ବାଲୁଗାଁ: ଚିଲିକା ବ୍ଲକ ହରିପୁର ପଞ୍ଚାୟତ ନୂଆପଟଣା ସ୍ଥିତ ଉତ୍ତରାୟଣୀ ମନ୍ଦିର ପ୍ରାଙ୍ଗଣରେ ରବିବାର ଦିନ ଚିଲିକା ନିର୍ବାଚନ ମଣ୍ଡଳୀ ଜାତୀୟ କଂଗ୍ରେସ ପକ୍ଷରୁ ଏକ ସାଙ୍ଗଠନିକ ବୈଠକ ଅନୁଷ୍ଠିତ ହୋଇଯାଇଛି। ଖୋର୍ଦ୍ଧା ଜିଲ୍ଲା ମହିଳା କଂଗ୍ରେସ ସମ୍ପାଦିକା ମିନାକ୍ଷୀ ପ୍ରଧାନଙ୍କ ନେତୃତ୍ୱରେ ଉକ୍ତ ବୈଠକରେ ଦୁଇ ଶହରୁ ଉର୍ଦ୍ଧ୍ବ କର୍ମୀ ଯୋଗ ଦେଇଥିଲେ।
ଉକ୍ତ ବୈଠକରେ ଚିଲିକା ନିର୍ବାଚନ ମଣ୍ଡଳୀ ପୂର୍ବତନ ଯୁବ କଂଗ୍ରେସ ସଭାପତି ବିପିନି ବିହାରୀ ବାରିକ, ସାଧାରଣ ସମ୍ପାଦକ କୁଳମଣି ସାହୁ ସମେତ ଶତାଧିକ ମହିଳା ଓ ପୁରୁଷ କର୍ମୀମାନେ ତୃଣମୂଳ ସ୍ତରରୁ ଚିଲିକା ନିର୍ବାଚନ ମଣ୍ଡଳୀରେ କଂଗ୍ରେସକୁ ମଜଭୁତ କରିବା ପାଇଁ ସଂକଳ୍ପ ନେଇଥିଲେ। ରାଜ୍ୟରେ ବିଜେପି ଓ ବିଜେଡି ଯେଉଁଭଳି ଭାବେ ମନମୁଖୀ ଶାସନ ଚଲାଇ ଆସିଛି, ସାଧାରଣ ଲୋକଙ୍କୁ ଲୁଟୁଛି, ତାହାର ମୂଳ ଉତ୍ପାଟନ କରିବାସହ ଜନତାଙ୍କ ନିକଟତର ହେବାକୁ ମହିଳା ସମ୍ପାଦିକା ଶ୍ରୀମତୀ ପ୍ରଧାନ କହିଛନ୍ତି। ଆଗାମୀ ଦିନରେ ଚିଲିକା ନିର୍ବାଚନ ମଣ୍ଡଳୀରେ କଂଗ୍ରେସ ତାହାର ରାଜ୍ୟ ସରକାରଙ୍କୁ ନିଶ୍ଚିତ ଭାବରେ ଜବାବ ଦେବ ବୋଲି କର୍ମୀମାନେ କହିଛନ୍ତି।
ଚିଲିକା ନିର୍ବାଚନ ମଣ୍ଡଳୀ ୩୪ ଗୋଟି ଗ୍ରାମ ପଞ୍ଚାୟତ ମଧ୍ୟରୁ ୧୩ଟି ଗ୍ରାମ ପଞ୍ଚାୟତରୁ ଶତାଧିକ ଜନସାଧାରଣ କଂଗ୍ରେସ ସାମିଲ ହୋଇ ରାଜ୍ୟ ସରକାରଙ୍କ ବିରୋଧରେ ନାରାବାଜି ଡ଼ାକରା ଦେଇଛନ୍ତି। ହରିପୁର, ସୋରଣ, ମାନସିଂହପୁର, ଆଙ୍କୁଲା, ମୋରାମୋରି, ହାଟବରଢ଼ୀହ, ବିରିବାଡ଼ି, ନନ୍ଦପୁର, ନାଚୁଣି, ବଉଳାବନ୍ଧ, ନିଳାଦ୍ରୀପ୍ରସାଦ ଆଦି ଗ୍ରାମପଞ୍ଚାୟତ କର୍ମୀମାନେ ଉପସ୍ଥିତ ରହି ଆଗକୁ ସଙ୍ଗଠନ ଜୋରଦାର ହେବ ବୋଲି ଦୃଢୋକ୍ତି ପ୍ରକାଶ କରିଛନ୍ତି।