Tag: ବାଲୁଗାଁ

ବାଲୁଗାଁ (ସୀତାରାମ ଅଗ୍ରୱାଲ): ଆଜି ଜଣେ ଗାଡି ଚୋରକୁ ଗିରଫ କରିଛି ବାଲୁଗାଁ ପୋଲିସ। ତାଙ୍କ ନିକଟରୁ ୩ଟି ଚୋରି ମୋଟର ସାଇକେଲ ଜବତ ହୋଇଛି।

ଖବର ମୁତାବକ ଗତ ୨ ତାରିଖରେ ନାଭାଲ ଫାଣ୍ଡି ଅନ୍ତର୍ଗତ ଡୁଙ୍ଗମାଳରୁ ଏକ ମୋଟର ସାଇକେଲ ଚୋରି ହୋଇଥିବା ନେଇ ଅଭିଯୋଗ ହୋଇଥିଲା। ଅଭିଯୋଗକୁ ଭିତ୍ତି କରି ନାଭାଲ ଫାଣ୍ଡି ଅଧିକାରୀ ରବୀନ୍ଦ୍ରନାଥ ଗୌଡା ତଦନ୍ତ ଜାରି ରଖିଥିବା ବେଳେ କୌଣସି ସୂତ୍ରରୁ ଖବରପାଇ ଶ୍ରୀ ଗୌଡା ଆଜି ସକାଳୁ ଅଚାନକ ଚଢ଼ାଉ କରିଥିଲେ।

ଚଢ଼ାଉ ବେଳେ ସମ୍ପୃକ୍ତ ଗାଡି ଚୋରକୁ କାବୁ କରିବା ସହ ତାଙ୍କ ନିକଟରୁ ତିନୋଟି ମୋଟର ସାଇକେଲ ଜବତ କରାଯାଇଛି। ଅଭିଯୁକ୍ତ ଜଣକ ଗଞ୍ଜାମ ଜିଲ୍ଲା ଖଲ୍ଲିକୋଟ ଥାନା ତେନ୍ତୁଳିଆପଲ୍ଲୀ ଗ୍ରାମର ସପନ ସାହୁଙ୍କ ପୁଅ ଦିଲ୍ଲୀପ ସାହୁ (୨୫) ବୋଲି ଜଣାପଡ଼ିଛି।

ଅଭିଯୁକ୍ତଙ୍କ ବିରୁଦ୍ଧରେ କେଶ ନଂ ୧୬୦/୨୪ ରେ ଏକ ମାମଲା ରୁଜୁ କରି କୋର୍ଟ ଚାଲାଣ କରାଯାଇଥିବା ବାଲୁଗାଁ ଥାନା ଅଧିକାରୀ ଜୟ ପ୍ରକାଶ ପରିଡା କହିଛନ୍ତି।

ଚିଲିକା (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲାରେ ସାଧାରଣ ନିର୍ବାଚନ ମଇ ୨୫ ତାରିଖରେ ଅନୁଷ୍ଠିତ ହେବାକୁ ଥିବା ବେଳେ ପୋଲିସ ପକ୍ଷରୁ ଏଥିପାଇଁ ଏକାଧିକ ପଦକ୍ଷେପ ନିଆଯାଇଛି। ବିଭିନ୍ନ ସ୍ଥାନରେ ଅସ୍ଥାୟୀ ଚେକ ପୋଷ୍ଟ ନିର୍ମାଣ କରାଯାଇଥିବା ବେଳେ ଜିଲ୍ଲା ପୋଲିସ ପକ୍ଷରୁ ୨୪ ଘଣ୍ଟିଆ ଚେକିଙ୍ଗ ଓ ପାଟ୍ରୋଲିଂ ଜାରି ରହିଛି। ଏହି ପରିପ୍ରେକ୍ଷୀରେ ଆଜି ଖୋର୍ଦ୍ଧା ଏସପି ଅବିନାଶ କୁମାର ବାଣପୁର ଓ ବାଲୁଗାଁ ଥାନା ଅଞ୍ଚଳ ପରିଦର୍ଶନରେ ଆସି ସମସ୍ତ ଚେକ ପୋଷ୍ଟର ବ୍ୟବସ୍ଥା ପରଖିଛନ୍ତି।

ଉକ୍ତ ଚେକ ପୋଷ୍ଟ ଗୁଡିକରେ କିପରି ନାଗରିକ ମାନଙ୍କ ଯାନବାହାନ ତନଖି କରାଯାଇଛି ତାହା ଅନୁଧ୍ୟାନ କରିଥିଲେ ଏସପି। ତତସହିତ ବାଲୁଗାଁ ଓ ବାଣପୁର ଥାନାର ସୀମାନ୍ତବର୍ତ୍ତୀ ଅଞ୍ଚଳ ଯାହା ଗଞ୍ଜାମ ଜିଲ୍ଲାକୁ ସଂଯୋଗ କରୁଛି ଯଥା ଶାଳିଆ ଡ୍ୟାମ ଏବଂ ନାଭାଲ ଫାଣ୍ଡି ଅଞ୍ଚଳ ପରିଦର୍ଶନ କରିବା ସହ ସେଠାର ଏସପି ସୁରକ୍ଷା ବ୍ୟବସ୍ଥା ପରଖିଥିଲେ। ଏପରିକି ଏସପି ଏକାଧିକ ଚେକ ପୋଷ୍ଟରେ କିଛି କିଛି ସମୟ ଅତିବାହିତ କରିଥିଲେ। ଏହି ସମୟରେ ବାଲୁଗାଁ ଏସଡିପିଓ ଶୁଭ୍ରାଂଶୁ ଶେଖର ମିଶ୍ର, ବାଲୁଗାଁ ଆଇଆଇସି ଜୟପ୍ରକାଶ ପରିଡ଼ା ଓ ବାଣପୁର ଆଇଆଇସି ରମେଶ ଚନ୍ଦ୍ର ଦେବତା ଆଦି ଉପସ୍ଥିତ ଥିଲେ।

ବାଲୁଗାଁ (ସୀତାରାମ ଅଗ୍ରୱାଲ): ଆଜି ପଞ୍ଚାୟତ ସମେତ ବିଜ୍ଞାପିତ ଅଞ୍ଚଳ ପରିଷଦରେ ଭୋଟର ସଚେତନତା ରାଲି ଅନୁଷ୍ଠିତ ହୋଇଯାଇଛି। ଚିଲିକା ଗୋଷ୍ଠୀ ଉନ୍ନୟନ ଅଧିକାରୀ ହଳଧର ଶବର, ବାଲୁଗାଁ ବିଜ୍ଞାପିତ ଅଞ୍ଚଳ ପରିଷଦ କାର୍ଯ୍ୟନିର୍ବାହୀ ଅଧିକାରୀ ପ୍ରାଣନାଥ ସେଠ, ବାଲୁଗାଁ ଥାନା ଅଧିକାରୀ ଜୟ ପ୍ରକାଶ ପରିଡାଙ୍କ ତତ୍ୱାବଧାନରେ ଏହି ରାଲି କରାଯାଇଥିଲା।

ଉକ୍ତ ରାଲି ବଡକୁଳ ଗ୍ରାମ ପଞ୍ଚାୟତ କାର୍ଯ୍ୟାଳୟଠାରୁ ବାହାରି ଏନଏସିର ବିଭିନ୍ନ ୱାର୍ଡ ସମେତ ବାଲୁଗାଁ ସହର ପରିକ୍ରମା କରିଥିଲା। ଏଥିରେ ଚିଲିକା ବ୍ଲକ, ବାଲୁଗାଁ ଏନଏସିର ସମସ୍ତ ସେକ୍ଟର ଅଫିସର, କର୍ମଚାରୀ, ବାଲୁଗାଁ ଥାନା କର୍ମଚାରୀ, ଏଫଏସଟି, ଭିଏସଟି, ଏସଏସଟି ପ୍ରମୁଖ ଯୋଗ ଦେଇ ନୂତନ ଯୁବ ଭୋଟର ଓ ସମସ୍ତ ଭୋଟରଙ୍କୁ ନିଜର ଅଧିକାର ମୁତାବକ ଶତ ପ୍ରତିଶତ ମତଦାନ କରିବାପାଇଁ ସଚେତନତା ବାର୍ତା ବାଣ୍ଟିଥିଲେ।

ଆସନ୍ତା ମେ ୨୫ ତାରିଖରେ ନିଜ ନିଜ ମତଦାନ କେନ୍ଦ୍ରରେ ପହଞ୍ଚି ଶାନ୍ତି ଶୃଙ୍ଖଳାର ସହ ନିଜ ମତଦାନ କରିବା ନିମନ୍ତେ ଅନୁରୋଧ କରିଥିଲେ।

ବାଲୁଗାଁ( ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲା ବାଲୁଗାଁ ଥାନା 16 ନମ୍ବର ଜାତୀୟ ରାଜପଥ ନୂଆଗଡ ଓଭରବ୍ରିଜ ନିକଟରେ ଏକ ଯାତ୍ରୀବାହି ଅଟୋ ଭାରସାମ୍ୟ ହରାଇ ଲେଉଟିବା ଫଳରେ ପାଞ୍ଚ ଜଣ ଗୁରୁତର ଆହତ ହୋଇଛନ୍ତି।

ସୂଚନା ମୁତାବକ ଅଟୋଟି ଚଣ୍ଡେଶ୍ୱର ଅଞ୍ଚଳରୁ ବାହାରି ଗଞ୍ଜାମ ପଥରା ଅଞ୍ଚଳକୁ ଯାଉଥିବା ବେଳେ ନୂଆଗଡ ଓଭରବ୍ରିଜ ନିକଟରେ ଭାରସାମ୍ୟ ହରାଇ ଲେଉଟିପଡ଼ିଛି। ଫଳରେ ଅଟୋ ମଧ୍ୟରେ ଥିବା ୩ ଜଣ ପୁରୁଷ ଓ ୨ ଜଣ ମହିଳା ଗୁରୁତର ଆହତ ହୋଇଛନ୍ତି।

ଖବର ପାଇ ବର୍ତ୍ତମାନ ଦୁର୍ଘଟଣାସ୍ଥଳରେ ନାଭାଲ ଫାଣ୍ଡି ପୋଲିସ ଏବଂ ଆମ୍ବୁଲାନ୍ସ ପହଞ୍ଚି ଗୁରୁତରଙ୍କୁ ଚିକିତ୍ସା ପାଇଁ ମେଡିକାଲ ନେଉଥିବାର ଜଣାପଡିଛି।

ବାଣପୁର (ସୀତାରାମ ଅଗ୍ରୱାଲ): ବାଲୁଗାଁ ବାଣପୁର ରୋଡ଼ ଅନ୍ତର୍ଗତ ଗୋପିକାନ୍ତପୁର ଠାରେ ଏକ ଘରୁ ଦୁର୍ବୁତ୍ତ ମାନେ ଘରେ କେହି ନଥିବାର ସୁଯୋଗ ନେଇ ତାଲା ଭାଙ୍ଗି ଚୋରି କରିଥିବାର ଥାନାରେ ଅଭିଯୋଗ ହୋଇଛି। ସୂଚନା ମୁତାବକ ଗୋପିକାନ୍ତ ପୁର ଗ୍ରାମର ରମେଶ କୁମାର ଦାସ ଭୁବନେଶ୍ୱରରେ ରହୁଥିବା ବେଳେ ଘରେ ଦୁର୍ବୁତ୍ତ ମାନେ କଳାକନା ବୁଲାଇ ଛନ୍ତି। ଗତ ରାତିରେ ତାଲା ଭାଙ୍ଗି ଘରେ ଥିବା ଏକ ମୋଟର ସାଇକେଲ, ପାଣି ମୋଟର ସହ ଆଲମିରା ଭାଙ୍ଗି ଦରକାରୀ କାଗଜପତ୍ର ଏବଂ ବିଭିନ୍ନ ଆସବାବ ପତ୍ର ନେଇଯାଇଥିଲେ।

ଆଜି ସକାଳେ ବାପାଙ୍କ ଠାରୁ ଖବର ପାଇ ଆସି ଘରେ ଦେଖନ୍ତି ଘର କବାଟ ଖୋଲା ଥାଇ ଆସବାବ ପତ୍ର ଏଣେତେଣେ ବିଛାଡି ହୋଇ ପଡିଛି। ଉକ୍ତ ଘଟଣାକୁ ରମେଶଙ୍କ ପତ୍ନୀ କଲ୍ୟାଣୀ ଦାସ ଥାନାରେ ଜଣାଇବା ପରେ ପୋଲିସ ତଦନ୍ତ ଜାରି ରଖିଛି।

ବାଲୁଗାଁ: ସୋମବାର ଅପରାହ୍ନରେ ଚିଲିକା ବ୍ଲକ ଅନ୍ତର୍ଗତ ବାଲୁଗାଁ ଅଞ୍ଚଳର ଆରାଧ୍ୟ ଠାକୁର ଶ୍ରୀ ଶ୍ରୀ ଉମାମହେଶ୍ବର ଦେବଙ୍କ ପୀଠରେ ଷୋହଳତମ ଅଷ୍ଟଶମ୍ଭୁ ମିଳନ ମହାସମାରୋହରେ ଅନୁଷ୍ଠିତ ହୋଇଯାଇଛି। ଦୁଇ ଦିନ ବ୍ୟାପି ମହାବିଷୁବ ସଂକ୍ରାନ୍ତି ଅବସରରେ ରବିବାର ଦିନ ତମାମ ସାଂସ୍କୃତିକ କାର୍ଯ୍ୟକ୍ରମ ମାନ ପରିବେଷଣ କରାଯାଇଥିଲା। ବିଳମ୍ବିତ ରାତ୍ରରେ ବାଜା, ରୋଷଣୀ, ପାଟପଟୁଆରରେ ଆଖପାଖ ଅଞ୍ଚଳର ୧୬ ଦେବ ଦେବୀଙ୍କ ବିଜେ ପ୍ରତିମା ବିମାନରେ ଆଗମନ ହୋଇ ନିଜ ନିଜ ଆସ୍ଥାନରେ ବିରାଜମାନ ହୋଇଥିଲେ। ମାତ୍ର ମେଳଣ ପଡିଆକୁ ବିମାନ ଯିବା ସମୟରେ କୌଣସି ବିବାଦ ନେଇ ଉମାମହେଶ୍ବର ରାସ୍ତାରେ ବିଶୃଙ୍ଖଳା ଦେଖାଦେଇଥିଲା। ଯାହାଫଳରେ ସିଙ୍ଗେଶ୍ୱର ବିଜେ ସିଂହନାଥ ଦେବ ଅଧ ରାସ୍ତାରୁ ପ୍ରତ୍ୟାବର୍ତ୍ତନ କରିଥିବା ଦେଖିବାକୁ ମିଳିଥିଲା।

ପ୍ରାତଃ କାଳରେ ସକାଳ ଭୋଗ, ମଧ୍ୟାହ୍ନରେ ଭୋଗ ଲାଗି କରାଯାଇ ଅପରାହ୍ନରେ ହୋମ ପୂର୍ଣ୍ଣାହୁତି ହୋଇଥିଲା। ପରେ ସମସ୍ତ ବିଜେ ପ୍ରତିମାଙ୍କ ନିକଟରେ ମେଳଣ ଭୋଗ ଲାଗି କରି ମେଳଣ ପର୍ଵ ହୋଇଥିଲା। ଏହି ଆଧ୍ୟାତ୍ମିକ କାର୍ଯ୍ୟକ୍ରମରେ ଆଖପାଖ ଅଞ୍ଚଳର ହଜାର ହଜାର ଶ୍ରଦ୍ଧାଳୁ ଦେବ ଦେବୀଙ୍କୁ ଦର୍ଶନ କରି ଆଶୀର୍ବାଦ ଲାଭ କରିଥିଲେ।

ଉକ୍ତ ମେଳଣ ପର୍ବରେ ଶ୍ରୀ ଶ୍ରୀ ଉମାମହେଶ୍ବର ଦେବଙ୍କ ନିମନ୍ତ୍ରଣ କ୍ରମେ ଗବପଦର ବିଜେ ଶ୍ରୀ ଶ୍ରୀ ରାମେଶ୍ୱର ଦେବ, ବାଙ୍କନିଧି ଦେବ, ନିମିକ୍ଷେତା ବିଜେ ନୀଳକଣ୍ଠେଶ୍ୱର ଦେବ, ବଡ଼କୁଳ ବିଜେ ଚନ୍ଦ୍ରଶେଖର ଦେବ, ଦୋଳମୁଣ୍ଡାଇ ବିଜେ ବାଲୁଙ୍କେଶ୍ୱର ଦେବ, ମଙ୍ଗରାଜପୁର ବିଜେ ଗତିଶ୍ୱର ଦେବ, ରଘୁନାଥପୁର ବିଜେ ଗୁପ୍ତେଶ୍ଵର ଦେବ, ସାମନ୍ତରାପୁର ବିଜେ ଦଧିବାମନ ଦେବ, ପାଟଣା ସାହି ବିଜେ ଗୋପାଳଜିଉ ଦେବ, ବାଲୁଗାଁ ବିଜେ ରଘୁନାଥ ଦେବ, କୁଲାକୁଣ୍ଢେଇ ବିଜେ ରାଧା ଗୋବିନ୍ଦ ଦେବ, ପାଟଣା ସାହି ମା ଜାଗୁଳାଇ, ଗୁଣ୍ଡୁରିପୁରୁ ମା ଜାଗୁଳାଇ, ବାଲୁଗାଁ ବଜାର ମା ଚଣ୍ଡୀ ଠାକୁରାଣୀଙ୍କ ବିଜେ ପ୍ରତିମା ବିମାନ ମାନ ସାମିଲ ହୋଇଥିଲେ।

ମେଳଣ ପର୍ଵ ସୁରୁଖୁରୁରେ ହୋଇଥିବା ବେଳେ ଦର୍ଶକଙ୍କ ଭିଡକୁ ନିୟନ୍ତ୍ରଣ କରିବା ପାଇଁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଥିଲା। ମନ୍ଦିର ଟ୍ରଷ୍ଟି,ମନ୍ଦିର କମିଟି ସଦସ୍ୟ ଏବଂ ଆଖପାଖ ଅଞ୍ଚଳବାସୀ ଏହି କାର୍ଯ୍ୟକ୍ରମରେ ପୂର୍ଣ୍ଣ ସହଯୋଗ କରିଥିଲେ।

ଚିଲିକା (ସୀତାରାମ ଅଗ୍ରୱାଲ): ଖୋର୍ଦ୍ଧାରେ ନୂତନ ଏସପି ଭାବେ ଗତ ଦୁଇ ଦିନ ତଳେ ଅବିନାଶ କୁମାର ଯୋଗଦେବା ପରେ ଜିଲ୍ଲାର ବିଭିନ୍ନ ଥାନା ଅଞ୍ଚଳ ଗସ୍ତକରି ସେଠାକାର ନିର୍ବାଚନ ସୁରକ୍ଷା ବ୍ୟବସ୍ଥା ଏବଂ ଆଇନ ଶୃଙ୍ଖଳା ସ୍ଥିତି ତଦାରଖ ଜାରି ରଖିଛନ୍ତି। ଏହି ପରିପ୍ରେକ୍ଷୀରେ ନୂତନ ଏସପି ଗତକାଲି ବାଲୁଗାଁ ଓ ବାଣପୁର ଥାନା ପରିଦର୍ଶନ କରିଥିଲେ।  ଅପରାହ୍ନରେ ବାଲୁଗାଁ ଥାନା ପହଞ୍ଚିବା ପରେ ଏସପିଙ୍କୁ ବାଲୁଗାଁ ଏସଡିପିଓ ଶୁଭ୍ରାଂଶୁ ଶେଖର ମିଶ୍ର, ବାଲୁଗାଁ ଆଇଆଇସି ଜୟପ୍ରକାଶ ପରିଡ଼ା ଏବଂ ଅନ୍ୟ ସମସ୍ତ ପୋଲିସ କର୍ମଚାରୀ ମାନେ ଗାର୍ଡ ଅଫ ଅନର ପ୍ରଦାନ କରିବା ସହ ସ୍ୱାଗତ ଜଣାଇଥିଲେ।

ଏହି ଅବସରରେ ଏସପି ଶ୍ରୀ କୁମାର ବାଲୁଗାଁ ଥାନା ଏବଂ ଏହାର ସୀମାନ୍ତବର୍ତ୍ତୀ ଅଞ୍ଚଳ ତଥା ଖୋର୍ଦ୍ଧା ଓ ଗଞ୍ଜାମ ଜିଲ୍ଲା ସୀମାରେ ଥିବା ନାଭାଲ ଫାଣ୍ଡି ଅଞ୍ଚଳ ପରିଦର୍ଶନ କରିଥିଲେ।  ସଂନ୍ଧ୍ୟାରେ ନୂତନ ଏସପି ବାଣପୁର ଥାନାରେ ପହଞ୍ଚି ସେଠାର ଆଇନ ଶୃଙ୍ଖଳା ସ୍ଥିତି ପରଖିଥିଲେ।

ଏହି ଅବସରରେ ତାଙ୍କୁ ବାଣପୁର ଆଇଆଇସି ରମେଶ ଚନ୍ଦ୍ର ଦେବତା ଏବଂ ଥାନାର ସମସ୍ତ ପୋଲିସ କର୍ମଚାରୀ ମାନେ ଗାର୍ଡ ଅଫ ଅନର ପ୍ରଦାନ କରିବା ସହ ସ୍ୱାଗତ ଜଣାଇଥିଲେ।  ତେବେ ସାଧାରଣ ନିର୍ବାଚନରେ ପୋଲିସର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ଚଳିତ ନିର୍ବାଚନକୁ ଅବାଧ, ନିରପେକ୍ଷ ଏବଂ ଶାନ୍ତିଶୃଙ୍ଖଳା ଭାବେ ପରିଚାଳନା କରିବା ପାଇଁ ସମସ୍ତ ଅଧିକାରୀଙ୍କୁ ଏସପି ତାଗିଦ କରିଥିଲେ।

ଚିଲିକା (ସୀତାରାମ ଅଗ୍ରୱାଲ): ଆକ୍ସନ ମୋଡ଼ରେ ଖୋର୍ଦ୍ଧା ନୂତନ ଏସପି ଅବିନାଶ କୁମାର। ଆଜି ଜିଲ୍ଲାରେ ଯୋଗଦାନ କରୁ କରୁ ବିଭିନ୍ନ ଦିଗରେ କାର୍ଯ୍ୟ ଆରମ୍ଭ କରିଦେଇଛନ୍ତି। ଅବାଧ ଓ ନିରପେକ୍ଷ ନିର୍ବାଚନ ପରିଚାଳନା ନୂତନ ଏସପିଙ୍କ ପ୍ରଥମ ପ୍ରାଥମିକତା ଥିବା ବେଳେ ଆଜି ସଂନ୍ଧ୍ୟାରେ ବାଲୁଗାଁ ପୋଲିସ ସବ ଡିଭିଜନ ଅଞ୍ଚଳରେ ଏହାର ପ୍ରତିଫଳନ ଦେଖିବାକୁ ମିଳିଛି।

ଏସପିଙ୍କ ନିର୍ଦ୍ଦେଶକ୍ରମେ ଏବଂ ବାଲୁଗାଁ ଏସଡିପିଓ ଶୁଭ୍ରାଂଶୁ ଶେଖର ମିଶ୍ରଙ୍କ ନେତୃତ୍ୱରେ ବାଣପୁର, ବାଲୁଗାଁ ଓ ନାଚୁଣୀ ଥାନା ଅଞ୍ଚଳରେ କଡ଼ାକଡି ଯାଞ୍ଚ ଜାରି ରହିଛି। ମଦ୍ୟପାନ କରି ଗାଡି ଚଳାଇବା, ଗାଡି ଭିତରେ ଟଙ୍କା ଚାଲାଣ, ଅସ୍ତ୍ରଶସ୍ତ୍ର ଚାଲାଣ ଆଦି ବିଭିନ୍ନ ଅପରାଧିକ ଗତିବିଧି ଉପରେ ତୀକ୍ଷ୍ଣ ନଜର ରଖିଛି ପୋଲିସ। ବିଭିନ୍ନ ଛକରେ ସମସ୍ତ ଗାଡିକୁ ଗୋଟି ଗୋଟି କରି ତନଖି ପ୍ରକ୍ରିୟା ଜାରି ରହିଛି।

ତେବେ ଏହି ପ୍ରକ୍ରିୟା ବିଳମ୍ବିତ ରାତ୍ରି ପର୍ଯ୍ୟନ୍ତ ଜାରି ରହିବ ବୋଲି ଏସଡିପିଓ ଶ୍ରୀ ମିଶ୍ର କହିଛନ୍ତି। ଉକ୍ତ ଯାଞ୍ଚରେ ବାଣପୁର ଆଇଆଇସି ରମେଶ ଚନ୍ଦ୍ର ଦେବତା, ବାଲୁଗାଁ ଆଇଆଇସି ଜୟପ୍ରକାଶ ପରିଡ଼ା ଏବଂ ନାଚୁଣୀ ଆଇଆଇସି ଚନ୍ଦ୍ରଶେଖର ଜେନା ସାମିଲ ଅଛନ୍ତି।

ବାଲୁଗାଁ (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲା ବାଲୁଗାଁ ଥାନା ଅନ୍ତର୍ଗତ ୧୬ ନମ୍ବର ଜାତୀୟ ରାଜପଥ ନୂଆଗଡ ଓଭରବ୍ରିଜ ଠାରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଯାଇଛି। ଯେଉଁଥିରେ ଜଣେ ବ୍ୟକ୍ତି ପ୍ରାଣ ହରାଇଛନ୍ତି।

ସୂଚନା ମୁତାବକ ଆଜି ସକାଳେ ଗୋପାଳପୁର ଅଭିମୁଖେ ଯାଉଥିବା ଏକ ଆଇରନ ବୋଝେଇ ଟ୍ରକଟି କୌଣସି କାରଣବଶତଃ ନୂଆଗଡ ଓଭରବ୍ରିଜ ଠାରେ ଛିଡା ହୋଇଥିଲା।  ସେପଟେ ସମାନ ଦିଗରୁ ଆସୁଥିବା ଏକ ପିକ ଅପ ଗାଡିଟି ହଠାତ ଆଇରନ ବୋଝେଇ ଟ୍ରକକୁ ପଛପଟୁ ଶକ୍ତ ଧକ୍କା ଦେଇଥିଲା। ଫଳରେ ପିକ ଅପ ଗାଡି ଡ୍ରାଇଭରଙ୍କ ଗାଡି ଭିତରେ ଚାପି ହୋଇ ମୃତ୍ୟୁ ଘଟିଥିଲା।

ଖବର ପାଇ ନାଭାଲ ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଦେଇଛି।

ବାଲୁଗାଁ (ସୀତାରାମ ଅଗ୍ରୱାଲ): ମଙ୍ଗଳବାର ଅପରାହ୍ନରେ ଖୋର୍ଦ୍ଧା ଜିଲ୍ଲା ବାଲୁଗାଁ ଥାନା ଅନ୍ତର୍ଗତ ବଡ଼କୁଳ ଗ୍ରାମରେ ଏକ ଅଭାବନୀୟ ଘଟଣା ଘଟିଯାଇଛି। ବଡ଼କୁଳ ଅଶ୍ୱରୀ ପାଟଣା ସାହିର ପାଣ୍ଡବ ବେହେରାଙ୍କ ପୁଅ ସଞ୍ଜୟ କୁମାର ବେହେରା (୨୯) ମଙ୍ଗଳବାର ଅପରାହ୍ନରେ ବଜାରରେ ବୁଲୁଥିବା ବେଳେ ହଠାତ ତଳେ ପଡି ଚେତାଶୂନ୍ୟ ହୋଇଯାଇଥିଲେ। ସ୍ଥାନୀୟ ଲୋକଙ୍କ ସହାୟତାରେ ସଞ୍ଜୟଙ୍କୁ ବାଲୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ମୃତ ଘୋଷଣା କରିଥିଲେ।

ମୃତ୍ୟୁର କାରଣ ଅସ୍ପଷ୍ଟ ରହିଥିବା ବେଳେ ବୁଧବାର ପୂର୍ବାହ୍ନରେ ଡାକ୍ତରଖାନାରେ ପୋଲିସ ପହଞ୍ଚି ୫/୨୪ ରେ ଏକ ଅପମୃତ୍ୟୁ ମାମଲା ରୁଜୁ କରି ଶବ ବ୍ୟବଚ୍ଛେଦ ପାଇଁ ପଠାଇ ଦେଇଛି। ଶବ ବ୍ୟବଚ୍ଛେଦ ପରେ ପରିବାରଙ୍କୁ ମୃତ ଶରୀର ହସ୍ତାନ୍ତର କରାଯିବାସହ ବ୍ୟବଚ୍ଛେଦ ରିପୋର୍ଟ ଆସିଲା ପରେ ମୃତ୍ୟୁର କାରଣ ଜଣାପଡିବ ବୋଲି ନାଭାଲ ଫାଣ୍ଡି ଅଧିକାରୀ ରବୀନ୍ଦ୍ରନାଥ ଗୌଡା କହିଛନ୍ତି।

ବାଲୁଗାଁ (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲାରେ ବେଆଇନ ଗୋରୁ ଚାଲାଣ ବଢୁଥିବା ବେଳେ ଏହାର ଚେର ବର୍ତ୍ତମାନ ବାଲୁଗାଁ ପର୍ଯ୍ୟନ୍ତ ବ୍ୟାପିଲାଣି। ଖବର ମୁତାବକ ଗତକାଲି ମଧ୍ୟ ରାତିରେ ବାଲୁଗାଁ ଥାନା ସରଳାପଦର ଛକ ଠାରେ ଦୁଇ ଜଣ ଦୁର୍ବୁତ୍ତ ଏକ ନାଲି ରଙ୍ଗର କାରରେ ଗାଈ ଚୋରି କରି ନେଉଥିବା ଦୃଶ୍ୟ ସ୍ଥାନୀୟ ଏକ ଦୋକାନିଙ୍କ ସିସି ଟିଭି କ୍ୟାମେରାରେ କଏଦ ହୋଇଛି। ଯାହାର ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।

ତେବେ ଉକ୍ତ ସ୍ଥାନରେ ମାଳ ମାଳ ଲାଇଟ ଲାଗିଥିବା ବେଳେ ଏହା ଲୋକଙ୍କ ଚଳପ୍ରଚଳ ରାସ୍ତା। ତଥାପି ଗୋରୁ ମାଫିଆମାନେ ଏପରି ସାହସ କେମିତି ଜୁଟାଉଛନ୍ତି ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି।

ତେବେ ଉକ୍ତ ଖବର ପ୍ରଚାର ହେବାପରେ ବାଲୁଗାଁ ଓ ବାଣପୁର ଅଞ୍ଚଳର ଗୋ ରକ୍ଷକ ଏବଂ ବୁଦ୍ଧିଜୀବୀଙ୍କ ମଧ୍ୟରେ ଆକ୍ରୋଶ ଦେଖାଦେଇଛି। ପୋଲିସ ଉକ୍ତ ଭିଡିଓ ତଦନ୍ତ କରି ନିଜଆଡୁ ମାମଲା ରୁଜୁ କରିବା ସହ ଅଭିଯୁକ୍ତଙ୍କୁ ଗିରଫ ଦାବି ଜୋର ଧରିଛି।

ବାଲୁଗାଁ (ସୀତାରାମ ଅଗ୍ରୱାଲ): ଶୁକ୍ରବାର ବିଳମ୍ବିତ ରାତିରେ ବାଲୁଗାଁ ନିକଟସ୍ଥ ସରଳସିଂହ ଗ୍ରାମର ସୀତାରାମ ପ୍ରସାଦ ନାୟକଙ୍କ ଘରେ ବଡ ଧରଣର ଚୋରୀ ହୋଇଛି। ଘରେ କେହି ନଥିବାବେଳେ ଦୁର୍ବୁତ୍ତ ଘରେ ପଶି ଲକ୍ଷାଧିକ ଟଙ୍କାର ସୁନା ଅଳଙ୍କାର ଲୁଟି ନେଇଯାଇଥିବା ଥାନାରେ ଅଭିଯୋଗ ହୋଇଛି।

ଖବର ମୁତାବକ ସରଳସିଂହ ଗ୍ରାମର ସୀତାରାମ ପ୍ରସାଦ ନାୟକ ଗତ ଶୁକ୍ରବାର ଦିନ ସନ୍ଧ୍ୟାରେ ନାଚୁଣି ସ୍ଥିତ ନିଜ ଭାଇ ଘରକୁ ପରିବାର ସହ ଯାଇଥିଲେ।ଶନିବାର ସକାଳେ ଶ୍ରୀ ନାୟକ ଓ ତାଙ୍କ ସ୍ତ୍ରୀ ଘରେ ପହଞ୍ଚିବା ବେଳେ ଘର ଖୋଲା ଥିବା ସହିତ ତାଙ୍କ ଘରେ ଥିବା ଆଲମିରାକୁ କିଏ ଭାଙ୍ଗି ଦେଇଥିବା ଦେଖିବାକୁ ପାଇଥିଲେ। ପରେ ଜାଣିବାକୁ ପାଇଲେ ଆଲମିରାରେ ଥିବା ନଗଦ ୩୦ ହଜାର ଟଙ୍କା, ସୁନା ହାର, ୨ହଳ କାନ ଫୁଲ, ମଙ୍ଗଳସୂତ୍ର, ୪ଟି ମୁଦି ଓ ସୁନା ଚେନକୁ ଦୁର୍ବୁତ୍ତ ମାନେ ଲୁଟି ନେଇ ଚାଲି ଯାଇଛନ୍ତି।ଘଟଣା ସମ୍ପର୍କରେ ଶ୍ରୀ ନାୟକ ଆଜି ସକାଳେ ବାଲୁଗାଁ ଥାନାରେ ଲିଖିତ ଅଭିଯୋଗ କରିବାପରେ ପୁଲିସ କେଶ ନଂ ୧୦୫/୨୪ରେ ମାମଲା ରୁଜୁକରି ସାଇଣ୍ଟିଫିକ ଟିମ ସହାୟତାରେ ତଦନ୍ତ ଜାରି ରଖିଛି।

ବାଲୁଗାଁ (ସୀତାରାମ ଅଗ୍ରୱାଲ): ରାଜ୍ୟବ୍ୟାପୀ ଶୈବପୀଠ ମାନଙ୍କରେ ବହୁ ଧୁମଧାମରେ ମହାଶିବରାତ୍ରି ପାଳନ କରାଯାଇଥିବା ବେଳେ ଖୋର୍ଦ୍ଧା ଜିଲ୍ଲା ବାଲୁଗାଁ ଥାନା ଅନ୍ତର୍ଗତ କୋତରୀ ଗ୍ରାମ ମୌଜା ଶ୍ରୀ ଶ୍ରୀ ଧବଳେଶ୍ବର ଦେବଙ୍କ ପୀଠରେ ମନ୍ଦିର ବିବାଦକୁ ନେଇ ପବିତ୍ର ଜାଗର ଯାତ୍ରାରେ ଦୁଇ ଗୋଷ୍ଠୀ ମଧ୍ୟରେ ତୁମୁଳ କାଣ୍ଡ ଦେଖିବାକୁ ମିଳିଛି। ଉକ୍ତ ଘଟଣାରେ ଉଭୟ ଗୋଷ୍ଠୀ ମଧ୍ୟରୁ ୮ ଜଣରୁ ଉର୍ଦ୍ଧ୍ବ ପୁରୁଷ ଆହତ ହୋଇଥିବା ବେଳେ ବିଶୃଙ୍ଖଳାକାରୀ ୧୦-୧୨ ଜଣଙ୍କ ନାମରେ ମାମଲା ରୁଜୁ କରାଯାଇଥିବା ପୋଲିସ ସୂଚନା ଦେଇଛି।

ଖବର ମୁତାବକ ବାଲୁଗାଁ ଥାନା ଅନ୍ତର୍ଗତ କୋତରୀ ଗ୍ରାମ ମୌଜା ସ୍ଥିତ ଶ୍ରୀ ଶ୍ରୀ ଧବଳେଶ୍ବର ଦେବଙ୍କ ପୀଠରେ ବାର ମାସରେ ତେର ଯାନିଯାତ୍ରା କୋତରୀ ଓ ଧୂଆଁଳ ଗ୍ରାମବାସୀ ମିଳିତ ଭାବେ କରିଆସୁଥିଲେ ମଧ୍ୟ ସଦାସର୍ବଦା ମନ୍ଦିର ପରିଚାଳନା ନେଇ ବିବାଦ ଲାଗିରହିଥିଲା। କୋତରୀ ମୌଜାରେ ମନ୍ଦିର ଥିବାରୁ ଶ୍ରୀ ଧବଳେଶ୍ବର ଦେବଙ୍କୁ ବିଜେ କୋତରୀ ସାର୍ବଜନୀନ କରିବା ନେଇ ଦାବି ହୋଇଆସୁଥିଲା। ଗତ ଫେବ୍ରୁଆରୀ ମାସରେ ଉକ୍ତ ପୀଠରେ ବିଶ୍ଵଶାନ୍ତି ମହାଯଜ୍ଞ ଅନୁଷ୍ଠିତ ନେଇ ଉଭୟ ଗ୍ରାମ ମଧ୍ୟରେ ମତାନ୍ତର ସାଙ୍ଗକୁ ତିକ୍ତତା ଲାଗିରହିଥିଲା। ଯାହାକୁ ନେଇ ଚିଲିକା ତହସିଲଦାର ଓ ବାଲୁଗାଁ ଥାନା ହସ୍ତକ୍ଷେପ ପରେ ଉଭୟ ଗ୍ରାମ କମିଟି ସଦସ୍ୟଙ୍କ ଉପସ୍ଥିତରେ ସମସ୍ୟା ସମାଧାନ ସହ ଶାନ୍ତିଶୃଙ୍ଖଳାରେ ଯଜ୍ଞ ସମାପନ ହୋଇଥିଲା। ମାତ୍ର କାହିଁ ପରମ୍ପରା ଅନୁଯାୟୀ ଧୂଆଁଳ ଗ୍ରାମବାସୀଙ୍କ ପକ୍ଷରୁ ଶ୍ରୀ ଶ୍ରୀ ଧବଳେଶ୍ବର ଦେବଙ୍କ ପୀଠରେ ସମସ୍ତ ଯାନିଯାତ୍ରା ସହ ମହାଶିବରାତ୍ରି ଆୟୋଜନ କରିଆସୁଥିବା ବେଳେ କୋତରୀ ଗ୍ରାମବାସୀ ଏହାକୁ ବିରୋଧ କରିବାସହ ଜାଗର ଯାତ୍ରାରେ ଆମ୍ଭ ଗ୍ରାମର ଠାକୁର ତେଣୁ ଆମର ମଧ୍ୟ କର୍ତ୍ତବ୍ୟ ରହିଛି ବୋଲି ଯୁକ୍ତି ବାଢିଥିଲେ। ଯାହାକୁ ନେଇ ଉଭୟ ଗୋଷ୍ଠୀ ମଧ୍ୟରେ ବାକବିବାଦ ଲାଗିରହିବା ବେଳେ କ୍ରମଶଃ ଉଗ୍ରରୂପ ଧାରଣ କରି ହାତାହାତି ହୋଇଥିଲା।

ଯାହାଫଳରେ ଶୈବପୀଠ ପରିବେଶ ଧାର୍ମିକସ୍ଥଳ ପରିବର୍ତ୍ତେ ରଣକ୍ଷେତ୍ର ପାଲଟିଥିଲା। ଯିଏ ଯେମିତି ପାରିଲା ଆକ୍ରମଣ କରିଥିଲେ। ଉକ୍ତ ଘଟଣାରେ ୮ ଜଣରୁ ଉର୍ଦ୍ଧ୍ବ ବ୍ୟକ୍ତି ଆହତ ହୋଇଥିବା ଜଣାପଡିଛି। ଘଟଣାସ୍ଥଳରେ ବାଲୁଗାଁ ଏସଡିପିଓ ଶୁଭ୍ରାଂଶୁ ଶେଖର ମିଶ୍ର ଓ ଆଇଆଇସି ଜୟ ପ୍ରକାଶ ପରିଡା ସଦଳବଳେ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ କରିଥିବା ବେଳେ ସୁରକ୍ଷା ବ୍ୟବସ୍ଥାକୁ କଡାକଡି କରି ବ୍ୟାପକ ଫୋର୍ସ ମୁତୟନ କରାଯାଇଛି। ପରମ୍ପରା ଅନୁଯାୟୀ ଠାକୁରଙ୍କ ନୀତିକାନ୍ତି ପୂଜାର୍ଚ୍ଚନା ସମ୍ପନ୍ନ ନିମନ୍ତେ ପୋଲିସ ପ୍ରଶାସନ ପକ୍ଷରୁ ମନ୍ଦିର ପରିଚାଳନା କମିଟିକୁ ନିର୍ଦ୍ଦେଶ ଦେଇଥିଲେ।

ଉକ୍ତ ଘଟଣା ନେଇ ଉଭୟ ଗ୍ରାମବାସୀଙ୍କ ପକ୍ଷରୁ ବାଲୁଗାଁ ଥାନାରେ ଗତକାଲି ବିଳମ୍ବିତ ରାତିରେ ଏତଲା ଦିଆଯାଇଛି। ଏତଲାକୁ ଭିତ୍ତି କରି ବାଲୁଗାଁ ଥାନା ପକ୍ଷରୁ ଆଜି କେଶ ନଂ ୯୫/୨୪ ଓ ୯୬/୨୪ ରେ ଗୋଷ୍ଠୀ ସଂଘର୍ଷକାରୀ ୧୦ ରୁ ୧୨ ଜଣଙ୍କ ନାମରେ ମାମଲା ରୁଜୁ କରାଯାଇ ତଦନ୍ତ ଜାରି ରହିବା ସହ ଉଭୟ ଗ୍ରାମ ଉପରେ ତୀକ୍ଷ୍ଣ ନଜର ରଖାଯାଇଥିବା ଆଇଆଇସି ଶ୍ରୀ ପରିଡା କହିଛନ୍ତି। ତେବେ ଗିରଫ ଭୟରେ ଉଭୟ ଗ୍ରାମ ପୁରୁଷଶୁନ୍ୟ ହୋଇଥିବା ଜଣାପଡିଛି।

ଚିଲିକା (ସୀତାରାମ ଅଗ୍ରୱାଲ): ଆଜି ପ୍ରବାଦ ପୁରୁଷ, ମହାନ ଜନନାୟକ, କଳିଙ୍ଗର ବରପୁତ୍ର, ଓଡିଆ ଜାତିର ସ୍ୱାଭିମାନ ତଥା ପୂର୍ବତନ ମୁଖ୍ୟମନ୍ତ୍ରୀ ସ୍ବର୍ଗତ ବିଜୁ ପଟ୍ଟନାୟକଙ୍କ ୧୦୮ ତମ ଜନ୍ମ ଜୟନ୍ତୀ। ଏହି ଦିନକୁ ସାରା ଓଡିଶାରେ ପଞ୍ଚାୟତିରାଜ ଦିବସ ଭାବେ ପାଳନ କରାଯାଏ। ଏହି ପ୍ରରିପ୍ରେକ୍ଷୀରେ ଖୋର୍ଦ୍ଧା ଜିଲ୍ଲା ବାଲୁଗାଁ ଏନଏସି ଠାରେ ବିଜୁ ଯୁବ ଜନତା ଦଳ ସଭାପତି ଶଶିକାନ୍ତ ପାଇକରାୟଙ୍କ ନେତୃତ୍ୱରେ ଏକ ପଦଯାତ୍ରା କରାଯାଇଥିଲା। ସରଳା ପଦର ଛକ ସ୍ଥିତ ମା’ ଉତ୍ତରାୟଣୀ ମନ୍ଦିର ଠାରୁ ଉକ୍ତ ପଦଯାତ୍ରା ଆରମ୍ଭ ହୋଇ ବାଲୁଗାଁ ବଜାରର ଗାନ୍ଧୀ ଛକ ଠାରେ ପହଞ୍ଚିଥିଲା। ଗାନ୍ଧୀ ଛକ ଠାରେ ଅବସ୍ଥିତ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରାଯାଇ ବାଲୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ରୋଗୀ ମାନଙ୍କୁ ଶୁଖିଲା ଖାଦ୍ୟ ଓ ଫଳ ବଣ୍ଟନ କରାଯାଇଥିଲା। ଏହି ସମୟରେ କର୍ମୀମାନଙ୍କ ଦ୍ଵାରା ବିଜୁ ପଟ୍ଟନାୟକ ଅମର ରହେ ସ୍ଲୋଗାନରେ ବାଲୁଗାଁ ବଜାର ପ୍ରକମ୍ପିତ ହୋଇଥିଲା।

ଏହି କାର୍ଯ୍ୟକ୍ରମରେ ବାଲୁଗାଁ ଏନଏସି ବିଜୁ ଜନତା ଦଳ ସଭାପତି ଜୟନ୍ତ ସ୍ୱାଇଁ, ଉପାଧ୍ୟକ୍ଷ ଭଗବାନ ପ୍ରଧାନ, ପୂର୍ବତନ ଚିଲିକା ବ୍ଲକ ଅଧ୍ୟକ୍ଷ ଉତ୍ପଳ ପାଇକରାୟ, ବିଜୁ ଯୁବ ଜନତା ଦଳ ସଭାପତି ଆଲୋକ ନାୟକ, କାଉନସିଲର ଅଭିମନ୍ୟୁ ସ୍ୱାଇଁ, ଲକ୍ଷ୍ମୀଧର ସେଠି, ସୁଜାତା ପଣ୍ଡା, ଡିଜିଟାଲ ସେକ୍ରେଟାରୀ ଆରବ କୁମାର ଏବଂ ବିଜୁ ଜନତା ଦଳର ଯୁବଛାତ୍ର, କର୍ମୀ ବହୁଳ ମାତ୍ରରେ ଯୋଗ ଦେଇଥିଲେ।