ନୂଆଦିଲ୍ଲୀ/ଭୁବନେଶ୍ବର: ଗତ କିଛି ଦିନ ହେଲା ସାଇବର ଠକଙ୍କ ପାଇଁ କ୍ୟୁଆର କୋଡ଼ ଏକ ଅସ୍ତ୍ର ଭାବେ କାମ କରୁଛି। ଆପଣମାନେ ମଧ୍ୟ କ୍ୟୁଆର କୋଡ଼ ସ୍କାନ କରି ଅନଲାଇନରେ ଟଙ୍କା ପଠାଉଥିବେ। ହେଲେ କ୍ୟୁଆର କୋଡ଼ ସ୍କାନ କରିବା ପରେ ଆପଣ ଠକାମିରେ ଶିକାର ହୋଇପାରନ୍ତି। ଏହି କୁଇକ ରେସ୍ପୋନ୍ସ (କ୍ୟୁଆର) କୁ ସର୍ବ ପ୍ରଥମେ ଜାପାନ ପ୍ରସ୍ତୁତ କରିଥିଲା। ଯଦି ଏହାର ବ୍ୟବହାରରେ ଆପଣ ସାବଧାନ ନରହିବେ, ତେବେ ଆପଣ ମଧ୍ୟ ଠକାମିରେ ପଡ଼ିପାରନ୍ତି।
ଜାଣନ୍ତୁ କ୍ୟୁଆର ଫିସିଙ୍ଗ କୋଡ଼ କଣ?:
୧- ଦିନକୁ ଦିନ ଡିଜିଟାଲ ପେମେଣ୍ଟର ମାତ୍ରା ବଢୁଥିବା ବେଳେ ସାଇବର ଠକଙ୍କ ସଂଖ୍ୟା ମଧ୍ୟ ବଢିଚାଲିଛି। କଣ୍ଟାକ୍ଟଲେସ ପେମେଣ୍ଟ କରିବା ସମୟରେ କ୍ୟୁଆର କୋଡ଼ ସ୍କାନ କରିକି ପେମେଣ୍ଟ କରାଯାଇଥାଏ। ଠକମାନେ ଏହାର ଫାଇଦା ନେଇ କ୍ୟୁଆର କୋଡ଼କୁ ପରିବର୍ତ୍ତନ କରିଦିଅନ୍ତି। ଯାହାଫଳରେ ପେମେଣ୍ଟ ଅନ୍ୟ ଆକାଉଣ୍ଟରେ ଜମା ହୋଇଯାଇଥାଏ। ଏହାକୁ କ୍ୟୁଆର କୋଡ଼ ଫିସିଙ୍ଗ କହନ୍ତି।
୨- କ୍ୟୁଆର କୋଡ଼ ଫିସିଙ୍ଗରେ ବିଭିନ୍ନ ପ୍ରକାର ଉପାୟ ରହିଥାଏ। ଏଥିପାଇଁ ଆପଣଙ୍କ ନିକଟକୁ ଇମେଲ କିମ୍ବା ମେସେଜ ମାଧ୍ୟମରେ କ୍ୟୁଆର କୋଡ ଆସିଥାଏ। ଆପଙ୍କର ଲଟେରୀ ଲାଗିଛି କହି ୟୁପିଆଇ ପିନ ମାଗିଥାନ୍ତି। କିନ୍ତୁ ଯେତେବେଳେ ଆପଣ ସ୍କାନ କରିବେ, ତୁରନ୍ତ ଆପଣଙ୍କ ଆକାଉଣ୍ଟରୁ ଟଙ୍କା କଟି ଯାଇପାରେ।
ଏଥିରୁ ଆପଣ କେମିତି ରକ୍ଷା ପାଇବେ:
ତେବେ ଏହି ଠକାମିରୁ ମୁକ୍ତି ପାଇବାକୁ ହେଲେ କୌଣସି ଦୋକାନ କିମ୍ବା ପେଟ୍ରୋଲ ପମ୍ପରେ ସ୍କାନ କରିବାପରେ ଆପଣଙ୍କ ମୋବାଇଲରେ ଟଙ୍କା ପଠାଉଥିବା ଲୋକ କିମ୍ବା କମ୍ପାନୀ ନାମ ଦେଖାଇଥାଏ। ତାହାକୁ ଆପଣ ନିଶ୍ଚିତ କରିବା ପରେ ଟଙ୍କା ପଠାଇବା ଉଚିତ। ସେହିପରି କୌଣସି ଅଜଣା ନମ୍ବରରୁ ମେଲ କିମ୍ବା ମେସେଜ ଆସିଲେ ଆପଣ ୟୁପିଆଇ ପିନକୁ ଜଣାନ୍ତୁ ନାହିଁ କି ସ୍କାନ କରନ୍ତୁ ନାହିଁ।
କ୍ୟୁଆର କୋଡକୁ ଫୋନର କ୍ୟାମେରାରୁ ସିଧା ସ୍କାନ କରନ୍ତୁ ନାହିଁ ଏବଂ ଏଭଳି ଆପରୁ କରନ୍ତୁ ଯେଉଁଥିରେ ଆପଣଙ୍କୁ କ୍ୟୁଆର କୋଡର ସମସ୍ତ ତଥ୍ୟ ମିଳିପାରିବ। କୌଣସି ଭୁଲରେ ଟ୍ରାଞ୍ଜାକ୍ସନ ହେଲେ ତୁରନ୍ତ ବ୍ୟାଙ୍କ ସହ ସମ୍ପର୍କ କରନ୍ତୁ ଏବଂ ଆବଶ୍ୟକ ହେଲେ ସାଇବର ସେଲରେ ମଧ୍ୟ ଅଭିଯୋଗ କରାନ୍ତୁ।
