ନୂଆଦିଲ୍ଲୀ:୨୦୦୮ ଅହମଦାବାଦ ସିରିଏଲ୍ ବୋମା ବିସ୍ଫୋରଣ ମାମଲାରେ ସୁପ୍ରିମକୋର୍ଟ ଏକ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଦେଇଛନ୍ତି। ପ୍ରାଣଘାତୀ ଆକ୍ରମଣରେ ସାମିଲ ଥିବା ଇଣ୍ଡିଆନ୍ ମୁଜାହିଦିନ୍ (ଆଇଏମ୍) ର ଆତଙ୍କବାଦୀ ଅହମଦ ବାୱା ଓରଫ୍ ଅବୁ ଅବୁବକର ବରେଲଭିକୁ ନିମ୍ନ ଅଦାଲତ ଦ୍ୱାରା ଦିଆଯାଇଥିବା ମୃତ୍ୟୁଦଣ୍ଡ କାର୍ଯ୍ୟକାରିତା ଉପରେ ସର୍ବୋଚ୍ଚ ଅଦାଲତ ସ୍ଥଗିତାଦେଶ ଲଗାଇଛନ୍ତି। ଅଭିଯୁକ୍ତର ଆବେଦନ ଉପରେ ଶୁଣାଣି କରି ଜଷ୍ଟିସ ବିକ୍ରମ ନାଥ, ଜଷ୍ଟିସ ଏସ.ଜି. ମସିହ ଏବଂ ଜଷ୍ଟିସ ସନ୍ଦୀପ ମେହତାଙ୍କୁ ନେଇ ଗଠିତ ଖଣ୍ଡପୀଠ ଗୁଜରାଟ ସରକାରଙ୍କୁ ନୋଟିସ୍ ଜାରି କରିବା ସହ ନିମ୍ନ ଅଦାଲତର ସମସ୍ତ ରେକର୍ଡ ତଲବ କରିଛନ୍ତି।
୨୦୦୮ ଜୁଲାଇ ୨୬ ତାରିଖରେ ଅହମଦାବାଦ ସହରରେ ମାତ୍ର ୭୦ ମିନିଟ୍ ମଧ୍ୟରେ ୨୧ଟି ବୋମା ବିସ୍ଫୋରଣ ଘଟିଥିଲା। ଏହି ଭୟଙ୍କର ଆତଙ୍କବାଦୀ ଆକ୍ରମଣରେ ୫୬ ଜଣଙ୍କ ମୃତ୍ୟୁ ଘଟିଥିବା ବେଳେ ପ୍ରାୟ ୨୦୦ ରୁ ଊର୍ଦ୍ଧ୍ୱ ଲୋକ ଗୁରୁତର ଆହତ ହୋଇଥିଲେ। ଭାରତର ଆତଙ୍କବାଦୀ ଆକ୍ରମଣ ଇତିହାସରେ ପ୍ରଥମ ଥର ପାଇଁ ଆହତମାନଙ୍କ ଚିକିତ୍ସା ଚାଲିଥିବା ହସ୍ପିଟାଲଗୁଡ଼ିକୁ ମଧ୍ୟ ଟାର୍ଗେଟ୍ କରାଯାଇ ବିସ୍ଫୋରଣ ଘଟାଯାଇଥିଲା। ଶୁଣାଣି ସମୟରେ ସୋଲିସିଟର ଜେନେରାଲ ତୁଷାର ମେହଟା ଏହାକୁ ଏକ ଅତ୍ୟନ୍ତ ଗୁରୁତର ଓ ସମ୍ବେଦନଶୀଳ ମାମଲା ବୋଲି ଅଦାଲତଙ୍କୁ ଜଣାଇଥିଲେ।
ଏହାପୂର୍ବରୁ ଜୁଲାଇ ୧ ତାରିଖରେ ଗୁଜରାଟ ହାଇକୋର୍ଟ ନିମ୍ନ ଅଦାଲତ ଦ୍ୱାରା ଦିଆଯାଇଥିବା ଇଣ୍ଡିଆନ୍ ମୁଜାହିଦିନ୍ ସଂଗଠନର ୩୮ ଜଣ ଆତଙ୍କବାଦୀଙ୍କ ମୃତ୍ୟୁଦଣ୍ଡ ଏବଂ ବାକି ୧୧ ଜଣଙ୍କ ଆଜୀବନ କାରାଦଣ୍ଡାଦେଶକୁ ବଜାୟ ରଖିଥିଲେ। ବହୁ ସଂଖ୍ୟକ ନିରୀହ ଲୋକଙ୍କ ଜୀବନ ନେବା, ଦେଶ ବିରୋଧୀ ଷଡ଼ଯନ୍ତ୍ର ରଚିବା ଏବଂ ସମାଜରେ ଭୟର ବାତାବରଣ ସୃଷ୍ଟି କରିବା କାରଣରୁ ମୃତ୍ୟୁଦଣ୍ଡ ଆବଶ୍ୟକ ବୋଲି ହାଇକୋର୍ଟ ଦର୍ଶାଇଥିଲେ। ଦୋଷୀ ସାବ୍ୟସ୍ତ ହୋଇଥିବା ବ୍ୟକ୍ତିମାନଙ୍କ ମଧ୍ୟରେ ନିଷିଦ୍ଧ ସଂଗଠନ ‘ସିମି’ ର ପୂର୍ବତନ ନେତା ସଫଦର ନାଗୋରୀ ଏବଂ ତାଙ୍କ ସହଯୋଗୀମାନେ ସାମିଲ ଅଛନ୍ତି, ଯେଉଁମାନେ ଗୁଜରାଟ, ମଧ୍ୟପ୍ରଦେଶ, କେରଳ, ଉତ୍ତରପ୍ରଦେଶ ସମେତ ୧୧ଟି ରାଜ୍ୟର ବାସିନ୍ଦା ଅଟନ୍ତି।