ବାଲୁଗାଁ (ସୀତାରାମ ଅଗ୍ରୱାଲ): ଆଜି ବହୁଚର୍ଚ୍ଚିତ ରଘୁନାଥପୁର ଗ୍ରାମ ହତ୍ୟାକାଣ୍ଡର ଫେରାର ଅଭିଯୁକ୍ତକୁ ଗିରଫ କରିଛି ଖୋର୍ଦ୍ଧା ଜିଲ୍ଲା ବାଲୁଗାଁ ପୋଲିସ। ସୂଚନା ମୁତାବକ ବାଲୁଗାଁ ଥାନା କେଶ ନଂ ୧୫୧/୨୦୨୨ ମୁତାବକ ରଘୁନାଥପୁର ଗ୍ରାମରେ ଜଣେ ବୃଦ୍ଧଙ୍କୁ ସଂଘବଦ୍ଧ ଭାବେ ଅତି ନିର୍ମମ ହତ୍ୟା କରାଯାଇଥିଲା।
ପୂର୍ବରୁ ଉକ୍ତ ହତ୍ୟା ମାମଲାରେ ୫ଜଣ ଗିରଫ ହୋଇଥିବା ବେଳେ ସିଙ୍ଗେଶ୍ୱର ଗ୍ରାମର ନାରାୟଣ ବେହେରାଙ୍କ ପୁଅ ଅନିଲ ବେହେରା ଓରଫ ଚିରୁ ଦୀର୍ଘ ଦିନ ଧରି ଫେରାର ଥିଲେ। ଏ ନେଇ ତାଙ୍କ ବିରୁଦ୍ଧରେ ଅଦାଲତ ଜି ଆର କେଶ ନଂ ୩୧୫/୨୦୨୨ ଆଧାରରେ ଜାମିନ ବିହୀନ ଗିରଫ ପରୱାନା ଜାରି କରିଥିଲେ।
ତେବେ ଆଜି କୌଣସି ସୂତ୍ରରୁ ଖବର ପାଇ ବାଲୁଗାଁ ଥାନାଧିକାରୀ ଜୟ ପ୍ରକାଶ ପରିଡା ସଦଳବଳେ ପହଞ୍ଚି ଅଭିଯୁକ୍ତ ଚିରୁଙ୍କୁ ଗିରଫ କରିବାରେ ସଫଳ ହେଇଛନ୍ତି। ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ଶ୍ରୀ ପରିଡା କହିଛନ୍ତି।