ବାଣପୁର (ସୀତାରାମ ଅଗ୍ରୱାଲ): ଆଜି ଦିବା ୧୧ ଘଟିକା ସମୟରେ ଉପର ମହଲା ପଠନ ଗୃହରେ ଗୋଦାବରୀଶ ମହାବିଦ୍ୟାଳୟର ଅଧ୍ୟକ୍ଷ ବିନାୟକ ହୋତାଙ୍କ ସଭାପତିତ୍ବରେ “ଲିଙ୍ଗଜନିତ ସମ୍ବେଦନଶୀଳତା” ଶୀର୍ଷକ ବିଷୟ ଉପରେ ଏକ ଆଲୋଚନା କାର୍ଯ୍ୟକ୍ରମ ଅନୁଷ୍ଠାନର ମନସ୍ତତ୍ତ୍ଵ ବିଭାଗ ଏବଂ ଆଈ.କ୍ୟୁ. ଏ.ସି ମିଳିତ ଆନୁକୁଲ୍ୟରେ ଅନୁଷ୍ଠିତ ହୋଇଥିଲା।
ଏହି ଆଲୋଚନାରେ ମୁଖ୍ୟ ବକ୍ତା ଭାବେ ଏହି ମହାବିଦ୍ୟାଳୟର ପୂର୍ବତନ ମନସ୍ତତ୍ତ୍ଵ ବିଭାଗ ର ରିଡର ଡଃ. ହରେଶ୍ ଚନ୍ଦ୍ର ମିଶ୍ର ଯୋଗ ଦେଇ ଲିଙ୍ଗ ଜନିତ ସମସ୍ୟା ଓ ବାଛ ବିଚାର ଦୂରେଇ ମହିଳା ସଶକ୍ତିକରଣ ଉପରେ ସାରଗର୍ଭକ ବକ୍ତବ୍ୟ ପ୍ରଦାନ କରିଥିଲେ। ଡଃ. ମିଶ୍ର ତାଙ୍କର ବକ୍ତବ୍ୟ ମାଧ୍ୟମରେ ଉଲ୍ଲେଖ କରିଥିଲେ ଯେ ଗୋଟିଏ ବିରାଟ ହାତୀ ଯେମିତି ଏକ ସରୁ ରସି ଦ୍ବାରା ଗୋଟିଏ ଛୋଟ ଗଛରେ ବନ୍ଧା ହୋଇ ମଧ୍ୟ ଗଛ ଭାଙ୍ଗି ପଳାଇବାକୁ ଚେଷ୍ଟା କରି ନଥାଏ କାରଣ ଶିଶୁ ସମୟରୁ ହାତୀ ଟି ଗଛରେ ବାନ୍ଧି ହୋଇ ରହିବା ଅଭ୍ୟାସ ରେ ଅଭ୍ୟସ୍ତ, ସେହିପରି ମହିଳା ମାନଙ୍କ ଅମାପ ଶକ୍ତି ଥିଲେ ମଧ୍ୟ ସମାଜ ଓ ସଂସ୍କୃତି ଚାରି କାନ୍ଥ ମଧ୍ୟରେ ସୀମିତ ହୋଇ ରହନ୍ତି।
ମନସ୍ତତ୍ତ୍ୱ ବିଭାଗର ମୁଖ୍ୟ ସୁଜିତ କୁମାର ପାଣ୍ଡେ, ଅଜୟ କୁମାର ବେହେରା, ସ୍ୱାଗତିକା ସାହୁ ଏବଂ ଆଈ.କ୍ୟୁ.ଏ.ସି ସଂଯୋଜିକା ଡଃ. ଋତୁସ୍ମିତା ମିଶ୍ର ଏହି କାର୍ଯ୍ୟକ୍ରମକୁ ପରିଚାଳନା କରିଥିଲେ।
ଏହି ଆଲୋଚନାରେ ମନସ୍ତତ୍ତ୍ୱ ବିଭାଗର ଅଧ୍ୟାପକ ଶ୍ରୀଯୁକ୍ତ ପୁଲିନ୍ ବିହାରି ଜେନା ସ୍ୱାଗତ ଭାଷଣ ପ୍ରଦାନ କରିଥିଲେ, ପ୍ରଶାସନିକ ଅଧିକାରୀ ଡକ୍ଟର ଏସ୍.ପି.ଏନ୍.ଏସ୍. ବର୍ମା ମୁଖ୍ୟବକ୍ତା ଙ୍କ ପରିଚୟ ପ୍ରଦାନ କରିଥିଲେ।
ପରିଶେଷରେ ଅଧ୍ୟାପକ( ଏଲ୍.ଟି) ଡଃ. ଗୁରୁ କିଶୋର ନାୟକ ଧନ୍ୟବାଦ ଅର୍ପଣ କରିଥିଲେ। ଏହି ଆଲୋଚନା ରେ ପ୍ରାୟତଃ ତିନିଶହ ରୁ ଉର୍ଦ୍ଧ୍ଵ ଛାତ୍ର ଛାତ୍ରୀ, ଅଧ୍ୟାପକ , ଅଧ୍ୟାପିକା ଓ କର୍ମଚାରୀ ଯୋଗ ଦେଇଥିଲେ।
