Categories
ଆଞ୍ଚଳିକ

ଚିଲିକା: ପ୍ରାକ ନିର୍ବାଚନୀ ହିଂସାକୁ ରୋକିବା ପାଇଁ ପୋଲିସର ମେଗା ଫ୍ଲାଗ ମାର୍ଚ୍ଚ

ଚିଲିକା (ସୀତାରାମ ଅଗ୍ରୱାଲ): ନିକଟରେ ଗଞ୍ଜାମ ଖଲ୍ଲିକୋଟରେ ହୋଇଥିବା ପ୍ରାକ ନିର୍ବାଚନୀ ହିଂସା ପରେ ଆହୁରି ସତର୍କ ହୋଇଛି ପୋଲିସ। ଚିଲିକା ନିର୍ବାଚନମଣ୍ଡଳୀରେ ଆସନ୍ତା ୨୫ ତାରିଖରେ ମତଦାନ ହେବାକୁ ଥିବା ବେଳେ ପ୍ରାକ ନିର୍ବାଚନ ହିଂସାକୁ ରୋକିବା ପାଇଁ ଏକାଧିକ ପଦକ୍ଷେପ ନେଇଛି ପୋଲିସ।

ଆଜି ଖୋର୍ଦ୍ଧା ଏସପି ଅବିନାଶ କୁମାରଙ୍କ ନେତୃତ୍ୱରେ ବାଣପୁର ଥାନା ଅଞ୍ଚଳରେ ଏକ ମେଗା ଫ୍ଲାଗ ମାର୍ଚ୍ଚ ଅନୁଷ୍ଠିତ ହୋଇଯାଇଛି। ଉକ୍ତ ଫ୍ଲାଗମାର୍ଚ୍ଚରେ ଏସପିଙ୍କ ସମେତ, ୩ ଅତିରିକ୍ତ ଏସପି, ୬ ଡ଼ିଏସପି, ୭ ଇନ୍ସପେକ୍ଟର ଏବଂ ଏକାଧିକ ପ୍ଲାଟୁନ ଫୋର୍ସ ସାମିଲ ଥିଲେ। ତେବେ ଭୟମୁକ୍ତ ମତଦାନକୁ ଗୁରୁତ୍ୱଦେଇ ଏସପି କହିଥିଲେ କି ବାଣପୁର ଏକ ସମ୍ବେଦନଶୀଳ ଅଞ୍ଚଳ ହୋଇଥିବାରୁ ପୋଲିସ ର ଏଠାରେ ସ୍ୱତନ୍ତ୍ର ନଜର ରହିଛି। କିପରି ନିର୍ବାଚନକୁ ଅବାଧ ଓ ନିରପେକ୍ଷ ଭାବେ ସମଗ୍ର ଜିଲ୍ଲାରେ ଅନୁଷ୍ଠିତ କରାଯିବ ତାହାପାଇଁ ପୋଲିସ ପ୍ରଶାସନ ସଦାସର୍ବଦା ତତ୍ପର ରହିଥିବା ଏସପି କହିଛନ୍ତି।

ତେବେ ଆଜିର ମେଗା ଫ୍ଲାଗମାର୍ଚ୍ଚ ଦ୍ୱାରା ବାଣପୁର ଅଂଚଳବାସୀଙ୍କ ମନୋବଳ ବଢିଥିବା ପରିଲକ୍ଷିତ ହୋଇଛି।

Categories
ଆଞ୍ଚଳିକ

ବାଣପୁରରେ ବଡଧରଣର ଅଗ୍ନିକାଣ୍ଡ: ନଗଦ ଦୁଇଲକ୍ଷ ସହ ଜଳି ପୋଡ଼ି ପାଉଁଶ ହେଲା ଚାରି ବଖରା ଘର

ବାଣପୁର (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲା ବାଣପୁର ଥାନା ନନ୍ଦପୁର ଗ୍ରାମ ପଞ୍ଚାୟତ ଅନ୍ତର୍ଗତ ଅନ୍ତରକିଆରୀ ଗ୍ରାମର ସୁକାନ୍ତ ବରାଳଙ୍କ ଘରେ ଅଗ୍ନିକାଣ୍ଡ ଘଟି ଚାରି ବଖରା ଘର ଜଳି ପୋଡ଼ି ପାଉଁଶ ହୋଇଯାଇଛି। ପୂଜା ସମୟରେ ଦୀପ ସଳିତା ଦ୍ୱାରା ଘରେ ନିଆଁ ଲାଗିଥିବା ପରିବାର ଲୋକ କହିଛନ୍ତି। ଅଗ୍ନିକାଣ୍ଡରେ ଘରର ସମସ୍ତ ଆସବାବପତ୍ର ସହ ପୁଅର ଡାକ୍ତରୀ ଖର୍ଚ୍ଚ ପାଇଁ ରଖିଥିବା ଦୁଇଲକ୍ଷ ଟଙ୍କା, ଏଲଇଡି ଦରକାରୀ କାଗଜପତ୍ର, ସୁନା ଅଳଙ୍କାର ଆଦି ଜଳି ପୋଡି ପାଉଁଶ ହୋଇଯାଇଥିବା ପୀଡ଼ିତ କହିଛନ୍ତି।

ଖବର ପାଇ ବାଣପୁର ଅଗ୍ନିଶମ ବିଭାଗ ପହଞ୍ଚି ନିଆଁକୁ ଆୟତ୍ତ କରିଥିବା ବେଳେ ନିଆଁର ପ୍ରକୋପରୁ କୌଣସି ସାମଗ୍ରୀ ଉଦ୍ଧାର ହୋଇନଥିବା ଜଣାଯାଇଛି। ପ୍ରକାଶ ଥାଉକି ସୁକାନ୍ତ ଜଣେ ଗରିବ ଓ ଦିନ ମଜୁରିଆ ହୋଇଥିବା ବେଳେ ଚାରି ପୁଅଙ୍କ ଭିତରୁ ଦୁଇ ପୁଅ ଉକ୍ତ ଘରେ ବାସ କରନ୍ତି। ତେବେ ଅଗ୍ନିକାଣ୍ଡ ଦ୍ୱାରା ସବୁ ନଷ୍ଟ ହୋଇଯାଇଥିବାରୁ ପରିବାର ସଦସ୍ୟ ଦୟନୀୟ ଅବସ୍ଥାରେ ବାହାରେ ରହିଛନ୍ତି।

ଖବର ପାଇ ବାଣପୁର ଅତିରିକ୍ତ ତହସିଲଦାର ସାହୀନ ନାଜ, ଆରଆଇ ଜୟଦେବ ନାୟକ ଆଦି ଘଟଣା ସ୍ଥଳରେ ପହଞ୍ଚି ପରିବାରକୁ ସାନ୍ତ୍ୱନା ଦେବା ସହ ସରକାରୀ ସାହାଯ୍ୟ ପ୍ରଦାନ କରିବାକୁ ପ୍ରତିଶୃତି ଦେଇଛନ୍ତି। ତେବେ ପ୍ରାଥମିକ ପର୍ଯ୍ୟାୟରେ ପୀଡ଼ିତଙ୍କ ପରିବାରକୁ ଗ୍ରାମ ସ୍କୁଲରେ ଥଇଥାନ କରାଯାଇଛି। ନନ୍ଦପୁର ଗ୍ରାମ ପଞ୍ଚାୟତ ସରପଞ୍ଚ ପୁଷ୍ପମିତ୍ର ଖୁଣ୍ଟିଆ କ୍ଷତିଗ୍ରସ୍ତ ପରିବାରକୁ ତୁରନ୍ତ ୫ହଜାର ଟଙ୍କା ଆର୍ଥିକ ସାହାଯ୍ୟ ପ୍ରଦାନ କରିଛନ୍ତି।

Categories
ଆଞ୍ଚଳିକ

ବାଣପୁର କୁମ୍ଭାକାଡିହରେ ଚୋରୀ ଅଭିଯୋଗ ନେଇ ଥାନାରେ ଏତଲା

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ କୁମ୍ଭାକାଡିହ ଗ୍ରାମରେ ଏକ ଚୋରି ହୋଇଥିବା ଥାନାରେ ଅଭିଯୋଗ ହୋଇଛି। ଅଭିଯୋଗ ମୁତାବକ ଉକ୍ତ ଗ୍ରାମର ସଂଗୀତା ଲେଙ୍କାଙ୍କ ଘରୁ ଗୁରୁବାର ବିଳମ୍ବିତ ରାତ୍ରିରେ ଅଜଣା ଦୁର୍ବୁତ୍ତମାନେ ପଛ କବାଟ ଭାଙ୍ଗି ଘରୁ ରୁ 50 ହଜାର ଟଙ୍କା ନଗଦ ଏବଂ ଅଳଙ୍କାର ଲୁଟି ନେଇ ଫେରାର ହୋଇଯାଇଛନ୍ତି।

ଅନୁରୂପ ଭାବେ ତାଙ୍କ ଭ୍ୟାନିଟି ବ୍ୟାଗରୁ ଦରକାରୀ କାଗଜପତ୍ର ଏବଂ ଛୋଟ ମନିପାର୍ସ ମଧ୍ୟ ନେଇଯାଇଛନ୍ତି ଏବଂ ଏକ ଆଟାଚିକୁ ଭାଙ୍ଗି ଦେଇଛନ୍ତି। ତେବେ ଅଭିଯୋଗ ଆଧାରରେ ପୋଲିସ କେସ ନମ୍ବର 40/24 ରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଦେଇଥିବା ଜଣାପଡିଛି।

Categories
ଆଞ୍ଚଳିକ

ବାଣପୁରରେ ନାବିଳିକାକୁ ପ୍ରେମ ନିବେଦନ, ଯୁବକକୁ ଉତ୍ତମମଧ୍ୟମ ଦେଇ ଥାନା ଜିମା ଦେଲେ ଲୋକେ

ବାଣପୁର( ସୀତାରାମ ଅଗ୍ରୱାଲ): ନାବାଳିକାଙ୍କୁ ପ୍ରେମ ନିବେଦନ କରିବା ସହ ଅଶ୍ଳୀଳ ଇଙ୍ଗିତ କରିବା ପଡ଼ିଲା ମହଙ୍ଗା। ଉତ୍ତମ ମଧ୍ୟମ ଦେଇ ଥାନା ଜିମା ଦେଲେ ଜନସାଧାରଣ। ଘଟଣା ଘଟିଛି ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଞ୍ଚଳରେ।

ଆଜି ସକାଳେ ନାଚୁଣୀ ଥାନା ଓଡଗାଁ ଗ୍ରାମର ବିଜୟ ସେଠୀ(୩୦) ନାମକ ଯୁବକ ବାଣପୁର ପଲଟନ ପଡିଆ ନିକଟରେ ଟ୍ୟୁସନ ପାଇଁ ସାଇକେଲରେ ଯାଉଥିବା ଜନୈକ ନାବାଳିକାଙ୍କୁ ଅଶ୍ଳୀଳ ଇଙ୍ଗିତ କରିବା ସହ ପ୍ରେମ ନିବେଦନ କରିଥିଲେ। ନାବାଳିକା ଏହାକୁ ବିରୋଧ କରି ପାଟି କରିବାରୁ ସ୍ଥାନୀୟ ଅଞ୍ଚଳବାସି ଘଟଣାସ୍ଥଳରେ ଜମା ହେବା ସହ ଅଭିଯୁକ୍ତଙ୍କୁ ମାଡ଼ ମାରି ବାଣପୁର ଥାନା ଜିମା ଦେଇଥିଲେ।

ପୋଲିସ ତଦନ୍ତରେ ଜାଣିବାକୁ ପାଇଥିଲା ଯେ,ଅଭିଯୁକ୍ତ ବିଜୟ ବରାବର ଜନୈକ ନାବାଳିକାଙ୍କୁ ଟ୍ୟୁସନ ଯିବା ସମୟରେ ପିଛା କରିବା ସହ ଅଶ୍ଳୀଳ ଇଙ୍ଗିତ କରିଆସୁଥିଲେ। ଫଳରେ ନାବାଳିକାଙ୍କ ପରିବାରବର୍ଗ ଙ୍କ ଅଭିଯୋଗ କ୍ରମେ ପୋଲିସ ପୋକସୋ ଅଧିନିୟମ ଅନୁଯାୟୀ କେସ ନମ୍ବର ୪୯୨/୨୩ ରେ ମାମଲା ରୁଜୁ କରି ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଆଇଆଇସି ରମେଶ ଚନ୍ଦ୍ର ଦେବତା ସୂଚନା ଦେଇଛନ୍ତି।

ସେହିପରି ଭାବେ ଯଦି କେହି ରୋଡ ରୋମିଓ କୌଣସି ଛାତ୍ରୀ କିମ୍ବା ମହିଳାଙ୍କୁ ହଇରାଣ କରନ୍ତି ତେବେ ତୁରନ୍ତ ଥାନାରେ ଅଭିଯୋଗ କରିବା ପାଇଁ ଆଇଆଇସି ଶ୍ରୀ ଦେବତା ନିବେଦନ କରିଛନ୍ତି।

Categories
ଆଞ୍ଚଳିକ

ବାଣପୁର-ବାଲୁଗାଁ ଜାତୀୟ ରାଜପଥରେ ମର୍ମନ୍ତୁଦ ସଡ଼କ ଦୁର୍ଘଟଣା, ଟ୍ରକ ହେଲ୍ପରଙ୍କ ମୃତ୍ୟୁ

ବାଣପୁର (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ୧୬ ନମ୍ବର ଜାତୀୟ ରାଜପଥ ବେଲପଡା ଛକରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଯାଇଛି। ଯେଉଁଥିରେ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଛି। ମୃତକ ଜଣକ ହେଲେ ଆସାମ ରାଜ୍ୟ ବରପେଟା ଥାନା ବିହାପରା ଗ୍ରାମର ମୋମିନୁଲ ଖାନ (୨୫)।

ସୂଚନା ମୁତାବକ ଆସାମରୁ ଏକ କାର୍ବନ ବୋଝେଇ ଟ୍ରକ ଆନ୍ଧ୍ର ଅଭିମୁଖେ ଯାଉଥିବା ବେଳେ ଆଜି ବଡ଼ି ଭୋରରେ ବେଲପଡା ଛକଠାରେ ବିଶ୍ରାମ ପାଇଁ ଅଟକିଥିଲା। ଉକ୍ତ ସମୟରେ ହେଲ୍ପର ମୃତ ମୋମିନୁଲ ଟ୍ରକ ଚକା ନିକଟରେ କିଛି ଯାନ୍ତ୍ରିକ ମରାମତି କାର୍ଯ୍ୟ ଜାରି ରଖିଥିଲେ।

ତେବେ ସେହି ସମୟରେ କେଉଁଝର ଯୋଡ଼ାରୁ ବ୍ରହ୍ମପୁର ଅଭିମୁଖେ ଦୃତଗତିରେ ଯାଉଥିବା ଏକ କୋଇଲା ବୋଝେଇ ହାଇୱା ପୁର୍ବରୁ ଛିଡା ହୋଇଥିବା କାର୍ବନ ବୋଝେଇ ଟ୍ରକକୁ ପଛପଟୁ ଶକ୍ତ ଧକ୍କା ଦେଇଥିଲା। ଫଳରେ ଟ୍ରକଟି ଆଗକୁ ଗାଡିଯାଇ ଆଉ ଏକ ଟ୍ରକକୁ ଧକ୍କା ଦେଇଥିଲା ଏବଂ ଟ୍ରକ ଚକା ନିକଟରେ କାର୍ଯ୍ୟ କରୁଥିବା ମୋମିନୁଲଙ୍କ ଉପରେ ଚଢିଯାଇଥିଲା। ଫଳରେ ଘଟଣାସ୍ଥଳରେ ମୋମିନୁଲଙ୍କ ମୃତ୍ୟୁ ହୋଇଥିବାବେଳେ ଦୁର୍ଘଟଣା ଘଟାଇଥିବା କୋଇଲା ବୋଝେଇ ହାଇୱା ଚାଳକ ଫେରାର ହୋଇଯାଇଛନ୍ତି।

ଖବର ପାଇ ବାଣପୁର ପୋଲିସ ଏସଆଈ ରବୀନ୍ଦ୍ରନାଥ ଗୌଡ଼, ଗାୟତ୍ରୀ ଗୋଛାୟତ, ଏଏସଆଈ ଅନିଲ କୁମାର ନାୟକ ଏବଂ ଟିମ ଘଟଣାସ୍ଥଳରେ ପହଞ୍ଚି ସ୍ଥାନୀୟ ଅଗ୍ନିଶମ ବାହିନୀର ସହାୟତାରେ ମୃତକଙ୍କୁ ଉଦ୍ଧାର କରିବା ସହ ଶବ ଜବତ କରି ତଦନ୍ତ ଜାରି ରଖିଛି।

Categories
ଆଞ୍ଚଳିକ

ବାଣପୁର: ନବ ବିବାହିତା ମହିଳାଙ୍କ ସନ୍ଦେହଜନକ ମୃତ୍ୟୁ, ସ୍ୱାମୀ ଓ ଶାଶୁ ଥାନାରେ ଅଟକ

ବାଣପୁର (ସୀତାରାମ ଅଗ୍ରୱାଲ): ବାଣପୁର ଥାନା ଅନ୍ତର୍ଗତ ତୋରସିଂହ ଗ୍ରାମରେ ଜଣେ ନବ ବିବାହିତା ମହିଳାଙ୍କ ସନ୍ଦେହଜନକ ମୃତ୍ୟୁ ହୋଇଥିବା ଅଭିଯୋଗ ହୋଇଛି। ଅଭିଯୋଗ ଅନୁଯାୟୀ ବାଲୁଗାଁ ଥାନା ଅନ୍ତର୍ଗତ ଚାଷଙ୍ଗରା ଗ୍ରାମର ପୂଜା ଜେନା ନାମ୍ନୀ ଜଣେ ମହିଳା ତୋରସିଂ ଗ୍ରାମର ରାଜା ଭୋଳଙ୍କୁ ପ୍ରେମ ବିବାହ କରିଥିଲେ। କିନ୍ତୁ ଶ୍ୱଶୁର ଘର ଲୋକ ଯୌତୁକ ଦାବୀ କରି ପୂଜାଙ୍କୁ ନିର୍ଯ୍ୟାତନା ଦେଉଥିଲେ ବୋଲି ଅଭିଯୋଗ ହୋଇଛି। ତେବେ ଏ ନେଇ ଗତକାଲି ପୂଜା ତାଙ୍କ ପରିବାର ଲୋକଙ୍କୁ ଜଣାଇଥିଲେ।

ରାତ୍ରି ୧୦ଟାରେ ପରିବାର ଲୋକ ରାଜାଙ୍କ ଘରେ ପହଂଚିବାରେ ଝିଅ ଘର ଲୋକଙ୍କୁ ରାଜାଙ୍କ ପରିବାର ଲୋକ ଘରକୁ ପୁରାଇଦେଇ ନ ଥିଲେ ବୋଲି କୁହାଯାଉଛି। ଆଜି ପୂଜାଙ୍କୁ ଶ୍ୱଶୁର ଘର ଲୋକେ ଆମ୍ବୁଲାନ୍ସରେ ଗୁରୁତର ଅବସ୍ଥାରେ ଡାକ୍ତରଖାନାକୁ ନେଇଥିବା ବେଳେ ପରିବାର ଲୋକ ପୂଜାଙ୍କ ମୃତ୍ୟୁ ହୋଇଯାଇଥିବା ଜାଣିବାକୁ ପାଇଥିଲେ।

ଉକ୍ତ ଘଟଣା ସମ୍ପର୍କରେ ପୂଜାଙ୍କ ମା’ ଥାନାରେ ଅଭିଯୋଗ କଲା ପରେ ପୋଲିସ ପୂଜାଙ୍କ ସ୍ୱାମୀ ଓ ଶାଶୁଙ୍କୁ ଅଟକ ରଖିଥିବା ବେଳେ ପୂଜା ବିଷ ପିଇ ଦେଇଥିବା ରାଜାଙ୍କ ପରିବାର ଲୋକ କହିଛନ୍ତି। ମୃତଶରୀରକୁ ବାଣପୁର ପୋଲିସ ଜବତ କରିଥିବା ବେଳେ ରିପୋର୍ଟ ଲେଖା ହେଲା ବେଳକୁ ଆମ୍ବୁଲାନ୍ସ ସହ ମୃତ ଶରୀର ବାଣପୁର ଥାନା ସମ୍ମୁଖରେ ଥିବା ଜଣାଯାଇଛି।

Categories
ଆଞ୍ଚଳିକ

ବାଣପୁରରେ ସାଇବର ସଚେତନତା ରଥକୁ ବିପୁଳ ସ୍ୱାଗତ

ବାଣପୁର (ସୀତାରାମ ଅଗ୍ରୱାଲ): ଖୋର୍ଦ୍ଧା ଏସପି ସିଦ୍ଧାର୍ଥ କଟାରିଆଙ୍କ ନିର୍ଦ୍ଦେଶକ୍ରମେ ଜିଲ୍ଲାର ବିଭିନ୍ନ ଥାନା ଅଞ୍ଚଳରେ ସାଇବର ସୁରକ୍ଷା ସଚେତନତା କାର୍ଯ୍ୟକ୍ରମ ଜାରି ରହିଛି। ଏହି ପରିପ୍ରେକ୍ଷୀରେ ବାଣପୁର ଥାନା ଅଞ୍ଚଳରେ ଆଜି ଉକ୍ତ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି।

ସକାଳେ ବାଣପୁର ସରକାରୀ ଉଚ୍ଚ ବିଦ୍ୟାଳୟ ଏବଂ ପୂର୍ବାହ୍ନରେ ଗୋଦାବରୀଶ ମହାବିଦ୍ୟାଳୟ ପରିସରରେ ଉକ୍ତ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ବାଣପୁର ଆଇଆଇସି ରମେଶ ଚନ୍ଦ୍ର ଦେବତାଙ୍କ ତତ୍ୱାବଧାନରେ ବିଭିନ୍ନ ସ୍ଥାନରେ ଉକ୍ତ କାର୍ଯ୍ୟକ୍ରମ ଆୟୋଜିତ ହୋଇଛି।

ଗୋଦାବରୀଶ ମହାବିଦ୍ୟାଳୟରେ ଆୟୋଜିତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଅତିରିକ୍ତ ଆରକ୍ଷୀ ଅଧିକ୍ଷକ କିଶୋର ଚନ୍ଦ୍ର ମୁଣ୍ଡ ଯୋଗଦେଇଥିବା ବେଳେ ସମ୍ମାନିତ ଅତିଥି ଭାବେ ଡ଼ିଏସପି ସୁଜିତ ପଣ୍ଡା, ଡ଼ିଏସପି ଅନିଲ କୁମାର ମହାନ୍ତି, ଡ଼ିଏସପି ମିନାକ୍ଷୀ ଠାକୁର, ବାଲୁଗାଁ ଏସଡିପିଓ ଶୁଭ୍ରାଂଶୁ ଶେଖର ମିଶ୍ର, ଆଇଆଇସି ରମେଶ ଚନ୍ଦ୍ର ଦେବତା, ମହାବିଦ୍ୟାଳୟ ଅଧ୍ୟକ୍ଷ ପ୍ରଫେସର ବିନାୟକ ହୋତା, ପ୍ରଶାସନିକ ଅଧିକାରୀ ଡା ସୁରପ୍ରତାପ ନରେନ୍ଦ୍ର ସିଂ ବର୍ମା ଓ ସହ ପ୍ରଶାସନିକ ଅଧିକାରିଣୀ ଡା ସୁଜାତା ମିଶ୍ର ଯୋଗଦେଇଥିଲେ।

ଏହି ଅବସରରେ ସାଇବର ଠକେଇ ସମ୍ପ୍ରତି ସମାଜରେ ଚ୍ୟାଲେଞ୍ଜ ଭାବେ ଉଭା ହୋଇଥିବା ବେଳେ ଏହାକୁ ପ୍ରତିହିତ କରିବା ପାଇଁ ସଚେତନତା ଏକମାତ୍ର ଉପାୟ ବୋଲି ଅତିଥିମାନେ ମତପ୍ରକାଶ କରିଥିଲେ। ସାଇବର ଲୁଟେରାଙ୍କ ଶିକାର ବିଶେଷ କରି ଯୁବ ପିଢ଼ି ଓ ବରିଷ୍ଠ ନାଗରିକ ମାନେ ହେଉଥିବା ବେଳେ ଏଥିରୁ ରକ୍ଷା ପାଇବାକୁ ହେଲେ ତୁରନ୍ତ ସ୍ଥାନୀୟ ପୋଲିସର ସହାୟତା ନେବାକୁ ଅତିଥି ମାନେ ଉପସ୍ଥିତ ଛାତ୍ରଛାତ୍ରୀଙ୍କୁ ପରାମର୍ଶ ଦେଇଥିଲେ।

ଅଜଣା ଫୋନ କଲ ଆସିଲେ ଓଟିପି ନଦେବା,  ୟୁପିଆଇରେ ପେମେଣ୍ଟ କରିବା ବେଳେ ସତର୍କ ରହିବା, ସାଇବର ଠକେଇର ଶିକାର ହେଲେ ୧୯୩୦ ଟୋଲ ଫ୍ରି ନମ୍ବରରେ ଅଭିଯୋଗ କରିବା ଭଳି ଏକାଧିକ ଉପାୟ ଅବଲମ୍ବନ କରିବା ପାଇଁ ଅତିଥିମାନେ କହିଥିଲେ।

ସଭା ଶେଷରେ ସାଇବର ସୁରକ୍ଷା ସମ୍ବନ୍ଧୀୟ ଏକାଧିକ ସାଂସ୍କୃତିକ କାର୍ଯ୍ୟକ୍ରମ, ନାଟକ ଏବଂ ପ୍ରତିଯୋଗିତା ଅନୁଷ୍ଠିତ ହୋଇଥିଲା ଏବଂ କୃତି ପ୍ରତିଯୋଗୀମାନଙ୍କୁ ପୁରସ୍କୃତ କରାଯାଇଥିଲା।

ପରିଶେଷରେ ସାଇବର ସଚେତନତା ରଥକୁ ବାଣପୁର ଗ୍ରାମାଞ୍ଚଳ ଓ ସହରାଞ୍ଚଳରେ ପରିକ୍ରମା କରାଯାଇ ସଚେତନତାର ବାର୍ତ୍ତା ପ୍ରଦାନ କରାଯାଇଥଲା।

ସୂଚନା ଥାଉକି ଓଡିଶା ପୋଲିସ ଆଇସିଆଇସିଆଇ ଫାଉଣ୍ଡେସନର ସହାୟତାରେ ସାରା ଓଡ଼ିଶାରେ ଉକ୍ତ ସାଇବର ସଚେତନତା କାର୍ଯ୍ୟକ୍ରମ ଜାରି ରଖିଛି।

Categories
ଆଞ୍ଚଳିକ

ବାଣପୁରର ବିଭିନ୍ନ ଗ୍ରାମରେ ଅବକାରୀ ବିଭାଗର ଚଢ଼ାଉ: ଦେଶୀ ମଦ ଜବତ, ଚାରି ଗିରଫ

ବାଣପୁର (ସୀତାରାମ ଅଗ୍ରୱାଲ): ଆଜି ଟାଙ୍ଗୀ ରେଞ୍ଜ ଅବକାରୀ ଅଧିକାରୀ ନାରାୟଣ ଜେନାଙ୍କ ନିର୍ଦ୍ଦେଶକ୍ରମେ ବାଲୁଗାଁ ଅବକାରୀ ବିଭାଗ ବାଣପୁର ଥାନା ଅଧିନସ୍ଥ ବିଭିନ୍ନ ଗ୍ରାମରେ ଚଢ଼ାଉ କରିଛି।  ଚଢ଼ାଉରେ ସମୁଦାୟ ୧୨୪ ଲିଟର ଦେଶୀ ମଦ ଓ ଦୁଇ ଗୋଟି ସ୍କୁଟି ଜବତ ହୋଇଥିବା ବେଳେ ଚାରି ଜଣ ଅଭିଯୁକ୍ତ ଗିରଫ ହୋଇଛନ୍ତି।

ଗିରଫ ଅଭିଯୁକ୍ତ ମାନେ ହେଲେ ଭୀମପୁର ଗ୍ରାମର କୁମର ବେହେରା (୫୦), ମାଟିଆପୋଖରୀ ଗ୍ରାମର ଧରଣୀଧର ପ୍ରଧାନ (୪୭) ଓ କାଳୁ ପ୍ରଧାନ (୪୨) ଏବଂ ବିଧାରପୁର ଗ୍ରାମର ଇନ୍ଦ୍ରମଣି ପରିଡ଼ା (୫୫)। ଅଭିଯୁକ୍ତ ମାନେ ସ୍କୁଟିରେ ବେଆଇନ ଦେଶୀ ମଦ ନେଇ ଯାଉଥିବା ବେଳେ ପୁର୍ବରୁ ଛକି ରହିଥିବା ଅବକାରୀ କର୍ମଚାରୀଙ୍କ ହାତରେ ଧରା ପଡ଼ି ଗିରଫ ହୋଇଥିଲେ।

ଏ ସଂକ୍ରାନ୍ତରେ ଚାରି ଗୋଟି ମାମଲା ରୁଜୁ କରାଯାଇ ସମସ୍ତ ଅଭିଯୁକ୍ତମାନଙ୍କୁ କୋର୍ଟଚାଲାଣ କରାଯାଇଥିବା ବାଲୁଗାଁ ଭାରପ୍ରାପ୍ତ ଅବକାରୀ ଅଧିକାରୀ ତପନ କୁମାର ସ୍ୱାଇଁ ସୂଚନା ଦେଇଛନ୍ତି।

Categories
ଆଞ୍ଚଳିକ

ବାଣପୁରର ଅପହୃତ ନାବାଳିକା ହାଇଦ୍ରାବାଦରୁ ଉଦ୍ଧାର, ଅଭିଯୁକ୍ତ ଗିରଫ

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଞ୍ଚଳର ଜନୈକ ଅପହୃତ ନାବାଳିକାଙ୍କୁ ସୁଦୂର ହାଇଦ୍ରାବାଦରୁ ଉଦ୍ଧାର କରିଛି ପୋଲିସ। ଉକ୍ତ ଘଟଣାରେ ଅପହରଣକାରି ଅଭିଯୁକ୍ତ ଗିରଫ ହୋଇଛନ୍ତି।

ସୂଚନା ମୁତାବକ ବାଲୁଗାଁ ଥାନା ଅନ୍ତର୍ଗତ ଧୂଁଆଳ ଗ୍ରାମର ଦିଲ୍ଲୀପ କୁମାର ବାରିକ ବାଣପୁର ଅଞ୍ଚଳର ଜନୈକ ନାବାଳିକାଙ୍କୁ ଅପହରଣ କରି ନେଇ ଯାଇଥିବା ଝିଅର ପରିବାର ବର୍ଗ ଗତ ମାର୍ଚ୍ଚ ମାସରେ ଥାନାରେ ଅଭିଯୋଗ କରିଥିଲେ। ସେବେଠାରୁ ଉକ୍ତ ଘଟଣାର ତଦନ୍ତ ଜାରି ରହିଥିବା ବେଳେ କୌଣସି ସୂତ୍ରରୁ ଖବର ପାଇ ନିକଟରେ ହାଇଦ୍ରାବାଦ ରେ ଚଢ଼ାଉ କରି ଅପହୃତ ନାବାଳିକାଙ୍କୁ ଉଦ୍ଧାର କରିଛି ବାଣପୁର ପୋଲିସ।

ଅନୁରୂପଭାବେ ଅଭିଯୁକ୍ତ ଦିଲ୍ଲୀପଙ୍କୁ ମଧ୍ୟ ଗିରଫ କରାଯାଇଛି। ତେବେ ନାବାଳିକା ଜଣକ ଦୁଷ୍କର୍ମର ଶିକାର ହୋଇଥିବା ଜଣାପଡିଛି। ଏହି ଆଧାରରେ ଅଭିଯୁକ୍ତ ଙ୍କ ବିରୁଦ୍ଧରେ ଅପହରଣ ଓ ଦୁଷ୍କର୍ମ ପରି ସଙ୍ଗୀନ ଦଫା ଲଗାଯାଇଥିବା ବେଳେ ଆଜି କୋର୍ଟଚାଲାଣ କରାଯିବ ବୋଲି ଆଇଆଇସି ରମେଶ ଚନ୍ଦ୍ର ଦେବତା କହିଛନ୍ତି।

Categories
ଆଞ୍ଚଳିକ

କେନାଲରେ ବୁଡି ଅଜଣା ବ୍ୟକ୍ତିଙ୍କ ମୃତ୍ୟୁ ମାମଲା: ମିଳିଲା ପରିଚୟ, ମୃତ୍ୟୁର କାରଣ ଅସ୍ପଷ୍ଟ

ସୀତାରାମ ଅଗ୍ରୱାଲ

ବାଣପୁର: ଆଜି ଅପରାହ୍ନରେ ବାଣପୁର ଥାନା ଅନ୍ତର୍ଗତ ମୁକ୍ତାଦେଇପୁର ଗ୍ରାମ ନିକଟ ଶାଳିଆ କେନାଲରୁ ଜଣେ ବୃଦ୍ଧଙ୍କ ମୃତଦେହ ଅଗ୍ନିଶମ ବାହିନୀ ଉଦ୍ଧାର କରିଥିଲା। ମୃତକଜଣଙ୍କ ବାଣପୁର ମଙ୍ଗରାଜପୁର ଗ୍ରାମର ଶରତ ପାଣି (୫୯) ବୋଲି ଜଣାପଡିଛି।

ଗତକାଲି ଠାରୁ ସେ ନିଖୋଜ ଥିଲେ। ତେବେ ଘର ଲୋକ ବହୁ ଖୋଜାଖୋଜି ପରେ ମଧ୍ୟ ଶରତଙ୍କୁ ପାଇନଥିଲେ। କିନ୍ତୁ ମୁକ୍ତାଦେଇପୁର କେନାଲରେ ଶରତଙ୍କ ମୃତଦେହ ଭାସୁଥିବାର ଜାଣି ପରିବାର ଲୋକେ ସେଠାରେ ପହଞ୍ଚିଥିଲେ। ବାଣପୁର ଅଗ୍ନିଶମ ବାହିନୀ ଓ ପୋଲିସ ପହଞ୍ଚି କେନାଲରୁ ଶରତଙ୍କ ଶବକୁ ଉଦ୍ଧାର କରିଥିଲା।

ଶବ ଚି଼ହ୍ନଟ ପରେ ତାଙ୍କୁ ବାଣପୁର ଡାକ୍ତରଖାନାରେ ରଖାଯାଇଛି। ଆସନ୍ତାକାଲି ବ୍ୟବଚ୍ଛେଦ କରାଯାଇ ପରିବାର ଲୋକଙ୍କୁ ହସ୍ତାନ୍ତର କରାଯିବ ବୋଲି ପୋଲିସ କହିଛି। ତେବେ ମୃତ୍ୟୁର କାରଣ ଏପର୍ଯ୍ୟନ୍ତ ଜଣାପଡିନଥିବା ବେଳେ ବାଣପୁର ଥାନାରେ ଏକ ଅପମୃତ୍ୟୁ ମାମଲା ରୁଜୁ କରାଯାଇ ପୋଲିସ ତଦନ୍ତ ଜାରି ରଖିଛି।

Categories
ଆଞ୍ଚଳିକ

ବାଣପୁର: କୂଅରେ ପଡି ମହିଳାଙ୍କ ମୃତ୍ୟୁ

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ଏକଡାଳିଆ ଗ୍ରାମରେ ଏକ ଅଭାବନୀୟ ଘଟଣା ଘଟିଯାଇଛି। କୂଅରେ ପଡ଼ି ଜଣେ ମହିଳାଙ୍କ ମୃତ୍ୟୁ ଘଟିଥିବା ଜଣାପଡିଛି।

ସୂଚନା ମୁତାବକ ଆଜି ଅପରାହ୍ନରେ ଉକ୍ତ ଗ୍ରାମର ସ୍ବର୍ଗତ ମୋଚିରାମ ଦଳବେହେରାଙ୍କ ପତ୍ନୀ ଇଚ୍ଛା ଦେଇ (୫୭) କୌଣସି କାରଣବଶତଃ ନିଜ ଘର ବାରି କୂଅରେ ପଡିଯାଇଥିଲେ।  ଏହାଦେଖି ପରିବାର ଲୋକ ତୁରନ୍ତ ବାଣପୁର ଅଗ୍ନିଶମ ବାହିନୀକୁ ସୂଚନା ଦେଇଥିଲେ।  ଅଗ୍ନିଶମ ଅଧିକାରୀ ଓ ଟିମ ଘଟଣାସ୍ଥଳରେ ପହଞ୍ଚି ଇଛାଙ୍କୁ କୂଅରୁ ଉଦ୍ଧାର କରିଥିଲେ ସୁଦ୍ଧା ତାଙ୍କର ମୃତ୍ୟୁ ହୋଇଯାଇଥିଲା।

Categories
ଆଞ୍ଚଳିକ

ବାଣପୁର ଥାନା ଅଞ୍ଚଳରେ ଜଘନ୍ୟ ହତ୍ୟାକାଣ୍ଡ!: ଯୌତୁକ ଲାଗି ବୋହୁକୁ ମାରି ପୋଡ଼ି ଦେଇଥିବା ଅଭିଯୋଗ

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଞ୍ଚଳରେ ଏକା ଯୌତୁକଜନିତ ହତ୍ୟାକାଣ୍ଡ ଘଟିଥିବାର ଅଭିଯୋଗ ହୋଇଛି। ଖବର ମୁତାବକ ଭେଷରୀ ଗ୍ରାମର ଲକ୍ଷ୍ମଣ ଜେନାଙ୍କ କନ୍ୟା ଶାନ୍ତି ଘଡେଇ ୨୦୦୫ ମସିହାରେ ଭେଟେଶ୍ୱର ଗ୍ରାମର ଅଭିରାମ ଘଡେଇଙ୍କ ପୁତ୍ର ପ୍ରକାଶ ଘଡେଇଙ୍କୁ ବିବାହ କରିଥିଲେ। ଇତି ମଧ୍ୟରେ ଶାନ୍ତିଙ୍କ କୌଣସି ସନ୍ତାନ ହୋଇନଥିବା ବେଳେ ଶ୍ୱଶୁର ଘର ଲୋକେ ତାଙ୍କୁ ଯୌତୁକ ଜନିତ ନିର୍ଯ୍ୟାତନା ଦେଇ ଆସୁଥିଲେ।

ତେବେ ଗତକାଲି ଶାନ୍ତିଙ୍କ ଦେହ ଖରାପ ଥିବା ନେଇ ଶ୍ୱଶୁର ଘର ଲୋକେ ତାଙ୍କ ବାପା ଘରକୁ ଜଣାଇଥିଲେ। ତେବେ ଶାନ୍ତିଙ୍କ ପରିବାରବର୍ଗ ଭେଟେଶ୍ୱର ପହଁଚିଲା ବେଳକୁ ଶାନ୍ତିଙ୍କ ମୃତ୍ୟୁ ହୋଇସାରିଥିଲା ଏପରିକି ତାଙ୍କୁ ସ୍ମଶାନରେ ମଧ୍ୟ ଦାହ କରିଦେଇଥିବା ପରିବାରବର୍ଗ ସଙ୍ଗୀନ ଅଭିଯୋଗ କରିଛନ୍ତି।

ଏ ନେଇ ବାଣପୁର ପୋଲିସ ଶାନ୍ତିଙ୍କ ସ୍ୱାମୀ ପ୍ରକାଶ ଏବଂ ଅନ୍ୟ ଛଅ ଜଣଙ୍କ ବିରୁଦ୍ଧରେ କେସ ନମ୍ବର ୨୫୧/୨୩ ରେ ଏକ ହତ୍ୟା ମାମଲା ରୁଜୁ କରି ତଦନ୍ତ ଜାରି ରଖିଥିବା ବେଳେ ସମସ୍ତ ଅଭିଯୁକ୍ତ ଫେରାର ଅଛନ୍ତି।

Categories
ଆଜିର ଖବର ରାଜ୍ୟ ଖବର

ଖୋର୍ଦ୍ଧା ଜିଲ୍ଲା ପୋଲିସରେ ଛୋଟ ଅଦଳବଦଳ: ମହିଳା ଅଧିକାରୀ ଶୂନ୍ୟ ହେଲା ବାଣପୁର ଥାନା

ଖୋର୍ଦ୍ଧା: ଖୋର୍ଦ୍ଧା ଜିଲ୍ଲା ପୋଲିସରେ ଏସଆଇ ଏବଂ ଏଏସଆଇ ସ୍ତରରେ ଏକ ଛୋଟ ଅଦଳବଦଳ ହୋଇଛି। ପ୍ରଶାସନିକ ଆବଶ୍ୟକତାକୁ ଦୃଷ୍ଟିରେ ରଖି ଏହି ଅଦଳବଦଳ ହୋଇଛି। ଏ ନେଇ ଜିଲ୍ଲା ପୋଲିସ ମୁଖ୍ୟାଳୟରୁ ବିଜ୍ଞପ୍ତି ପ୍ରକାଶ ପାଇଛି।

ଜିଲ୍ଲା ପୋଲିସ ମୁଖ୍ୟାଳୟରେ କାର୍ଯ୍ୟରତ ଏସଆଇ ସଂଗ୍ରାମ କେଶରୀ ପାଇକରାୟଙ୍କ ବୋଲଗଡ଼ ଥାନା ଅଧିନସ୍ଥ ବାଙ୍କୋଇ ଫାଣ୍ଡି ଅଧିକାରୀ ଭାବେ ବଦଳି, ବାଙ୍କୋଇ ଫାଣ୍ଡି ଅଧିକାରୀ ଏସଆଇ ପ୍ରତାପ ଚନ୍ଦ୍ର ପୁହାଣଙ୍କ ଟାଙ୍ଗୀ ଥାନାକୁ ବଦଳି, ବାଣପୁର ଥାନା ଏସଆଇ ଦେବସ୍ମିତା ବେହେରାଙ୍କ ଖୋର୍ଦ୍ଧା ସଦର ଥାନାକୁ ବଦଳି, ଟାଙ୍ଗୀ ଥାନା ଏସଆଇ ପୁଷ୍ପଲତା ଲେଙ୍କାଙ୍କ ବାଲୁଗାଁ ଥାନାକୁ ବଦଳି, ସଦର ଥାନା ଏଏସଆଇ ଆରାଧ୍ୟ ପ୍ରସାଦ ନାୟକଙ୍କ ନାଚୁଣୀ ଥାନାକୁ ବଦଳି ଏବଂ ବାଙ୍କୋଇ ଫାଣ୍ଡି ଏଏସଆଇ ଶ୍ରୀନିବାସ ପ୍ରଧାନଙ୍କ ବୋଲଗଡ଼ ଥାନାକୁ ବଦଳି ହୋଇଛି।

ଉକ୍ତ ଅଧିକାରୀମାନଙ୍କୁ ତୁରନ୍ତ ନିଜର ନୂତନ କାର୍ଯ୍ୟସ୍ଥଳରେ ଯୋଗଦେବାକୁ ନିର୍ଦ୍ଦେଶ ଅଛି।  ତେବେ ଆଶ୍ଚର୍ଯ୍ୟର ବିଷୟ ବାଣପୁର ଥାନାରେ ମାତ୍ରାଧିକ ମହିଳା ଏବଂ ନାବାଳିକା ଜନିତ ମାମଲା ଆସୁଥିବା ବେଳେ ଏଠାରେ କାର୍ଯ୍ୟରତ ଥିବା ଏକମାତ୍ର ମହିଳା ଏସଆଇ ଙ୍କ ବଦଳିକୁ ବୁଦ୍ଧିଜୀବୀମାନେ ନାପସନ୍ଦ କରିଛନ୍ତି।

ବାଣପୁର ଥାନାରେ ଯଦି କୌଣସି ମହିଳା ଅଧିକାରୀ ରହିବେ ନାଇଁ ତେବେ ଥାନାରେ ବଢୁଥିବା ମହିଳା ଏବଂ ନାବାଳିକା ସମ୍ବନ୍ଧୀୟ ଅଭିଯୋଗ ଗୁଡିକର ଶୁଣାଣି ତଥା କାଉନସେଲିଙ୍ଗ କରିବାରେ ନିଶ୍ଚିତ ଅସୁବିଧା ସୃଷ୍ଟି ହେବ।

ଏହି ପରିପ୍ରେକ୍ଷୀରେ ବାଣପୁର ଥାନାରେ ଜଣେ ନୂତନ ମହିଳା ଏସଆଇ ଙ୍କୁ ନିଯୁକ୍ତି ଦିଆଯିବା ପର୍ଯ୍ୟନ୍ତ ପୁରୁଣା ମହିଳା ଏସଆଇ ଙ୍କୁ ଏଠାରୁ ବଦଳି ନକରାଯାଉ ବୋଲି ବୁଦ୍ଧିଜୀବୀ ମାନେ ଜିଲ୍ଲା ଏସପି ସିଦ୍ଧାର୍ଥ କଟାରିଆଙ୍କୁ ଅନୁରୋଧ କରିଛନ୍ତି।

Categories
ଆଞ୍ଚଳିକ

ବାଣପୁର: ଟ୍ରକ ସହ ଧକ୍କା ହେଲା ସ୍କୁଟର, ଶିକ୍ଷୟତ୍ରୀ ଗୁରୁତର

ସୀତାରାମ ଅଗ୍ରୱାଲ
ବାଣପୁର: ଆଜି ପୂର୍ବାହ୍ନରେ ବାଣପୁର ଥାନା ଅନ୍ତର୍ଗତ ଟାକିଆ ଶଙ୍ଖ ନିକଟରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଯାଇଛି। ଖବରରୁ ଜଣାଯାଇଛି ଯେ, ଗୋଦାବରୀଶ ବିଦ୍ୟାପୀଠର ଇଂରାଜୀ ଶିକ୍ଷୟତ୍ରୀ ଶୁଚିସ୍ମିତା ବଳ (୩୦) ନିଜର ସ୍କୁଟି ଯାହାର ନମ୍ବର ଓଡି ୦୨ ବିଏକ୍ସ ୫୪୧୨ ରେ ରେଲୱେ ଷ୍ଟେସନରୁ ସ୍କୁଲ ଅଭିମୁଖେ ଯାଉଥିଲେ। ସେହି ସମୟରେ ବାଣପୁର ନିକଟସ୍ଥ ଟାକିଆ ଶଙ୍ଖ ନିକଟରେ ଆଗରେ ଯାଉଥିବା ଏକ ୧୬ ଚକିଆ ଟ୍ରକ ଯାହାର ନମ୍ବର (ଏପି ୫୯ ୟୁଏମ ୩୮୦୮) ହଠାତ ବ୍ରେକ ମାରିବାରୁ ଶୁଚିସ୍ମିତାଙ୍କ ସ୍କୁଟିଟି ଟ୍ରକ ପଛପଟେ ବାଡେଇ ହୋଇ ଦୁର୍ଘଟଣା ଘଟିଥିଲା। ଯାହାଫଳରେ ଶୁଚିସ୍ମିତାଙ୍କର ମୁଣ୍ଡ ଓ ଓଠରେ ଗଭୀର କ୍ଷତ ସୃଷ୍ଟି ହୋଇ ଅଚେତ ହୋଇ ପଡ଼ିଥିଲେ।

ସଙ୍ଗେସଙ୍ଗେ ବାଣପୁର ପୋଲିସ ଘଟଣା ସ୍ଥଳରେ ପହଞ୍ଚି ବାଣପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ପଠାଇଥିଲା। ସେଠାରେ ତାଙ୍କର ଅବସ୍ଥା ସଙ୍କଟାପନ୍ନ ଥିବାରୁ ତାଙ୍କୁ ଭୁବନେଶ୍ୱର ଏମ୍ସ ହସ୍ପିଟାଲକୁ ଡାକ୍ତର ସ୍ଥାନାନ୍ତରଣ କରିଥିବାର ସୂଚନା ମିଳିଛି।

ପ୍ରକାଶଥାଉକି ବାଣପୁର ବଜାର ଅଞ୍ଚଳ ସଂକୀର୍ଣ୍ଣ ଥିବା ସତ୍ତ୍ୱେ ଭାରିଯାନନ ଗୁଡିକ ବଜାର ଭିତରକୁ ପ୍ରବେଶ କରୁଥିବାରୁ ବାରମ୍ବାର ଦୁର୍ଘଟଣା ଘଟୁଥିବାର ନଜିର ରହିଛି। ତେଣୁ ସ୍କୁଲ ସମୟ ଭିତରେ ଭାରିଯାନ ପ୍ରବେଶକୁ ଅନୁମତି ନ ଦେବାକୁ ସାଧାରଣରେ ବାରମ୍ବାର ଅଭିଯୋଗ ହୋଇ ଆସୁଅଛି, ରିପୋର୍ଟ ଲେଖାହେଲା ବେଳକୁ ଥାନାରେ କୌଣସି ମାମଲା ଦାୟର ହୋଇନଥିବା ଜଣାଯାଇଛି।

Categories
ଆଜିର ଖବର ରାଜ୍ୟ ଖବର

ନାଚୁଣୀ: ସଡ଼କ ଦୁର୍ଘଟଣାରେ ଯୁବକ ମୃତ

ସୀତାରାମ ଅଗ୍ରୱାଲ

ନାଚୁଣୀ: ଖୋର୍ଦ୍ଧା ଜିଲ୍ଲା ନାଚୁଣୀ ବଜାର ନିକଟରେ ସଡ଼କ ଦୁର୍ଘଟଣାରେ ଜଣେ ଯୁବକଙ୍କ  ମୃତ୍ୟୁ ହୋଇଛି। ମୃତକଙ୍କ ନାମ କୁମାର ବେହେରା (୩୦)। ଗଞ୍ଜାମ ଜିଲ୍ଲା ବ୍ରହପୁର ଶଗଡିଆ ସାହିରେ ତାଙ୍କ ଘର।

ପୋଲିସ ସୂଚନା ମୁତାବକ ଯୁବକ ଜଣକ ବାଇକ୍ ରେ ତାପଙ୍ଗରୁ ବ୍ରହ୍ମପୁର ଅଭିମୁଖେ ଯାଉଥିବା ବେଳେ ନାଚୁଣୀ ଛକସ୍ଥିତ ଦିଭାଇଡରକୁ ଅସାବଧାନତା ବଶତଃ ପିଟି ଦେଇଥିଲେ। ଫଳରେ ସେଠାରେ ସେ ଗୁରୁତର ଅବସ୍ଥାରେ ପଡିଥିବା ବେଳେ ତାଙ୍କୁ ଚିଲିକା ଅଗ୍ନିଶମ ବାହିନୀ ଉଦ୍ଧାର କରି ଟାଙ୍ଗୀ ମେଡିକାଲରେ ଭର୍ତ୍ତି କରିଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା। ଶବ ଜବତ କରି ଟାଙ୍ଗୀ ପୋଲିସ୍ ନାଚୁଣୀ ଫାଣ୍ଡି ପୋଲିସ୍ କୁ ହସ୍ତାନ୍ତର କରିଥିଲା।

ତେବେ ଏ ନେଇ ବାଣପୁର ଥାନାରେ କେସ ନମ୍ବର ୧/୨୩ ରେ ଏକ ମାମଲା ରୁଜୁ କରାଯାଇ ତଦନ୍ତ ଜାରି ରହିଥିବାର ନାଚୁଣୀ ଫାଣ୍ଡି ଅଧିକାରୀ କେଶବ ସାହୁ କହିଛନ୍ତି।

Categories
ଆଞ୍ଚଳିକ

କୁମାରଙ୍ଗ ସୋଆଇଟି କାର୍ଯ୍ୟାଳୟରୁ ସିସି କ୍ୟାମେରା ଚୋରି ଅଭିଯୋଗ

ସୀତାରାମ ଅଗ୍ରୱାଲ
ବାଣପୁର: ଗତକାଲି ରାତିରେ ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଧିନସ୍ଥ କୁମାରଙ୍ଗ ସୋସାଇଟି କାର୍ଯ୍ୟାଳୟରୁ ଦୁଇଟି ସିସିଟିଭି କ୍ୟାମେରା ଚୋରି ହୋଇଯାଇଥିବା ସେକ୍ରେଟାରୀ ସଂଜୀବ କୁମାର ସାହୁ ବାଣପୁର ଥାନାରେ ଅଭିଯୋଗ କରିଛନ୍ତି।

ଅଭିଯୋଗ ଅନୁଯାୟୀ ସରକାରଙ୍କ ନିର୍ଦ୍ଦେଶ ମୁତାବକ ଧାନ ପ୍ରୋକ୍ୟୁରମେଣ୍ଟ ସମୟରେ ସମସ୍ତ ସୋସାଇଟିରେ ସିସି ଟିଭି କ୍ୟାମେରା ବାଧ୍ୟତା ମୂଳକ ଥିବାବେଳେ କୁମାରଙ୍ଗ ସୋସାଇଟିରେ ଲାଗିଥିବା କ୍ୟାମେରାକୁ କୌଣସି ଦୁର୍ବୃତ୍ତ ଚୋରି କରି ନେଇଯାଇଛି।

ସେକ୍ରେଟାରୀ ସକାଳୁ ଅଫିସ ଖୋଲିବା ସମୟରେ ଚୋରି ହୋଇଯାଇଥିବା ଜାଣିପାରି ଥାନାର ଦ୍ୱାରସ୍ତ ହୋଇଥିବା ଜଣାଯାଇଛି। ତେବେ ଉକ୍ତ ଚୋରି ପଛର ଉଦ୍ଦେଶ୍ୟ କଣ ତାହା ଏବେ ରହସ୍ୟ ଘେରରେ ଅଛି।

Categories
ଅପରାଧ ଆଜିର ଖବର ରାଜ୍ୟ ଖବର

ନାଚୁଣୀ ବଜାରରେ ବଡ଼ ଧରଣର ଲୁଟ: ଏଟିଏମ ଭାଙ୍ଗି ସମସ୍ତ ଟଙ୍କା ଲୁଟିନେଲେ ଦୁର୍ବୃତ୍ତ

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ନାଚୁଣୀ ବଜାରରେ ଏକ ଏଟିଏମ ରୁ ବଡ଼ ଧରଣର ଲୁଟ ହୋଇଥିବା ଜଣାପଡିଛି। ସୂଚନା ମୁତାବକ ଗତକାଲି ବିଳମ୍ବିତ ରାତ୍ରିରେ ନାଚୁଣୀ ବଜାର ଏଚଡ଼ିଏଫସି ବ୍ୟାଙ୍କ ଏଟିଏମରୁ ଦୁର୍ବୃତ୍ତମାନେ ମେସିନ ଭାଙ୍ଗି ତନ୍ମଧ୍ୟରୁ ସମସ୍ତ ଟଙ୍କା ଲୁଟି ନେଇଛନ୍ତି। ଏ ନେଇ ଏଚଡ଼ିଏଫସି ବ୍ୟାଙ୍କ ନୂଆଦିଲ୍ଲୀରୁ ବାଣପୁର ଆଇଆଇସି ଜୟପ୍ରକାଶ ପରିଡ଼ାଙ୍କୁ ସୂଚନା ଦିଆଯିବା ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଦେଇଛି।

ତେବେ ଅତ୍ୟାଧୁନିକ କୌଶଳସତ୍ତ୍ୱେ ଲୁଟେରାମାନେ କିପରି ଏଟିଏମ ଲୁଟିଲେ ଏବଂ ବ୍ୟାଙ୍କ ସିଗନାଲ ପାଇପାରିଲା ନାହିଁ, ତାହା ଆଶ୍ଚର୍ଯ୍ୟଜନକ ବିଷୟ। ଅଞ୍ଚଳବାସୀଙ୍କ କହିବା ମୁତାବକ ଲୁଟେରାମାନେ ଲୁଟ କରି ଫେରିବା ସମୟରେ ସ୍ଥାନୀୟ ଅଞ୍ଚଳର ରାତ୍ରି ଜଗୁଆଳିଙ୍କୁ ମଧ୍ୟ ମାରଧାର କରି ଫେରାର ହୋଇଯାଇଛନ୍ତି। ବର୍ତ୍ତମାନ ବାଣପୁର ପୋଲିସ ଉକ୍ତ ଏଟିଏମକୁ ନିଜ ହେପାଜତକୁ ନେଇଥିବା ବେଳେ କିଛି ସମୟରେ ସନ୍ଧାନୀ କୁକୁର ଓ ସାଇଣ୍ଟିଫିକ ଟିମ ଘଟଣାସ୍ଥଳରେ ପହଞ୍ଚିବେ ବୋଲି ଆଇଆଇସି ଶ୍ରୀ ପରିଡ଼ା କହିଛନ୍ତି।

Categories
ଅପରାଧ ଆଞ୍ଚଳିକ

ବାଣପୁର: ରାତିରେ ଘରୁ କଳାକନା ବୁଲାଇଲେ ଦୁର୍ବୁତ୍ତ, ଲକ୍ଷାଧିକ ଟଙ୍କାର ଅଳଙ୍କାର ଲୁଟ

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ବିଂଝଳା ଗ୍ରାମରେ ଗତକଲି ରାତିରେ ଏକ ଚୋରି ହୋଇଥିବାର ଖବର ହସ୍ତଗତ ହୋଇଛି। ପୋଲିସ ସୂଚନା ମୁତାବକ ଉକ୍ତ ଗ୍ରାମର ସୁଶାନ୍ତ ସ୍ୱାଇଁ ଏବଂ ତାଙ୍କ ପତ୍ନୀ ସୌନ୍ଦର୍ଯ୍ୟା ଲକ୍ଷ୍ମୀ ସ୍ୱାଇଁ ଗତକାଲି କୌଣସି ବ୍ୟକ୍ତିଗତ କାର୍ଯ୍ୟରେ ଘର ତାଲା ପକାଇ କଟକ ଯାଇଥିବା ବେଳେ ଆଜି ସକାଳେ ଗ୍ରାମକୁ ଫେରିଥିଲେ।

ତେବେ ଘର ଖୋଲିବା ପାଇଁ ଉଦ୍ୟତ ହେଲା ବେଳକୁ ଘର ତାଲା ଭାଙ୍ଗିଥିବାର ଦେଖିବାକୁ ପାଇଥିଲେ ଦମ୍ପତି। ଭିତରକୁ ଯାଇ ଦେଖିଲା ବେଳକୁ ଦୁର୍ବୁତ୍ତ ମାନେ ଘରୁ ବହୁ ମୂଲ୍ୟବାନ ଜିନିଷ ଚୋରି କରିଦେଇଥିବାର ଦେଖିବାକୁ ପାଇଥିଲେ।

ଅଭିଯୋଗ ମୁତାବକ ସୁଶାନ୍ତଙ୍କ ଘରୁ କିଛି ସ୍ଵର୍ଣ୍ଣ ଅଳଙ୍କାର ଏବଂ ୫୦ ହଜାର ନକଦ ଟଙ୍କା ଲୁଟ ହୋଇଛି। ଏ ନେଇ ବାଣପୁର ଥାନାରେ ସୌନ୍ଦର୍ଯ୍ୟା ଅଭିଯୋଗ କଲାପରେ ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଦେଇଛି।

Categories
ଆଞ୍ଚଳିକ

ବାଣପୁର: ବେକରେ ରଶି ଲଗାଇ ଜଣେ ମହିଳାଙ୍କ ଆତ୍ମହତ୍ୟା

ସୀତାରାମ ଅଗ୍ରୱାଲା

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ନାଚୁଣୀ ଫାଣ୍ଡି ଅନ୍ତର୍ଗତ ପଥରକଟା ଗ୍ରାମରେ ଏକ ଅଭାବନୀୟ ଘଟଣା ଘଟିଯାଇଛି। ଜଣେ ମହିଳା ବେକରେ ରଶି ଲଗାଇ ଆତ୍ମହତ୍ୟା କରିଥିବାର ଅଭିଯୋଗ ହୋଇଛି। ଫାଣ୍ଡି ଅଧିକାରୀ କେଶବ ବେହେରାଙ୍କ ସୂଚନା ମୁତାବକ ପଥରକଟା ଗ୍ରାମର ନୀଳକଣ୍ଠ ଭୋଳଙ୍କ ଝିଅ କଣ୍ଢେଇ ଭୋଳ ଟାଙ୍ଗୀ ଥାନା ଆଡିଆପଡ଼ା ଗ୍ରାମର ପୂର୍ଣ୍ଣ ପରିଡ଼ାଙ୍କ ପୁତ୍ର ଚନ୍ଦନ ପରିଡ଼ାଙ୍କୁ ଏକ ବର୍ଷ ପୂର୍ବେ ବିବାହ କରିଥିଲେ।

ତେବେ କଣ୍ଢେଇଙ୍କ ସ୍ୱାମୀ ବିଦେଶରେ କାମ ପାଇଁ ଯିବା ପରେ ଦୀର୍ଘ ତିନି ମାସ ହେବ କଣ୍ଢେଇ ନିଜ ବାପ ଘର ପଥରକଟା ରେ ରହୁଥିଲେ। ତେବେ ଆଜି ମଧ୍ୟାହ୍ନରେ କୌଣସି କାରଣବଶତଃ କଣ୍ଢେଇ ବେକରେ ରଶି ଲଗାଇ ଝୁଲିପଡ଼ିଥିଲେ। ପରିବାରବର୍ଗ ଏ ନେଇ ଜାଣିବା ପରେ ନାଚୁଣୀ ଫାଣ୍ଡି ଅଧିକାରୀଙ୍କୁ ଖବର ଦେଇଥିଲେ।

ଘଟଣାସ୍ଥଳରେ ବାଣପୁର ଆଇଆଇସି ଜୟପ୍ରକାଶ ପରିଡ଼ା ଓ ଫାଣ୍ଡି ଅଧିକାରୀ ଶ୍ରୀ ବେହେରା ପହଞ୍ଚି ଶବ ଜବତ କରିବା ସହ କେସ ନମ୍ବର 33/22 ରେ ଏକ ଅପମୃତ୍ୟୁ ମାମଲା ରୁଜୁ କରି ବ୍ୟବଛେଦ ପାଇଁ ପଠାଇଦେଇଛନ୍ତି। ବ୍ୟବଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ଜଣାପଡିବ ବୋଲି ଆଇଆଇସି ଶ୍ରୀ ପରିଡ଼ା କହିଛନ୍ତି।

Categories
ଆଜିର ଖବର ରାଜ୍ୟ ଖବର

ନାଚୁଣୀ: ଅଜଣା ଗାଡ଼ି ଧକ୍କାରେ ସ୍କୁଟି ଚାଳକ ମୃତ

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ନାଚୁଣୀ କଉଡ଼ିଖଣି ଛକରେ ଏକ ସଡ଼କ ଦୁର୍ଘଟଣା ଘଟିଛି ଯେଉଁଥିରେ ଜଣେ ସ୍କୁଟି ଚାଳକ ପ୍ରାଣ ହରାଇଥିବାର ଖବର ମିଳିଛି।  ସୂଚନା ମୁତାବକ ଆଜି ସକାଳେ ବଡପଦର ଗ୍ରାମର ସ୍ବର୍ଗତ ବ୍ରଜବନ୍ଧୁ ପଲେଇଙ୍କ ପୁତ୍ର ମୋହନ ପଲେଇ (୨୫) ଏକ ସ୍କୁଟି ଯୋଗେ ନିଜ ଗ୍ରାମରୁ କଉଡ଼ିଖଣି ଛକ ଅତିକ୍ରମ କରିବା ବେଳକୁ ହଠାତ ଭୁବନେଶ୍ୱରରୁ ବ୍ରହ୍ମପୁର ଅଭିମୁଖେ ଯାଉଥିବା ଏକ ଦ୍ରୁତଗାମୀ ଅଜଣା ଗାଡ଼ି ମୋହନଙ୍କୁ ଶକ୍ତ ଧକ୍କା ଦେଇ ଫେରାର ହୋଇଯାଇଥିଲା। ଫଳରେ ଘଟଣାସ୍ଥଳରେ ମୋହନଙ୍କ ମୃତ୍ୟୁ ଘଟିଥିଲା।

ଏହାପରେ ଉତ୍ତ୍ୟକ୍ତ ଗ୍ରାମବାସୀଙ୍କ ଦ୍ଵାରା ରାସ୍ତା ଅବରୋଧ କରାଯାଇଛି। ଖବର ପାଇ ସରପଞ୍ଚଙ୍କ ପ୍ରତିନିଧି ଓ ପୋଲିସ ପ୍ରଶାସନ ସେଠାରେ ପହଞ୍ଚି ଉତ୍ତ୍ୟକ୍ତ ଗ୍ରାମବାସୀଙ୍କୁ ବୁଝାସୁଝା କରିବା ପରେ ଶବକୁ ବାଣପୁର ମେଡିକାଲ ବ୍ୟବଚ୍ଛେଦ ପାଇଁ ପଠାଯାଇଛି।

ଅପରପକ୍ଷରେ ଦୁର୍ଘଟଣା ଘଟାଇଥିବା ଅଜଣା ଗାଡ଼ିକୁ ଠାବ କରିବା ପାଇଁ ପୋଲିସ ତାହାର ପ୍ରୟାସ ଆରମ୍ଭ କରିଦେଇଥିବାର ଆଇଆଇସି କହିଛନ୍ତି।

ସୂଚନାଥାଉ କି ନାଚୁଣୀ କଉଡ଼ିଖଣି ଛକରେ ଅଣ୍ଡରପାସ ନଥିବାରୁ ବହୁ ଧନଜୀବନ ବାରମ୍ବାର ଦୁର୍ଘଟଣା ଦ୍ୱାରା ନଷ୍ଟ ହେଉଛି। ବାରମ୍ବାର ସ୍ଥାନୀୟ ଜନସାଧାରଣଙ୍କ ଦାବି ସତ୍ତ୍ୱେ ଏଠାରେ ଅଣ୍ଡରପାସ ନିର୍ମାଣ କରାଯାଉନାହିଁ।

Categories
ଆଞ୍ଚଳିକ

ନାଚୁଣୀ ବାଇପାସ ଠାରେ ଓଲଟିଲା ଗ୍ୟାସ ଟାଙ୍କି ବୋଝେଇ ଟ୍ରକ: ଚାଳକ ସୁରକ୍ଷିତ

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ନାଚୁଣୀ ବାଇପାସ ଠାରେ ଏକ ଗ୍ୟାସ ଟାଙ୍କି ବୋଝେଇ ଗାଡ଼ିଟି ଦୁର୍ଘଟଣାଗ୍ରସ୍ତ ହୋଇଛି। ସୂଚନା ମୁତାବକ କିଛି ସମୟ ପୁର୍ବରୁ ବ୍ରହ୍ମପୁରରୁ ଭୁବନେଶ୍ୱର ଅଭିମୁଖେ ଯାଉଥିବା ଏକ ଗ୍ୟାସ ଟାଙ୍କି ବୋଝେଇ ଗାଡ଼ି ଭାରସାମ୍ୟ ହରାଇ ନାଚୁଣୀ ବାଇପାସ ନିକଟରେ ଲେଉଟି ପଡିଥିଲା। ଫଳରେ ଗାଡିଟି ରାସ୍ତା ତଳକୁ ଖସି ପଡ଼ିଛି।

ଖବର ପାଇ ବର୍ତ୍ତମାନ ନାଚୁଣୀ ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚିଥିବା ବେଳେ ଗାଡ଼ି ଚାଳକ ସୁରକ୍ଷିତ ଥିବା ଜଣାପଡିଛି। ତେବେ ଉକ୍ତ ଗାଡ଼ିରେ ପାଖାପାଖି ୪୦୦ ଗୋଟି ଖାଲି ଗ୍ୟାସ ଟାଙ୍କି ଥିବାରୁ ସୌଭାଗ୍ୟବଶତଃ କୌଣସି କ୍ଷୟକ୍ଷତି ହୋଇନଥିବା ଜଣାପଡିଛି।