ସୀତାରାମ ଅଗ୍ରୱାଲ
ବାଲୁଗାଁ: ଖୋର୍ଦ୍ଧା ଜିଲ୍ଲା ବାଲୁଗାଁ ବଜାରରେ ଥିବା ବିଭିନ୍ନ ଦୋକାନର ସଟର ତାଡି ଲୁଟ୍ ହୋଇଛି। ବର୍ତ୍ତମାନ ଏଭଳି ଲୁଟ୍ ଘଟଣା ଚିଲିକା ଅଞ୍ଚଳରେ ବଢୁଥିବାର ଦେଖିବାକୁ ମିଳୁଛି। ଦୁର୍ବୃତ୍ତମାନେ ଖୋଲାଖୋଲି ପୋଲିସକୁ ଚ୍ୟାଲେଞ୍ଜ ଦେଇ ଲୁଟ୍ କରି ଚାଲିଛନ୍ତି।
ସୂଚନା ମୁତାବକ, ଗତକାଲି ବିଳମ୍ବିତ ରାତିରେ କେତେ ଜଣ ଦୁର୍ବୃତ୍ତ ବାଲୁଗାଁ ବଜାରରେ ଥିଵା ମହାମାୟୀ ହିରୋ ନାମକ ଏକ ବାଇକ୍ ସୋ ରୁମ୍ ର ସଟର ତାଡି ସୋ ରୁମ୍ ଭିତରୁ ବିଭିନ୍ନ ବାଇକ୍ ପାର୍ଟସ ସହ ନଗଦ ଟଙ୍କା ଲୁଟି ନେଇଥିବା ଅଭିଯୋଗ ହୋଇଛି। ଏହାସହ ଦୁର୍ବୃତ୍ତମାନେ ସୋ ରୁମ୍ ର ପଡିଶା ଏକ ଫର୍ଣ୍ଣିଚର ଦୋକାନର ସଟରକୁ ତାଡିବାକୁ ଉଦ୍ୟମ କରିଛନ୍ତି। ବୁଲା କୁକୁର ମାନେ ଭୁକିବାରୁ ଦୁର୍ବୃତ୍ତମାନେ ଘଟଣା ସ୍ଥଳ ଛାଡି ପଳାଇଥିବା ସନ୍ଦେହ କରାଯାଉଛି।
ବାଇକ ସୋ ରୁମ କର୍ମଚାରୀଙ୍କଠାରୁ ସୂଚନା ପାଇ ବାଇକ୍ ସୋ ରୁମ୍ ମାଲିକ ଏବଂ ଫର୍ଣ୍ଣିଚର ଦୋକାନର ମାଲିକ ଘଟଣା ସ୍ଥଳରେ ପହଂଚିଥିଲେ। ସେଠାରେ ସେମାନଙ୍କ ଦୋକାନର ସଟର ତଡା ଯାଇଥିବା ଦେଖିବାକୁ ପାଇଥିଲେ।
ଏନେଇ ବାଲୁଗାଁ ଥାନାରେ ଅଭିଯୋଗ କରାଯିଵା ପରେ ଘଟଣା ସ୍ଥଳରେ ବାଲୁଗାଁ ଥାନା ଅଧିକାରୀ ରମାକାନ୍ତ ମାହାଲିକ ଓ ବାଲୁଗାଁ ଏସ୍ ଡି ପି ଓ ମାନସ ରଞ୍ଜନ ବାରିକ ଘଟଣା ସ୍ଥଳରେ ପହଂଚି ଘଟଣାର ଛାନ ବିନ୍ ଆରମ୍ଭ କରିଛନ୍ତି। ତେବେ ସୋ ରୁମ୍ ରୁ କେତେ କଣ ଲୁଟ୍ ହୋଇଛି ତାର ସଠିକ୍ ପରିମାଣ ତଦନ୍ତ ପରେ ଜଣାପଡିବ ବୋଲି ଏସ୍ ଡି ପି ଓ ଶ୍ରୀ ବାରିକ ସୂଚନା ଦେଇଛନ୍ତି।
ସୂଚନା ଥାଉକି ଅଳ୍ପ ଦିନ ତଳେ ବାଣପୁର -ବାଲୁଗାଁ ବାଇପାସରୁ ୧୫ ଲକ୍ଷ ଟଙ୍କା ଲୁଟ ହେବା ସହ ବାଣପୁର ଦକ୍ଷେଶ୍ୱର ମନ୍ଦିରରୁ ବିଭିନ୍ନ ମୂର୍ତ୍ତି ଚୋରି ହୋଇଥିଲା ଯାହା ଆଜି ପର୍ଯ୍ୟନ୍ତ ସ୍ଥାନୀୟ ପୋଲିସ ଲୁଟେରାମାନଙ୍କୁ ଧରିବାରେ ସକ୍ଷମ ହୋଇପାରିନାହିଁ। ତେବେ ପୁଣି ବାଲୁଗାଁ ବଜାରରେ ଏହାର ପୁନରାବୃତ୍ତି ଘଟିବା ପୋଲିସକୁ ଦୁର୍ବୁତ୍ତଙ୍କ ଖୋଲା ଚାଲେଞ୍ଜ ବୋଲି କହିଲେ ଅତ୍ୟୁକ୍ତି ହେବନାହିଁ।
