ବାଲୁଗାଁ: ବାଲୁଗାଁ ମହାବିଦ୍ୟାଳୟ ଦର୍ଶନ ବିଭାଗର ବାର୍ଷିକ ଉତ୍ସବ ସାୟନାରା କାର୍ଯ୍ୟକ୍ରମରେ ଅଧ୍ୟାପିକା ଡକ୍ଟର ମନସ୍ବିନୀ ପଟ୍ଟନାୟକଙ୍କୁ ବିଭାଗ ପକ୍ଷରୁ ସମ୍ବର୍ଦ୍ଧନା ପ୍ରଦାନ କରାଯାଇଛି। ଦର୍ଶନଶାସ୍ତ୍ର ବିଭାଗ ମୁଖ୍ୟ ଅଧ୍ୟାପକ ଡକ୍ଟର କୈଳାସ ଚନ୍ଦ୍ର ମହାରଣାଙ୍କ ସଭାପତିତ୍ୱରେ ଅନୁଷ୍ଠିତ ଉକ୍ତ ବାର୍ଷିକ ଉତ୍ସବର ପ୍ରାରମ୍ଭରେ ଶିକ୍ଷାର୍ଥୀମାନେ ଶ୍ରୀଜଗନ୍ନାଥଙ୍କ ମୂର୍ତ୍ତି ନିକଟରେ ପ୍ରଦୀପ ପ୍ରଜ୍ବଳନ କରିଥିଲେ।
ସଭାପତି ଡକ୍ଟର ମହାରଣା ଅନ୍ତିମବର୍ଷ ସ୍ନାତକ ଶିକ୍ଷାର୍ଥୀମାନଙ୍କୁ ଭାବପୂର୍ଣ୍ଣ ବିଦାୟ ଜଣାଇ କହିଥିଲେ ଯେ, ଶ୍ରେଣୀ କକ୍ଷରେ ନିୟମିତତା ଓ ନିଷ୍ଠାପରତା ଶିକ୍ଷାଦାତାଙ୍କ ସହିତ ନିବିଡ଼ ତଥା ଜୀବନ୍ତ ସମ୍ପର୍କକୁ ମଜବୁତ କରିଥାଏ। ଯେଉଁଠି ମୁକ୍ତ ବାତାବରଣ ଓ ଗ୍ରହଣଶୀଳତା ଥାଏ ସେଠାରେ ନୈତିକତା ଯଥାର୍ଥ ଭାବେ ପ୍ରତିଫଳିତ ହୋଇଥାଏ। ଏହି ପରିବେଶ ଶିକ୍ଷାର୍ଥୀଙ୍କ ମଧ୍ୟରେ ଥିବା ନେତୃତ୍ୱ ଓ ସର୍ଜନଶୀଳତାକୁ ଅଧିକ ପ୍ରସ୍ଫୁଟିତ କରିଥାଏ।
ଏହି ଅବସରରେ ନିକଟରେ ଉତ୍କଳ ବିଶ୍ୱବିଦ୍ୟାଳୟରୁ ପରିବେଶ ନୈତିକତାରେ ପିଏଚଡ଼ି ଲାଭ କରିଥିବା ଯୁବ ଅଧ୍ୟାପିକା ଡକ୍ଟର ମନସ୍ବିନୀ ପଟ୍ଟନାୟକଙ୍କୁ ଡକ୍ଟର ମହାରଣା ଦର୍ଶନ ବିଭାଗ ପକ୍ଷରୁ ଅଭିନନ୍ଦନ ସ୍ମାରକୀ, ପୁଷ୍ପଗୁଚ୍ଛ ଓ ଉପଢୌକନ ପ୍ରଦାନ କରି ସମ୍ବର୍ଦ୍ଧିତ କରି ଥିଲେ।
ଅନୁରୂପ ଭାବେ ମହାବିଦ୍ୟାଳୟ ଶିକ୍ଷକ ସଙ୍ଘ ପକ୍ଷରୁ ଅଧ୍ୟକ୍ଷ ଡକ୍ଟର ଲଷ୍ମୀଧର ସୁବୁଦ୍ଧି, ଯୁକ୍ତ ଦୁଇ ଅଧ୍ୟକ୍ଷ ସୁବାସ ଚନ୍ଦ୍ର ଶ୍ରୀଚନ୍ଦନ, ଶିକ୍ଷକ ସଙ୍ଘ ସଭାପତି ଡକ୍ଟର ମୋନାଲିସା ମାନସିଂ, ସମ୍ପାଦକ ବିଦ୍ୟାଧର ଜୁଝାରସିଂହ ମିଳିତ ଭାବେ ଡକ୍ଟର ମନସ୍ବିନୀ ପଟ୍ଟନାୟକଙ୍କୁ ସମ୍ବର୍ଦ୍ଧିତ କରିଥିଲେ। ଦର୍ଶନ ବିଭାଗ ସେମିନାର ସମ୍ପାଦିକା ସନ୍ଧ୍ୟାରାଣୀ ପାଇକରାୟ ନିଜ ବକ୍ତବ୍ୟରେ କହିଲେ ଯେ ଶିକ୍ଷକଙ୍କ ଅଧ୍ୟବସାୟ, ଶୈକ୍ଷିକ ସଫଳତା ଓ ଉଚ୍ଚତମ ଡିଗ୍ରୀ ଛାତ୍ରଛାତ୍ରୀମାନଙ୍କୁ ନିଶ୍ଚିତ ପ୍ରଭାବିତ ଓ ଅନୁପ୍ରେରିତ କରିବ।
ଡକ୍ଟର ମନସ୍ବିନୀ ଏହି ସମ୍ବର୍ଦ୍ଧନାର ଉତ୍ତର ଦେଇ କହିଲେ ଯେ, ଏହି ସମ୍ବର୍ଦ୍ଧନା ତାଙ୍କ ଅଧ୍ୟାପନା ଜୀବନର ଏକ ଅବିସ୍ମରଣୀୟ ମୁହୂର୍ତ୍ତ। ଏହି ଶୈକ୍ଷିକ ସଫଳତାର ଶ୍ରେୟ ସେ ମହାବିଦ୍ୟାଳୟର ଅଧ୍ୟକ୍ଷଙ୍କ ସମେତ ଅଧ୍ୟାପକ ଓ ଅଧ୍ୟାପିକାଙ୍କୁ ପ୍ରଦାନ କରିଥିଲେ।
ଏହାପରେ ତୃତୀୟ ବର୍ଷ, ଦ୍ୱିତୀୟ ବର୍ଷ ଓ ପ୍ରଥମ ବର୍ଷର ଶିକ୍ଷାର୍ଥୀମାନେ ସେମାନଙ୍କ ଅନୁଭୂତି ଉପସ୍ଥାପନ କରିଥିଲେ। ସାୟନାରା କାର୍ଯ୍ୟକ୍ରମକୁ ବିଭାଗର ସହ ସମ୍ପାଦିକା ସୋନାଲି ବିଶ୍ୱାସ ପରିଚାଳନା କରିଥିବା ବେଳେ ସଂଯୋଜିକା ସରସ୍ବତୀ ଘଟୁଆଳି ଧନ୍ୟବାଦ ଅର୍ପଣ କରିଥିଲେ।