ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର : ଦିନକୁ ଦିନ ଗଂଜାମ ଜିଲ୍ଲାର ବିଭିନ୍ନ ଅଂଚଳରେ ଲୋକାଲ୍ କେସ ବାହାରୁଥିବାରୁ ଲୋକଙ୍କ ମଧ୍ୟରେ ଭୟସଞ୍ଚାର ହୋଇଛି । ପ୍ରବାସୀଙ୍କ ଆସିବା କମିଥିବାବେଳେ ସେମାନଙ୍କୁ ସେବା ଯୋଗାଉଥିବା ଯୋଦ୍ଧାଙ୍କ ଦେହରେ କରୋନା ଭୂତାଣୁ ଦେଖିବାକୁ ମିଳୁଛି । ତେବେ ଛତ୍ରପୁର ବ୍ଲକ୍ର ନରେନ୍ଦ୍ରପୁର ଏବଂ ଶ୍ରୀରାମଚନ୍ଦ୍ରପୁର ପଂଚାୟତରେ ଲୋକାଲ୍ କରୋନା ପଜିଟିଭ୍ କେସ ମିଳିଥିବାରୁ ଏହି ଦୁଇ ଅଂଚଳକୁ ଉଭୟ ସରପଞ୍ଚ ନିଜର ଜିଲ୍ଲାପାଳ କ୍ଷମତା ପ୍ରୟୋଗ କରି ୫ ଦିନ ପାଇଁ ସଟ୍ଡ଼ାଉନ୍ ଘୋଷଣା କରିଛନ୍ତି । ଶ୍ରୀରାମଚନ୍ଦ୍ରପୁରର ସରପଞ୍ଚ ରେବତୀ କୁମାର ପ୍ରଧାନ ଘଡ଼ଘଡ଼ାପଲ୍ଲୀ ଗ୍ରାମକୁ ସଟ୍ଡ଼ାଉନ୍ ଘୋଷଣା କରିଛନ୍ତି । ଉକ୍ତ ଗ୍ରାମର ସମସ୍ତ ପ୍ରବେଶ ପଥକୁ ସିଲ୍ କରାଯିବା ସହ ଗ୍ରାମର କୌଣସି ଲୋକ ବାହାରକୁ ଯିବନାହିଁ ଏବଂ କିଏବି ବାହାରକୁ ଆସିବ ନାହିଁ ବୋଲି ଧେଣ୍ଡୁରା ମାଧ୍ୟମରେ ସଚେତନ କରାଯାଇଛି । ଏହି ଗ୍ରାମରୁ ୩ ଜଣଙ୍କ ରିପୋର୍ଟ ପଜିଟିଭ୍ ଆସିବା ପରେ ଗୁରୁବାର ରାତ୍ରିରୁ ଘଡ଼ଘଡ଼ାପଲ୍ଲୀ ଗ୍ରାମକୁ ସିଲ୍ କରିବା ସହ ଲୋକଙ୍କୁ ବାହାରକୁ ନ ବାହାରିବାକୁ ପ୍ରଶାସନର ଅଧିକାରୀମାନେ ସଚେତନ କରିଥିଲେ ।
ଏନେଇ ଶନିବାର ଦିନ ସରପଞ୍ଚ ରେବତୀ ପ୍ରଧାନ, ନୋଡ଼ାଲ୍ ଅଫିସର ସ୍ୱପ୍ନେଶ୍ୱର ପାଳ, ଅଙ୍ଗନୱାଡ଼ି କର୍ମୀ ଗାୟତ୍ରୀ ମହାନ୍ତି, ଆଶାକର୍ମୀ ଦମୟନ୍ତି ସାହୁ, ଏମ୍. ରଘୁନାଥ ଗ୍ରାମ ମଧ୍ୟକୁ ଯାଇ ଲୋକଙ୍କୁ ଘରୁ ନ ବାହାରିବାକୁ ସଚେତନ କରିଥିଲେ । ସେହିପରି ନରେନ୍ଦ୍ରପୁର ସରପଞ୍ଚ ବାବୁଲା ବେହେରା ମଧ୍ୟ ଜିଲ୍ଲାପାଳ କ୍ଷମତା ପ୍ରୟୋଗ କରି ତାଙ୍କ ପଞ୍ଚାୟତର ସମସ୍ତ ୫ଟି ଗ୍ରାମକୁ ୫ ଦିନ ପର୍ଯ୍ୟନ୍ତ ସଟ୍ଡ଼ାଉନ୍ ଘୋଷଣା କରିଛନ୍ତି । ଅଂଚଳରେ ଜଣଙ୍କ ଦେହରେ କରୋନା ସଂକ୍ରମିତ ଦେଖାଯିବାରୁ ସମସ୍ତ ଯାତାୟତ ପଥକୁ ସିଲ୍ କରିବା ସହ ଲୋକମାନଙ୍କୁ ଘରେ ରହିବା ପାଇଁ କୁହାଯାଇଛି । ସଟ୍ଡ଼ାଉନ୍ ଘୋଷଣା ସମୟରେ କାର୍ଯ୍ୟନିର୍ବାହୀ ଅଧିକାରୀ ଦଣ୍ଡପାଣି ପ୍ରଧାନ, ନରେନ୍ଦ୍ରପୁର ଆର୍ଆଇ ତଥା ନୋଡ଼ାଲ୍ ଅଧିକାରୀ ଜି. ଦୁର୍ବାସା, ଜି.ଆର୍.ଏସ୍. ବସନ୍ତ କୁମାର ରାଉଳ, ଅଙ୍ଗନୱାଡ଼ି କର୍ମୀ ମମତା ମଲ୍ଲିକ, ଆଶା କର୍ମୀ ସଂଗିତା ବାଡ଼ତ୍ୟା ପ୍ରମୁଖ ଉପସ୍ଥିତ ଥିଲେ । ଏହା ସହ ଗ୍ରାମଗୁଡ଼ିକ ସାନିଟାଇଜ୍ କରିବା ପାଇଁ ସରପଞ୍ଚ ଅନୁରୋଧ କରିଥିବାବେଳେ ଅତ୍ୟାବଶ୍ୟକ ସାମଗ୍ରୀ ଯୋଗାଇବାର ବ୍ୟବସ୍ଥା କରାଯାଇଛି ବୋଲି କହିଛନ୍ତି ।