ବେଙ୍ଗାଲୁରୁ : କେଉଁଠି ବି ଆସିପାରେ ମୃତ୍ୟୁ । ଏମିତି ଏକ ଘଟଣା ଘଟିଛି କର୍ଣ୍ଣାଟକରେ । ଜଣେ ଛାତ୍ରୀ ନୃତ୍ୟ ଅଭ୍ୟାସ କରୁଥିବା ସମୟରେ ହୃଦ୍ଘାତର ଶିକାର ହୋଇ ପ୍ରାଣ ହରାଇଛନ୍ତି । କର୍ଣ୍ଣାଟକର କୋଲାର ଗୋଲ୍ଡ ଫିଲ୍ଡ (କେଜିଏଫ୍)ରେ ଏହି ଘଟଣା ଘଟିଛି । ଶନିବାର ପୋଲିସ୍ ପକ୍ଷରୁ ପ୍ରକାଶିତ ସୂଚନା ଅନୁଯାୟୀ ନବମ ଶ୍ରେଣୀର ଛାତ୍ରୀ ପୂଜିତା ନୃତ୍ୟ ଅଭ୍ୟାସ କରୁଥିବା ସମୟରେ ପ୍ରାଣ ହରାଇଥିଲେ । କୋଲାରର ଗୋଲ୍ଲାହାଲି ବିଦ୍ୟାଳୟର ଛାତ୍ରୀ ପୂଜିତା ଗୁରୁବାର ନୃତ୍ୟ ଅଭ୍ୟାସ କରୁଥିବା ସମୟରେ ଅଚେତ ହୋଇ ପଡିଥିଲେ । ତାଙ୍କୁ ତୁରନ୍ତ ବଙ୍ଗାରପେଟର ଏକ ଘରୋଇ ହସ୍ପିଟାଲକୁ ନିଆଯାଇଥିବା ବେଳେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପୂଜିତାଙ୍କ ମୃତ୍ୟୁ ପରେ ସ୍କୁଲ କର୍ତ୍ତୃପକ୍ଷଙ୍କ ପକ୍ଷରୁ ସ୍କୁଲର ସାଂସ୍କୃତିକ କାର୍ଯ୍ୟକ୍ରମକୁ ବନ୍ଦ ରଖାଯାଇଛି । (ଏଜେନ୍ସି)
