର ସ୍ଥାପନ ହେଲେ ତାହା ନୂତନ ଆହ୍ୱାନର ସମ୍ମୁଖୀନ ହେବା ସହ ଦେଶକୁ ଶକ୍ତି ମଧ୍ୟ ପ୍ରଦାନ କରିବ ।

ପ୍ରଧାନମନ୍ତ୍ରୀ କହିଥିଲେ ଯେ ଚାଷୀମାନଙ୍କୁ କେବଳ ଫସଲ ଛାଡି ଅନ୍ୟ ଅଧିକ ଲାଭ ପ୍ରଦାନକାରୀ କାର‌୍ୟ୍ୟ ପାଇଁ ପ୍ରୋତ୍ସାହନ ଦିଆଯାଉଛି । ବିଜ୍ଞାନ ଓ ଗବେଷଣା ଦ୍ୱାରା ବାଜରା ଜାତୀୟ ଶସ୍ୟ ଅଧିକ ଉତ୍ପାଦନର ଆବଶ୍ୟକତା ରହିଛି । ଏହାର ଉଦ୍ଦେଶ୍ୟ ହେଲା ସ୍ଥାନୀୟ ଆବଶ୍ୟକତା ଅନୁସାରେ ଉତ୍ପାଦନ ଦେଶର ଅନ୍ୟାନ୍ୟ ସ୍ଥାନରେ କରାଯାଇପାରିବ । ଆସନ୍ତାବର୍ଷକୁ ଜାତିସଂଘ ଆନ୍ତର୍ଜାତୀୟ ବାଜରା ବର୍ଷ ଘୋଷଣା କରିଥିବାରୁ ଚାଷୀମାନେ ଏହାର ସୁଯୋଗ ନେବାକୁ ପ୍ରଧାନମନ୍ତ୍ରୀ ନିବେଦନ କରିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଆମର ପ୍ରାଚୀନ ଚାଷ ପରମ୍ପରା ସହ ଭବିଷ୍ୟତରେ ଆଗକୁ ବଢିବା ମଧ୍ୟଖୁବ୍ ଗୁରୁତ୍ୱପୂର୍ଣ୍ଣ । ଭବିଷ୍ୟତ ଚାଷ ପାଇଁ ଆଧୁନିକ ପ୍ରଯୁକ୍ତିବିଜ୍ଞାନ ଓ ନୂଆ ଚାଷ ଉପକରଣ ମୁଖ୍ୟ ଆୟୁଧ ହେବ । “ଆଧୁନିକ କୃଷି ଯନ୍ତ୍ରପାତି ଓ ଅନ୍ୟାନ୍ୟ ଉପକରଣର ବ୍ୟବହାର ଆଦି ତାର ସଫଳତା ଦର୍ଶାଉଛି” ବୋଲି ଶ୍ରୀ ମୋଦି କହିଛନ୍ତି ।