ରଞ୍ଜିତ ପଣ୍ଡା
କୁଜଙ୍ଗ : ଦିନ ମଜୁରିଆ ଓ ଶ୍ରମିକ ମାନଙ୍କ ମେରୁଦଣ୍ଡ ଦୋହଲାଇ ଦେଇଛି ଲକ୍ ଡାଉନ । ବନ୍ଦର ନଗରୀ ପାରାଦ୍ବୀପରେ ରହୁଥିବା ଦିନ ମଜୁରିଆ ଏବେ ଭୋକ ଉପାସରେ । ନା ମିଳିପାରୁଛି ମଜୁରୀ, ନା ପାଖରେ ଅଛି ରାସନ କାର୍ଡ । ଫଳରେ ସମସ୍ତ ପ୍ରକାର ସରକାରୀ ସୁବିଧାରୁ ବଞ୍ଚିତ ହୋଇ ଏମାନେ ଏବେ ଦୟନୀୟ ଅବସ୍ଥାରେ ରହୁଛନ୍ତି । ସରକାର ବିନା ରାସନ କାର୍ଡରେ ରାସନ ପ୍ରଦାନ ପାଇଁ ଘୋଷଣା କରିଥିଲେ ମଧ୍ୟ ତାହା ସାଧାରଣ ଲୋକଙ୍କ ନିକଟରେ ପହଞ୍ଚି ପାରୁନାହିଁ । ତେବେ ସେମାନଙ୍କୁ ସହାୟତାର ହାତ ବଢାଇଛନ୍ତି ପାରାଦ୍ବୀପ ପରିବହନ ସଂସ୍ଥା ।
ପାରାଦ୍ବୀପ ପୌରପରିଷଦର ୬, ୮, ୧୩ ଏବଂ ୧୮ ନମ୍ବର ୱାର୍ଡ଼ ସମେତ ଅଠରବାଙ୍କି, ବାଉରିଆପାଳନ୍ଦା, ଲକପଡା ପ୍ରଭୃତି ସ୍ଥାନରେ ଥିବା ୧୦୦ ରୁ ଉର୍ଦ୍ଧ୍ବ ପରିବାରକୁ ସହାୟତାର ହାତ ବଢାଇଛି ଏହି ସଙ୍ଗଠନ । ଏହି ପରିବାର ଗୁଡିକୁ ଶୁଖିଲା ଖାଦ୍ୟ ପୁଡିଆ ଯୋଗାଇ ଦିଆଯାଇଛି । ପାରାଦ୍ବୀପ ପରିବହନ ସଂସ୍ଥାର ପରିଚାଳନା ନିର୍ଦ୍ଦେଶକ ଖଲିଦ୍ ଖାନ୍ ଓ ଆଜାଦ୍ ଭାରତ ମେମୋରିଆଲ୍ ଟ୍ରଷ୍ଟର ସଭାପତି ଅବଦୁଲ ଆବିଦ ଖାନଙ୍କ ତତ୍ତ୍ଵାବଧାନରେ ପ୍ରତ୍ୟେକ ପରିବାରକୁ ଚାଉଳ, ଅଟା, ତେଲ, ଆଳୁ, ପିଆଜ ପ୍ରଭୃତି ସାମଗ୍ରୀ ବଣ୍ଟନ କରାଯାଇଛି । ଆଗାମୀ ଦିନରେ ପ୍ରତ୍ୟେକ ସପ୍ତାହରେ ଏହି ପରିବାର ଗୁଡିକୁ ଶୁଖିଲା ଖାଦ୍ୟ ଯୋଗାଇ ଦିଆଯିବ ବୋଲି ସଙ୍ଘ ପକ୍ଷରୁ କୁହାଯାଇଛି ।
