Categories
ଜାତୀୟ ଖବର ବିଶେଷ ଖବର ରାଜ୍ୟ ଖବର

ସ୍ୱତନ୍ତ୍ର ସଂକ୍ଷିପ୍ତ ଭୋଟର ତାଲିକାର ସଂଶୋଧନ ପାଇଁ ଆରମ୍ଭ ହେଲା ତାଲିମ କାର୍ଯ୍ୟକ୍ରମ

ଭୁବନେଶ୍ୱର: ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ କାର୍ଯ୍ୟାଳୟ ତରଫରୁ ଆଜି ୧୬ଟି ଜିଲ୍ଲାରୁ ଆସିଥିବା ମାଷ୍ଟର ଟ୍ରେନରଙ୍କର ଭୁବନେଶ୍ୱରସ୍ଥିତ ମଧୁସୂଦନ ଏକାଡେମୀଠାରେ ଭୋଟର ତାଲିକାର ସ୍ୱତନ୍ତ୍ର ସଂକ୍ଷିପ୍ତ ସଂଶୋଧନ-୨୦୨୩ ସହ ଲୋକପ୍ରତିନିଧି ଆଇନ ୧୯୫୦/୧୯୫୧ରେ କରାଯାଇଥିବା ସଂଶୋଧନ ସଂପର୍କରେ ଏକ ଦିନିକିଆ ତାଲିମ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି।

ମୁଖ୍ୟ ଅତିଥି ଭାବେ ଯୋଗଦେଇ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ଏହି ତାଲିମ କାର୍ଯ୍ୟକ୍ରମର ଶୁଭାରମ୍ଭ କରି ତାଲିମ କାର୍ଯ୍ୟକ୍ରମର ଉଦ୍ଦେଶ୍ୟ, ତ୍ରୁଟିଶୂନ୍ୟ ଭୋଟର ତାଲିକାର ପ୍ରସ୍ତୁତି ଓ ଲୋକପ୍ରତିନିଧି ଆଇନ ୧୯୫୦/୧୯୫୧ରେ କରାଯାଇଥିବା ସଂଶୋଧନ ସଂପର୍କରେ କାର୍ଯ୍ୟକ୍ରମରେ ଉପସ୍ଥିତ ଥିବା ଡେପୁଟୀ କଲେକଫର, ଆସିଷ୍ଟାଣ୍ଟ କଲେକଫର ଓ ଜିଲ୍ଲାସ୍ତରରେ ନିର୍ବାଚନ କାର୍ଯ୍ୟରେ ସଂପୃକ୍ତ ଥିବା କର୍ମକର୍ତ୍ତାମାନଙ୍କୁ ଅବଗତ କରାଇଥିଲେ।

ଜିଲ୍ଲାସ୍ତରରେ ସ୍ୱତନ୍ତ୍ର କ୍ୟାମ୍ପ ଅନୁଷ୍ଠିତ କରାଯାଇ ଅନ୍‌ଲାଇନ୍‌ ଓ ଅଫ୍‌ଲାଇନ୍‌ ମାଧ୍ୟମରେ ନୂତନ ଭୋଟରମାନଙ୍କଠାରୁ ଫର୍ମ ସଂଗ୍ରହ ଏବଂ ଏହାର ଡିଜିଟାଇଜେସନ୍‌ କରିବା, ଲୋକପ୍ରତିନିଧି ଆଇନ ୧୯୫୦/୧୯୫୧ରେ କରାଯାଇଥିବା ସଂଶୋଧନ, ଭୋଟର ତାଲିକାରେ ନାମ ଅନ୍ତର୍ଭୁକ୍ତ ନିମନ୍ତେ ସଂଶୋଧିତ ହୋଇଥିବା ନୂତନ ଫର୍ମ ସଂପର୍କରେ ଅବଗତ କରାଯାଇଥିଲା।

ସେହିପରି ଭୋଟର ତାଲିକାରେ ନାମ ଅନ୍ତର୍ଭୁକ୍ତ ନିମନ୍ତେ ୪ଟି ଯୋଗ୍ୟତାସୂଚକ ତାରିଖ, ଭୋଟର ତାଲିକାରେ ସେ୍ୱଚ୍ଛାକୃତ ଭାବେ ଆଧାର ସଂଯୋଗୀକରଣ ନିମନ୍ତେ ନୂତନ ଫର୍ମ ନଂ ୬(ଖ) ସଂପର୍କରେ ଉଚ୍ଚଶିକ୍ଷା ବିଭାଗର ନିର୍ଦ୍ଦେଶକ ଶ୍ରୀ ରଘୁରାମ ଆର୍‌. ଆୟାର, ଅତିରିକ୍ତ ମୁଖ୍ୟ ନିର୍ବାଚନ ଅଧିକାରୀ ଶ୍ରୀ ଶତ୍ରୁଘ୍ନ କର, ଶ୍ରୀମତୀ ସଂଘମିତ୍ରା ଶତପଥୀ, ଭୁବନେଶ୍ୱରର ଆସିଷ୍ଟାଣ୍ଟ କଲେକଫର ଶ୍ରୀ ସମୀର ଦାସ, କଳାହାଣ୍ଡିର ଡେପୁଟି କଲେକଫର ସୁଶ୍ରୀ ପ୍ରଧାନ, ଏଏସ୍‌ଇ ଇଦ୍ରିଶ ଅଲ୍ଲୀ ଖାନ୍‌ ପ୍ରମୁଖ ଉପସ୍ଥିତ ରହି ଅଧିକାରୀମାନଙ୍କୁ ତାଲିମ ପ୍ରଦାନ କରିଥିଲେ।

ଆଜିର ଏହି ତାଲିମ କାର୍ଯ୍ୟକ୍ରମରେ ବଲାଙ୍ଗୀର, ନୂଆପଡ଼ା, ନବରଙ୍ଗପୁର, କଳାହାଣ୍ଡି, କନ୍ଧମାଳ, ବୌଦ୍ଧ, କଟକ, ଜଗତସିଂହପୁର, ପୁରୀ, ଖୋର୍ଦ୍ଧା, ନୟାଗଡ଼, ଗଞ୍ଜାମ, ଗଜପତି, ରାୟଗଡ଼ା, କୋରାପୁଟ ଓ ମାଲକାନଗିରି ଜିଲ୍ଲାର ୮୬ ଜଣ ଅଧିକାରୀ ଅଂଶଗ୍ରହଣ କରିଥିଲେ।

Categories
PanchayatElection ବିଶେଷ ଖବର ରାଜ୍ୟ ଖବର

ପଞ୍ଚାୟତ ନିର୍ବାଚନରେ ଭୋଟ ଦେଇଥିବା ସେହି ଭୋଟର ଭାଇର ଭିତିରି କଥା

ପ୍ରକାଶ ଦଳାଇ

ଏଇ ମହାଶିବରାତ୍ରୀ ଦିନର ଘଟଣା। ସକାଳେ ମନ୍ଦିରର ଆଗରେ ଥିବା ଏକ ଦୋକାନରୁ ମୁଁ ଦୀପଟିଏ କିଣୁଥିଲି। ଦୋକାନରୁ ଟିକିଏ ଦୂରରେ ଜଣେ କେହି ପାଟି କରି କାହା ସହିତ ଫୋନରେ କଥା ହେଉଥିଲା। ସେପଟେ ଥିବା ଲୋକକୁ ସେ କହୁଥିଲା ଯେ, ସେ ଟଙ୍କା ମୁଁ ଆଉ ଫେରାଇ ପାରିବି ନାହିଁ, ତୁ କଣ କରୁଛୁ କର ??  କିଛି ଭଦ୍ର କିଛି ଅଭଦ୍ର ଭାଷାରେ ସେ ଗାଳି କରି ଚାଲିଥାଏ। ତୁ କାହିଁକି ଏପରି ପାଟି କରୁଛ ବୋଲି ମଝିରେ ମଝିରେ ଦୋକାନୀ ତାଙ୍କୁ ତାଗିଦ କରୁଥିଲେ। ବୋଧହୁଏ ତାଙ୍କର ଚିହ୍ନା ପରିଚୟ।

କଥାବାର୍ତ୍ତା ସରିବା ପରେ ସେହି ବ୍ୟକ୍ତି ରାଗ ତମତମ ହୋଇ ଦୋକାନୀ ପାଖକୁ ଆସିଲା। ଦୋକାନୀକୁ କହିଲେ, ମାମୁଁ କହିଲ, ଭୁବନେଶ୍ବରରେ ମୁଁ ବହୁତ କାମ ଧରିଛି କି ନାହିଁ। ଏତେ କାମ ଭିତରେ ମୋର ଗାଁକୁ ଯିବାର ସମୟ କାହିଁ ? ସେ ବାରମ୍ବାର ଫୋନ କରି ଗାଁ କୁ ଆସ, ଗାଁକୁ ଆସ ବୋଲି ଡାକିଲା। ମୁଁ ଗଲି ନାହିଁ। ତଥାପି ଆସ, ଆସ ବୋଲି ସେ ବାଧ୍ୟ କଲା।

ଶେଷରେ ତା ଆଡୁ ସେ କହିଲା ଯେ ଗାଁକୁ ଆସିବା ପାଇଁ ତୋ ପାଖକୁ ପାଞ୍ଚ ହଜାର ଟଙ୍କା ପଠାଉଛି। ସକାଳୁ ସକାଳୁ ଆସି ପହଁଚିବୁ। ପୁରା ତମ ପରିବାର ସମସ୍ତେ ଆସିବ, ଭୋଟ ଦେଇ ପଳାଇଯିବ। ଫୋନ-ପେ ରେ ସେ ମୋ ପାଖକୁ ଟଙ୍କା ପଠାଇବାରୁ ମୁଁ ଆଉ ମୋ ପରିବାର ବାଧ୍ୟ ହୋଇ ଗାଁକୁ ଗଲୁ। ଭୋଟ ଦେଇ ତା ପରଦିନ ଆସିଲୁ। ଏବେ ସେ ମୋତେ କହୁଛି କଣ ନା, ସେହି ଟଙ୍କା ଫେରେଇ ଦିଅ। କହିଲ ମାମୁଁ, ମୁଁ କଣ ତାକୁ ଟଙ୍କା ମାଗୁଥିଲି। ସେ କାହିଁକି ଟଙ୍କା ପଠାଇଲା। ଯଦି ତୋଆଡୁ ତୁ ଟଙ୍କା ପଠାଇଲୁ, ଏବେ କାହିଁକି ମାଗୁଛୁ? ଗୋଟିଏ ନିଃଶ୍ବାସରେ ସେ ଏସବୁ କଥା ସେ ବ୍ୟକ୍ତି ଜଣଙ୍କ କହି ଚାଲିଲା।

କାହିଁକି କଣ ହେଲା କେଜାଣି ମୁଁ ପଚାରି ଦେଲି, ତମ ତ ଭୋଟ ଦେଲ, ସେ ଟଙ୍କା କାହିଁକି ମାଗୁଛି। ମୋ ପ୍ରଶ୍ନ ସରିବା ମାତ୍ରେ ସେହି ଦୋକାନୀ ଏବଂ ସେ ଲୋକ ଏକା ସଙ୍ଗରେ କହିଲେ ଯେ, ସେ ଲୋକଟି ହାରିଗଲା। କିଛି ସମୟ ଧରି ସେ ଲୋକଟି ମୋ ଆଡକୁ ଅନାଇଲା। ମୋତେ କଅଁଳ ସ୍ବରରେ ସେ ପଚାରିଲା, ସାରେ ଟଙ୍କା ନ ଫେରାଇଲେ ମୋର କଣ କିଛି ଅସୁବିଧା ହେବ କି ? ଏପରି ପ୍ରଶ୍ନ ଶୁଣି ମୁଁ ବଡ ଅଡୁଆରେ ପଡିଗଲି। ସେ ବାରମ୍ବାର ମୋତେ ପଚାରି, ମୋ ମୁହଁକୁ ଅନାଇ ରହିଲା।

ସେହି ସ୍ଥାନରୁ ଖସିବା ପାଇଁ ତାଙ୍କୁ କହିଦେଲି , ନାହିଁ କିଛି ହେବ ନାହିଁ। ତମ ବନ୍ଧୁବାନ୍ଧବ କଥା, ତମ ଗାଁ କଥା, ତମେ ଯାହା ବିଚାର କରିବ ତାହା କର। ସେ କହିଲା- ନାଇଁ ସାରେ ଆପଣ ଯଦି କହିଲେଣି କିଛି ହେବନି ମୁଁ ସେ ଟଙ୍କା ଆଉ ଫେରାଇବି ନାହିଁ। ଏତିକି କହି ତାହାର ପୁରା ଗସ୍ତ ସଂପର୍କରେ ଏକ ସଂକ୍ଷିପ୍ତ ଧାରାବିବରଣୀଟିଏ ମୋ ଆଗରେ ଥୋଇଦେଲା। ମୁଁ ଦୀପଟିଏ କିଣି ସେଠାରୁ ଖସିବାକୁ ଚେଷ୍ଠା କଲି।

ହେଲେ ହଠାତ କଣ ହେଲା କେଜାଣି ମୋର ଅନିଚ୍ଛା ସତ୍ବେ ତାଙ୍କୁ ଗୋଟିଏ ପ୍ରଶ୍ନ ପଚାରି ଦେଲି। କହିଲି, ଭାଇ ତମେ କେବଳ ସେହି ଗୋଟିଏ ଲୋକଠାରୁ ପଇସା ଆଣିଥିଲ, ନା ଆଉ କାହାଠାରୁ ଆଣିଛ?  ଏତିକି ଶୁଣିବା ପରେ ରାଗ ତମତମ ହୋଇ ପଡିଥିବା ସେ ଲୋକଟି ଲାଜରେ ମୁହଁ ତଳକୁ କରିଦେଲା। ମୁରୁକି ମୁରୁକି ହସିଲା। ତା ସହିତ ସେ ଦୋକାନୀ ମଧ୍ୟ ହସିଲା। ହେଲେ କେହି କିଛି କହିଲେ ନାହିଁ।

କିଛି ସମୟ ପରେ ଦୋକାନୀ କହିଲା, ଆରେ ଆଜି ମହାଶିବରାତ୍ରି, ତୁ ସତ କଥା କହିଦେ। ସେ ଲୋକଟି ଲାଜେଇ କହିଲା ସାରେ ଆମେ ହେଉଛୁ ଗରିବ ଲୋକ। ସତକଥା ହେଲା ଆଉ ଜଣେ ମଧ୍ୟ ମୋତେ ଚାରି ହଜାର ଟଙ୍କା ଦେଇଥିଲା। ହେଲେ ଆମେ ତାକୁ ଭୋଟ ଦେଇ ନ ଥିଲୁ।

ଏତିକି କହି ସେ ମୋ ପାଖକୁ ଆସିଲା। ଆଉ ଧିର ସ୍ବରରେ କହିଲା, ସାରେ ମୁଁ ଯେଉଁ ଲୋକକୁ ଭୋଟ ଦେଇ ନ ଥିଲି, ସେହି ଲୋକଟି ଜିତିଗଲା। ସେ ମୋତେ ପଇସା ମାଗୁନି। ଏ ଲୋକଟିକୁ ମୁଁ ଭୋଟ ଦେଇଥିଲି, ହେଲେ ସେ ହାରିଗଲା। ସେଥିପାଇଁ ମୋତେ ସେ ପଇସା ମାଗୁଛି। ଆଉ ପଇସା ଦେବାର ନାହିଁ। ସେ କଣ କରୁଛି କରୁ।

ହଠାତ ମନେ ପଡିଲା ମୋ ସ୍ତ୍ରୀ ମନ୍ଦିର ବେଢାରେ ମୋତେ ଅପେକ୍ଷା କରିଥିବ। ଦୀପ ନେଇ ଗଲେ ମନ୍ଦିର ଭିତରକୁ ଯିବୁ। ଦୋକାନୀଠାରୁ ଫୁଲ ଆଉ ଦୀପ ନେଇ ମୁଁ ତରତର ହୋଇ ମନ୍ଦିର ଭିତରକୁ ଚାଲିଗଲି।

Categories
ବିଶେଷ ଖବର ରାଜ୍ୟ ଖବର

ଆପଣଙ୍କ ଭୋଟର କାର୍ଡରେ କିଛି ଭୁଲ ଅଛି କି ? ଜାଣନ୍ତୁ କେମିତି କରିବେ ସଂଶୋଧନ

ଭୁବନେଶ୍ବର: ଗତ ଏକ ତାରିଖରୁ ଓଡିଶାରେ ଭୋଟର ସଂଶୋଧନ ପକ୍ରିୟା ଆରମ୍ଭ ହୋଇଛି। ଯେଉଁମାନଙ୍କର ବୟସ ଆସନ୍ତା ଜାନୁୟାରୀ 1 ତାରିଖ ସୁଦ୍ଧା 18 ବର୍ଷ କିମ୍ବା ତଦୁର୍ଦ୍ଧ ହେଉଛି ସେମାନେ ନାମ ପଂଜୀକରଣ ପାଇଁ ଆବେଦନ କରିପାରିବେ।

ଏଥିସହିତ ଯେଉଁମାନେ ଠିକଣା ପରିବର୍ତ୍ତନ କରିବାକୁ ଚାହିଁବେ କିମ୍ବା କିଛି ସଂଶୋଧନ କରିବାକୁ ଚାହିଁବେ ସେମାନେ ଏହି ପକ୍ରିୟାରେ ଭାଗ ନେଇପାରିବେ। ତେବେ ଏହି ସଂଶୋଧନ ପକ୍ରିୟା  ନଭେମ୍ବର 30 ତାରିଖ ପର୍ଯ୍ୟନ୍ତ ଚାଲିବ।

କେମିତି କରିବେ ସଂଶୋଧନ

ଯେଉଁମାନେ ଭୋଟର ଲିଷ୍ଟକୁ ସଂଶୋଧନ ବା ନାମ ଯୋଗ କରିବାକୁ ଚାହୁଁଛନ୍ତି ସେମାନେ ଏସବୁ ମାଧ୍ୟମରେ ଆବେଦନ କରିପାରିବେ।

1- ଭୋଟର ତାଲିକାରେ ସଂଶୋଧନ କରିବାକୁ ଚାହୁଁଥିଲେ ଆପଣ ମୋବାଇଲ ଆପ ମାଧ୍ୟମରେ କରିପାରିବେ। ଆପଣ ପ୍ଲେ ଷ୍ଟୋରକୁ ଯାଇ ଭୋଟର ହେଲପଲାଇନ ଆପ ଡାଉନଲୋଡ କରି ଆବେଦନ କରିପାରିବେ।

2-ଆପଣ ଅନଲାଇନରେ ମଧ୍ୟ ଏହି ଆବେଦନ କରିପାରିବେ। ସେଥିପାଇଁ www.voterportal.eci.gov.in  କିମ୍ବା www.nvsp.in ରେ ଲଗଅନ କରି ଆବେଦନ କରିପାରିବେ।

3- ଭୋଟର ସହାୟତା କେନ୍ଦ୍ର ମାଧ୍ୟମରେ ମଧ୍ୟ ଆପଣ ଏହି ସଂଶୋଧନ ପାଇଁ ଆବେଦନ କରିପାରିବେ।

ଏ ସଂପର୍କରେ ଅଧିକ ଜାଣିବା ପାଇଁ ଆପଣ ଭୋଟର ହେଲପ ଲାଇନ 1950 କୁ ଫୋନ କରି ମଧ୍ୟ ସମସ୍ତ ତଥ୍ୟ ବୁଝିପାରିବେ।

Categories
ଜାତୀୟ ଖବର ବିଶେଷ ଖବର

ଆଜିଠାରୁ ଓଡିଶାରେ ଆରମ୍ଭ ହେଲା ଭୋଟର ସଂଶୋଧନ କାର୍ଯ୍ୟ, ଜାଣନ୍ତୁ କେମିତି କରିବେ ଆବେଦନ

ଭୁବନେଶ୍ବର: ଆଜିଠାରୁ ଓଡିଶାରେ ଭୋଟର ସଂଶୋଧନ ପକ୍ରିୟା ଆରମ୍ଭ ହେଲା। ଏନେଇ ଓଡିଶା ମୁଖ୍ୟ ନିର୍ବାଚନ ଅଧିକାରୀଙ୍କ କାର୍ଯ୍ୟାଳୟ ତରଫରୁ ସୂଚନା ଦିଆଯାଇଛି। ଯେଉଁମାନଙ୍କର ବୟସ ଆସନ୍ତା ଜାନୁୟାରୀ 1 ତାରିଖ ସୁଦ୍ଧା 18 ବର୍ଷ କିମ୍ବା ତଦୁର୍ଦ୍ଧ ହେଉଛି ସେମାନେ ନାମ ପଂଜୀକରଣ ପାଇଁ ଆବେଦନ କରିପାରିବେ।

ଏଥିସହିତ ଯେଉଁମାନେ ଠିକଣା ପରିବର୍ତ୍ତନ କରିବାକୁ ଚାହିଁବେ କିମ୍ବା କିଛି ସଂଶୋଧନ କରିବାକୁ ଚାହିଁବେ ସେମାନେ ଏହି ପକ୍ରିୟାରେ ଭାଗ ନେଇପାରିବେ। ତେବେ ଏହି ସଂଶୋଧନ ପକ୍ରିୟା  ନଭେମ୍ବବର 1 ତାରିଖରୁ ଆରମ୍ଭ ହୋଇ 30 ତାରିଖ ପର୍ଯ୍ୟନ୍ତ ଚାଲିବ।

କେମିତି କରିବେ ଆବେଦନ

ଯେଉଁମାନେ ଭୋଟର ଲିଷ୍ଟକୁ ସଂଶୋଧନ ବା ନାମ ଯୋଗ କରିବାକୁ ଚାହୁଁଛନ୍ତି ସେମାନେ ଏସବୁ ମାଧ୍ୟମରେ ଆବେଦନ କରିପାରିବେ।

1- ଭୋଟର ତାଲିକାରେ ସଂଶୋଧନ କରିବାକୁ ଚାହୁଁଥିଲେ ଆପଣ ମୋବାଇଲ ଆପ ମାଧ୍ୟମରେ କରିପାରିବେ। ଆପଣ ପ୍ଲେ ଷ୍ଟୋରକୁ ଯାଇ ଭୋଟର ହେଲପଲାଇନ ଆପ ଡାଉନଲୋଡ କରି ଆବେଦନ କରିପାରିବେ।

2-ଆପଣ ଅନଲାଇନରେ ମଧ୍ୟ ଏହି ଆବେଦନ କରିପାରିବେ। ସେଥିପାଇଁ www.voterportal.eci.gov.in  କିମ୍ବା www.nvsp.in ରେ ଲଗଅନ କରି ଆବେଦନ କରିପାରିବେ।

3- ଭୋଟର ସହାୟତା କେନ୍ଦ୍ର ମାଧ୍ୟମରେ ମଧ୍ୟ ଆପଣ ଏହି ସଂଶୋଧନ ପାଇଁ ଆବେଦନ କରିପାରିବେ।

ଏ ସଂପର୍କରେ ଅଧିକ ଜାଣିବା ପାଇଁ ଆପଣ ଭୋଟର ହେଲପ ଲାଇନ 1950 କୁ ଫୋନ କରି ମଧ୍ୟ ସମସ୍ତ ତଥ୍ୟ ବୁଝିପାରିବେ।

Categories
ଆଜିର ଖବର ରାଜ୍ୟ ଖବର

ତିର୍ତ୍ତୋଲ ନିର୍ବାଚନମଣ୍ଡଳୀର ବରିଷ୍ଠ ନାଗରିକ, ଭିନ୍ନକ୍ଷମ ଓ କରୋନା ସଂକ୍ରମିତ ଭୋଟରଙ୍କ ପାଇଁ ସ୍ୱତନ୍ତ୍ର ସୁବିଧା

ରମେଶ ମହାନ୍ତି

ଜଗତସିଂହପୁର: ତିର୍ତ୍ତୋଲ ବିଧାନସଭା ନିର୍ବାଚନମଣ୍ଡଳୀର ସମସ୍ତ ବରିଷ୍ଠ ନାଗରିକ(୮୦ ବର୍ଷରୁ ଉର୍ଦ୍ଧ୍ୱ), ଶାରୀରିକ ଭିନ୍ନକ୍ଷମ ଏବଂ କୋଭିଡ୍-୧୯ ଦ୍ୱାରା ସଂକ୍ରମିତ ଓ ସଂକ୍ରମଣ ସନ୍ଦେହରେ ଥିବା (ସ୍ୱୀକୃତି ପ୍ରାପ୍ତ ସ୍ୱାସ୍ଥ୍ୟ ଅଧିକାରୀଙ୍କ ଠାରୁ ପ୍ରମାଣପତ୍ର ପାଇଥିବା) ଭୋଟଦାତା ଯେଉଁମାନଙ୍କର ଭୋଟର ତାଲିକାରେ ନାମଥିବ ସେମାନଙ୍କ ପାଇଁ ପୋଷ୍ଟାଲ୍ ବାଲାଟ ପେପର ମାଧ୍ୟମରେ ଭୋଟ୍ ଦେବାର ବ୍ୟବସ୍ଥା କରାଯାଇଛି। ସେମାନେ ନିର୍ଭୟରେ ପୋଷ୍ଟାଲ ବାଲାଟ ପେପର ମାଧ୍ୟମରେ ନିଜର ମତଦାନ ସାବ୍ୟସ୍ତ କରିପାରିବେ।

ଏହି ପରିପ୍ରେକ୍ଷୀରେ ପ୍ରତି ବୁଥରେ ବୁଥ୍ ସ୍ତରୀୟ ଅଧିକାରୀ ମାନେ ନିୟୋଜିତ ହୋଇଛନ୍ତି। ବୁଥ୍ ସ୍ତରୀୟ ଅଧିକାରୀମାନେ ଉପରୋକ୍ତ ବର୍ଗର ମତଦାତା ମାନଙ୍କୁ ସିଧାସଳଖ ଯୋଗାଯୋଗ କରି ସେମାନଙ୍କର ସହମତି ଗ୍ରହଣ କରିବେ। ଥରେ ପୋଷ୍ଟାଲ ବାଲାଟ ପେପର ମାଧ୍ୟମରେ ମତଦାନ କରିବାକୁ ସହମତି ପ୍ରଦାନ କରିସାରିଥିଲେ ଭୋଟଦାତା ଆଉ ବୁଥକୁ ଯାଇ ମତଦାନ କରିପାରିବେ ନାହିଁ। ଉପରୋକ୍ତ ବର୍ଗର ମତଦାତା ମାନେ ସେମାନଙ୍କର ଘରେ ରହି ସୁରକ୍ଷିତ ଭାବରେ ମତଦାନ କରିପାରିବେ।

ଏଥି ନିମନ୍ତେ ଜିଲ୍ଲା ପ୍ରଶାସନ ପକ୍ଷରୁ ସମସ୍ତ ବ୍ୟବସ୍ଥା କରାଯାଇଛି। ଏହା ବ୍ୟତୀତ ଚଳିତ ଉପନିର୍ବାଚନରେ କୋଭିଡ୍-୧୯ ର ଦୃତ ସଂକ୍ରମଣକୁ ଦୃଷ୍ଟିରେ ରଖି ସମସ୍ତ ବୁଥରେ ମଧ୍ୟ ସାନିଟାଇଜେସନ୍, ମାସ୍କ୍ ବ୍ୟବହାର ଓ ସାମାଜିକ ଦୂରତ୍ୱକୁ କଡାକଡି ପାଳନ ନିମନ୍ତେ ସମସ୍ତ ପ୍ରକାର ପ୍ରତିଷେଧକ ବ୍ୟବସ୍ଥା ଗ୍ରହଣ କରାଯାଇଛି ବୋଲି ଜିଲ୍ଲା ପ୍ରଶାସନ ପକ୍ଷରୁ ସୂଚନା ପ୍ରଦାନ କରାଯାଇଛି।