Categories
ଆଜିର ଖବର ଜାତୀୟ ଖବର ସ୍ବାସ୍ଥ୍ୟ

ଗତ ୨୪ ଘଣ୍ଟା ମଧ୍ୟରେ ଭାରତରେ ୩ ହଜାର ୧୧ ଟି ନୂଆ ମାମଲା ଚିହ୍ନଟ

ନୂଆଦିଲ୍ଲୀ: ଗତ ୨୪ ଘଣ୍ଟା ମଧ୍ୟରେ ଭାରତରେ ୩ ହଜାର ୧୧ ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି। ଯାହା ପରେ ଦେଶରେ ମୋଟ ସଂକ୍ରମିତ ସଂଖ୍ୟା ୪ କୋଟି ୪୫ ଲକ୍ଷ ୯୭ ହଜାର ୪୯୮ କୁ ବୃଦ୍ଧି ପାଇଥିବାବେଳେ ଚିକିତ୍ସିତ ରୋଗୀଙ୍କ ସଂଖ୍ୟା ୩୬ ହଜାର ୧୨୬ କୁ ହ୍ରାସ ପାଇଛି। କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ଵାରା ଆଜି ସକାଳ ୮ ଟାରେ ପ୍ରକାଶିତ ତଥ୍ୟ ଅନୁଯାୟୀ ଦେଶରେ ସଂକ୍ରମଣ ହେତୁ ୨୮ ଜଣଙ୍କର ମୃତ୍ୟୁ ପରେ ମୋଟ ମୃତ୍ୟୁ ସଂଖ୍ୟା ୫ ଲକ୍ଷ ୨୮ ହଜାର ୭୧୦ କୁ ବୃଦ୍ଧି ପାଇଛି।

Categories
ଆଜିର ଖବର ଜାତୀୟ ଖବର ସ୍ବାସ୍ଥ୍ୟ

ଗତ ୨୪ ଘଣ୍ଟା ମଧ୍ୟରେ ଦେଶରେ ୪ ହଜାର ୨୭୨ ଆକ୍ରାନ୍ତ ଚିହ୍ନଟ, ଆହୁରି ୨୭ ମୃତ

ନୂଆଦିଲ୍ଲୀ: ଗତ ୨୪ ଘଣ୍ଟା ମଧ୍ୟରେ ଭାରତରେ ୪ ହଜାର ୨୭୨ ଆକ୍ରାନ୍ତ ଚିହ୍ନଟ ହୋଇଛନ୍ତି, ଯାହା ପରେ ଦେଶରେ ମୋଟ ଆକ୍ରାନ୍ତଙ୍କ ସଂଖ୍ୟା ୪ କୋଟି ୪୫ ଲକ୍ଷ ୮୩ ହଜାର ୩୬୦ କୁ ବୃଦ୍ଧି ହୋଇଛି। କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ଵାରା ଆଜି ସକାଳ ୮ ଟାରେ ପ୍ରକାଶିତ ତଥ୍ୟ ଅନୁଯାୟୀ ଦେଶରେ ସଂକ୍ରମଣ ହେତୁ ୨୭ ଜଣଙ୍କ ମୃତ୍ୟୁ ହୋଇଛି। ଯାହାପରେ ମୋଟ ମୃତ୍ୟୁ ସଂଖ୍ୟା ୫ ଲକ୍ଷ ୨୮ ହଜାର ୬୧୧ କୁ ବୃଦ୍ଧି ପାଇଛି।

Categories
ଆଜିର ଖବର ଖେଳ ଜାତୀୟ ଖବର

କୁଲଦୀପଙ୍କ ହ୍ୟାଟ୍ରିକ୍ ପରେ ପୃଥ୍ବୀ ଶ’ଙ୍କ ଚୌକା ଓ ଛକା ବର୍ଷା, ସାମସନଙ୍କ ନେତୃତ୍ଵରେ ସିରିଜ୍ ଜିତିଲା ଭାରତ

ନୂଆଦିଲ୍ଲୀ: ଚେନ୍ନାଇର ଏମ ଚିଦାମ୍ବରମ୍ ଷ୍ଟାଡିୟମରେ ଖେଳାଯାଇଥିବା ଦ୍ୱିତୀୟ ଅଣଆନୁଷ୍ଠାନିକ ଦିନିକିଆରେ ନ୍ୟୁଜିଲ୍ୟାଣ୍ଡ-ଏକୁ ଭାରତ-ଏ ପରାସ୍ତ କରିଛି। ଏହା ସହ ଭାରତ-ଏ ୩ ଟି ଦିନିକିଆ ସିରିଜରେ ୨-୦ ରେ ଅଗ୍ରଣୀ ହାସଲ କରିଛି। ସଞ୍ଜୁ ସାମସନଙ୍କ ନେତୃତ୍ୱରେ ଇଣ୍ଡିଆ ଏ ପ୍ରଥମ ଦିନିକିଆରେ ୭ ୱିକେଟ୍ ରେ ଜିତିଥିଲା। ତୃତୀୟ ମ୍ୟାଚ୍ ସେପ୍ଟେମ୍ବର ୨୭ ତାରିଖରେ ଚେନ୍ନାଇରେ ମଧ୍ୟ ଖେଳାଯିବ।

ଭାରତ-ଏ ବିଜୟରେ ଦୁଇ ଖେଳାଳି ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ଯେଉଁଠାରେ କୁଲଦୀପ ଯାଦବ ବଲରେ ପ୍ରାଧାନ୍ୟ ବିସ୍ତାର କରିଥିଲେ, ପୃଥ୍ବୀ ଶ’ ବ୍ୟାଟ୍ ରେ କମାଲ କରିଥିଲେ। କୁଲଦୀପ ହ୍ୟାଟ୍ରିକ୍ ସହ ମ୍ୟାଚ୍‌ରେ ୪ ୱିକେଟ୍ ନେଇଥିଲେ। ଏଥିସହିତ ଶ’ ଇଣ୍ଡିଆ-ଏ ଇନିଂସ ଆରମ୍ଭ କରି ମାତ୍ର ୨୬ ବଲରେ ଅର୍ଦ୍ଧଶତକ ହାସଲ କରିଥିଲେ। ସେ ୧୧ ଟି ଚୌକା ଓ ୩ ତି ଛକା ସହାୟତାରେ ୪୮ ବଲରେ ୭୭ ରନ୍ ସ୍କୋର କରିବା ପରେ ଆଉଟ୍ ହୋଇଥିଲେ। ଚଳିତ ବର୍ଷ ଅଣ୍ଡର-୧୯ ବିଶ୍ୱକପ ଜିତିଥିବା ଭାରତୀୟ ଦଳର ସଦସ୍ୟ ଥିବା ରାଜା ବାୱା ଏହି ମ୍ୟାଚରେ ଡେବ୍ୟୁ କରିଥିଲେ।

ନ୍ୟୁଜିଲ୍ୟାଣ୍ଡ-ଏ ଟସ୍ ଜିତି ମ୍ୟାଚ୍‌ରେ ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ଚାଡ ବୋଜ ଏବଂ ରଚିନ୍ ରବିନ୍ଦ୍ର ନ୍ୟୁଜିଲ୍ୟାଣ୍ଡ ଏ ପାଇଁ ପାଳି ଆରମ୍ଭ କରିଥିଲେ। କିନ୍ତୁ, ୩୨ ରନ୍ ସ୍କୋରରେ ଚାଡକୁ ଉମ୍ରାନ ମଲିକ ଆଉଟ କରିଥିଲେ। ଏହା ପରେ ଡେନ୍ କ୍ଲିଭର ମଧ୍ୟ ଶୀଘ୍ର ପ୍ୟାଭିଲିୟନ ଫେରିଥିଲେ। କିନ୍ତୁ, ରବିନ୍ଦ୍ର ଗୋଟିଏ ମୁଣ୍ଡରେ ଜମି ରହିଥିଲେ ଏବଂ ସେ ତାଙ୍କର ଅର୍ଦ୍ଧ ଶତକ ପୂରଣ କରିଥିଲେ। ତେବେ ୬୧ ରନର ବ୍ୟକ୍ତିଗତ ସ୍କୋରରେ ଋଷି ଧାୱନ ତାଙ୍କୁ ଆଉଟ କରିଥିଲେ।

ଯେତେବେଳେ ରାଚିନ୍ ଆଉଟ୍ ହୋଇଥିଲେ, ନ୍ୟୁଜିଲ୍ୟାଣ୍ଡ-ଏ ୩ ୱିକେଟ୍ ହରାଇ ୧୦୬ ରନ୍ କରିଥିଲା। ଏହା ପରେ ଜୋ କାର୍ଟର ୮୦ ବଲରେ ୭୨ ରନର ଇନିଂସ ଖେଳିଥିଲେ। ସେ ମଧ୍ୟମ ଏବଂ ନିମ୍ନ କ୍ରମରେ କୌଣସି ବ୍ୟାଟ୍ସମ୍ୟାନଙ୍କ ଠାରୁ ସମର୍ଥନ ପାଇନଥିଲେ। ଚାଇନାମ୍ୟାନ ସ୍ପିନର କୁଲଦୀପ ଯାଦବ ହ୍ୟାଟ୍ରିକ୍ ନେଇ ନ୍ୟୁଜିଲ୍ୟାଣ୍ଡ ଏ ବ୍ୟାଟିଂକ୍ରମକୁ ସମ୍ପୂର୍ଣ୍ଣ ଭାଙ୍ଗି ଦେଇଥିଲେ।

ଅନ୍ତିମ ତିନିଟି ବଲରେ ଲୋଗାନ୍ ୱାନ୍ ବିକ, ଜୋ ୱାକର ଅରେର ଏବଂ ଜ୍ୟାକବ ଡଫିଙ୍କୁ ଆଉଟ କରି କୁଲଦୀପ ନ୍ୟୁଜିଲ୍ୟାଣ୍ଡ ଏ ଇନିଂସର ୪୭ ତମ ଓଭରରେ ନିଜର ହ୍ୟାଟ୍ରିକ୍ ପୂରଣ କରିଥିଲେ। ନ୍ୟୁଜିଲ୍ୟାଣ୍ଡ-ଏ ଦଳ ସମ୍ପୂର୍ଣ୍ଣ ୫୦ ଓଭର ଖେଳି ପାରି ନଥିଲା ଏବଂ ୪୭ ଓଭରରେ ୨୧୯ ରନ୍ କରି ସମସ୍ତ ୱିକେଟ ହରାଇଥିଲା। ୧୦ ଓଭରରେ ୫୧ ରନ୍ ଦେଇ କୁଲଦୀପ ଯାଦବ ୪ ୱିକେଟ୍ ନେଇଥିଲେ। ତାଙ୍କ ବ୍ୟତୀତ ଋଷି ଧାୱନ ମଧ୍ୟ ୨ ଟି ୱିକେଟ୍ ନେଇଥିଲେ।

Categories
ଆଜିର ଖବର ଖେଳ ଜାତୀୟ ଖବର

ଆଜି ଫାଇନାଲ: ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଖେଳାଯିବ ଅନ୍ତିମ ଟି-୨୦, ଜାଣନ୍ତୁ ପ୍ଲେଇଂ ଏକାଦଶ

ହାଇଦ୍ରାବାଦ: ଆଜି ହାଇଦ୍ରାବାଦର ରାଜୀବ ଗାନ୍ଧୀ ଅନ୍ତର୍ଜାତୀୟ ଷ୍ଟାଡିୟମରେ ଭାରତ ଏବଂ ଅଷ୍ଟ୍ରେଲିଆର ଦଳ ମୁହାଁମୁହିଁ ହେବେ। ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜର ଏହି ଶେଷ ମ୍ୟାଚ୍ ସନ୍ଧ୍ୟା ୭ ଟାରୁ ଆରମ୍ଭ ହେବ। ଏହି ସିରିଜରେ ଉଭୟ ଦଳ ବର୍ତ୍ତମାନ ୧-୧ ରେ ବରାବର ଅଛନ୍ତି। ତେଣୁ ହାଇଦ୍ରାବାଦରେ ଅନୁଷ୍ଠିତ ହେବାକୁ ଥିବା ଏହି ମ୍ୟାଚର ଫଳାଫଳ ଦ୍ୱାରା ସିରିଜର ବିଜେତା ଘୋଷିତ ହେବ।

ଏହି ସିରିଜର ପ୍ରଥମ ମ୍ୟାଚ୍ ଭାରତୀୟ ଦଳ ହରାଇଥିଲା। ମୋହାଲିରେ ଭାରତୀୟ ଦଳ ୨୦୮ ରନ୍ ର ବିରାଟ ସ୍କୋରକୁ ମଧ୍ୟ ରକ୍ଷା ପାରିନଥିଲା। ତେବେ ଦ୍ୱିତୀୟ ମ୍ୟାଚ୍‌ରେ ଟିମ୍ ଇଣ୍ଡିଆ ପ୍ରତ୍ୟାବର୍ତ୍ତନ କରି ସିରିଜକୁ ୧-୧ରେ ସମାନ କରିଥିଲା। ସିରିଜର ଏହି ଦ୍ୱିତୀୟ ମ୍ୟାଚ୍ ବର୍ଷା ଦ୍ୱାରା ପ୍ରଭାବିତ ହୋଇଥିଲା ଯେଉଁଥିରେ କେବଳ ୮-୮ ଓଭର ଖେଳାଯାଇଥିଲା। ଶେଷ ଓଭରରେ ୬ ୱିକେଟ୍ ରେ ଭାରତ ଜିତିଥିଲା।

ହେଡ୍ ଟୁ ହେଡ୍: ଏପର୍ଯ୍ୟନ୍ତ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ୨୫ ଟି -୨୦ ଆନ୍ତର୍ଜାତୀୟ ଖେଳାଯାଇଛି। ସେଥିମଧ୍ୟରୁ ଭାରତ ଅଧିକ ଜିତିଛି। ଭାରତ ୧୪ ଟି ମ୍ୟାଚ୍ ଜିତିଥିବାବେଳେ ଅଷ୍ଟ୍ରେଲିଆ ୧୦ ଟି ମ୍ୟାଚ୍ ଜିତିଛି। ଗୋଟିଏ ମ୍ୟାଚ୍ ଫଳାଫଳ ଶୂନ୍ୟ ରହିଛି।

ପିଚ୍ ତାପମାତ୍ରା: ଗତ ତିନିବର୍ଷ ଧରି ହାଇଦ୍ରାବାଦରେ କୌଣସି ଆନ୍ତର୍ଜାତୀୟ ତି-୨୦ ମ୍ୟାଚ୍ ହୋଇନାହିଁ। ତେବେ ଏହା ପୂର୍ବରୁ ଟି -୨୦ ମ୍ୟାଚ୍‌ରେ ଭଲ ରନ୍ ସ୍କୋର କରାଯାଇଛି। ଏଥର ମଧ୍ୟ ଏଠାରେ ବଡ ସ୍କୋର ହେବା ସମ୍ଭାବନା ଅଛି। ପିଚରେ ଘାସ ନାହିଁ, ତେଣୁ ବୋଲରମାନଙ୍କୁ ଏଠାରେ ରନ୍ ରୋକିବା କଷ୍ଟକର ହୋଇପାରେ।

ଟିମ୍ ଇଣ୍ଡିଆ ସମ୍ଭାବ୍ୟ ଖେଳାଳି: ରୋହିତ ଶର୍ମା (କ୍ୟାପଟେନ୍), କେ.ଏଲ୍ ରାହୁଲ, ବିରାଟ କୋହଲି, ସୂର୍ଯ୍ୟକୁମାର ଯାଦବ, ହାର୍ଦ୍ଦିକ ପାଣ୍ଡ୍ୟା, ଦୀନେଶ କାର୍ତ୍ତିକ, ଅକ୍ସର ପଟେଲ, ଭୁବନେଶ୍ୱର କୁମାର, ହର୍ଷଲ ପଟେଲ, ଯୁଜବେନ୍ଦ୍ର ଚହଲ, ଜସପ୍ରୀତ ବୁମ୍ରା।

ଅଷ୍ଟ୍ରେଲିଆ ସମ୍ଭାବ୍ୟ ଖେଳାଳି: ଆରୋନ ଫିଞ୍ଚ (କ୍ୟାପଟେନ୍), ଜୋସ୍ ଇଂଲିସ୍, ଷ୍ଟିଭେନ୍ ସ୍ମିଥ୍, ଗ୍ଲେନ୍ ମ୍ୟାକ୍ସୱେଲ, ମାଥ୍ୟୁ ୱେଡ୍, ଟିମ୍ ଡେଭିଡ, କ୍ୟାମେରନ୍ ଗ୍ରୀନ୍, ଆଡାମ ଜାମ୍ପା, ପ୍ୟାଟ୍ କମିନ୍ସ, ଜୋସ୍ ହାଜଲେଉଡ୍, ନାଥାନ୍ ଏଲିସ୍।

Categories
ଆଜିର ଖବର ଜାତୀୟ ଖବର ସ୍ବାସ୍ଥ୍ୟ

ଭାରତରେ ଶିଶୁ ମୃତ୍ୟୁ ହାର ହ୍ରାସ କରିବାରେ ମହତ୍ତ୍ୱପୂର୍ଣ୍ଣ ଉପଲବ୍ଧି ହାସଲ

ନୂଆଦିଲ୍ଲୀ: ଭାରତକୁ ଶିଶୁ ମୃତ୍ୟୁ ହାରକୁ ଆହୁରି ହ୍ରାସ କରିବା ଦିଗରେ ମହତ୍ତ୍ୱପୂର୍ଣ୍ଣ ଉପଲବ୍ଧି  ପ୍ରାପ୍ତ ହୋଇଛି। ରେଜିଷ୍ଟ୍ରାର୍‌ ଜେନେରାଲ ଅଫ୍‌ ଇଣ୍ଡିଆ (ଆରଜିଆଇ) ଦ୍ୱାରା ସେପ୍ଟେମ୍ବର ୨୨, ୨୦୨୨ ତାରିଖ ଦିନ ଜାରି କରାଯାଇଥିବା ନମୁନା ପଂଜୀକରଣ ପ୍ରଣାଳୀ (ଏସଆରଏସ) ସାଂଖ୍ୟିକ ରିପୋର୍ଟ ୨୦୨୦ ଅନୁସାରେ ଦେଶରେ ୨୦୧୪ଠାରୁ ଆଇଏମଆର, ୟୁ୫ଏମଆର ଏବଂ ଏନଏମଆରେ ହ୍ରାସ ଆସିଛି ଏବଂ ଏବଂ ଦେଶ ୨୦୩୦ ପର୍ଯ୍ୟନ୍ତ ପୋଷଣୀୟ ବିକାଶ ଲକ୍ଷ୍ୟ (ଏସଡିଜି) ପ୍ରାପ୍ତ କରିବା ଦିଗରେ ଆଗକୁ ଅଗ୍ରସର ହେଉଛି।

କେନ୍ଦ୍ର ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରୀ ଡକ୍ଟର ମନସୁଖ ମାଣ୍ଡବୀୟ ଏହି ଉପଲବ୍ଧି ଉପରେ ଦେଶକୁ ଅଭିନନ୍ଦନ ଜଣାଇଛନ୍ତି ଏବଂ ସମସ୍ତ ସ୍ୱାସ୍ଥ୍ୟକର୍ମୀ, ସେବା କାର୍ଯ୍ୟରେ ନିୟୋଜିତ ଲୋକ ତଥା ସମୁଦାୟ ସଦସ୍ୟମାନଙ୍କୁ ଶିଶୁ ମୃତ୍ୟୁ ହାର ହ୍ରାସ କରିବା ଦିଗରେ ଉଲ୍ଲେଖନୀୟ କାର୍ଯ୍ୟ କରିଥିବାରୁ ଧନ୍ୟବାଦ ଜଣାଇଛନ୍ତି। ସେ କହିଛନ୍ତି – “ଏସଆରଏସ ୨୦୨୦ରେ ୨୦୧୪ଠାରୁ ଶିଶୁ ମୃତ୍ୟୁ ହାରରେ ଲଗାତାର ଭାବେ ହ୍ରାସ ଘଟିଥିବା ପରିଲକ୍ଷିତ ହୋଇଛି। ଭାରତ କେନ୍ଦ୍ର ସରକାରଙ୍କ କାର୍ଯ୍ୟକ୍ରମମାନ, ମଜଭୁତ କେନ୍ଦ୍ର-ରାଜ୍ୟ ସହଭାଗୀତା ତଥା ସମସ୍ତ ସ୍ୱାସ୍ଥ୍ୟକର୍ମୀମାନଙ୍କ ସମର୍ପଣ ଭାବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଜୀଙ୍କ ନେତୃତ୍ୱରେ ଶିଶୁ ମୃତ୍ୟୁ ହାରକୁ ୨୦୩୦ ଏସଡ଼ିଜି ଲକ୍ଷ୍ୟକୁ ପ୍ରାପ୍ତ କରିବା ନିମନ୍ତେ ପ୍ରସ୍ତୁତ ଅଛି।”

ସଂକେତକ ଏସଆରଏସ ୨୦୧୪ ଏସଆରଏସ ୨୦୧୯ ଏସଆରଏସ ୨୦୨୦
ଅଶୋଧିତ ଜନ୍ମ ହାର (ସିବିଆର) ୨୧.୦ ୧୯.୭ ୧୯.୫
ମୋଟ ପ୍ରଜନନ ହାର ୨.୩ ୨.୧ ୨.୦
ପ୍ରାରମ୍ଭିକ ନବଜାତ ମୃତ୍ୟୁ ହାର (ଇଏନଏମଆର)-୦-୭ ଦିନ ୨୦ ୧୬ ୧୫
ନବଜାତ ମୃତ୍ୟୁ ହାର (ଏନଏମଆର) ୨୬ ୨୨ ୨୦
ଶିଶୁ ମୃତ୍ୟୁ ହାର (ଆଇଏମଆର) ୩୯ ୩୦ ୨୮
୫ ବର୍ଷ ଠାରୁ କମ୍‌ ବୟସର ଶିଶୁଙ୍କ ମୃତ୍ୟୁ ହାର (ୟୁ୫ଏମଆର) ୪୫ ୩୫ ୩୨

ଲଗାତାର ଭାବେ ହ୍ରାସ ଘଟିଚାଲିବା ପରେ ଆଇଏମଆର, ୟୁ୫ଏମଆର ଏବଂ ଏନଏମଆରରେ ଆହୁରି ମଧ୍ୟ ହ୍ରାସ ଘଟିଛି।

ଦେଶରେ ପାଞ୍ଚବର୍ଷରୁ କମ୍‌ ଆୟୁବର୍ଗର ଶିଶୁମାନଙ୍କ ମୃତ୍ୟୁ ହାର (ୟୁ୫ଏମଆର)ରେ ୨୦୧୯ଠାରୁ ତିନି ଅଙ୍କର (ବାର୍ଷିକ ହ୍ରାସ ଦର ୮.୬ ପ୍ରତିଶତ) (୨୦୧୯ରେ ପ୍ରତି ୧୦୦୦ ଜୀବିତ ଜନ୍ମ ୩୫ ପ୍ରତିଶତ ତୁଳନାରେ ୨୦୨୦ରେ ୩୨ ପ୍ରତି ୧,୦୦୦ ଜୀବିତ ଜନ୍ମ)। ଏଥିରୁ ଗ୍ରାମୀଣ କ୍ଷେତ୍ରର ୩୬ରୁ ସହରୀ କ୍ଷେତ୍ରରେ ୨୧ ପର୍ଯ୍ୟନ୍ତ ପାର୍ଥକ୍ୟ ରହିଛି।

ବାଳିକାମାନଙ୍କ ନିମନ୍ତେ ୟୁ୫ଏମଆର ବାଳକ (୩୧) ତୁଳନାରେ ଅଧିକ (୩୩) ରହିଛି।

ୟୁ୫ଏମଆରରେ ସର୍ବାଧିକ ହ୍ରାସ ଉତ୍ତର ପ୍ରଦେଶ (୫ ଅଙ୍କ) ତଥା କର୍ଣ୍ଣାଟକ ( ୫ ଅଙ୍କ)ରେ ଦେଖିବାକୁ ମିଳିଛି।

ଶିଶୁ ମୃତ୍ୟୁ ହାର (ଆଇଏମଆର)ରେ ମଧ୍ୟ ୨୦୧୯ରେ ପ୍ରତି ୧୦୦୦ ଜୀବିତ ଜନ୍ମ ମଧ୍ୟରୁ ୩୦ରୁ ୨୦୨୦ରେ ପ୍ରତି ୧୦୦୦ ଜୀବିତ ଜନ୍ମରେ ୨୮ ସହିତ ୨ ଅଙ୍କର ହ୍ରାସ ହାସଲ କରାଯାଇଛି । (ବାର୍ଷିକ ହ୍ରାସ ହାର: ୬.୭ ପ୍ରତିଶତ)।

ଗ୍ରାମୀଣ- ସହରୀ ପାର୍ଥକ୍ୟ ସୀମିତ ହୋଇ ୧୨ ଅଙ୍କକୁ ଆସିଯାଇଛି । (ସହରାଞ୍ଚଳ କ୍ଷେତ୍ର ୧୯, ଗ୍ରାମୀଣ କ୍ଷେତ୍ର- ୩୧)।

୨୦୨୦ରେ କୌଣସି ଲୈଙ୍ଗିକ ଭେଦଭାବ ଦେଖାଯାଇନାହିଁ (ପୁରୁଷ- ୨୮,ମହିଳା – ୨୮)।

ନବଜାତ ମୃତ୍ୟୁ ହାରରେ ମଧ୍ୟ ଦୁଇ ଅଙ୍କର ହ୍ରାସ ଘଟିଛି। ଏହା ୨୦୧୯ରେ ପ୍ରତି ୧୦୦୦ ଜୀବିତ ଜନ୍ମରେ ୨୨ ଥିଲା ଯାହା ୨୦୨୦ରେ ପ୍ରତି ୧୦୦୦ ଜୀବିତ ଜନ୍ମରେ ୨୦ ହୋଇଯାଇଛି । (ବାର୍ଷିକ ହ୍ରାସ: ୯.୧ ପ୍ରତିଶତ)। ଏହା ସହରାଞ୍ଚଳ କ୍ଷେତ୍ରରେ ୧୨ରୁ ନେଇ ଗ୍ରାମୀଣ କ୍ଷେତ୍ରରେ ୨୩ ପର୍ଯ୍ୟନ୍ତ ରହିଛି।

ଏସଆରଏସ ୨୦୨୦ ରିପୋର୍ଟ ଅନୁସାରେ

ଛଅ (୬) ରାଜ୍ୟ/କେନ୍ଦ୍ରଶାସିତ ପ୍ରଦେଶ ଯେଉଁମାନେ ଏନଏମଆରରେ ପ୍ରଥମେ ରହିଛନ୍ତି: (<=୧୨ ୨୦୩୦ ପର୍ଯ୍ୟନ୍ତ)ର ଏସଡ଼ିଜି ଲକ୍ଷ୍ୟ ପ୍ରାପ୍ତ କରିସାରିଛନ୍ତି: କେରଳ (୪), ଦିଲ୍ଲୀ (୯), ମହାରାଷ୍ଟ୍ର (୧୧), ଜାମ୍ମୁ ଓ କାଶ୍ମୀର (୧୨), ଏବଂ ପଞ୍ଜାବ (୧୨)

ଏଗାର (୧୧) ରାଜ୍ୟ/କେନ୍ଦ୍ରଶାସିତ କ୍ଷେତ୍ର ଯେଉଁମାନେ ୟୁ୫ଏମଆରରେ ପ୍ରଥମେ ଅଛନ୍ତି: (<=୨୫ ପର୍ଯ୍ୟନ୍ତ ୨୦୩୦)ର ଏସଡିଜି ଲକ୍ଷ୍ୟ ପ୍ରାପ୍ତ କରିସାରିଛନ୍ତି: କେରଳ (୮), ତାମିଲନାଡ଼ୁ (୧୩), ଦିଲ୍ଲୀ (୧୪), ମହାରାଷ୍ଟ୍ର (୧୮), ଜମ୍ମୁ- କଶ୍ମୀର (୧୭), କର୍ଣ୍ଣାଟକ (୨୧), ପଞ୍ଜାବ (୨୨), ପଶ୍ଚିମ ବଙ୍ଗଳା (୨୨), ତେଲଙ୍ଗାନା (୨୩), ଗୁଜରାଟ (୨୪) ଏବଂ ହିମାଚଳ ପ୍ରଦେଶ (୨୪)।

Categories
ବିଶେଷ ଖବର

ଶାନ୍ତି ଚାହୁଁଥିବା ଦେଶ, ଆତଙ୍କବାଦକୁ ପ୍ରାୟୋଜିତ କରେ ନାହିଁ’: ଜାତିସଂଘରେ ପାକିସ୍ତାନକୁ କଡା ଜବାବ ଦେଲା ଭାରତ

ନୂଆଦିଲ୍ଲୀ: ମିଳିତ ଜାତିସଂଘ ସାଧାରଣ ସଭା (ୟୁଏନଜିଏ) ର ୭୭ତମ ଅଧିବେଶନରେ ଶୁକ୍ରବାର ଦିନ ଭାରତ ବିରୋଧୀ ବିବୃତ୍ତି ଦେଇଥିବାରୁ ପାକିସ୍ତାନ ପ୍ରଧାନମନ୍ତ୍ରୀ ଶାହାବାଜ ସରିଫଙ୍କୁ ଭାରତ ସମାଲୋଚନା କରିଛି। ମିଳିତ ଜାତିସଂଘରେ ଭାରତୀୟ ମିଶନର ପ୍ରଥମ ସଚିବ ମିଜିଟୋ ଭିନିଟୋ କାଶ୍ମୀର ପ୍ରସଙ୍ଗରେ ଶେହବାଜ ସରିଫଙ୍କ ଦାବିକୁ ଖଣ୍ଡନ କରିଛନ୍ତି ଏବଂ ଇସଲାମାବାଦକୁ ସୀମା ଆତଙ୍କବାଦ ସହ ଜଡିତ ଥିବା ଅଭିଯୋଗ କରିଛନ୍ତି।

ଭିନିଟୋ କହିଛନ୍ତି ଯେ, “ଦୁଃଖର ବିଷୟ ଯେ ପାକିସ୍ତାନର ପ୍ରଧାନମନ୍ତ୍ରୀ ଭାରତ ବିରୁଦ୍ଧରେ ମିଥ୍ୟା ଅଭିଯୋଗ ଆଣିବା ପାଇଁ ଏହି ସମ୍ମାନଜନକ ସଭାର ମଞ୍ଚକୁ ଚୟନ କରିଛନ୍ତି। ଯାହାକୁ ଦୁନିଆ ଗ୍ରହଣ କରେ ନାହିଁ। ”

ଆତଙ୍କବାଦୀ ଡାୱଡ ଇବ୍ରାହିମଙ୍କ ବିଷୟରେ ଏକ ସ୍ପଷ୍ଟ ସୂଚନା ଦେଇ ସେ କହିଛନ୍ତି ଯେ, ଶାନ୍ତି ଚାହୁଁଥିବା ଦେଶ କେବେ ୧୯୯୩ ମୁମ୍ବାଇ ବିସ୍ଫୋରଣରେ ଦୋଷୀମାନଙ୍କୁ ଆଶ୍ରୟ ଦେବ ନାହିଁ।

ଆତଙ୍କବାଦ, ଶତ୍ରୁତା ଏବଂ ହିଂସା ମୁକ୍ତ ପରିବେଶରେ ପାକିସ୍ତାନ ସହ ସାଧାରଣ ପଡୋଶୀ ସମ୍ପର୍କ ଖୋଜୁଛି ବୋଲି ଭିନିଟୋ ଦୃଢତାର ସହ ଦୋହରାଇଛନ୍ତି।

ନିକଟରେ ପାକିସ୍ତାନରେ ହିନ୍ଦୁ, ଶିଖ ଏବଂ ଖ୍ରୀଷ୍ଟିଆନ ପରିବାରର ଝିଅମାନଙ୍କୁ ଅପହରଣ ଏବଂ ବିବାହର ଘଟଣା ସମ୍ପର୍କରେ ଉଲ୍ଲେଖ କରି ଭାରତ କହିଛି ଯେ ଏହା ବିଡମ୍ବନାର ବିଷୟ ଯେ, ଯେଉଁ ଦେଶ ଅଳ୍ପସଂଖ୍ୟଙ୍କ ଅଧିକାରକୁ ଗମ୍ଭୀର ଉଲ୍ଲଂଘନ କରିଛି, ସେ ବିଶ୍ୱ ସ୍ତରରେ ଅଳ୍ପସଂଖ୍ୟକ ବିଷୟରେ କହୁଛି।

Categories
ଆଜିର ଖବର ଖେଳ ଜାତୀୟ ଖବର

କେବେ ହେବ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଦ୍ୱିତୀୟ ଟି -୨୦?, କେଉଁଠାରେ ଦେଖିବେ ମ୍ୟାଚ୍

ନୂଆଦିଲ୍ଲୀ: ଅଷ୍ଟ୍ରେଲିଆ ବିପକ୍ଷ ତିନି ମ୍ୟାଚ୍ ବିଶିଷ୍ଟ ଟି -୨୦ ସିରିଜର ପ୍ରଥମ ମ୍ୟାଚ୍ ଟିମ୍ ଇଣ୍ଡିଆ ହାରିଛି। ଏବେ ଦ୍ୱିତୀୟ ମ୍ୟାଚ୍‌ରେ ସେ ଏକ ଶକ୍ତିଶାଳୀ ପ୍ରତ୍ୟାବର୍ତ୍ତନ କରିବାକୁ ଚେଷ୍ଟା କରିବ। ଆଗାମୀ ମ୍ୟାଚ୍ ଟିମ୍ ଇଣ୍ଡିଆ ପାଇଁ ଏକ ‘କର ବା ମର’ ମ୍ୟାଚ୍ ହେବ। ଯଦି ଭାରତୀୟ ଦଳ ମଧ୍ୟ ଏହି ମ୍ୟାଚ୍ ହାରିଯାଏ, ତେବେ ସିରିଜ୍ ଅଷ୍ଟ୍ରେଲିଆ ନାମରେ ହେବ। ଏଭଳି ପରିସ୍ଥିତିରେ ଭାରତୀୟ ଦଳ ଏହି ମ୍ୟାଚରେ ବହୁତ ଗୁରୁତ୍ୱ ଦେବାକୁ ଯାଉଛି। ଏଥି ସହିତ ଅଷ୍ଟ୍ରେଲିଆ ଏହି ମ୍ୟାଚ୍ ଜିତିବାକୁ ଚେଷ୍ଟା କରିବ ଏବଂ ସିରିଜରେ ଏକ ଅପରାଜୟ ଅଗ୍ରଣୀ ହାସଲ କରିବ।

ଏହି ବଡ ମ୍ୟାଚ୍ କେବେ ଏବଂ କେଉଁଠାରେ ହେବ?:
ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଟି -୨୦ ସିରିଜର ଏହି ଦ୍ୱିତୀୟ ମ୍ୟାଚ୍ ସେପ୍ଟେମ୍ବର ୨୩ ତାରିଖ ଦିନ ସନ୍ଧ୍ୟା ୭ ଟାରେ ଖେଳାଯିବ। ଏହି ମ୍ୟାଚ୍ ନାଗପୁରର ବିଦର୍ଭ କ୍ରିକେଟ୍ ଆସୋସିଏସନ୍ ଷ୍ଟାଡିୟମରେ ଅନୁଷ୍ଠିତ ହେବ।

ଲାଇଭ୍ ଟେଲିକାଷ୍ଟ କେଉଁଠାରେ ଦେଖିବେ?:
ଏହି ମ୍ୟାଚର ଲାଇଭ ଟେଲିକାଷ୍ଟ ଷ୍ଟାର ସ୍ପୋର୍ଟସ ନେଟୱାର୍କର ବିଭିନ୍ନ ଚ୍ୟାନେଲରେ କରାଯିବ। ଏହା ସହିତ, ଏହି ମ୍ୟାଚ୍ ର ଲାଇଭ୍ ଷ୍ଟ୍ରିମିଂ ଡିସ୍ନି + ହଟଷ୍ଟାର୍ ଆପ୍ ରେ ଦେଖିବାକୁ ମିଳିବ।

ଖେଳାଳି ଏକାଦଶରେ କୌଣସି ପରିବର୍ତ୍ତନ ହେବ କି?:

ମୋହାଲିରେ ଅନୁଷ୍ଠିତ ପ୍ରଥମ ଟି -୨୦ ମ୍ୟାଚରେ ଅଷ୍ଟ୍ରେଲିଆର ପୁରା ଦଳ ଏକ ଭଲ ପ୍ରଦର୍ଶନ କରିଥିଲେ। ଏପରି ପରିସ୍ଥିତିରେ, ତାଙ୍କ ଦଳର କୌଣସି ପରିବର୍ତ୍ତନ ସମ୍ଭାବନା କମ ଅଟେ। ଏଠାରେ, ଟିମ୍ ଇଣ୍ଡିଆରେ ଏକ ପରିବର୍ତ୍ତନ ନିଶ୍ଚିତ ବୋଲି ବିଶ୍ୱାସ କରାଯାଏ। ଉମେଶ ଯାଦବଙ୍କ ସ୍ଥାନରେ ଖେଳାଳି ଏକାଦଶରେ ଜସପ୍ରୀତ ବୁମ୍ରାଙ୍କୁ ଦେଖିବାକୁ ମିଳିପାରେ।

ଟିମ୍ ଇଣ୍ଡିଆ: ରୋହିତ ଶର୍ମା (କ୍ୟାପଟେନ୍), କେ.ଏଲ୍ ରାହୁଲ, ବିରାଟ କୋହଲି, ସୂର୍ଯ୍ୟକୁମାର ଯାଦବ, ହାର୍ଦ୍ଦିକ ପାଣ୍ଡ୍ୟା, ଦୀନେଶ କାର୍ତ୍ତିକ, ଅକ୍ସର ପଟେଲ, ଭୁବନେଶ୍ୱର କୁମାର, ହର୍ଷଲ ପଟେଲ, ଯୁଜବେନ୍ଦ୍ର ଚହଲ, ଜସପ୍ରୀତ ବୁମ୍ରା।

ଅଷ୍ଟ୍ରେଲିଆ: ଆରୋନ୍ ଫିଞ୍ଚ (କ୍ୟାପଟେନ୍), ଜୋସ୍ ଇଂଲିସ୍, ଷ୍ଟିଭେନ୍ ସ୍ମିଥ୍, ଗ୍ଲେନ୍ ମ୍ୟାକ୍ସୱେଲ, ମାଥ୍ୟୁ ୱେଡ୍ (ୱିକି), ଟିମ୍ ଡେଭିଡ, କାମେରନ୍ ଗ୍ରୀନ୍, ଆଡାମ ଜାମ୍ପା, ପ୍ୟାଟ୍ କମିନ୍ସ, ଜୋସ୍ ହାଜଲେଉଡ୍, ନାଥାନ୍ ଏଲିସ୍।

Categories
ଆଜିର ଖବର ଜାତୀୟ ଖବର ସ୍ବାସ୍ଥ୍ୟ

ଦେଶରେ ୫ ହଜାରରୁ ଉର୍ଦ୍ଧ୍ଵ ଆକ୍ରାନ୍ତ ଚିହ୍ନଟ, ଗତ ୨୪ ଘଣ୍ଟା ମଧ୍ୟରେ ୨୬ ମୃତ

ନୂଆଦିଲ୍ଲୀ: ଗତ ୨୪ ଘଣ୍ଟା ମଧ୍ୟରେ ଭାରତରେ କୋଭିଡ ର ୫ ହଜାର ୪୪୩ ଆକ୍ରାନ୍ତ ଚିହ୍ନଟ ହୋଇଛନ୍ତି। ଏହାକୁ ମିଶାଇ ଦେଶରେ ମୋଟ ସଂକ୍ରମିତ ସଂଖ୍ୟା ୪ କୋଟି ୪୫ ଲକ୍ଷ ୫୩ ହଜାର ୪୨ କୁ ବୃଦ୍ଧି ପାଇଥିବାବେଳେ ସକ୍ରିୟ ରୋଗୀଙ୍କ ସଂଖ୍ୟା ୪୬ ହଜାର ୩୪୨ ରେ ପହଞ୍ଚିଛି। ଏଥି ସହିତ ଗତ ୨୪ ଘଣ୍ଟା ମଧ୍ୟରେ କୋଭିଡ କାରଣରୁ ୨୬ ରୋଗୀଙ୍କ ମୃତ୍ୟୁ ଘଟିଛି। ବର୍ତ୍ତମାନ ସମୁଦାୟ ମୃତକଙ୍କ ସଂଖ୍ୟା ୫ ଲକ୍ଷ ୨୮ ହଜାର ୪୨୯ କୁ ବୃଦ୍ଧି ପାଇଛି।

Categories
ବିଶେଷ ଖବର

ଭାରତ ଏବଂ ଇଜିପ୍‌ଟ ପ୍ରତିରକ୍ଷା ମନ୍ତ୍ରୀଙ୍କ ମଧ୍ୟରେ କାଇରୋରେ ଦ୍ବିପାକ୍ଷିକ ଆଲୋଚନା

ନୂଆଦିଲ୍ଲୀ: ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ୧୯, ସେପ୍ଟେମ୍ବର ୨୦୨୨ ରେ କାଇରୋରେ ଇଜିପ୍‌ଟର ପ୍ରତିରକ୍ଷା ମନ୍ତ୍ରୀ ଜେନେରାଲ୍ ମହମ୍ମଦ ଜାକିଙ୍କ ସହିତ ଦ୍ବିପାକ୍ଷିକ ଆଲୋଚନା କରିଛନ୍ତି। ରାଜନାଥ ସିଂ ବର୍ତ୍ତମାନ ଇଜିପ୍‌ଟ ଗସ୍ତରେ ରହିଛନ୍ତି। ତାଙ୍କୁ ଦ୍ବିପାକ୍ଷିକ ଆଲୋଚନା ଆରମ୍ଭ ହେବା ପୂର୍ବରୁ କାଇରୋ ସ୍ଥିତ ପ୍ରତିରକ୍ଷା ମନ୍ତ୍ରଣାଳୟରେ ସେରିମୋନିଆଲ୍ ଗାର୍ଡ଼ ଅଫ୍ ଅନର ପ୍ରଦାନ କରାଯାଇଛି। ବୈଠକ ସମୟରେ ଉଭୟ ପକ୍ଷ ପ୍ରତିରକ୍ଷା ସମ୍ପର୍କକୁ ମଜବୁତ୍ କରିବା ଦିଗରେ ମିଳିତ ସୈନ୍ୟାଭ୍ୟାସ ବଢ଼ାଇବା ଏବଂ ପ୍ରଶିକ୍ଷଣ, ବିଶେଷ କରି ଆତଙ୍କବାଦ ବିରୋଧୀ କାର୍ଯ୍ୟକଳାପ କ୍ଷେତ୍ରରେ ପ୍ରଶିକ୍ଷଣ ପାଇଁ ସୈନ୍ୟକର୍ମୀମାନଙ୍କର ଆଦାନ ପ୍ରଦାନ ଉପରେ ସହମତି ପ୍ରକାଶ କରିଛନ୍ତି।

ଉଭୟ ମନ୍ତ୍ରୀ ଭାରତ ଏବଂ ଇଜିପ୍‌ଟର ରକ୍ଷା ଉଦ୍ୟୋଗ ମଧ୍ୟରେ ନିର୍ଦ୍ଦିଷ୍ଟ ସମୟ ଅବଧିରେ ସହଯୋଗ ବଢ଼ାଇବା ପାଇଁ ପ୍ରସ୍ତାବ ଉପରେ ଧ୍ୟାନ ପ୍ରଦାନ କରିବା ଉପରେ ସହମତି ପ୍ରଦାନ କରିଛନ୍ତି। ସେମାନେ କ୍ଷେତ୍ରୀୟ ସୁରକ୍ଷା ଉପରେ ବିଚାରର ଆଦାନ ପ୍ରଦାନ କରିଛନ୍ତି ତଥା ବିଶ୍ବରେ ଶାନ୍ତି ଏବଂ ସ୍ଥିରତା ବଜାୟ ରଖିବାରେ ଭାରତ ତଥା ଇଜିପ୍‌ଟର ଯୋଗାଦାନକୁ ରେଖାଙ୍କିତ କରିଛନ୍ତି। ଉଭୟ ପକ୍ଷ ଏହି ବିଷୟ ଉପରେ ଖୁସି ପ୍ରକାଶ କରିଛନ୍ତି ଯେ କୋଭିଡ୍ ୧୯ ମହାମାରୀ ସତ୍ତ୍ବେ ଗତ ବର୍ଷ ସମୟରେ ଉଭୟ ଦେଶ ମଧ୍ୟରେ ରକ୍ଷା କାର୍ଯ୍ୟକାରୀତା ଓ ଆଦାନ-ପ୍ରଦାନର ଗତି ତୀବ୍ର ରହିଛି।

ଇଜିପ୍‌ଟର ରାଷ୍ଟ୍ରପତି ଆବଦେଲ୍ ଫତାହ-ଅଲ୍ –ସିସି ଙ୍କ ସହିତ ରକ୍ଷା ମନ୍ତ୍ରୀ ରାଜନାଥ ସିଂ ଙ୍କ ସାକ୍ଷାତ ପରେ ଉଭୟ ରକ୍ଷା ମନ୍ତ୍ରୀ ଦ୍ବିପାକ୍ଷୀୟ ସହଯୋଗ ବିଷୟରେ ସୁରକ୍ଷା ଏବଂ ରକ୍ଷା ପକ୍ଷର ବୃଦ୍ଧି ଉପରେ ସହମତି ବ୍ୟକ୍ତ କରିଛନ୍ତି। ଉଭୟ ରକ୍ଷା ମନ୍ତ୍ରୀ ରକ୍ଷା କ୍ଷେତ୍ରରେ ସହଯୋଗ ପାଇଁ ବୁଝାମଣା ରାଜିନାମା ଉପରେ ସ୍ବାକ୍ଷର କରିଛନ୍ତି। ଏହି ବୁଝାମଣା ରାଜିନାମା ପାରସ୍ପରିକ ହିତର ସମସ୍ତ କ୍ଷେତ୍ରରେ ରକ୍ଷା ସହଯୋଗ ବଢ଼ାଇବାର ମାର୍ଗକୁ ପ୍ରଶସ୍ତ କରିବ।

ରାଜନାଥ ସିଂ ଭାରତ-ଆଫ୍ରିକା ରକ୍ଷା ସମ୍ବାଦ ଏବଂ ଆଇଓଆର ରକ୍ଷା ମନ୍ତ୍ରୀମାନଙ୍କର ସମ୍ମିଳନୀରେ ଭାଗ ନେବା ପାଇଁ ଇଜିପ୍ଟ ସମକକ୍ଷଙ୍କୁ ଭାରତ ଆସିବାକୁ ନିମନ୍ତ୍ରଣ କରିଛନ୍ତି। ଏହି କାର୍ଯ୍ୟକ୍ରମ ୧୨ଶ ଡେଫ୍‌ ଏକ୍ସପୋର ଭାଗ ରୂପେ ଗୁଜରାଟର ଗାନ୍ଧୀନଗରରେ ୧୮-୨୨ ଅକ୍ଟୋବର ୨୦୨୨ ମଧ୍ୟରେ ଆୟୋଜିତ ହେବ।

ଦିନ ବ୍ୟାପି ନିଜର କାର୍ଯ୍ୟକ୍ରମ ସମୟରେ ରକ୍ଷା ମନ୍ତ୍ରୀ କାଇରୋରେ ଅଜ୍ଞାତ ସୈନ୍ୟ ସ୍ମାରକ ଏବଂ କାଇରୋର ପୂର୍ବ ରାଷ୍ଟ୍ରପତି ଅନୱର-ଅଲ-ସାଦାତ୍ ଙ୍କ ସମାଧିରେ ଶ୍ରଦ୍ଧାଞ୍ଜଳି ପ୍ରଦାନ କରିଛନ୍ତି।

Categories
ଆଜିର ଖବର ଜାତୀୟ ଖବର ସ୍ବାସ୍ଥ୍ୟ

ଭାରତରେ ୫,୬୬୪ ନୂତନ ଆକ୍ରାନ୍ତ ଚିହ୍ନଟ, ସକ୍ରିୟ ରୋଗୀଙ୍କ ସଂଖ୍ୟା ୪୭,୯୨୨ କୁ ବୃଦ୍ଧି

ନୂଆଦିଲ୍ଲୀ: ଗତ ୨୪ ଘଣ୍ଟା ମଧ୍ୟରେ ଭାରତରେ କୋଭିଡ-୧୯ ର ୫ ହଜାର ୬୬୪ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଦେଶରେ ମୋଟ ସଂକ୍ରମିତ ଲୋକଙ୍କ ସଂଖ୍ୟା ୪ କୋଟି ୪୫ ଲକ୍ଷ ୩୪ ହଜାର ୧୮୮ ଥିବାବେଳେ ଚିକିତ୍ସିତ ହେଉଥିବା ରୋଗୀଙ୍କ ସଂଖ୍ୟା ୪୬ ହଜାର ୮୪୮ ରୁ ୪୭ ହଜାର ୯୨୨ କୁ ବୃଦ୍ଧି ପାଇଛି। ତଥ୍ୟ ଅନୁଯାୟୀ, ସଂକ୍ରମଣ ହେତୁ ଅଧିକ ୩୫ ଜଣଙ୍କ ମୃତ୍ୟୁ ହୋଇଛି। ତେବେ ମୋଟ ମୃତ୍ୟୁ ସଂଖ୍ୟା ୫ ଲକ୍ଷ ୨୮ ହଜାର ୩୩୭ କୁ ବୃଦ୍ଧି ପାଇଛି।

Categories
ଜାତୀୟ ଖବର ବିଶେଷ ଖବର

ଭାରତରେ ବିଲୁପ୍ତ ଜଙ୍ଗଲୀ ଚିତାଙ୍କୁ କୁନୋ ଜାତୀୟ ଉଦ୍ୟାନରେ ଛାଡ଼ିଲେ ପ୍ରଧାନମନ୍ତ୍ରୀ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ଦିନ କୁନୋ ଜାତୀୟ ଉଦ୍ୟାନରେ ଜଙ୍ଗଲୀ ଚିତା ବାଘମାନଙ୍କୁ ଛାଡ଼ିଛନ୍ତି। ଚିତା ବାଘ ପ୍ରଜାତି ଭାରତରୁ ବହୁ ବର୍ଷ ପୂର୍ବରୁ ବିଲୁପ୍ତ ହୋଇଯାଇଥିଲେ। ପ୍ରୋଜେକ୍ଟ ଚିତା ଅଧୀନରେ ନାମିବ୍ୟାରୁ ଭାରତକୁ ଚିତା ବାଘ ଗୁଡ଼ିକୁ ଅଣାଯାଇଛି। ଏହା ହେଉଛି ବିଶ୍ୱର ସର୍ବପ୍ରଥମ ଆନ୍ତଃମହାଦେଶୀୟ ବୃହତ ମାଂସାହାରୀ ପ୍ରାଣୀ ସ୍ଥାନାନ୍ତର ପ୍ରକଳ୍ପ। ଏହି ପ୍ରକଳ୍ପ ଅଧୀନରେ ଅଣାଯାଇଥିବା ଆଠଟି ଚିତା ମଧ୍ୟରୁ ୫ଟି ମାଈ ଏବଂ ୩ଟି ଅଣ୍ଡିରା ରହିଛନ୍ତି।

କୁନୋ ଜାତୀୟ ଉଦ୍ୟାନର ଦୁଇଟି ସ୍ଥାନରେ ପ୍ରଧାନମନ୍ତ୍ରୀ ଏହି ଚିତାଗୁଡ଼ିକୁ ଛାଡ଼ିଥିଲେ। ଏହି ଅବସରରେ ପ୍ରଧାନମନ୍ତ୍ରୀ ଚିତା ମିତ୍ର, ଚିତା ପୁନର୍ବାସ ପରିଚାଳନା ଦଳ ଏବଂ ଛାତ୍ରଛାତ୍ରୀଙ୍କ ସହିତ ଆଲୋଚନା କରିଥିଲେ। ପ୍ରଧାନମନ୍ତ୍ରୀ ଏହି ଐତିହାସିକ ସମାରୋହରେ ଦେଶବାସୀଙ୍କ ଉଦ୍ଦେଶ୍ୟରେ ନିଜର ଅଭିଭାଷଣ ରଖିଥିଲେ।

ଭାରତର ବନ୍ୟପ୍ରାଣୀ ଏବଂ ସେମାନଙ୍କର ବାସସ୍ଥଳୀର ପୁନରୁଦ୍ଧାର ଏବଂ ବିବିଧକରଣ ପାଇଁ ପ୍ରଧାନମନ୍ତ୍ରୀ ଶ୍ରୀ ମୋଦୀ ଲଗାତାର ପ୍ରୟାସ କରି ଆସୁଛନ୍ତି। ଏହି ଉଦ୍ୟମର ଅଂଶବିଶେଷ ସ୍ୱରୂପ ସେ କୁନୋ ଜାତୀୟ ଉଦ୍ୟାନରେ ଚିତାଗୁଡ଼ିକୁ ଛାଡ଼ିଛନ୍ତି। ୧୯୫୨ ମସିହା ଠାରୁ ଭାରତରେ ଚିତା ବାଘମାନଙ୍କୁ ବିଲୁପ୍ତ ଘୋଷଣା କରାଯାଇଛି। ଚଳିତ ବର୍ଷ ପ୍ରାରମ୍ଭରେ ସ୍ୱାକ୍ଷରିତ ଏକ ରାଜିନାମା ଅନ୍ତର୍ଗତ ନାମିବ୍ୟାରୁ ଏହି ଚିତାଗୁଡ଼ିକୁ ଆଣି ଏଠାରେ ଛଡ଼ାଯାଇଛି। ବିଶ୍ୱର ସର୍ବପ୍ରଥମ ଆନ୍ତଃମହାଦେଶୀୟ ବୃହତ ମାଂସାହାରୀ ପ୍ରାଣୀ ସ୍ଥାନାନ୍ତର ପ୍ରକଳ୍ପ ‘ପ୍ରୋଜେକ୍ଟ ଚିତା’ ଅଧୀନରେ ଚିତାମାନଙ୍କର ସଂରକ୍ଷଣ ପାଇଁ ଏହି ଉଦ୍ୟମ କରାଯାଉଛି।

ଭାରତକୁ ଚିତା ଅଣାଯିବା ଦ୍ୱାରା ମୁକ୍ତ ଜଙ୍ଗଲ ଏବଂ ଚାରଣଭୂମି ପରିବେଶ ପରିତନ୍ତ୍ରର ପୁନରୁଦ୍ଧାର ହେବ। ଏହା ମଧ୍ୟ ଜୈବ ବିବିଧତାର ସଂରକ୍ଷଣ ସହିତ ଜଳ ସୁରକ୍ଷା, କାର୍ବନ ସିକ୍ୟୁଷ୍ଟ୍ରେସନ ବା ଅଙ୍ଗାରକ ପୃଥକୀକରଣ ଏବଂ ଜଳ ଆର୍ଦ୍ରତା ସଂରକ୍ଷଣ ଭଳି ଇକୋସିଷ୍ଟମ ବା ପରିବେଶ ପରିତନ୍ତ୍ର ସେବାକୁ ବଢ଼ାଇବ ଯାହାର ବ୍ୟାପକ ଲାଭ ସମାଜକୁ ମିଳିପାରିବ। ପରିବେଶ ସୁରକ୍ଷା ଏବଂ ଜଳବାୟୁ ସଂରକ୍ଷଣ ପାଇଁ ପ୍ରଧାନମନ୍ତ୍ରୀଙ୍କ ପ୍ରତିବଦ୍ଧତା ଅନୁରୂପ, ଏହି ପ୍ରୟାସ ବଳରେ ପରିବେଶର ବିକାଶ ଓ ପରିବେଶ ପର୍ଯ୍ୟଟନ ଗତିବିଧି ମାଧ୍ୟମରେ ସ୍ଥାନୀୟ ସମୁଦାୟଙ୍କ ପାଇଁ ଜୀବିକା ଅର୍ଜନ ନିମନ୍ତେ ସୁଯୋଗ ସୃଷ୍ଟି ହେବ।

ଗତ ଆଠ ବର୍ଷ ମଧ୍ୟରେ ଦୀର୍ଘସ୍ଥାୟିତ୍ୱ ଏବଂ ପରିବେଶ ସୁରକ୍ଷା ସୁନିଶ୍ଚିତ କରିବା ଲାଗି ଭାରତରେ ସଂଖ୍ୟାଧିକ ପଦକ୍ଷେପ ଗ୍ରହଣ କରାଯାଇଛି। ଚିତା ପୁନର୍ବାସ ପ୍ରକଳ୍ପ ଆରମ୍ଭ ହେବା ଏହି କାର୍ଯ୍ୟଧାରାର ଏକ ଅଂଶବିଶେଷ। ଏସବୁ ପଦକ୍ଷେପ ଫଳରେ ପରିବେଶ ସୁରକ୍ଷା ଏବଂ ଦୀର୍ଘସ୍ଥାୟିତ୍ୱ କ୍ଷେତ୍ରରେ ଅନେକ ଉଲ୍ଲେଖନୀୟ ଉପଲବ୍ଧି ହାସଲ କରାଯାଇପାରିଛି। ଉଦାହରଣ ସ୍ୱରୂପ, ୨୦୧୪ରେ ଦେଶର ମୋଟ୍‌ ଭୌଗଳିକ କ୍ଷେତ୍ର ମଧ୍ୟରୁ ସଂରକ୍ଷିତ ଅଞ୍ଚଳର ପ୍ରସାର ୪.୯୦ ପ୍ରତିଶତ ଥିଲା, ବର୍ତ୍ତମାନ ଏହା ୫.୦୩ ପ୍ରତିଶତକୁ ବୃଦ୍ଧି ପାଇଛି। ୨୦୧୪ରେ ଦେଶରେ ସଂରକ୍ଷିତ ଅଭୟାରଣ୍ୟ କ୍ଷେତ୍ରଗୁଡ଼ିକର ସଂଖ୍ୟା ଥିଲା ୭୪୦ ଏବଂ ଏସବୁ କ୍ଷେତ୍ରର ମୋଟ୍‌ କ୍ଷେତ୍ରଫଳ ଥିଲା ୧,୬୧,୦୮୧.୬୨ ବର୍ଗ କିଲୋମିଟର। ବର୍ତ୍ତମାନ ସଂରକ୍ଷିତ ଅଞ୍ଚଳ ସଂଖ୍ୟା ୯୮୧କୁ ବୃଦ୍ଧି ପାଇଥିବା ବେଳେ ଏସବୁ ଅଞ୍ଚଳର କ୍ଷେତ୍ରଫଳ ୧,୭୧,୯୨୧ ବର୍ଗ କିଲୋମିଟରକୁ ବୃଦ୍ଧି ପାଇଛି।

ଗତ ୪ ବର୍ଷ ମଧ୍ୟରେ ଦେଶରେ ଜଙ୍ଗଲ ଓ ଗଛର ଘନତ୍ୱ ୧୬ ହଜାର ବର୍ଗ କିଲୋମିଟର ବୃଦ୍ଧି ପାଇଛି। ନିରନ୍ତର ଭାବେ ଜଙ୍ଗଲ ଘନତ୍ୱ ବୃଦ୍ଧି କ୍ଷେତ୍ରରେ ଭାରତ ବିଶ୍ୱର ହାତଗଣତି ରାଷ୍ଟ୍ରମାନଙ୍କ ମଧ୍ୟରେ ସାମିଲ ହୋଇପାରିଛି।

ଦେଶରେ ଗୋଷ୍ଠୀ ଅଭୟାରଣ୍ୟ ସଂଖ୍ୟା ମଧ୍ୟ କ୍ରମାଗତ ଭାବେ ବୃଦ୍ଧି ପାଇଛି। ୨୦୧୪ରେ ଏପରି କ୍ଷେତ୍ର ସଂଖ୍ୟା ୪୩ ଥିବା ବେଳେ ୨୦୧୯ରେ ଏହା ବୃଦ୍ଧି ପାଇ ୧୦୦ରୁ ଅଧିକ ହୋଇଯାଇଛି।

ଭାରତରେ ୫୨ଟି ବ୍ୟାଘ୍ର ଅଭୟାରଣ୍ୟ ରହିଛି ଏବଂ ୧୮ ରାଜ୍ୟରେ ବ୍ୟାପି ରହିଥିବା ଏସବୁ ଅଭୟାରଣ୍ୟର ମୋଟ୍‌ କ୍ଷେତ୍ରଫଳ ହେଉଛି ୭୫ ହଜାର ବର୍ଗ କିଲୋମିଟର। ବିଶ୍ୱସ୍ତରରେ ମୋଟ ଜଙ୍ଗଲୀ ବାଘଙ୍କ ମଧ୍ୟରୁ ୭୫% କେବଳ ଭାରତରେ ରହୁଛନ୍ତି। ୨୦୨୨ ସୁଦ୍ଧା ବାଘଙ୍କ ସଂଖ୍ୟା ଦ୍ୱିଗୁଣିତ କରିବା ଲାଗି ଭାରତ ଲକ୍ଷ୍ୟ ନିର୍ଦ୍ଧାରଣ କରିଥିଲା, କିନ୍ତୁ ଏହାର ୪ ବର୍ଷ ପୂର୍ବରୁ ୨୦୧୮ରେ ଦେଶ ଏହି ଲକ୍ଷ୍ୟ ହାସଲ କରିପାରିଛି। ୨୦୧୪ରେ ଦେଶରେ ବାଘଙ୍କ ସଂଖ୍ୟା ୨,୨୨୬ ଥିବା  ଥିବା ବେଳେ ୨୦୧୮ରେ ଏହା ୨୯୬୭କୁ ବୃଦ୍ଧି ପାଇଛି।

୨୦୧୪ରେ ବାଘ ସଂରକ୍ଷଣ ପାଇଁ ବଜେଟ୍‌ ଆବଣ୍ଟନ ପରିମାଣ ୧୮୫ କୋଟି ଟଙ୍କା ଥିବା ବେଳେ ୨୦୨୨ରେ ଏହା ୩୦୦ କୋଟି ଟଙ୍କାକୁ ବୃଦ୍ଧି ପାଇଛି।

ସେହିପରି ଦେଶରେ ଏସୀୟ ସିଂହଙ୍କ ସଂଖ୍ୟା ମଧ୍ୟ ବଢ଼ୁଛି। ୨୦୧୫ରେ ଏମାନଙ୍କ ସଂଖ୍ୟା ୫୨୩ ଥିଲା, ବର୍ତ୍ତମାନ ଏହା ୬୭୪କୁ ବୃଦ୍ଧି ପାଇଛି। ସିଂହଙ୍କ ସଂଖ୍ୟାରେ ୨୮.୮୭ ପ୍ରତିଶତ ବୃଦ୍ଧି ପରିଲକ୍ଷିତ ହୋଇଛି ଯାହାକି ବର୍ତ୍ତମାନ ସୁଦ୍ଧା ସବୁଠୁ ଅଧିକ ଅଭିବୃଦ୍ଧି ହାର।

ଏବେ (୨୦୨୦ ସୁଦ୍ଧା) ଭାରତରେ ୧୨, ୮୫୩ଟି କଲରାପତରିଆ ବାଘ ଅଛନ୍ତି। ୨୦୧୪ରେ କରାଯାଇଥିବା ଗଣନା ଅନୁଯାୟୀ ଏମାନଙ୍କ ସଂଖ୍ୟା ୭୯୧୦ ଥିଲା। କଲରାପତରିଆ ବାଘଙ୍କ ସଂଖ୍ୟାରେ ୬୦% ବୃଦ୍ଧି ଦେଖିବାକୁ ମିଳିଛି।

ଆଜିର ପ୍ରୋଜେକ୍ଟ ଚିତା କାର୍ଯ୍ୟକ୍ରମରେ ମଧ୍ୟପ୍ରଦେଶ ରାଜ୍ୟପାଳ ମଙ୍ଗୁଭାଇ ପଟେଲ, ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ, କେନ୍ଦ୍ର ମନ୍ତ୍ରୀ ନରେନ୍ଦ୍ର ସିଂ ତୋମର, ଭୂପେନ୍ଦ୍ର ଯାଦବ, ଜ୍ୟୋତିରାଦିତ୍ୟ ଏମ. ସିନ୍ଧିଆ, ଅଶ୍ୱିନୀ କୁମାର ଚୌବେ ପ୍ରମୁଖ ଉପସ୍ଥିତ ଥିଲେ।

Categories
ଆଜିର ଖବର ଜାତୀୟ ଖବର ବ୍ୟବସାୟ ରାଜ୍ୟ ଖବର

ଅନେକ ଗୁଡ଼ିଏ ସରପ୍ରାଇଜ୍ ସହିତ ଅଲ ଷ୍ଟାର ସେଲ୍ ଶୁଭାରମ୍ଭ କଲା ଆଜିଓ

ଭୁବନେଶ୍ୱର: ଭାରତର ଅଗ୍ରଣୀ ଅନଲାଇନ୍ ଫେସନ ଇ-ରିଟେଲର ଆଜିଓ ଅନେକ ଗୁଡ଼ିଏ ତାରକା ଖଚିତ ଅଫରକୁ ନେଇ ଆସିଛି ଏବଂ ଏଥିରେ ରହିଛି ଜାତୀୟ ଓ ଆନ୍ତର୍ଜାତୀୟ ସ୍ତରର ଷ୍ଟାର ବ୍ରାଣ୍ଡ୍ ସମୂହ। ଏଥିରେ ଥିବା କଲେକ୍ସନ ଓ ଅତୁଳନୀୟ ଡିଲ୍ ବେଶୂ ଆକର୍ଷଣୀୟ ରହିଛି। ଆଜିଓ ଅଲ୍ ଷ୍ଟାର ସେଲ୍ ଏବେ ସେପ୍ଟେମ୍ବର ୧୬ ଠାରୁ ୨୫ ତାରିଖ ପର୍ଯ୍ୟନ୍ତ ଲାଇଭ୍ ରହିଛି।

୩୫୦୦+ ଅଗ୍ରଣୀ ଭାରତୀୟ ଓ ଆନ୍ତର୍ଜାତିକ ଫେସନ ବ୍ରାଣ୍ଡ୍‌ରେ ୧ ନିୟୁତରୁ ଅଧିକ ଷ୍ଟାଇଲ୍ ଯେଉଁଥିରେ ୫୦-୯୦% ଡିସକାଉଂଟ ଉପଲବ୍ଧ ରହିଛି। ଗ୍ରାହକମାନେ ପ୍ରଥମ ଥର ଆପ୍‌ରେ ସାଇନିଂ ଅପ୍ କରିବା ପରେ ତୁରନ୍ତ ଟ.୫୦୦ ମୂଲ୍ୟର ରିହାତି ପାଇପାରିବେ।

ଆଜିଓରେ ରହିଛି ୱେଷ୍ଟର୍ଣ୍ଣ ଉୟର, ଡେନିମ୍ସ, ସ୍ନିକର, ଆଥଲେଜର, ଏଥିନିକ୍ ଉୟର ଓ ଆହୁରି ଅନେକ କିଛି। ଏଥିରେ ଆପଣ ପାଇପାରିବେ ଷ୍ଟାର-ଷ୍ଟଡେଡ୍ ବ୍ରାଣ୍ଡ ଲାଇନ୍ ଅପ୍ ଯେଉଁଥିରେ ରହିଛି ପ୍ରମୁଖ ନାମ ଯଥା ଆଡିଡାସ୍‌, ନାଇକ୍‌, ସୁପରଡ୍ରାଏ, ଷ୍ଟିଭ୍ ମାଡେନ୍‌, ଲିଭାଇସ୍‌, ମାର୍କସ୍ ଆଣ୍ଡ ସ୍ପେନ୍ସର, ଅର୍ମାନି ଏକ୍ସଚେଞ୍ଜ, ମାଭି, ରିତୁ କୁମାର, ଡବ୍ଲୁ, ମାସବା, ମୁଜି ଓ ଆହୁରି ଅନେକ।

ବଲିଉଡର ଅଗ୍ରଣୀ ଷ୍ଟାରମାନେ ଅନନ୍ୟ ଷ୍ଟାଇଲରେ ସୁସଜ୍ଜିତ ହୋଇ ଆଜିଓ ଅଲଷ୍ଟାର ସେଲକୁ ସଭିଙ୍କ ପାଇଁ ‘ଷ୍ଟ୍ରିଟ’କୁ ଆଣିଛନ୍ତି। ଶ୍ରଦ୍ଧା କପୁର, ବାଣୀ କପୁର, ଜିମ୍ ସର୍ଭ ଓ ବାଦଶାହା ହେଉଛନ୍ତି ସଦ୍ୟତମ ଆଜିଓ କ୍ୟାମ୍ପେନର ଷ୍ଟାରକାଷ୍ଟ ଯେଉଁମାନେ ଟିଭି ଓ ଡିଜିଟାଲ୍ ମିଡିଆରେ ପ୍ରମୁଖ ଭୂମିକା ଗ୍ରହଣ କରିଛନ୍ତି।

ବିଭିନ୍ନ ପ୍ରକାର ବ୍ରାଣ୍ଡ୍ ସହିତ, ଜଣେ ବ୍ୟକ୍ତି ଅଲ୍‌- ଷ୍ଟାର ସେଲ୍ ସମୟରେ ଆଜିଓ ଆପ୍‌ରେ ଅନେକ ଗୁଡ଼ିଏ ଆକର୍ଷଣୀୟ ଡିଲ୍ ପାଇପାରିବେ। ଗ୍ରାହକମାନେ ମଧ୍ୟ ଅତିରିକ୍ତ ସୁବିଧା ଯଥା ସୁପରଫାଷ୍ଟ ଡେଲିଭରି, ଡୋରଷ୍ଟପ୍ ରିଫଣ୍ଡ ଓ ସହଜିଆ ଏକ୍ସଚେଞ୍ଜ ସୁବିଧା ପାଇପାରିବେ ଯାହାଦ୍ୱାର ଆଜିଓର ଅଫରିଂ ଆହୁରି ଅଧିକ ଆକର୍ଷଣୀୟ ହୋଇପାରିଛି।

ଭାରତରେ ଉତ୍ସବ ସେଲ୍ ଋତୁ ଆରମ୍ଭ ହୋଇଥିବା ବେଳେ ଆଜିଓ ଅଲ୍ ଷ୍ଟାର୍ସ ସେଲ୍ ଗ୍ରାହକଙ୍କ ସମସ୍ତ ଫେସନ ସପିଂ ଆବଶ୍ୟକତାକୁ ପୂରଣ କରୁଛି । ପ୍ଲେ ଷ୍ଟୋର ବା ଆପ୍ ଷ୍ଟୋରରୁ ଆଜିଓ ଆପ୍‌କୁ ମୋବାଇଲରେ ଡାଉନଲୋଡ୍ କରି ଗ୍ରାହକମାନେ ସମସ୍ତ ପ୍ରକାର ଫେସନର ଆନନ୍ଦ ଉଠାଇପାରିବେ।

Categories
ବିଶେଷ ଖବର

ସେପ୍ଟେମ୍ବର ୧୭ରେ ପ୍ରଧାନମନ୍ତ୍ରୀଙ୍କ ମଧ୍ୟପ୍ରଦେଶ ଗସ୍ତ: ଚିତା ପ୍ରକଳ୍ପ ଅଧୀନରେ ନାମ୍ବିଆରୁ ଭାରତ ଆସିବ ଚିତା

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସେପ୍ଟେମ୍ବର ୧୭ ତାରିଖ ଦିନ ମଧ୍ୟପ୍ରଦେଶ ଗସ୍ତରେ ଯିବେ। ପୂର୍ବାହ୍ନ ପ୍ରାୟ ୧୦ଟା ୪୫ ମିନିଟ ବେଳେ ପ୍ରଧାନମନ୍ତ୍ରୀ ଚିତାକୁ କୁନୋ ଜାତୀୟ ଉଦ୍ୟାନ ଭିତରକୁ ଛାଡିବେ। ତା ପରେ ପାଖାପାଖି ମଧ୍ୟାହ୍ନ ବାରଟା ବେଳକୁ ସେ ସ୍ୱୟଂସହାୟକ ଗୋଷ୍ଠୀ ସମ୍ମିଳନୀରେ ମହିଳା ସ୍ୱୟଂ ସହାୟକ ଗୋଷ୍ଠୀ ସଦସ୍ୟ ଓ ଗୋଷ୍ଠୀ ପ୍ରତିନିଧି ମାନଙ୍କ ସହିତ କରହଲ, ସେଓପୁରଠାରେ ଯୋଗଦେବେ।

କୁନୋ ଜାତୀୟ ଉଦ୍ୟାନରେ ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀଙ୍କ ଦ୍ୱାରା କୁନୋ ଜାତୀୟ ଉଦ୍ୟାନକୁ ହିଂସ୍ର ଚିତା ଛଡାଯିବା ଭାରତୀୟ ହିଂସ୍ରପ୍ରାଣୀ ଓ ସେମାନଙ୍କ ବସତିକୁ ସଶକ୍ତ କରିବା ଦିଗରେ ଏକ ଉଦ୍ୟମ। ୧୯୫୨ ମସିହାରେ ଭାରତକୁ ଚିତା ଲୋପ ପାଇଯାଇଥିବା ଘୋଷଣା କରାଯାଇଥିଲା । ଛଡାଯିବାକୁ ଥିବା ଚିତାଗୁଡିକୁ ଚଳିତ ବର୍ଷ ପ୍ରାରମ୍ଭରେ ସ୍ୱାକ୍ଷରିତ ଏକ ବୁଝାମଣାପତ୍ର ଆଧାରରେ ନାମ୍ବିଆରୁ ଅଣାଯାଇଛି। ଚିତା ପ୍ରକଳ୍ପ ଅଧୀନରେ ଭାରତରେ ଚିତାଙ୍କୁ ପୁଣି ଛଡାଯାଉଛି। ଏହା ବିଶ୍ୱର ପ୍ରଥମ ଆନ୍ତଃ ମହାଦେଶୀୟ ହିଂସ୍ର ମାଂସାସୀ ପ୍ରାଣୀ ସ୍ଥାନାନ୍ତରଣ ପ୍ରକଳ୍ପ।

ଚିତା ଛଡାଯିବା ଦ୍ୱାରା ଏହା ଭାରତର ଉନ୍ମୁକ୍ତ ଜଙ୍ଗଲ ଓ ତୃଣଭୂମି ବାତାବରଣ ପୁନରୁଦ୍ଧାରରେ ସହାୟକ ହେବ। ଏହା ଜୈବ ବିବିଧତାର ସଂରକ୍ଷଣ କରିବା ସହ ବାତାବରଣରେ ଜଳ ସୁରକ୍ଷା, ଅଙ୍ଗାରକାମ୍ଳ ବର୍ଜନ ଓ ମାଟିର ଆର୍ଦ୍ରତା ସଂରକ୍ଷଣ କରି ସମାଜ ପାଇଁ ହିତକାରକ ହେବ। ବନ୍ୟାପ୍ରାଣୀ ସଂରକ୍ଷଣ ସହ ପରିବେଶ ସୁରକ୍ଷା ନେଇ ପ୍ରଧାନମନ୍ତ୍ରୀଙ୍କ ପ୍ରତିବଦ୍ଧତା ଯୋଗୁଁ ସ୍ଥାନୀୟ ଜନସାଧାଣଙ୍କ ପରିବେଶ ପର୍ଯ୍ୟଟନ କାର୍ଯ୍ୟକଳାପ ବୃଦ୍ଧି ଓ ଜୀବିକାର୍ଜନ ସୁଯୋଗ ମଧ୍ୟ ବୃଦ୍ଧି ପାଇବ।

ଏସଏଚଜି ସମ୍ମିଳନୀରେ ପ୍ରଧାନମନ୍ତ୍ରୀ

ସେଓପୁର, କରହଲଠାରେ ଆୟୋଜିତ ହେଉଥିବା ଏସଏଚଜି ସମ୍ମେଳନୀରେ ମଧ୍ୟ ପ୍ରଧାନମନ୍ତ୍ରୀ ଯୋଗଦେବ। ଏଥିରେ ସହସ୍ରାଧିକ ସ୍ୱୟଂସହାୟକ ଗୋଷ୍ଠୀ ମହିଳା ସଦସ୍ୟ ଗୋଷ୍ଠୀ ବ୍ୟକ୍ତିବିଶେଷ ଯୋଗ ଦେଇଛନ୍ତି। ଏହି ସମ୍ମେଳନୀରେ ଦୀନଦୟାଲ ଅନ୍ତୋଦୟ ଯୋଜନା-ଜାତୀୟ ଗ୍ରାମୀଣ ଜୀବିକା ମିଶନ ଅଧୀନରେ କାର୍ଯ୍ୟରତ ଏସଏଚଜି ସଦସ୍ୟ ଯୋଗଦାନ କରିବେ।

ଏହି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ମଧ୍ୟ ଚାରିଟି ଦୁର୍ବଳ ଜନଜାତି ଗୋଷ୍ଠୀଙ୍କ କୌଶଳ କେନ୍ଦ୍ର ପ୍ରଧାନମନ୍ତ୍ରୀ କୌଶଳ ବିକାଶ ଯୋଜନା ଅଧୀନରେ ଉଦଘାଟନ କରିବେ।

ଡିଏୱାଇ-ଏନଆରଏଲଏମ ଗ୍ରାମୀଣ ଗରୀବ ପରିବାରଗୁଡିକ ଏସଏଚଜି ପର୍ଯ୍ୟାୟକ୍ରମେ ନେଇ ସେମାନଙ୍କ ଜୀବିକାର ବିକେନ୍ଦ୍ରୀକରଣ ଦ୍ୱାରା ସେମାନଙ୍କ ଆୟ ଓ ଜୀବନଧାରଣ ମାନ ବୃଦ୍ଧିରେ ସାହାଯ୍ୟ କରିଥାଏ। ଏହି ଅଭିଯାନ ଜରିଆରେ ମହିଳା ସ୍ୱୟଂ ସହାୟକ ଗୋଷ୍ଠୀ ସଦସ୍ୟମାନେ ମଧ୍ୟ ସଶକ୍ତ ହୋଇଥାନ୍ତି। ଘରୋଇ ହିଂସା, ମହିଳା ଶିକ୍ଷା ଓ ଅନ୍ୟାନ୍ୟ ଲିଙ୍ଗଗତ ବୈଷମ୍ୟ, ପୌଷ୍ଟିକତା, ପରିମଳ ଓ ସ୍ୱାସ୍ଥ୍ୟ କ୍ଷେତ୍ରରେ ସଚେତନତା ଓ ବ୍ୟାବହାରିକ ପ୍ରୟୋଗ ଦ୍ୱାରା ଏହି  ସଶକ୍ତିକରଣ ସମ୍ଭବ ହୋଇଥାଏ।

Categories
ଅନ୍ତରାଷ୍ଟ୍ରୀୟ ଆଜିର ଖବର ଖେଳ ଜାତୀୟ ଖବର

ଟିଫନି ଟିଓଙ୍କ ଚ୍ୟାଲେଞ୍ଜକୁ ସ୍ଵୀକାର କଲେ ରିତୁ ଫୋଗଟ୍: ସେପ୍ଟେମ୍ବର ୨୯ରେ ହେବ ଲଢେଇ

ନୂଆଦିଲ୍ଲୀ: ଭାରତର ତାରକା ଏମଏଏ ଯୋଦ୍ଧା ରିତୁ ଫୋଗଟ ପୁଣି ଥରେ ରିଙ୍ଗରେ ପ୍ରବେଶ କରିବାକୁ ପ୍ରସ୍ତୁତ ଅଛନ୍ତି। ୱାନ୍ ଚାମ୍ପିଅନସିପ୍ ରେ ରିତୁ ଅଂଶଗ୍ରହଣ କରିବେ, ଯାହା ସେପ୍ଟେମ୍ବର ୨୯ ତାରିଖରୁ ଆରମ୍ଭ ହେଉଛି। ଇଣ୍ଡିଆନ୍ ଟାଇଗର୍ସ ଭାବରେ ଜଣାଶୁଣା ରିତୁଙ୍କୁ ସିଙ୍ଗାପୁରର ଟିଫନି ଟିଓ ଚ୍ୟାଲେଞ୍ଜ କରିଛନ୍ତି। ଏହି ଚ୍ୟାଲେଞ୍ଜ ବିଷୟରେ ଏକ ପ୍ରଶ୍ନ ଉପରେ ରିତୁ ଫୋଗାଟ କହିଛନ୍ତି ଯେ, ସେ ଟିଫନିଙ୍କ ଚ୍ୟାଲେଞ୍ଜ ପାଇଁ ପ୍ରସ୍ତୁତ ଅଛନ୍ତି। ସେ କେବଳ ଏହି ମ୍ୟାଚ୍ ପାଇଁ ନୁହେଁ, MMA ରେ ଏକ ଦୀର୍ଘ ଯାତ୍ରା ପାଇଁ ପ୍ରସ୍ତୁତ। ‘ଫୋଗେଟ୍ ଭଉଣୀ’ ମଧ୍ୟରୁ ସବୁଠୁ କନିଷ୍ଠ ରିତୁ କହିଛନ୍ତି ଯେ, ମୁଁ ଶୀଘ୍ର ବେଲ୍ଟ ଆଣିବି। ଭାରତ ଖୁବ୍ ଶୀଘ୍ର ଏହାର ପ୍ରଥମ ମହିଳା MMA ବିଶ୍ୱ ଚାମ୍ପିଅନ୍ ହେବ।

ପ୍ରାୟ ୯ ମାସ ପରେ ରିତୁ ଫୋଗେଟ୍ ରିଙ୍ଗକୁ ଫେରୁଛନ୍ତି। ଆଘାତରୁ ଫେରିବା ପାଇଁ ସେ କଠିନ ପରିଶ୍ରମ କରିଛନ୍ତି। ୨୮ ବର୍ଷୀୟ ରିତୁ ଫୋଗେଟ୍ ସିଙ୍ଗାପୁରର ଜୁମ୍ ରେ ଏକ ବାର୍ତ୍ତାଳାପରେ କହିଛନ୍ତି ଯେ, ସେ ଫେରିବା ନେଇ ବହୁତ ଉତ୍ସାହିତ ଅଛନ୍ତି। ଭାରତର ଲଡଲି ଫାଇଟର କହିଛନ୍ତି ଯେ, ସେମାନେ କେବଳ ଏହି ମ୍ୟାଚରେ ବିଜୟ ପାଇଁ ଆଶାବାଦୀ ନୁହଁନ୍ତି। ବରଂ ସେ ଦେଶବାସୀଙ୍କୁ ମଧ୍ୟ ଆଶ୍ୱାସନା ଦେବାକୁ ଚାହୁଁଛନ୍ତି ଯେ ଭାରତ ଶୀଘ୍ର ପ୍ରଥମ ମହିଳା ଏମଏଏ ବିଶ୍ୱ ଚାମ୍ପିୟନ ହେବ।

ପ୍ରକାଶ ଯୋଗ୍ୟ ଯେ ରିତୁ ଫୋଗେଟ୍ ଜଣେ ସଫଳ ରେସଲର ହୋଇଛନ୍ତି। ସେ କମନୱେଲଥ ଗେମ୍ସ ରେସଲିଂ ଚାମ୍ପିଅନସିପରେ ସ୍ୱର୍ଣ୍ଣ ପଦକ ଜିତିଛନ୍ତି। ତେବେ ପରେ ସେ କୁସ୍ତି ଛାଡି ଏମଏଏ ନେଇଥିଲେ। ରିତୁ କହିଛନ୍ତି ଯେ, ସେ ଏମଏକୁ ବାଛିଥିଲେ କାରଣ ଏପର୍ଯ୍ୟନ୍ତ କୌଣସି ମହିଳା ଏହି କ୍ରୀଡ଼ାରେ ବିଶ୍ୱ ଚାମ୍ପିଅନ୍ ହୋଇପାରି ନାହାଁନ୍ତି। ସେ ଏହି ଶୂନ୍ୟସ୍ଥାନ ପୂରଣ କରିବାକୁ ଚାହୁଁଛନ୍ତି।

Categories
ଅନ୍ତରାଷ୍ଟ୍ରୀୟ ଆଜିର ଖବର ଜାତୀୟ ଖବର

ଜି -୨୦ ର ଅଧ୍ୟକ୍ଷତା କରିବ ଭାରତ, ସମଗ୍ର ଦେଶରେ ୨୦୦ ରୁ ଅଧିକ ହେବ ସଭା

ନୂଆଦିଲ୍ଲୀ: ୨୦୨୨ ଶେଷରେ ଆରମ୍ଭ ହେବାକୁ ଥିବା ଜି-୨୦ ବୈଠକରେ ଭାରତ ଅଧ୍ୟକ୍ଷତା କରିବାକୁ ଯାଉଛି। ଭାରତ ଡିସେମ୍ବର ୧ ତାରିଖରୁ ନଭେମ୍ବର ୩୦ ତାରିଖ ୨୦୨୩ ପର୍ଯ୍ୟନ୍ତ ଜି-୨୦ର ଅଧ୍ୟକ୍ଷତା କରିବ। ଏହି ଅଧ୍ୟକ୍ଷତା ଦେଶରେ ୨୦୦ ରୁ ଅଧିକ ଜି-୨୦ ବୈଠକ ଆୟୋଜନ କରିବେ ବୋଲି ଆଶା କରାଯାଉଛି। ବୈଦେଶିକ ବ୍ୟାପାର ମନ୍ତ୍ରଣାଳୟ ଆଜି ଏକ ବିବୃତ୍ତି ଜାରି କରି ଏହି ସୂଚନା ଦେଇଛି।

ବୈଦେଶିକ ବ୍ୟାପାର ମନ୍ତ୍ରଣାଳୟ କହିଛି ଯେ, ଜି-୨୦ ଦେଶର ନେତାଙ୍କ ଶିଖର ସମ୍ମିଳନୀ ୨୦୨୩ ମସିହା ସେପ୍ଟେମ୍ବର ୯ ତାରିଖ ଓ ୧୦ ତାରିଖ ଦିନ ନୂଆଦିଲ୍ଲୀରେ ଅନୁଷ୍ଠିତ ହେବାକୁ ଯାଉଛି। ଜି-୨୦ କିମ୍ବା ଗ୍ରୁପ୍ ଅଫ୍ ୨୦ ହେଉଛି ବିଶ୍ଵର ପ୍ରମୁଖ ବିକଶିତ ତଥା ବିକାଶଶୀଳ ଅର୍ଥନୀତିର ଏକ ଆନ୍ତ- ସରକାରୀ ମଞ୍ଚ। ଏଥିରେ ୧୯ ଟି ଦେଶ ଅନ୍ତର୍ଭୁକ୍ତ।

ଜି-୨୦ରେ କେଉଁ ଦଶ ଅନ୍ତର୍ଭୁକ୍ତ?:

ଜି-୨୦ ରେ ଅନ୍ତର୍ଭୁକ୍ତ ଦେଶଗୁଡିକ ହେଉଛି- ଆର୍ଜେଣ୍ଟିନା, ଅଷ୍ଟ୍ରେଲିଆ, ବ୍ରାଜିଲ, କାନାଡା, ଚୀନ୍, ଫ୍ରାନ୍ସ, ଜର୍ମାନୀ, ଭାରତ, ଇଣ୍ଡୋନେସିଆ, ଇଟାଲୀ, ଜାପାନ, କୋରିଆ, ମେକ୍ସିକୋ, ଋଷ, ସାଉଦି ଆରବ, ଦକ୍ଷିଣ ଆଫ୍ରିକା, ତୁର୍କୀ, ଆମେରିକା ଏବଂ ୟୁରୋପୀୟ ୟୁନିଅନ୍। ସାମୂହିକ ଭାବରେ ଜି-୨୦ ବିଶ୍ଵ ଜିଡିପିର ୮୫ ପ୍ରତିଶତ, ଆନ୍ତର୍ଜାତୀୟ ବାଣିଜ୍ୟର ୭୫ ପ୍ରତିଶତ ଏବଂ ବିଶ୍ଵର ଦୁଇ ତୃତୀୟାଂଶ ଜନସଂଖ୍ୟାକୁ ଏହା ଆନ୍ତର୍ଜାତୀୟ ଅର୍ଥନୈତିକ ସହଯୋଗ ପାଇଁ ଏକ ପ୍ରମୁଖ ପ୍ଲାଟଫର୍ମ କରିପାରିଛି।

Categories
ଆଜିର ଖବର

ସୋମବାର ସୁଦ୍ଧା ଲଦାଖର ଗୋଗରା-ହଟ୍ ସ୍ପ୍ରିଙ୍ଗରୁ ଶେଷ ହେବ ସୈନ୍ୟବାହିନୀର ପ୍ରତ୍ୟାହାର କାର୍ଯ୍ୟ

ନୂଆଦିଲ୍ଲୀ: ପୂର୍ବ ଲଦାଖରେ ଦୁଇ ବର୍ଷରୁ ଅଧିକ ସମୟ ଧରି ଚାଲିଆସୁଥିବା ବିବାଦକୁ ଶେଷ କରିବା ପାଇଁ ଭାରତ ଏବଂ ଚୀନ୍ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି। ଗୁରୁବାର ଦୁଇ ଦେଶର ସୈନ୍ୟବାହିନୀ ଘୋଷଣା କରିଛନ୍ତି ଯେ, ସେମାନେ ଗୋଗରା-ହଟ୍ସପ୍ରିଙ୍ଗ୍ ଅଞ୍ଚଳରେ ‘ପାଟ୍ରୋଲିଂ ପଏଣ୍ଟ ୧୫’ ରୁ ସୈନ୍ୟ ପ୍ରତ୍ୟାହାର ପ୍ରକ୍ରିୟା ଆରମ୍ଭ କରିଛନ୍ତି। ଲଦାଖର ଗୋଗରା-ହଟ୍ ସ୍ପ୍ରିଙ୍ଗ୍ସରୁ ଭାରତ ଏବଂ ଚୀନ୍ ସୈନ୍ୟବାହିନୀର ପ୍ରତ୍ୟାହାର ସୋମବାର ସୁଦ୍ଧା ଶେଷ ହେବ। ବୈଦେଶିକ ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗଚି ଏକ ବିବୃତ୍ତିରେ କହିଛନ୍ତି ଯେ, ଉଭୟ ପକ୍ଷ ସହମତ ହୋଇଛନ୍ତି ଯେ ଏହି ଅଞ୍ଚଳରେ ନିର୍ମିତ ସମସ୍ତ ଅସ୍ଥାୟୀ ସଂରଚନା ଏବଂ ଅନ୍ୟାନ୍ୟ ଭିତ୍ତିଭୂମି ଭାଙ୍ଗିବା ପାଇଁ ଉଭୟ ପକ୍ଷ ଏହା ନିଶ୍ଚିତ କରିବେ। ଉଭୟ ଭାରତୀୟ ସେନା ଏବଂ ବୈଦେଶିକ ବ୍ୟାପାର ମନ୍ତ୍ରଣାଳୟ ଏହି ବିବୃତ୍ତିରେ ଏହା ନିଶ୍ଚିତ କରିଛନ୍ତି। ବିବୃତ୍ତି ଅନୁଯାୟୀ ଏହି ପ୍ରକ୍ରିୟା ୮ ତାରିଖ ସକାଳୁ ଆରମ୍ଭ ହୋଇ ସେପ୍ଟେମ୍ବର ୧୨ ତାରିଖ ସୁଦ୍ଧା ଶେଷ ହେବ। ଏହା ମଧ୍ୟ ସୂଚନାଯୋଗ୍ୟ ଯେ ଏହି ପ୍ରକ୍ରିୟା ସକାଳେ ଆରମ୍ଭ ହୋଇଥିଲା କିନ୍ତୁ ସେନାର ବିବୃତ୍ତି ଠିକ୍ ସନ୍ଧ୍ୟାରେ ଆସିଛି। ତେବେ ଚାଇନାର ସୈନିକମାନେ ପଛକୁ ହଟିବା ଆରମ୍ଭ କରିଛନ୍ତି, ଦିନସାରା ଯାଞ୍ଚ କରିବା ପରେ ଏହି ବିବୃତ୍ତି ଦିଆଯାଇଛି।

ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗଚି ଏହି ପ୍ରସଙ୍ଗରେ ଜଡିତ ପ୍ରଶ୍ନର ଉତ୍ତରରେ କହିଛନ୍ତି ଯେ, ଏହି ଅଞ୍ଚଳରେ ଉଭୟ ପକ୍ଷ ଦ୍ୱାରା ନିର୍ମିତ ସମସ୍ତ ଅସ୍ଥାୟୀ ସଂରଚନା ଏବଂ ଅନ୍ୟାନ୍ୟ ଆନୁସଙ୍ଗିକ ସଂରଚନାକୁ ଭାଙ୍ଗି ଦିଆଯିବ ଏବଂ ଏହା ପରସ୍ପର ମଧ୍ୟରେ ନିଶ୍ଚିତ ହେବ। ଉକ୍ତ ଅଞ୍ଚଳରେ ସମାନ ପ୍ରାକୃତିକ ରୂପ ପୁନଃସ୍ଥାପିତ ହେବ, ଯାହା ଉଭୟ ପକ୍ଷ ମଧ୍ୟରେ ବିବାଦ ପରିସ୍ଥିତି ପୂର୍ବରୁ ଥିଲା। ଆପଣଙ୍କୁ କହିରଖୁଛୁ ଯେ ଜୁନ୍ ୨୦୨୦ରେ ଗାଲୱାନ୍ ଉପତ୍ୟକାରେ ଦୁଇ ଦେଶର ସୈନ୍ୟବାହିନୀ ମଧ୍ୟରେ ହିଂସାତ୍ମକ ସଂଘର୍ଷ ହୋଇଥିଲା, ଯେଉଁଥିରେ ଭାରତର ୨୦ ଜଣ ସୈନିକ ସହିଦ ହୋଇଥିଲେ ଏବଂ ଚାଇନାର ପ୍ରାୟ ୪୦ ରୁ ୪୫ ସୈନିକ ନିହତ ହୋଇଥିଲେ। ପୂର୍ବ ଲଦାଖରେ ଚାଲିଥିବା ଉତ୍ତେଜନାକୁ ଦୃଷ୍ଟିରେ ରଖି ଚୀନ୍ ସୀମାରେ ୫୦ ହଜାରରୁ ଅଧିକ ସୈନିକ ନିୟୋଜିତ କରିଛି ଏବଂ ଭାରତ ମଧ୍ୟ ସମାନ ସଂଖ୍ୟକ ସୈନିକଙ୍କୁ ନିୟୋଜିତ କରିଛି। ଯାହା ଦ୍ଵାରା ଚୀନ୍‌ର କୌଣସି କାର୍ଯ୍ୟାନୁଷ୍ଠାନର ଜବାବ ଦିଆଯାଇପାରିବ।

Categories
ଆଜିର ଖବର ଜାତୀୟ ଖବର ସ୍ବାସ୍ଥ୍ୟ

ଦେଶରେ ୫୦ ହଜାର ତଳକୁ ଖସିଲା ସକ୍ରିୟ ରୋଗୀଙ୍କ ସଂଖ୍ୟା, ୬ ହଜାରରୁ ଉର୍ଦ୍ଧ୍ଵ ଆକ୍ରାନ୍ତ ଚିହ୍ନଟ

ନୂଆଦିଲ୍ଲୀ: ଗତ ୨୪ ଘଣ୍ଟା ମଧ୍ୟରେ ଭାରତରେ କରୋନାରେ ୬ ହଜାର ୯୩ ଜଣ ଲୋକ ସଂକ୍ରମିତ ହୋଜିଛନ୍ତି। ଯାହା ପରେ ଦେଶରେ ମୋଟ ସଂକ୍ରମିତ ସଂଖ୍ୟା ୪,୪୪,୮୪,୭୨୯ କୁ ବୃଦ୍ଧି ପାଇଥିବାବେଳେ ଚିକିତ୍ସିତ ରୋଗୀଙ୍କ ସଂଖ୍ୟା ୪୯,୬୩୬ କୁ ହ୍ରାସ ପାଇଛି।

ତଥ୍ୟ ଅନୁଯାୟୀ, ଦେଶରେ ସଂକ୍ରମଣ ହେତୁ ଆହୁରି ୩୧ ଜଣଙ୍କ ମୃତ୍ୟୁ ପରେ ମୃତ୍ୟୁ ସଂଖ୍ୟା ୫,୨୮,୧୨୧ କୁ ବୃଦ୍ଧି ପାଇଛି।

Categories
ଅନ୍ତରାଷ୍ଟ୍ରୀୟ ଆଜିର ଖବର ଜାତୀୟ ଖବର

ଶିକ୍ଷା ଓ ଦକ୍ଷତା କ୍ଷେତ୍ରରେ ସହଯୋଗୀ ହେବା ପାଇଁ ଆମେରିକୀୟ କମ୍ପାନୀ ଏବଂ ଶିକ୍ଷାନୁଷ୍ଠାନକୁ ନିମନ୍ତ୍ରଣ

ନୂଆଦିଲ୍ଲୀ/ଭୁବନେଶ୍ୱର: କେନ୍ଦ୍ର ଶିକ୍ଷା, ଦକ୍ଷତା ବିକାଶ ଏବଂ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଗୁରୁବାର ୟୁଏସ ଇଣ୍ଡିଆ ବିଜନେସ କାଉନସିଲ ଏବଂ ସାଉଥ ଏସିଆ ଇଣ୍ଟରନ୍ୟାସନାଲ ଆଫେୟାର୍ ୟୁଏସ ଚାମ୍ବର ଅଫ୍ କର୍ମର୍ସ ଦ୍ୱାରା ଆୟୋଜିତ ‘ଇଣ୍ଡିଆ ଆଇଡ଼ିଆ ସମ୍ମିଟ’ରେ ଯୋଗଦେଇ ପ୍ରମୁଖ ଶିଳ୍ପ ସମୂହର ମୁଖ୍ୟଙ୍କ ସହ ଆଲୋଚନା କରିଛନ୍ତି।

ଭାରତ ଏବଂ ୟୁଏସ ସମ୍ପର୍କରେ ଶିକ୍ଷା ଓ ଦକ୍ଷତା ବିକାଶ ଏକ ପ୍ରମୁଖ ସ୍ତମ୍ଭ। ଶିକ୍ଷା ଓ ଦକ୍ଷତା ବିକାଶ କ୍ଷେତ୍ରରେ ଭାରତର କଳ୍ପନା, ଶିକ୍ଷାର ଅନ୍ତର୍ଜାତୀୟକରଣ ଉପରେ ଜାତୀୟ ଶିକ୍ଷା ନୀତିର ଗୁରୁତ୍ୱ ଓ ଯୁବବର୍ଗଙ୍କୁ ସ୍କିଲି, ରି-ସ୍କିଲିଂ ଏବଂ ଅପ୍ ସ୍କିଲିଂ କରିବା ଦିଗରେ ଭାରତର ପ୍ରୟାସ ଉପରେ କେନ୍ଦ୍ରମନ୍ତ୍ରୀ ଶ୍ରୀ ପ୍ରଧାନ ଏହି ସମ୍ମିଟରେ ଆଲୋଚନା କରିଛନ୍ତି। ଭାରତରେ ଡ଼ିଜିଟାଲ ଅର୍ଥନୀତି, ଆକାଂକ୍ଷୀ ଜନସଂଖ୍ୟା, ଜ୍ଞାନ ଆଧାରିତ ସମାଜ, ଅନେକ ସଂସ୍କାର ଭାରତ ପାଇଁ ଅପାର ସମ୍ଭାବନା ଆଣିଦେଇଛି।

ଶିକ୍ଷା, ଗବେଷଣା ଓ ଦକ୍ଷତା ବିକାଶ କ୍ଷେତ୍ରରେ ସମ୍ପର୍କକୁ ଅଧିକ ସୁଦୃଢ଼ କରିବା ଦିଗରେ ଶ୍ରୀ ପ୍ରଧାନ ଗୁରୁତ୍ୱାରୋପ କରିଥିଲେ। ଏହାସହ  ଦେଶର ବ୍ୟାପକ ଭାବରେ ରୂପାନ୍ତରିତ ହେଉଥିବା ଶିକ୍ଷା ଓ ଦକ୍ଷତା ଦୃଶ୍ୟପଟ୍ଟରେ ସହଯୋଗୀ ହେବା ପାଇଁ ଆମେରିକୀୟ କମ୍ପାନୀ ଏବଂ ଶିକ୍ଷାନୁଷ୍ଠାନକୁ ସେ ନିମନ୍ତ୍ରଣ ଦେଇଛନ୍ତି।

Categories
ଆଜିର ଖବର ଖେଳ ଜାତୀୟ ଖବର

ହାତରୁ ଖସିଲା ଏସିଆ କପ୍ ୨୦୨୨!, ବର୍ତ୍ତମାନ ବିଶ୍ୱକପ ପୂର୍ବରୁ କରିବାକୁ ପଡିବ ୩ ଟି ପରିବର୍ତ୍ତନ

ନୂଆଦିଲ୍ଲୀ: ଡିଫେଣ୍ଡିଂ ଚାମ୍ପିଅନ୍ ଭାରତର ଏଥର ଏସିଆ କପ୍ ଜିତିବାର ସମ୍ଭାବନା ଦେଖାଯାଉନାହିଁ। ପାକିସ୍ତାନ ବିପକ୍ଷ ସୁପର-୪ ମ୍ୟାଚ୍ ହାରିଯିବା ପରେ ଭାରତ ମଧ୍ୟ ଶ୍ରୀଲଙ୍କା ଠାରୁ ହାରିଛି। ଏହା ସହିତ ତାଙ୍କର ଫାଇନାଲରେ ପହଞ୍ଚିବାର ଆଶା ପ୍ରାୟ ଶେଷ ହୋଇଯାଇଛି। ଗତ ବର୍ଷ ଟି-୨୦ ବିଶ୍ୱକପ ପରେ ରୋହିତ ଶର୍ମା ଅଧିନାୟକ ହୋଇଥିଲେ, ତା’ପରେ ରାହୁଲ ଦ୍ରାବିଡ ଭାରତୀୟ ଦଳର କୋଚ ହୋଇଥିଲେ। ଏହି ଦୁଇଜଣଙ୍କ ଦାୟିତ୍ଵ ଗ୍ରହଣ କରିବା ପରଠାରୁ ଭାରତୀୟ କ୍ରିକେଟ୍ ରେ କ୍ରମାଗତ ପରିବର୍ତ୍ତନ ଆସୁଛି। ବିଶେଷକରି ଟିମ୍ ଇଣ୍ଡିଆ, ଟି-୨୦ କ୍ରିକେଟ୍ ଏକ ଭିନ୍ନ ଢଙ୍ଗରେ ଖେଳୁଛି, କାରଣ ଚଳିତ ବର୍ଷ ଅକ୍ଟୋବର-ନଭେମ୍ବରରେ ହେବାକୁ ଥିବା ଟି-୨୦ ବିଶ୍ୱକପ ଏବଂ ଭାରତ ଗତ ବର୍ଷର ବିଫଳତାକୁ ଭୁଲିଯିବାକୁ ଚାହୁଁଛି ଏବଂ ଏଥର ଟୁର୍ଣ୍ଣାମେଣ୍ଟରେ ଭଲ ପ୍ରଦର୍ଶନ କରିବାକୁ ଚାହୁଁଛି। କିନ୍ତୁ ଏପରି କିଛି ନିଷ୍ପତ୍ତି ଯୋଗୁଁ ବର୍ତ୍ତମାନ ଦଳ ଉପରେ ପ୍ରଭାବ ପଡୁଥିବା କୁହାଯାଉଛି। ଅନ୍ତତଃପକ୍ଷେ ଏହା ଏସିଆ କପରେ ଏହାର ନଜର ଆସୁଛି।

ଏସିଆ କପ୍ ଆରମ୍ଭ ପୂର୍ବରୁ ଭାରତ ଟାଇଟଲ୍ ପାଇଁ ଏକ ଶକ୍ତିଶାଳୀ ପ୍ରତିଦ୍ୱନ୍ଦ୍ୱୀ ଭାବରେ ବିବେଚନା କରାଯାଉଥିଲା। କିନ୍ତୁ, ସୁପର-୪ ରାଉଣ୍ଡର ପ୍ରଥମ ୩ ମ୍ୟାଚ୍ ପରେ ହିଁ ସମସ୍ତ ସମୀକରଣ ବଦଳି ଯାଇଛି। ଡିଫେଣ୍ଡିଂ ଚାମ୍ପିଅନ୍ ଇଣ୍ଡିଆର ହାତରୁ ଏସିଆ କପ୍ ପ୍ରାୟ ଖସି ଯାଇଛି ଏବଂ ବର୍ତ୍ତମାନ ପାକିସ୍ତାନ ସହିତ ଶ୍ରୀଲଙ୍କା ମଧ୍ୟ ଟାଇଟଲ୍ ପାଇଁ ପ୍ରତିଦ୍ୱନ୍ଦ୍ୱୀ ଭାବରେ ଉଭା ହୋଇଛି।

ବାରମ୍ବାର ପରୀକ୍ଷଣ ବିଷୟରେ ଯଦିବା ରୋହିତ ଶର୍ମା ଏବଂ କୋଚ୍ ରାହୁଲ ଦ୍ରାବିଡ କୁହନ୍ତି। କିନ୍ତୁ, ପାକିସ୍ତାନ ଏବଂ ଶ୍ରୀଲଙ୍କା ବିପକ୍ଷ ଏସିଆ କପ୍‌ର କ୍ରମାଗତ ଦୁଇଟି ପରାଜୟ ଭାରତୀୟ ଦଳ ପାଇଁ ସତର୍କ ଘଣ୍ଟି ବାଜିଛି। ଯଦି ଆପଣ ତଥାପି ଆବଶ୍ୟକତାଠାରୁ ଅଧିକ ପରିଚାଳନା ଏବଂ ପରୀକ୍ଷଣ କରନ୍ତି, ତେବେ ଭାରତକୁ ଶେଷ ଟି-୨୦ ବିଶ୍ୱକପ ଭଳି ହେବାକୁ ଅଧିକ ସମୟ ଲାଗିବ ନାହିଁ। ଯଦି ଅଷ୍ଟ୍ରେଲିଆରେ ଆୟୋଜିତ ହେବାକୁ ଥିବା ଟି-୨୦ ବିଶ୍ୱକପ ଜିତିବାକୁ ଭାରତୀୟ ଦଳ ଚାହୁଁଛି, ତେବେ ତୁରନ୍ତ ତିନୋଟି ଜିନିଷକୁ ଉନ୍ନତ କରିବାକୁ ପଡିବ। ଆସନ୍ତୁ ସେଗୁଡ଼ିକୁ ଗୋଟିଏ ପରେ ଗୋଟିଏ ବୁଝିବା।

ବର୍ତ୍ତମାନ ଟି-୨୦ ବିଶ୍ୱକପ ଆରମ୍ଭ ହେବାକୁ ମାତ୍ର ୪୦ ଦିନ ବାକି ଅଛି। ଏସିଆ କପ୍ ପରେ ଭାରତକୁ ଅଷ୍ଟ୍ରେଲିଆ ଏବଂ ଦକ୍ଷିଣ ଆଫ୍ରିକା ବିପକ୍ଷରେ ଘରୋଇ ସିରିଜ୍ ଖେଳିବାକୁ ପଡିବ। ଯେଉଁଠାରେ ଭାରତ ଅଷ୍ଟ୍ରେଲିଆ ବିରୋଧରେ ୩ ଟି-୨୦ ଖେଳିବ, ସେହିଭଳି ଦକ୍ଷିଣ ଆଫ୍ରିକା ବିରୋଧରେ ୩ ଟି-୨୦ ବ୍ୟତୀତ ୩ ମ୍ୟାଚ ବିଶିଷ୍ଟ ଦିନିକିଆ ସିରିଜ୍ ଖେଳିବ। ଏହି ସିରିଜର ଶେଷ ମ୍ୟାଚ୍ ଅକ୍ଟୋବର ୧୧ ତାରିଖରେ ଶେଷ ହେବ ଏବଂ ଏହାର କିଛି ସମୟ ପରେ ଭାରତୀୟ ଦଳ ଟି-୨୦ ବିଶ୍ୱକପ ପାଇଁ ଅଷ୍ଟ୍ରେଲିଆ ଅଭିମୁଖେ ଯାତ୍ରା କରିବ। ଅର୍ଥାତ୍ ଏସିଆ କପ୍ ପରେ ଭାରତୀୟ ଦଳ ଟି-୨୦ ବିଶ୍ୱକପ ପୂର୍ବରୁ ୬ ଟି-୨୦ ଖେଳିବ। ଏପରି ପରିସ୍ଥିତିରେ, ବର୍ତ୍ତମାନ ଭାରତୀୟ ଦଳକୁ ପରୀକ୍ଷଣରୁ ଦୂରେଇ ରହିବାକୁ ପଡିବ ଏବଂ ଏକାଦଶ ଖେଳିବାକୁ ସ୍ଥିର କରିବ। ଏଥିରେ ମଧ୍ୟ ଟପ୍ ଅର୍ଡର ସ୍ଥିର କରିବା ସବୁଠାରୁ ଗୁରୁତ୍ୱପୂର୍ଣ୍ଣ।

ଗତ ଟି-୨୦ ବିଶ୍ୱକପରେ ଭାରତର ପରାଜୟର କାରଣ ହେଉଛି ଟପ୍ ଅର୍ଡର। ତେବେ ଏସିଆ କପରେ ମଧ୍ୟ ଭାରତ ସମାନ ଟପ୍ ଅର୍ଡର ସହିତ ଅବତରଣ କରିଥିଲା। ସମସ୍ତ ମ୍ୟାଚ୍‌ରେ କେଏଲ ରାହୁଲ ରୋହିତ ଶର୍ମାଙ୍କ ସହ ବ୍ୟାଟିଂ ଆରମ୍ଭ କରିଥିଲେ ଏବଂ ବିରାଟ କୋହଲି ନମ୍ବର- ୩ ରେ ଅବତରଣ କରିଥିଲେ। କିନ୍ତୁ, ପ୍ରଦର୍ଶନ ଦୃଷ୍ଟିରୁ କେ.ଏଲ୍ ରାହୁଲ ବିଫଳ ହୋଇଥିଲେ। ସେ ପ୍ରତ୍ୟାବର୍ତ୍ତନ କରିବା ଦିନଠାରୁ ରନ୍ ସ୍କୋର କରିବାକୁ ସଂଘର୍ଷ କରିଆସୁଛନ୍ତି। ସେ ୧୦୪ ଷ୍ଟ୍ରାଇକ ରେଟ ହିସାବରେ ୪ ଟି ମ୍ୟାଚ ଖେଳି ୭୦ ରନ୍ ସଂଗ୍ରହ କରିଥିଲେ। ଟି-୨୦ ଦୃଷ୍ଟିରୁ ଏହା ଭଲ ବିବେଚନା କରାଯିବ ନାହିଁ। ଏହା ମଧ୍ୟ ଯେତେବେଳେ ଭାରତୀୟ ଆକ୍ରାମଣାତ୍ମକ ଢଙ୍ଗରେ ଖେଳିବା ପାଇଁ ଚିନ୍ତା କରୁଛି। କୋହଲି ନିଶ୍ଚିତ ଭାବରେ ଫର୍ମକୁ ଫେରିଥିବାର ନଜର ଆସିଛନ୍ତି। କିନ୍ତୁ, ତାଙ୍କର ଷ୍ଟ୍ରାଇକ୍ ହାର ମଧ୍ୟ ୧୨୨ ଥିଲା। ଯାହା ଟି-୨୦ ରେ ଟପ୍ ଅର୍ଡର ବ୍ୟାଟ୍ସମ୍ୟାନଙ୍କ ଦୃଷ୍ଟିରୁ ଭଲ ବିବେଚନା କରାଯିବ ନାହିଁ।

ରୋହିତ ଆକ୍ରମଣକାରୀ କ୍ରିକେଟ୍ ଖେଳୁଛନ୍ତି। ଏକ ଭଲ ଆରମ୍ଭ ମଧ୍ୟ ଦେଇଛନ୍ତି। କିନ୍ତୁ, ସେ ଏହାକୁ ଏକ ବଡ଼ ଇନିଂସରେ ପରିଣତ କରିବାକୁ ସକ୍ଷମ ହୋଇପାରୁନାହାନ୍ତି। ସେଥିପାଇଁ ମଧ୍ୟମ କ୍ରମରେ ଚାପ ଆସୁଛି। ଏଭଳି ପରିସ୍ଥିତିରେ ଭାରତୀୟ ଦଳକୁ ଟପ୍ ଅର୍ଡରର ସମସ୍ୟାକୁ ଦୂର କରିବାକୁ ପଡ଼ିବ।

ଗତ କିଛି ମାସ ମଧ୍ୟରେ, ଅନେକ ଖେଳାଳିଙ୍କୁ ପରୀକ୍ଷଣର ଏକ ଅଂଶ ଭାବରେ ଓପନିଂରେ ଚେଷ୍ଟା କରାଯାଇଥିଲା। ଋଷଭ ପନ୍ତ, ସୂର୍ଯ୍ୟକୁମାର ଯାଦବ ଏବଂ ଦୀପକ ହୁଡା ଇନିଂସ ଆରମ୍ଭ କରିଥିଲେ। ଏଥିରେ ସୂର୍ଯ୍ୟକୁମାର ପ୍ରଭାବଶାଳୀ ବୋଲି ପ୍ରମାଣିତ ହୋଇଛନ୍ତି। ଏଭଳି ପରିସ୍ଥିତିରେ ଯଦି କେ.ଏଲ୍ ରାହୁଲ ରନ୍ ସ୍କୋର କରିବାକୁ ସଂଘର୍ଷ କରୁଛନ୍ତି, ତେବେ ସୁର୍ଯ୍ୟକୁମାରଙ୍କୁ ଟପ୍ କ୍ରମରେ ପରୀକ୍ଷା କରାଯାଇପାରିବ। ସେ ଏହି ଫର୍ମାଟରେ ସର୍ବୋତ୍ତମ ବ୍ୟାଟ୍ସମ୍ୟାନ୍। ସେ ପ୍ରତ୍ୟେକ କୋଣକୁ ସଟ୍ ଖେଳିପାରନ୍ତି। ଟପ୍ ଅର୍ଡରରେ ଆସିବା ରୋହିତ ଶର୍ମାଙ୍କ ଉପରେ ଚାପ ହ୍ରାସ କରିପାରେ ଏବଂ ସେ ଇନିଂସ ପରିଚାଳନା କରିବାରେ ଭୂମିକା ଗ୍ରହଣ କରିପାରନ୍ତି।

ତେବେ ଭାରତୀୟ ଦଳ ପରିଚାଳନାରେ ଅଧିକ ସମୟ ନାହିଁ, ଯଦି ସୂର୍ଯ୍ୟକୁମାରଙ୍କୁ ଓପନିଂରେ ବିଚାର କରିବାକୁ ପଡିବ, ତେବେ ତାଙ୍କୁ ଅଷ୍ଟ୍ରେଲିଆ ଏବଂ ଦକ୍ଷିଣ ଆଫ୍ରିକା ବିପକ୍ଷ ସମସ୍ତ ୬ ଟି-୨୦ ରେ ପୁନର୍ବାର ଏହି ଦାୟିତ୍ଵ ଦେବାକୁ ପଡିବ। ଯାହାଫଳରେ ସେ ଏହି ଭୂମିକାରେ ନିଜକୁ ଗଢି ପାରିବେ।

ଟି-୨୦ ବିଶ୍ୱକପ ମୁଣ୍ଡ ଉପରେ ଅଛି ଏବଂ ୱିକେଟ୍ କିପର କିଏ ହେବ ତାହା ଏପର୍ଯ୍ୟନ୍ତ ସ୍ଥିର ହୋଇନାହିଁ। ଏହି ଦାୟିତ୍ୱ ଋଷଭ ପନ୍ତଙ୍କ ଦ୍ୱାରା କରାଯିବ କିମ୍ବା ଦଳ ଅଭିଜ୍ଞ ଦୀନେଶ କାର୍ତ୍ତିକଙ୍କ ସହିତ ଯିବ। ଏହା ସହିତ ପରୀକ୍ଷା ମଧ୍ୟ କରାଯାଉଛି। କାର୍ତ୍ତିକ କେବଳ ଜଣେ ୱିକେଟ୍ କିପର ନୁହଁନ୍ତି, ଦଳ ତାଙ୍କୁ ମ୍ୟାଚ୍ ଫିନିସର୍ ଭାବରେ ଦେଖୁଛି। ସେ ପ୍ରତ୍ୟାବର୍ତ୍ତନ କରିବା ଦିନଠାରୁ ସେ ଅନେକ ଗୁରୁତ୍ୱପୂର୍ଣ୍ଣ ଇନିଂସ ଖେଳିଛନ୍ତି। କିନ୍ତୁ, ତାଙ୍କୁ ଏସିଆ କପରେ ୨ ଟି ମ୍ୟାଚ୍ ଖେଳିବାକୁ ପଡିଲା। ସେ ପାକିସ୍ତାନ ଏବଂ ଶ୍ରୀଲଙ୍କା ବିପକ୍ଷ ସୁପର-୪ ମ୍ୟାଚ୍‌ରେ ଏକାଦଶରେ ଅଂଶଗ୍ରହଣ କରିନଥିଲେ। ପନ୍ତ ତାଙ୍କ ସ୍ଥାନରେ ଖେଳିଥିଲେ। କିନ୍ତୁ, ସେ ମଧ୍ୟ ବ୍ୟାଟ୍ ଦ୍ଵାରା କିଛି ବିଶେଷ କରିପାରିନଥିଲେ।

ହଂକଂ ବିପକ୍ଷ ମ୍ୟାଚରେ ଭାରତ ଉଭୟ କାର୍ତ୍ତିକ ଏବଂ ପନ୍ତଙ୍କୁ ଖେଳାଇଥିଲା। କିନ୍ତୁ, ଭାରତୀୟ ଦଳ ପରିଚାଳନାର ଏହି ଚିନ୍ତାଧାରା ବୁଝିବା ବାହାରେ, କାରଣ କାର୍ତ୍ତିକ ଏହି ମ୍ୟାଚରେ ବ୍ୟାଟିଂ କରିନଥିଲେ ଏବଂ ସେ ୱିକେଟ୍ କିପିଂ ବଦଳରେ ଆଉଟଫିଲ୍ଡରେ ଦୌଡୁଥିଲେ।

କାର୍ତ୍ତିକ ଏବଂ ପନ୍ତଙ୍କ ପାଇଁ ବାରମ୍ବାର ପରିବର୍ତ୍ତନ କରିବା ଠିକ ନୁହେଁ। ଏହା ତାଙ୍କ ପ୍ରଦର୍ଶନକୁ ମଧ୍ୟ ପ୍ରଭାବିତ କରିଥାଏ ଏବଂ ଦଳରେ ତାଙ୍କ ସ୍ଥାନକୁ ନେଇ ସର୍ବଦା ସନ୍ଦେହ ରହିଥାଏ। ଏଭଳି ପରିସ୍ଥିତିରେ ଯଦି ଅଧିନାୟକ ରୋହିତ ଶର୍ମା ଏବଂ ପ୍ରଶିକ୍ଷକ ଦ୍ରାବିଡଙ୍କୁ ଟି-୨୦ ବିଶ୍ୱକପ ଖେଳିବାକୁ ପଡିବ। ତେବେ ସେମାନଙ୍କ ମଧ୍ୟରୁ ଜଣଙ୍କ ଉପରେ ଭରସା ଦେଖାଇବାକୁ ପଡିବ ଏବଂ ପରେ ତାଙ୍କୁ ସୁଯୋଗ ଦିଆଯିବାଆ ଉଚିତ, ଯାହାଫଳରେ ସେ ତାଙ୍କ ଭୂମିକାରେ ଫିଟ୍ ହୋଇପାରିବେ।

ଗତ ବର୍ଷ ଟି-୨୦ ବିଶ୍ୱକପ ପରଠାରୁ ଭାରତୀୟ ଦଳ ଏହି ଟୁର୍ଣ୍ଣାମେଣ୍ଟର ପରବର୍ତ୍ତୀ ସଂସ୍କରଣ ପାଇଁ ପ୍ରସ୍ତୁତି ଆରମ୍ଭ କରିଥିଲା। ଏହି କାରଣରୁ, ଗତ ବିଶ୍ୱକପ ପରଠାରୁ ଭାରତ ଟି-୨୦ ଫର୍ମାଟରେ ୨୫ ରୁ ଅଧିକ ଖେଳାଳିଙ୍କୁ ଚେଷ୍ଟା କରିଛି। ଏଥିରେ ବୋଲର, ବ୍ୟାଟ୍ସମ୍ୟାନ୍, ୱିକେଟ୍ କିପର ଏବଂ ଅଲରାଉଣ୍ଡର ଅନ୍ତର୍ଭୁକ୍ତ। ଗତ ଟି-୨୦ ବିଶ୍ୱକପ ପରଠାରୁ ଭାରତ ଏପର୍ଯ୍ୟନ୍ତ ୨୭ ଟି-୨୦ ଖେଳିଛି ଏବଂ ଖେଳୁଥିବା ଏକାଦଶରେ ୨୫ ରୁ ଅଧିକ ଖେଳାଳିଙ୍କୁ ପ୍ରୟୋଗ କରିଛି। ଏହି ପରୀକ୍ଷଣ କହିବା ଭଲ ହୋଇପାରେ, ଏହା ବେଞ୍ଚର ଶକ୍ତି ପରୀକ୍ଷା କରିବାକୁ ଏକ ସୁଯୋଗ ଦେଇପାରେ। କିନ୍ତୁ, ଯେତେବେଳେ ଆପଣ ଟି -୨୦ ବିଶ୍ୱକପ ପାଇଁ ପ୍ରସ୍ତୁତ ହେବାକୁ ଏହା କରୁଛନ୍ତି, ସେତେବେଳେ କୌଣସି ସ୍ଥାନରେ ରଣନୀତିରେ ଏକ ଭୁଲ ହେଉଛି।

ଏତେ ସଂଖ୍ୟକ ଖେଳାଳୀ ଚେଷ୍ଟା କରିବା ଏବଂ ବାରମ୍ବାର ଦଳ ମିଶ୍ରଣ ପରିବର୍ତ୍ତନ ହେତୁ, କୌଣସି ଖେଳାଳି ସଠିକ ହୋଇପାରୁନାହାନ୍ତି। ଅଳ୍ପ କିଛି ବ୍ୟାଟ୍ସମ୍ୟାନଙ୍କୁ ବାଦ୍ ଦେଇ ବାକି ଖେଳାଳି କେଉଁ ନମ୍ବରରେ ବ୍ୟାଟିଂ କରିବାକୁ ପଡିବ ତାହା ମଧ୍ୟ ଜାଣନ୍ତି ନାହିଁ। ତାଙ୍କ ବ୍ୟାଟିଂ କ୍ରମକୁ ବାରମ୍ବାର ବଦଳାଯାଉଛି। ବୋଲରଙ୍କ କ୍ଷେତ୍ରରେ ମଧ୍ୟ ସମାନ ଅବସ୍ଥା।

ଯଦି ଆମେ ରବି ବିଶ୍ନୋଇଙ୍କ ଉଦାହରଣ ନେବା, ତେବେ ତାଙ୍କୁ ପାକିସ୍ତାନ ବିପକ୍ଷ ସୁପର-୪ ମ୍ୟାଚ୍‌ରେ ସୁଯୋଗ ଦିଆଯାଇଛି। ସେ ସବୁଠାରୁ କଞ୍ଜୁସ ବୋଲର ବୋଲି ପ୍ରମାଣ କରିଥିଲେ। ଯେତେବେଳେ ୟୁଜବେନ୍ଦ୍ର ଚହଲ, ହାର୍ଦ୍ଦିକ ପାଣ୍ଡ୍ୟା ଏବଂ ଭୁବନେଶ୍ବର କୁମାରଙ୍କ ଭଳି ବୋଲରମାନେ ଅଧିକ ରନ ଦେଇଥିଲେ। ବିଶ୍ନୋଇ ଭଲ ବୋଲିଂ କରିଥିଲେ। କିନ୍ତୁ, ଶ୍ରୀଲଙ୍କା ବିପକ୍ଷରେ ତାଙ୍କୁ ବାଦ ଦିଆଯାଇଥିଲା। ଏହା କେବଳ କାରଣ ଶ୍ରୀଲଙ୍କା ଦଳରେ ଅଧିକ ବାମହାତୀ ବ୍ୟାଟ୍ସମ୍ୟାନ୍ ଅଛନ୍ତି ଏବଂ ଆର ଅଶ୍ୱିନ୍ ସେମାନଙ୍କ ବିପକ୍ଷରେ ଅଧିକ ପ୍ରଭାବଶାଳୀ ହୋଇପାରନ୍ତି। କୌତୁହଳର ବିଷୟ ହେଉଛି ବାମହାତୀ ବ୍ୟାଟ୍ସମ୍ୟାନମାନେ ଖେଳିବାକୁ ସେତେଟା ସୁଯୋଗ ପାଇନଥିଲେ। ଶ୍ରୀଲଙ୍କାର ଉଭୟ ଡାହାଣହାତୀ ଓପନର୍ ୧୧ ଓଭର ଖେଳିଥିଲେ।

ଏଥି ସହିତ, ଯଦି ଆମେ ଶ୍ରୀଲଙ୍କା ଏବଂ ପାକିସ୍ଥାନକୁ ଦେଖିବା ଗତ କିଛି ମାସ ମଧ୍ୟରେ, ଏହି ଦଳମାନେ ମଧ୍ୟ ଟି-୨୦ ରେ ୧୮ ରୁ ଅଧିକ ଖେଳାଳିଙ୍କୁ ସୁଯୋଗ ଦେଇଛନ୍ତି। କିନ୍ତୁ, ଉଭୟ ଦଳ ଖେଳାଳି ଏକାଦଶ ଏବଂ ଦଳ ମିଶ୍ରଣକୁ ବାରମ୍ବାର ପରିବର୍ତ୍ତନ କରିନଥିଲେ। ଏହି କାରଣରୁ ଟି-୨୦ ବିଶ୍ୱକପ ପୂର୍ବରୁ ଏହି ଦୁଇ ଦଳ ଭଲ ଗତି ହାସଲ କରିଛନ୍ତି। ଏବେ ଭାରତ ଆଗରେ ଏକ ବଡ଼ ଚ୍ୟାଲେଞ୍ଜ ରହିଛି।

Categories
ବିଶେଷ ଖବର ବ୍ୟବସାୟ

ବ୍ରିଟେନକୁ ପଛରେ ପକାଇ ବିଶ୍ଵର ପଞ୍ଚମ ସର୍ବବୃହତ ଅର୍ଥବ୍ୟବସ୍ଥା ହେଲା ଭାରତ

ନୂଆଦିଲ୍ଲୀ: ଅନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମଏଫ) ର ଆକଳନ ଅନୁଯାୟୀ, ବ୍ରିଟେନକୁ ପଛରେ ପକାଇ ଭାରତ ବିଶ୍ଵର ପଞ୍ଚମ ସର୍ବବୃହତ ଅର୍ଥବ୍ୟବସ୍ଥା ହୋଇପାରିଛି। କେବଳ ସେତିକି ନୁହେଁ ଅନ୍ୟାନ୍ୟ ପ୍ରଗତି ସୂଚକାଙ୍କରେ ମଧ୍ୟ ଭାରତର ସ୍ଥିତିରେ ସୁଧାର ଆସିଛି। ଜି-୨୦ ରାଷ୍ଟ୍ର ସମୂହଙ୍କ ମଧ୍ୟରେ ଭାରତ ସବୁଠୁ ଦ୍ରୁତ ଅଭିବୃଦ୍ଧିଶୀଳ ଅର୍ଥବ୍ୟବସ୍ଥା ଭାବେ ପ୍ରଗତି ହାସଲ କରୁଛି। ଭାରତରେ ବିଶ୍ଵର ସବୁଠୁ ଅଧିକ ସ୍ମାର୍ଟଫୋନ ଡାଟା ଉପଭୋକ୍ତା ରହିଛନ୍ତି। ସେହିପରି ଭାରତରେ ଅଛନ୍ତି ବିଶ୍ଵର ଦ୍ୱିତୀୟ ସର୍ବାଧିକ ଇଣ୍ଟରନେଟ୍‌ ବ୍ୟବହାରକାରୀ। ବିଶ୍ଵ ଖୁଚୁରା ସୂଚକାଙ୍କରେ ଭାରତ ସମ୍ପ୍ରତି ଦ୍ୱିତୀୟ ସ୍ଥାନ ହାସଲ କରିଛି। ସାରା ବିଶ୍ଵରେ ଭାରତ ତୃତୀୟ ବୃହତମ ଶକ୍ତି ଉପଭୋକ୍ତା ରାଷ୍ଟ୍ର ହୋଇପାରିଛି। ସେହିପରି ଭାରତ ହେଉଛି ବିଶ୍ଵର ତୃତୀୟ ସର୍ବବୃହତ ଉପଭୋକ୍ତା ବଜାର। ନବୋନ୍ମେଷ ସୂଚକାଙ୍କରେ ଭାରତ ଲଗାତାର ଭାବେ ନିଜ ମାନ୍ୟତାରେ ସୁଧାର ଆଣିଛି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଦେଶର ଅର୍ଥବ୍ୟବସ୍ଥାରେ କ୍ରମାଗତ ଭାବେ ବିଭିନ୍ନ ସଂସ୍କାରମୂଳକ ପଦକ୍ଷେପ ଗ୍ରହଣ କରାଯାଉଛି। ଯାହାଫଳରେ ଦେଶରେ ସମାବେଶୀ ବିକାଶ ସୁନିଶ୍ଚିତ ହୋଇଛି ଏବଂ ବିଶ୍ଵ ସ୍ତରରେ ଭାରତର ସମ୍ମାନ ବଢ଼ିଛି। ଚଳିତ ବର୍ଷ ଭାରତ ୬୭୦ ବିଲିୟନ ଆମେରିକୀୟ ଡଲାର ବା ପ୍ରାୟ ୫୦ ଲକ୍ଷ କୋଟି ଟଙ୍କାର ବସ୍ତୁ ରପ୍ତାନି କରିଛି। ପ୍ରତ୍ୟେକ ଆହ୍ୱାନର ସଫଳତାର ସହ ମୁକାବିଲା କରି ଭାରତର ୪୧୮ ବିଲିୟନ ଡଲାର ବା ପ୍ରାୟ ୩୧ ଲକ୍ଷ କୋଟି ଟଙ୍କାର ବାଣିଜ୍ୟିକ ରପ୍ତାନି କରି ନୂଆ ରେକର୍ଡ ପ୍ରତିଷ୍ଠା କରିଛି।

ବିଗତ ଆଠ ବର୍ଷ ମଧ୍ୟରେ ୧୦୦ରୁ ଅଧିକ ବିଲିୟନ ଡଲାର କମ୍ପାନୀ ଭାରତରେ ଗଠନ ହୋଇଛନ୍ତି। ପ୍ରତିମାସରେ ନୂଆ ନୂଆ କମ୍ପାନୀ ମୁଣ୍ଡ ଟେକୁଛନ୍ତି। ବିଗତ ଆଠ ବର୍ଷ ମଧ୍ୟରେ ସୃଷ୍ଟି ହୋଇଥିବା ଏସବୁ ୟୁନିକର୍ଣ୍ଣର ମୂଲ୍ୟ ବର୍ତ୍ତମାନ ପ୍ରାୟ ୧୫୦ ବିଲିୟନ ଆମେରିକୀୟ ଡଲାର ବା ୧୨ ଲକ୍ଷ କୋଟି ଟଙ୍କା ଅତିକ୍ରମ କରିଛି।

୨୦୧୪ ପରଠାରୁ ୮୦୦ ଦିନ ମଧ୍ୟରେ ପ୍ରଥମ ୧୦ ହଜାର ଷ୍ଟାର୍ଟଅପ୍‌ ଗଠନ ହୋଇଥିଲା। ଏହାପରେ ମାତ୍ର ୨୦୦ ଦିନ ମଧ୍ୟରେ ୧୦ହଜାର ନୂଆ ଷ୍ଟାର୍ଟଅପ୍‌ ଏହି ଇକୋସିଷ୍ଟମ ସହ ଯୋଡ଼ି ହୋଇଛନ୍ତି। ବିଗତ ଆଠ ବର୍ଷ ମଧ୍ୟରେ ଦେଶରେ ଷ୍ଟାର୍ଟଅପଗୁଡ଼ିକର ସଂଖ୍ୟା ମାତ୍ର କେତେ ଶହରୁ ଏବେ ୭୦ହଜାରରୁ ଅଧିକରେ ପହଞ୍ଚିଛି। ଦେଶର ପ୍ରାୟ ସବୁ ରାଜ୍ୟରେ, ବିଶେଷ କରି ଛୋଟ ଛୋଟ ସହରରେ ଷ୍ଟାର୍ଟଅପଗୁଡ଼ିକ ପ୍ରତିଷ୍ଠା ହେଉଛନ୍ତି। ଦେଶର ୬୫୦ରୁ ଅଧିକ ସହରରେ ଷ୍ଟାର୍ଟଅପଗୁଡ଼ିକ ରହିଥିବା ବେଳେ ଏମାନଙ୍କ ମଧ୍ୟରୁ ୫୦ ପ୍ରତିଶତ ଦ୍ୱିତୀୟ ଓ ତୃତୀୟ ଶ୍ରେଣୀର ସହରରେ ରହିଛନ୍ତି।

ଦେଶରେ ଗତ କିଛି ବର୍ଷ ଏକ ଡିଜିଟାଲ ବିପ୍ଳବ ଆସିଛି। ୨୦୧୪ରେ ମାତ୍ର ୬.୫ କୋଟି ବ୍ରଡବ୍ୟାଣ୍ଡ ଉପଭୋକ୍ତା ଥିବା ବେଳେ ଆଜି ସେମାନଙ୍କ ସଂଖ୍ୟା ୭୮ କୋଟିରୁ ଅଧିକକୁ ଅତିକ୍ରମ କରି ଯାଇଛି। ୨୦୧୪ରେ ୧ଜିବି ଡାଟା ମୂଲ୍ୟ ୨୦୦ ଟଙ୍କା ଥିଲା ଆଜି ଏହା ୧୧-୧୨ ଟଙ୍କାକୁ ହ୍ରାସ ପାଇଛି। ୨୦୧୪ରେ ଦେଶରେ ୧୧ ଲକ୍ଷ କିଲୋମିଟର ପର୍ଯ୍ୟନ୍ତ ଅପ୍ଟିକାଲ ଫାଇବର ବିଛା ଯାଇଥିଲା। ଏବେ ୨୮ ଲକ୍ଷରୁ ଅଧିକ କିଲୋମିଟର କ୍ଷେତ୍ରରେ ଅପ୍ଟିକାଲ ଫାଇବର ବିଛା ଯାଇପାରିଛି।

ଭାରତରେ ବିନିର୍ମାଣ ବା ଉତ୍ପାଦନ ୟୁନିଟ୍‌ ପ୍ରତିଷ୍ଠା କରିବା ଲାଗି ସରକାର ୨ ଲକ୍ଷ କୋଟି ଟଙ୍କାର ପିଏଲଆଇ ଯୋଜନା ଆରମ୍ଭ କରିଛନ୍ତି। ଗତ ଆଠ ବର୍ଷ ମଧ୍ୟରେ ସରକାର ଗୋଟିଏ ସିଙ୍ଗଲ କ୍ଲିକ୍‌ ଜରିଆରେ ବିଭିନ୍ନ ସରକାରୀ ଯୋଜନାର ହିତାଧିକାରୀମାନଙ୍କୁ ସିଧାସଳଖ ୨୨ ଲକ୍ଷ କୋଟି ଟଙ୍କା ହସ୍ତାନ୍ତର କରିଛନ୍ତି। ଡିବିଟି ଜରିଆରେ ଏହି ଅର୍ଥ ସିଧାସଳଖ ହିତାଧିକାରୀଙ୍କ ବ୍ୟାଙ୍କ ଆକାଉଣ୍ଟରେ ପହଞ୍ଚିଛି।

ସେହିପରି ଦେଶରେ ବହୁମୁଖି ଯୋଗାଯୋଗ ବ୍ୟବସ୍ଥା ପ୍ରତି ଗୁରୁତ୍ୱ ଦିଆଯାଉଛି। ସାଗରମାଳା, ଭାରତମାଳା, ପର୍ବତମାଳା, ବନ୍ଦର ଆଧାରିତ ବିକାଶ ଜରିଆରେ ଯୋଗାଯୋଗ ଭିତ୍ତିଭୂମିରେ ସୁଧାର ଆସିଛି। ସାମାଜିକ ଏବଂ ଭୌତିକ ଭିତ୍ତିଭୂମିରେ ଅଭୂତପୂର୍ବ ନିବେଶ ଦେଖିବାକୁ ମିଳିଛି। ଦେଶରେ ସହମତିର ଏକ ପରିବେଶ ସୃଷ୍ଟି ହୋଇଛି। ନୂଆ ଜାତୀୟ ଶିକ୍ଷା ନୀତିର କାର୍ଯ୍ୟକାରିତାରେ ଏହା ପ୍ରତିଫଳିତ ହୋଇଛି। ଦେଶରେ ନୂଆ ସ୍ୱାସ୍ଥ୍ୟ ନୀତି ଆଣିବା ଲାଗି କାର୍ଯ୍ୟ ଜାରି ରହିଛି। ଆଜି ଦେଶରେ ରେକର୍ଡ ସଂଖ୍ୟକ ନୂଆ ବିମାନ ବନ୍ଦର ନିର୍ମାଣ ହେଉଛି। ଛୋଟ ଛୋଟ ସହର ବିମାନ ମାର୍ଗ ସହ ଯୋଡ଼ି ହେଉଛନ୍ତି। ମେଟ୍ରୋ ରେଳ ସେବାର ସମ୍ପ୍ରସାରଣ ଆଜି ଏତେ ପରିମାଣରେ ହେଉଛି ଯେ ପୂର୍ବରୁ ଏହା କେବେ ଦେଖିବାକୁ ମିଳିନଥିଲା। ଦେଶରେ ରେକର୍ଡ ସଂଖ୍ୟକ ନୂଆ ମୋବାଇଲ ଟାୱାର ସଂଯୋଗ କରାଯାଉଛି। ଅତ୍ୟାଧୁନିକ ଫାଇଭ୍‌ ଜି ସେବା ଦେଶରେ କାର୍ଯ୍ୟକାରୀ ହେବାକୁ ଯାଉଛି। ଭାରତରେ ଆଜି ରେକର୍ଡ ସଂଖ୍ୟକ ଗ୍ରାମକୁ ଅପ୍ଟିକାଲ ଫାଇଭର ସଂଯୋଗ ହୋଇପାରିଛି।

ଦେଶର ଜନସାଧାରଣଙ୍କ ମଧ୍ୟରେ ବିଶ୍ବାସ ବୃଦ୍ଧି ପାଇଛି। ଉତ୍ତମ ପ୍ରଶାସନ ପାଇଁ ଅଣାଯାଇଥିବା ପ୍ରଯୁକ୍ତିକୁ ଲୋକମାନେ ଗ୍ରହଣ କରୁଛନ୍ତି। ବିଶ୍ଵର ଶ୍ରେଷ୍ଠ ଡିଜିଟାଲ ଅର୍ଥ ପଇଠ ପ୍ଲାଟଫର୍ମ ୟୁପିଆଇ ବା ୟୁନିଫାଏଡ ଇଣ୍ଟରଫେସ ପ୍ରତି ଜନସାଧାରଣଙ୍କ ଅଭୂତପୂର୍ବ ସମର୍ଥନ ଦେଖିବାକୁ ମିଳିଛି। ଏହା ଡିଜିଟାଲ ସଂସ୍କାର ପ୍ରତି ଜନସାଧାରଣଙ୍କ ଆସ୍ଥାକୁ ପ୍ରତିଫଳିତ କରିଛି। ବିଶ୍ଵର ୪୦ ପ୍ରତିଶତ ଡିଜିଟାଲ କାରବାର ଭାରତରେ ହେଉଛି। ଦୂରବର୍ତ୍ତୀ ଗାଁ ଠାରୁ ଆରମ୍ଭ କରି ବଡ଼ ସହର ପର୍ଯ୍ୟନ୍ତ ରାସ୍ତାକଡ଼ ଉଠାଦୋକାନୀଙ୍କ ଠାରୁ ଆରମ୍ଭ କରି ବଡ଼ ବ୍ୟବସାୟୀଙ୍କ ପର୍ଯ୍ୟନ୍ତ, ସମସ୍ତେ ୧୦-୨୦ ଟଙ୍କାରୁ ଆରମ୍ଭ କରି ଲକ୍ଷ ଲକ୍ଷ ଟଙ୍କା ପର୍ଯ୍ୟନ୍ତ ଦେଣନେଣ ୟୁପିଆଇ ମାଧ୍ୟମରେ କରୁଛନ୍ତି।

ଦେଶରେ ସମାବେଶୀ ବିକାଶ ଦେଖିବାକୁ ମିଳିଛି। ପିଏମ କିଷାନ ସମ୍ମାନ ନିଧି ଯୋଜନାରେ ଦେଶର ୧୧ କୋଟି ଚାଷୀଙ୍କ ବ୍ୟାଙ୍କ ଆକାଉଣ୍ଟକୁ ପ୍ରାୟ ୨ ଲକ୍ଷ କୋଟି ଟଙ୍କା ହସ୍ତାନ୍ତର କରାଯାଇଛି। ଆଜି ଦେଶର ୩ କୋଟି ଗରିବ ଲୋକମାନଙ୍କୁ ନୂଆ ପକ୍କା ଘର ମିଳିଛି, ଯେଉଁଥିରେ ସେମାନେ ରହିବା ଆରମ୍ଭ କରିଛନ୍ତି। ଦେଶର ୫୦ କୋଟିରୁ ଅଧିକ ଲୋକଙ୍କୁ ୫ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ପାଇବାର ସୁବିଧା ରହିଛି । ଦେଶର ୨୫ କୋଟିରୁ ଅଧିକ ଲୋକଙ୍କ ପାଖରେ ଦୁର୍ଘଟଣା ବୀମା ଏବଂ ୨ ଲକ୍ଷ ଟଙ୍କା ଲେଖାଏଁ ଅବଧି ବୀମା ରହିଛି। ଆଜି ଦେଶର ୪୬ କୋଟିରୁ ଅଧିକ ଲୋକଙ୍କ ପାଖରେ ଜନ ଧନ ବ୍ୟାଙ୍କ ଆକାଉଣ୍ଟ ରହିଛି। ପିଏମ ସ୍ୱନିଧି ଯୋଜନା ମାଧ୍ୟମରେ ଦେଶର ୩୫ ଲକ୍ଷ ରାସ୍ତାପାର୍ଶ୍ବ ଉଠାଦୋକାନୀଙ୍କୁ ଆର୍ଥିକ ସହାୟତା ପ୍ରଦାନ କରାଯାଇଛି।

ପ୍ରଧାନମନ୍ତ୍ରୀ ମୁଦ୍ରା ଯୋଜନା ଅଧୀନରେ ଦେଶର କ୍ଷୁଦ୍ର ଉଦ୍ୟୋଗୀମାନଙ୍କୁ ୨୦ ଲକ୍ଷ କୋଟି ଟଙ୍କାରୁ ଅଧିକ ଋଣ ଯୋଗାଇ ଦିଆଯାଇଛି। ଋଣଗ୍ରହିତାମାନଙ୍କ ମଧ୍ୟରେ ୭କୋଟି ଏଭଳି ଉଦ୍ୟୋଗୀ ରହିଛନ୍ତି ଯେଉଁମାନେ ପ୍ରଥମ ଥର ପାଇଁ ସେମାନଙ୍କର ବ୍ୟବସାୟ ଆରମ୍ଭ କରି ସଫଳ ଉଦ୍ୟୋଗୀ ହୋଇପାରିଛନ୍ତି। ପ୍ରଥମ ଥର ପାଇଁ ୭ କୋଟିରୁ ଅଧିକ ଲୋକ ମୁଦ୍ରା ଯୋଜନା ସହାୟତାରେ ସ୍ୱାବଲମ୍ବୀ ହୋଇପାରିଛନ୍ତି। ୭୦ ପ୍ରତିଶତ ମହିଳା ଉଦ୍ୟୋଗୀମାନଙ୍କୁ ଋଣ ପ୍ରଦାନ କରାଯାଇଛି। ‘ଜରୁରିକାଳୀନ କ୍ରେଡିଟ୍‌ ଲାଇନ ଗ୍ୟାରେଣ୍ଟି ଯୋଜନା’ କ୍ଷୁଦ୍ର ଉଦ୍ୟୋଗୀମାନଙ୍କୁ ସହାୟକ ହୋଇଛି। ଏକ ଅଧ୍ୟୟନ ଅନୁଯାୟୀ ଏହି ଯୋଜନା ପ୍ରାୟ ଦେଢ଼ କୋଟି ଲୋକଙ୍କ ଚାକିରି ସୁରକ୍ଷିତ ରଖିପାରିଛି।

ଲଘୁ କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ (ଏମଏସଏମଇ)କୁ ସହାୟତା ପାଇଁ ଗତ ୮ ବର୍ଷ ମଧ୍ୟରେ ଏହି କ୍ଷେତ୍ର ପାଇଁ ବଜେଟକୁ ୬୫୦ ପ୍ରତିଶତରୁ ଅଧିକ ବୃଦ୍ଧି କରାଯାଇଛି। ୧୧ କୋଟିରୁ ଅଧିକ ଲୋକ ଏହି କ୍ଷେତ୍ର ଠାରୁ ପ୍ରତ୍ୟକ୍ଷ ଏବଂ ପରୋକ୍ଷ ଭାବେ ଲାଭ ପାଇପାରିଛନ୍ତି।  ଶତାବ୍ଦୀର ସବୁଠୁ ବଡ଼ ବିପତ୍ତି ସମୟରେ କ୍ଷୁଦ୍ର ଉଦ୍ୟୋଗୀମାନଙ୍କୁ ସୁରକ୍ଷା ଦେବା ଲାଗି କେନ୍ଦ୍ର ସରକାର ଏମଏସଏମଇଙ୍କ ପାଇଁ ୩.୫ ଲକ୍ଷ କୋଟି ଟଙ୍କାର ଋଣ ସୁନିଶ୍ଚିତ କରିଥିଲେ।

ଦେଶରେ ଏବେ ବ୍ୟାପକ ପରିବର୍ତ୍ତନ ଦେଖିବାକୁ ମିଳିଛି। ବିଭିନ୍ନ କ୍ଷେତ୍ରରେ ବ୍ୟାପକ ସଂସ୍କାର ଅଣାଯାଇଛି । ଶ୍ରମ ଆଇନ ଭଳି କେତେକ ଆଇନକୁ ସରଳ କରାଯାଇଛି। ୨୯ରୁ ଅଧିକ ଶ୍ରମ ଆଇନ ପରିବର୍ତ୍ତେ ୪ଟି ସରଳ ଶ୍ରମ ସଂହିତା ଲାଗୁ କରାଯାଇଛି। ୩୦ ହଜାରରୁ ଅଧିକ ଅନୁପାଳନକୁ କମାଇବା, ୧୫୦୦ରୁ ଅଧିକ ଆଇନ ଉଚ୍ଛେଦ କରିବା, କମ୍ପାନୀ ଆଇନରେ ଥିବା ବହୁ ବ୍ୟବସ୍ଥାର ନିରପରାଧୀକରଣ କରିବା ଫଳରେ ଭାରତର କମ୍ପାନୀମାନଙ୍କ ଅଭିବୃଦ୍ଧି ପାଇଁ ଏକ ଅନୁକୂଳ ପରିବେଶ ସୃଷ୍ଟି ହୋଇଛି। କେନ୍ଦ୍ର ଓ ରାଜ୍ୟ ସରକାରଙ୍କ ଭିନ୍ନ ଭିନ୍ନ ସଂଖ୍ୟାଧିକ ଟିକସର ଜାଲ ପରିବର୍ତ୍ତେ ଏବେ କେବଳ ଜିଏସଟି କାର୍ଯ୍ୟକାରୀ ହେଉଛି। ଏହି ସରଳ ଟିକସ ବ୍ୟବସ୍ଥାର ଲାଭ ଦେଶକୁ ମିଳୁଛି। ପ୍ରତି ମାସରେ ଜିଏସଟି ସଂଗ୍ରହ ଏକ ଲକ୍ଷ କୋଟି ଟଙ୍କା ଅତିକ୍ରମ କରିବା ସାଧାରଣ କଥା ହୋଇଗଲାଣି। ଏସବୁ ବ୍ୟବସାୟିକ ସୁଗମତା ପାଇଁ ମାର୍ଗ ପ୍ରଶସ୍ତ କରିଛି। ସରକାର ନୀତିଗତ ସ୍ଥିରତା, ସମନ୍ବୟ ଏବଂ ବ୍ୟବସାୟିକ ସୁଗମତା ଉପରେ ଜୋର ଦେଉଛନ୍ତି। ଅତୀତରେ ଥିବା ହଜାର ହଜାର ପୁରୁଣା ଆଇନ ଓ ଅନୁପାଳନକୁ ଉଚ୍ଛେଦ କରାଯାଇଛି। ସଂସ୍କାର ମାଧ୍ୟମରେ ଭାରତକୁ ଅଖଣ୍ଡ ରାଷ୍ଟ୍ର ଭାବେ ଅଧିକ ଶକ୍ତିଶାଳୀ କରିବା ଲାଗି ପ୍ରୟାସ କରାଯାଉଛି। ଏକ ରାଷ୍ଟ୍ର-ଏକ ଟିକସ ଆକାରରେ ଜିଏସଟି, ଏକ ରାଷ୍ଟ୍ର-ଏକ ଗ୍ରୀଡ, ଏକ ରାଷ୍ଟ୍ର-ଏକ ମୋବିଲିଟି ବା ପରିବହନ କାର୍ଡ, ଏକ ରାଷ୍ଟ୍ର-ଏକ ରାସନ କାର୍ଡ, ଏସବୁ ପ୍ରୟାସ ସରକାରଙ୍କ ସ୍ପଷ୍ଟ ଓ ଦୃଢ଼ ନୀତିକୁ ପ୍ରତିଫଳିତ କରୁଛି।

‘‘ସରକାର ସବୁକଥା ଜାଣନ୍ତି ଏବଂ କେବଳ ସରକାର ହିଁ ସବୁ କରିବେ’’, ଅତୀତର ଏହି ଚିନ୍ତାଧାରାରେ ଏବେ ପରିବର୍ତ୍ତନ ଆସିଛି। ‘ସବକା ପ୍ରୟାସ’ (ସମସ୍ତଙ୍କ ଉଦ୍ୟମ) ଭାବନା ନେଇ ଦେଶ ଏବେ ଆଗକୁ ବଢ଼ୁଛି। ଏହି କାରଣରୁ ଦେଶରେ ଏବେ ବିଭିନ୍ନ ଦିଗରେ ଉଦ୍ୟମ କରାଯାଉଛି। ବିଆଇଆରଏସି ଭଳି ପ୍ଲାଟଫର୍ମକୁ ଶସ୍ତ କରାଯାଉଛି। ଷ୍ଟାର୍ଟଅପ୍‌ ପାଇଁ ଷ୍ଟାର୍ଟଅପ୍‌ ଇଣ୍ଡିଆ ଅଭିଯାନ, ମହାକାଶ କ୍ଷେତ୍ର ପାଇଁ ଇନ-ସ୍ପେସ, ପ୍ରତିରକ୍ଷା ଷ୍ଟାର୍ଟଅପ୍ସ ପାଇଁ ଆଇଡିଇଏକ୍ସ, ସେମିକଣ୍ଡକ୍ଟର ପାଇଁ ଇଣ୍ଡିଆନ ସେମିକଣ୍ଡକ୍ଟର ମିଶନ, ଯୁବବର୍ଗଙ୍କ ମଧ୍ୟରେ ନବସୃଜନ ଓ ଉଦ୍ୟମିତାକୁ ପ୍ରୋତ୍ସାହନ ପାଇଁ ସ୍ମାର୍ଟ ଇଣ୍ଡିଆ ହାକାଥନ, ବାୟୋଟେକ୍‌ ଷ୍ଟାର୍ଟଅପ୍‌ ଆଦି ପଦକ୍ଷେପ ସରକାରଙ୍କ ଅଭିନବ ପ୍ରୟାସର ପ୍ରମାଣ ଦେଉଛି। ଗବେଷଣା ଓ ବିକାଶ, ନବସୃଜନ, ଷ୍ଟାର୍ଟଅପ୍ସ, ଅଭିନବ ପ୍ରଯୁକ୍ତିକୁ ପ୍ରୋତ୍ସାହନ ଦେବା ଲାଗି ସରକାର ଏସବୁ ପଦକ୍ଷେପ ଗ୍ରହଣ କରିଛନ୍ତି। ଦେଶ ଏସବୁ ପ୍ରୟାସ ଦ୍ୱାରା ବ୍ୟାପକ ଭାବେ ଲାଭାନ୍ୱିତ ହେଉଛି। ଗବେଷଣା ଓ ଶିକ୍ଷାଦାନ କ୍ଷେତ୍ରରେ ଦେଶ ଏକ ନୂଆ ଉପଲବ୍ଧି ହାସଲ କରିଛି। ଏହି କ୍ଷେତ୍ରରେ ବାସ୍ତବ ଦୁନିଆର ଦୃଷ୍ଟି ପ୍ରଦାନ କରିବା ଲାଗି ଶିଳ୍ପ ଜଗତର ସହାୟତା ମିଳୁଛି। ସରକାର ଏଥିପାଇଁ ଆବଶ୍ୟକ ନୀତିଗତ ପରିବେଶ ଏବଂ ଭିତ୍ତିଭୂମି ଯୋଗାଇ ଦେଉଛନ୍ତି।

ଲଗାତାର ସଂସ୍କାର ମାଧ୍ୟମରେ ଦେଶର ଯୁବବର୍ଗ ସମ୍ମୁଖିନ ହେଉଥିବା ବାଧା ଦୂର ପାଇଁ ଅନେକ ପଦକ୍ଷେପ ଗ୍ରହଣ କରାଯାଇଛି। ଘରୋଇ ଉଦ୍ୟୋଗ ପାଇଁ ପ୍ରତିରକ୍ଷା କ୍ଷେତ୍ରକୁ ଖୋଲାଯାଇଛି । ମହାକାଶ ଉଦ୍ୟୋଗରେ ଘରୋଇ ଅଂଶଗ୍ରହଣ ଲାଗି ମାର୍ଗପ୍ରଶସ୍ତ ହୋଇଛି। ଆଧୁନିକ ଦ୍ରୋନ ନୀତି ଅଣାଯାଇଛି। ଭୂସ୍ଥାନିକ ଡାଟା ମାର୍ଗଦର୍ଶିକା ପ୍ରସ୍ତୁତ କରାଯାଉଛି। ଟେଲିକମ-ଆଇଟି କ୍ଷେତ୍ର ପାଇଁ ‘ଯେକୌଣସି ସ୍ଥାନରୁ କାମ କରିବା’ର ସୁବିଧା ଦିଆଯାଇଛି। ସରକାର ସବୁ ଦିଗରେ କାର୍ଯ୍ୟ କରୁଛନ୍ତି। ଘରୋଇ କ୍ଷେତ୍ରକୁ ସର୍ବାଧିକ ବ୍ୟବସାୟିକ ସୁଗମତା ଦେବା ପାଇଁ ସରକାର କାର୍ଯ୍ୟ କରୁଛନ୍ତି, ଯାହାଫଳରେ ଦେଶବାସୀଙ୍କ ସହଜ ଜୀବନ ଧାରଣ ପାଇଁ ଦେଶର ଘରୋଇ କ୍ଷେତ୍ର ମଧ୍ୟ ଉଲ୍ଲେଖନୀୟ ଯୋଗଦାନ ଦେଇପାରିବେ।

Categories
ଅନ୍ତରାଷ୍ଟ୍ରୀୟ ଆଜିର ଖବର ଖେଳ

ହଂକଂକୁ ୧୫୫ ରନ୍ ରେ ପରାସ୍ତ କଲା ପାକିସ୍ତାନ, ବର୍ତ୍ତମାନ ଭାରତ ସହ ହେବ ଲଢେଇ

ନୂଆଦିଲ୍ଲୀ: ଏସିଆ କପ୍-୨୦୨୨ ର ଷଷ୍ଠ ମ୍ୟାଚ୍ ରେ ପାକିସ୍ତାନ ହଂକଂକୁ ଦୟନୀୟ ଭାବେ ପରାସ୍ତ କରିଛି। ମ୍ୟାଚକୁ ୧୫୫ ରନରେ ପାକିସ୍ତାନ ଜିତିନେଇଛି। ଏହି ବିଜୟ ପରେ ପାକିସ୍ତାନର ପରବର୍ତ୍ତୀ ମ୍ୟାଚ୍ ଭାରତ ବିପକ୍ଷରେ ହେବ। ସେପ୍ଟେମ୍ବର ୪ ତାରିଖରେ ହେବାକୁ ଥିବା ସୁପର-୪ ମ୍ୟାଚରେ ଭାରତ ଏବଂ ପାକିସ୍ତାନର ଦଳ ମୁହାଁମୁହିଁ ହେବେ। ହଂକଂ ବିପକ୍ଷରେ ପାକିସ୍ତାନ ପାଇଁ ଶାଦବ ଖାନ, ନାସିମ ଶାହା ଏବଂ ମହମ୍ମଦ ନୱାଜ ଚମତ୍କାର ବୋଲିଂ କରିଥିଲେ। ଏଥି ସହ ମହମ୍ମଦ ରିଜୱାନ ବ୍ୟାଟିଂରେ ଭଲ ପ୍ରଦର୍ଶନ କରିଥିଲେ।

ପାକିସ୍ତାନ ଦେଇଥିବା ଟାର୍ଗେଟକୁ ପିଛା କରି ହଂକଂ ଦଳ ୧୦.୪ ଓଭରରେ ମାତ୍ର ୩୮ ରନରେ ସମାପ୍ତ ହୋଇଥିଲା। କ୍ୟାପଟେନ ନିଜକତ ଖାନ ଏବଂ ୟାସିମ ମୋର୍ଟାଜା ଦଳ ପାଇଁ ଖୋଲିବାକୁ ଆସିଥିଲେ। ନିଜକତ ମାତ୍ର ୮ ରନ୍ କରି ଆଉଟ ହୋଇଥିଲେ ଏବଂ ମୋର୍ଟାଜା ୨ ରନ୍ ସଂଗ୍ରହ କରିଥିଲେ। ବାବର ହାୟାତ୍ ମଧ୍ୟ ଖାତା ଖୋଲି ପାରିନଥିଲେ ଏବଂ ଶୂନରେ ପ୍ୟାଭିଲିୟନକୁ ଫେରିଥିଲେ। କିଞ୍ଚିତ ଶାହା ୧୦ ଟି ବଲରେ ୬ ରନ୍ ସଂଗ୍ରହ କରିଥିଲେ। ଅଜାଜ ଖାନଙ୍କୁ ୧ ରନ୍ ଏବଂ ସ୍କଟ୍ ମ୍ୟାକକେନି ୪ ରନ୍ ରେ ଆଉଟ ହୋଇଯାଇଥିଲା। ସେହିଭଳି ପୁରା ଟିମ୍ ଆଉଟ୍ ହୋଇଥିଲେ।

ଶାଦବ ଖାନ ପାକିସ୍ତାନ ପାଇଁ ଚମତ୍କାର ବୋଲିଂ କରିଥିଲେ। ସେ ୨.୪ ଓଭରରେ ମାତ୍ର ୮ ରନ୍ ଦେଇ ୪ ଟି ୱିକେଟ୍ ନେଇଥିଲେ। ମହମ୍ମଦ ନୱାଜ ୨ ଓଭରରେ ୫ ରନ୍ ଦେଇ ୩ ଟି ୱିକେଟ୍ ନେଇଥିଲେ। ନାସିମ ଶାହା ୨ ଓଭରରେ ୭ ରନ୍ ଦେଇ ୨ ଟି ୱିକେଟ୍ ନେଇଥିଲେ। ଶାହନାୱାଜ ଦହାନି ୨ ଓଭରରେ ୭ ରନ୍ ଦେଇ ଗୋଟିଏ ୱିକେଟ୍ ନେଇଥିଲେ।

୨ ୱିକେଟ୍ ହରାଇ ୨୦ ଓଭରରେ ପାକିସ୍ତାନ ୧୯୩ ରନ୍ ସଂଗ୍ରହ କରିଥିଲା। ଏହି ସମୟରେ ମହମ୍ମଦ ରିଜୱାନ ଦଳ ପାଇଁ ଅପରାଜିତ ୭୮ ରନ୍ କରିଥିଲେ। ରିଜୱାନ୍ ୬ ଟି ଚୌକା ଓ ଗୋଟିଏ ଛକା ମାରିଥିଲେ। ୯ ରନ୍ ସ୍କୋର କରିବା ପରେ କ୍ୟାପଟେନ ବାବର ଆଜାମଙ୍କୁ ଆଉଟ କରାଯାଇଥିଲା। ଫାକର ଜମାନ ୪୧ ବଲରେ ୫୩ ରନ୍ ସଂଗ୍ରହ କରିଥିଲେ। ଶେଷରେ ଖୁସଦିଲ ଏକ ଧୂଆଁଧାର ଇନିଂସ ଖେଳିଥିଲେ। ସେ ୧୫ ବଲରେ ଅପରାଜିତ ୩୫ ରନ ସଂଗ୍ରହ କରିଥିଲେ।