ରଞ୍ଜିତ୍ ପଣ୍ଡା
କୁଜଙ୍ଗ : ମହିଳା ଓ ଯୁବତୀମାନଙ୍କୁ ସ୍ବାବଲମ୍ବୀ କରିବା ସହ ସେମାନଙ୍କୁ ଯଥେଷ୍ଟ କର୍ମନିଯୁକ୍ତି ସୃଷ୍ଟି କରିବା ଲକ୍ଷ୍ୟରେ ଜେଏସ୍ଡବ୍ଲ୍ୟୁ ଉତ୍କଳ ଷ୍ଟିଲ୍ ଓ ‘ଶାହୀ ଏକ୍ସପୋର୍ଟ’ ମିଳିତ ସହଯୋଗରେ କାର୍ଯ୍ୟାରମ୍ଭ କରିଛନ୍ତି ।
ଏରସମା ବ୍ଲକର ନୂଆଗାଁଠାରେ ଜେଏସ୍ଡବ୍ଲୁ ଏକ ଅତ୍ୟାଧୁନିକ ଇସ୍ପାତ ପ୍ରକଳ୍ପ ପାଇଁ ଆପାତତଃ ସ୍ଥିରୀକୃତ ହୋଇଛି । କମ୍ପାନୀ ପକ୍ଷରୁ ଉକ୍ତ ପ୍ରକଳ୍ପରେ 71ହଜାର କୋଟି ଟଙ୍କା ପୁଞ୍ଜିନିବେଶ କରିବ। ଏହି କ୍ରମରେ ଉକ୍ତ ଅଞ୍ଚଳରେ ବସବାସ କରୁଥିବା ଗରିବ ମହିଳା ଓ ଯୁବତୀମାନେ କିଭଳି ନିଜର ଓ ପରିବାର ଆର୍ଥିକ ପରିସ୍ଥିତିରେ ସୁଧାର ଆଣିପାରିବେ ସେଥିପାଇଁ ଏକ ଅଭିନବ କାର୍ଯ୍ୟକ୍ରମ ହାତକୁ ନିଆଯାଇଛି । ଢିଙ୍କିଆ, ଗଡକୁଜଙ୍ଗ ଓ ନୂଆଗାଁ ପଞ୍ଚାୟତରେ ଥିବା 18ରୁ 38 ବର୍ଷର ମହିଳା ମାନଙ୍କୁ ଶାହୀ ଏକ୍ସପୋର୍ଟ କମ୍ପାନୀ ସହାୟତାରେ ପ୍ରଥମ ପର୍ଯ୍ୟାୟରେ 50 ଜଣ ମହିଳାଙ୍କୁ କୁଶଳୀ କାରିଗର ହେବା ପାଇଁ ଟ୍ରେନିଂ ଆରମ୍ଭ କରାଯାଇଛି । ଏମାନଙ୍କୁ ବିଭିନ୍ନ ଡିଜାଇନ୍ରେ କଟିଂ ଓ ସିଲେଇ, ଦକ୍ଷ କାରିଗରଙ୍କ ଦ୍ବାରା ଭୁବନେଶ୍ବରରେ ଶିକ୍ଷା ଆରମ୍ଭ ହୋଇଛି । ଏମାନଙ୍କର ରହିବା ଖାଇବା ମଧ୍ୟ ସମ୍ପୂର୍ଣ୍ଣ ମାଗଣା । ଏମାନଙ୍କୁ ଚାରି ମାସ ଶିକ୍ଷା ଦିଆଯିବା ପରେ ନିଜର ଦକ୍ଷତା ଅନୁଯାୟୀ ସେମାନଙ୍କୁ ଉକ୍ତ କମ୍ପାନୀରେ ନିଯୁକ୍ତି ପ୍ରଦାନ କରାଯିବ ବୋଲି ଜେଏସଡବ୍ଲୁ ତରଫରୁ ସୂଚନା ଦିଆଯାଇଛି । ଆଗାମୀ ଦିନରେ ଉକ୍ତ ତିନୋଟି ପଞ୍ଚାୟତରୁ 300ରୁ400 ମହିଳା ଓ ଯୁବତୀମାନଙ୍କୁ କର୍ମକୁଶଳୀ କରାଯିବା ସହ ସେମାନଙ୍କୁ କର୍ମନିଯୁକ୍ତି ଦିଆଯିବ ଓ ଆବଶ୍ୟକ ପଡ଼ିଲେ କର୍ମକୁଶଳୀ ମହିଳାମାନେ ନିଜ ନିଜର ଘରେ ରହି ମଧ୍ୟ ଉକ୍ତ କମ୍ପାନୀ ପାଇଁ କାର୍ଯ୍ୟ କରି ଅର୍ଥ ଉପାର୍ଜନ କରିପାରିବେ ।
ସୂଚନାଯୋଗ୍ୟ ଯେ, ଶାହୀ ଓ ଜେସଏସ୍ଡବ୍ଲୁର ମିଳିତ ସହଯୋଗରେ ଦୁଇଦିନିଆ କର୍ମଶାଳା ପାରାଦ୍ବୀପସ୍ଥିତ କାର୍ଯ୍ୟାଳୟରେ ଶେଷ ହୋଇଥିଲା । ଜେଏସ୍ଡବ୍ଲୁର ଏହିଭଳି ଅଭିନବ ପ୍ରୟାସକୁ ଉକ୍ତ ଅଞ୍ଚଳରେ ସ୍ଥାନୀୟ ଅଧିବାସୀମାନେ ସ୍ବାଗତ କରିବା ସହ ଭୂୟସୀ ପ୍ରଶଂସା କରିଛନ୍ତି ।