Tag: ନବ ଦାସ

କଟକ: ବହୁ ଚର୍ଚ୍ଚିତ ନବ ଦାସ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଗୋପାଳ ଦାସକୁ ସ୍ଥାନାନ୍ତରିତ କରାଯାଇଛି। ତାକୁ ଝାରସୁଗୁଡା ଉପକାରାଗାରରୁ ଚୌଦ୍ବାର ଜେଲକୁ ସ୍ଥାନାନ୍ତରିତ କରାଯାଇଛି। ଗତକାଲି ରାତିରେ ଗୋପାଳକୁ ଏକ ସ୍ବତନ୍ତ୍ର ସୁରକ୍ଷା ଦଳ ସହିତ ଏହି ସ୍ଥାନାନ୍ତରିତ ପକ୍ରିୟା କରାଯାଇଥିଲା।

ଗୋପାଳ ହାଇ ପ୍ରୋଫାଇଲ ହତ୍ୟାକାଣ୍ଡରେ ଅଭିଯୁକ୍ତ ଥିବାରୁ ସେ ଝାରସୁଗୁଡା ଉପକାରାଗାରରେ ସୁରକ୍ଷିତ ମନେ କରି ନ ଥିଲା।  ଫଳରେ ଜେଲ ବିଭାଗ ମାଧ୍ୟମରେ ସ୍ଥାନାନ୍ତରିତ କରିବା ପାଇଁ ସେ କୋର୍ଟରେ ଆବେଦନ କରାଯାଇଥିଲା। କୋର୍ଟ ଗତକାଲି ଅନୁମତି ଦେବା ପରେ ତାକୁ କଡା ସୁରକ୍ଷା ବଳୟ ମଧ୍ୟରେ ସ୍ଥାନାନ୍ତିତ କରାଯାଇଛି।

ଗୋପାଳ ବର୍ତ୍ତମାନ ଚୌଦ୍ବାର ଜେଲର ସେଲ ନମ୍ବର 3 ରେ ରଖାଯାଇଛି। ତାକୁ ଚୌଦ୍ବାର ଜେଲ ଭିତରକୁ ଯିବା ପୂର୍ବରୁ ସ୍ବାସ୍ଥ୍ୟ ପରୀକ୍ଷା କରାଯାଇଥିଲା। ଦୁଇ ଜଣିଆ ଡାକ୍ତରୀ ଦଳ ତାହାର ସ୍ବାସ୍ଥ୍ୟ ପରୀକ୍ଷା କରି ଠିକ ଥିବାର କହିବା ପରେ ଜେଲକୁ ନିଆଯାଇଥିଲା। ସେ ତିନି ନମ୍ବର ସେଲରେ ଏକା ରହିବ। କେବଳ କେହି ସାକ୍ଷାତ କରିବାକୁ ଆସିଲେ ତାକୁ ସେଲରୁ ବାହାର କରାଯିବ।

ଏହି ସେଲରେ ସୁରକ୍ଷା ବ୍ୟବସ୍ଥା କଡା କରାଯାଇଛି। ସେଠାରେ ସିସି କ୍ୟାମେରା ଚବିଶ ଘଣ୍ଟା ଲାଗି ରହିବ। ଯାହାକୁ ଜେଲ ଅଧିକ୍ଷକ ନୀରିକ୍ଷଣ କରିବେ। ସେହିପରି ସେଲ୍ ସମ୍ମୁଖରେ ଆଠ ଘଣ୍ଟିଆ ଡିୟୁଟି ରେ ତିନୋଟି ସିଫ୍ଟରେ ଜେଲ ଅଧିକାରୀ ଜଗି ରହିବେ। ପ୍ରତି ପର୍ଯ୍ୟାୟରେ ଜଣେ ଏଏସଆଇ ଅଧିକାରୀ ତାହାର ସୁରକ୍ଷା ଅନୁଧ୍ୟାନ କରିବାକୁ ବନ୍ଦୋବସ୍ତ କରାଯାଇଛି।

ପ୍ରତି ପର୍ଯ୍ୟାୟର ଅଧିକାରୀ ଗୋପାଳର ହାବଭାବ ଏବଂ ମାନସିକ ସ୍ଥିତି ସଂପର୍କରେ ଜେଲ ଅଧିକ୍ଷକଙ୍କୁ ରିପୋର୍ଟ ଦେବେ। ସେହି ରିପୋର୍ଟ ଜେଲ ଅଧିକ୍ଷକ ଡିଜିଙ୍କୁ ଅବଗତ କରାଇବେ ବୋଲି ବ୍ୟବସ୍ଥା କରାଯାଇଛି। ସେହିପରି ପ୍ରତିଦିନ ଗୋପାଳର ସ୍ବାସ୍ଥ୍ୟ ପରୀକ୍ଷା ଯାଞ୍ଚ କରାଯାଇ ରିପୋର୍ଟ ପ୍ରଦାନ କରାଯିବ।

ତେବେ ତାହାର ମାମଲା ପାଇଁ ତାକୁ ବାରମ୍ବାର ଝାରସୁଗୁଡା ଜେଏମଏଫସି କୋର୍ଟକୁ ନେବା ଆଣିବା କରିବାକୁ ପଡିବ ନାହିଁ। ତାର ମାମଲା ପରିଚାଳନା ପାଇଁ ସେ ଭିଡିଓ କନଫ୍ରେସିଂ ମାଧ୍ୟମରେ ହାଜର ହେବା ପାଇଁ ବନ୍ଦୋବସ୍ତ କରାଯାଇଛି। ସେ ଚୌଦ୍ବାର ଜେଲରେ ରହି ମାମଲା ପାଇଁ ହାଜର ହେବ।

ଭୁବନେଶ୍ବର: ନବ ଦାସଙ୍କ ହତ୍ୟାକାରୀ ଗୋପାଳ ଦାସକୁ କ୍ରାଇମ ବ୍ରାଞ୍ଚ ଚାରିଦିନ ଧରି ରିମାଣ୍ଡରେ ନେବା ପରେ ତାକୁ ବିଭିନ୍ନ ପ୍ରଶ୍ନ ପଚାରିଥିଲେ। ଆଶ୍ଚର୍ଯ୍ୟ କଥା ତଦନ୍ତ ଅଧିକାରୀଙ୍କୁ ସେ ପଚାରୁଛି ଯେ, ନବ ଦାସଙ୍କୁ ଗୁଳି କରିବାର କେତେ ସମୟ ପରେ ସେ ମୃତ୍ୟୁ ବରଣ କଲେ। ଏହାକୁ ନେଇ ତଦନ୍ତ ଅଧିକାରୀ ତାଜୁବ ହୋଇପଡିଛନ୍ତି।

ଏକ ବିଶେଷ ସୁତ୍ର ଅନୁସାରେ ଗୋପାଳକୁ କ୍ରାଇମ ବ୍ରାଞ୍ଚ ଜେରା କରିବା ବେଳେ ସେ କିପରି ଗୁଳି କଲେ କେତେଟା ଗୁଳି କଲେ ବୋଲି ପ୍ରଶ୍ନ କରିଥିଲେ। ଗୋପାଳ କହିଥିଲା ଯେ, ସେ ପ୍ରଥମେ ତାଙ୍କ ଛାତିକୁ ଗୁଳି କରିଥିଲେ। ତାହା ଠିକ ବାଜିଥିଲା, ଏହି ଗୁଳିରେ ସେ ମରିଯିବେ ବୋଲି ଭାବି ନେଲି। ହେଲେ ସନ୍ଦେହରେ ଆଉ ଦଶ ସେକେଣ୍ଡରେ ଆଉ ଏକ ଗୁଳି ମାରିଲି। ହେଲେ ଠେଲାପେଲାରେ ତାହା ତାଙ୍କ ପଛ ଗାଡିରେ ବାଜିଥିଲା।

ଏହାପରେ ଗୋପାଳ ନିଜ ଆଡୁ ପ୍ରଶ୍ନ କରିଥିଲା ଯେ, ନବ ଦାସ ସେହି ସ୍ଥାନରେ ନା ଡାକ୍ତରଖାନାରେ ମୃତ୍ୟୁବରଣ କରିଥିଲେ। ଏପରି ପ୍ରଶ୍ନରେ କ୍ରାଇମ ବ୍ରାଞ୍ଚ ପୋଲିସ ହଡବଡେଇ ଯାଇଥିଲେ। କାରଣ ଗୋପାଳ ପୁରା ଥଣ୍ଡା ଏବଂ ଶାନ୍ତ ମିଜାଜରେ ଏପରି ପ୍ରଶ୍ନ କରୁଥିଲା। ଲାଗୁଥିଲା ସେ ଏତେ ବଡ ହତ୍ୟାକାଣ୍ଡ କରିବା ପରେ ମଧ୍ୟ ଅନୁଶୋଚନା କରି ନାହିଁ।

ଘଟଣାଦିନ ସେ ଗୁଳି ମାରିବା ପରେ ତାଙ୍କୁ ଲୋକେ ଘେରିଯାଇଥିଲେ। ଏହାପରେ ପୋଲିସ କାବୁ କରି ତାଙ୍କୁ ନିଜ ହେପାଜତକୁ ନେଇଯାଇଥିଲେ। ଏହାପରେ ନବ ଦାସଙ୍କର କଣ ହେଲା ସେ ଆଉ କିଛି ଜାଣିପାରି ନାହିଁ। ସେଥିପାଇଁ ସେ ନବ ଦାସଙ୍କର କଣ ହେଲା, କେତେବେଳେ ମୃତ୍ୟୁବରଣ କଲେ ସେ ନେଇ ଜାଣିବାର ଗୋପାଳର ଉତ୍କଣ୍ଠା ରହିଥିଲା।

ଭୁବନେଶ୍ବର: ମନ୍ତ୍ରୀ ନବ ଦାସଙ୍କ ହତ୍ୟାକାଣ୍ଡ ଘଟଣାର ଖାନଭିନ୍ନ କରୁଛି କ୍ରାଇମ ବ୍ରାଞ୍ଚ। କେଉଁ ପରିସ୍ଥିତିରେ ଏଏସଆଇ ଗୋପାଳ ଦାସ ହତ୍ୟା କଲା ତାହାର ଛାନଭିନ୍ନ କରିବାରେ ଲାଗିଛି। ତେବେ ଏହାର ସତ୍ୟତା ଜାଣିବା ପାଇଁ କ୍ରାଇମ ବ୍ରାଞ୍ଚ ଗୋପାଳର ଲେୟାରଡ ଭଏସ ଆନାଲିସିସ ଟେଷ୍ଟ କରାଯାଉଛି। ଏଥିପାଇଁ ନୂଆ ଦିଲ୍ଲୀରୁ ଏକ ଟିମ ଓଡିଶା ଆସିଛନ୍ତି।

ଲେୟାରଡ ଭଏସ ଆନାଲିସିସ ଟେଷ୍ଟ ବା ଏଲଭିଏ ହେଉଛି ଏହିପରି ଏକ ପରୀକ୍ଷା ଯେଉଁଥିରେ ବ୍ୟକ୍ତିର ସ୍ବରରୁ ତାହାର ମାନସିକ ସ୍ଥିତି ଜାଣିହେବ। ଏହା ବିଭିନ୍ନ ପର୍ଯ୍ୟାୟରେ ପରୀକ୍ଷା କରାଯାଇଥାଏ। ଏହା ଏକ ଭିନ୍ନ ଟେକନୋଲୋଜି ଯାହା ଏହିପରି କ୍ରାଇମ ଡିଟେକ୍ଟ ପାଇଁ ବ୍ୟବହାର କରାଯାଇଥାଏ। ଏଥିରେ ବ୍ୟକ୍ତିର ଭଏସ ସହିତ ମସ୍ତିସ୍କର ବିଭିନ୍ନ ଅଙ୍ଗପ୍ରତ୍ୟେଙ୍ଗର ଚଳନକୁ ମପାଯାଇଥାଏ। ଏହାଦ୍ବାରା ସତ ବାହାରିବ ବୋଲି କ୍ରାଇମ ବ୍ରାଞ୍ଚ ଆଶା ରଖିଛି।

ଅନ୍ୟପକ୍ଷରେ ଗୋପାଳର ରିମାଣ୍ଡର ଗତକାଲି ଆଉ ଚାରିଦିନ ପାଇଁ ବୃଦ୍ଧି କରାଯାଇଛି। ଶନିବାର ଦିନ ତାହାର ରିମାଣ୍ଡ ଶେଷ ହେବାରୁ ତାକୁ ଝାରସଗୁଡା ଜେଏମଏଫସି ରେ ହାଜର କରାଯାଇ ଆଉ ଚାରି ଦିନ ପାଇଁ ରିମାଣ୍ଡ ବୃଦ୍ଧି ଆବେଦନ କରାଯାଇଥିଲା। ଯାହା କୋର୍ଟ ଅନୁମୋଦ କରିବା ପରେ ପୋଲିସ ଗୋପାଳକୁ ନିଜ ହେପାଜତକୁ ନେଇଛି। ପୂର୍ବରୁ ଝାରସୁଗୁଡା ଏୟାରପୋର୍ଟ ଥାନା ଟାଙ୍କିରୁ ମିଳିଥିବା କାଗଜ ଟୁକୁଡା ପରୀକ୍ଷା ପାଇଁ ଦିଲ୍ଲୀ ପଠାଯାଇଛି।

ସେହିପରି ଶନିବାର ଦିନ ଏହାର ତଦନ୍ତ କରୁଥିବା ଅରୁଣ ବୋଥ୍ରା ଅବସରପ୍ରାପ୍ତ ବିଚାରପତି ଜେପି ଦାସଙ୍କୁ ସାକ୍ଷାତ କରିଛନ୍ତି। ବୋଥ୍ରା ତଦନ୍ତର ଅଗ୍ରଗତି ସଂପର୍କରେ ତାଙ୍କୁ ଅବଗତି କରାଇଛନ୍ତି। ଏ ନେଇ ଜଷ୍ଟିସ ଦାସ କହିଥିଲେ ଯେ, ବର୍ତ୍ତମାନ ସୁଦ୍ଧା କ୍ରାଇମ ବ୍ରାଞ୍ଚ କଣ ଅଗ୍ରଗତି କରିଛି ତାହା ବୁଝୁଥିଲି। ତାହା ଜାଣିବା ପରେ ତାଙ୍କୁ ଆଉ କେତେକ ଦିଗ ପ୍ରତି ତଦନ୍ତ କରିବା ପାଇଁ ପରାମର୍ଶ ଦିଆଯାଇଛି।

ଜଷ୍ଟିସ ଜେ ପି ଦାସ ଖୁବ ଶିଘ୍ର ଘଟଣା ସ୍ଥଳକୁ ଯାଇ ତଦନ୍ତର ଅଗ୍ରଗତି ଉପରେ ସମୀକ୍ଷା କରିବେ ବୋଲି ଜଣାପଡିଛି।

ଭୁବନେଶ୍ବର: ଶେଷରେ ନବ ଦାସ ହତ୍ୟା ଘଟଣାରେ ମୁହଁ ଖୋଲିଛନ୍ତି ପୋଲିସ ଡିଜି ସୁନଲ ବଂଶଲ। ଆଜି ଏକ ସାମ୍ବାଦିକ ସମ୍ମିଳନୀ କରି ସେ ଏହି ଘଟଣାର ତଦନ୍ତ ସଂପର୍କରେ ଆବଗତ କରାଇଛନ୍ତି। ଏହି ହତ୍ୟାକାଣ୍ଡ ଘଟିବା ଦିନଠାରୁ ଡିଜି କୌଣସି ପ୍ରତିକ୍ରିୟା ଦେଇ ନ ଥିଲେ। ଏପରିକି ଘଟଣା ସ୍ଥଳକୁ ମଧ୍ୟ ଗସ୍ତ କରି ନ ଥିଲେ। ଫଳରେ ବିଭିନ୍ନ ମହଲରେ ତାଙ୍କର କାର୍ଯ୍ୟକଳାପ ନେଇ ସମାଲୋଚନା କରାଯାଇଥିଲା।

ତେବେ ଆଜି ସେ ସାମ୍ବାଦିକ ସମ୍ମିଳନୀ କରି କହିଛନ୍ତି ଯେ, ନବଦାସ ମୃତ୍ୟୁ ଘଟଣାରେ ତଦନ୍ତ ଚାଲିଛି। ଏଥିରେ ପୋଲିସକୁ ବହୁତ କିଛି ତଥ୍ୟ ହାସଲ ହୋଇଛି। ହେଲେ ଆହୁରି କିଛି ତଥ୍ୟ ବାକି ରହିଛି। ଯାହାକୁ କ୍ରାଇମ ବ୍ରାଞ୍ଚ ଟିମ ତଦନ୍ତ କରୁଛନ୍ତି। ଏହି ଘଟଣା ସମସ୍ତଙ୍କୁ ସ୍ତବ୍ଧ କରିଦେଇଛି ବୋଲି ଡିଜି କହିଛନ୍ତି।

ସେ କହିଛନ୍ତି ଯେ, ଏହି ଘଟଣାର ତଦନ୍ତ ନେତୃତ୍ବ ନେଇଛନ୍ତି ଅରୁଣ ବୋଥ୍ରା। ସେ ଜଣ ଦକ୍ଷ ଅଫିସର। ତାଙ୍କର ଆଗରୁ ସିବିଆଇ ରେ କାର୍ଯ୍ୟ କରିବାର ଦକ୍ଷତା ରହିଛି। ଦେଶର ସେ ହେଉଛନ୍ତି ଜଣେ ଭଲ ତଦନ୍ତ ଅପିସର। ସେହିପରି ଜଣେ ଅଫିସର ଏହି ଘଟଣାର ତଦନ୍ତ କରୁଛନ୍ତି। ସେ ନିଶ୍ଚିତ ଭାବେ ଏହି ଘଟଣା ପଛରେ କଣ କାରଣ ରହିଛି ତାହାର ଅନୁସନ୍ଧାନ କରି ବାହାର କରିବେ ବୋଲି ଡିଜି କହିଛନ୍ତି।

ଏହି ଘଟଣା ପରେ ଜିଲ୍ଲା ପୋଲିସ ସ୍ତରରେ ବ୍ୟାପକ ଅଦଳବଦଳ କରାଯାଇଛି। ନବଦାସଙ୍କର ପିଏସଓଙ୍କୁ ନିଲମ୍ବିତ କରାଯାଇଛି। ଭବିଷ୍ୟତରେ ଯଦି କିଛି ଆବଶ୍ୟକ ପଡେ ତେବେ ତାହା ଉପରେ ପଦକ୍ଷେପ ନିଶ୍ଚିତ ଗ୍ରହଣ କରାଯିବ। ଏହିପରି ଘଟଣାର ଯେପରି ପୁନରାବୃତ୍ତି ନ ଘଟେ ସେହିପରି ପଦକ୍ଷେପ ଗ୍ରହଣ କରାଯିବ। ବର୍ତ୍ତମାନ ତଦନ୍ତର ଗତି କେଉଁ ଆଡକୁ ଯାଉଛି ତାହା ଉପରେ ନଜର ରଖାଯାଇଛି।

ଫରର୍ନେସିକ ଲ୍ୟାବର ସାହାଯ୍ୟ ମଧ୍ୟ ନିଆଯାଇଛି। ନୂଆଦିଲ୍ଲୀରୁ ସେହି ଟିମ ଆସିପାରନ୍ତି। ତେବେ ଏହି ତଦନ୍ତ ଆଉ କେତେ ଦିନ ଲାଗିବ ସେ ନେଇ କିଛି କହିହେବ ନାହିଁ। ହେଲେ ତଦନ୍ତକୁ ଠିକ ଭାବେ କରିବା ପାଇଁ ଯାହା କିଛି ସରକାରୀ ସଂସ୍ଥାର ସାହାଯ୍ୟ ନେବା କଥା ତାହା ନିଆଯିବ ବୋଲି ଡିଜି ସାମ୍ବାଦିକ ସମ୍ମିଳନୀ କରି କହିଛନ୍ତି।