ଭୁବନେଶ୍ବର: ଧିରେଧିରେ ଭୁବନେଶ୍ବର ସାଂସଦ ତଥା ବିଜେପି ରାଷ୍ଟ୍ରୀୟ ପ୍ରବକ୍ତା ଅପରାଜିତା ଷଡଙ୍ଗୀଙ୍କ ରାଜ୍ୟର ଦଳିୟ ବ୍ୟାପାରରେ ହସ୍ତକ୍ଷେପ ଜୋରଦାର ହେବାରେ ଲାଗିଲାଣି। ଏପରିକି ସେ ରାଜ୍ୟ କାର୍ଯ୍ୟାଳୟକୁ ମଧ୍ୟ ନିଜ କବଜାକୁ ନେଇ ସାରିଲେଣି। ପୂର୍ବରୁ ଏହି କାର୍ଯ୍ୟାଳୟର ହର୍ତାକର୍ତ୍ତା ଥିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ଏବେ ସେହିପରି ଅପରାଜିତା ମଧ୍ୟ ବିଜେପି ଅଫିସକୁ ଦଖଲ କରିବାକୁ ବସିଲେଣି।
ଦଳୀୟ କର୍ମିଙ୍କ ଅନୁସାରେ ମନମୋହନ ସାମଲ ସଭାପତି ହେବା ପରେ ଅପରାଜିତାଙ୍କ ଏହି ଦଖଲ ଜୋରଦାର ହୋଇଯାଇଛି। ପୂର୍ବରୁ ସେ ବହୁ ଚେଷ୍ଠା କରି ମଧ୍ୟ ଧର୍ମେନ୍ଦ୍ରଙ୍କ ପତିୟାରାରେ ତାହା କରିପାରୁ ନ ଥିଲେ। ହେଲେ ଏବେ ସେହି ମିଶନ ସଫଳ ହୋଇଯାଇଛି। ଯାହାକୁ ନେଇ ବିଜେପି ନେତା ତଥା କର୍ମିଙ୍କ ମହଲରେ ବେଶ ଚର୍ଚ୍ଚା ଆରମ୍ଭ ହୋଇଯାଇଛି। କେହି ମୁହଁ ଖୋଲୁ ନ ଥିଲେ ମଧ୍ୟ ଭୁବନେଶ୍ବର କାର୍ଯ୍ୟାଳୟରେ ତାଙ୍କର ଆଧିପତ୍ୟକୁ ସମସ୍ତେ ଅନୁଭବ କରିସାରିଲେଣି।
ଖବର ଅନୁସାରେ ଅପରାଜିତାଙ୍କ ପ୍ରାୟ ପାଞ୍ଚରୁ ସାତ ଜଣ କର୍ମି ପ୍ରତିଦିନ ଭୁବନେଶ୍ବର କାର୍ଯ୍ୟାଳୟରେ ପଇଁତରା ମାରୁଛନ୍ତି। ଗୋଟିଏ ଦଳ ମଧ୍ୟାହ୍ନ ପର୍ଯ୍ୟନ୍ତ ପଇଁତରା ମାରୁଥିବା ବେଳ ଆଉ ଏକ ଦଳ ଅପରାହ୍ନରେ ଆସି ସେଠାରେ ଉପସ୍ଥିତ ହେଉଛନ୍ତି। ଅଫିସକୁ କିଏ ଆସିଲା, କାହା ସହିତ କିଏ କଥା ହେଲା ତାହାର ଟିକିନିଖି ଖବର ସେମାନେ ରଖୁଛନ୍ତି। ଏପରିକି ସେମାନେ ଚାହିଁଲେ କାହାକୁ ଅଫିସ ବାହାରକୁ ମଧ୍ୟ ବାହାର କରିବାର କ୍ଷମତା ରହିଛି।
ସେତିକି ନୁହେଁ ଅପରାଜିତାଙ୍କ କବଜାରେ ମଧ୍ୟ ଅଛନ୍ତି ଖୋଦ ରାଜ୍ୟ ବିଜେପି ସଭାପତି ମନମୋହନ ସାମଲ। ଯାହାର ଗଣ୍ଡାଗଣ୍ଡା ପ୍ରମାଣ ନେତା ଓ କର୍ମିଙ୍କ ପାଖରେ ରହିଛି। ନିକଟରେ ଭି କେ ପାଣ୍ଡିଆନଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଉଭୟ କେନ୍ଦ୍ରକୁ ଚିଠି ଲେଖିଥିଲେ। ଜଣେ ରାଜ୍ୟ ସଭାପତି ଭାବେ ସେ ନିଜେ ଲେଖିବା ଉଚିତ କିମ୍ବା ଅପରାଜିତାଙ୍କ ଦ୍ବାରା ଲେଖାଇବା ଉଚିତ। ହେଲେ ସେହି ଚିଠିରେ ଅପରାଜିତା ଆଗେ ଦସ୍ତଖତ କରିବା ପରେ ତଳେ ସାମଲ ଦସ୍ତଖତ କରିଛନ୍ତି।
ଏହି ଚିଠିକୁ ନେଇ ଦଳୀୟ ନେତାମାନଙ୍କ ଭିତରେ ଭିତରେ ବେଶ ଟୁପୁରୁଟାପର ଚାଲିଛି। ସଭାପତିଙ୍କ କାନ୍ଧରେ ବନ୍ଧୁକ ରଖି ଅପରାଜିତା ଗୁଳି ଫୁଟାଉଛନ୍ତି ବୋଲି କୁହାଯାଉଛି। କାରଣ ବର୍ତ୍ତମାନ କେନ୍ଦ୍ର ସରକାର ପାଣ୍ଡିଆନଙ୍କ ଉପରେ କୌଣସି ପଦକ୍ଷେପ ନେବ ନାହିଁ। ଫଳରେ ଏକା ଚିଠି ଲେଖି ଅପରାଜିତା ଲୋକହସା ହେବା ଅପେକ୍ଷା ସେ ସଭାପତିଙ୍କ ନାମକୁ ମଧ୍ୟ ସେଥିରେ ଯୋଡିଦେଲେ।
ସେହିପରି ସଭାପତି ଯେତେବେଳେ ରାଜ୍ୟ କାର୍ଯ୍ୟାଳୟରେ ବସୁଛନ୍ତି ତାଙ୍କ ଦ୍ବାର ପାଖରେ ଅପରାଜିତାଙ୍କ ଲୋକ ଜଗି ରହୁଛନ୍ତି। ତାଙ୍କ ପାଖକୁ ଯିଏ ଯାଉଛି ତାଙ୍କର ପରିଚୟ କଣ ଏବଂ କାହିଁକି ଭେଟିବେ ପରି ବିଭିନ୍ନ ପ୍ରଶ୍ନ ପଚାରିବା ପରେ ଭିତରକୁ ଛାଡୁଛନ୍ତି। ବାହାରକୁ ଆସିବା ପରେ ମଧ୍ୟ କଣ କଥା ହେଲେ ବୋଲି ସେମାନେ ଖବର ରଖୁଛନ୍ତି। ଏକଥା ନିଜେ ମନମୋହନ ଜାଣୁଥିଲେ ମଧ୍ୟ କିଛି କହିପାରୁ ନାହାଁନ୍ତି। ସେ କୁଆଡେ ଅପରାଜିତାଙ୍କୁ ଭୟ କରୁଛନ୍ତି ବୋଲି କର୍ମିଙ୍କ ମହଲରେ ଆଲୋଚନା ଚାଲିଛି।
ଅପରାଜିତାଙ୍କ ଏପରି ଅପରେସନ ଦେଖି ବର୍ତ୍ତମାନ ଦଳର ବରିଷ୍ଠ ନେତାମାନେ ଅସନ୍ତୋଷ ହେବାରେ ଲାଗିଛନ୍ତି। ସେମାନେ ମଧ୍ୟ ସଭାପତିଙ୍କୁ ଦେଖା କରିବାକୁ ଗଲେ ଅପରାଜିତାଙ୍କ ଲୋକଙ୍କର ସମ୍ମୁଖୀନ ହେବାକୁ ପଡୁଛି। ଏହାକୁ ସହଜରେ ସେମାନେ ହଜମ କରିପାରୁ ନାହାଁନ୍ତି କି କିଛି ମଧ୍ୟ କହିପାରୁ ନାହାଁନ୍ତି। କେବଳ ଭବିଷ୍ୟତକୁ ଅପେକ୍ଷା କରି ବସି ରହିଛନ୍ତି।
