ବାଣପୁର: ଗତ ୧ ତାରିଖ ଦିନ ବାଣପୁର ମା ଭଗବତୀଙ୍କ ଉନ୍ନୟନ ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କରାଯାଇଛି। ସାଂସଦ ମାନସ ମଙ୍ଗରାଜ ଏହି ପ୍ରକଳ୍ପର ଭିତ୍ତି ପ୍ରସ୍ତର ସ୍ଥାପନ କରିଛନ୍ତି। ଏଥିରେ ବାଣପୁର ଏନଏସି ଅଧ୍ୟକ୍ଷ ଏବଂ ଉପଧ୍ୟକ୍ଷ ଯୋଗଦେଇଥିଲେ। ହେଲେ ସେହି ୱାର୍ଡର କାଉନସିଲର ସସ୍ମିତା ପୃଷ୍ଟିଙ୍କୁ ଡକାଯାଇ ନ ଥିଲା କି ଫଳକରେ ତାଙ୍କ ନାମ ଲେଖାଯାଇ ନ ଥିଲା। ଯାହାକୁ ନେଇ ସେ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି।
ସେ ଅଭିଯୋଗ କରିଛନ୍ତି ଯେ, ଏହି ଭିତ୍ତିପ୍ରସ୍ତର ସ୍ଥାପନ ଉତ୍ସବକୁ ଦଳିୟ କାର୍ଯ୍ୟକ୍ରମ କରି ଦିଆ ଯାଇଛି। ମୁଁ ନିଜେ ବିଜେପି କାଉନିସଲର ହୋଇଥିବାରୁ ମୋତେ ଡକାଗଲା ନାହିଁ ବୋଲି ସେ ଅଭିଯୋଗ କରିଛନ୍ତି। ଏ ନେଇ ସେ ଓବିସିସି ଚେୟାରମ୍ୟାନ, ଖୋର୍ଦ୍ଧା ଜିଲ୍ଲାପାଳ, ଉପ ଜିଲ୍ଲାପାଳ, ବାଣପୁର ତହସିଲଦାର ଏବଂ ଏନଏସି କାର୍ଯ୍ୟନିର୍ବାହୀ ଅଧିକାରୀଙ୍କୁ ଲିଖିତ ଅଭିଯୋଗ କରିଥିବା ଜଣାପଡିଛି।
ସାତ ଦିନ ମଧ୍ୟରେ ଯଦି ଏହାର ସମାଧାନ ନ ହୁଏ ଏବଂ ମହିଳା କାଉନସିଲରଙ୍କୁ ଉପଯୁକ୍ତ ନ୍ୟାୟ ନ ମିଳେ ତେବେ ସେ ବାଧ୍ୟ ହୋଇ ଆଇନର ଦ୍ୱାରସ୍ତ ହେବା ସହ ଆନ୍ଦୋଳନକୁ ଓଲ୍ହାଇବେ ବୋଲି ସସ୍ମିତା ଗଣମାଧ୍ୟମକୁ କହିଛନ୍ତି।
ତେବେ ଏ ନେଇ ବରିଷ୍ଠ ବିଜେପି ନେତା ପୃଥ୍ୱୀରାଜ ହରିଚନ୍ଦନ ଶାସକ ଦଳର ଏପରି କାର୍ଯ୍ୟକୁ ନିନ୍ଦା କରିଛନ୍ତି। ଆଗାମୀ ନିର୍ବାଚନରେ ଏହାର ସଠିକ ଜବାବ ଜନସାଧାରଣ ଦେବେ ବୋଲି ସେ କହିଛନ୍ତି । ଏ ବାବଦରେ ସେ ଓବିସିସି ଚେୟାରମ୍ୟାନଙ୍କ ସହ କଥା ହେବେ ବୋଲି କହିଛନ୍ତି। ଖୁବଶୀଘ୍ର ଯଦି ଏହାର ସମାଧାନ ଓବିସିସି ନ କରେ ତେବେ ବିଜେପି ତାହାର ଆଗାମୀ କାର୍ଯ୍ୟପନ୍ଥା ଗ୍ରହଣ କରିବ ବୋଲି ସେ କହିଛନ୍ତି।
ତେବେ ଉକ୍ତ ଫଳକ କେଉଁ ବିଭାଗ ଦ୍ୱାରା ଲଗାଯାଇଛି ଏବଂ କାହା ନିର୍ଦ୍ଦେଶରେ ଫଳକରେ ନାମ ସବୁ ଲେଖାଯାଇଛି ତାହା ଏବେ ସନ୍ଦେହ ସୃଷ୍ଟି କରିଛି।
