ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ସୋଲାରୀ ପାହାଡ଼ ପାଦଦେଶରେ ଥିବା ଭଗବତୀପୁର ଗ୍ରାମର ମାଆ ତାରିଣୀଙ୍କ ପୀଠରେ ବିଶ୍ୱଶାନ୍ତି ଗୀତା ମହାଯଜ୍ଞ ଓ ଶମ୍ଭୁ ମିଳନ ମହାସମାରୋହରେ ଅନୁଷ୍ଠିତ ହୋଇଯାଇଛି। ଏହି ସୋଲାରୀ ପାହାଡ଼ ବଣ ଜଙ୍ଗଲ ଭରପୁର ପ୍ରାକୃତିକ ପରିବେଶ ଖୁବ ଆକୃଷ୍ଟ କରିଥାଏ। ମାଆ ତାରିଣୀ ଙ୍କ ପୀଠରେ ଦୀର୍ଘ ଚାରି ଦିନ ବ୍ୟାପି ଗୀତା ମହାଯଜ୍ଞ ଅନୁଷ୍ଠିତ ହୋଇଥିଲା।
ମାଆ ତାରିଣୀଙ୍କ ଅପାର କରୁଣା ତଥା ଅଞ୍ଚଳର ପ୍ରତ୍ୟକ୍ଷ ଦେବୀପୀଠ ହୋଇଥିବାରୁ ଆଖପାଖ ଅଞ୍ଚଳର ହଜାର ହଜାର ସଂଖ୍ୟକ ଶ୍ରଦ୍ଧାଳୁଙ୍କ ସମାଗମ ଦେଖିବାକୁ ମିଳିଥିଲା। ମାଆ ତାରିଣୀ ତେତିଶି କୋଟି ଦେବାଦେବୀ ଙ୍କୁ ସାଙ୍ଗରେ ଧରି ଆଲୋକମାଳା ଓ ଫୁଲମାଳରେ ସଜେଇ ହୋଇ ଦୋଳ ବିମାନ, ଗରୁଡ଼, ସହିତ ଘଣ୍ଟ ବାଦ୍ୟ, ସଂକୀର୍ତ୍ତନ, ଚଇତି ଘୋଡ଼ା, ଆଦି ନୃତ୍ୟସବୁ ବିରାଟ ପାଟ ପଟୁଆର ରେ ଗାଁ ଦାଣ୍ଡ ଫାଟି ପଡୁଥିଲା। ଗ୍ରାମର ପ୍ରତି ଘରେ ପୂର୍ଣ୍ଣକୁମ୍ଭ ସହିତ ଦୀପ ପ୍ରଜ୍ଜ୍ବଳନ ଗ୍ରାମକୁ ଫୁଲରେ ସୁସଜ୍ଜିତ କରାଯାଇଥିଲା।
ଆଜି ବିଶ୍ୱଶାନ୍ତି ଗୀତା ମହାଯଜ୍ଞ ଉଦଯାପନୀ ଉତ୍ସବରେ ମାଆ ତାରିଣୀ ଙ୍କ ପୀଠରେ ଆଖପାଖ ଅଞ୍ଚଳର ନିମନ୍ତ୍ରିତ ସମସ୍ତ ଦେବା ଦେବୀଙ୍କ ଶମ୍ଭୁ ମେଳଣ ଅନୁଷ୍ଠିତ ହୋଇଥିଲା। ଏହି ମେଳଣ ପର୍ବରେ ମାଆ ତାରିଣୀ ନିମନ୍ତ୍ରଣ କ୍ରମେ ଶ୍ରୀଶ୍ରୀ ଗୋବିନ୍ଦ ଗୋପାଳ ଦେବ, ଶ୍ରୀଶ୍ରୀ ଭଗବତ ଦେବ, ଶ୍ରୀଶ୍ରୀ କଳିଯୁଗେଶ୍ୱର ଦେବ, ଶ୍ରୀଶ୍ରୀ ପତିତପାବନ ଦେବ, ଶ୍ରୀଶ୍ରୀ ଗାଦିଶ୍ୱର ଦେବ, ଶ୍ରୀଶ୍ରୀ ସୋମନାଥ ଶ୍ୱର ଦେବ, ମାଆ ଧୂଳିଆ ଦେବୀ ବିଜେ ପ୍ରତିମା ବିମାନ ମାନ ସାମିଲ ହୋଇଥିଲେ। ହରିବୋଲ ହୁଳହୁଳି ଧ୍ୱନୀରେ ଫାଟି ପଡୁଥିଲା ସମ୍ପୂର୍ଣ୍ଣ ମେଳଣ ପଡିଆ।
ମା’ ଧୂଳିଆ ଦେବୀ ଙ୍କ ସହିତ ସମସ୍ତ ଦେବା ଦେବୀଙ୍କ ଅପୂର୍ବ ମହାମିଳନର ମାହେନ୍ଦ୍ର ବେଳାକୁ ଦର୍ଶନ କରି ଅଶେଷ ପୂର୍ଣ୍ୟ ଅର୍ଜନ କରିଥିଲେ ଶ୍ରଦ୍ଧାଳୁ. ମେଳଣ ପଡିଆ ଠାରେ ସୁରୁଖୁରୁରେ ମେଳଣ ପର୍ବ ସରିଥିବା ବେଳେ ଲୋକଙ୍କ ଭିଡ଼କୁ ନିୟନ୍ତ୍ରିତ କରିବା ପାଇଁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଥିଲା।