ସୀତାରାମ ଅଗ୍ରୱାଲ
ବାଣପୁର: ଆସନ୍ତାକାଲି ଜନ୍ମମାଟି ବାଣପୁର ଆସିବେ ଛତିଶଗଡ ରାଜ୍ୟପାଳ ବିଶ୍ୱଭୂଷଣ ହରିଚନ୍ଦନ। ରାଜ୍ୟପାଳଙ୍କ ଗସ୍ତ ପୁର୍ବରୁ ତତ୍ପର ହୋଇଉଠିଛି ପ୍ରଶାସନ। ସୁରକ୍ଷା ଦୃଷ୍ଟିରୁ ବ୍ୟାପକ ପୋଲିସ ମୁତୟନ କରାଯାଇଛି।
ଅପରପକ୍ଷେ ଛତିଶଗଡ ପୋଲିସ ମଧ୍ୟ ବାଣପୁରରେ ପଇଁତରା ମାରୁଛି। ତେବେ ଶ୍ରୀ ହରିଚନ୍ଦନ ଆସନ୍ତାକାଲି ଭୁବନେଶ୍ୱର ସ୍ଥିତ ବାସଭବନରୁ ବାହାରି ଦିବା ୧୧.୩୦ ମିନିଟ ସମୟରେ ନାଚୁଣୀ ସ୍ଥିତ ପୂର୍ବତନ ବିଧାୟକ ତଥା ରାଜ୍ୟପାଳଙ୍କ ଭାଇ ଡଃ ବିଭୁତି ଭୂଷଣ ହରିଚନ୍ଦନଙ୍କ ବାସଭବନରେ ପହଞ୍ଚିବେ। ସେଠାରେ ରାଜ୍ୟପାଳ ଦୀର୍ଘ ତିନି ଘଣ୍ଟା ଅବସ୍ଥାପନ କରିବେ।
ଏହି ଅବସରରେ ଚିଲିକା ନିର୍ବାଚନମଣ୍ଡଳୀର ବିଶିଷ୍ଟ ବ୍ୟକ୍ତିବିଶେଷ ମାନେ ରାଜ୍ୟପାଳଙ୍କ ସହ ଭେଟିବେ ଓ ସମ୍ବର୍ଦ୍ଧନା ଦେବେ। ଏହାପରେ ଅପରାହ୍ନ ୩ ଘଟିକା ସମୟରେ ରାଜ୍ୟପାଳ ନିଜର ଜନ୍ମସ୍ଥାନ ଗୋଡ଼ିଝର ଗ୍ରାମ ସ୍ଥିତ ବାସଭବନରେ ପହଞ୍ଚିବେ। ସେ ନିଜ ପିତାଙ୍କ ଆରଧ୍ୟ ଠାକୁର ବାଲୁଙ୍କେଶ୍ବର ଦେବଙ୍କୁ ଦର୍ଶନ କରିବେ। ଏଥିସହିତ ସେ ନିଜ ପିତାମାତାଙ୍କ ସମାଧିସ୍ଥଳରେ ମଧ୍ୟ ଶ୍ରଦ୍ଧାଞ୍ଜଳି ଅର୍ପଣ କରିବେ।
ଏହାପରେ ଅପରାହ୍ନ ୪ ଘଟିକା ସମୟରେ ରାଜ୍ୟପାଳ ଗମ୍ଭାରୀମୁଣ୍ଡା ଗସ୍ତ କରିବେ। ସେଠାରେ ବିଭିନ୍ନ ସାମାଜିକ ସଂଗଠନ ରାଜ୍ୟପାଳଙ୍କୁ ସମ୍ବର୍ଦ୍ଧନା ଦେବେ।
ଏହାପରେ ଅପରାହ୍ନ ୫.୩୦ ଘଟିକା ସମୟରେ ରାଜ୍ୟପାଳ ବାଣପୁର ମା’ ଭଗବତୀ ମନ୍ଦିର ପହଞ୍ଚି ମା’ ଙ୍କ ଦର୍ଶନ କରିବେ। ସେଠାରେ କିଛି ସମୟ ଅତିବାହିତ କଲାପରେ ସେ ଭୁବନେଶ୍ୱର ବାସଭବନ ଫେରିଯିବାର କାର୍ଯ୍ୟକ୍ରମ ରହିଛି।