ଭୁବନେଶ୍ୱର : ଟିକ୍ଟକ୍ ମାଧ୍ୟମରେ ପ୍ରେମକରି ଶେଷରେ ଘର ଛାଡ଼ି ନାବାଳିକା ଜଣକ ଉକ୍ତ ଯୁବକ ସହିତ ଫେରାର ହୋଇଯାଇଥିଲେ । ଏବେ ନାବାଳିକା ଜଣକ ପୁଲିସ ଦ୍ୱାରା ଉଦ୍ଧାର ହୋଇଥିବାବେଳେ ଓ ଯୁବକ ଜଣକ ଗିରଫ ହୋଇଛନ୍ତି ।
ପୁଲିସ ସୂତ୍ରରୁ ପ୍ରକାଶ ଯେ, ଭାପୁର ବ୍ଲକ ଫତେଗଡ଼ ଥାନା କରବର ଗ୍ରାମର କାଠିଆ ବେହେରାଙ୍କ 27 ବର୍ଷୀୟ ପୁଅ ଟିକ୍ଟକ୍ ମାଧ୍ୟମରେ ଭୁବନେଶ୍ୱର ଭିଏସଏସ ନଗରର ମହାବୀର ବସ୍ତିର ଜଣେ ଷଷ୍ଠ ଶ୍ରେଣୀର ନାବାଳିକାଙ୍କ ସହିତ ସମ୍ପର୍କ ଗଢ଼ି ଉଠିଥିଲା। ଏହି ପ୍ରେମ ସମ୍ପର୍କକୁ ପାଥେୟ କରି ଚଳିତ ମାସ ତିନି ତାରିଖ ଦିନ ଉକ୍ତ ନାବାଳିକା ଯୁବକଙ୍କ ସହିତ କରବର ଗ୍ରାମକୁ ପଳାଇ ଆସିଥିଲେ । ନାବାଳିକାଙ୍କୁ ପରିବାର ଲୋକ ନ ପାଇ ଖୋଜା ଖୋଜି କରି ଶେଷରେ ହତାଶ ହୋଇ ଥାନାରେ ଲିଖିତ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତି କରି ସହିଦ ନଗର ଥାନା ପକ୍ଷରୁ କେସ ନଂ 379/20 ରେ ଏକ ଅପହରଣ ମାମଲା ରୁଜୁ କରି ତଦନ୍ତ ଚଳାଇଥିଲେ ।
ଫୋନ ଟ୍ରାକିଙ୍ଗ ମାଧ୍ୟମରେ ଫତେଗଡ଼ ଥାନା କରବର ଗ୍ରାମରେ ଥିବା ଜାଣିବାକୁ ପାଇଥିଲେ ପୋଲିସ୍ । ଏହି ମାମଲାରେ ଫତେଗଡ଼ ଥାନା ପକ୍ଷରୁ ସମସ୍ତ ପ୍ରକାରର ସହଯୋଗ କରାଯାଇଥିଲା । ଫତେଗଡ଼ ଥାନା ଏସଆଇ କରବର ଗ୍ରାମର ଉକ୍ତ ଯୁବକଙ୍କ ଘରେ ଚଢ଼ଉ କରିଥିଲା । ପୁଲିସ ଯୁବକଙ୍କୁ ଗିରଫ କରିବା ସହ ନାବାଳିକାକୁ ଉଦ୍ଧାର କରିଥିଲେ। ସୋମବାର ଉଭୟଙ୍କର ଡାକ୍ତରୀ ମାଇନା ପରେ ନାବାଳିକାଙ୍କୁ ତାର ପରିବାରକୁ ହସ୍ତାନ୍ତର କରାଯାଇଥିବାର ସୂଚନା ରହିଛି ।
