Tag: ବାଣପୁର-ବାଲୁଗାଁ

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର ସ୍ଥିତ ଲଡ଼ୁକେଶ୍ୱର ଜରାଶ୍ରମ ପରିସର ମଧ୍ୟରେ ନିକଟରେ ଶ୍ରୀରାମ ଶ୍ରୀକ୍ରିଷ୍ଣା ଚାରିଟେବୁଲ ଟ୍ରଷ୍ଟର ଶୁଭ ଉଦ୍ଘାଟନ ହୋଇଯାଇଛି। ବିଶିଷ୍ଟ ସମାଜସେବୀ ତଥା ସେଣ୍ଟ ଜନ ଆମ୍ବୁଲାନ୍ସର ଆଜୀବନ ସଭ୍ୟ ଅନନ୍ତ ଚରଣ ଖଟେଇ ଏବଂ ଜରାଶ୍ରମର ସମ୍ପାଦକ ନାରାୟଣ ସାହୁଙ୍କ ଉପସ୍ଥିତିରେ ଏହି ଚାରିଟେବୁଲ ଟ୍ରଷ୍ଟର ଶୁଭ ଉଦ୍ଘାଟନ ହୋଇଯାଇଅଛି। ମାନବସେବା ଉଦ୍ଦେଶ୍ୟରେ ସଂସ୍ଥାକୁ ଆଗେଇ ନେବା ପାଇଁ ଦୃଢ ସଂକଳ୍ପ ନିଆଯାଇଛି ବୋଲି  ଟ୍ରଷ୍ଟ୍ ର ସଭାପତି କାର୍ତ୍ତିକେଶ୍ୱର ସେନାପତି ଓ ସମ୍ପାଦକ କୃଷ୍ଣ ଚନ୍ଦ୍ର ପ୍ରଧାନ ପ୍ରକାଶ କରିଛନ୍ତି।

ଏହି ଅବସରରେ ସଂସ୍ଥାର ସମସ୍ତ ସଦସ୍ୟ ଯଥା ସନ୍ତୋଷ ସେନାପତି, ଚନ୍ଦନ ବେହେରା, ଗଣେଶ ସ୍ୱାଇଁ, ଅଧ୍ୟାପକ ଜିତେନ୍ଦ୍ର କୁମାର ବସ୍ତି, ସିପୁନ ମହାପାତ୍ର, ରାଜେଶ ଜେନା ଏବଂ ସନ୍ତୋଷ ବିଶ୍ବାଳଙ୍କ ସହଯୋଗରେ ବାଣପୁର ଜରାଶ୍ରମ ଠାରେ ଅନ୍ତେବାସୀଙ୍କୁ ଖାଦ୍ୟ ମଧ୍ୟ ବଣ୍ଟନ କରାଯାଇଛି। ଉକ୍ତ କାର୍ଯ୍ୟ କରି ସଂସ୍ଥାର ସମସ୍ତ ସଦସ୍ୟ ବେଶ୍ ଖୁସି ଅନୁଭବ କରିଛନ୍ତି  ବୋଲି ସେମାନେ ମତ ପ୍ରକାଶ କରିଛନ୍ତି।

ଏତତବ୍ୟତୀତ ଲକଡ଼ାଉନର କଟକଣାରେ କୋଭିଡ ନିୟମକୁ ଅନୁପାଳନ କରି ଦିନ ଦ୍ବିପ୍ରହରରେ ଭୋକିଲା ପଶୁ, ପକ୍ଷୀ ମାନଙ୍କୁ ଆହାର ମଧ୍ୟ ଯୋଗାଉଛି ଉକ୍ତ ଟ୍ରଷ୍ଟ।

ପରିଶେଷରେ ଆଗକୁ ଏହିପରି ଭାବେ ସାରା ଜୀବନ ସମାଜସେବା ଓ ମାନବସେବା କରିବାପାଇଁ ସେମାନଙ୍କୁ ଶକ୍ତି ପ୍ରଦାନ କରିବା ନିମନ୍ତେ ଭଗବାନଙ୍କ ନିକଟରେ ଆଶୀର୍ବାଦ ଭିକ୍ଷା କରିଛନ୍ତି ଟ୍ରଷ୍ଟର ସମସ୍ତ କର୍ମକର୍ତ୍ତାମାନେ।

ସୀତାରାମ ଅଗ୍ରୱାଲ

ବାଲୁଗାଁ: ଆଜି ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର-ବାଲୁଗାଁ ରୋଟାରୀ କ୍ଲବ ପକ୍ଷରୁ ଏକ ସ୍ଵେଚ୍ଛାକୃତ ରକ୍ତଦାନ ଶିବିର ଅନୁଷ୍ଠିତ ହୋଇଯାଇଛି। ବାଲୁଗାଁ ସ୍ଥିତ ଶ୍ରୀ ଶ୍ରୀ ଉମାମହେଶ୍ୱର ବଣିକ ସଂଘ ଗୃହ ଠାରେଏହି ରକ୍ତ ଦାନ ଶିବିର ଅନୁଷ୍ଠିତ ହୋଇଯାଇଅଛି। ଉକ୍ତ ଶିବିରରେ ରୋଟାରିକ୍ଲବର ସଭ୍ୟ ଓ ସ୍ଥାନୀୟ ଜନସାଧାରଣମାନେ ରକ୍ତ ଦାନ କରିଥିଲେ।

ବାଲୁଗାଁ ଏସଡିପିଓ ମାନସ ରଞ୍ଜନ ବାରିକ ଉକ୍ତ ଶିବିରକୁ ଉଦଘାଟନ କରିବା ସହ ସ୍ଵେଚ୍ଛାକୃତ ଭାବେ ରକ୍ତଦାନ କରିଥିଲେ। ବାଲୁଗାଁ ଥାନା ଅଧିକାରୀ ରମାକାନ୍ତ ମହାଲିକ ଉପସ୍ଥିତ ରହି ଉତ୍ସାହିତ କରିଥିଲେ। ରୋଟାରୀ କ୍ଲବ ବାଣପୁର-ବାଲୁଗାଁର ସଭାପତି ରୋଟାରୀୟାନ ଅଶୋକ କୁମାର ପାତ୍ର ଏବଂ ସମ୍ପାଦକ ରୋଟାରୀୟାନ ଜିତେନ୍ଦ୍ର କୁମାର ପାତ୍ରଙ୍କ ତତ୍ତ୍ଵାବଧାନରେ ୪୫ ୟୁନିଟ ରକ୍ତ ସଂଗ୍ରହ କରାଯାଇଥିଲା।

ବ୍ରହ୍ମପୁର ଏମ କେ ସି ଜି ଟେକିନିସିଆନ ପ୍ରଦୀପ କୁମାର ସୁବୁଦ୍ଧିଙ୍କ ସହିତ ଛଅ ଜଣ କର୍ମକର୍ତ୍ତାଙ୍କ ଦ୍ଵାରା ରକ୍ତ ସଂଗ୍ରହ କରାଯାଇଥିଲା। ବାଲୁଗାଁ ମହାବିଦ୍ୟାଳୟର ଅଧ୍ୟାପକ ଲକ୍ଷ୍ମୀଧର ସୁବୁଦ୍ଧି, ଜାତୀୟ ସେବା ଯୋଜନାର ଯୁବ ବନ୍ଧୁ ମାନେ ଉକ୍ତ କାର୍ଯ୍ୟରେ ଭାଗ ନେଇଥିଲେ। କ୍ଲବର ପୂର୍ବତନ ସଭାପତି ବିଜୟ କୁମାର ନନ୍ଦ, ଓମ୍ ପ୍ରକାଶ ଅଗ୍ରୱାଲ, ରବି ନାରାୟଣ ନାୟକ, ଧିରେନ୍ଦ୍ରନାଥ ପାତ୍ର, ବିଜୟ କୁମାର ବେହେରା, ହିମାଂଶୁ କୁମାର ପାତ୍ର, ସୁନିଲ କୁମାର ପାତ୍ର, ଗୋପାଳ ଚନ୍ଦ୍ର ନାୟକ ଏବଂ କ୍ଲବର ପ୍ରଥମ ମହିଳା ଲକ୍ଷ୍ମୀପ୍ରିୟା ପାତ୍ର ପ୍ରମୁଖ ରୋଟରୀୟାନ ମାନେ ପରିଚାଳନାରେ ସହଯୋଗ କରିଥିଲେ।

ସୀତାରାମ ଅଗ୍ରୱାଲ

ଚିଲିକା: ଆସନ୍ତାକାଲି ବାଲୁଗାଁ ୩୩ କେଭି ଗ୍ରୀଡ଼ ଅଧିନସ୍ଥ ସମସ୍ତ ଅଞ୍ଚଳରେ ବିଦ୍ୟୁତ ସରବରାହ ନିର୍ଦ୍ଦିଷ୍ଟ ସମୟ ପାଇଁ ବନ୍ଦ ରହିବ। ଏନେଇ ଟି.ପି.ସି.ଓ.ଡ଼ି.ଏଲ ବାଲୁଗାଁ ଉପଖଣ୍ଡ ଅଧିକାରୀ ଟୁକୁନା ଦଳାଇ ସୂଚନା ଦେଇଛନ୍ତି। ସୂଚନା ଅନୁଯାୟୀ ଆସନ୍ତାକାଲି ୧୩୨/୩୩  କେଭି ଗ୍ରୀଡ଼ ସବଷ୍ଟେସନ, ବାଲୁଗାଁର ବାର୍ଷିକ ରକ୍ଷଣାବେକ୍ଷଣ କାର୍ଯ୍ୟ କରାଯିବ। ତେଣୁ ଉକ୍ତ ଗ୍ରୀଡ଼ ଅଧୀନରେ ଥିବା ବାଣପୁର ଏବଂ ବାଲୁଗାଁର ସମସ୍ତ ଅଞ୍ଚଳରେ ସକାଳ ୮ ଘଟିକାରୁ ଅପରାହ୍ନ ୪ ଘଟିକା ଯାଏଁ ବିଦ୍ୟୁତ ସରବରାହ ସମ୍ପୂର୍ଣ୍ଣ ବନ୍ଦ ରହିବ। ଏ ନେଇ ଡ଼ାକବାଜି ଯନ୍ତ୍ର ଦ୍ୱାରା ପ୍ରଚାର ହୋଇଥିବାର କହିଛନ୍ତି ଶ୍ରୀ ଦଳାଇ ଏବଂ ଏଥିଲାଗି ଜନସାଧାରଣଙ୍କ ସହଯୋଗ ମଧ୍ୟ ଲୋଡିଛନ୍ତି।

ସୀତାରାମ ଅଗ୍ରୱାଲ

ଚିଲିକା: ବାଣପୁର-ବାଲୁଗାଁ ଅଞ୍ଚଳରେ ଅନଲକର ସୁଯୋଗ ନେଇ ଚୋରା ଦେଶୀ ମଦବେପାରୀ ସେମାନଙ୍କ ଚୋରା ପସରା ଖୋଲିଥିବାବେଳେ ଗତ କିଛିଦିନ ହେବ ଅବକାରୀ ବିଭାଗ ଲାଗି ସେମାନଙ୍କ ପସରାର ଫସର ଫାଟିଯାଉଛି। ଗତକାଲି ଅବକାରୀ ବିଭାଗ ବାଲୁଗାଁରୁ ୫୧ ଲିଟର ଦେଶୀ ମଦ ସହ ଦୁଇ ମଦ ବେପାରୀଙ୍କୁ ଗିରଫ କରିଥିବାବେଳେ ଆଜି ପୁଣି ବାଣପୁର ଥାନା ଅନ୍ତର୍ଗତ ସାନସିରେଇପୁର ବିଟ ହାଉସ ପାଖରୁ ଦୁଇ ଜଣ ଚୋରା ଦେଶୀ ମଦ ବେପାରୀଙ୍କୁ ଗିରଫ କରିଛି। ସେମାନଙ୍କ ନିକଟରୁ ୫୨ ଲିଟର ଦେଶୀ ମଦ ସହ ଗୋଟେ ମଟରସାଇକେଲ ଜବତ ହୋଇଥିବାର ସୂଚନା ଦେଇଛନ୍ତି ବାଲୁଗାଁ ଅବକାରୀ ବିଭାଗ ଅଧିକାରୀ ଏସ.ଆଇ ମନୋଜ ବାରିକ। ଗିରଫ ଦୁଇଜଣ ହେଲେ ରମେଶ ଚନ୍ଦ୍ର ଶବର ଓ ଶ୍ରୀଧର ଶବର। ଉଭୟଙ୍କ ଘର ନୀଳାଦ୍ରିପ୍ରସାଦ ପଞ୍ଚାୟତ ଅନ୍ତର୍ଗତ ମୁଦୁଲିଡ଼ିହ ଗ୍ରାମର।

ମିଳିଥିବା ସୂଚନା ଅନୁଯାୟୀ କୌଣସି ସୂତ୍ରରୁ ଖବର ପାଇ ଅବକାରୀ ବିଭାଗ ଟିମ ଗତକାଲି ରାତି ୨:୩୦ ସମୟରୁ ସାନସିରେଇପୁର ଫରେଷ୍ଟ ବିଟ ହାଉସ ପାଖେ ଛକି ରହିଥିଲେ। ପାଖାପାଖି ରାତି ୩:୩୦ ରେ ଉଭୟ ବେପାରୀ ଅବକାରୀ ବିଭାଗ ହାତରେ ଧରା ପଡ଼ିଥିଲେ। ଉକ୍ତ ଚଢାଉରେ ବାଲୁଗାଁ ଅବକାରୀ ବିଭାଗ ଏ.ଏସ.ଆଇ ରଂଜନୀ ମିଶ୍ର, କନଷ୍ଟେବଳ ରତ୍ନାକର ଜାଲୀ, ପ୍ରିୟବ୍ରତ ପରିଡ଼ା ଏବଂ ପୁରୁଷୋତ୍ତମ ସାମନ୍ତରାୟ ସାମିଲ ଥିଲେ। ଉଭୟଙ୍କ ବିରୋଧରେ କେସ ନମ୍ବର ୩୦, ୩୧ ରେ ମାମଲା ରୁଜୁ କରି ଆଜି କୋର୍ଟ ଚାଲାଣ କରାଯିବ ବୋଲି ଅବକାରୀ ଅଧିକାରୀ ମନୋଜ ବାରିକ ସୂଚନା ଦେଇଛନ୍ତି। ସୂଚନା ଥାଉ କି ଗତ କିଛି ଦିନ ହେଲା ବାଣପୁର -ବାଲୁଗାଁ ଅଞ୍ଚଳରେ ବାରମ୍ବାର ଅଭିଯୋଗ ପରେ ଅବକାରୀ ବିଭାଗ ଆହୁରି କ୍ରିୟାଶୀଳ ହୋଇ ଉଠିଛି ଏବଂ ପ୍ରତିଦିନ ପାଟ୍ରୋଲିଂ ଜାରି ରଖିଛି।

ସୀତାରାମ ଅଗ୍ରୱାଲ

ଚିଲିକା: ଦିନକୁ ଦିନ ବାଣପୁର-ବାଲୁଗାଁ ଅଞ୍ଚଳରେ ବିଦ୍ୟୁତ ବିଭାଗର ଦୌରାତ୍ମ୍ୟ ବୃଦ୍ଧି ପାଇବାରେ ଲାଗିଛି। ମାନବିକତା ହରେଇ ବସିଲାଣି ବିଦ୍ୟୁତ ବିଭାଗ। ସାରା ରାଜ୍ୟରେ ଲକ ଡାଉନ ଓ ୧୧ ଟି ଜିଲ୍ଲାରେ ସାପ୍ତାହିକ ସଟଡାଉନ ଜାରି ରହିଥିବା ସ୍ଥଳେ ନାଗରିକ ମାନେ ଘରେ ରହୁଛନ୍ତି ଏବଂ ଅତି ଜରୁରୀ ହେଲେ ପଦାକୁ ବାହାରୁଛନ୍ତି। ଏପରି ସ୍ଥଳେ କିଛିଦିନ ହେବ ବାଣପୁର-ବାଲୁଗାଁ ଅଞ୍ଚଳରେ ଘନ ଘନ ଅଘୋଶିତ ବିଦ୍ୟୁତ କାଟ ହେଉଛି।

ଲକ ଡାଉନ ସମୟରେ ବିଦ୍ୟୁତ କାଟ ନ କରିବାପାଇଁ ସରକାରଙ୍କ କଡ଼ା ନିର୍ଦ୍ଦେଶ ଥିଲାବେଳେ ବାଣପୁର ବାଲୁଗାଁରେ ଏହାର ବ୍ୟତିକ୍ରମ ଘଟୁଛି। ବର୍ତ୍ତମାନ ଲକ ଡାଉନ ଲାଗି ନାଗରିକ ମାନେ ଅନେକ କାମ ଘରେ ରହି କରିବାକୁ ବାଧ୍ୟ ହେଉଛନ୍ତି ଯେଉଁଥିରେ ବିଦ୍ୟୁତ ପ୍ରମୁଖ ମାଧ୍ୟମ ଅଟେ। ଛାତ୍ର ଛାତ୍ରୀଙ୍କ ପାଇଁ ଅନଲାଇନ କ୍ଲାସ ହେଉ କିମ୍ବା ଘରୋଇ କର୍ମଚାରୀଙ୍କ ଅନଲାଇନ କାମ ସବୁଠି ବିଦ୍ୟୁତ ଅପରିହାର୍ଯ୍ୟ ହୋଇପଡିଛି। ବର୍ଷାଦିନ ଆସିବାକୁ ବାକିଥିଲା ବେଳେ ପ୍ରବଳ ଗୁଳୁଗୁଳି ଦିନଯାକ ରହୁଛି। ଏ ସବୁକୁ ଖାତିର ନକରି ବିଦ୍ୟୁତ ବିଭାଗ ମନଇଚ୍ଛା କାର୍ଯ୍ୟ କରୁଛି।

ଦିନ ତମାମ ଅଘୋଷିତ ବିଦ୍ୟୁତକାଟ ହେଉଛି ଯାହା ଫଳରେ ଲକ ଡାଉନ ଲାଗି ସ୍ୱଳ୍ପ ସମୟ ପାଇଁ ସରକାରୀ ବେସରକାରୀ କାର୍ଯ୍ୟାଳୟ, ବ୍ୟାଙ୍କ, ଏବଂ ଦୋକାନ ବଜାର ବେଶୀ ପ୍ରଭାବିତ ହେଉଛନ୍ତି ଯାହାର ସିଧାସଳଖ ପ୍ରଭାବ ନାଗରିକଙ୍କ ଉପରେ ପଡୁଛି। ଅନ୍ୟ ପକ୍ଷରେ ଯଦି ଏ ନେଇ ଅଭିଯୋଗ କରାଯାଏ ତାହାଲେ ଗୋଟେ ଅଭିଯୋଗ ପ୍ରକୋଷ୍ଠ ନାଇଁ କି ଅଭିଯୋଗ ହେଲ୍ପଲାଇନ ନମ୍ବର ବି ନାଇଁ। ଯଦି ଉପରିସ୍ଥ ଅଧିକାରୀଙ୍କୁ ଯୋଗାଯୋଗ କରାଯାଉଛି ତାହାଲେ ସେମାନେ ନାଭାଲ ଗ୍ରୀଡ଼କୁ ଦୋଷ ଦେଉଛନ୍ତି ଏବଂ ଯଦି ନାଭାଲ ଗ୍ରୀଡ଼କୁ ଯୋଗାଯୋଗ କରାଯାଏ ତାହାଲେ ସେମାନେ ସେସୁ ଉପରକୁ ଦୋଷ ଲଦିଦେଉଛନ୍ତି। ଦେଖିବାକୁ ଗଲେ ବର୍ଷ ତମାମ ରକ୍ଷଣାବେକ୍ଷଣ ପାଇଁ ବାରମ୍ବାର ଘୋଷଣା ହୋଇ ବିଦ୍ୟୁତ ସରବରାହ ବନ୍ଦ ରହୁଥିବା ବେଳେ ପୁଣି ଅଘୋଷିତ ବିଦ୍ୟୁତକାଟ କେତେଦୂର ଯୁକ୍ତିଯୁକ୍ତ। ଅଞ୍ଚଳରେ ସାମାନ୍ୟ ବର୍ଷା ପବନ ହେଲେ ସଙ୍ଗେସଙ୍ଗେ ବିଦ୍ୟୁତ କାଟ ହେଉଛି ଏବଂ ତାକୁ ମରାମତି ପାଇଁ ଘଣ୍ଟା ଘଣ୍ଟା ଲାଗୁଛି।

ତେବେ ଏଠି ପ୍ରଶ୍ନ ଉଠୁଛି ବର୍ଷ ତମାମ ବିଦ୍ୟୁତ ବିଭାଗ ମରାମତି ଆଳରେ ଦିନ ଦିନ ଧରି ଯେଉଁ ବିଦ୍ୟୁତ କାଟ କରୁଛି ତାହାର ଅଭିପ୍ରାୟ କଣ? ଏଠାର ନାଗରିକ ମାନଙ୍କ ମୌଳିକ ସୁବିଧାକୁ ଅଣଦେଖା କରିବା ଆଗକୁ ଯେ ବଡ଼ ଧରଣର ଆନ୍ଦୋଳନକୁ ପରୋକ୍ଷ ଭାବେ ବିଦ୍ୟୁତ ବିଭାଗ ନିମନ୍ତ୍ରଣ କରୁଛି ଏଥିରେ କୌଣସି ସନ୍ଦେହ ନାଇଁ। ଯଥାଶୀଘ୍ର ଉପରିସ୍ଥ ଅଧିକାରୀ ଏଠିକାର ବିଦ୍ୟୁତ କାଟ ସମସ୍ୟା ଦୂର କରିବା ସହ ଏକ ୨୪/୭ ଅଭିଯୋଗ ହେଲ୍ପଲାଇନ ନମ୍ବର ଜାରି କରିବାପାଇଁ ସାଧାରଣରେ ଦାବି ହେଉଛି।