Tag: ବାଣପୁର

ସୀତାରାମ ଅଗ୍ରୱାଲ

ବାଣପୁର: ମୃତ ବ୍ୟକ୍ତି ପାଉଛନ୍ତି ବିଧବା ଭତ୍ତା। ପ୍ରସଙ୍ଗଟି ଟିକେ ଅଜବ ଲାଗୁଥିଲେ ମଧ୍ୟ ଏହା ସତ। ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ଅନ୍ତର୍ଗତ ତୋରସିଂହ ପଞ୍ଚାୟତରେ ଏପରି ଏକ ମହା ଦୁର୍ନୀତି ନଜରକୁ ଆସିଛି।

ସୂଚନା ମୁତାବକ ତୋରସିଂହ ପଞ୍ଚାୟତ ରୋପଡ଼ା ଗ୍ରାମର ହେମଲତା ବେୱାଙ୍କ ମୃତ୍ୟୁ ବହୁ ମାସ ପୂର୍ବରୁ ହୋଇଯାଇଥିଲେ ମଧ୍ୟ ଏପର୍ଯ୍ୟନ୍ତ ତାଙ୍କୁ ମାସିକ ବିଧବା ଭତ୍ତା ମିଳୁଥିବାର ଅଭିଯୋଗ ହେଉଛି। ତେବେ ଏଠି ପ୍ରଶ୍ନ ଉଠୁଛି ଜଣେ ମୃତକ ବ୍ୟକ୍ତିଙ୍କୁ ବିଧବା ଭତ୍ତା କିପରି ମିଳୁଛି ଏବଂ ଭତ୍ତା ନେଉଛି କିଏ?

ହସ୍ତଗତ ତଥ୍ୟ ମୁତାବକ ଚଳିତ ମାସ ୧୮ ତାରିଖରେ ମୃତ ହେମଲତା ବେୱାଙ୍କୁ ବିଧବା ଭତ୍ତା ଟଙ୍କା ମିଳିଛି। ତେବେ ନିୟମ ମୁତାବକ ଯଦି ପଞ୍ଚାୟତରେ କୌଣସି ହିତାଧିକାରୀଙ୍କ ମୃତ୍ୟୁ ହୁଏ ତେବେ ଉକ୍ତ ପଞ୍ଚାୟତର ସରପଞ୍ଚ ଏବଂ ପିଇଓ ଏବାବଦରେ ତଦନ୍ତ କରି ସଙ୍ଗେସଙ୍ଗେ ସମ୍ପୃକ୍ତ ହିତାଧିକାରୀ ପାଉଥିବା ସମସ୍ତ ସରକାରୀ ସୁବିଧାକୁ ବନ୍ଦ କରିଥାନ୍ତି।

ଦ୍ଵିତୀୟତଃ ଭତ୍ତା ଟଙ୍କା ପାଇବା ପୂର୍ବରୁ ସମ୍ପୃକ୍ତ ହିତାଧିକାରୀଙ୍କୁ ପଞ୍ଚାୟତର ସରପଞ୍ଚ ଏବଂ ପିଇଓ ଉଭୟେ ଚି଼ହ୍ନଟ କରି ଭତ୍ତା କାର୍ଡ ଏବଂ ସ୍ଵାକ୍ଷର ଯାଞ୍ଚ କରିବେ। ଏହାପରେ ମିଳିତଭାବେ ସ୍ଵାକ୍ଷର କଲା ପରେ ହିତାଧିକାରୀଙ୍କୁ ପଇସା ମିଳିଥାଏ। ତେବେ ତୋରସିଂହ ପଞ୍ଚାୟତରେ ଏପରି ଜଘନ୍ୟ କାମ ଚାଲିଛି କିପରି? ମାସ ମାସ ଧରି ହିତାଧିକାରୀଙ୍କ ମୃତ୍ୟୁ ପରେ ବି ସରକାରୀ କର୍ମଚାରୀମାନେ ସେମାନଙ୍କ ଭତ୍ତା ଟଙ୍କା କିପରି ଅନ୍ୟକୁ ପ୍ରଦାନ କରୁଛନ୍ତି।

ଏତେ ସବୁ ଦୁର୍ନୀତି ହେଲାପରେ ବି କିପରି ସରପଞ୍ଚ ଜାଣିପାରୁନାହାନ୍ତି? କିପରି ପିଇଓ ମହାଶୟ ଏପରି ଦୁର୍ନୀତି କରିବାକୁ ସାହସ ପାଉଛନ୍ତି? ଏଠି ପିଇଓ, ଜି ଆର ଏସ୍ ଏବଂ ସରପଞ୍ଚଙ୍କ କାର୍ଯ୍ୟଦକ୍ଷତା ଏବଂ ଉଦ୍ଦେଶ୍ୟକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।

ତେବେ ଏ ବିଷୟ ନେଇ ପିଇଓ ଅମୃତ କୁମାର ବେହେରାଙ୍କୁ ଯୋଗାଯୋଗ କରିଥିଲେ ମଧ୍ୟ ତାହା ସମ୍ଭବ ହୋଇପାରିନଥିଲା। ଜିଆରଏସ୍ ଜ୍ୟୋତି ପ୍ରକାଶ ଦାସଙ୍କୁ ଯୋଗାଯୋଗ କରିବାରୁ ଏହା ଭୁଲରେ ହୋଇଯାଇଛି ବୋଲି ସେ ସ୍ୱୀକାର କରିଛନ୍ତି। ତେବେ ବାଣପୁର ବିଡ଼ିଓ ଡ଼. ଶୁଭଶ୍ରୀ ତ୍ରିପାଠୀଙ୍କୁ ଏବିଷୟ ନେଇ ଦୃଷ୍ଟି ଆକର୍ଷଣ କରାଯିବାରୁ ନିକଟରେ ସେ ଏପରି ଅଭିଯୋଗ ପାଇଛନ୍ତି ଏବଂ ଏବାବଦକୁ ଉଭୟ ପିଇଓ ଏବଂ ଜି ଆର ଏସ୍ ଙ୍କୁ ସେ ଲିଖିତ ଆକାରରେ ସ୍ପଷ୍ଟୀକରଣ ମାଗିଛନ୍ତି।

ଯଦି ଏପରି ଅନିୟମିତତା ହୋଇଥିବାର ପ୍ରମାଣିତ ହୁଏ ତେବେ ନିଶ୍ଚିତ ରୂପେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ଆମ ପ୍ରତିନିଧିଙ୍କୁ ପ୍ରତିଶୃତି ଦେଇଛନ୍ତି। ତେବେ ବାଣପୁର ବ୍ଲକରେ ଏଭଳି ଦୁର୍ନୀତି ବାରମ୍ବାର ଦେଖିବାକୁ ମିଳୁଥିବା ବେଳେ ମୃତ ହିତାଧିକାରୀଙ୍କ ରାସନ କାର୍ଡ ଏବଂ ଭତ୍ତା ଖାତା ଟିକନିଖ ଭାବେ ଯାଞ୍ଚ କରାଯାଉ ବୋଲି ବିଡିଓଙ୍କୁ ସାଧାରଣରେ ଦାବି ହେଉଛି।

ସୀତାରାମ ଅଗ୍ରୱାଲ

ବାଣପୁର/ଚିଲିକା: ଜିଲ୍ଲା ପ୍ରଶାସନର ନିର୍ଦ୍ଦେଶ କ୍ରମେ ଖୋର୍ଦ୍ଧା ଜିଲ୍ଲା ବାଣପୁର ଏବଂ ଚିଲିକା ଅଞ୍ଚଳରେ ପ୍ରତିଦିନ ବେଆଇନ ବାଲି, ମାଟି, ଗୋଡି, ମାଙ୍କଡା ପଥର ଚାଲାଣ କରୁଥିବା ଗାଡିଗୁଡିକ ଉପରେ ଚଢ଼ାଉ କରାଯାଉଛି। ବାଣପୁର ଏବଂ ଚିଲିକା ତହସିଲଦାର ଏହିସବୁ ଗାଡିଗୁଡ଼ିକ ଉପରେ ଚଢାଉ କରି ଜରିମାନା ଆଦାୟ କରୁଛନ୍ତି।

ଗତକାଲି ବାଣପୁର ତହସିଲ ପକ୍ଷରୁ ଦୁଇ ଗୋଟି ବେଆଇନ ମାଙ୍କଡା ପଥର ବୋଝେଇ ଟ୍ରକ ଜବତ କରାଯାଇ ସେମାନଙ୍କଠାରୁ ଜରିମାନା ବାବଦରେ ୫୫ ହଜାର ଟଙ୍କା ଆଦାୟ କରାଯାଇଥିଲା। ତେବେ ଆଜି ପୁଣି ବାଣପୁର ତହସିଲଦାର ମନ୍ମଥ ବେହେରା ତହସିଲ ସ୍କ୍ୱାର୍ଡ ଟିମ୍ ସହଯୋଗରେ ସକାଳୁ ତହସିଲର ବିଭିନ୍ନ ଅଞ୍ଚଳରେ ଚଢ଼ାଉ କରି ମଧ୍ୟାହ୍ନ ସୁଦ୍ଧା ୬ ଗୋଟି ଗାଡ଼ି ଜବତ କରିଛନ୍ତି। ତନ୍ମଧ୍ୟରୁ ୨ ଗୋଟି ମାଙ୍କଡା ପଥର ବୋଝେଇ ଟ୍ରକ, ୨ ଗୋଟି ମାଟି ବୋଝେଇ ଟ୍ରାକ୍ଟର, ୧ ଗୋଟି ମେଟାଲ ବୋଝେଇ ଟିପର ଏବଂ ଗୋଟାଏ ଜେସିବି ଜବତ ହୋଇଥିବାର ସୂଚନା ଦେଇଛନ୍ତି ତହସିଲଦାର ଶ୍ରୀ ବେହେରା। ସମସ୍ତ ଗାଡ଼ି ବେଆଇନ ଭାବେ ଏହି ସବୁ ଜିନିଷ ଚାଲାଣ କରୁଥିଲେ।  ତେବେ ବର୍ତ୍ତମାନ ସମସ୍ତ ଗାଡିଗୁଡିକ ବାଣପୁର ତହସିଲ ପରିସରରେ ଅଛି।

ଅନୁରୂପ ଭାବେ ଆଜି ସକାଳେ ଚିଲିକା ତହସିଲଦାର ପୁନମ ମହାପାତ୍ର ବେଆଇନ ଭାବେ ଗୋଡି ଚାଲାଣ କରୁଥିବା ୨ ଗୋଟି ଟ୍ରାକ୍ଟରକୁ  କୁହୁଡି ନିକଟରୁ ଜବତ କରିଛନ୍ତି। ଜବତ ହୋଇଥିବା ଟ୍ରାକ୍ଟର ଦୁଇଟି ବର୍ତ୍ତମାନ କୁହୁଡି ଫାଣ୍ଡି ପରିସରରେ ରହିଛି। ଉପଯୁକ୍ତ କାଗଜପତ୍ର ଦେଖାଇବାସହ ଜରିମାନା ପରିମାଣ ଦେଇ ଗାଡ଼ି ମାଲିକମାନେ ସେମାନଙ୍କ ଗାଡ଼ି ମୁକୁଳାଇ ନେଇପାରିବେ ବୋଲି ସୂଚନା ଦେଇଛନ୍ତି ଉଭୟ ବାଣପୁର ଏବଂ ଚିଲିକା ତହସିଲଦାର।

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ପଞ୍ଚାୟତ ସମିତିରେ ଦେଖାଦେଇଛି ଚରମ ଅବ୍ୟବସ୍ଥା। ଦୀର୍ଘ ଦଶ ମାସ ଭିତରେ ଗୋଟିଏ ଥର ପାଇଁ ମଧ୍ୟ ପଞ୍ଚାୟତ ସମିତିର ବୈଠକ ଅନୁଷ୍ଠିତ ହୋଇପାରିନାହିଁ।

ରାଜ୍ୟ ସରକାରଙ୍କ ପଞ୍ଚାୟତରାଜ ଏବଂ ପାନୀୟ ଜଳ ବିଭାଗ ଦ୍ୱାରା ଗତ ୧୮.୧୦.୧୯ରେ ଚିଠି ସଂଖ୍ୟା ୧୮୫୬୭ ରେ ଏକ ପତ୍ର ସମସ୍ତ ଜିଲ୍ଲାପାଳଙ୍କୁ ପ୍ରେରଣ କରାଯାଇଥିଲା। ଯେଉଁଥିରେ ଉଲ୍ଲେଖ ଥିଲା ଯେ, ପ୍ରତି ଦୁଇ ମାସରେ ଅତିକମରେ ଗୋଟାଏ ଥର ବୈଠକ ପ୍ରତି ପଞ୍ଚାୟତ ସମିତିରେ ଅନୁଷ୍ଠିତ ହେବ। ଉକ୍ତ ବୈଠକକୁ ପଞ୍ଚାୟତ ସମିତି ଚେୟାରମ୍ୟାନ ଅଧ୍ୟକ୍ଷତା କରିବେ।

ଅନୁରୂପଭାବେ ବିଭିନ୍ନ ବକେୟା ବିଲର ପ୍ରତିସ୍ଵାକ୍ଷର କରିବାରେ କୌଣସି ବ୍ଲକ ଚେୟାରମ୍ୟାନ ଯଦି ଅହେତୁକ ବିଳମ୍ବ କରନ୍ତି କିମ୍ବା ଟାଳଟୁଳ ନୀତି ଅବଲମ୍ବନ କରନ୍ତି ତେବେ ସେହି ପରିସ୍ଥିତିରେ ଜିଲ୍ଲାପାଳ ଏହାର ସତ୍ୟାସତ୍ୟକୁ ହୃଦୟଙ୍ଗମ କରି ପି.ଡ଼ି କିମ୍ବା ଉପ ଜିଲ୍ଲାପାଳଙ୍କଠାରୁ ସମ୍ପୃକ୍ତ ବିଲଗୁଡିକୁ ସ୍ଵାକ୍ଷର କରାଇ ପାସ କରେଇବା ପାଇଁ ବି.ଡ଼ି.ଓ ଙ୍କୁ ନିର୍ଦ୍ଦେଶ ଦେଇପାରିବେ।

ପଞ୍ଚାୟତ ସମିତି ବୈଠକ ନିହାତି ଏକ ଗୁରୁତ୍ୱପୂର୍ଣ ବୈଠକ। କାରଣ ଉକ୍ତ ବୈଠକରେ ସମସ୍ତ ପଞ୍ଚାୟତର ସରପଞ୍ଚ, ସମିତି ସଭ୍ୟଙ୍କ ସହ ଜନସାଧାରଣଙ୍କ ସେବା ଉଦ୍ଦେଶ୍ୟରେ ବିଭିନ୍ନ ବିଭାଗର ଅଧିକାରୀମାନେ ଉପସ୍ଥିତ ରହିବେ। ଉକ୍ତ ବୈଠକରେ ସମସ୍ତ ଜନପ୍ରତିନିଧିମାନେ ନିଜ ନିଜ ପଞ୍ଚାୟତରେ ଉପୁଜୁଥିବା ସମସ୍ତ ଛୋଟ ବଡ଼ ସମସ୍ୟାଗୁଡ଼ିକ ଉପସ୍ଥାପନା କରିବା ସହ ବିଭିନ୍ନ ଉନ୍ନୟନ ପ୍ରକଳ୍ପ ଅନୁମୋଦନ ପାଇଁ ମଧ୍ୟ ଉପସ୍ଥାପନା କରାଯାଏ। ଏବଂ ସର୍ବ ସହମତି କ୍ରମେ ସେସବୁ ସମାଧାନ ଏବଂ ଅନୁମୋଦିତ କରାଯାଇଥାଏ।

ହେଲେ ଏପରି ଗୁରୁତ୍ୱ ବହନ ରଖୁଥିବା ବୈଠକ କିପରି ଭାବେ ଦୀର୍ଘ ଦଶ ମାସ ହେଲା ବାଣପୁର ବ୍ଲକରେ ହୋଇନାହିଁ ତାହା ଆଶ୍ଚର୍ଯ୍ୟର ବିଷୟ। ହସ୍ତଗତ ତଥ୍ୟ ମୁତାବକ ବାଣପୁର ପଞ୍ଚାୟତ ସମିତି ବୈଠକ ଶେଷଥର ପାଇଁ ଫେବୃଆରୀ ମାସ ୨୦୨୦ ରେ ଅନୁଷ୍ଠିତ ହୋଇଥିଲା। ଏହାପରେ କୋଭିଡ ଲାଗି ସବୁ କାର୍ଯ୍ୟକ୍ରମ ବନ୍ଦ ହୋଇଗଲା।

ତେବେ ବର୍ତ୍ତମାନ ଦୀର୍ଘ ଛଅ ମାସରୁ ଉର୍ଦ୍ଧ ସମୟ ହେଲାଣି ଅନଲକ ପ୍ରକ୍ରିୟା ଜାରି ରହିଥିବା ସ୍ଥଳେ ସମସ୍ତ ସରକାରୀ କାର୍ଯ୍ୟ କ୍ଷିପ୍ର ଗତିରେ ଚାଲୁଛି। ତେବେ ବାଣପୁର ବ୍ଲକରେ କଣ ପାଇଁ ସମିତି ବୈଠକ ଅନୁଷ୍ଠିତ ହୋଇପାରୁନାହିଁ ତାହାର ଜବାବ କାହାପାଖେ ନାହିଁ।

ସୂଚନା ମୁତାବକ ଚଳିତ ମାସରେ ଦୁଇ ଦୁଇ ଥର ବ୍ଲକ ଅଧ୍ୟକ୍ଷାଙ୍କ ଦ୍ୱରା ବୈଠକ ପାଇଁ ତାରିଖ ଧାର୍ଯ୍ୟ କରାଯାଇଥିଲେ ମଧ୍ୟ ଶେଷ ମୁହୂର୍ତ୍ତରେ ତାକୁ ବାତିଲ କରିଦିଆଯାଉଛି। ଗତ ୧୫ ଏବଂ ୧୯ ତାରିଖ ପାଇଁ ବୈଠକ ସ୍ଥିର ହୋଇଥିବାସ୍ଥଳେ ଦୁଇ ଥର ବାତିଲ କରାଯାଇଛି।

ଏ ନେଇ ବାଣପୁର ବ୍ଲକ ଅଧ୍ୟକ୍ଷା ରଞ୍ଜିତା ସେଠିଙ୍କୁ ଯୋଗାଯୋଗ କରିବାରୁ ତାଙ୍କ ଶ୍ୱଶୁରଙ୍କ ସ୍ୱାସ୍ଥ୍ୟବସ୍ଥା ଗୁରୁତର ଥିବାରୁ ବୈଠକ ଦିନ ଧାର୍ଯ୍ୟ ହେଇପାରୁନାହିଁ ବୋଲି କହିବା ସହ ଖୁବ ଶୀଘ୍ର ସମିତି ବୈଠକ ଆୟୋଜନ କରିବେ ବୋଲି ସୂଚନା ଦେଇଛନ୍ତି।

ତେବେ ଏ ବିଷୟ ନେଇ ଆମ ପ୍ରତିନିଧି ଖୋର୍ଦ୍ଧା ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରିବାରୁ ଯଦି ବ୍ଲକ ଅଧ୍ୟକ୍ଷା ଅନୁପସ୍ଥିତ ରହୁଛନ୍ତି ତେବେ ସେ ପରିସ୍ଥିତିରେ ବି.ଡ଼ି.ଓ ବ୍ଲକ ଉପାଧ୍ୟକ୍ଷଙ୍କ ସହ ଆଲୋଚନା କରି ତାରିଖ ନିର୍ଧାରଣ କରି ବ୍ଲକ ଉପାଧ୍ୟକ୍ଷଙ୍କ ଅଧ୍ୟକ୍ଷତାରେ ବୈଠକ କରାଇପାରିବେ ବୋଲି ସୂଚନା ଦେଇଥିଲେ।

କିନ୍ତୁ ଭିତିରି ସୂତ୍ରରୁ ଖବର ମିଳିଛି ଯେ, ଉକ୍ତ ବୈଠକ ନକରେଇବା ପାଇଁ ବ୍ଲକ ଅଧ୍ୟକ୍ଷାଙ୍କ ଉପରେ କୁଆଡେ ରାଜନେତା ଏବଂ କେତେକ ସରପଞ୍ଚମାନଙ୍କ ଚାପ ପଡୁଛି। ତେବେ ବାଣପୁର ପଞ୍ଚାୟତ ସମିତିର ବୈଠକ କେବେ ବସୁଛି ଏବଂ ସାଧାରଣ ଜନତାଙ୍କ ସମସ୍ୟାର ସମାଧାନ କେବେ ହୋଇପାରୁଛି, ତାହା ଦେଖିବା ବାକି ରହିଲା।

ସୀତାରାମ ଅଗ୍ରୱାଲ

ଚିଲିକା: ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର ଏବଂ ବାଲୁଗାଁ ଅଞ୍ଚଳର ବିଭିନ୍ନ ବ୍ୟବସାୟିକ ପ୍ରତିଷ୍ଠାନ ଦ୍ୱାରା ଓଜନରେ ଠକେଇ ହେଉଥିବା ବାରମ୍ବାର ଅଭିଯୋଗ ହୋଇଆସୁଥିଲା। ଏନେଇ ଗତକାଲି ମାପ ଏବଂ ଓଜନ ବିଭାଗ ଦ୍ୱାରା ଉଭୟ ଅଞ୍ଚଳର ବିଭିନ୍ନ ବ୍ୟବସାୟ ପ୍ରତିଷ୍ଠାନ ଉପରେ ଚଢ଼ାଉ କରାଯାଇଥିଲା। ଜିଲ୍ଲା ସହକାରୀ ନିୟନ୍ତ୍ରକ ସୁଶୀଲ କୁମାର କାନ୍ଦୁଲଙ୍କ ନେତୃତ୍ୱରେ ଉକ୍ତ ଚଢ଼ାଉ କରାଯାଇଥିଲା। ଚଢ଼ାଉ ସମୟରେ ବିଭିନ୍ନ ବ୍ୟବସାୟିକ ପ୍ରତିଷ୍ଠାନରେ ମାପ, ଓଜନ ଏବଂ କାଗଜପତ୍ର ଆଦି କାର୍ଯ୍ୟରେ ଅନିୟମିତତା ଦେଖାଦେଇଥିଲା।

ଏହି ପରିପ୍ରେକ୍ଷୀରେ ଜିଲ୍ଲା ସହକାରୀ ନିୟନ୍ତ୍ରକ ଅଞ୍ଚଳର ବିଭିନ୍ନ ହାର୍ଡୱେର, ଫଳ, ମାଛ, ଲୁଗା ଦୋକାନ ସହ ଗୋଟିଏ ପାଣି ଫାକ୍ଟ୍ରି ଏବଂ ପାଉଁରୁଟି କାରଖାନା ଠାରୁ ୧୭ ହଜାର ଟଙ୍କା ଜରିମାନା ଆଦାୟ କରିଥିଲେ।  ଉକ୍ତ ଚଢ଼ାଉ ଅଭିଯାନରେ ବରିଷ୍ଠ ନିରୀକ୍ଷକ ପ୍ରଦୋଷ ହରିଚନ୍ଦନ ଏବଂ ସୁଶ୍ରୀ ରଥ ଆଦି ସାମିଲ ଥିଲେ।

ତେବେ ପୂର୍ବରୁ ଖବର ପାଇ କେତେ ଜଣ ମାଲିକ ସେମାନଙ୍କ ଦୋକାନ ବନ୍ଦ କରିଦେଇଥିବା ଦେଖିବାକୁ ମିଳିଥିଲା। ତେଣୁ ଅଞ୍ଚଳରେ ଏପରି ଚଢ଼ାଉ  ନିୟମିତ ଭାବେ ଜାରି ରହୁ ବୋଲି ଜନସାଧାରଣମାନେ ବରିଷ୍ଠ ଅଧିକାରୀଙ୍କ ନିକଟରେ ଦାବି କରିଛନ୍ତି।

ସୀତାରାମ ଅଗ୍ରୱାଲ

ବାଣପୁର: ଆଜିଠାରୁ ଓଡ଼ିଶାର ଅନ୍ୟତମ ଶକ୍ତିପୀଠ ତଥା ଖୋର୍ଦ୍ଧା ଜିଲ୍ଲା ବାଣପୁରର ମା’ ଭଗବତୀ ମନ୍ଦିର ସର୍ବସାଧାରଣଙ୍କ ଉଦ୍ଦେଶ୍ୟରେ ଖୋଲାଯାଇଛି। କରୋନା କଟକଣା ତଥା ଗାଇଡଲାଇନ ଅନୁଯାୟୀ ମାଆ ଙ୍କୁ ଦର୍ଶନ କରିବେ ଭକ୍ତ। ଏ ନେଇ ଆଜି ଶ୍ରୀ ଶ୍ରୀ ଦକ୍ଷେଶ୍ୱର ଭଗବତୀ ଏଣ୍ଡାଓମେଣ୍ଟ ର କାର୍ଯ୍ୟନିର୍ବାହୀ ଅଧିକାରୀ ତଥା ବାଣପୁର ତହସିଲଦାର ମନ୍ମଥ ବେହେରା ମନ୍ଦିର ଦର୍ଶନ ପାଇଁ ମାର୍ଗଦର୍ଶିକା ଜାରି କରିଛନ୍ତି।

ଭକ୍ତଙ୍କ ପାଇଁ ଗାଇଡଲାଇନ ଗୁଡ଼ିକ ହେଲା:-

୧. ଭକ୍ତମାନେ ମନ୍ଦିରରେ ପ୍ରବେଶ ପୂର୍ବରୁ ନିଜ ଶରୀରର ତାପମାତ୍ରା ମାପ କରିବେ
୨. ଭକ୍ତମାନେ ମାକ୍ସ ପରିଧାନ କରିବା ଅନିବାର୍ଯ୍ୟ ଅଟେ
୩. ଭକ୍ତମାନେ ସାନିଟାଇଜର ବ୍ୟବହାର କରିବେ
୪. ଭକ୍ତମାନେ ପରସ୍ପରଠାରୁ ୬ ଫୁଟ ଦୂରତା ରକ୍ଷା କରିବେ
୫. ୧୦ ବର୍ଷରୁ କମ ପିଲା, ୬୫ ବର୍ଷରୁ ଉର୍ଦ୍ଧ୍ଵ ବ୍ୟକ୍ତିଙ୍କୁ ମନ୍ଦିର ପ୍ରବେଶ ପାଇଁ ବାରଣ
୬. ଦର୍ଶନବେଳେ ଭକ୍ତମାନେ ଅର୍ଗଳୀ ଡ଼େଇଁପାରିବେ ନାହିଁ ତଥା ଦେବାଦେବୀଙ୍କୁ ସ୍ପର୍ଶ କରିପାରିବେ ନାହିଁ
୭. ମନ୍ଦିର ଭିତରେ ଭକ୍ତମାନେ କୌଣସି ଜାଗାରେ ଏକାଠି(ଠୁଳ) ହୋଇପାରିବେ ନାହିଁ

ଆଜିଠାରୁ ମନ୍ଦିର ମଧ୍ୟରେ ଏହି ସବୁ ବ୍ୟବସ୍ଥା ପରିଚାଳନା କରିବା ପାଇଁ ଦେବୋଦତ୍ତର କର୍ମଚାରୀ ଏବଂ ସ୍ଥାନୀୟ ପୋଲିସ କର୍ମଚାରୀମାନେ ଉପସ୍ଥିତ ରହିବେ ବୋଲି ତହସିଲଦାର ଶ୍ରୀ ବେହେରା ସୂଚନା ଦେଇଛନ୍ତି।

ସୀତାରାମ ଅଗ୍ରୱାଲ

ବାଣପୁର: ୧୫  ଓ ୨୦ ରୁ କମ ଛାତ୍ର ଓ ଛାତ୍ରୀ ଥିବା ୭୭୭୨ ରୁ ଉର୍ଦ୍ଧ୍ଵ ସରକାରୀ ବିଦ୍ୟାଳୟକୁ ବନ୍ଦ କରିବାକୁ ବିଦ୍ୟାଳୟ ଓ ଗଣଶିକ୍ଷା ବିଭାଗ ଘୋଷଣା କରିଛନ୍ତି। ଏହାକୁ ବିରୋଧ କରି ସର୍ବ ଦଳୀୟ ବୈଠକରେ ନିଆ ଯାଇଥିବା ନିଷ୍ପତ୍ତିକୁ ତୁରନ୍ତ ମାନିନେବା ପାଇଁ  ଓଡିଶା ଅଭିଭାବକ ମହାସଂଘ ସାରା ଓଡ଼ିଶାରେ ଦାବି କରୁଛି।

ଓଡିଶା ଅଭିଭାବକ ମହାସଂଘର ଅଧ୍ୟକ୍ଷ ବାସୁଦେବ ଭଟ୍ଟ ଓ ରାଜ୍ୟ କମିଟି ସଦସ୍ୟ ଲଲାଟେନ୍ଦୁ ଶତପଥୀ ଏବଂ କୃତାର୍ଥ ସାହୁ ଆଜି ବାଣପୁର ଓ ଚିଲିକା ଆସି ଅଭିଭାବକ ଓ ଗ୍ରାମବାସୀ ମାନଙ୍କ ସହ ସ୍କୁଲ ସମସ୍ୟା ସମ୍ପର୍କରେ ଆଲୋଚନା କରିବା ସହିତ  ବନ୍ଦ ହେଉଥିବା ବାଣପୁରର ବିଭିନ୍ନ ସ୍କୁଲକୁ ଯାଇ ସ୍ଥିତି ଅନୁଧ୍ୟାନ କରିଥିଲେ। ଏହା ସହିତ ମହାସଂଘର ଅଧ୍ୟକ୍ଷ ବାସୁଦେବ ଭଟ୍ଟଙ୍କ ନେତୃତ୍ୱରେ ଏକ ପ୍ରତିନିଧିଦଳ ସାମ୍ବାଦିକ ସମ୍ମିଳନୀରେ ସର୍ବଦଳୀୟ ବୈଠକର ହୋଇଥିବା ଦାବିକୁ ଦୋହରେଇଛନ୍ତି।

ସରକାର ଓ ଜିଲ୍ଲା ସ୍ତରୀୟ ଶିକ୍ଷା ଅଧିକାରୀ ମାନେ ତୁରନ୍ତ ପ୍ରତ୍ୟେକ ସ୍କୁଲ ବନ୍ଦ ହେବାର କାରଣ ସହ ଏକ ରିପୋର୍ଟ ପ୍ରଦାନ କରନ୍ତୁ ବୋଲି ଏହି ପ୍ରତିନିଧିଦଳ ଦାବି କରିଛନ୍ତି।

ଦାବିଗୁଡିକ ହେଲା:

୧) ସର୍ବ ଦଳୀୟ ବୈଠକର ନିଷ୍ପତ୍ତି ଅନୁସାରେ ଏବେ ସରକାରୀ ସ୍କୁଲ ବନ୍ଦ ନିଷ୍ପତ୍ତିକୁ ସ୍ଥଗିତ ରଖାଯାଉ।

୨) ପ୍ରାୟ ୮୦୦୦ – ୧୦୦୦୦  ନକଲି ଵା ବେଆଇନ ଭାବେ ଚାଲୁଥିବା ବିନା ସ୍ୱୀକୃତି ପ୍ରାପ୍ତ ଘରୋଇ ବିଦ୍ୟାଳୟ ଗୁଡ଼ିକୁ ତୁରନ୍ତ ବନ୍ଦ କରନ୍ତୁ ଓ ନକଲି ସ୍କୁଲ ମାଲିକଙ୍କ ବିରୁଦ୍ଧରେ ଏଫ.ଆଇ.ଆର ଦିଆଯାଇ ଗିରଫ କରାଯାଉ। ଯଦ୍ୱାରା  ଆଉ ନୂଆ ସ୍କୁଲ ବେଆଇନ ଭାବେ ଖୋଲି ପାରିବ ନାହିଁ।

୩) ଜିଲ୍ଲା ସ୍ତରୀୟ ବିଦ୍ୟାଳୟ ମିଶ୍ରଣ କମିଟିକୁ ପୁନଃ ଗଠନ କରାଯାଇ ସଂସଦ, ବିଧାୟକ, ପଂଚାୟତି ରାଜ ନିର୍ବାଚିତ ଜନ ପ୍ରତିନିଧି, ଶିକ୍ଷାବିତ ଓ ଅଭିଭାବକ ମହାସଂଘ ପରି ସଂଘ ମାନଙ୍କୁ ନିଆଯାଉ।

୪) ସାଂପ୍ରତିକ ସ୍କୁଲ ବନ୍ଦର ବିକଳ୍ପ କଣ ହୋଇପାରିବ ତାର ଏକ ରୂପରେଖ ପ୍ରସ୍ତୁତି ପାଇଁ ବିଶିଷ୍ଟ ଶିକ୍ଷାବିତ, ବିଶେଷଜ୍ଞ ଓ ଅଭିଭାବକ ମାନଙ୍କୁ ନେଇ ଏକ ପରାମର୍ଶ ସଭା ଆୟୋଜିତ କରାଯିବ ଓ ସରକାରଙ୍କ ପକ୍ଷରୁ ତୁରନ୍ତ ସବୁ ରାଜନୈତିକ ଦଳ ଏବଂ ଶିକ୍ଷା ଉପରେ କାମ କରୁଥିବା ବିଭିନ୍ନ ସଂଗଠନ ଗୁଡିକୁ ଡାକି ଏକ ପରାମର୍ଶ ସଭା ଆୟୋଜନ କରନ୍ତୁ। ସ୍କୁଲ ବନ୍ଦର କାରଣ ଖୋଜିବା ସହ ଏକ ସଂପୂର୍ଣ୍ଣ  ରିପୋର୍ଟ ଜନସାଧାରଣଙ୍କୁ ଜଣାଯାଉ।

ଉଲ୍ଲେଖ ଯୋଗ୍ୟ ଯେ, ଏହି ପ୍ରତିନିଧି ଦଳ ସ୍କୁଲ ବନ୍ଦ ହେବାକୁ ଥିବା ଅଞ୍ଚଳଗୁଡିକି  ଗସ୍ତ କରି ଏହା ଉପରେ ପୁଙ୍ଖାନୁପୁଙ୍ଖ ଅନୁଧ୍ୟାନ କରିଥିଲେ। ଏହି ସ୍କୁଲ ଗୁଡିକ ବନ୍ଦ ହେଲେ ପିଲାମାନେ ଦୂର ସ୍କୁଲକୁ ନ ଯାଇ ପାଠ ପଢ଼ା ଛାଡ଼ିଦେବେ ବୋଲି ଆଶଙ୍କା କରିଥିଲେ। ସ୍କୁଲ ଅନୁଧ୍ୟାନ ବେଳେ ଜଣାପଡିଲା କି, ପ୍ରାୟତଃ ଅଭିଭାବକ ଓ ଏସଏମସି ସହ ଆଲୋଚନା ହୋଇନି, ବହୁ ଅଂଚଳରେ ଚାରିରୁ ପାଞ୍ଚ କିମି ଦୂର ସ୍କୁଲ ଯାଇଥିବାରୁ, ଆଦିବାସୀ ଓ ହରିଜନ ବହୁଳ ଅଂଚଳ, ଅନେକ ବ୍ୟସ୍ତ ବହୁଳ, ଭାରୀଯାନ ଚାଲୁଥିବା  ରାସ୍ତା ଅତିକ୍ରମଣ, ଜମି ଗହୀର ରାସ୍ତା, ଜଙ୍ଗଲ ଅଂଚଳ ଆଦି ଅନେକ ସମସ୍ୟା ସହ ସ୍କୁଲରେ ମିଶ୍ରଣକୁ ଗ୍ରାମବାସି ମାନେ ବିରୋଧ କରୁଛନ୍ତି।

ଆଜିର ଏହି ସାମ୍ବାଦିକ ସମ୍ମିଳନୀରେ ଓଡିଶା ଅଭିଭାବକ ମହାସଂଘ ଅଧ୍ୟକ୍ଷଙ୍କ ସହିତ ସହ ରାଜ୍ୟ କମିଟି ସଦସ୍ୟ ଲଲାଟେନ୍ଦୁ ଶତପଥୀ, କୁର୍ତାର୍ଥ ସାହୁ, ଶରତ ମହାପାତ୍ର, ମନୋଜ କୁମାର ଜେନା, ବବିନା ତ୍ରିପାଠୀ, ରୀନା ଶ୍ରୀଚନ୍ଦନ, କବିତାରାଣୀ ମହାପାତ୍ର, ଗୀତାଞ୍ଜଳି ମହାପାତ୍ର, କଳ୍ପନା ମହାରଣା, ସବିତା ଦାଶ, ମଧୁସ୍ମିତା ସାହୁ, ପ୍ରଭାତୀ ଦେବୀ, ପ୍ରମୋଦିନି ସାହୁ ଏବଂ  ସ୍ଵପ୍ନରଣୀ ଦାଶ ପ୍ରମୁଖ  ଉପସ୍ଥିତ ଥିଲେ।