ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ମାର୍କସ୍ବାଦର ମହାନ୍ ରୂପକାର, କାର୍ଲମାର୍କସ୍ଙ୍କ ସାତ୍ତ୍ୱିକ ବନ୍ଧୁ ଏବଂ ମହନ୍ ଦାର୍ଶନିକ ଫ୍ରେଡ଼୍ରିକ୍ ଏଙ୍ଗେଲସ୍ଙ୍କର ୨୦୦ତମ ଜନ୍ମ ଜୟନ୍ତୀ ଉପଲକ୍ଷେ ଏକ ଆଲୋଚନା ସଭା ମାର୍କସବାଦୀ କମ୍ୟୁନିଷ୍ଟ ପାର୍ଟିର ଗଂଜାମ ଜିଲ୍ଲା କମିଟି ତରଫରୁ ବ୍ରହ୍ମପୁର ସ୍ଥିତ ଶହୀଦ୍ ଲକ୍ଷ୍ମଣ ନାୟକ କମ୍ୟୁନିଟ୍ ହଲ୍ଠାରେ ଅନୁଷ୍ଠିତ ହୋଇଯାଇଛି। ଏଥିରେ ପାର୍ଟିର ଜିଲ୍ଲା ସଂପାଦକ କୈଳାସ ଷଡ଼ଙ୍ଗୀ ସଭାପତିତ୍ୱ କରିଥିଲେ। ପାର୍ଟିର ରାଜ୍ୟ ସଂପାଦକ ଅଳି ପଟ୍ଟନାୟକ ମୁଖ୍ୟଅତିଥି ଭାବେ ଯୋଗ ଦେଇ ଆଜିକାର ଦିନରେ ମାର୍କ ଓ ଏଙ୍ଗେଲସ୍ଙ୍କ ତତ୍ତ୍ୱର ପ୍ରାସଙ୍ଗିକତା ସଂପର୍କରେ ଶ୍ରମିକ ଶ୍ରେଣୀ ଅଧିକ ଅନୁଧ୍ୟାନ କରିବା ଆବଶ୍ୟକ ବୋଲି କହିଥିଲେ। ପୁଂଜିବାଦୀ, ସାମ୍ରାଜ୍ୟବାଦୀ ଶୋଷଣର ବିଲୋପ ଘଟାଇବାକୁ ହେଲେ ଶ୍ରମିକ ଶ୍ରେଣୀକୁ ସଚେତନତାର ସହ ସାମାଜିକ ବ୍ୟବସ୍ଥାର ପରିବର୍ତ୍ତନ ପାଇଁ ଆଗେଇ ଆସିବାକୁ ଆହ୍ୱାନ ଦେଇଥିଲେ। ପାର୍ଟିର ଜିଲ୍ଲା ନେତୃବୃନ୍ଦ ଯୁଧିଷ୍ଠିର ବେହେରା, ରାମଚନ୍ଦ୍ର ନାୟକ, ବସନ୍ଦ ନନ୍ଦ, ବିଦ୍ୟାଧର ଜେନା, ଦିଲୀପ ଛୋଟରାୟଙ୍କ ସମେତ ଶତାଧିକ କର୍ମୀ ଏହି ଆଲୋଚନାରେ ଯୋଗ ଦେଇଥିଲେ।
