ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ଦିନ ଛତିଶଗଡର ରାଜନନ୍ଦନ ଜିଲ୍ଲାର ଏକ ଲୋକପ୍ରିୟ ତୀର୍ଥସ୍ଥାନ ଡୋଙ୍ଗରଗଡ ପରିଦର୍ଶନ କରି ଜୈନ ସାଧୁ ଆଚାର୍ଯ୍ୟ ବିଦ୍ୟାସାଗର ମହାରାଜଙ୍କୁ ସାକ୍ଷାତ କରିଛନ୍ତି। ତାଙ୍କର ପାଦତଳେ ମୁଣ୍ଡିଆ ମାରି ପ୍ରଧାନମନ୍ତ୍ରୀ ଆର୍ଶିବାଦ ଭିକ୍ଷା କରିଥିଲେ।
ଏହାସହିତ ସେ ଡୋଙ୍ଗରଗଡର ଏକ ପାହାଡ ପାଦଦେଶରେ ଅବସ୍ଥିତ ମା ବାମଲେଶ୍ୱରୀ ମନ୍ଦିରରେ ମଧ୍ୟ ପ୍ରାର୍ଥନା କରିଥିଲେ। ସେ ତାଙ୍କର ଏକ୍ସ ରେ ଲେଖିଛନ୍ତି ଯେ, ଛତିଶଗଡର ଡୋଙ୍ଗରଗଡର ଚନ୍ଦ୍ରଗିରି ଜୈନ ମଣ୍ଡପରେ ଆଚାର୍ଯ୍ୟ ଶ୍ରୀ ୧୦୮ ବିଦ୍ୟାସାଗର ଜୀ ମହାରାଜଙ୍କ ଆଶୀର୍ବାଦ ଗ୍ରହଣ କରି ନିଜକୁ ଧନ୍ୟ ମନେ କରୁଛି।
ପ୍ରଧାନମନ୍ତ୍ରୀ ଛତିଶଗଡକୁ ନିର୍ବାଚନ ପ୍ରଚାରରେ ଯାଇଥିବା ବେଳେ ସେ ଏହି ମନ୍ଦିର ଏବଂ ସାଧୁଙ୍କୁ ସାକ୍ଷାତ କରିଛନ୍ତି। ଛତିଶଗଡର ପ୍ରଥମ ପର୍ଯ୍ୟାୟ ନିର୍ବଚନ ଆସନ୍ତା ନଭେମ୍ବର ୭ ତାରିଖରେ ହେବ। ସେଥିପାଇଁ ରବିବାର ଦିନ ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ପ୍ରଚାର ଶେଷ ହୋଇଯାଇଛି।
ଆଚାର୍ଯ୍ୟ ବିଦ୍ୟାସାଗର ମହାରାଜ କିଏ?
ଆଚାର୍ଯ୍ୟ ଶ୍ରୀ ବିଦ୍ୟାସାଗର ମହାରାଜ ଜୀ ଜଣେ ଅତ୍ୟନ୍ତ ସମ୍ମାନସ୍ପଦ ଦିଗମ୍ବର ଜୈନ ଆଚାର୍ଯ୍ୟ। ତାଙ୍କର ଅତୁଳନୀୟ ଶିଷ୍ୟ ପ୍ରେମ, ଗଭୀର ଆଧ୍ୟାତ୍ମିକ ଚିନ୍ତାଧାର ଏବଂ ଶାସ୍ତ୍ରଜ୍ଞାନର ଜଣେ ପ୍ରଗାଢ ବ୍ୟକ୍ତିତ୍ବ। ପ୍ରତ୍ୟେକ ଜୈନ ଧର୍ମର ବ୍ୟକ୍ତିଗଣ ତାଙ୍କୁ ଭଗବାନ ସଦୃଶ୍ୟ ପୂଜା କରିଥାନ୍ତି।
ଆଚାର୍ଯ୍ୟ ଶ୍ରୀ ବିଦ୍ୟାସାଗର ମହାରାଜ ଅକ୍ଟୋବର ୧୦, ୧୯୪୬ ରେ କର୍ଣ୍ଣାଟକର ସାଦାଲଗାରେ ଜନ୍ମଗ୍ରହଣ କରି ସେ ଅଳ୍ପ ବୟସରୁ ଆଧ୍ୟାତ୍ମିକତାକୁ ଗ୍ରହଣ କରିଥିଲେ। ସେ ରାଜସ୍ଥାନର ଅଜମେରରେ ୨୧ ବର୍ଷ ବୟସରେ ଆଧ୍ୟାତ୍ମିକତା ପାଇଁ ସାଂସାରିକ ଜୀବନ ପରିତ୍ୟାଗ କରିଥିଲେ।
ଆଜି ପର୍ଯ୍ୟନ୍ତ ଆଚାର୍ଯ୍ୟ ବିଦ୍ୟାସାଗର ମହାରାଜ ଜୈନ ଶାସ୍ତ୍ର ଏବଂ ଦର୍ଶନ ଶାସ୍ତ୍ରର ଅଧ୍ୟୟନ ଏବଂ ଗବେଷଣାରେ ଗଭୀର ଭାବରେ ବୁଡି ରହିଛନ୍ତି। ସଂସ୍କୃତ ସହିତ ଅନେକ ଆଧୁନିକ ଭାଷାରେ ତାଙ୍କର ଦକ୍ଷତା ରହିଛି। ଫଳରେ ସେ ବିଭିନ୍ନ ଭାଷାରେ ଅନେକ କବିତା ଏବଂ ଆଧ୍ୟାତ୍ମିକ ପୁସ୍ତକ ଲେଖିବାରେ ସକ୍ଷମ ହୋଇଛନ୍ତି।
ନିରଂଜନ ଶତାକା, ଭବନ ଶତାକା, ପରିଷଦ ଜୟା ଶତାକା, ସୁନୀତି ଶତାକା ଏବଂ ଶ୍ରୀମାନା ଶତାକାଙ୍କ ସମେତ ତାଙ୍କର ଅନେକ ପୁସ୍ତକ ଜୈନ ସମ୍ପ୍ରଦାୟ ମଧ୍ୟରେ ବହୁ ଲୋକପ୍ରିୟ। ତାଙ୍କର ପାଣ୍ଡିତ୍ୟକୁ କଳନା କରିବା ଅସମ୍ଭବ। ଆଚାଯ୍ୟ ବିଦ୍ୟାସାଗର ମହାରାଜ ତାଙ୍କର କଠୋର ଅଭ୍ୟାସ ଏବଂ ଆଧ୍ୟାତ୍ମିକ ଅଭିବୃଦ୍ଧି ପାଇଁ ନିରନ୍ତର ଉତ୍ସର୍ଗିକୃତ।
ଏହିପରି ଜଣେ ପ୍ରସିଦ୍ଧ ଆଧ୍ୟାତ୍ମିକ ବ୍ୟକ୍ତିତ୍ବଙ୍କୁ ସାକ୍ଷାତ କରି ପ୍ରଧାନମନ୍ତ୍ରୀ ନିଜକୁ ଧନ୍ୟ ମନେ କରିଛନ୍ତି ବୋଲି ନିଜେ ସ୍ବୀକାର କରିଛନ୍ତି।
