ସମୀକ୍ଷା ବ୍ୟୁରୋ
କଳାହାଣ୍ଡି, ୨୧/୧୨: ଦେଶରେ ପ୍ରତ୍ୟେକ ଘରକୁ ବିଜୁଳି ପହଞ୍ଚାଇବାର ଲକ୍ଷ୍ୟ ନେଇ ଆରମ୍ଭ କରାଯାଇଥିବା ସୌଭାଗ୍ୟ ଯୋଜନା କଳାହାଣ୍ଡିରେ ଦିଗହରା ହୋଇଛି। ଦୀର୍ଘ ଦୁଇ ବର୍ଷ ହେବ ଟ୍ରାନ୍ସଫର୍ମର ବସାଯାଇଥିଲେ ମଧ୍ୟ ଆଜି ପର୍ଯ୍ୟନ୍ତ ବିଦ୍ୟୁତ ସଞ୍ଜୋଗ ହୋଇ ପାରିନାହିଁ। ଏପରି ଘଟଣା ଦେଖିବାକୁ ମିଳିଛି କର୍ଲାମୁଣ୍ଡା ବ୍ଲକର ଗଜବାହଲ ପଞ୍ଚାୟତର ଧଅଁରାଖମନ ଗ୍ରାମରେ। ଦୁଇବର୍ଷ ତଳୁ ଗାଁରେ ଟ୍ରାନ୍ସଫର୍ମର ବସାଯିବା ସହିତ ତାରଟଣା ସରିଥିଲେ ମଧ୍ୟ ଆଜିବି ଅନ୍ଧାରରେ ରହିଛି ଏହି ଗ୍ରାମ। ଗ୍ରାମରେ ଅଧିକାଂଶ ଲୋକ ଜନଜାତି ବର୍ଗର ରହିଥିବା ବେଳେ ସମୁଦାୟ ୮୧ ପରିବାର ବସବାସ କରୁଥିବା ବେଳେ ଗ୍ରାମର ଜନସଂଖ୍ୟା ପାଖାପାଖି ଚାରି ଶହ ରହିଛି। ଚାଷ ଉପରେ ଅଧିକାଂଶ ଲୋକ ନିର୍ଭରଶୀଳ ହୋଇଥିବା ବେଳେ ବିନା ବିଦ୍ୟୁତ୍ରେ ସାଧାରଣ ଲୋକ ବିଭିନ୍ନ ଅଭାବ ଅସୁବିଧାର ସମ୍ମୁଖୀନ ହେଉଛନ୍ତି। ୨୦୦୫-୦୬ ମସିହାରେ ଏକ ୧୦ କେଭି ଟ୍ରାନ୍ସଫର୍ମର ଜରିଆରେ ୪୫ଟି ପରିବାରକୁ ବିଦ୍ୟୁତ ସଞ୍ଜୋଗ ଦିଆଯାଇଥିବା ବେଳେ ଲୋକ ଲୋ ଭୋଲ୍ଟେଜ୍ର ସମ୍ମୁଖୀନ ହୋଇଛନ୍ତି। ଏହି ଟ୍ରାନ୍ସଫର୍ମରଟି ଚାର୍ଜ ହୋଇଗଲେ ଗ୍ରାମରେ ରହିଥିବା ଲୋ ଭୋଲ୍ଟେଜ୍ ସମସ୍ୟା ଦୂର ହେବ। ଏ ନେଇ ଜିଲ୍ଲାପାଳ ଏବଂ ବିଭାଗୀୟ ଅଧିକାରୀଙ୍କୁ ବାରମ୍ବାର ଅନୁରୋଧ କରାଯାଇଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ନିଆଯାଇନଥିବା ଜଣାପଡିଛି। ଖୁବ୍ ଶୀଘ୍ର ଧଅଁରାଖମନ ଗ୍ରାମକୁ ସୌଭାଗ୍ୟ ଯୋଜନାରେ ବିଦ୍ୟୁତ୍ ସଂଯୋଗ କରିବା ପାଇଁ ସାଧାରଣରେ ଦାବି ହୋଇଛି।