ବାଲୁଗାଁ: ଖୋର୍ଦ୍ଧା ଜିଲ୍ଲା ବାଲୁଗାଁ ହାଇସ୍କୁଲର ବିଶିଷ୍ଟ ଶିକ୍ଷାବିତ, ଆଦର୍ଶ ଶିକ୍ଷକ ଓ ସୁନାମଧନ୍ୟ ସାହିତ୍ୟିକ ସ୍ବର୍ଗତ ଜିତେନ୍ଦ୍ର ନାଥ ବରାଳଙ୍କ ଦ୍ଵାଦଶାହ ସ୍ମୃତି ଶ୍ରଦ୍ଧାଞ୍ଜଳି ସଭା ସ୍ଥାନୀୟ ଶ୍ରୀଉମାମହେଶ୍ୱର କଲ୍ୟାଣ ମଣ୍ଡପ ସଭାଗୃହରେ ଅଧ୍ୟାପକ ମାନସ ମୋହନ ବଳିଆରସିଂଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। ଏଥିରେ ଶିକ୍ଷାବିଦ ତଥା ବାଲୁଗାଁ ହାଇସ୍କୁଲର ଅଵସର ପ୍ରାପ୍ତ ପ୍ରଧାନ ଶିକ୍ଷକ ବିମଳ ପ୍ରସାଦ ମହାନ୍ତି, ଅବସର ପ୍ରାପ୍ତ ବରିଷ୍ଠ ପୋଲିସ ଅଧିକାରୀ ଜଳନ୍ଧର ଜାଲି, ଜିଲ୍ଲାପରିଷଦ ଉପାଧ୍ୟକ୍ଷ ଗୋପୀନାଥ ମହାରଣା, ନାଟ୍ୟକାର ଭିକାରୀ ଚରଣ ପ୍ରଧାନ, ମୁରଲୀ ସାମନ୍ତ ସିଂହାର, ରବୀନ୍ଦ୍ର ନାଥ ମାନସିଂହ, ଅଧ୍ୟାପକ ରାମାକାନ୍ତ ନନ୍ଦ, ସର୍ବେଶ୍ୱର ମହାରଣା, କୈଳାଶ ଚନ୍ଦ୍ର ସାହୁ, ଅମୁଲ୍ୟ ମହାପାତ୍ର, ରାଜକିଶୋର ସାହୁ, ଉମାକାନ୍ତ ସାହୁ, ପ୍ରସନ୍ନ ନାୟକ ପ୍ରମୁଖ ବହୁ ଶିକ୍ଷାବିଦ, ସାହିତ୍ୟିକ, ସ୍ତମ୍ଭକାର ଯୋଗଦେଇ ସ୍ବର୍ଗତ ଜିତେନ୍ଦ୍ର ନାଥ ବରାଳ ରାଜ୍ୟର ଅନ୍ୟତମ ସୁନାମଧନ୍ୟ ବିଶିଷ୍ଟ ଲେଖକ, କବି ଓ ଶିକ୍ଷାବିଦ ଥିଲେ ବୋଲି ବକ୍ତା ମାନେ କହିଥିଲେ।
ତାଙ୍କ ଦ୍ବାରା ଲିଖିତ ସାରସ୍ୱତ ପ୍ରବନ୍ଧ ଓ ପତ୍ର ଲିଖନ, ପ୍ରାଚୀ ପ୍ରବନ୍ଧ ଓ ପ୍ରବନ୍ଧମାଳା, ସାରସ୍ୱତ ବ୍ୟାକରଣ ଆଦି ପୁସ୍ତକ ସାରା ରାଜ୍ୟରେ ଛାତ୍ରଛାତ୍ରୀଙ୍କ ମହଲରେ ତାଙ୍କୁ ସବୁବେଳେ ପରିଚିତ କରି ରଖିବ ବୋଲି ସମସ୍ତେ ମତ ପ୍ରକାଶ କରିଥିଲେ। ଜଣେ ଆଦର୍ଶ ଶିକ୍ଷକ ହିସାବରେ ଅର୍ଥ ପଛରେ ନ ଗୋଡ଼ାଇ ଜୀବନର ଶେଷ ପର୍ଯ୍ୟନ୍ତ ସେ ବାଲୁଗାଁ ଅଞ୍ଚଳରେ ଶିକ୍ଷାର ଆଲୋକ ବର୍ତ୍ତିକା ସାଜିଥିଲେ ଓ ଏହି ଅଞ୍ଚଳ ଛାତ୍ରଛାତ୍ରୀ ସବୁଦିନ ତାଙ୍କୁ ମନେ ରଖିବେ ବୋଲି ଉପସ୍ଥିତ ତାଙ୍କର ସମସ୍ତ ଛାତ୍ରଛାତ୍ରୀ କହିଥିଲେ। ଦିବ୍ୟ ଗତ ଆତ୍ମାର ସ୍ମରଣ ପାଇଁ “ସୃତିଅଞ୍ଜଳି” ସ୍ମରଣୀକା ଉନ୍ମୋଚିତ ହୋଇଥିଲା।
ସଭା ପ୍ରାରମ୍ଭରେ ଦିବ୍ୟଗତ ଶିକ୍ଷା ବିଦଙ୍କ ଫୋଟୋ ଚିତ୍ରରେ ମାଲ୍ୟାର୍ପଣ ଓ ଆତ୍ମା ସଦଗତି ଉଦ୍ଦେଶ୍ୟରେ ଦୁଇ ମିନିଟ ନିରବ ପ୍ରାର୍ଥନା, ଶାନ୍ତିପାଠ ଶିକ୍ଷକ ଆଲୋକ ପାଟ୍ଟଶାଣୀ ସଂଯୋଜନା କରିଥିବା ବେଳେ ଶେଷରେ ତାଙ୍କ ସାନପୁଅ ଅରୁଣ ବରାଳ ଧନ୍ୟବାଦ ଅର୍ପଣ କରିଥିଲେ।