Tag: ଟାଙ୍ଗୀ

ଟାଙ୍ଗୀ (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲା ଟାଙ୍ଗୀ ତହସିଲରେ ଆଜି ନୂତନ ତହସିଲଦାର ଭାବେ କାର୍ଯ୍ୟରେ ଯୋଗଦେଇଛନ୍ତି ବରିଷ୍ଠ ଓଏଏସ ଅଧିକାରିଣୀ ମିତାଲି ପାତ୍ର। ଶ୍ରୀମତୀ ପାତ୍ର ୨୦୧୧ ବ୍ୟାଚ ଓଏଏସ ଅଧିକାରିଣୀ ଏବଂ ବରିଷ୍ଠ ପାହ୍ୟାକୁ ପଦୋନ୍ନତି ପାଇବା ସହ ଏହା ପୁର୍ବରୁ ସେ ଗଞ୍ଜାମ ଜିଲ୍ଲାପାଳଙ୍କ କାର୍ଯ୍ୟାଳୟରେ ଡେପୁଟି ଜିଲ୍ଲାପାଳ ଭାବେ କାର୍ଯ୍ୟରତ ଥିଲେ। ସେଠାରେ ବହୁ ଗୁରୁତ୍ୱପୂର୍ଣ୍ଣ ବିଭାଗର ଦାୟିତ୍ୱ ବହନ କରି ଜିଲ୍ଲାର ଉନ୍ନତି ଦିଗରେ ଏକାଧିକ କାର୍ଯ୍ୟ କରିଛନ୍ତି ଶ୍ରୀମତୀ ପାତ୍ର।

ତେବେ ନିକଟରେ ତାଙ୍କ ବଦଳି ଟାଙ୍ଗୀ ତହସିଲଦାର ଭାବେ ହୋଇଥିବା ବେଳେ ଆଜି କାର୍ଯ୍ୟାଭାର ଗ୍ରହଣ କରିଛନ୍ତି ଶ୍ରୀମତୀ ପାତ୍ର। ଟାଙ୍ଗୀ ଖୋର୍ଦ୍ଧା ଜିଲ୍ଲାର ଏକ ଗୁରୁତ୍ୱପୂର୍ଣ୍ଣ ତହସିଲ ହେବା ସହ ଲଘୁ ଖଣିଜ ଦ୍ରବ୍ୟରେ ପରିପୂର୍ଣ୍ଣ। ତେଣୁ ବେଆଇନ ଲଘୁ ଖଣିଜ ଦ୍ରବ୍ୟ ଚୋରାଚାଲାଣ ରୋକିବା ନୂତନ ତହସିଲଦାରଙ୍କ ପାଇଁ ଚ୍ୟାଲେଞ୍ଜ ରହିବ।

ଟାଙ୍ଗୀ: ଆଜି ଟାଙ୍ଗୀ ଦୂର୍ଗାଚରଣ ଚିଲିକା ଉଚ୍ଚ ମାଧ୍ୟମିକ ବିଦ୍ୟାଳୟ ପରିସରରେ ଓଡିଶା ପୋଲିସ ଦ୍ବାରା ସାଇବର ଅପରାଧ ସଚେତନତା ଶିବିର ଅନୁଷ୍ଠିତ ହୋଇଯାଇଛି। ଚଳିତ ମାସ ପହିଲା ଠାରୁ ଆସନ୍ତା ୧୫ ତାରିଖ ପର୍ଯ୍ୟନ୍ତ ରାଜ୍ୟ ର ବିଭିନ୍ନ ଅଞ୍ଚଳରେ ସାଇବର ଅପରାଧ ସଂପର୍କରେ ସଚେତନତା ଶିବିର ହେଉଥିବା ବେଳେ ଆଜି ଏହି ଉଚ୍ଚ ମାଧ୍ୟମିକ ବିଦ୍ୟାଳୟ ପରିସରରେ ଅନୁଷ୍ଠିତ ହୋଇଛି।

ଏଥିରେ ମୂଖ୍ୟ ଅତିଥି ଭାବେ ପୋଲିସ ମୂଖ୍ୟ କାର୍ଯ୍ୟାଳୟ ଡିଏସପି ଜୌସ୍ନା କାଉରି,ବାଲୁଗାଁ ଏସଡିପିଓ ଶୁଭ୍ରାଂଶୁ ଶେଖର ମିଶ୍ର,ଟାଂଗୀ ଆଇଆଇସି ସୁଶାନ୍ତ କୁମାର ବେହେରା, ଟାଂଗୀ ଦୂର୍ଗାଚରଣ ଚିଲିକା ଉଚ ମାଧ୍ୟମିକ ବିଦ୍ୟାଳୟ ର ଅଧ୍ୟକ୍ଷ ସିତାଶୁଂ ଭୁଷଣ ନନ୍ଦ ପ୍ରମୂଖ ଅତିଥି ଭାବେ ଯୋଗଦେଇ ସାଇବର ଅପରାଧ କିପରି ରୋକାଯାଇପାରିବ ଓ ପ୍ରତ୍ୟେକ କିପରି ଏହି ଅପରାଧ ରେ ଛନ୍ଦି ନହେବେ ଏପରିକି କେହି ଯଦି ସାଇବର ଅପରାଧ ରେ ପଡିଯାଇଛି କିପରି ନିଜକୁ ରକ୍ଷା କରିପାରିବେ ସେ ସଂପର୍କରେ ସଚେତନ କରିଥିଲେ।

ଇନଫରମେସନ ଟେକ୍ନୋଲୋଜି ପ୍ରଫେସନାଲ କେ ଦିନେସ ଯୋଗଦେଇ ସାଇବର ଅପରାଧ ରେ ଗୁରୁତର ଭାବେ ଠକାମିର ର ଶିକାର ହେଉଥିବା ଓ ଅନଲାଇନ ମାଧ୍ୟମରେ ଇଲେକ୍ଟୋନିକ ସାଇବର ଠକେଇ ରୁ ନିଜକୁ କିପରି ରକ୍ଷା କରାଯାଇପାରିବ ସେ ସଂପର୍କରେ ଉପସ୍ଥିତ ଛାତ୍ରଛାତ୍ରୀ ମାନଙ୍କୁ ସତର୍କ କରାଇଥିଲେ।ସାଇବର ଠକେଇ ର ଶିକାର ହେଲେ ଏକ ଘଣ୍ଟା ମଧ୍ୟରେ ସ୍ଥାନିୟ ପୋଲିସ କୁ ଜଣାଇପାରିଲେ ୨୪ ଘଣ୍ଟା୍ ମଧ୍ୟରେ ଠକେଇ ର ପର୍ଦାଫାସ ହୋଇପାରିବ ବୋଲି ସୂଚନା ଦିଆଯାଇଥିଲା।

୧୯୩୦ ଟୋଲ ଫ୍ରି ନମ୍ବର ରେ ସାଇବର ଠକେଇ ସଂପର୍କରେ ଜଣାଇବା ପାଇଁ ସମସ୍ତଙ୍କୁ ଅବଗତ କରାଯାଇଥିଲା। ଇଭେଣ୍ଟ କୋଅଡିନେଟର ରତ୍ନେସ ଜଗଦଲା ସଚେତନତା କାର୍ଯ୍ୟକ୍ରମ ରେ ସହାୟତା କରିଥିଲେ। ଏହି ଅବସରରେ ଛାତ୍ରଛାତ୍ରୀ ମାନଙ୍କ ଦ୍ବାରା ବିଭିନ୍ନ ମନୋରଞ୍ଜନ କାର୍ଯ୍ୟକ୍ରମ କରାଯାଇଥିଲା।

ଟାଙ୍ଗୀ (ସୀତାରାମ ଅଗ୍ରୱାଲ): ଜଙ୍ଗଲରେ ଖାଦ୍ୟର ଅଭାବ ଯୋଗୁଁ ଜଙ୍ଗଲରେ ରହୁଥିବା ହାତୀ ମାନେ ଏବେ ଗାଁ ମୁହାଁ ହେଉଛନ୍ତି। ଖୋର୍ଦ୍ଧା ବନ ଖଣ୍ଡ ଟାଙ୍ଗୀ ରେଞ୍ଜରେ ଏବେ ୧୮ ରୁ ଅଧିକ ହାତୀ ରହୁଛନ୍ତି।  ସେହି ହାତୀ ମାନେ ପଟିଆ ଜଙ୍ଗଲରେ ରହୁଥିବାରୁ ସେଠାରେ ଏବେ ଖାଦ୍ୟ ସମସ୍ୟା ଦେଖା ଦେଇଛି। ବନ ବିଭାଗ ସଠିକ ପରିଚାଳନା ନୀତି ଗ୍ରହଣ କରୁନଥିବାରୁ ଏହା ଏବେ ଏକ ବଡ଼ ସମସ୍ୟା ପାଲଟିଛି। ହାତୀ ମାନେ ଜନବସତିକୁ ପଳାଇ ଆସି ବ୍ୟାପକ କ୍ଷୟ କ୍ଷତି କରୁଛନ୍ତି।

ସେହିଭଳି ଆଜି ଗୋଟିଏ ଦନ୍ତା ହାତୀ ଜଙ୍ଗଲରୁ ପଲାଇ ଆସି ଉଗ୍ରତାରା ନିକଟରେ ଆତଙ୍କ ମଚଇଥିବା ଜଣା ପଡିଛି। ଏପଟେ ବନ ବିଭାଗ ନିକଟରେ ଖବର ନଥିବା ଜଣା ପଡିଛି।  ଫଳରେ ଲୋକେ ଭୟଭୀତ ହୋଇ ପଦଛନ୍ତି। ତେଣୁ ବନ ବିଭାଗ ହାତୀକୁ ଘଉଡ଼ାଇବାକୁ ଆବଶ୍ୟକ ପଦକ୍ଷେପ ନେବା ଦାବି ହେଉଛି।

ସୀତାରାମ ଅଗ୍ରୱାଲ

ଟାଙ୍ଗୀ: ଟାଙ୍ଗୀ ରେଞ୍ଜ ବଡ଼ ପୋଖରୀଆ ଗୋଡି ଗାଁରେ ଏକ ବିରାଟ କାୟ ଅଜଗର ସାପ ଉଦ୍ଧାର ହୋଇଛି। ଅଜଗରକୁ ଦେଖି ଲୋକେ ଭୟରେ ଆତଙ୍କିତ ହୋଇପଡିଛନ୍ତି।

ସୂଚନା ଅନୁଯାୟୀ, ଗତ କାଲି ରାତିରେ ଖାଦ୍ୟ ଖାଇବାକୁ ଆସି ବଡ଼ ପୋଖରୀଆ ଗୋଡି ଗାଁରେ ବିରାଟକାୟ ଅଜଗର ପଶି ଆସିଥିଲା। ଧାନ ବିଲରେ ଷଣ୍ଢ ଘଉଡ଼ାଇବାକୁ ଯାଇଥିବା ଜଣେ ଚାଷୀ ଘରକୁ ଫେରୁଥିବା ବେଳେ ଅଜଗରକୁ ଗାଁ ରାସ୍ତାରେ ବୁଲୁଥିବାର ଦେଖିଥିଲେ।  ଏହା ପରେ ଗାଁ ଲୋକଙ୍କୁ ସେ ଖବର ଦେଇଥିଲେ।

ଗାଁ ଲୋକଙ୍କ ଠାରୁ ଖବର ପାଇ କାଳୁପଡା ଘାଟର ସ୍ନେକ ହେଲ୍ପ ଲାଇନ ସଦସ୍ୟ ସୂର୍ଯ୍ୟ ନାରାୟଣ ନାଥ ଗୋଡି ଗାଁରେ ପହଁଚି ଅଜଗରକୁ ଧରିବାରେ ସଫଳ ହୋଇଥିଲେ। ଅଜଗରକୁ ଧରି ନିଜ ଗାଡ଼ିରେ ଆଣି ସେ ଟାଙ୍ଗୀ ବନ ବିଭାଗକୁ ହସ୍ତାନ୍ତର କରିଛନ୍ତି।

ଅଜଗରକୁ ପରୀକ୍ଷା ନିରୀକ୍ଷା କରିବା ପରେ ଅଜଗର ସୁସ୍ଥ ଥିବା ଟାଙ୍ଗୀ ରେଞ୍ଜର ଦେବାଶିଷ ଭୋଇ କହିଛନ୍ତି। ଅଜଗରର ଲମ୍ବା ୧୫ ଫୁଟ ହୋଇଥିବା ବେଳେ ତାହାର ଓଜନ ୨୬ କିଲୋ ଗ୍ରାମ ବୋଲି ଜଣା ପଡିଛି। ଆଜି ପଟିଆ ଜଙ୍ଗଲରେ ଅଜଗରକୁ ଛାଡି ଦିଆଯିବ ବୋଲି ରେଞ୍ଜର କହିଛନ୍ତି।

ସୀତାରାମ ଅଗ୍ରୱାଲ

ଟାଙ୍ଗୀ: ଗତକାଲି ବିଳମ୍ବିତ ରାତ୍ରିରେ ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଅନ୍ତର୍ଗତ ହାଟବରଡ଼ି ତରାପି ରୋଡରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଯାଇଛି। ଯେଉଁଥିରେ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଛି। ମୃତକଜଣକ ନଇରୀ ଗ୍ରାମର ଜୟ ବେହେରାଙ୍କ ପୁତ୍ର ରାଜେଶ ବେହେରା ବୋଲି ଜଣାପଡିଛି।

କୁହୁଡି ଫାଣ୍ଡି ଅଧିକାରୀ ପ୍ରସନ୍ନ ଜେନାଙ୍କ ସୂଚନା ମୁତାବକ ଗତକାଲି ରାତିରେ ଏକ ବାଇକରେ ରାଜେଶ ଓ ତାଙ୍କ ସହଯୋଗୀ ହାଟବରଡ଼ି ତରାପି ରୋଡରେ ଯାଉଥିବା ବେଳେ ଅସାବଧାନତା ବଶତଃ ଏକ ଗଛରେ ବାଇକକୁ ପିଟିଦେଇଥିଲେ। ଫଳରେ ଉଭୟ ଘଟଣାସ୍ଥଳରେ ବାଇକରୁ ତଳେ ପଡ଼ିଯାଇଥିଲେ। ସୂଚନା ପାଇ ଦୁର୍ଘଟଣାସ୍ଥଳରେ କୁହୁଡି ଫାଣ୍ଡି ପୋଲିସ ପହଞ୍ଚି ଉଭୟଙ୍କୁ ଟାଙ୍ଗୀ ଡାକ୍ତରଖାନାକୁ ନେଇଥିବା ବେଳେ ରାଜେଶଙ୍କୁ ଡାକ୍ତର ମୃତ ଘୋଷଣା କରିଥିଲେ।

ସୀତାରାମ ଅଗ୍ରୱାଲ
ଟାଙ୍ଗୀ: ଓଡ଼ିଶା ବିଖ୍ୟାତ ପର୍ଯ୍ୟଟନ ସ୍ଥଳୀ ତଥା ତନ୍ତ୍ରପୀଠ ଶକ୍ତିପୀଠ ମା’ ଉଗ୍ରତାରା ପୀଠ କାର୍ଯ୍ୟାଳୟରେ ତାଲା ପଡିଛି। ମା ଉଗ୍ରତାରା ପାଇକ ଖଣ୍ଡାୟତ ମହାସଂଘର ସଦସ୍ୟମାନେ କାର୍ଯ୍ୟାଳୟରେ ତାଲା ପକାଇଦେଇଛନ୍ତି। ପାଇକ ମହାସଂଘ ସଂଗଠନର ୬୦ ପରିବାରର ସଦସ୍ୟମାନେ ମା’ ଉଗ୍ରତାରା ପୀଠ କାର୍ଯ୍ୟାଳୟରେ ତାଲା ପକାଇ ପ୍ରତିବାଦ ଓ ଧାରଣା ଦେଇଛନ୍ତି।

ପାଇକ ମହାସଂଘର ଦାବି ଅନୁଯାୟୀ, ପାଇକମାନେ ମା’ ଉଗ୍ରତାରା ପୀଠର ପାଇକ ସେବକ। ମା’ ଉଗ୍ରତାରାଙ୍କ ସମସ୍ତ ପର୍ବପର୍ବାଣି ଜାନିଯାତ୍ରାରେ ମୂଖ୍ୟ ଭୂମିକା ନିଭାଉଥିବା ବେଳେ ଦୀର୍ଘଦିନ ହେବ ପାଇକ ମହାସଂଘ ପକ୍ଷରୁ ସ୍ଥାୟୀ ଭାବରେ ମନ୍ଦିର ନିକଟରେ ନିଜସ୍ୱ ଖର୍ଚ୍ଚରେ ଦୁଇ ବଖରା ପକ୍କାଘର କରି କାର୍ଯ୍ୟାଳୟ ଚଳାଉ ଆସୁଥିଲେ। ଜିଲ୍ଲା ପ୍ରଶାସନ ଓ ପାଇକ ମହାସଂଘର ନିଷ୍ପତ୍ତି କ୍ରମେ ଉକ୍ତ ଘରଟିରେ ମନ୍ଦିର କାର୍ଯ୍ୟାଳୟ ଚାଲୁଅଛି।ସେତେବେଳେ ପାଇକ ମହାସଂଘକୁ ଜିଲ୍ଲା ପ୍ରଶାସନ ଘରଭଡା ବାବଦରେ ଏକ ହଜାର ଟଙ୍କା ଦେବାକୁ ନିଷ୍ପତ୍ତି ହୋଇଥିବା ବେଳେ ଟଙ୍କା ମିଳୁନାହିଁ।

ଖଣ୍ଡାୟତ ପାଇକ ମହାସଂଘର ସଦସ୍ୟମାନେ ଉକ୍ତ ଘରଟିକୁ ଫେରାଇ ଦେବାକୁ ଜିଲ୍ଲା ପ୍ରଶାସନର ଜିଲ୍ଲାପାଳ, ଉପଜିଲ୍ଲାପାଳ, ତହସିଲଦାର, ଏଣ୍ଡାମେଣ୍ଟ କମିଶନକୁ ବାରମ୍ବାର ଦାବି କରିବାପରେ କୈ।ଣସି ସୁଫଳ ମିଳିନାହିଁ। ଉଗ୍ରତାରା ମନ୍ଦିରରେ ପାଇକ ମହାସଂଘ ସଦସ୍ୟ ମାନେ କେୟାର ଟେକର, ମନ୍ଦିର ସୁରକ୍ଷା ନିମନ୍ତେ ସିକ୍ୟୁରିଟ ଗାର୍ଡ, କମ୍ପ୍ୟୁଟର ଅପରେଟର, ଶାନ୍ତିଶୃଙ୍ଖଳା ରକ୍ଷା କରିବା ଦାୟିତ୍ୱରେ ଦୈନିକ ଦୁଇଜଣ ସୁରକ୍ଷା ଦାୟିତ୍ୱ ଆଦି ଦାୟିତ୍ୱ ଦିଆଯାଉ।

ମନ୍ଦିରରେ ଅନୁଷ୍ଠିତ ବାର୍ଷିକ ରଜ ମହୋତ୍ସବରେ ପାଇକ ମାନଙ୍କୁ ସାମିଲ କରିବା ପାଇଁ ସ୍ଥାନୀୟ ପାଇକ ଖଣ୍ଡାୟତ ମହାସଂଘର ସଦସ୍ୟ ମାନେ ଦାବିକରିଛନ୍ତି। ଉକ୍ତ ଦାବି ନେଇ ଖଣ୍ଡାୟତ ପାଇକ ମହାସଂଘ ସଦସ୍ୟ ମାନେ ମା’ ଉଗ୍ରତାରା ପୀଠ ମନ୍ଦିର କାର୍ଯ୍ୟାଳୟରେ ତାଲା ପକାଇ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସି ପ୍ରତିବାଦ କରିଛନ୍ତି।

ସୀତାରାମ ଅଗ୍ରୱାଲ

ଟାଙ୍ଗୀ: ଖୋର୍ଦ୍ଧା ଜିଲ୍ଲା ଟାଙ୍ଗୀ ଅଞ୍ଚଳରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ୨ ଦିନ ହେବ ନିଖୋଜ ଥିବା ଯୁବକଙ୍କ ଆଜି ମୃତ ଦେହ ଉଦ୍ଧାର କରାଯାଇଛି।

ସୂଚନା ଅନୁଯାୟୀ, ଟାଙ୍ଗୀ ବ୍ଲକ ଅନ୍ତର୍ଗତ ପଣସ ପୁର ପାଟଣାର ଦୀପକ ଦାସ (୨୭) ଗତ ଦୁଇ ଦିନ ହେଲା ନିଖୋଜ ଥିଲେ। ପରିବାର ଲୋକେ ତାଙ୍କୁ ବହୁତ ଖୋଜାଖୋଜି କରିଥିଲେ। ହେଲେ ଆଜି ନାରାୟଣୀ ପୋଖରୀ ନିକଟ ଏକ ଚୁଆରୁ ଦୀପକଙ୍କ ମୃତ ଦେହ ଭାସୁଥିବାରୁ ସ୍ଥାନୀୟ ଲୋକେ ଦେଖିବାକୁ ପାଇଥିଲେ। ଏନେଇ ଟାଙ୍ଗୀ ପୋଲିସକୁ ଖବର ଦେବା ମାତ୍ରେ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରିଛି। କିନ୍ତୁ ମୃତ୍ୟୁର କାରଣ ଜଣାପଡିନଥିବା ବେଳେ ପୋଲିସ ଏହାର ତଦନ୍ତ ଆରମ୍ଭ କରିଦେଇଛି।

ସୀତାରାମ ଅଗ୍ରୱାଲ

ଟାଙ୍ଗୀ: ଖୋର୍ଦ୍ଧା ଜିଲ୍ଲା ଟାଙ୍ଗୀ ବ୍ଲକ ଅନ୍ତର୍ଗତ ବଳରାମ ଦେବ ବିଦ୍ୟାପୀଠରେ ସ୍ଵାଧୀନତା ଦିବସ ପ୍ୟାରେଡ ଉତ୍ସବ ଧୂମଧାମରେ ପାଳିତ ହୋଇଯାଇଛି। ଏହି ଅବସରରେ ଉକ୍ତ ବିଦ୍ୟାଳୟର ପୁରାତନ ଛାତ୍ର ୧୯୯୭ ବ୍ୟାଚ ପକ୍ଷରୁ ମେଧାବୀ ଛାତ୍ରଛାତ୍ରୀମାନଙ୍କୁ ପୁରସ୍କୃତ କରାଯାଇଛି। ୨୦୨୨-୨୩ ଶିକ୍ଷା ବର୍ଷରେ ଷଷ୍ଠ ଶ୍ରେଣୀରୁ ଦଶମ ଶ୍ରେଣୀ ପର୍ଯ୍ୟନ୍ତ ଶ୍ରେଣୀରେ ପ୍ରଥମ ସ୍ଥାନ ଅଧିକାର କରିଥିବା ଛାତ୍ରଛାତ୍ରୀମାନଙ୍କୁ ପୁରସ୍କୃତ କରାଯାଇଛି।

ତେବେ ଷଷ୍ଠ ଶ୍ରେଣୀର ଭାଗ୍ୟଲକ୍ଷ୍ମୀ ପାତ୍ର, ସପ୍ତମ ଶ୍ରେଣୀର ଅଂଶୁମାନ ବେହେରା, ଅଷ୍ଟମ ଶ୍ରେଣୀର ଶୁଭଲକ୍ଷ୍ମୀ ସାମନ୍ତରାୟ, ନବମ ଶ୍ରେଣୀର ସ୍ୱୟମ୍ ପ୍ରକାଶ ମହାପାତ୍ରଙ୍କୁ ଟ୍ରଫି ପ୍ରଦାନ କରାଯାଇଥିବା ବେଳେ ଦଶମ ଶ୍ରେଣୀ ବୋର୍ଡ ପରୀକ୍ଷାରେ ବିଦ୍ୟାଳୟର ଟପ୍ପର ହୋଇଥିବା ପପୁନ ପାତ୍ରଙ୍କୁ ଟ୍ରଫି ସହ ୫ ହଜାର ଟଙ୍କା ପୁରସ୍କାର ରାଶି ପ୍ରଦାନ କରାଯାଇଛି।

ସେହିଭଳି ବ୍ରହ୍ମପୁର ଏନ ସି ସି କ୍ୟାମ୍ପରେ ଗୁଳି ଚାଳନାରେ ପ୍ରଥମ ସ୍ଥାନ ହାସଲ କରି ବିଦ୍ୟାଳୟକୁ ଗୌରବାନ୍ଵିତ କରିଥିବା ଏବଂ ସ୍ୱାଧୀନତା ଦିବସ ପ୍ୟାରେଡରେ କି ବୋର୍ଡ ବାଦନ କରି ଅନନ୍ୟ ପ୍ରତିଭା ପ୍ରଦର୍ଶନ ପାଇଁ ବିଶ୍ଵଜିତ ପାତ୍ରଙ୍କୁ ମଧ୍ୟ ପୁରାତନ ଛାତ୍ରମାନଙ୍କ ଦ୍ଵାରା ସମ୍ବର୍ଦ୍ଧିତ କରାଯାଇଛି।

ଉଲ୍ଲେଖ ଯୋଗ୍ୟ ଯେ, ଉକ୍ତ ବିଦ୍ୟାଳୟର ୧୯୯୭ ବ୍ୟାଚର ପୁରାତନ ଛାତ୍ରମାନେ ନିଜ ବିଦ୍ୟାଳୟର ଉନ୍ନତି ଏବଂ ଛାତ୍ରଛତ୍ରୀମାନଙ୍କୁ ଉତ୍ସାହିତ କରିବା ପାଇଁ ସେମାନେ ଏକ ଅଭିନବ ପ୍ରୟାସ କରୁଛନ୍ତି। କେବଳ ପାଠ ପଢାରେ ନୁହେଁ ପିଲାମାନଙ୍କର ଅନ୍ୟ ପ୍ରତିଭା ଯଥା- ଖେଳ, ସଙ୍ଗୀତ, କଳା ଇତ୍ୟାଦି କ୍ଷେତ୍ରରେ ବିଦ୍ୟାଳୟର ଛାତ୍ରଛାତ୍ରୀମାନଙ୍କ ମଧ୍ୟରେ ଆଗ୍ରହ ସୃଷ୍ଟି କରିବା ଓ ଦକ୍ଷତା ଥିବା ପିଲାମାନଙ୍କୁ ସମ୍ମାନିତ କରିବା ପାଇଁ ଗତ ବର୍ଷ ଠାରୁ ଏହି ପ୍ରୟାସ ଜାରି ରଖିଛନ୍ତି। ତେଣୁ ଗତ ବର୍ଷଠାରୁ ସେମାନେ ବିଦ୍ୟାଳୟର ମେଧାବୀ ଏବଂ ଅନନ୍ୟ ପ୍ରତିଭା ପ୍ରଦର୍ଶନ କରୁଥିବା ଛାତ୍ରଛାତ୍ରୀମାନଙ୍କୁ ପୁରସ୍କୃତ କରିଆସୁଛନ୍ତି।

ଏହି କାର୍ଯ୍ୟକ୍ରମରେ ବିଦ୍ୟାଳୟର ପ୍ରଧାନ ଶିକ୍ଷକ ବିଶ୍ୱଜିତ୍ ପଲେଇ, ବିଦ୍ୟାଳୟ ପରିଚାଳନା କମିଟିର ସଭାପତି ସୁନିଲ ମହାନ୍ତି ଓ ଅନ୍ୟମାନେ ଯୋଗ ଦେଇଥିବା ବେଳେ ପୁରାତନ ଛାତ୍ର ଅଜିତ୍ କୁମାର ମହାପାତ୍ର, ଭଗବାନ ସାହୁ, ଲକ୍ଷ୍ମୀକାନ୍ତ ପାତ୍ର, ଦିବ୍ୟସିଂହ ସାମନ୍ତରାୟ ଓ ସୂର୍ଯ୍ୟକାନ୍ତ ପ୍ରଧାନ ପ୍ରମୁଖ ସହଯୋଗ କରିଥିଲେ।

ସୀତାରାମ ଅଗ୍ରୱାଲ

ଟାଙ୍ଗୀ: ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଜରିପଡା ଦଳ ବେହେରା ସାହିରେ ଅଭାବନୀୟ ଘଟଣା ଘଟିଯାଇଛି। ବିଷାକ୍ତ ସାପ କାମୁଡ଼ାରେ ରୁନୁ ବେହେରା (୪୦) ନାମକ ଜଣେ ମହିଳାଙ୍କର ମୃତ୍ୟୁ ଘଟିଛି।

ସୂଚନା ଅନୁଯାୟୀ, ରୁନୁ ବେହେରା ଘରେ ଶୋଇଥିବା ବେଳେ ବିଳମ୍ବିତ ରାତିରେ ବିଷାକ୍ତ ସାପଟିଏ କାମୁଡ଼ି ଦେଇଥିଲା। ମହିଳାଙ୍କ ଚିତ୍କାର ଶୁଣି ସାହି ପଡିଶା ଲୋକ ଏକାଠି ହୋଇ ସାପକୁ ଖୋଜିଥିଲେ। ପରେ ସାପକୁ ଉଦ୍ଧାର କରି ଏକ ପ୍ଲାଷ୍ଟିକ୍ ଡବାରେ ରଖିଥିଲେ। କିନ୍ତୁ ସେପଟେ ମହିଳାଜଣଙ୍କ ଗୁରୁତର ହେବାରୁ ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି ହୋଇଥିଲେ। ପରେ ଅବସ୍ଥା ସଂକଟାପନ୍ନ ହେବାରୁ ତାଙ୍କୁ ଖୋର୍ଦ୍ଧା ସଦର ମେଡିକାଲକୁ ସ୍ଥାନାନ୍ତର କରାଯାଇଥିଲା। କିନ୍ତୁ ଚିକିତ୍ସାଧୀନ ଅବସ୍ଥାରେ ମହିଳାଙ୍କ ମୃତ୍ୟୁ ହୋଇଥିଲା।

ସେପଟେ ମହିଳାଙ୍କ ସ୍ୱାମୀ ଶ୍ରାବଣୀ ଜଳ ଭାର ଲାଗି ଯାଇଥିବା ଜଣାପଡିଛି।

ସୀତାରାମ ଅଗ୍ରୱାଲ

ଚିଲିକା/ଟାଙ୍ଗୀ: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଞ୍ଚଳରେ ଚୋରା ମଦ କାରବାର ବୃଦ୍ଧି ପାଉଥିବା ବେଳେ ଅବକାରୀ ବିଭାଗ ଚଢ଼ାଉ ଜାରି ରଖିଛି। ଜିଲ୍ଲାପାଳ କେ. ସୁଦର୍ଶନ ଚକ୍ରବର୍ତ୍ତୀ ଓ ଅବକାରୀ ଅଧିକ୍ଷକ ଝସକେତନ ବରିହାଙ୍କ ନିର୍ଦ୍ଦେଶକ୍ରମେ ଆଜି ପୂର୍ବାହ୍ନରୁ ଅପରାହ୍ନ ପର୍ଯ୍ୟନ୍ତ ଅବକାରୀ ବିଭାଗ ବାଣପୁର ଥାନା ଅନ୍ତର୍ଗତ ନୀଳାଦ୍ରିପ୍ରସାଦ ଓ ଦାମିଆ ବରବରା ଅଞ୍ଚଳରେ ଚଢ଼ାଉ କରି ଚାରି ଜଣ ଅଭିଯୁକ୍ତଙ୍କୁ ଗିରଫ କରିଥିବା ବେଳେ ଟାଙ୍ଗୀ ଥାନା ଅଞ୍ଚଳରୁ ଜଣେ ଅଭିଯୁକ୍ତଙ୍କୁ ଗିରଫ କରିଛି।

ଟାଙ୍ଗୀ ରେଞ୍ଜ ଅବକାରୀ ଇନ୍ସପେକ୍ଟର ଆଲୋକ ପ୍ରଧାନ, ବାଲୁଗାଁ ଅବକାରୀ ଅଧିକାରୀ ବି. ମନୋଜ କୁମାର ଓ କଟକ ଅବକାରୀ ଫ୍ଲାଇଙ୍ଗ ସ୍କ୍ୱାର୍ଡ ଏସଆଇ ରଜନୀ ମିଞ୍ଜ, ନୀଳାଦ୍ରି ବିହାରୀ ମିଶ୍ର ଓ ଟିମ ଉକ୍ତ ଚଢ଼ାଉ ରେ ସାମିଲ ଥିଲେ। ଚଢ଼ାଉରେ ସମୁଦାୟ ୧୦୦୦ ଲିଟର ପୋଚ ଏବଂ ୪୧୦ ଲିଟର ଦେଶୀ ମଦ ଜବତ ହୋଇଥିବା ବେଳେ ଟାଙ୍ଗୀକୁ ମିଶାଇ ସମୁଦାୟ ୫ ଅଭିଯୁକ୍ତ ଗିରଫ ହୋଇଛନ୍ତି। ଗିରଫ ଅଭିଯୁକ୍ତ ମାନଙ୍କ ବିରୁଦ୍ଧରେ ୫ ଗୋଟି ମାମଲା ରୁଜୁ କରାଯାଇ କୋର୍ଟଚାଲାଣ କରାଯାଇଥିବାର ସୂଚନା ମିଳିଛି।

ସୀତାରାମ ଅଗ୍ରୱାଲ

ଟାଙ୍ଗୀ: ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଅନ୍ତର୍ଗତ ରତ୍ନମାଳୀ ସାହିରେ ଏକ ଅଭାବନୀୟ ଘଟଣା ଘଟିଯାଇଛି। ଶଙ୍ଖା ସିନ୍ଦୁର ପୋଖରୀରେ ଜନୈକ ଯୁବକଙ୍କ ମୃତଦେହ ଭାସୁଥିବାର ଦେଖିବାକୁ ମିଳିଛି। ମୃତ ଯୁବକଙ୍କ ନାମ ଅମରଜିତ୍ ପଟ୍ଟନାୟକ (୨୮) ହୋଇଥିବା ବେଳେ ତାଙ୍କ ଘର ଟାଙ୍ଗୀ ରତ୍ନମାଳୀ ସାହିରେ ବୋଲି ଜଣାପଡିଛି।

ସୂଚନା ଅନୁଯାୟୀ, ରତ୍ନମାଳୀ ସାହିରେ ଥିବା ଶଙ୍କା ସିନ୍ଦୁର ପୋଖରୀକୁ ସ୍ଥାନୀୟ ଲୋକେ ଗାଧୋଇବାକୁ ଯାଇଥିବା ବେଳେ ଏକ ଶବ ଭାସୁଥିବା ଦେଖିବାକୁ ପାଇଥିଲେ। ଏ ନେଇ ଟାଙ୍ଗୀ ଅଗ୍ନିଶମ ବାହୀନୀକୁ ଜଣାଇଥିଲେ। ଅଗ୍ନିଶମ ବାହୀନୀ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିଥିଲେ। ଯୁବକଙ୍କ ପରିଚୟ ମିଳିବା ପରେ ତୁରନ୍ତ ମୃତକଙ୍କ ପିତାଙ୍କୁ ସୂଚନା ଦେଇଥିଲେ। ପିତା ତାରାକାନ୍ତ ପଟ୍ଟନାୟକ ଘଟଣା ସ୍ଥଳରେ ପହଂଚି ମୃତକଙ୍କ ଶବକୁ ଚିହ୍ନଟ କରିଥିଲେ। ହେଲେ ମୃତ୍ୟୁର କାରଣ ଅସ୍ପଷ୍ଟ ଥିବା ବେଳେ ପୋଲିସ ଏହାର ତଦନ୍ତ ଆରମ୍ଭ କରିଦେଇଛି।

ତେବେ ଗତ କାଲି ଠାରୁ ଯୁବକଜଣକ ନିଖୋଜ ଥିଲେ। ଯୁବକଙ୍କ ଘରେ ଶୌଚାଳୟର ସୁବିଧା ଥିବା ସତ୍ତ୍ୱେ ସେ ପୋଖରୀକୁ କାହିଁକି ଯାଇଥିଲେ, ତାହାର କାରଣ ଜଣାପଡିନାହିଁ। ପୋଲିସ୍ ଏ ନେଇ ତଦନ୍ତ ଆରମ୍ଭ କରିଛି।

ଟାଙ୍ଗୀ: ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା ଝରିଆ ଗ୍ରାମରେ ଚାଷ ଜମିରେ ହଳ କରୁଥିବା ବେଳେ ଆଜି ଜଣେ ଚାଷୀ ଗୁରୁତର ହୋଇପଡ଼ିଥିଲେ। ଗୁରୁତର ଅବସ୍ଥାରେ ତାଙ୍କୁ ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ପରୀକ୍ଷା ନୀରିକ୍ଷା ପରେ ଡାକ୍ତର ଚାଷୀଙ୍କୁ ମୃତ ଘୋଷଣା କରିଥିଲେ।

ମୃତ୍ୟୁର କାରଣ ଅସ୍ପଷ୍ଟ ରହିଥିବା ବେଳେ ମୃତ ଚାଷୀଙ୍କର ନାମ ଅଜୟ ପଲାଇ ( ୪୩) ବୋଲି ଜଣାପଡିଛି। ବର୍ତ୍ତମାନ ଶବ ଜବତ କରି ତଦନ୍ତ କରୁଛି ପୋଲିସ୍।

ନିଜ ଚାଷ ଜମିରେ ଖରଡି ଧାନ ବୁଣିବା ପାଇଁ ଅଜୟ ଟ୍ରାକ୍ଟର ସହ ଧାନ ନେଇ ନିଜ ଚାଷ ଜମିକୁ ଯାଇଥିଲେ। ଚାଷ ଜମିରେ ହଳ କରିସାରି ଧାନ ବୁଣୁଥିବା ବେଳେ ସେ ହଠାତ୍ ଗୁରୁତର ହୋଇ ଅସୁସ୍ଥ ହୋଇ ପଡିଥିଲେ। ଅଜୟ ଜଣେ ଗରୀବ ଚାଷୀ ହୋଇଥିବାରୁ ତାଙ୍କ ପରିବାରକୁ ସରକାରୀ ସହାୟତା ଦେବାକୁ ସାଧାରଣରେ ଦାବି ହେଉଛି।

ସୀତାରାମ ଅଗ୍ରୱାଲ

ଟାଙ୍ଗୀ: ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା କୟଥପଲ୍ଲା ସ୍ଥିତ ଫାଲକନ ଫିଡ଼ସରେ ଜଣେ କାର୍ଯ୍ୟରତ ଶ୍ରମିକ ଆତ୍ମହତ୍ୟା କରିଥିବାର ଖବର ହସ୍ତଗତ ହୋଇଛି। ଶ୍ରମିକଙ୍କ ନାମ ଅନିରୁଦ୍ଧ ସ୍ୱାଇଁ (୩୩)। ମୃତକଙ୍କ ଘର ଜଗତସିଂହପୁର ବୋଲି ଜଣାପଡିଛି।

ତେବେ କୌଣସି କାରଣରୁ ଗତକାଲି ରାତିରେ ଅନିରୁଦ୍ଧ ତାଙ୍କ କୋଠରୀ ଝରକାରେ ଦଉଡି ଲଗାଇ ଆତ୍ମହତ୍ୟା କରିଥିବାର ସନ୍ଦେହ ହେଉଛି। ତେବେ ଖବର ପାଇ ଟାଙ୍ଗୀ ପୋଲିସ ଘଟଣାସ୍ଥଳରେ ପହଞ୍ଚିଥିବାବେଳେ ଅଦ୍ୟାବଧି ମୃତକଙ୍କ ପରିବାର ପକ୍ଷରୁ ଏ ନେଇ କୌଣସି ଅଭିଯୋଗ ହୋଇନଥିବାର ଟାଙ୍ଗୀ ଆଇଆଇସି ଦିଗବିଜୟ ବିଶ୍ୱାଳ କହିଛନ୍ତି।

ସୀତାରାମ ଅଗ୍ରୱାଲ

ଟାଙ୍ଗୀ: ଆଜି ଟାଙ୍ଗୀ ଅବକାରୀ ବିଭାଗ ଖୋର୍ଦ୍ଧା ଜିଲ୍ଲା ଜଙ୍କିଆ ଥାନା ଅଞ୍ଚଳରେ ଚଢ଼ାଉ କରି ୩ ଲକ୍ଷ ଟଙ୍କାର ବ୍ରାଉନ ସୁଗାର ଜବତ କରିଛି। ସୂଚନା ମୁତାବକ ଛଣଗିରି ଠାରେ ବ୍ରାଉନ ସୁଗାର କାରବାର ଚାଲୁଥିବାର ଖବର ପାଇ ଟାଙ୍ଗୀ ରେଞ୍ଜ ଅବକାରୀ ଇନ୍ସପେକ୍ଟର ଆଲୋକ ପ୍ରଧାନ ଓ ଟିମ ସମ୍ପୃକ୍ତ ସ୍ଥାନରେ ଚଢ଼ାଉ କରିଥିଲେ।

ଚଢ଼ାଉ ରେ ଛଣଗିରି ଗ୍ରାମର ସଞ୍ଜୟ ମହାପାତ୍ର(35) ଗିରଫ ହୋଇଥିବା ବେଳେ ତାଙ୍କ ନିକଟରୁ 30 ଗ୍ରାମ ବ୍ରାଉନ ସୁଗାର ଜବତ ହୋଇଛି ଯାହାର ଆନୁମାନିକ ମୂଲ୍ୟ ତିନି ଲକ୍ଷ ଟଙ୍କା ହେବ। ଗିରଫ ଅଭିଯୁକ୍ତଙ୍କ ବିରୁଦ୍ଧରେ ଏକ ମାମଲା ରୁଜୁ କରାଯାଇ କୋର୍ଟଚାଲାଣ କରାଯାଇଛି।