The Samikhsya Odia
ନୂଆଦିଲ୍ଲୀ: ରାଜସ୍ଥାନ ମୁଖ୍ୟମନ୍ତ୍ରୀ ଭଜନ ଲାଲ ଶର୍ମା କରୋନା ସଂକ୍ରମିତ ହୋଇଛନ୍ତି। ସେ ସୋସିଆଲ ମିଡିଆ ପ୍ଲାଟଫର୍ମରେ ଲେଖିଛନ୍ତି ଯେ, ସ୍ଵାସ୍ଥ୍ୟଗତ ସମସ୍ୟା ଦେଖାଦେବାରୁ ସ୍ୱାସ୍ଥ୍ୟ ପରୀକ୍ଷା କରିଥିଲି, ଯେଉଁଥିରେ ମୋର କରୋନା ରିପୋର୍ଟ ପଜିଟିଭ ଆସିଥିଲା।
ସେ କହିଛନ୍ତି ଯେ, ମୁଁ ସ୍ଵୟଂ ସଙ୍ଘରୋଧରେ ଅଛି ଏବଂ ଡାକ୍ତରଙ୍କ ପରାମର୍ଶକୁ ସମ୍ପୂର୍ଣ୍ଣରୂପେ ପାଳନ କରୁଛି ଏବଂ ଭର୍ଚୁଆଲ୍ ମାଧ୍ୟମରେ ଆଗାମୀ ସମସ୍ତ କାର୍ଯ୍ୟକ୍ରମରେ ଭାଗ ନେବି।
ଲଣ୍ଡନ : ଦୁନିଆରେ କରୋନା ଭାଇରସର କାୟା ଥମିବାରେ ନାଁ ନେଉନାହିଁ । ପ୍ରତ୍ୟେକ ଦିନ ନୂତନ ଆକ୍ରାନ୍ତ ଚିହ୍ନଟ ହେଉଛନ୍ତି । ଏହା ମଧ୍ୟରେ ବ୍ରିଟେନ୍ରେ ପୁଣି ଥରେ କରୋନା ଆକ୍ରାନ୍ତଙ୍କ ସଂଖ୍ୟାରେ ବୃଦ୍ଧି ଦେଖାଦେଇଛି । ବ୍ରିଟେନ୍ରେ ଏବେ ଦେଖାଦେଇଥିବା କରୋନାରେ ଶକ୍ତିଶାଳୀ ଷ୍ଟ୍ରେନ୍ ଦେଖିବାକୁ ମିଳିଛି । ବ୍ରିଟେନ୍ରେ ଚିହ୍ନଟ ହୋଇଥିବାର କରୋନା ମାମଲାରେ ଏବେ ନୂତନ ପ୍ରକାର ଦେଖଯାଉଛି ଅର୍ଥାତ୍ ଏହି ଭାଇରସ୍ ଏବେ ନୂତନ ପ୍ରକାରରେ ଚିହ୍ନଟ ହୋଇଛି । ଏହାକୁ ଦୃଷ୍ଟିରେ ରଖି ବ୍ରିଟେନ୍ ସରକାର ଶକ୍ତ ଲକ୍ଡାଉନ୍ ଜାରି କରିବା ନେଇ ନିଷ୍ପତ୍ତି ନେଇଛନ୍ତି । ଏହାପରେ ବ୍ରିଟେନ୍ରେ ଲକ୍ଡାଉନ୍ର ଘୋଷଣା କରାଯାଇଛି । କରୋନା ମାମଲାରେ ନୂତନ ପ୍ରକାରର ଚିହ୍ନଟ ହେବା ପରେ ଦେଶର ରାଜଧାନୀ ତଥା ଏହାର ଆଖପାଖ ଅଞ୍ଚଳରେ ବୁଧବାର ଦିନ କଡା ଲକ୍ଡାଉନ୍ ଲଗାଯିବା ନେଇ ସୂଚନା ରହିଛି । ଏହି ନୂତନ କରୋନା ଭାଇରସ୍ ଦ୍ରୁତ ଗତିରେ ବ୍ୟାପୁଥିବାର କାରଣ ବୋଲି ଜଣାପଡିଛି ।
ବ୍ରିଟେନ୍ର ସ୍ବାସ୍ଥ୍ୟମନ୍ତ୍ରୀ କହିଛନ୍ତି ଯେ ସମ୍ପୃକ୍ତ ଅଞ୍ଚଳରେ କେବଳ ସାତ ଦିନ ମଧ୍ୟରେ ଏହି ଘାତକ ଭାଇରସ୍ର ମାମଲା ଦୁଇଗୁଣ ହାରରେ ବଢିବାରେ ଲାଗିଛି । ଏଥିପାଇଁ ତତ୍କାଳ ତଥା ନିର୍ଣ୍ଣାୟକ ପଦକ୍ଷେପ ନିଆଯିବାର ଆବଶ୍ୟକତା ରହିଛି । ଏଥିପାଇଁ ଲଣ୍ଡନ୍ ଓ ଏହାର ଆଖପାଖ ଅଞ୍ଚଳରେ ‘ଟିୟର୍-3’ ସ୍ତରର ପ୍ରତିବନ୍ଧକ ଲାଗୁ କରାଯିବା ନେଇ ନିଷ୍ପତ୍ତି ନିଆଯାଇଛି । ସୂଚନାଯୋଗ୍ୟ, ନିକଟରେ ବ୍ରିଟେନ୍ରେ କରୋନା ଭ୍ୟାକ୍ସିନ୍ ଦେବା ପ୍ରକ୍ରିୟା ଆରମ୍ଭ ହୋଇଛି । (ଏଜେନ୍ସି)
କଲମ୍ବୋ : ଶ୍ରୀଲଙ୍କାର ରାଜଧାନୀ କଲମ୍ବୋର ମହାରାଜା ଜେଲ୍ରେ କରୋନାକୁ ନେଇ ସଂଘର୍ଷ ହୋଇଛି । ଏହି ସଂଘର୍ଷରେ 8ଜଣ କଏଦୀଙ୍କ ମୃତ୍ୟୁ ହୋଇଥିବାବେଳେ 50ଜଣ ଗୁରୁତର ହୋଇଛନ୍ତି । ଦେଶର ଭିଡଥବା ଜେଲ୍ରେ କରୋନା ସଂକ୍ରମଣକୁ ବୃଦ୍ଧିକୁ ନେଇ କଏଦୀମାନେ ବିରୋଧ କରୁଥିଲେ । ଏହି ଘଟଣାକୁ ନେଇ ଗାର୍ଡଙ୍କ ସହ କଏଦୀଙ୍କର ଝଗଡା ହୋଇଥିଲା । ଗାର୍ଡଙ୍କ ସହିତ ଝଗଡା ଉଗ୍ର ରୂପେ ନେଇ ସଂଘର୍ଷରେ ପରିଣତ ହୋଇଥିଲା । ଏଥିରେ 8ଜଣ କଏଦୀଙ୍କର ମୃତ୍ୟୁ ହୋଇଛି । ଗତ ମାସରେ ଶ୍ରୀଲଙ୍କାରେ କରୋନା ମାମଲାରେ ବୃଦ୍ଧି ଘଟିଛି । କଏଦୀମାନେ ନିକଟ ସପ୍ତାହରେ କରୋନା ଟେଷ୍ଟରେ ବୃଦ୍ଧି ତଥା ସଂକ୍ରମିତ କଏଦୀଙ୍କପାଇଁ ଅଲଗା ସୁବିଧା ଦାବିରେ ବିରୋଧ ପ୍ରଦର୍ଶନ କରୁଛନ୍ତି । ତେବେ ଗୁଳି ଯୋଗୁଁ କଏଦୀମାନଙ୍କର ମୃତ୍ୟୁ ହୋଇଥିବାର ସୂଚନା ରହିଛି । ସୂଚନାଯୋଗ୍ୟ, ଶ୍ରୀଲଙ୍କାରେ ଏବେ ସୁଦ୍ଧା 22 ହଜାର 988 କରୋନା ମାମଲା ଚିହ୍ନଟ ହୋଇଥିବାବେଳେ 109ଜଣଙ୍କର ମୃତ୍ୟୁ ହୋଇଛି । (ଏଜେନ୍ସି)
ନ୍ୟୁୟର୍କ, ଯେଉଁମାନେ ଗୁରୁତର କୋଭିଡ -୧୯ରୁ ଆରୋଗ୍ୟ ଲାଭ କରିଛନ୍ତି ସେମାନଙ୍କ ଦେହରେ ଦୀର୍ଘମାସ ପର୍ଯ୍ୟନ୍ତ ପ୍ରତିକ୍ରିୟା ପରିଲକ୍ଷିତ ହେଉଛି। ସେଥିପାଇଁ ଗୁରୁତର କୋଭିଡ19ରୁ ଆରୋଗ୍ୟ ଲାଭ କରିଥିବା ରୋଗୀମାନେ ଚାରିମାସ ପାଇଁ ସତର୍କ ରହିବା ଆବଶ୍ୟକ। ଏହି ତଥ୍ୟ ପ୍ରକାଶ କରିଛି ନ୍ୟୁୟର୍କର ସାଇନ୍ସ ଇମ୍ୟୁନୋଲୋଜି ପତ୍ରିକା। ଏହି ପତ୍ରିକା ତରଫରୁ ଗବେଷଣା କରି କୁହାଯାଇଛି କରୋନା ଭାଇରସ ଥରେ ଶରୀର ଭିତରେ ପ୍ରବେଶ କଲେ ତାହା ଅନ୍ତତଃ ପକ୍ଷେ ଚାରିମାସ ପର୍ଯ୍ୟନ୍ତ ପାର୍ଶ ପ୍ରତିକ୍ରିୟା ରଖିଥାଏ।
ଏହି ଗବେଷଣା ଦଳ କୋଭିଡ19 ରେ ଗୁରୁତର ଆକ୍ରାନ୍ତ ହୋଇଥିବା ୩୪୩ ରୋଗୀଙ୍କଠାରୁ ରକ୍ତ ନମୁନା ନେଇ ଏହି ପରୀକ୍ଷା କରିଥିଲେ। ରୋଗର ଲକ୍ଷଣ ଦେଖାଯିବା ପରଠାରୁ ଚାରିମାସ ପର୍ଯ୍ୟନ୍ତ ଏହି ରୋଗୀଙ୍କଠାରୁ ରକ୍ତ ନମୂନା ନିଆଯାଇଥିଲା। ସେଥିରୁ ସେମାନେ ଅବଗତ ହୋଇଥିଲେ ଯେ, 14 ଦିନ ପରେ ରୋଗୀକୁ ଛାଡି ଦିଆଯାଉଥିଲେ ମଧ୍ୟ ରୋଗୀର ଦେହରେ 4 ମାସ ପର୍ଯ୍ୟନ୍ତ ବିଭିନ୍ନ ପାର୍ଶ ପ୍ରତିକ୍ରିୟା କରୁଅଛି।
ବେଙ୍ଗାଲୁରୁ : କରୋନାକୁ ନେଇ ସାରା ବିଶ୍ବ ଭୀତତ୍ରସ୍ତ ରହିଥିବାବେଳେ କରୋନାକୁ ନେଇ ପୁଣି ଏକ ନୂତନ ମାମଲା ଦେଖିବାକୁ ମିଳିଛି । କରୋନା ସଂକ୍ରମଣରୁ ସୁସ୍ଥ ହୋଇଥିବା ଜଣେ 27 ବର୍ଷୀୟା ମହିଳା ପୁନର୍ବାର କରୋନାରେ ପୀଡ଼ିତ ହୋଇଥିବାର ସୂଚନା ରହିଛି ।
ବେଙ୍ଗାଲୁରୁର 27 ବର୍ଷୀୟା ଜଣେ ମହିଳା କୋଭିଡ୍-19ରୁ ସୁସ୍ଥ ହେବା ପରେ ପୁଣିଥରେ କରୋନା ସଂକ୍ରମଣରେ ସଂକ୍ରମିତ ହୋଇଥିବାର ଦେଖାଯାଇଛି । ଭାରତରେ ଏଭଳି ମାମଲା ପ୍ରଥମଥର ପାଇଁ ଦେଖାଦେଇଛି । ଯଦିଓ ଏପରି ମାମଲା ବାହାର ଦେଶରେ ପୂର୍ବରୁ ଦେଖାଯାଇଥିବାର ସୂଚନା ରହିଥିଲା । ମିଳିଥିବା ସୂଚନା ଅନୁସାରେ ମହିଳାଜଣକ ଜୁଲାଇ ମାସରେ କରୋନାରୁ ସୁସ୍ଥ ହୋଇ ହସ୍ପିଟାଲରୁ ଡିସ୍ଚାର୍ଜ ହେବାର ମାସକ ପରେ ପୁଣିଥରେ କରୋନାରେ ସଂକ୍ରମିତ ହୋଇଛନ୍ତି । ରାଜ୍ୟରେ ଏଭଳି ମାମଲାକୁ ଦେଖି ସ୍ବାସ୍ଥ୍ୟ ମନ୍ତ୍ରୀ ଡା. କେ ସୁଧାକର ଅଧିକାରୀଙ୍କୁ ଏହା ସମ୍ପର୍କରେ କ୍ଲିନିକାଲ୍ ଅଧ୍ୟୟନ କରିବାକୁ ପରାମର୍ଶ ଦେଇଛନ୍ତି ।
ତେବେ ବିଶେଷଜ୍ଞଭ୍କ ମତରେ କୋଭିଡ୍ -19 ରୋଗୀରେ ଶରୀରରେ ଶ୍ବେତ ରକ୍ତ କଣିକାର ଉତ୍ପାଦନ ହେବା ପାଇଁ ଅତି କମ୍ରେ 15 ଦିନ ଲାଗିଥାଏ । ଏଥିପାଇଁ ଏହି ରୋଗ ଦ୍ବିତୀୟଥର ସଂକ୍ରମଣ ହେବାର ସମ୍ଭାବନାକୁ ଏଡାଇ ଯାଇ ହେବ ନାହିଁ । ତେବେ ଦ୍ବିତୀୟ ଥର କରୋନା ଆକ୍ରାନ୍ତ ହେବାର ଏହା ନିଶ୍ଚିନ୍ତ କାରଣ ନୁହେଁ । (ଏଜେନ୍ସି)
ନୂଆଦିଲ୍ଲୀ: ଦେଶରେ ଗତ ୨୪ ଘଣ୍ଟା ମଧ୍ୟରେ ୬୦,୯୭୫ ଜଣ କରୋନାରେ ସଂକ୍ରମଣ ହୋଇଛନ୍ତି। ଏହି ସଂକ୍ରମଣ ସଂଖ୍ୟାକୁ ମିଶାଇ ଦେଶରେ ସଂକ୍ରମଣଙ୍କ ସଂଖ୍ୟା ୩୧,୬୭,୩୨୩ କୁ ବୃଦ୍ଧି ପାଇଛି। ତେବେ ଦେଶରେ ସକ୍ରିୟ ମାମଲା ବର୍ତ୍ତମାନ ୭,୦୪,୩୪୮ ରହିଛି। ସେହିପରି ଗତ ୨୪ ଘଣ୍ଟା ମଧ୍ୟରେ ସର୍ବାଧିକ ୬୬,୫୫୦ ଜଣ ଲୋକ ସୁସ୍ଥ ହୋଇ ଘରକୁ ଫେରିଥିବା ବେଳେ ସୁସ୍ଥ ହୋଇଥିବା କରୋନା ଆକ୍ରାନ୍ତଙ୍କ ସଂଖ୍ୟା ୨୪,୦୪,୫୮୫ କୁ ବୃଦ୍ଧି ପାଇଛି। ଆଜି କରୋନାରେ ୮୪୮ ଜଣ ମୃତ୍ୟୁବରଣ କରିଥିବାବେଳେ ମୃତ୍ୟୁ ସଂଖ୍ୟା ମୋଟ ୫୮, ୩୯୦କୁ ବୃଦ୍ଧି ହୋଇଛି।
ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଗତ ଦୁଇଦିନ ହେଲା ଗଂଜାମରେ ଦୁଇଶହରୁ କମ୍ ସଂକ୍ରମିତ ଚିହ୍ନଟ ହେଉଥିବାବେଳେ ଆଜି ଏଥିରେ ବୃଦ୍ଧି ପରିଲକ୍ଷିତ ହୋଇ ଏହି ସଂଖ୍ୟା ୨୭୧ରେ ପହଞ୍ଚିଛି। ଗଂଜାମରେ ଅଧିକ ପରିମାଣରେ ଟେଷ୍ଟ ହେଉଥିବାରୁ ଏହି ସଂଖ୍ୟା ବୃଦ୍ଧି ପାଉଛି ବୋଲି ପ୍ରଶାସନ କହିଛି। ଆଜି ଗଂଜାମରେ ୩ ଜଣଙ୍କ ମୃତ୍ୟୁ ମଧ୍ୟ ହୋଇଛି। ଜଣେ ୬୦ ବର୍ଷୀୟ ବୃଦ୍ଧ, ଜଣେ ୬୧ ବର୍ଷୀୟ ବୃଦ୍ଧ ଏବଂ ଜଣେ ୭୦ ବର୍ଷୀୟ ବୃଦ୍ଧଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଛି।
୨୭୧ ସଂକ୍ରମିତ ମଧ୍ୟରୁ ଭଂଜନଗର ବ୍ଲକ୍ରୁ ୮, ଜଗନ୍ନାଥପ୍ରସାଦରୁ ୭, ବେଲଗୁଣ୍ଠାରୁ ୫, ବୁଗୁଡ଼ାରୁ ୧୨, ସୋରଡ଼ାରୁ ୪, ପୋଲସରାରୁ ୧, ବେଗୁନିଆପଡ଼ାରୁ ୨୪, କବିସୂର୍ଯ୍ୟନଗରରୁ ୫, ଆସିକାରୁ ୬, ଧରକୋଟରୁ ୨, ସାନଖେମୁଣ୍ଡିରୁ ୮, ହିଂଜିଳିକାଟୁରୁ ୧୧, ପୁରୁଷୋତ୍ତମପୁରରୁ ୮, ଖଲିକୋଟରୁ ୧୧, ଗଂଜାମରୁ ୭, ଛତ୍ରପୁରରୁ ୪୦, ରଙ୍ଗେଇଲୁଣ୍ଡାରୁ ୨୪, କୁକୁଡ଼ାଖଣ୍ଡିରୁ ୮, ଚିକିଟିରୁ ୧୩, ପାତ୍ରପୁରରୁ ୭, ଦିଗପହଣ୍ଡି ବ୍ଲକ୍ରୁ ୧୭ ଜଣ ଚିହ୍ନଟ ହୋଇଥିବାବେଳେ ବ୍ରହ୍ମପୁର ମହାନଗର ନିଗମରୁ ୪୨ ଏବଂ ଅନ୍ୟାନ୍ୟ ଦୁଇଜଣ ଅଛନ୍ତି।
ସମୁଦାୟ ୧୬୩୪୯ ସଂକ୍ରମିତ ଚିହ୍ନଟ ହୋଇଥିବାବେଳେ ୧୪୧୭୯(୮୬.୭୭%) ସୁସ୍ଥ ହୋଇଛନ୍ତି। ୧୯୮୮ (୧୨.୧୭%) ଜଣ ଆକ୍ଟିଭ୍ ରୋଗୀ ଥିବାବେଳେ ୧୭୪ (୧.୦୬%) ଜଣଙ୍କ ମୁଣ୍ଡ ନେଇଛି କରୋନା। ସେହପରି ବ୍ରହ୍ମପୁରରେ ଆଜିର ନୂତନ ୪୨ ଜଣଙ୍କୁ ମିଶାଇଲେ ସମୁଦାୟ ସଂକ୍ରମିତ ସଂଖ୍ୟା ୨୯୪୩ରେ ପହଞ୍ଚିଛି। ୨୬୦୨ (୮୮.୪୧%) ଜଣ ସୁସ୍ଥ ହୋଇଛନ୍ତି। ବର୍ତ୍ତମାନ ୨୮୮ (୯.୭୯ ଜଣ ଆକ୍ଟିଭ୍ କେସ ରହିଥିବାବେଳେ ୫୩ (୧.୮୦%) ଜଣଙ୍କ ମୃତ୍ୟୁ ଘଟିଛି।
ନୂଆଦିଲ୍ଲୀ: ପ୍ରତିଦିନ ଆରୋଗ୍ୟଙ୍କ ସଂଖ୍ୟା ବୃଦ୍ଧି କରିବା ଲାଗି ଭାରତ ଏବେ ଦ୍ରୁତ ଗତିରେ କାର୍ଯ୍ୟ କରୁଛି। ଗତ 24 ଘଣ୍ଟା ମଧ୍ୟରେ 57,584 ଜଣ କୋଭିଡ-19 ରୋଗୀ ସୁସ୍ଥ ହୋଇ ଘରକୁ ଫେରିବା ସହିତ ଆଜି ଦେଶରେ ଗୋଟିଏ ଦିନର ସର୍ବାଧିକ ଆରୋଗ୍ୟ ସଂଖ୍ୟା ପଞ୍ଜୀକୃତ ହୋଇଛି।
ଏହି 72% ମାଇଲଖୁଣ୍ଟକୁ ସଫଳତାର ସହ ଅତିକ୍ରମ କରିବା ଭାରତର ଆରୋଗ୍ୟ ହାରକୁ ଆହୁରି ଉନ୍ନତ କରିଛି। ଏହାକୁ ପ୍ରଭାବଶାଳୀ ଆବଧାଞ୍ଚଳ କୌଶଳ, ଦୃଢ ଏବଂ ବିସ୍ତୃତ ପରୀକ୍ଷଣ, ଜଟିଳ ରୋଗୀଙ୍କ ଉନ୍ନତ ମାନର ଚିକିତ୍ସା ପରିଚାଳନା ସହିତ ସଫଳ ତଥା ସମନ୍ୱିତ କାର୍ଯ୍ୟକାରିତାର ଫଳ ଭାବେ ବିବେଚନା କରାଯାଉଛି। କୋଭିଡ-19 ରୋଗୀଙ୍କୁ ସାମାନ୍ୟ, ମଧ୍ୟମ ଏବଂ ଜଟିଳ ଭାବେ ବିଭକ୍ତ କରିବା ପାଇଁ ଭାରତ ଏକ ଚିକିତ୍ସା ମାନକ ଅନୁସରଣ କରିଛି ଯାହା ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟର ଚିକିତ୍ସା ପରିଚାଳନା ନିୟମାବଳୀରେ ସ୍ପଷ୍ଟ ଭାବରେ ସୂଚିତ କରାଯାଇଛି।
ଅଧିକରୁ ଅଧିକ ରୋଗୀ ସୁସ୍ଥ ହୋଇ ଡାକ୍ତରଖାନାରୁ ଏବଂ ଘରୋଇ ଏକାନ୍ତବାସରୁ ମୁକ୍ତ ହେବା (ସାମାନ୍ୟ ଏବଂ ମଧ୍ୟମ କ୍ଷେତ୍ରରେ) ଦ୍ଵାରା ଭାରତର ଆରୋଗ୍ୟ ସଂଖ୍ୟା ପ୍ରାୟ 2 ନିୟୁତରେ ପହଞ୍ଚିଛି (19,19,842)। ଏହାଫଳରେ ସକ୍ରିୟ ରୋଗୀଙ୍କ ତୁଳନାରେ 12,42,942 ଅଧିକ ରୋଗୀ ଆରୋଗ୍ୟ ଲାଭ କରିଛନ୍ତି।
ଦେଶରେ 6,76,900 ସକ୍ରିୟ ରୋଗୀ ଥିବା ବେଳେ ଏହା ମୋଟ ସଂକ୍ରମିତ ରୋଗୀଙ୍କ ସଂଖ୍ୟାର ମାତ୍ର 25.57 ପ୍ରତିଶତ। ଶୀଘ୍ର ଚିହ୍ନଟିକରଣ ଓ ଉତ୍ତମ ଚିକିତ୍ସା ଯୋଗୁଁ ମୃତ୍ୟୁ ହାର ଆହୁରି ହ୍ରାସ ପାଇ ଆଜି 1.92%ରେ ପହଞ୍ଚିଛି। (ପିଆଇବି)
ଭୁବନେଶ୍ବର : ରାଜ୍ୟରେ 5 ପ୍ରକାରର କରୋନା ଭାଇରସ ଚିହ୍ନଟ ହୋଇଛି ବୋଲି ସୂଚନା ଦେଇଛନ୍ତି ଆଇଏଏଲଏସ୍ ନିର୍ଦ୍ଦେଶକ ଅଜୟ ପରିଡା । 19A, 19B, 20A, 20A ଓ 20 C ଭାଇରସ୍ ଚିହ୍ନଟ ହୋଇଥିବାବେଳେ ସବୁଠାରୁ ଅଧିକ 20 ଏ ଓ 20 ବି ପ୍ରକାର ଭାଇରସ୍ ଠାବ ହୋଇଛି । 20 ସି ଭାଇରସ୍ କେବଳ ଓଡ଼ିଶାରୁ ଠାବ ହୋଇଛି, ଅନ୍ୟଠାରେ ନାହିଁ ବୋଲି ସୂଚନା ଦେଇଛନ୍ତି ଆଇଏଲଏସ୍ ନିର୍ଦ୍ଦେଶକ । 19 ଏ ଭାଇରସ ସହ ୟୁହାନ୍ ଭାଇରସର ବହୁତ ସାମଞ୍ଜସ୍ୟ ରହିଛି । ଓଡ଼ିଶାରେ 225 ସାମ୍ପଲ ସଂଗ୍ରହ କରାଯାଇ ଗବେଷଣା ହୋଇଛି । 13ଟି ରାଜ୍ୟରୁ ଆସିଥିବା ପ୍ରବାସୀଙ୍କୁ ନେଇ ଗବେଷଣା ହୋଇଥିଲା । ଗୁଜୁରାଟ, ଦିଲ୍ଲୀ, ତାମିଲନାଡୁ ଆଦି 13ଟି ରାଜ୍ୟରୁ ଫେରିଥିବା ପ୍ରବାସୀଙ୍କୁ ନେଇ ପରୀକ୍ଷା କରାଯାଇଛି । 13ଟି ରାଜ୍ୟରୁ 18ଟି ଜିଲ୍ଲାରୁ ଫେରିଥିବା 225 ଲୋକଙ୍କୁ ନେଇ ଏହି ପରୀକ୍ଷା କରାଯାଇଥିଲା । ଜେନୋମିକ୍ ଷ୍ଟଡି ପରେ 5 ପ୍ରକାରର କରୋନା ଭାଇରସ ରହିଥିବା ପ୍ରମାଣ ମିଳିଛି। ଭାରତକୁ ମୂଳତଃ ୟୁରୋପ ଓ ଦକ୍ଷିଣପୂର୍ବ ଏସିଆରୁ ଭାଇରସ୍ ଆସିଛି ବୋଲି ସୂଚନା ଦେଇଛନ୍ତି ନିର୍ଦ୍ଦେଶକ ।
ଭାଇରସର ପ୍ରକାର ମିଳିବା ପରେ ଭ୍ୟାକସିନ୍ ପାଇଁ ସୁବିଧା ହେବ ବୋଲି କହିଛନ୍ତି ଆଇଏଲଏସ ନିର୍ଦ୍ଦେଶକ । ଏହା ପରେ ଏହି ପାଞ୍ଚ ପ୍ରକାରର ଭାଇରସ୍ ସହ ମୁକାବିଲା କରିବା ପାଇଁ ପାଞ୍ଚ ପ୍ରକାର ଭ୍ୟାକସିନ୍ ଦରକାର ହେବ ନା ଗୋଟାଏ ପ୍ରକାର ଭ୍ୟାକସିନ୍ ଦରକାର ହେବ ତାହା ଜଣାପଡିବ । ଜୁଲାଇ ପରଠାରୁ ରାଜ୍ୟରେ ସଂକ୍ରମଣ ନେଇ ପୁଣି ଷ୍ଟଡି କରାଯିବ ବୋଲି କହିଛନ୍ତି ଆଇଏଲଏସ୍ ନିର୍ଦ୍ଦେଶକ ।
ମହାରାଷ୍ଟ୍ର : ମହରାଷ୍ଟ୍ରର ଅମରାବତୀ ଅଞ୍ଚଳରୁ ଏକ ଲଜ୍ଜ୍ୟାଜନକ ଘଟଣା ସାମ୍ନାକୁ ଆସିଛି । ଏଠାରେ ଜଣେ ଲ୍ୟାବ୍ ଟେକ୍ନସିଆନ୍ କରୋନା ଟେଷ୍ଟ ପାଇଁ ଯୁବତୀଙ୍କ ପ୍ରାଇଭେଟ୍ ପାର୍ଟ (ଗୁପ୍ତାଙ୍ଗ)ରୁ ସାମ୍ପଲ୍ ଟେଷ୍ଟ ନେଇଛନ୍ତି । ଏହି ଘଟଣା ସାମ୍ନାକୁ ଆସିବା ପରେ ଚାଞ୍ଚଲ୍ୟ ସୃଷ୍ଟି ହୋଇଛି । ଯୁବତୀ ଏହି ଘଟଣାକୁ ନେଇ ପୋଲିସ୍ରେ ଅଭିଯୋଗ କରିଛନ୍ତି । ପୋଲିସ୍ ତରଫରୁ ଦୁଷ୍କର୍ମ ମାମଲା ଅଭିଯୋଗ କରାଯାଇ ଅଭିଯୁକ୍ତଙ୍କୁ ଗିରଫ କରାଯାଇଛି । ଅଭିଯୁକ୍ତଙ୍କ ଜଣକ କୋଭିଡ୍ ଟ୍ରମା ସେଣ୍ଟରରେ ଲ୍ୟାବ୍ ଟେକ୍ନିସିଆନ୍ ଭାବେ କାର୍ଯ୍ୟରତ ଅଛନ୍ତି ।
ମିଳିଥିବା ସୂଚନା ଅନୁସାରେ ଯୁବତୀ ଜଣକ ଏକ ସର୍ଭିସ୍ ସେଣ୍ଟରରେ କାର୍ଯ୍ୟ କରୁଥିଲେ । ଏକ କୋଭିଡ୍ ସଂକ୍ରମିତଙ୍କ ସଂସ୍ପର୍ଶରେ ଆସିବା ପରେ ଏହି ଷ୍ଟାରର ସମସ୍ତ 28 ଜଣ କର୍ମଚାରୀଙ୍କ କରୋନା ଟେଷ୍ଟ କରାଯାଇଥିଲା । ଏକ ସରକାରୀ ଲ୍ୟାବରେ ଏହି କରୋନା ଟେଷ୍ଟ କରାଯାଇଥିଲା । ସ୍ବାବ୍ ଟେଷ୍ଟ ନିଆଯିବା ପରେ ଲ୍ୟାବ୍ ଟେକ୍ନିସିନ୍ ଜଣକ ଯୁବତୀଙ୍କ ପଜିଟିଭ୍ ରିପୋର୍ଟ ଆସିଥିବା କଥା କହିଥିଲେ । ଏଥିପାଇଁ ୟୁରିନ୍ ଟେଷ୍ଟ କରିବାକୁ ପଡିବ ବୋଲି ଯୁବତୀଙ୍କୁ କହିଥିଲେ ।
କରୋନା ଭାଇରସ ଟେଷ୍ଟ ପରେ ଯୁବତୀ ଜଣକ ଏହି ଘଟଣା ସମ୍ପର୍କରେ ତାଙ୍କ ଭାଇଙ୍କୁ କହିଥିଲେ । ତେବେ ଭାଇଙ୍କୁ ଏନେଇ ସନ୍ଦେହ ହେବା ପରେ ସେ ଡାକ୍ତରଙ୍କ ସହ ଏହି ସମ୍ପର୍କରେ କଥା ହୋଇଥିଲେ । କୋଭିଡ୍ 19 ଟେଷ୍ଟରେ ଏମିତି କୌଣସି ପରୀକ୍ଷା ହୁଏ ନାହିଁ ବୋଲି ଜାଣିଥିଲେ । ଏହା ପରେ ଯୁବତୀଙ୍କ ବୟାନ ଅନୁସାରେ ପୋଲିସ୍ ଅଭିଯୁକ୍ତଙ୍କୁ ଗିରଫ କରିଛି ।
ମହାରାଷ୍ଟର ମହିଳା ତଥା ଶିଶୁ ବିକାଶ ମନ୍ତ୍ରୀ ଯଶୋମତୀ ଠାକୁର୍ ଏହି ଘଟଣାକୁ ଗମ୍ଭୀର ରୂପେ ଗ୍ରହଣ କରିବା ସହ ଦୋଷୀ ବିରୋଧରେ କଡା କାର୍ଯ୍ୟାନୁଷ୍ଠାନ ନେବାକୁ କହିଛନ୍ତି । (ଏଜେନ୍ସି)
କେଦାର ମିଶ୍ର
ଜୁନ ମାସ ତିରିଶ ତାରିଖ ଯାଏ ଆପାତତଃ ତାଲାବନ୍ଦ ବା ଲକ ଡାଉନ ଅବ୍ଯାହତ ରହିଥିବା ବେଳେ କେନ୍ଦ୍ର ସରକାର କିନ୍ତୁ ଏହାକୁ ତାଲା ଖୋଲିବାର ପ୍ରଥମ ସୋପାନ ବା “ଲକ ଆଉଟ-୧” ବୋଲି କହିଛନ୍ତି। କ୍ରମେ କ୍ରମେ ଜୁଲାଇ ମାସରେ ଦେଶର ଆର୍ଥିକ ଗତିବିଧି ସ୍ଵାଭାବିକ ହେବାର ପ୍ରକ୍ରିୟା ଚାଲିବ ବୋଲି ସରକାର କହିଛନ୍ତି। ତେବେ ଦେଶରେ ଯେହେତୁ ଏବେ ମଧ୍ୟ ଜାତୀୟ ବିପର୍ୟୟ ପରିଚାଳନା ଆଇନ ଏବଂ ମହାମାରୀ ଆଇନ ଲାଗୁ ହୋଇଛି, ତେଣୁ ଲକ ଆଉଟ ବୋଲି ଏହାକୁ କେମିତି କହିବା। ତେବେ ସବୁଠୁ ବିଚିତ୍ର କଥାଟି ହେଉଛି, ଯେଉଁ ଦିନ ସରକାର ଲକ ଆଉଟ ଘୋଷଣା କରୁଛନ୍ତି, ସେଦିନ ଦେଶରେ ସର୍ବାଧିକ ୮୩୮୦ ସଂକ୍ରମିତ ଏବଂ ୨୦୫ ଜଣ ମୃତ ବୋଲି ସୂଚନା ମିଳୁଛି।ଲକ ଡାଉନ ଆରମ୍ଭର ପ୍ରଥମ ତିନି ସପ୍ତାହ ସରିବା ବେଳକୁ ଦେଶରେ ମୋଟ ଆକ୍ରାନ୍ତଙ୍କ ସଂଖ୍ୟା ଥିଲା ୧୧,୪୮୫ ଏବଂ ମୃତ୍ଯୁ ବରଣ କରିଥିବା ଲୋକ ସଂଖ୍ୟା ଥିଲା ୩୯୬। ଏପ୍ରିଲ ୧୫ ପରଠୁ ସଙ୍କ୍ରମିତଙ୍କ ସଂଖ୍ୟା ୧୫ ଗୁଣରୁ ଅଧିକ ଏବଂ ମୃତକଙ୍କ ସଂଖ୍ୟା ପ୍ରାୟ ୧୫ ଗୁଣ ବଢିଛି। ତା ସତ୍ତ୍ୱେ ଆମେ ଲକ ଡାଉନକୁ ଏକ ସଫଳ ଉପଚାର ବୋଲି କହିପାରିବା କି?
ଦେଶର ଅର୍ଥନୈତିକ ସ୍ଥିତି ଓ ସରକାରୀ ଆୟ ବ୍ୟୟର ହିସାବଖାତା ଦେଖିଲେ, ତାଲା ବନ୍ଦକୁ ଅଧିକ ସମୟ ଚଳାଇ ରଖିବାର ସାମର୍ଥ୍ୟ ଏବେ ଆଉ ସରକାରଙ୍କ ପାଖରେ ନାହିଁ। ଲୋକେ ମଧ୍ୟ ତାଲା ବନ୍ଦ ର କଟକଣା ଭିତରେ ଅସ୍ଥିର ହେଲେଣି। ତେଣୁ ବର୍ତ୍ତମାନ ସମୟରେ ତାଲା ଖୋଲିବା ଛଡା ସରକାରଙ୍କ ପାଖରେ ଅନ୍ୟ ବିକଳ୍ପ ନାହିଁ। ତେବେ ଆଜି ପ୍ରଶ୍ନ ଉଠିବ, ଯଦି ଦୈନିକ ୮୦୦୦+ ସଂକ୍ରମଣ ସମୟରେ ଜୀବନଯାତ୍ରା ସ୍ଵାଭାବିକ ହେଉ ବୋଲି ସରକାର ଚାହୁଁଛନ୍ତି, ୧୦୦ ସଂଖ୍ୟା ବଢୁଥିବା ସମୟରେ ଲୋକଙ୍କ ଉପରେ ଜୁଲମ କରି ତାଲା ବନ୍ଦ ଘୋଷଣା କରାଗଲା କାହିଁକି? କୋଟି କୋଟି ଲୋକଙ୍କର ଜୀବନ ଓ ଜୀବିକା ର ପ୍ରଶ୍ନ ବିଷୟରେ ସରକାର ଚିନ୍ତା ନ କରି ଯେଉଁ କଟକଣା ଲାଗୁ କଲେ ତାର ସୁଫଳ କିଛି ମିଳିଛି।
ସରକାର ବିଭିନ୍ନ ସୂତ୍ର ଉଦ୍ଧାର କରି କହୁଛନ୍ତି ଯେ ଯଦି ଲକ ଡାଉନ ହୋଇ ନଥାନ୍ତା, ତାହେଲେ ହୁଏତ ଦେଶରେ ଲକ୍ଷାଧିକ ଲୋକ ମୃତ୍ୟୁ ବରଣ କରିଥାନ୍ତେ। ହୁଏତ ଏହା ଠିକ। ହେଲେ ଏ ପର୍ୟନ୍ତ କୌଣସି ଏସୀୟ ଦେଶରେ ମୃତ୍ୟୁ ସଂଖ୍ୟା ୫୦୦୦ ହଜାର ଟପିନାହିଁ। ବର୍ତ୍ତମାନ ଏସିଆର ସବୁଠୁ ଅଧିକ ଆକ୍ରାନ୍ତ ଓ ମୃତ ବ୍ୟକ୍ତିଙ୍କର ରେକର୍ଡ ଭାରତ ପାଖରେ ରହିଛି। ସବୁଠୁ ଚିନ୍ତାଜନକ କଥା ହେଉଛି, ଭାରତର ଗ୍ରାମାଞ୍ଚଳରେ କରୋନା ସଂକ୍ରମଣ ବ୍ୟାପକ ହେବା ଆରମ୍ଭ କରିଛି। ଗ୍ରାମାଞ୍ଚଳରେ ଏହା ବ୍ୟାପିବା ଆରମ୍ଭ କଲେ ବାସ୍ତବ ସଂଖ୍ଯାର ଆକଳନ ଆଗକୁ ସମ୍ଭବ ହେବନାହିଁ।
ପ୍ରବାସୀ ଶ୍ରମିକଙ୍କ ଉପରେ ଲକ ଡାଉନର ବୋଝ ଲଦି ଦେଇ ଭାରତ ସରକାର ସେମାନଙ୍କର ଜୀବନ ଓ ଜୀବିକା ଉଭୟକୁ ନଷ୍ଟ କରି ଦେଇଛନ୍ତି। ବିଭିନ୍ନ ମହାନଗରୀରୁ ଗାଁକୁ ଫେରୁଥିବା ଆମର ଶ୍ରମଜୀବୀମାନେ ଏବେ ସର୍ବାଧିକ ସଂକ୍ରମଣର ଶିକାର। ଏମାନଙ୍କୁ ଆରମ୍ଭରୁ ପରୀକ୍ଷା ଓ ଚିକିତ୍ସା ସୁବିଧା ଯୋଗାଇ ଦେବାର ବନ୍ଦୋବସ୍ତ କେନ୍ଦ୍ର ଓ ରାଜ୍ୟ ସରକାର କଲେ ନାହିଁ। ସାମାଜିକ ଦୂରତା ରଖି ସୁରକ୍ଷିତ ରହିବାର କୌଣସି ସୁବିଧା ଆମ ଶ୍ରମଜୀବୀଙ୍କ ପାଖରେ ନଥିଲା। ସେମାନେ ଚାକିରୀ ଓ ଦରମା ହରାଇବା ପରେ ସେମାନଙ୍କୁ ଘର ମାଲିକମାନେ ବାହାର କରି ଦେଇଥିଲେ। କୌଣସି ଘର ମାଲିକ ବା ସରକାରଙ୍କ ଆଦେଶ ମାନିଥାନ୍ତା କାହିଁକି? କୋଟି କୋଟି ସଂଖ୍ୟାରେ ଏହି ଉଦବାସ୍ତୁ ଶ୍ରମଜୀବୀମାନେ ରାସ୍ତାରେ, ରେଳ ଧାରଣାରେ,ବସ ଷ୍ଟାଣ୍ଡରେ କିମ୍ବା ଅପନ୍ତରା ପଡିଆରେ ପଡିରହି ସଂକ୍ରମିତ ହେବାକୁ ବାଧ୍ୟ ହେଲେ। ଲକ ଡାଉନ ସମୟରେ ଏମାନଙ୍କ ଜୀବନ ଓ ଜୀବିକା କୁ ନେଇ କୌଣସି ଯୋଜନା ଭାରତ ସରକାର କଲେନାହିଁ।
ଭାଗ୍ୟ ଓ ଭଗବାନ ଭରସାରେ ବଞ୍ଚିଥିବା କୋଟି କୋଟି ଗରୀବ ଲୋକଙ୍କର ଦେହରେ ଏବେ କରୋନା ସଂକ୍ରମଣର ସମ୍ଭାବନା ରହିଛି। ଏବେ ଲକ ଆଉଟ ପରେ ଲୋକଙ୍କ ଚଳାଚଳ କୁ ନିୟନ୍ତ୍ରଣ କରିବା ଆଉ ସମ୍ଭବ ନୁହେଁ। ଆନ୍ତଃ ରାଜ୍ୟ ଗମନାଗମନ କଟକଣା ଉଠିଯିବା ପରେ ସ୍ଥିତି ଅଧିକ ଜଟିଳ ହେବ। ସ୍ଵାଭାବିକ ଜୀବନ ଯାପନ ପ୍ରକ୍ରିୟାରେ ସଂକ୍ରମଣ ଓ ତାର ପ୍ରସାରଣକୁ ଚିହ୍ନଟ କରିବାର ପ୍ରକ୍ରିୟା ଟି କଣ ହେବ? ସଂଖ୍ୟାଧିକ ଲକ୍ଷଣ ନଥିବା ରୋଗୀ ହୁଏତ ଆପେ ଆପେ ଆରୋଗ୍ଯ ଲାଭ କରିବେ, ହେଲେ ସେମାନଙ୍କ ମାଧ୍ୟମରେ ସଂକ୍ରମଣ ବ୍ୟାପିବ। ସବୁ କଟକଣା ସତ୍ତ୍ୱେ ଆମେ ମୃତ୍ୟୁ ସଂଖ୍ୟା କୁ ନିୟନ୍ତ୍ରଣରେ ରଖିପାରିନାହୁଁ। ଲକ ଆଉଟ ପରେ ତାକୁ ନିୟନ୍ତ୍ରଣ କରି ହେବ କେମିତି? ଯେତିକି ସଂଖ୍ୟକ ସ୍ଵତନ୍ତ୍ର କୋଭିଦ ଡାକ୍ତରଖାନା ଆମର ଅଛି, ତାହା ୫ ଲକ୍ଷରୁ ଅଧିକ ନୁହେଁ। ସେଥିରେ ଆଗାମୀ ଦିନର ବିପଦକୁ ଆମେ ସାମ୍ନା କରିବା କେମିତି?
ଚୀନ୍ : ଚୀନ୍ର ବୁହାନ ସହରରୁ କରୋନା ସାରା ବିଶ୍ବରେ ତାଣ୍ଡବ ରଚୁଥିବାବେଳେ ପୁଣି ଥିରେ ବୁହାନରେ ଏହି ଭାଇରସର ପ୍ରଭାବ ଦେଖିବାକୁ ମିଳିଛି। ଚୀନ୍ର ଜାତୀୟ ସ୍ୱାସ୍ଥ୍ୟ ଆୟୋଗ ଠାରୁ ମିଳିଥିବା ସୂଚନା ଅନୁଯାୟୀ, ବୁହାନରେ ପୁଣି 14 ଜଣ ବ୍ୟକ୍ତି କରୋନା ସଂକ୍ରମିତ ହୋଇଥିବାର ସୂଚନା ରହିଛି। 2019 ମସିହାରେ ସର୍ବପ୍ରଥମେ ଏଠାରୁ ହିଁ ଏହି ଭାଇରସ୍ ଦେଖିବାକୁ ମିଳିଥିବା ପରେ ଚଳିତ ବର୍ଷ ଏପ୍ରିଲ୍ 3 ତାରିଖ ପରଠାରୁ ଏଠାରେ କରୋନା ସଂକ୍ରମଣର ମାମଲା ଆଉ ଆସିନଥିଲା। ସ୍ବାଭାବିକ ଅବସ୍ଥାକୁ ବୁହାନ୍ ଫେରିଆସିଥିବାବେଳ ସାରା ବିଶ୍ବ କିନ୍ତୁ କରୋନା କବଳରେ ଛଟପଟ ହେଉଛି। କିନ୍ତୁ 37 ଦିନ ପରେ ବୁହାନରେ ପୁର୍ନବାର କରୋନାର ପ୍ରଭାବ ଅନୁଭୂତ ହୋଇଛି।
2019 ମସିହାରେ ୱୁହାନରୁ ଏହି ଭାଇରସ୍ ଆରମ୍ଭ ହେବା ପରେ, ଚଳିତ ବର୍ଷ ଏପ୍ରିଲ୍ 3 ତାରିଖ ପରଠାରୁ ସେଠାରେ କୌଣସି ସଂକ୍ରମଣର ଘଟଣା ଦେଖିବାକୁ ମିଳି ନଥିଲା। କିନ୍ତୁ ବର୍ତ୍ତମାନ କରୋନା ପୁନର୍ବାର ବୁହାନରେ ବିସ୍ତାର କରିବା ଆରମ୍ଭ କରିଛି। ଗୋଟିଏ ଦିନ ପୂର୍ବରୁ ଜଣେ ମହିଳା ପଜିଟିଭ୍ ମିଳିବା ପରେ ରବିବାର ଦିନ 11 ଟି ନୂଆ ମାମଲା ସାମ୍ନାକୁ ଆସିଥିଲା। ଦେଶରେ କରୋନା ସଂକ୍ରମିତ ରୋଗୀଙ୍କ ସଂଖ୍ୟା ବର୍ତ୍ତମାନ ସୁଦ୍ଧା 82,901ରେ ପହଞ୍ଚିଥିବାବେଳେ ଏହି ମହାମାରୀ ଯୋଗୁଁ ଚୀନ୍ରେ 4,633 ଲୋକ ପ୍ରାଣ ହରାଇଛନ୍ତି। (ଏଜେନ୍ସି)
ନୂଆଦିଲ୍ଲୀ : ମହାମାରୀ କରୋନା ଭାରଇସ୍ ସହ ଲଢେଇ କରୁଥିବା ରାଜଧାନୀ ଦିଲ୍ଲୀରେ ଲକ୍ ଡାଉନ୍ ଚାଲିଥିବା ବେଳେ ବି ଅପରାଧ ମଧ୍ୟ କମିବାରେ ଦେଖାଯାଉନାହିଁ । ଦିଲ୍ଲୀରେ ଜଣେ ସ୍ତ୍ରୀ ତାଙ୍କ ପ୍ରେମିକ ସହିତ ମିଶି ସ୍ବାମୀଙ୍କର ହତ୍ୟା କରିଥିବାର ସୂଚନା ରହିଛି । ମିଳିଥିବା ସୂଚନା ଅନୁସାରେ ଏହିଘଟଣାଟି ଅଶୋକ ବିହାର ଅଞ୍ଚଳରେ ଘଟିଛି । ଏହି ଅଞ୍ଚଳରେ ଜଣେ ବ୍ୟକ୍ତିଙ୍କ ସନ୍ଦିଗ୍ଧ ପରିସ୍ଥିତିରେ ମୃତ୍ୟୁ ହୋଇଥିଲା । ସ୍ତ୍ରୀ ଏହି ମୃତ୍ୟକୁ କରୋନା ଜନିତ ମୃତ୍ୟୁ ବୋଲି କହିଥିଲେ । ଏହାପରେ ଏହା କାନରୁ କାନକୁ ହୋଇ ପୋଲିସ୍ ନିକଟରେ ପହଞ୍ଚିଥିଲା । ଏହାପରେ ପୋଲିସ୍ ଶ୍ମଶାନ ଘାଟରେ ପହଞ୍ଚି ଶବକୁ ଜବତ କରି ଏହି ଘଟଣାର ତଦନ୍ତ ଆରମ୍ଭ କରିଥିଲେ । ପରିଶେଷରେ ଏହି ମୃତ୍ୟ ରହସ୍ୟର ପର୍ଦ୍ଦାଫାସ କରି ମହିଳା ଓ ତାଙ୍କ ପ୍ରେମିକଙ୍କୁ ଗିରଫ କରିଛି ।
ମହିଳା ଜଣକ ସ୍ବାମୀଙ୍କ କରୋନା ଯୋଗୁଁ ମୃତ୍ୟୁ ହୋଇଥିବାର କହିଶଶ୍ମାନରେ ଅନ୍ତ୍ୟେଷ୍ଟି କ୍ରିୟା କରିବାକୁ ନେଲାବେଳେ ପୋଲିସ୍ ସନ୍ଦେହ କରି ଶବକୁ ପୋଷ୍ଟମର୍ଟମ୍ କରିଥିଲେ । ରିପୋର୍ଟ ଆସିବା ପରେ ହତ୍ୟା ହୋଇଥିବାର ଜଣାପଡିଥିଲା । ମହିଳା ଜଣକ ନିଜ ପ୍ରେମିକ ସହିତ ମିଶି ହତ୍ୟା କରିଥିବାର ସ୍ପଷ୍ଟ ହୋଇଛି । ରିପୋର୍ଟ ଆସିବା ପରେ ପୋଲିସ୍ ହତ୍ୟା ମାମଲା ରୁଜୁ କରି ମହିଳା ଓ ପ୍ରେମିକଙ୍କୁ ଗିରଫ କରିଛନ୍ତି ।
ଦେବ ରଞ୍ଜନ
ଆଜିର ତାରିଖରେ ସାରା ବିଶ୍ବରେ କରୋନା ଭାଇରସ ହେତୁ ୨୧୫ ଦେଶର ସମୁଦାୟ ମୃତକଙ୍କ ସଂଖ୍ୟା ୨ ଲକ୍ଷ ୩୯ ହଜାର । ଆମେ ସେମାନଙ୍କ ଲାଗି ଶୋକପାଳନ କରିବା ସହିତ ଆମେ ଯେ ସେମାନଙ୍କୁ ବଞ୍ଚାଇବାରେ ଅସମର୍ଥ ହେଲୁ ସେଥିଲାଗି ଦୁଃଖ ପ୍ରକାଶ କରିବାର ସମୟ ଆସିଛି । କରୋନା କେବଳ ଯେ ବିଶ୍ୱବ୍ୟାପି ମହାମାରୀରେ ପରିଣତ ହୋଇଛି ତାହା ନୁହେଁ ଏହା ଆମ ସଭ୍ୟତାକୁ ନେଇ ଥିବା ଆମର ଗର୍ବ, ଆମର ବିକାଶକୁ ନେଇ ଥିବା ଆମର ଦାମ୍ଭିକତା, ବିଜ୍ଞାନର ଅଗ୍ରଗତିକୁ ନେଇ ଆତ୍ମସନ୍ତୋଷ, ଗଣତନ୍ତ୍ରକୁ ନେଇଥିବା ଆମର ଅହମିକା ସବୁକୁ ଖର୍ବ କରିଦେଇଛି ।
କୌଣସି ଅଚାନକ ବିପତ୍ତି ହିଁ ଆମର ପ୍ରସ୍ତୁତିକୁ ଦର୍ଶାଇଥାଏ। କରୋନା ଭାଇରସ ହେତୁ ଅଧିକ ସଂଖ୍ୟାରେ ସାଧାରଣ ଲୋକର ମୃତ୍ୟୁ ଆମର ସ୍ୱାସ୍ଥ୍ୟ କ୍ଷେତ୍ରରେ ଥିବା (ଅ)ପ୍ରସ୍ତୁତିକୁ ଦର୍ଶାଉଛି। ଏହା ସାରା ବିଶ୍ଵର ସମସ୍ୟା। ଆଜି ଭାରତରେ ସେହି ୨ ଲକ୍ଷ ୩୯ ହଜାର ମୃତକଙ୍କ ମଧ୍ୟରେ ୧୩୦୦ ଜଣ ଅଛନ୍ତି ଯେଉଁମାନଙ୍କ ମଧ୍ୟରୁ ୬୫ % ବରିଷ୍ଠ ନାଗରିକ । ଆମ ସଭ୍ୟତା ଆମକୁ ଏହା ଶିଖାଇଛି ଯେ ବରିଷ୍ଠଙ୍କୁ ସମ୍ମାନ କରିବା ଆମର କର୍ତ୍ତବ୍ୟ। ଏକ ଆଧୁନିକ ଗଣତାନ୍ତ୍ରିକ ରାଷ୍ଟ୍ରଶକ୍ତି ଭାବରେ ଆମ୍ଭେମାନେ ଆମର କର୍ତ୍ତବ୍ୟ କରିପାରିଲେ କି ?
କମ୍ପାନୀଙ୍କ ହାତରେ ସ୍ୱାସ୍ଥ୍ୟ ବ୍ୟବସ୍ଥା ହେତୁ :
ଆଜି ଆମେରିକାରେ ସର୍ବାଧିକ ମୃତକଙ୍କ ମଧ୍ୟରେ ଅଛନ୍ତି ସେଠାର କଳାଲୋକ ଓ ଲାଟିନୋମାନେ। ଆମେରିକାର ପ୍ରଚଳିତ ପ୍ରାଇଭେଟ ସ୍ୱାସ୍ଥ୍ୟ ଚିକିତ୍ସା ବ୍ୟବସ୍ଥା ଓ ବେସରକାରୀ ସ୍ୱାସ୍ଥ୍ୟବୀମା ବ୍ୟବସ୍ଥାରେ ସେହିମାନେ ଉପଯୁକ୍ତ ଚିକିତ୍ସା ନପାଇବା ସ୍ଵାଭାବିକ। ନ୍ୟୁର୍କ ଟାଇମସର ତଥ୍ୟ ଅନୁସାରେ ବିଭିନ୍ନ ବାର୍ଦ୍ଧକ୍ୟ ଗୃହ ଓ ନର୍ସିଙ୍ଗ ହୋମରେ ଅଧିକ ସଂଖ୍ୟକ ବୟସ୍କ ଲୋକେ ଡାକ୍ତରଖାନାରେ ଭେଣ୍ଟିଲେଟର ଓ ଅନ୍ୟ ସ୍ୱାସ୍ଥ୍ୟ ଉପକରଣର ଅଭାବ ହେତୁ ମୃତ୍ୟୁବରଣ କରୁଛନ୍ତି । ବିଶ୍ଵର ସର୍ବଶ୍ରେଷ୍ଠ କମ୍ପାନୀମାନଙ୍କ ଉପସ୍ଥିତି ସତ୍ବେ ସ୍ୱାସ୍ଥ୍ୟ ଉପକରଣର ଅଭାବ ହେତୁ ଆମେରିକା ନିଜର ବୟୋଜେଷ୍ଠ ଲୋକଙ୍କୁ ହରାଇବା ଏକ ରାଷ୍ଟ୍ର ଲାଗି ଲଜ୍ଜାର ବିଷୟ।
ଇଉରୋପରେ ଦୃଢ ଅର୍ଥନୀତି ଓ ବଳିଷ୍ଠ ସ୍ୱାସ୍ଥ୍ୟ ବ୍ୟବସ୍ଥା ଭାବରେ ଜଣାଶୁଣା ଇଟାଲୀ, ସେଠାରେ ମଧ୍ୟ ଅଧିକ ସଙ୍ଖ୍ୟାରେ ବୟସ୍କ ଲୋକଙ୍କ ମୃତ୍ୟୁ ହୋଇସାରିଲାଣି । ନିକଟରେ ପ୍ରକାଶିତ ଟାଇମସ ଅଫ ଇଣ୍ଡିଆର ଲେଖା ଅନୁସାରେ ଇଟାଲୀର ଲୋମ୍ବାର୍ଡି ପ୍ରଦେଶ ଯେଉଁଠି ସ୍ୱାସ୍ଥ୍ୟ ବ୍ୟବସ୍ଥା କମ୍ପାନୀମାନଙ୍କ ଦ୍ଵାରା ଅଧିକ ପରିଚାଳିତ ସେହି ପ୍ରଦେଶରେ ମୃତକଙ୍କ ସଙ୍ଖ୍ୟା ଅଧିକ। ସ୍ପେନରେ ଏକ ଦୃଢ ସ୍ୱାସ୍ଥ୍ୟ ବ୍ୟବସ୍ଥା ଥାଇ ମଧ୍ୟ ଅଧିକ ମୃତକ ଏହାର ଗ୍ରାମାଞ୍ଚଳବାସୀ ଯେଉଁମାନଙ୍କ ନିକଟରେ ପ୍ରାଇଭେଟ ସ୍ୱାସ୍ଥ୍ୟ ବ୍ୟବସ୍ଥା ଠିକରେ ପହଞ୍ଚିପାରିଲା ନାହିଁ।
ଏହି ସମାନ କଥା ଆଜି ଅଧିକାଂଶ ଇଉରୋପୀୟ ଦେଶରେ ଘଟିଛି । ଆଜି ଆଫ୍ରିକାରେ ମଧ୍ୟ ଘାନାର ଶାସକ ଶେଷରେ ହାତ ଟେକିଦେଇଛନ୍ତି ଓ ଦେଶବାସୀଙ୍କୁ ଚର୍ଚ୍ଚର ଦ୍ଵାରସ୍ଥ ହେବା ଲାଗି ଅନୁରୋଧ କରିଛନ୍ତି । ଇସ୍ରାଇଲ ସୈନ୍ୟଙ୍କ ଘେରା ବନ୍ଦୀ ମଧ୍ୟରେ ଥିବା ଗାଜା ଅଞ୍ଚଳର ତିନି ଲକ୍ଷ ଅଧିବାସୀ ସର୍ବଦା ମୃତ୍ୟୁର ଆଶଙ୍କା ମଧ୍ୟରେ ଗତି କରୁଛନ୍ତି । ସମଗ୍ର ପୃଥିବୀରେ ସବୁଠାରୁ ଅଧିକ ସଂଶୟ ମଧ୍ୟରେ ଅଛନ୍ତି ବିଭିନ୍ନ ଦେଶର ଜେଲରେ ଥିବା କଏଦୀ, ବସ୍ତିବାସିନ୍ଦା ଓ ଜଙ୍ଗଲରେ ରହିଆସୁଥିବା ଆଦିବାସୀ। ବିଶ୍ୱବ୍ୟାପି ଏହି ଲାଭଖୋର କମ୍ପାନୀଙ୍କ ହାତରେ ସ୍ୱାସ୍ଥ୍ୟବ୍ୟବସ୍ଥା ରହିବା ହେତୁ ମହାମାରୀ ଏକ ପାଣ୍ଡେମିକ ଭାବରେ ନିଜର ପ୍ରକୋପ ଦେଖାଇବାରେ ସମର୍ଥ ହୋଇଛି।
ଓଡିଶାର ସ୍ଥିତି ମଧ୍ୟ ଭିନ୍ନ ନୁହେଁ । ଆଜି ମହାମାରୀ ସମୟରେ ନା କୌଣସି ପ୍ରାଇଭେଟ କମ୍ପାନୀ ନିଜେ ନିଜେ କରୋନାର ମୁକାବିଲା ଲାଗି ଆଗକୁ ଆସିଲେ (ଯେଉଁ ମୁଷ୍ଟିମେୟ ପ୍ରାଇଭେଟ ହସ୍ପିଟାଲ ଗୁଡିକ କୋଭିଡ ହସ୍ପିଟାଲ କରାଯାଇଛି ସେଠାର କୋଠାଟି ଛାଡିଦେଲେ ଅଧିକାଂଶ ଡାକ୍ତର, ନର୍ସ ଓ ସ୍ୱାସ୍ଥ୍ୟ ଉପକରଣ ସରକାରଙ୍କର) ନା ସେମାନେ କୋଭିଡ ଭିନ୍ନ ଅଣସଂକ୍ରମଣ ରୋଗର ଚିକିସ୍ଛା ଲାଗି ନିଜର ଦ୍ଵାର ଖୋଲା ରଖିଲେ।
ସରକାରୀ ଜମି, ରେଫରାଲର ସୁବିଧା, ବୀମା ଅର୍ଥର ଭାଗୀଦାରୀ ସହିତ ଅନ୍ୟ ବହୁ ସରକାରୀ ସୁବିଧାରେ ଗଢିଉଠିଥିବା ଭୁବନେଶ୍ଵରର ସମସ୍ତ ପ୍ରାଇଭେଟ ହସ୍ପିଟାଲ (ଉଦାହରଣ ସ୍ୱରୂପ ଗଲା ୩୦ ବର୍ଷରେ ଭୁବନେଶ୍ଵରରେ ପୂର୍ବରୁ ସେହି ଗୋଟିଏ ସରକାରୀ ‘କ୍ୟାପିଟାଲ ହସ୍ପିଟାଲ’ ଥିଲା ବେଳେ ୨୨ଟି ନୂତନ ବୃହତ ପ୍ରାଇଭେଟ ହସ୍ପିଟାଲ ଓ ଅସଂଖ୍ୟ ଛୋଟ ବଡ ନର୍ସିଙ୍ଗ ହୋମ ତିଆରିହୋଇଛି ) ଅତି ନିର୍ଦ୍ଦୟ ଭାବରେ ଏହି ସମୟରେ ଦୈନନ୍ଦିନ ଚିକିତ୍ସାକୁ ବନ୍ଦ ରଖିବା, ରୋଗୀଙ୍କୁ ବିଭିନ୍ନ ବାହାନରେ ଫେରାଇଦେବା ଇତ୍ୟାଦି ଏହି ମହାମାରୀର ଇତିହାସରେ ଏକ ଅତ୍ୟନ୍ତ ଘୃଣିତ ଅଧ୍ୟାୟ ହୋଇରହିବ। ସରକାର ସେମାନଙ୍କୁ ଜାଗା ଓ ସୁବିଧା ଦେଇଥିବା ସତ୍ବେ କୌଣସି କାର୍ଯ୍ୟ ଆଦାୟ ନ କରିପାରିବା କରୋନା ଭାଇରସକୁ ନେଇ ଗଢିଥିବା ଆତଙ୍କ ଓ ଅନିଶ୍ଚିତତାର ଅନ୍ୟତମ କାରଣ।
ଆଜି କରୋନା ଭାଇରସର ଆକ୍ରାନ୍ତ ଦେଶମାନେ ଏ କଥାରେ ନିଶ୍ଚିତ ଯେ ସେମାନେ ଭାଇରସର ମୂଳକୁ ନଷ୍ଟ କରିପାରୁନାହାନ୍ତି, କେବଳ ଏହାର ପ୍ରକୋପକୁ କମାଇବାରେ ଲାଗିଛନ୍ତି । ସେହି ଭିତରେ ଲୋକେ ଚିକିତ୍ସାରେ ବିଲମ୍ଭ, ଉପଯୁକ୍ତ ଉପକରଣର (ଭେଣ୍ଟିଲେଟର ଇତ୍ୟାଦି) ଅଭାବ ଓ ନିଜର ରୋଗ ପ୍ରତିରୋଧକ ଶକ୍ତିର ଅଭାବ ହେତୁ ମୃତ୍ୟୁବରଣ କରୁଛନ୍ତି । ଏହା ମୂଳରେ ରହିଛି ଭାଇରସ ଯେତିକି ମୃତ୍ୟୁର କାରଣ ନୁହେଁ ତାହା ଠାରୁ ଅଧିକ ହେଉଛି ନିଜ ସ୍ୱାସ୍ଥ୍ୟ ବ୍ୟବସ୍ଥାର ଘରୋଇକରଣ ।
ରାଜନୈତିକ ଇଚ୍ଛା ଶକ୍ତିର କମ୍ପାନୀକରଣ :
ଏହି କୋଭିଡ଼ ସମୟରେ ଯେବେ ଏକ ଜରୁରୀକାଳୀନ ସ୍ଥିତି ରହିଛି ସେତେବେଳେ ଅଣସଂକ୍ରମିତ ରୋଗ ଯଥା କ୍ୟାନସର ରୋଗୀ କ୍ୟେମୋ ନପାଇବା, ହାର୍ଟଆଟକରେ ତୁରନ୍ତ ଆଡମିସନ ନହେବା, କିଡନି ସମସ୍ୟା ହେତୁ ଡାଏଲିଶିସ ନହେବା ଇତ୍ୟାଦି ହେତୁ ରୋଗୀ ମୃତ୍ୟୁବରଣ କରୁଛନ୍ତି । ପ୍ରାଇଭେଟ ହସ୍ପିଟାଲ ନିଜର ଦ୍ଵାର ସମସ୍ତ ରୋଗୀଙ୍କ ପାଇଁ ଖୋଲିବା ଛାଡିଦିଆଯାଉ, ସେମାନେ ନିଜର ନିୟମିତ ରୋଗୀଙ୍କ ପାଇଁ ମଧ୍ୟ ଦ୍ଵାର ବନ୍ଦ କରିଦେବା ହେତୁ ଏହାର ଚାପ ମଧ୍ୟ ସରକାରୀ ଡାକ୍ତରଖାନାମାନଙ୍କରେ ପଡିଛି ଓ ଉଭୟ ପ୍ରକାର ରୋଗୀଙ୍କୁ ଉପଯୁକ୍ତ ଚିକିତ୍ସା ଦେଇନପାରିବା ହେତୁ ମଧ୍ୟ ଲୋକେ ମୃତ୍ୟୁବରଣ କରିଛନ୍ତି ।
ଏଭଳି ସମୟରେ ଆମେ ବୁଝିପାରୁଛୁ ଯେ ଜନସ୍ୱାସ୍ଥ୍ୟ କ୍ଷେତ୍ରରେ ଆମେ କେତେ ଦୁର୍ବଳ! ଜନସ୍ୱାସ୍ଥ୍ୟ ସମ୍ପର୍କରେ ଗବେଷଣା ଲାଗି ପାଣ୍ଠି ଓ ଗବେଷଣାଗାରର ଅଭାବ ଯାହା ହେତୁ ଭାଇରସକୁ ବୁଝିବାରେ ସମୟ ଲାଗିବା, ଜନସ୍ୱାସ୍ଥ୍ୟ ବାହିନୀ ବା ଫୋର୍ସର ଅଭାବ, ଲୋକଙ୍କ ମଧ୍ୟରେ ଏ ନେଇ ଶିକ୍ଷା ଲାଗି ଉପଯୁକ୍ତ ମାଧ୍ୟମର ଅଭାବ, ପରସ୍ପର ମଧ୍ୟରେ ଅନୁଭୂତି ଓ ଚିକିତ୍ସା ସାମଗ୍ରୀର ଆଦାନ ପ୍ରଦାନର ଅଭାବ ଆଜି ପ୍ରତ୍ୟେକ ଦେଶକୁ ବାରମ୍ବାର ଲକଡାଉନ ହେତୁ ଆର୍ଥିକ ଦୃଷ୍ଟିରୁ ଦୁର୍ବଳ କରିସାରିଲାଣି । ଅଥଚ ପ୍ରତ୍ୟେକ ମହାମାରୀରେ ଯେମିତ ଅଧିକ ଚର୍ଚ୍ଚା ହୋଇଥାଏ ଯେ କେଉଁ ଦେଶରୁ ଏହି ଭୂତାଣୁ ଆସିଲା ବା କେଉଁ ପ୍ରାଣୀ ଦେହରୁ ଆସିଲା ତାହା ଆଜି ମିଡିଆ ମାଧ୍ୟମରେ ଏଠାରେ ହେଉଛି। ଏଥିରେ ଅନ୍ୟକୁ ଦୋଷ ଲଦିଦେବା କିନ୍ତୁ ନିଜକୁ ନସଜାଡିବାର ଯେଉଁ ଉଦ୍ଦେଶ୍ୟ ରହିଥାଏ ତାହା ହିଁ ହେଉଛି ।
ଏହି ମହାମାରୀ ସମୟରେ ତଥାପି ବଞ୍ଚିଯାଇଥିବା ସରକାରୀ ସ୍ୱାସ୍ଥ୍ୟ ବ୍ୟବସ୍ଥା ହିଁ ଆମକୁ ବିଶ୍ଵାସ ଦେଉଛି। ଆଜି ଯାହା ହୋଇପାରୁଛି ଏହା କେବଳ ସେହିମାନଙ୍କ ହେତୁ। ଯଦି ବିଶ୍ଵ ବୁଝିବ ଯେ ମୃତକମାନେ କେବଳ ସଙ୍ଖ୍ୟା ନୁହନ୍ତି ବା ନିଜ ଅଞ୍ଚଳରେ ବାକି ବଞ୍ଚିଯାଇଥିବା ଲୋକଙ୍କ ପାଇଁ କେବଳ ଏକ ଏକ ଭୟ ନୁହନ୍ତି । ବରଂ ସେମାନେ ବଳି ପଡିଯାଇଛନ୍ତି କାରଣ ଆମେ ଆମର ସ୍ୱାସ୍ଥ୍ୟବ୍ୟବସ୍ଥାକୁ ଠିକ ପରିଚାଳନା କରିପାରିନାହୁଁ ତେବେ ଦୃଢତାର ସହିତ ଏହାର ମୁକାବିଲା ହୋଇପାରିବ।
ସମସ୍ତ ପ୍ରାଇଭେଟ କମ୍ପାନୀଙ୍କ ଜମିକୁ ନିଜ ହାତକୁ ନେଇ ସେମାନଙ୍କୁ ସରକାରୀ ହସ୍ପିଟାଲର ମାନ୍ୟତା ଦେବା ଲାଗି ଆମର ଜନସାଧାରଣ ଯଦି ସରକାରମାନଙ୍କୁ ବ୍ୟାଧ୍ୟ କରିବାରେ ସମର୍ଥ ହେବେ ତେବେ ଏହି ମହାମାରୀ ବହୁ କଷ୍ଟ ଦେଇଥିଲେ ବି ଅତ୍ୟନ୍ତ ଏକ ଖୁସିର ଖବର ରଖିଦେଇଯିବ ଓ ତାହା ହିଁ ଆମ ସରକାରଙ୍କ ସର୍ବଶ୍ରେଷ୍ଠ ରାଜନୈତିକ ନିଷ୍ପତ୍ତି ହେବc।
ହାଇଦ୍ରାବାଦ, ନିଜ ରାଜ୍ୟକୁ ଫେରିବା ପାଇଁ ଶ୍ରମିକମାନେ ହାଇଦ୍ରାବାଦର ବିକେ ରାଘବ ରେଡ୍ଡି ହଲ ଆଗରେ ଲମ୍ବା ଧାଡିରେ ଛିଡା ହୋଇଛନ୍ତି । ପଣିଥରେ ଲକଡାଉନ ଘୋଷଣା ହୋଇଥିବାରୁ ଏମାନେ ନିଜ ରାଜ୍ୟକୁ ଫେରିପାରୁ ନାହାଁନ୍ତି।
ଲକ୍ଷ୍ନୌ : ବିଶ୍ବାସ ନହେଲେ ମଧ୍ୟ ସତ୍ୟ । ଏକା ସାଙ୍ଗରେ 5 ଶିଶୁଙ୍କୁ ଜନ୍ମ ଦେଇଛନ୍ତି ମହିଳା । ଉତ୍ତର ପ୍ରଦେଶରେ ଏହି ଘଟଣା ଘଟିଛି । ବୁଧବାର ଉତ୍ତରପ୍ରଦେଶର ବାରାବାଙ୍କୀ ଜିଲ୍ଲା ହସ୍ପିଟାଲରେ ଏହି ଘଟଣା ଘଟିଛି । ନବଜାତଙ୍କ ମଧ୍ୟରେ ଦୁଇ ଜଣ ପୁଅ ଏବଂ ତିନି ଜଣ ଝିଅ ରହିଛନ୍ତି । ପ୍ରସବ ପରେ 5 ଶିଶୁ ଏବଂ ମା ସୁସ୍ଥ ରହିଥିବା ଜଣାପଡିଛି । ଡାକ୍ତର ଯାଆଁଳା ଶିଶୁ ରହିଥିବାର ଅନୁମାନ କରିଥିବା ବେଳେ 5 ଶିଶୁଙ୍କ ଜନ୍ମ ନେଇ ଶିଶୁଙ୍କ ପିତା କୁନ୍ଦନ ଗୌତମ ଖୁସି ଜାହିର କରିଛନ୍ତି । କୁନ୍ଦନ ବାରାବାଙ୍କୀ ଜିଲ୍ଲାର କତଲପୁରର ରାମ ନଗର ଅଞ୍ଚଳରେ ଅବସ୍ଥାନ କରନ୍ତି । (ଏଜେନ୍ସି)
ଭୁବନେଶ୍ବର: ଆଜି ରାଜ୍ୟରେ ଆଉ ଚାରିଜଣ କରୋନା ଆକ୍ରାନ୍ତ ଚିହ୍ନଟ ହୋଇଥିବା କଥା ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ୱେବ ସାଇଟ ରୁ ଜଣା ପଡୁଛି। ଏହି ନୂଆ ଚାରି ଆକ୍ରାନ୍ତ ଯାଜପୁର ଜିଲ୍ଲାରେ ଚିହ୍ନଟ ହୋଇଥିବା ସ୍ପଷ୍ଟ ଜଣା ପଡୁଛି। ଆଜି ସକାଳେ ଭୁବନେଶ୍ବରର ଜଣେ ନୂଆ ଆକ୍ରାନ୍ତ ସୁସ୍ଥ ହୋଇଥିଲେ। ନୂଆ ୪ ଆକ୍ରାନ୍ତଙ୍କୁ ମିଶାଇ ରାଜ୍ୟରେ ମୋଟ ଆକ୍ରାନ୍ତଙ୍କ ସଂଖ୍ୟା ୮୭ ରେ ପହଞ୍ଛିଛି। ୩୩ ଜଣ କରୋନା ମୁକ୍ତ ହୋଇଥିବା ବେଳେ ଜଣେ ମୃତ୍ୟୁ ବରଣ କରିଛନ୍ତି। ଏହି ଆକ୍ରାନ୍ତଙ୍କ ମଧ୍ୟରେ ତିନି ଜଣ ମହିଳା ଏବଂ ଜଣେ ଯୁବକ ରହିଛନ୍ତି। ଆକ୍ରାନ୍ତ ତିନି ମହିଳାଙ୍କ ବୟସ ୪୮, ୭୪ ଏବଂ ୮୦ ରହିଥିବା ବେଳେ ଯୁବକଙ୍କ ବୟସ ୨୧ ରହିଛି। ୪ ଆକ୍ରାନ୍ତ ପଶ୍ଚିମବଙ୍ଗ ଫେରନ୍ତାଙ୍କ ପରିବାର ସଦସ୍ୟ ବୋଲି ସୂଚନା ମିଳିଛି।
ରାଞ୍ଚି : ଝାଡଖଣ୍ଡର ରାଜଧାନୀ ରାଞ୍ଚିରେ ହିନ୍ଦପିଢିଠାରୁ ଧରାପଡିଥିବା ଜମାତୀଙ୍କୁ ବଡ ଝଟ୍କା ଲାଗିଛି । ସିଭିଲ୍ କୋର୍ଟ ଏହି 17 ବିଦେଶିନୀଙ୍କ ସମେତ 18 ଜଣଙ୍କୁ ନ୍ୟାୟିକ ହେପାଜତକୁ ପଠାଇବା ପାଇଁ ଆଦେଶ ଦେଇଛନ୍ତି।
ଟୁରିଷ୍ଟ ଭିସା ଦ୍ବାରା ଭାରତରେ ଧର୍ମପ୍ରଚାର କରୁଥିବା ତବଲିଗ୍ ଜମାତ ସହ ସମ୍ପର୍କିତ 17 ବିଦେଶୀଙ୍କ ଉପରେ କଡା କାର୍ଯ୍ୟାନୁଷ୍ଠାନ କରାଯାଇଛି । ଭିସା ନିୟମ ଉଲ୍ଲଂଘନ ଅଭିଯୋଗରେ ସମସ୍ତଙ୍କ ବିରୋଧରେ ନ୍ୟାୟିକା ପ୍ରକ୍ରିୟା ଆରମ୍ଭ କରାଯାଇଛି । ରାଞ୍ଚି ପୋଲିସ୍ ଲକ୍ ଡାଉନ୍ ସମୟରେ ହିନ୍ଦପିଢିର ଏକ ମସ୍ଜିଦ୍ରେ ଲୁଚି ରହିଥିବା 17 ବିଦେଶୀଙ୍କ ସମେତ 23ଜଣଙ୍କୁ ଅଟକ ରଖି କ୍ବାରେଣ୍ଟାଇନ୍ରେ ରଖିବା ପାଇଁ ଖେଲ୍ ଗ୍ରାମଙ୍କୁ ପଠାଇଦେଇଥିଲେ ।
ଶନିବାର ଦିନ ଏହି କ୍ବାରେଣ୍ଟାଇନ୍ରେ ରହିଥିବା ଜଣେ ଜମାତୀଙ୍କ ନିକଟରୁ କରୋନା ପଜିଟିଭ୍ ଚିହ୍ନଟ ହୋଇଥିଲା । ପୋଲିସ୍ ସଂକ୍ରମିତଙ୍କୁ ରିମ୍ସର କୋଭିଡ୍ ବୋର୍ଡଙ୍କୁ ପଠାଇଥିବାବେଳେ ଅନ୍ୟ ସମସ୍ତଙ୍କୁ କ୍ବାରେଣ୍ଟାଇନ୍ ସେଣ୍ଟରରେ ରଖିବା ସହିତ କଡା ନଜରରେ ରଖିଛି । ସମସ୍ତ ଜମାତୀଙ୍କୁ ପୁନର୍ବାର ଯାଞ୍ଚ କରାଯିବା ସହ ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
ମିଳିଥିବା ସୂଚନା ଅନୁସାରେ ହିନ୍ଦପିଢିର ପୋଲିସ୍ 17 ଜମାତୀଙ୍କୁ କ୍ବାରେଣ୍ଟାଇନ୍ ସେଣ୍ଟରକୁ ପଠାଇଥିବାବେଳେ ଯାଞ୍ଚ ପରେ 22 ବର୍ଷୀୟ ଜଣେ ମାଲେସିଆ ମହିଳାଙ୍କ ନିକଟରେ କରୋନା ପଜିଟିଭ ଚିହ୍ନଟ ହୋଇଥିଲା । ଏହାପରେ ଜିଲ୍ଲା ପ୍ରଶାସନ ହିନ୍ଦପିଢି ନଦୀ ଗ୍ରାଉଣ୍ଡ ହରମୁ ସହିତ କଡରୁ ଅଞ୍ଚଳକୁ ପୂରାପୂରି ସିଲ୍ କରିଦେଇଛନ୍ତି। (ଏଜେନ୍ସି)
ଓ୍ବାଶିଂଟନ୍ : ଗଭର୍ବତୀ ଥିବା ସମୟରେ କରୋନାରେ ସଂକ୍ରମିତ ହୋଇଥିବା ଜଣେ ମହିଳା କୋମାରେ ରହିବା ପରେ ଏକ ଶିଶୁକୁ ଜନ୍ମ ଦେଇଥିଲେ । 27 ବର୍ଷୀୟ ଏହି ମହିଳା ଜଣକ ହେଉଛନ୍ତି ଏଞ୍ଜେଲା ପ୍ରିମଚିନ୍କୋ । ଆମେରିକାର ଓ୍ବାସିଟନର ଏହି ମହିଳା ଜଣକ ଗର୍ଭବତୀ ହେବାର 33 ସପ୍ତାହରେ କରୋନାରେ ସଂକ୍ରମିତ ହୋଇଥିଲେ । ତାଙ୍କ ଅବସ୍ଥା ବେଶ୍ ଗୁରୁତର ଥିବାରୁ ତାଙ୍କୁ ଭେଣ୍ଟିଲେଟରରେ ରଖାଯାଇଥିଲା । ଏପ୍ରିଲ୍1 ତାରିଖରେ ସେ ଏକ କନ୍ୟା ସନ୍ତାନକୁ ଜନ୍ମ ଦେଇଥିବାବେଳେ ଏପ୍ରିଲ୍ 6 ତାରିଖରେ ସେ କୋମାରୁ ବାହାରକୁ ଆସିଥିଲେ ।
କରୋନା କାରଣରୁ ସେ ତାଙ୍କର ଜନ୍ମିତ ସନ୍ତାନକୁ ପ୍ରାୟ 15 ପର୍ଯ୍ୟନ୍ତ ଦେଖିନଥିଲେ । କରୋନା ଯାଞ୍ଚ ପରେ ତାଙ୍କର ରିପୋର୍ଟ ନେଗେଟିଭ୍ ଆସିବା ପରେ ତାଙ୍କୁ ତାଙ୍କ ଝିଅ ସହିତ ଦେଖାକରିବାର ସୁଯୋଗ ଦିଆଯାଇଥିଲା। ଗତ ମାର୍ଚ୍ଚ 24ରେ ସେ କରୋନା ସଂକ୍ରମିତ ଜଣାପଡିଥିବାବେଳେ ଏପ୍ରିଲ୍ 15 ତାରିଖରେ ସେ ତାଙ୍କ ସନ୍ତାନକୁ ଦେଖା କରିପାରିଛନ୍ତି । ନିଜ ଝିଅ ସହିତ ଦେଖା କରିବା ପରେ ବେଶ୍ ଭାବବିହ୍ବଳିତ ହୋଇପଡିଛନ୍ତି ଏଞ୍ଜେଲା ।(ଏଜେନ୍ସି)
ନୂଆଦିଲ୍ଲୀ: ଦିଲ୍ଲୀର ଜହାଙ୍ଗୀରପୁରର ଏକ କଣ୍ଟେନମେଣ୍ଟ ଜୋନ୍ରେ ଏକ ପରିବାରର 26ଜଣ ସଦସ୍ୟଙ୍କଠାରେ କରୋନା ପଜିଟିଭ୍ ହୋଇଥିବାର ସୂଚନା ମିଳିଛି। 26 ଜଣଙ୍କ ମଧ୍ୟରେ ଦୁଇଟି ସ୍ତ୍ରୀ, ଜଣେ ସ୍ବାମୀ, 12ଟି ଝିଅ ଓ 7ଟି ପୁଅ ରହିଛନ୍ତି। ଦିଲ୍ଲୀରେ ଏପର୍ଯ୍ୟନ୍ତ 71ଟି କଣ୍ଟନମେଣ୍ଟ ଜୋନ୍ର ଚିହ୍ନଟ କରାଯାଇଛି। ଏହି ଅଞ୍ଚଳର କିଛି ଲୋକେ ନିୟମ ପାଳନ ନ କରି ଘରୁ ବାହାରୁଥିବାର ଜଣାପଡିଛି। ମହାରାଷ୍ଟ୍ର ପରେ ଦ୍ବିତୀୟ ସର୍ବାଧିକ କରୋନା ସଂକ୍ରମିତ ଦିଲ୍ଲୀରୁ ହିଁ ଚିହ୍ନଟ ହୋଇଛନ୍ତି। ଏଠାରେ 1700ରୁ ଅଧିକ ଜଣ କରୋନାରେ ସଂକ୍ରମିତ ହୋଇଥିବାବେଳେ 42ଜଣଙ୍କର ମୃତ୍ୟୁ ହୋଇଛି। (ଏଜେନ୍ସି)