କନ୍ଦର୍ପ ବେହେରା
ରେଢାଖୋଲ : ସରକାର ବାହାର ରାଜ୍ୟରେ ଥିବା ଶ୍ରମିକ ମାନଙ୍କୁ ନିଜ ରାଜ୍ୟକୁ ଫେରାଇ ଆଣିବାକୁ ପ୍ରୟାସ ଜାରି ରଖିଛନ୍ତି । ଅପରପକ୍ଷରେ ନାକ୍ଟିଦେଉଳ ବ୍ଲକ୍ ଗୋଗୁଆ ପଂଚାୟତରେ କିଛି ଲୋକ କ୍ବାରେଣ୍ଟାଇନ୍ ସେଣ୍ଟରରେ ତାଲା ମାରି ଦେଇଛନ୍ତି ।
ଉଲ୍ଲେଖଯୋଗ୍ୟ ଯେ, ସମ୍ବଲପୁର ଜିଲ୍ଲା ନାକଟିଦଦେଉଳ ବ୍ଲକ୍ ଗୋଗୁଆ ପଂଚାୟତର ଗୋଗୁଆ ହାଇସ୍କୁଲ ଠାରେ ଏହି କ୍ବାରେଣ୍ଟାଇନ୍ ସେଣ୍ଟର ଖୋଲା ଯାଇଥିଲା । ଗତ ୨ ତାରିଖରେ ଗୋଗୁଆ ଗ୍ରାମର କିଛି ଲୋକ ଏହି କେନ୍ଦ୍ରକୁ ଅନ୍ୟତ୍ର କରିବା ପାଇଁ ନାକଟିଦେଉଳ ବିଡିଓଙ୍କ ନିକଟରେ ଲିଖିତ ଅଭିଯୋଗ କରିଥିଲେ । ଆଜି ଗୋଗୁଆ ଗ୍ରାମର ହାଇସ୍କୁଲ ପଡାର କିଛି ଲୋକ ହାଇସ୍କୁଲ ଠାରେ ଥିବା କ୍ବାରେଣ୍ଟାଇନ୍ ସେଣ୍ଟରର ଗେଟ୍ ସମ୍ମୁଖରେ ତାଲା ମାରିଦେବା ସହ ରାସ୍ତା ଉପରେ ବ୍ୟାରିକେଡ୍ କରି ବନ୍ଦ କରିଦେଇଛନ୍ତି ।
ସେଠାରେ ପାଇଖାନା ନିର୍ମାଣ ହେବାର ଥିବା ବେଳେ ସେଇ ପଡାର ଲୋକମାନେ କାମ କରାଇ ଦେଉ ନଥିବା ଗୋଗୁଆ ସରପଂଚ ପ୍ରକାଶ କରିଛନ୍ତି । ଅନ୍ୟ ରାଜ୍ୟରେ କାମ କରୁଥିବା ୮୬ ଜଣ ଶ୍ରମିକ ଗୋଗୁଆ ଗ୍ରାମପଂଚାୟତରେ ନାମ ପଂଜିକରଣ କରିଛନ୍ତି । ଏହି କେନ୍ଦ୍ରରେ ୫୦ଟି ବେଡ୍ ଥିବା ବେଳେ ଆଉ ୩୦ଟି ବେଡ୍ ପଡା ବାସୀଙ୍କ ବିରୋଧ ଯୋଗୁଁ ହୋଇପାରି ନ ଥିବା ଜଣା ପଡିଛି । ଗୋଗୁଆ ସରପଂଚ ସୁଭଦ୍ରା ବେହେରା ଆଜି ନାକଟିଦେଉଳ ବିଡଓଙ୍କ ନିକଟରେ ଏନେଇ ଅଭିଯୋଗ କରିଛନ୍ତି । ନାକଟିଦେଉଳ ବିଡିଓ ଘଟଣା ସ୍ଥଳକୁ ଯାଇ ଅନୁଧ୍ୟାନ କରି ଫେରି ଆସିଛନ୍ତି । ବ୍ଲକ୍ ପ୍ରଶାସନ ସମ୍ବଲପୁର ଜିଲ୍ଲାପାଳଙ୍କୁ ମଧ୍ୟ ଜଣାଇ ଦେଇଥିଲେ ମଧ୍ୟ ବର୍ତମାନ ୮୬ ଜଣ ଶ୍ରମିକ ଆସିଲେ କେଉଁଠି ରହିବେ ତାହା ପ୍ରଶ୍ନବାଚୀ ସୃଷ୍ଟି କରିଛି ।
