Categories
ଆଞ୍ଚଳିକ

କୁଜଙ୍ଗ ବିଜୁ ଯୁବ ଓ ଛାତ୍ର ଜନତା ଦଳ ପକ୍ଷରୁ ରକ୍ତ ଦାନ ଶିବିର

ରମେଶ ମହାନ୍ତି

ଜଗତସିଂହପୁର: କୁଜଙ୍ଗ ବ୍ଲକ ବିଜୁ ଯୁବ ଓ ଛାତ୍ର ଜନତା ଦଳ ପକ୍ଷରୁ ଓଡିଶା ମୋ ପରିବାର ଓ ଜୀବନ ବିନ୍ଦୁ କାର୍ଯ୍ୟକ୍ରମ ଶୁକ୍ରବାର ପୂର୍ବାହ୍ନ ୯ ଘଟିକା ସମୟରେ ସ୍ଥାନୀୟ ସୂଚନା ଭବନରେ ଅନୁଷ୍ଠିତ ହୋଇଯାଇଛି। ପାରାଦ୍ବୀପ ବିଧାୟକ ସମ୍ବିତ ରାଉତରାୟ ମୁଖ୍ୟ ଅତିଥି ଭାବେ ଯୋଗ ଦେଇ ପ୍ରଦୀପ ପ୍ରଜ୍ଜ୍ବଳନ ପୂର୍ବକ ଶୁଭ ଉଦ୍‌ଘାଟନ କରିଥିଲେ।

ଏହି ରକ୍ତଦାନ ଶିବିରରେ ୬୭ ୟୁନିଟ ରକ୍ତ ସଂଗୃହୀତ ହୋଇଥିଲା। କୁଜଙ୍ଗ ବ୍ଲକ୍ ଯୁବ ବିଜେଡି ସଭାପତି ମାନଭଞ୍ଜନ ମଲ୍ଲ, ଉପସଭାପତି ଜଗବନ୍ଧୁ ଦାସ, କୁଜଙ୍ଗ ବ୍ଲକ ଛାତ୍ର ବିଜେଡି ସଭାପତି ମହେଶ୍ୱର ଦାସ, ଯୁବ ବିଜେଡି ସଂଗଠକ ତଥା ଆଇଟି ସେଲ ମୁଖ୍ୟ ଅରୂପ୍ରସାଦ ମହାନ୍ତି, ରାଜ୍ୟ ଯୁବ ବିଜେଡି ସଂପାଦକ ତ୍ରିଲୋଚନ ତରାଇ, ରାଜ୍ୟ ଯୁବ ସାଂଗଠନିକ ସଂପାଦକ ରଶ୍ମିରଞ୍ଜନ ଦାସ, ରାଜ୍ୟ ଛାତ୍ର ସଂପାଦକ ସୁଚିସ୍ମିତା ବେହେରା,ଜଗତସିଂହପୁର ଜିଲ୍ଲା ଛାତ୍ର ସଭାପତି ସମ୍ବିତ ଲେଙ୍କା, ସାଂସଦ ପ୍ରତିନିଧି ସୁଢଳ ସ୍ୱାଇଁ ,ପ୍ରକାଶ ପରିଡା, ମାନସ ପରିଡା, ଭାରତ ଭୁଷଣ ନାୟକ, ସ୍ମୃତି ରଂଜନ ବେହେରା, ଭାରତ ଭୁଷଣ ଦାସ, ପୁଷ୍ପଲତା ବେହେରା, ନରେନ୍ଦ୍ର ପରିଡ଼ା, ମଦନ ମୋହନ ସ୍ବାଇଁ, ରାଜେନ୍ଦ୍ର ସାହୁ, ବିଚିତ୍ରାନନ୍ଦ ପ୍ରଧାନ, ସବିତା ମହାପାତ୍ର, ସୁରେନ୍ଦ୍ର ନାଥ ମହାପାତ୍ର, ଅଜିତ ପ୍ରସାଦ ମହାନ୍ତି, ନନ୍ଦିନୀ ପଣ୍ଡା, ମିହିର ପଟ୍ଟନାୟକ, ରାଜେଶ୍ ଭୁଆଁ, ସଂଗ୍ରାମ ମନ୍ତ୍ରୀ, ନିରଞ୍ଜନ ପ୍ରଧାନ,କବି ରଂଜନ ବେହେରା ପ୍ରମୁଖ ଯୋଗଦେଇ ଏହି ଜୀବନ ବିନ୍ଦୁ କାର୍ଯ୍ୟକ୍ରମରେ ସ୍ଥାନୀୟ ବିଜେଡି ଯୁବ ଓ ଛାତ୍ର ସଦସ୍ୟଙ୍କୁ ଅଧିକ ଉତ୍ସାହିତ କରିବା ସହ ପୂର୍ଣ୍ଣ ସହଯୋଗ କରିଥିଲେ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଯୋଗୁଁ ଓଡିଶା ମୋ ପରିବାର, ଜୀବନ ବିନ୍ଦୁ କାର୍ଯ୍ୟକ୍ରମ ରାଜ୍ୟର ପୁରପଲ୍ଲୀରେ ସଫଳ ଓ ସାକାର ହୋଇ ପାରିଛି। ସଂଗୃହିତ ରକ୍ତରେ ବହୁ ମୂଲ୍ୟବାନ ଜୀବନ ବଞ୍ଚାଇ ହେଉଛି ବୋଲି ବିଧାୟକ ଶ୍ରୀ ରାଉତରାୟ ମତ ରଖିଥିଲେ। ଶେଷରେ ରକ୍ତଦାତା କରୋନା ଯୋଦ୍ଧାଙ୍କୁ ପ୍ରମାଣ ପତ୍ର ମୁଖ୍ୟ ଅତିଥିଙ୍କ ଦ୍ବାରା ପ୍ରଦାନ କରାଯାଇଥିଲା।

Categories
ଆଞ୍ଚଳିକ

ତିର୍ତ୍ତୋଲ, କୁଜଙ୍ଗ ଓ ଏରସମା ଅଞ୍ଚଳର ମଠ ମନ୍ଦିରକୁ ଏଲ୍.ଇ.ଡି ଲାଇଟ୍ ବଣ୍ଟନ

ରମେଶ ମହାନ୍ତି

ଜଗତସିଂହପୁର: ତିର୍ତ୍ତୋଲ, କୁଜଙ୍ଗ ଓ ଏରସମା ବ୍ଲକ ଅଞ୍ଚଳରେ ଥିବା ବିଭିନ୍ନ ମଠ ମନ୍ଦିର ମାନଙ୍କରେ ଆଲୋକିକରଣ ନିମନ୍ତେ ମହାଶକ୍ତି ଫାଉଣ୍ଡେସନ୍ ଓ ସ୍ମାର୍ଟ ପାୱାର ଇଣ୍ଡିଆ ସହଯୋଗରେ ମାଗଣା ଏଲ୍.ଇ.ଡି ଲାଇଟ୍ ବଣ୍ଟନ କରାଯାଇଛି। ସ୍ମୃତି ରଞ୍ଜନ ଦାଶ ଓ ହେମନ୍ତ ତ୍ରିପାଠୀଙ୍କ ମିଳିତ ସହଯୋଗରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ବିଜୁଳି ଦିଦି ମାନଙ୍କ ଦ୍ୱାରା ଏହି ଏଲ୍.ଇଡି. ଲାଇଟ୍ ବଣ୍ଟନ କରାଯାଇଛି।

Categories
ଆଜିର ଖବର ଆଞ୍ଚଳିକ

କୁଜଙ୍ଗରେ ସମସ୍ତ ମଦ ଦୋକାନ ସିଲ ଥିବା ସତ୍ତ୍ବେ ବ୍ୟାପକ ଚୋରାମଦ କାରବାର

ରଞ୍ଜିତ୍‌ ପଣ୍ଡା

କୁଜଙ୍ଗ : କୁଜଙ୍ଗ ବ୍ଳକ ଏବଂ ଥାନା ଅଂଚଳରେ ରହିଥିବା ସମସ୍ତ ସରକାରୀ ମଦ ଦୋକାନକୁ ସରକାର ସିଲ କରିଛନ୍ତି । ମାତ୍ର ଏହା ସତ୍ୱେ କୁଜଙ୍ଗ ବ୍ଳକ ଏବଂ ଥାନା ଅଂଚଳରେ ବ୍ୟାପକ ମଦର କାରବାର ନେଇ ସାଧାରଣରେ ସନ୍ଦେହ ପ୍ରକାଶ ପାଇଛି । ତେବେ ଧାର୍ଯ୍ୟ ମୂଲ୍ୟଠାରୁ ୪ ଗୁଣା ମୂଲ୍ୟରେ ଏହା ବିକ୍ରୟ କରାଯାଉଥିବା ଜଣାପଡ଼ିଛି । ସରକାରୀ ମଦ ଦୋକାନ ସିଲ ସତ୍ୱେ କୁଜଙ୍ଗ, ବାଲିତୁଠ, ରାହାମା ଏବଂ ଭୂତମୁଣ୍ଡାଇ ଅଂଚଳରେ ଉପଲବ୍ଧ ହେଉଥିବା ଏହି ମଦ କେଉଁଠୁ ଆସୁଛି ଏବେ ଏହା ନେଇ ସନ୍ଦେହ ଘନୀଭୂତ ହେବାରେ ଲାଗିଛି । ଏହା ସାଧାରଣତଃ ହାତ ତିଆରୀ ଚୋରାମଦ ନା ସିଲ ଖୋଲାଯାଇ ସରକାରୀ ମଦ ଦୋକାନରୁ କଢାଯାଇ କଳାବଜାରୀ କରାଯାଉଛି  ତାହାଏବେ ସାଧାରଣରେ ସନ୍ଦେହ ସୃଷ୍ଟି କରିଛି । ଯାହା ଏବେ କୁଜଙ୍ଗରେ ମଦମୃତ୍ୟୁ ଆଶଙ୍କାକୁ ବଢାଇ ଦେଇଛି ।  ତେବେ  ଜିଲ୍ଲାପାଳ ଏହି ଅଭିଯୋଗ ଆଧାରରେ ତଦନ୍ତ ନିର୍ଦ୍ଦେଶ ପ୍ରଦାନକଲେ  ପ୍ରକୃତ ରହସ୍ୟ ପଦାକୁ ଆସିବ ବୋଲି ଚର୍ଚ୍ଚା ହେଉଛି ।

ପ୍ରକାଶଯେ, କୁଜଙ୍ଗ ବ୍ଳକର କୁଜଙ୍ଗ ଠାରେ ଦୁଇଟି, ଭୂତମୁଣ୍ଡାଇରେ ଗୋଟିଏ, ରାହାମା ଏବଂ ବାଲିତୁଠାରେ ଗୋଟିଏ ଲେଖାଏ ସରକାରୀ ମଦ ଦୋକାନ ରହିଛି । କରୋନା ଭାଇରସ ଜନିତ କାରଣରୁ କେନ୍ଦ୍ର ଏବଂ ରାଜ୍ୟସରକାର ଗତ ମାର୍ଚ୍ଚ ମାସ ୨୪ ତାରିଖଠାରୁ ରାଜ୍ୟର ସମସ୍ତ ସରକାରୀ ମଦ ଦୋକାନକୁ ସିଲ କରିଛନ୍ତି । ପ୍ରାୟ ଦେଢ ମାସହେବ  ଏହି କଟକଣା ବଳବତ୍ତର ରହିଛି । ମାତ୍ର କୁଜଙ୍ଗବ୍ଳକର ରାହାମା, କୁଜଙ୍ଗ, ବାଲିତୁଠ ଏବଂ ଭୂତମୁଣ୍ଡାଇ ଅଂଚଳରେ ବ୍ୟାପକ ମଦର କାରବାର ହେଉଥିବା ଜଣାପଡ଼ିଛି ।

ରାହମା ବଜାର, ହଂସୁରା, ବାଲିକଣୀ, ପଙ୍କପାଳ, ମୁଥାପଦା ଭରାଳ, ଗରେଇ, ବୋରିଖି, ବାଲିପାଟଣା, କରତୁଠା, ବାଲିପାରୀ, ବାଲିତୁଠ, ତାଳଦଣ୍ଡା, ଜିଳ୍ଲାନାସୀ ସାହାରାଡିଆ,  ନୂଆବାଲିସାହୀ, ଗଣ୍ଡକିପୁର, ମାଳହୁଙ୍କା, ଭୂତମୁଣ୍ଡାଇ ଆଦି ବଜାର ଏବଂ  ଗ୍ରାମାଂଚଳରେ ଅତିମାତ୍ରାରେ ମଦ କାରବାର ହେଉଛି ।

ସବୁଠାର ଗୁରୁତ୍ୱପୂର୍ଣ୍ଣ କଥା ହେଉଛି ଧାର୍ଯ୍ୟ ମୂଲ୍ୟଠାରୁ ଏହା ଚାରିଗୁଣ ଚଢା ମୂଲ୍ୟରେ ବିକ୍ରୟ କରାଯାଉଛି । ପୁଲିସ ସାଧାରଣତଃ ଏବେ କୋଭିଡ଼-୧୯ ଜନିତ କଟକଣା ଯୋଗୁ ବ୍ୟସ୍ଥ ରହିଥିବାବେଳେ ଅବକାରୀ ବିଭାଗର ଭୂମିକା ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି । ଗତ ଦୁଇଦିନ ତଳେ କୁଜଙ୍ଗର ସିଲ ହୋଇଥିବା ସରକାରୀ ମଦ ଦୋକାନ ନିକଟରେ ରାତି ୧୦.୧୨ ମିନିଟରେ ପାରାଦୀପ ଅବକାରୀ ବିଭାଗର ଅଧିକାରୀ ସନ୍ଦେହ ଜନକଭାବେ ଛିଡ଼ା ହୋଇଥିଲେ । ଯାହାକୁନେଇ ଏବେ ଅଂଚଳରେ ନାନା ସନ୍ଦେହ ଉଙ୍କି ମାରିଛି ।

ତେବେ ଏବେ ଉପରୋକ୍ତ ଅଂଚଳରେ ଉପଲବ୍ଧ ମଦ ସରକାରୀ ମଦ ନା ଚୋରାରେ ଚାଲାଣ ହେଉଥିବା ହାତ ତିଆରି ନକଲି ମଦ ତାହା ସବୁଠାରୁ ଅଧିକ ଗୁରୁତ୍ୱ ବହନ କରୁଛି । ତେବେ ଏନେଇ ଜିଲ୍ଲାପାଳ ଘଟଣା ଗୁରୁତ୍ୱ ଉପଲବ୍ଧିକରି ତଦ୍ଦନ୍ତ ଆଦେଶ ଦେବାକୁ ରାଜ୍ୟ ବରିଷ୍ଠ ନାଗରିକ ମହାସଙ୍ଘର ସଙ୍ଗଠନ ସମ୍ପାଦକ  କମ୍ରେଡ଼ ବାବୁରାମ ଚୌଧୁରୀ ଦାବୀ କରିଛନ୍ତି । ଏନେଇ ପାରାଦୀପ ଅବକାରୀ ଉପନୀରିକ୍ଷକ ପ୍ରଭାକର ସେଠୀଙ୍କୁ ପଚାରିବାରୁ ଏପରି ଚୋରା ମଦ ବ୍ୟବସାୟ କେଉଁଠାରେ ହେଉଛି ଆମକୁ ସୂଚନା ପ୍ରଦାନକଲେ ଆମେ ଚଢାଉ କରିବୁ ବୋଲି  ଓଲଟା ପ୍ରଶ୍ନ କରିଛନ୍ତି ।  ଶ୍ରୀଯୁକ୍ତ ସେଠୀଙ୍କ ଏହି ପାଲଟା ପ୍ରଶ୍ନମଧ୍ୟ ଅବକାରୀ ବିଭାଗର କାର୍ଯ୍ୟକାରିତାନେଇ ପ୍ରଶ୍ନବାଚୀ ସୃଷ୍ଟି କରିଛି ।

Categories
ଆଜିର ଖବର ଆଞ୍ଚଳିକ ରାଜ୍ୟ ଖବର

ଶିଶୁ ରୋହନ କୁମ୍ପି ଭାଙ୍ଗି ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ଦେଲେ ୫ ହଜାରଟଙ୍କା

ରଞ୍ଜିତ୍‌ ପଣ୍ଡା

କୁଜଙ୍ଗ: କୁଜଙ୍ଗର ବରିଷ୍ଠ ନାଗରିକ କିଶୋର ପ୍ରଧାନଙ୍କ ନାତି ତଥା ଯୁବସମାଜସେବୀ ଦେବୀପ୍ରସନ୍ନ ସରୋଜ କୁମାରଙ୍କ ୪ ବର୍ଷର ପୁତ୍ର ଦିଗଦିଜୟ(ରୋହନ) ନିଜର ସଂଚିତ ଅର୍ଥ ୫ ହଜାର ଟଙ୍କା ନିଜର କୁମ୍ପି ଭାଙ୍ଗି ଆଦି ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ପ୍ରଦାନ କରିଥିବା ଜଣାପଡ଼ିଛି । ଆଜି ଅପରାହ୍ନରେ କୁଜଙ୍ଗ ତହସିଲଦାର ସ୍ମୃତିପ୍ରଜ୍ଞା ପ୍ରିୟଦର୍ଶିନୀଙ୍କୁ ସେ ତାଙ୍କର ଅଜା ଶ୍ରୀଯୁକ୍ତ ପ୍ରଧାନଙ୍କ ସହିତ ଯାଇ ଏହି ଅର୍ଥରାଶିର ଏକ ଚେକ୍ ପ୍ରଦାନ କରିଥିଲେ । କୋଭିଡ୍‌-୧୯ ରୋଗର ମୁକାବିଲା ପାଇଁ ଶହଶହ ଲୋକମାନେ ମୁଖ୍ୟମନ୍ତ୍ରୀ ଏବଂ ପ୍ରଧାନମନ୍ତ୍ରୀଙ୍କ ରିଲିଫ ପାଣ୍ଠିକୁ ଦାନ ଦେଉଥିବାବେଳେ ମାତ୍ର ୪ ବର୍ଷର ଶିଶୁଙ୍କର ଏହି ବଦାନ୍ୟତା ସାଧାରଣରେ ବେଶ୍ ପ୍ରଶଂସା କରାଯାଇଛି । ମା ଜୟଶ୍ରୀ, ଆଇ ଆରତୀଙ୍କ ସମେତ ପରିବାର ଲୋକମାନଙ୍କର ପ୍ରେରଣା ଏଥିପାଇଁ ତାଙ୍କୁ ଅଧିକ ଉତ୍ସାହିତ କରିଥିବା ପରିବାର ପକ୍ଷରୁ କୁହାଯାଇଛି । ଏହି କାର୍ଯ୍ୟକ୍ରମ ଅବସରରେ ଅନ୍ୟମାନଙ୍କ ମଧ୍ୟରେ ଅତିରିକ୍ତ ତହସିଲଦାର ଦିଲ୍ଲୀପ କୁମାର ନାୟକ ଉପସ୍ଥିତ ଥିଲେ ।

Categories
ଆଞ୍ଚଳିକ

କୁଜଙ୍ଗ ବରିଷ୍ଠ ନାଗରିକ ମଞ୍ଚ ପକ୍ଷରୁ ମୁଖ୍ୟମନ୍ତ୍ରୀ ରିଲିଫ୍‌ ଫଣ୍ଡ୍‌କୁ 10 ହଜାର ଟଙ୍କା ଦାନ

ରଞ୍ଜିତ୍‌ ପଣ୍ଡା

କୁଜଙ୍ଗ: କୋଭିଡ୍‌-19ର ମୁକାବିଲା ପାଇଁ ସାରା ଦେଶରେ ଲକ୍‌ଡାଉନ୍‌। ଏହି ସମୟରେ ବହୁ ବ୍ୟକ୍ତି, ଅନୁଷ୍ଠାନ ଆର୍ଥିକ ସହାୟତାର ହାତ ବଢାଇଛନ୍ତି। ଏହି କ୍ରମରେ ଆଜି କୁଜଙ୍ଗ ବରିଷ୍ଠ ନାଗରିକ ମଞ୍ଚ ତରଫରୁ ମୁଖ୍ୟମନ୍ତ୍ରୀ ରିଲିଫ୍‌ ଫଣ୍ଡ୍‌କୁ 10 ହଜାର ଟଙ୍କା ଦାନ କରାଯାଇଛି। କୁଜଙ୍ଗ ବରିଷ୍ଠ ନାଗରିକ ମଞ୍ଚର ସମ୍ପାଦକ ବାବୁରାମ ଚୌଧୁରୀଙ୍କ ନେତୃତ୍ବରେ ଅନଙ୍ଗ କୁମାର ମହାପାତ୍ର, ବିଷ୍ଣୁ ଚରଣ ମୁଦୁଲି, ସତ୍ୟାନନ୍ଦ ନାଥ, ଦେବୀ ପ୍ରସାଦ ପଟ୍ଟନାୟକ ଭାରପ୍ରାପ୍ତ ବିଡିଓ ଡ. ପୂଜା ଲେଙ୍କାଙ୍କୁ ଏହି ଅର୍ଥ ପ୍ରଦାନ କରିଛନ୍ତି।

Categories
ଆଜିର ଖବର ଆଞ୍ଚଳିକ

କୁଜଙ୍ଗରେ ଲକ୍‌ ଡାଉନ୍‌ ନିୟମ କଡାକଡି: ସାପ୍ତାହିକ ହାଟରେ ସାମାଜିକ ଦୂରତ୍ବକୁ ଗୁରୁତ୍ବ

ରଞ୍ଜିତ୍ ପଣ୍ଡା

କୁଜଙ୍ଗ: କୁଜଙ୍ଗରେ ସାପ୍ତାହିକ ହାଟରେ ଆଜି ଦେଖିବାକୁ ମିଳିଛି ସାମାଜିକ ଦୂରତ୍ବ। ସାମାଜିକ ଦୂରତ୍ବକୁ ମାନି ଲୋକମାନେ ହାଟରୁ ପରିବାପତ୍ର କିଣିଛନ୍ତି। ଦୋକାନୀଙ୍କଠାରୁ ଆରମ୍ଭ କରି ଗ୍ରାହକମାନେ ସମେସ୍ତ ଏହି ନିୟମକୁ  ସଠିକ୍‌ ରୂପେ ପାଳନ କରିଛନ୍ତି। କୁଜଙ୍ଗ ଥାନା ଅଧିକାରୀ ଦିଲ୍ଲୀପ କୁମାର ସାହୁ, ତହସିଲଦାର ପ୍ରଭାସ ରଞ୍ଜନ ଦେହୁରା, ଭାରପ୍ରାପ୍ତ ବିଡିଓ ପୂଜା ଲେଙ୍କା ତତ୍ତ୍ବାବଧାନରେ ଆଜି ଶୃଙ୍ଖଳିତ ଭାବେ ସାମାଜିକ ଦୂରତ୍ବ ନିୟମ ଅନୁସାରେ ହାଟ ଅନୁଷ୍ଠିତ ହୋଇଥିଲା। ଆଜି କୁଜଙ୍ଗ ସାପ୍ତାହିକ ହାଟ କଟକ ପାରାଦ୍ଵୀପ ରାସ୍ତାର ଉଭୟ ପାର୍ଶ୍ବରେ ବସିଥିଲା। ଲୋକମାନେ ନିର୍ଦ୍ଦିଷ୍ଟ ଦୂରତ୍ବରେ ରହି କିଣାକିଣି କରିଥିବାର ନଜର ଆସିଥିଲା। ଲୋକମାନେ ଚାଲି ଚାଲି ପରିବା କିଣିବାକୁ ଆସିଥିବାବେଳେ କେହି କେହି ସାଇକେଲ୍‌ ଦ୍ବାରା ମଧ୍ୟ ବଜାରକୁ ଆସିଥିଲେ। କେହି ଦୁଇଚକିଆ ଯାନର ବ୍ୟବହାର ନ କରିଥିବାବେଳେ ସରକାରଙ୍କ ନିୟମକୁ ସଠିକ୍‌ ରୂପେ ପାଳନ କରିଥିବାର ଦେଖିବାକୁ ମିଳିଥିଲା।

ସୂଚନାଯୋଗ୍ୟ, ଗତକାଲି ରାହାମାରେ ସାପ୍ତାହିକ ହାଟରେ ପ୍ରବଳ ଜନସମାବେଶ ହୋଇଥିବାର ଜଗତସିଂହପୁର ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର ରାହାମା ସାପ୍ତାହିକ ହାଟଟିକୁ କରୋନାକୁ ଦୃଷ୍ଟିରେ ରଖି ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ରଖିଛନ୍ତି।

ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇଥିବାର ସାମାଜିକ ଦୂରତ୍ବକୁ କଡାକଡି କରାଯାଇଛି। ଏବେ ରାଜ୍ୟରେ ଆକ୍ରାନ୍ତଙ୍କ ସଂଖ୍ୟା ୪୦କୁ ବୃଦ୍ଧି ପାଇଛି।

Categories
ଆଜିର ଖବର ଆଞ୍ଚଳିକ ରାଜ୍ୟ ଖବର

ବାଲି ମାଫିଆଙ୍କ ଆକ୍ରମଣରେ ବୃଦ୍ଧା ଗୁରୁତର, କଟକ ସ୍ଥାନାନ୍ତର

ରଞ୍ଜିତ୍‌ ପଣ୍ଡା 

କୁଜଙ୍ଗ : କୁଜଙ୍ଗଥାନା ଅନ୍ତର୍ଗତ ଜିଲ୍ଲାନାସୀ ପଂଚାୟତର ମହାନଦୀରୁ ବେଆଇନଭାବେ ବାଲିଉଠାଣକୁ କେନ୍ଦ୍ରକରି ଆଜି ଗଣ୍ଡଗୋଳ ହୋଇଥିବା ଜଣାପଡ଼ିଛି। ସ୍ଥାନୀୟ ସରପଂଚଙ୍କ ପ୍ରତ୍ୟକ୍ଷ ତତ୍ୱାବଧାନରେ ତାଙ୍କର ଜେସିବି ଏବଂ ଟ୍ରାକ୍ଟର ଜରିଆରେ ପ୍ରତ୍ୟେକ ସରକାରୀ ଛୁଟିଦିନରେ ଏହିପରିଭାବେ ବେଆଇନଭାବେ ବାଲିଉଠାଯାଉଥିବା ନେଇଆସୁଥିବାବେଳେ ଏନେଇ ସ୍ଥାନୀୟ ତହସିଲଦାରଙ୍କର ନୀରବତା ରହସ୍ୟ ସୃଷ୍ଟି କରିଥିବା ଜଣାପଡ଼ିଛି।

ତେବେ ଗତକାଲି ଏକ ଦୈନନ୍ଦିନ ବ୍ୟବହୃତ ହେଉଥିବା ଏକ ଗାଧୁଆତୁଠ, ଗାଇଗୋଠ ତଥା ଯାତାୟତ ପଥରୁ ବାଲିଉଠାଯାଉଥିବା ବେଳେ ସ୍ଥାନୀୟ କିଛିଲୋକ ଏହାକୁ ବିରୋଧ କରିବାରୁ ଗଣ୍ଡଗୋଳର ସୂତ୍ରପାତ ହୋଇଥିଲା।

ଏନେଇ ଗୁରୁତର ଆହତଙ୍କୁ ଚିକିତ୍ସାପାଇଁ କଟକ ବଡ଼ଡ଼ାକ୍ତରଖାନାକୁ ପଠାଯାଇଥିବାବେଳେ ପୀଡ଼ିତଙ୍କ ପରିବାର ତରଫରୁ ଏନେଇ ଥାନାରେ ଅଭିଯୋଗ କରାଯାଇଛି । ବାଲି ଉଠାକୁ ନେଇ ସମ୍ପୃକ୍ତ ବୃଦ୍ଧ ଜଣକ ସରପଞ୍ଚ ପ୍ରମୋଦ ସ୍ବାଇଁ ଓ ଓ୍ବାର୍ଡମେମ୍ବରକୁ ନଦୀକୁ ଯିବା ଆସିବା ପାଇଁ ହଇରାଣ ହେଉଛୁ ଏଠୁ ବାଲି ନିଅ ନାହିଁ ବୋଲି କହିବା ସହିତ ବାଲି ଚାଲାଣ ହେଉଥିବା ଗାଡ଼ି ଆଗରେ ଠିଆ ହୋଇ ବନ୍ଦ କରିବାକୁ ଚେଷ୍ଟା କରୁଥିଲେ । କିନ୍ତୁ ସରପଞ୍ଚ ଓ ଓ୍ବାର୍ଡମେମ୍ବର ତାଙ୍କୁ ଅସଭ୍ୟ ଭାଷାରେ ଗାଳି କରିବା ସହିତ ତାଙ୍କୁ ମାରଧାର କରି ରକ୍ତାକ୍ତ କରିଥିବାର ଅଭିଯୋଗ ହୋଇଛି। ଏହା ସହିତ ବୃଦ୍ଧାଙ୍କର 1800 ଟଙ୍କାର ଶ୍ରବଣ ଯନ୍ତ୍ରଟିକୁ ମଧ୍ୟ ଦୁବୃର୍ତ୍ତମାନେ ଛଡାଇ ନେଇଛନ୍ତି ବୋଲି ଅଭିଯୋଗ ହୋଇଛି। ପୋଲିସ୍‌  କେଶ ନଂ 51/2020ରେ ଏତଲାକୁ ଗ୍ରହଣ କରି ଅଭିଯୁକ୍ତଙ୍କ ବିରୋଧରେ ଆଇପିସି ଧାରା 325, 323, 294, 379 34ରେ ମାମଲା ରୁଜୁ କରାଯାଇଛି ।  ଅନ୍ୟପକ୍ଷରେ ସରପଂଚଙ୍କ ସମର୍ଥକ ତଥା ୱାଡ଼ ସଭ୍ୟଙ୍କ ପକ୍ଷରୁ ଏକ ପାଲଟା ଅଭିଯୋଗ ହୋଇଥିବା ଜଣାପଡ଼ିଛି ।

ପ୍ରକାଶଯେ, ଜିଲ୍ଲାନାସୀ ସରପଂଚ ନିଜର ଜେସିବି ଏବଂ ଟ୍ରାକ୍ଟରକୁ ନିୟୋଜିତ କରିବା ଲାଗି ପ୍ରତ୍ୟେକ ସରକାରୀ ଛୁଟି ଦିନରେ ମହାନଦୀରୁ ବାଲି ଉଠାଇଥାନ୍ତି। ଏନେଇ ତାଙ୍କୁ ପଚାରିବାରୁ ସେ ସରକାରୀ ଭାବେ ଲିଜ୍‌ କାଟି ବାଲି ନେଉଥିବା ସଫେଇ ଦେଇଥାନ୍ତି। ମାତ୍ର ତହସିଲଦାରଙ୍କୁ ଏନେଇ ପଚାରିଲେ କାହାକୁ ନଦୀରୁ ବାଲି ଉଠାଇବାକୁ ଲିଜ୍‌ ପ୍ରଦାନ କରଯାଇ ନାହିଁ ବୋଲି ଉତ୍ତର ମିଳିଥାଏ। ସେହିପରି ଭାବେ ଗତକାଲି ସରକାରୀ ଛୁଟିଯୋଗୁ ତହସିଲ କାର୍ଯ୍ୟାଳୟ ବନ୍ଦ ରହିଥିଲା। ଏହାର ସୁଯୋଗନେଇ ସ୍ଥାନୀୟ ସରପଂଚଙ୍କ ଜେସିବି, ଟ୍ରାକ୍ଟର ଯୋଗେ କିଛି ୱାର୍ଡ଼ ସଭ୍ୟ ଏବଂ ସରପଂଚଙ୍କ ସମର୍ଥକମାନେ ପୂର୍ବାହ୍ନ ସମୟରେ ବାଲି ଉଠାଉଥିଲେ।  ମାତ୍ର ଜୟଶଙ୍ଖପୁର ଗ୍ରାମର ଏକ ସ୍ଥାନୀୟ ଲୋକମାନଙ୍କ ନିତ୍ୟ ବ୍ୟବହୃତ ଗାଧୁଆତୁଠ, ଶୌଚ କର୍ମ, ଯାତାୟତ ପଥକୁ ଖୋଳି ବାଲି ଉଠାଯାଉଥିବାରୁ ସ୍ଥାନୀୟ ଅଂଚଳର ପ୍ରସନ୍ନ ମହାପାତ୍ର, ତାଙ୍କର ବୟସ୍କା ମାଆ ସାକ୍ଷୀ ମହାପାତ୍ର ଏହାକୁ ରୋକିବାକୁ ଉଦ୍ୟମ କରିଥିଲେ। ମାତ୍ର ସେଠାରେ ଉପସ୍ଥିତ ଥିବା କିଛି ସରପଂଚଙ୍କ ସମର୍ଥକ ଏବଂ ୱାର୍ଡ଼ସଭ୍ୟ ମାନେ ସେମାନଙ୍କୁ ମରଣାନ୍ତକ ଭାବେ ଆକ୍ରମଣ କରିଥିବାନେଇ ଅଭିଯୋଗ ହୋଇଛି। ପ୍ରସନ୍ନ ମହାପାତ୍ର ଏବଂ ତାଙ୍କ ମାଆ ସାକ୍ଷୀ ମହାପାତ୍ର ଆହତ ଅବସ୍ଥାରେ ଥାନାରେ ପଂଚିଥିବାବେଳେ ସେମାନଙ୍କୁ ପ୍ରଥମେ ଚିକିତ୍ସା ହେବାକୁ କୁହାଯାଇଥିଲା। ପ୍ରଥମେ କୁଜଙ୍ଗ ସ୍ୱାସ୍ଥ୍ୟକେନ୍ଦ୍ର ଏବଂ ପରେ କଟକ ବଡ଼ ଡ଼ାକ୍ତରଖାନାକୁ ଗୁରୁତର ଆହତ ବୃଦ୍ଧାଙ୍କୁ ସ୍ଥାନାନ୍ତର କରଯାଇଥିବା ଜଣାପଡ଼ିଛି। ତାଙ୍କର ଏହି ଆକ୍ରମଣ ଫଳରେ ଅଣ୍ଟା ଏବଂ ହାତରେ ଗୁରୁତର ଆଘାତ ଲାଗିଥିବା ଜଣାପଡ଼ିଛି।

ଅନ୍ୟ ପକ୍ଷରେ ଜନୈକା ୱାର୍ଡ଼ ସଭ୍ୟାଙ୍କ ପକ୍ଷରୁ ମଧ୍ୟ ଅନ୍ୟଏକ ପାଲଟା ଅଭିଯୋଗ କରାଯାଇଛି। ଏନେଇ ଆହତ ସାକ୍ଷୀଙ୍କ ପୁତ୍ରଙ୍କୁ ପଚାରିବାରୁ ସେ ସରପଂଚ ପ୍ରମୋଦ କୁମାର ସ୍ୱାଇଁ ଏବଂ ତିନିଜଣ ୱାର୍ଡ଼ସଭ୍ୟଙ୍କ ନାମରେ ଲିଖିତ ଅଭିଯୋଗ କରିବା ସହିତ ଘଟଣା ସମ୍ପର୍କରେ ଜିଲ୍ଲାପାଳଙ୍କୁ ଅବଗତ କରାଇବେ ବୋଲି କହିଛନ୍ତି। ପ୍ରକାଶଯେ ଏହିପରିଭାବେ ବେଆଇନ ବାଲି ବର୍ଷବର୍ଷ ଧରି ମହାନଦୀରୁ ଉଠାଯାଉଛି। ଲଘୁ ଖଣିଜ ସମ୍ପଦ ସଂରକ୍ଷଣ କରିବା ତହସିଲଦାରଙ୍କ ଦାୟିତ୍ୱ ହୋଇଥିବାବେଳେ ଏନେଇ ତାଙ୍କୁ ବାରମ୍ବାର ଅବଗତ କରାଗଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନଥିବାରୁ ଏନେଇ ଯୁବସମାଜସେବୀ ତଥା ବିଜୁଜନତା ଦଳର ସଙ୍ଗଠକ ତପନ କୁମାର ସାମନ୍ତରାୟ  ଚେତାବନୀ ଦେଇଛନ୍ତି ।

Categories
ଆଜିର ଖବର ଆଞ୍ଚଳିକ ରାଜ୍ୟ ଖବର

ବିପଦ ଶଙ୍କୁଳ ବିଦ୍ୟୁତ୍‌ ତାରକୁ ନେଇ ପଶିଛି ଛନ୍‌କା : କୁଜଙ୍ଗ ବାଲିତୁଠ ରାସ୍ତାରେ ବିପଦ ଶଙ୍କୁଳ ୧୧ କେଭି ବିଦ୍ୟୁତ୍ ତାର

ରଞ୍ଜିତ ପଣ୍ଡା

କୁଜଙ୍ଗ:  ବ୍ରହ୍ମପୁରଠାରେ ୧୧ କେଭି ବିଦ୍ୟୁତ ତାର ଜନିତ ବସ୍‌ ଟ୍ରାଜେଡି ଘଟି ୧୦ ଜଣ ମୃତ୍ୟୁବରଣ କରିଥିବା ଘଟଣା ସାରା ରାଜ୍ୟବାସୀଙ୍କୁ ସମ୍ଭୀଭୂତ କରିଥିବାବେଳେ ବିପଦ ଶଙ୍କୁଳ ବିଦ୍ୟୁତ୍‌ ତାରକୁ ନେଇ ଏବେ ରାଜ୍ୟ ସରକାର ମଧ୍ୟ ତତ୍ପରତା ପ୍ରକାଶ କରିଛନ୍ତି । ତେବେ ରାଜ୍ୟରେ ବହୁ ସ୍ଥାନରେ ବିପଦ ସଙ୍କୁଳ ୧୧ କେଭି ବିଦ୍ୟୁତ୍‌ ତାର ଓହଳିଥିବାର ନଜର ଆସିଛି । କୁଜଙ୍ଗ ଅଂଚଳରେ ବହୁ ସ୍ଥାନରେ ବିପଦ ଶଙ୍କୁଳ ୧୧ କେଭି ବିଦ୍ୟୁତ୍ ତାରକୁ ନେଇ ଛନକା ପଶିଛି । କୁଜଙ୍ଗ ଥାନା ଅନ୍ତର୍ଗତ କୁଜଙ୍ଗ-ବାଲିତୁଠ ରାସ୍ତାର ବିଜିପୁରର ବିଦ୍ୟାଧର ପୁର ଛକ କିଛିଦିନ ତଳେ ୧୧ କେଭି ତାର ଛିଡି ପଡିଥିଲା ।  ଏହି ସମୟରେ ଏକ ବସ୍ ଆସୁଥିବା ବେଳେ ସୌଭାଗ୍ୟ ବଶତଃ ବର୍ତ୍ତି ଯାଇଥିଲା । ମାତ୍ର ଏହି ସମୟରେ କୁଜଙ୍ଗ ଥାନା ବନାପାଟ ଗ୍ରାମର ପର୍ଶୁରାମ ରାଉତ ସେହି ରାସ୍ତା ଦେଇ ଯିବା ସମୟରେ ତାରଟି ଛିଡି ପଡିଥିଲା । ଏହି ସମ୍ପର୍କରେ ସେ ତୁରନ୍ତ ବାଲିତୁଠର ପୂର୍ବତନ ସମିତି ସଭ୍ୟ ପ୍ରକାଶ ଚନ୍ଦ୍ର ପରିଡାକୁ ଜଣାଇଥିଲେ । ପ୍ରକାଶ ତୁରନ୍ତ ୪ନଂ ଜୋନ୍ ଜିଲାପରିଷଦ ସଭ୍ୟାଙ୍କୁ ଅବଗତ କରାଇବା ସହ ତୁରନ୍ତ ବିଦ୍ୟୁତ୍ ବିଭାଗର  କର୍ମଚାରୀ ତାରକୁ ତାଳିପକା କାମ କରି ମରାମତି କରିଥିଲେ ।

ମାତ୍ର ଏହି ରାସ୍ତା ଦେଇ ପ୍ରତ୍ୟହ ଶହ ଶହ ଭାରି ଯାନ ଯାତାୟତ କରୁଥିବା ବେଳେ ବିଦ୍ୟୁତ୍‌ ତାର ବିପଦ ଶଙ୍କୁଳ ତା’ର ତଳେ ଭାରୀବାହୀ ଯାନ ବା ବସଗୁଡ଼ିକ ଚଳାଚଳ କରିବା ବେଶ୍‌ ବିପଦଜ୍ଜନକ । ପ୍ରକାଶ ଯେ ଗତ କିଛି ଦିନ ତଳେ କୁଜଙ୍ଗ ବ୍ଲକ୍ ପାନପୁଲି ଗ୍ରାମର ହେମନ୍ତ ପାତ୍ର ବାଲିତୁଠରେ ମଧ୍ୟ ବିଦ୍ୟୁତ୍ ଆଘାତରେ ମୃତ୍ୟୁବରଣ କରିଥିଲେ । ଏବେ କୁଜଙ୍ଗ, ବାଲିତୁଠ ନିକଟର ବହୁ ଅଂଚଳରେ ବିପଦ ଶଙ୍କୁଳ ଅବସ୍ଥାରେ ବିଦ୍ୟୁତ୍ ତାର ବିଶେଷକରି  ୧୧କେଭି ତାର ଝୁଲି ରହିଥିବା ବେଳେ ତୁରନ୍ତ ବିଦ୍ୟୁତ ବିଭାଗ ଏହା ପ୍ରତି ଯତ୍ନବାନ୍ ହେବାକୁ ବାଲିତୁଠର ପୂବତନ ସମିତି ସଭ୍ୟ ପ୍ରକାଶ ଚନ୍ଦ୍ର ପରିଡା, ପୂର୍ବତନ ସରପଂଚ ଛବି ପ୍ରସାଦ ରାଉତରାରୟ ପ୍ରମୁଖ ବିଭାଗୀୟ ନିର୍ବାହୀ ଯନ୍ତ୍ରୀଙ୍କୁ ନିବେଦନ କରିଛନ୍ତି ।

Categories
ଆଞ୍ଚଳିକ

ବିଦ୍ୟାଳୟର ବାର୍ଷିକ କ୍ରୀଡ଼ାରେ ଜେଏସ୍‌ଡବ୍ଲୁର ସହାୟତା

ରଞ୍ଜିତ୍‌ ପଣ୍ଡା

କୁଜଙ୍ଗ: ଭାରତର ଅଗ୍ରଣୀ ଇସ୍ପାତ ଉତ୍ପାଦନକାରୀ ତଥା ଜେଏସ୍‌ଡବ୍ଲୁ ଉତ୍କଳ ଷ୍ଟିଲ୍‌ ତରଫରୁ ଗଡକୁଜଙ୍ଗ ଅପଗ୍ରେଡ୍‌ ବିଦ୍ୟାଳୟରେ ଅନୁଷ୍ଠିତ ବାର୍ଷିକ କ୍ରୀଡ଼ା ଉତ୍ସବ ପାଇଁ ସାହାଯ୍ୟ ସହଯୋଗ ଯୋଗାଇ ଦିଆଯାଇଛି। ଏରସମା ବ୍ଲକ୍‌ ଅନ୍ତର୍ଗତ ଗଡକୁଜଙ୍ଗ ପଞ୍ଚାୟତରେ ଥିବା ଗଡକୁଜଙ୍ଗ ଉଚ୍ଚ ବିଦ୍ୟାଳୟରେ ଗତ ୩ ତାରିଖରୁ ଅନୁଷ୍ଠିତ ହୋଇଥିବା ବିଦ୍ୟାଳୟର ବାର୍ଷିକ କ୍ରୀଡ଼ା ଉତ୍ସବରେ ସମସ୍ତ ଛାତ୍ରଛାତ୍ରୀ ଭାଗ ନେଇଥିଲେ। ବିଦ୍ୟାଳୟର ଅନୁରୋଧକୁ ରକ୍ଷା କରି କମ୍ପାନୀ ତରଫରୁ ଛାତ୍ରଛାତ୍ରୀମାନଙ୍କ ପାଇଁ ଟୋପି, ଖେଳ ଛତା ଓ ବିଭିନ୍ନ ବିଭାଗରେ ପାରଦର୍ଶିତା ଲାଭ କରିଥିବା ଛାତ୍ରଛାତ୍ରୀମାନଙ୍କ ପାଇଁ ଟ୍ରଫି ସହ ଖେଳର ସମସ୍ତ ଆନୁସଙ୍ଗିକ ଜିନିଷ ପ୍ରଦାନ କରିଥିଲେ। ଏହି ଅବସରରେ କୁଜଙ୍ଗ ବ୍ଲକ୍‌ର ଜନପ୍ରତିନିଧିମାନେ ଉପସ୍ଥିତ ରହିଥିଲେ।

ସୂଚନାଯୋଗ୍ୟ, ଏରସମା ବ୍ଲକର ନୂଆଗାଁଠାରେ ଜେଏସ୍‌ଡବ୍ଲୁ ଏକ ଅତ୍ୟାଧୁନିକ ଗ୍ରୀନ୍‌ ଫିଲ୍ଡ ଇସ୍ପାତ ପ୍ରକଳ୍ପ କରିବା ପାଇଁ ରାଜ୍ୟ ସରକାର ଅନୁମତି ପ୍ରଦାନ କରିଛନ୍ତି। ଏହି ପ୍ରକଳ୍ପରେ ୭୧ ହଜାର କୋଟି ଟଙ୍କାର ପୁଞ୍ଜି ନିବେଶ କମ୍ପାନୀ କରିବ। ଏହା ସହିତ ପ୍ରଦୂଷଣକୁ ନିୟନ୍ତ୍ରଣ କରିବା ପାଇଁ ଅତ୍ୟାଧୁନିକ ଜ୍ଞାନ କୌଶଳ ବ୍ୟବହାର କରାଯିବ। କମ୍ପାନୀ ପ୍ରତ୍ୟେକ ୧୨ ହଜାର ୫୦୦ କର୍ମଚାରୀଙ୍କୁ ପରୋକ୍ଷରେ ୪୦ରୁ ୫୦ ହଜାର ଲୋକ ନିଯୁକ୍ତି ନେବ।

Categories
ଆଞ୍ଚଳିକ ରାଜ୍ୟ ଖବର

ସ୍ବୟଂ ସହାୟକ ଗୋଷ୍ଠୀକୁ ସ୍ବାବଲମ୍ବୀ କରିବା ପାଇଁ ଜେଏସ୍‌ଡବ୍ଲୁର ପ୍ରୟାସ ଆରମ୍ଭ

ସମୀକ୍ଷା ବ୍ୟୁରୋ

କୁଜଙ୍ଗ: ରାଜ୍ୟ ସରକାର ମହିଳାମାନଙ୍କୁ ସଶକ୍ତିକରଣ ଓ ଆର୍ଥିକ ସ୍ବାବଲମ୍ବୀଶୀଳ କରିବା ପାଇଁ ବିଭିନ୍ନ ଯୋଜନାର ରୂପାୟନ କରି ଏହାକୁ ସୂଚାରୁରୂପେ ପରିଚାଳନା କରୁଛନ୍ତି। ଯାହାଫଳରେ ଗ୍ରାମାଞ୍ଚଳରେ ଥିବା ବହୁ ଗରିବ ନିମ୍ନମଧ୍ୟବିତ୍ତ ମହିଳାମାନେ ସ୍ବୟଂସହାୟକ ଗୋଷ୍ଠୀ ମାଧ୍ୟମରେ ବହୁ ସୁବିଧା ସୁଯୋଗର ଲାଭ ଉଠାଇ ପାରୁଛନ୍ତି ଓ ନିଜର ନିଜର ପରିବାର ଆର୍ଥିକ ସମସ୍ୟାକୁ ବହୁ ପରିମାଣରେ ହ୍ରାସ କରିପାରୁଛନ୍ତି। ରାଜ୍ୟ ସରକାରଙ୍କ ଏହି ଜନହିତକର ଯୋଜନାକୁ ଆଉ ପାଦେ ଆଗେଇ ନେବା ପାଇଁ ଜେ.ଏସ୍‌.ଡବ୍ଲୁ ଉତ୍କଳ ଷ୍ଟିଲ୍‌ ତରଫରୁ ପ୍ରୟାସ ଆରମ୍ଭ କରିଛି। ଏହିକ୍ରମରେ ଜେ.ଏସ୍‌.ଡବ୍ଲୁ ପକ୍ଷରୁ ଏରସମା ବ୍ଲକର ଢିଙ୍କିଆ, ଗଡକୁଜଙ୍ଗ ଓ ନୂଆଗାଁ ପଞ୍ଚାୟତର ୫୦ରୁ ୬୦ ଜଣ ଗୋଷ୍ଠୀ ସହାୟିକା (ସିଆରପି) ଓ ଦକ୍ଷନଥି ପତ୍ର ସହାୟିକା (ଏମ୍‌ବିକେ)ମାନଙ୍କୁ ରାଜ୍ୟ ସରକାରଙ୍କ ଓରମାସ୍‌ ଦ୍ବାରା ଆୟୋଜିତ ‘ଶିଶିର ସରସ ମେଳା ୨୦୨୦’କୁ ନିଆଯାଇ, କୁଶଳୀ ଅଧିକାରୀମାନଙ୍କ ଦ୍ବାରା କିଭଳି ମେସିନ୍‌ ସାହାଯ୍ୟରେ ଅଧିକ ଉତ୍ତମ ଗୁଣବତ୍ତା ଥିବା ଧୂପକାଠି ତିଆରି କରାଯାଇପାରିବ ଓ ଏହାର ବିକ୍ରୟ ପାଇଁ ଆବଶ୍ୟକ ଜ୍ଞାନକୌଶଳ ସମ୍ପର୍କରେ ଶିକ୍ଷା ଦିଆଯାଇଛି। ଯାହାଫଳରେ ସେମାନେ ନିଜ ନିଜର ପଞ୍ଚାୟତର ସ୍ବୟଂ ସହାୟକ ଗୋଷ୍ଠୀର ମହିଳାମାନଙ୍କୁ ତାଲିମ ଦେଇପାରିବେ। ଯାହାଫଳରେ ସ୍ବୟଂସହାୟକ ଗୋଷ୍ଠୀରେ ଥିବା ଗରିବ ନିମ୍ନମଧ୍ୟବିତ୍ତ ମହିଳାମାନେ ସ୍ବାବଲମ୍ବୀ ହୋଇପାରିବେ।

ଏହାକୁ ସେହି ଅଞ୍ଚଳର ବୁଦ୍ଧିଜୀବୀମାନେ ସ୍ବାଗତ କରିଛନ୍ତି। ଉକ୍ତ ଅଞ୍ଚଳର ବିକାଶ, ଜନସାଧାରଣଙ୍କ ଜୀବନ ଜୀବିକାରେ ଉନ୍ନତି ଓ ମହିଳାମାନଙ୍କୁ ସ୍ବାବଲମ୍ବୀ କରିବାର ପ୍ରୟାସ ଜାରି ରହିବ ବୋଲି କମ୍ପାନୀ ତରଫରୁ ବିଭିନ୍ନ ସମୟ ଏହିଭଳି କାର୍ଯ୍ୟ ହାତକୁ ନିଆଯିବ ବୋଲି ସୂଚନା ଦିଆଯାଇଛି।

Categories
ଆଞ୍ଚଳିକ

ଜେଏସ୍‌ଡବ୍ଲ୍ୟୁ କାର୍ଯ୍ୟାଳୟରେ ଇଞ୍ଜିନିୟରିଂ ଛାତ୍ରଙ୍କ ଭଙ୍ଗାରୁଜା ଘଟଣା: ୧୦ ଛାତ୍ର ଗିରଫ

ସମୀକ୍ଷା ବ୍ୟୁରୋ
ପାରାଦୀପ/କୁଜଙ୍ଗ, ୨୪/୧୨: ନିଯୁକ୍ତି ଆଶାୟୀଙ୍କ ଦ୍ଵାରା ଜେଏସ୍‌ଡବ୍ଲ୍ୟୁ ଇନଫ୍ରାଷ୍ଟ୍ରକଚର ଲିମିଟେଡ କାର୍ଯ୍ୟାଳୟରେ ଭଙ୍ଗାରୁଜା ଘଟଣାରେ ୧୦ଜଣ ଛାତ୍ରକୁ ପୋଲିସ ଗିରଫ କରିଛି। ଆଦର୍ଶ ଥାନା ପୋଲିସ ଉକ୍ତ ଛାତ୍ରମାନଙ୍କୁ ଗିରଫ କରି କୋର୍ଟ ଚାଲାଣ କରିଛି।

ଉଲ୍ଲେଖଯୋଗ୍ୟ ଯେ ଆଜି ସକାଳେ ପାରାଦୀପରେ ରହିଥିବା ଜେଏସ୍‌ଡବ୍ଲ୍ୟୁ ଇନଫ୍ରାଷ୍ଟ୍ରକଚର ଲିମିଟେଡ କାର୍ଯ୍ୟାଳୟରେ ଏକ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା। ୨୦୦ରୁ ଅଧିକ ଇଞ୍ଜିନିୟରିଂ ଛାତ୍ର କାର୍ଯ୍ୟାଳୟରେ ଭଙ୍ଗାରୁଜା କରିଥିବାର ଅଭିଯୋଗ ହୋଇଥିଲା। ସମସ୍ତ ଛାତ୍ରଛାତ୍ରୀଙ୍କୁ ନିଯୁକ୍ତି ପାଇଁ ପ୍ରତିଶ୍ରୁତି ଦିଆଯାଇଥିଲେ ମଧ୍ୟ ନିଯୁକ୍ତି ପ୍ରଦାନ କରାଯାଇନଥିବାରୁ ଏହି ଆନ୍ଦୋଳନ କରାଯାଇଥିଲା ବୋଲି ସୂଚନା ରହିଛି।  ଛାତ୍ରଛାତ୍ରୀମାନେ କାର୍ଯ୍ୟାଳୟ ମଧ୍ୟରେ ପ୍ରବେଶ କରି କୈଫିୟତ ମାଗିବା ସହିତ ବିଭିନ୍ନ ଆସବାବପତ୍ର ଭଙ୍ଗାରୁଜା କରିଥିଲେ। ଆଇନ ବିରୋଧ କାର୍ଯ୍ୟ କରିବା ଅଭିଯୋଗରେ କିଛି ଛାତ୍ରଛାତ୍ରୀଙ୍କୁ ପୋଲିସ୍‌ ଅଟକ ରଖିଥିଲା। ଏନେଇ ଅନ୍ୟ ଛାତ୍ରଛାତ୍ରୀମାନେ ଥାନାକୁ ଯାଇ ପାଟିତୁଣ୍ଡ କରିଥିଲେ।

ସମ୍ପୃକ୍ତ ଘଟଣାରେ ପୋଲିସ ୧୦ ଜଣ ଛାତ୍ରଙ୍କୁ ଗିରଫ କରିଥିବା ବେଳେ ଆଦର୍ଶ ଥାନାର ଆଇଆଇସି ରଜନୀକାନ୍ତ ସାମଲ ଏହି ଘଟଣାର ତଦନ୍ତ କରୁଥିବା ଜଣାପଡିଛି।