The Samikhsya Odia
ନୂଆଦିଲ୍ଲୀ: ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କ ଜନ୍ମବାର୍ଷିକୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି।
ପ୍ରଧାନମନ୍ତ୍ରୀ ଏକ୍ସରେ ପୋଷ୍ଟ କରି କହିଛନ୍ତି ଯେ, ‘ଶ୍ରୀ ପ୍ରଣବ ମୁଖାର୍ଜୀଙ୍କ ଜନ୍ମବାର୍ଷିକୀରେ ତାଙ୍କୁ ଶ୍ରଦ୍ଧାଞ୍ଜଳି। ତାଙ୍କ ନେତୃତ୍ୱ ଏବଂ ବୌଦ୍ଧିକ ଗଭୀରତା ଆମ ଦେଶର ଗତିପଥକୁ ଏକ ମଜଭୁତ ଆକାର ଦେଇଛି। ତାଙ୍କ ଅନ୍ତର୍ଦୃଷ୍ଟି ଏବଂ ନେତୃତ୍ୱ ଅମୂଲ୍ୟ ଥିଲା ଏବଂ ବ୍ୟକ୍ତିଗତ ସ୍ତରରେ ଆମ ଆଲୋଚନା ସର୍ବଦା ସମୃଦ୍ଧ ଥିଲା। ତାଙ୍କ ନିଷ୍ଠା ଏବଂ ଜ୍ଞାନ ସର୍ବଦା ଆମ ପ୍ରଗତିର ଯାତ୍ରାରେ ଏକ ମାର୍ଗଦର୍ଶକ ହେବ।’
ବେଗୁନିଆପଡା: ସମୟ ୧୧.୩୦ ମିନିଟ୍ ବାଜିଲାଣି କିନ୍ତୁ ଗଞ୍ଜାମ ଜିଲ୍ଲା କୋଦଳା ତହସିଲ୍ ଅନ୍ତର୍ଭୁକ୍ତ ଷଣ୍ଢମୂଳ ରାଜସ୍ୱ ନିରୀକ୍ଷକ କାର୍ଯ୍ୟାଳୟ ଖୋଲା ନାହିଁ। ଏ ନେଇ କିଛି କାର୍ଯ୍ୟପାଇଁ ଯାଇଥିବା ମହିଳା ଓ ପୁରୁଷ ବ୍ୟକ୍ତିବିଶେଷ ମାନେ ଅପେକ୍ଷା କରି ବିରକ୍ତି ପ୍ରକାଶ କରିଛନ୍ତି।
ସରକାରୀ କାର୍ଯ୍ୟାଳୟ ନିର୍ଦ୍ଧାରିତ ସମୟସୀମା ମଧ୍ୟରେ ଖୋଲିବାର ନିୟମ ଥିଲେ ମଧ୍ୟ ଏହି କାର୍ଯ୍ୟାଳୟରେ ତାହା ବ୍ୟତିକ୍ରମ ଦେଖା ଦେଇଛି। ଏହି କାର୍ଯ୍ୟାଳୟର ଜୈନିକ ଚତୁର୍ଥ ଶ୍ରେଣୀ କର୍ମଚାରୀ ଦିର୍ଘ ସମୟ ଧରି କାର୍ଯ୍ୟାଳୟ ବାହାରେ ବାବୁ ମାନଙ୍କୁ ଅପେକ୍ଷା କରିଛନ୍ତି। ଚାବି ତାଙ୍କ ପାଖରେ ଥିଲା ନା ବାବୁଙ୍କ ପାଖରେ ଥିଲା। ଯଦି ରାଜସ୍ୱ ନିରୀକ୍ଷକ ମହୋଦୟ କୌଣସି ଫିଲ୍ଡି କାର୍ଯ୍ୟ କିମ୍ବା ଅଫିସ କାର୍ଯ୍ୟରେ ଯାଇଛନ୍ତି, ତାହା ହେଲେ କାର୍ଯ୍ୟାଳୟରେ ଅନ୍ୟମାନେ ଉପସ୍ଥିତ ରହିଥାନ୍ତେ। ନତୁବା ସୂଚନା ଫଳକରେ କାର୍ଯ୍ୟକ୍ରମ ବିଷୟ ନେଇ ଲିପିବଦ୍ଧ କରିଥାନ୍ତେ। ଏସବୁରେ ବ୍ୟତିକ୍ରମ ଦେଖିବାକୁ ମିଳିଥିଲା।
କାର୍ଯ୍ୟାଳୟର ମୁଖ୍ୟ ଫାଟକରେ ତାଲା ଝୁଲୁ ଥିଲା ଚତୁର୍ଥ ଶ୍ରେଣୀ କର୍ମଚାରୀ ଜଣଙ୍କ ବାହାରେ ଅନ୍ୟ ଜନସାଧାରଣଙ୍କ ଭଳି ବାହାରେ ଅପେକ୍ଷା କରିଥିଲେ। ସରକାରୀ ଦପ୍ତରରୁ ମୋଟା ଅଙ୍କର ଦରମା ପାଉଥିବା ବାବୁଙ୍କ ଏହା ମନମାନି ନା ବେଖାତିର ମନୋଭାବ ନା କୌଣସି ସରକାରୀ କାର୍ଯ୍ୟ ନା ବ୍ୟକ୍ତିଗତ କାର୍ଯ୍ୟ ରେ ସେ ଲିପ୍ତ ଥିଲେ ସେ ନେଇ ଜନସାଧାରଣଙ୍କ ମନରେ ପ୍ରଶ୍ନବାଚୀ ସୃଷ୍ଟି କରିଛି।
ଏ ନେଇ କୋଦଳା ତହସିଲଦାର ଏବଂ ଷଣ୍ଢମୂଳ ରାଜସ୍ୱ ନିରୀକ୍ଷକ ମହୋଦୟଙ୍କୁ ଯୋଗାଯୋଗ କରିବା ପାଇଁ ଚେଷ୍ଟା କରିଥିଲେ ମଧ୍ଯ ସମ୍ଭବ ପର ହୋଇପାରିନାହିଁ।ଦେଖାଯାଉ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏ ନେଇ କଣ ପଦକ୍ଷେପ ଗ୍ରହଣ କରୁଛି ତାହା ଦେଖିବାକୁ ବାକି ରହିଲା?
ବେଗୁନିଆପଡା/ବାଣପୁର (ଟୁକୁନା ପ୍ରଧାନ): ଗଂଜାମ ଓ ଖୋର୍ଦ୍ଧା ଜିଲ୍ଲାର ଏକ ପ୍ରମୁଖ ପର୍ଯ୍ୟଟନ ସ୍ଥଳୀର ମାନ୍ୟତା ପାଇଥିବା ଶାଳିଆ ଡ୍ୟାମ ସରକାରୀ କଳର ଅବହେଳା ହେଉ କିମ୍ବା ପର୍ଯ୍ୟଟକଙ୍କ ବେଖିଆଲ ମନୋଭାବ କାରଣରୁ ଏବେ ଅଳିଆ ଆବର୍ଜନା ଅବସ୍ଥାରେ ପଡିଛି। ବଣଭୋଜି ପାଇଁ ଦୈନନ୍ଦିନ ଶତାଧିକ ଜନସାଧାରଣଙ୍କ ଭିଡ଼ ଦେଖିବାକୁ ମିଳିଥାଏ ଏହି ସ୍ଥାନରେ।
ସରକାରଙ୍କ ତରଫରୁ ନିର୍ମାଣ ହୋଇଥିବା ପିଣ୍ଡି ସ୍ଥାନୀୟ ଜନସାଧାରଣ ମାନେ ଭୋଜି କରି ଖାଇବା ସହ ସେହି ସ୍ଥାନକୁ ସଫା ନ କରି ଅଇଁଠା ପତ୍ର, ବୋତଲ ଆଦି ପକାଇ ଅପରିଷ୍କାର କରୁଛନ୍ତି। ଗମନାଗମନର ଅସୁବିଧା ସହିତ ପରିମଳ ବ୍ୟବସ୍ଥା କଥା ନ କହିବା ଆହୁରି ଭଲ। ରାସ୍ତା ଉପରେ ବିଦ୍ୟୁତ ତାର ଝୁଲି ରହିଛି କେତେ ବେଳେ ଯେ ଅଘଟଣ ଘଟିବ କିଛି କହିହେବ ନାହିଁ। ଠୁଳ ଠୁଳ ମଦ କାଚ ଓ ପ୍ଲାଷ୍ଟିକ ବୋତଲ ପଡି ରହିଛି।
ସରକାରଙ୍କ ଦୃଷ୍ଟି ଆକର୍ଷଣ କରିବାକୁ କିଛି ସ୍ଥାନୀୟ ବାସିନ୍ଦା ଆଜି ୱାଚ ଟାୱାର ଠାରେ ଏକ ସଫେଈ କାର୍ଯ୍ୟକ୍ରମ ମାଧ୍ୟମରେ ୧୦ରୁ ଉର୍ଦ୍ଧ୍ଵ ବ୍ୟାଗ କାଚ, ଟିଣ ଓ ପ୍ଲାଷ୍ଟିକ ବୋତଲ ଗୋଟେଇବା ସହ ପରବର୍ତ୍ତୀ କାର୍ଯ୍ୟକ୍ରମରେ ଆହୁରି ସଫା କରିବା ସହ ଡିସ୍ପୋଜ କରିବେ ବୋଲି କହିଛନ୍ତି।
ଏଥିରେ ଗୌତମ ସ୍ୱାଇଁ, ଅମୀୟ ପଣ୍ଡା, ପ୍ରିୟବ୍ରତ ଜେନା, ଅଜୟ ସ୍ୱାଇଁ ସମେତ ଅନ୍ୟମାନେ ଯୋଗ ଦେଇଥିଲେ। ଏଥିସହିତ ଅନ୍ୟ ସ୍ଵେଚ୍ଛାସେବୀଙ୍କୁ ମଧ୍ୟ ସଫେଇ କାର୍ଯ୍ୟକ୍ରମ ରେ ସାମିଲ ହେବା ପାଇଁ ଅନୁରୋଧ କରିଛନ୍ତି।
ନୂଆଦିଲ୍ଲୀ: ମଧ୍ୟପ୍ରଦେଶରେ ମୁଖ୍ୟମନ୍ତ୍ରୀଙ୍କ ନାମର ଅପେକ୍ଷା ଶେଷ ହୋଇଛି। ବିଜେପି ବିଧାୟକ ଦଳ ବୈଠକରେ ମୋହନ ଯାଦବଙ୍କ ନାମକୁ ଅନୁମୋଦନ କରାଯାଇଛି। ଡିସେମ୍ବର ୩ ତାରିଖରେ ମଧ୍ୟପ୍ରଦେଶରେ ନିର୍ବାଚନ ଫଳାଫଳ ଘୋଷଣା କରାଯାଇଥିଲା ଏବଂ ଆଠ ଦିନ ପରେ ଦଳର ହାଇକମାଣ୍ଡ ଚୂଡାନ୍ତ ନିଷ୍ପତ୍ତି ନେଇଥିଲେ। ମୋହନ ଯାଦବ ତୃତୀୟ ଥର ପାଇଁ ଉଜୈନ ସାଉଥରୁ ବିଧାୟକ ଭାବରେ ନିର୍ବାଚିତ ହୋଇଛନ୍ତି। ଯାଦବ ଜୁଲାଇ ୨୦୨୦ ରୁ ୨୦୨୩ ପର୍ଯ୍ୟନ୍ତ ଶିକ୍ଷା ମନ୍ତ୍ରୀ ଥିଲେ ଏବଂ ୨୦୧୩ ଠାରୁ କ୍ରମାଗତ ଭାବରେ ବିଧାୟକ ଭାବେ କାର୍ଯ୍ୟ କରିଆସୁଥିଲେ।
ଏହା ବ୍ୟତୀତ ନରେନ୍ଦ୍ର ସିଂ ତୋମାରଙ୍କୁ ବିଧାନସଭା ବାଚସ୍ପତି କରାଯାଇପାରେ।
ସ୍ୱାସ୍ଥ୍ୟ ଟିପ୍ସ: କୋଷ୍ଠକାଠିନ୍ୟ ଏକ ଛୋଟ ଶବ୍ଦ ପରି ଶୁଣାଯାଏ, କିନ୍ତୁ ଅଧିକାଂଶ ଲୋକ ଏହି ସମସ୍ୟା ଦ୍ୱାରା ଅସୁବିଧାରେ ପଡ଼ନ୍ତି। ଅନ୍ୟପକ୍ଷରେ ପେଟ ସଫା ନେହେବା ହେତୁ ଶାରୀରିକ ସମସ୍ୟା ସହିତ ଅନେକ ଚର୍ମ ସମସ୍ୟା ମଧ୍ୟ ଦେଖାଯାଏ। କିନ୍ତୁ ଆପଣ ଜାଣନ୍ତି କି ଆପଣଙ୍କର କିଛି ଅଭ୍ୟାସ ହେତୁ ଆପଣ କୋଷ୍ଠକାଠିନ୍ୟରେ ଅସୁବିଧାର ସମ୍ମୁଖୀନ ହୁଅନ୍ତି। ଏପରି ପରିସ୍ଥିତିରେ, ଆପଣ ନିଜର ଯତ୍ନ ନେବା ପାଇଁ ଆପଣଙ୍କର କିଛି ଅଭ୍ୟାସରେ ଉନ୍ନତି ଆଣିବା ଉଚିତ୍। ଆପଣ କିଛି ଟିପ୍ସ ଗ୍ରହଣ କରି କୋଷ୍ଠକାଠିନ୍ୟ ସମସ୍ୟାରୁ ମୁକ୍ତି ପାଇପାରିବେ।
ଲେମ୍ବୁ: ଆମ ଶରୀରରୁ ବିଷାକ୍ତ ପଦାର୍ଥ ବାହାର କରିବା ପାଇଁ ଲେମ୍ବୁ କାମ କରେ। ଯଦି ଆପଣ କୋଷ୍ଠକାଠିନ୍ୟ ସମସ୍ୟାର ସମ୍ମୁଖୀନ ହେଉଛନ୍ତି, ତେବେ ଆପଣ ଗୋଟିଏ ଲେମ୍ବୁ ଏବଂ ମହୁର ରସକୁ ଏକ ଗ୍ଲାସ ଉଷୁମ ପାଣିରେ ମିଶାଇ ପିଇପାରିବେ। ଏହା କରିବା ଦ୍ୱାରା ଆପଣ କୋଷ୍ଠକାଠିନ୍ୟ ସମସ୍ୟାରୁ ମୁକ୍ତି ପାଇପାରିବେ।
କ୍ଷୀର ଏବଂ ଦହି: କୋଷ୍ଠକାଠିନ୍ୟର ସମସ୍ୟାକୁ ଦୂର କରିବା ପାଇଁ ପେଟରେ ଭଲ ଜୀବାଣୁ ରହିବା ଅତ୍ୟନ୍ତ ଜରୁରୀ। ଏପରି ପରିସ୍ଥିତିରେ, ଆପଣ ସାଧା ଦହିରୁ ପ୍ରୋବୋଟିକ୍ସ ପାଇବେ। ତେଣୁ, ଆପଣ ଦିନରେ ଗୋଟିଏରୁ ଦୁଇ କପ୍ ଦହି ଖାଇବା ଜରୁରୀ। ଏହା ବ୍ୟତୀତ ଯଦି ଆପଣ କୋଷ୍ଠକାଠିନ୍ୟରେ ଅସୁବିଧାରେ ପଡ଼ନ୍ତି, ତେବେ ଏକ ଗ୍ଲାସ୍ କ୍ଷୀରରେ ଗୋଟିଏରୁ ଦୁଇ ଚାମଚ ଘିଅକୁ ମିଶାଇ ଶୋଇବା ସମୟରେ ପିଅନ୍ତୁ, ଏହାଦ୍ବାରା କୋଷ୍ଠକାଠିନ୍ୟ ସମସ୍ୟାରୁ ମୁକ୍ତି ପାଇପାରିବେ।
ଖାଦ୍ୟରେ ଫାଇବର: ଜଣେ ମହିଳା ଦିନକୁ ୨୫ ଗ୍ରାମ ଫାଇବର ଆବଶ୍ୟକ କରେ। ଏହି ସମୟରେ, ଜଣେ ବ୍ୟକ୍ତି ୩୫ ଗ୍ରାମ ଫାଇବର ଆବଶ୍ୟକ କରେ। ଏଥିପାଇଁ, ଆପଣ ନିଜ ଆବଶ୍ୟକତା ଅନୁଯାୟୀ ପ୍ରତିଦିନ ଫାଇବର ସପ୍ଲିମେଣ୍ଟ ନେଇପାରିବେ, ଏହା କରିବା ଦ୍ୱାରା କୋଷ୍ଠକାଠିନ୍ୟର କୌଣସି ଅସୁବିଧା ହେବ ନାହିଁ।
ଆୟୁର୍ବେଦିକ ଔଷଧ: ଶୋଇବା ପୂର୍ବରୁ ଦୁଇ କିମ୍ବା ତିନୋଟି ତ୍ରିଫଳା ଟାବଲେଟ୍ ଗରମ ପାଣି ସହିତ ନିଅନ୍ତୁ। କାରଣ ତ୍ରିଫଳା ହରଡା, ବାହାଡା ଏବଂ ଅଁଳାକୁ ନେଇ ପ୍ରସ୍ତୁତ। ଏହି ତିନୋଟି ଫଳ ପେଟ ପାଇଁ ଲାଭଦାୟକ ଅଟେ। ଏଥିପାଇଁ ଆପଣ ଏହାକୁ ରାତିରେ ବ୍ୟବହାର କରିପାରିବେ।
ସ୍ୱାସ୍ଥ୍ୟ ଟିପ୍ସ: ଶୁଖିଲା ଫଳର ରାଜା ଭାବରେ କାଜୁକୁ ବିବେଚନା କରାଯାଏ। ଯାହା ସ୍ୱାସ୍ଥ୍ୟ ସହିତ ଆପଣଙ୍କ ସୌନ୍ଦର୍ଯ୍ୟ ବଢାଇବା ପାଇଁ ମଧ୍ୟ କାର୍ଯ୍ୟ କରିଥାଏ। ଏହା ସହିତ ଏହାକୁ ଖାଇବା ଦ୍ୱାରା ଅନେକ ପ୍ରକାରର ରୋଗକୁ ମଧ୍ୟ ନିୟନ୍ତ୍ରଣ କରାଯାଇପାରିବ। ଆଜି ଆମେ ଆପଣଙ୍କୁ କାଜୁର ଏପରି କିଛି ଉପକାର ବିଷୟରେ କହିବାକୁ ଯାଉଛୁ, ଯାହା ଆପଣଙ୍କ ପାଇଁ ଅତ୍ୟନ୍ତ ଲାଭଦାୟକ ପ୍ରମାଣିତ ହେବ। ଏହାକୁ ଖାଇବା ଦ୍ୱାରା ମେଟାବୋଲିଜିମ୍ ଠିକ୍ ରହିଥାଏ ଏବଂ ହୃଦୟ ସମ୍ବନ୍ଧୀୟ ଅନେକ ରୋଗରେ ଆରାମ ମିଳିଥାଏ। ଆମ ରୋଷେଇ ଘରେ, କାଜୁ ବାଦାମ ପନିପରିବା ଗ୍ରେଭି ସ୍ୱାଦିଷ୍ଟ କରିବା ସହିତ ମିଠା ର ସ୍ୱାଦ ବଢାଇଥାଏ। ଏହା ଅନେକ ଉପାୟରେ ବ୍ୟବହୃତ ହୁଏ। ଏହା ଆପଣଙ୍କ ସ୍ୱାସ୍ଥ୍ୟ ଏବଂ ଚର୍ମ ପାଇଁ ମଧ୍ୟ ବହୁତ ଲାଭଦାୟକ ଅଟେ।
କାଜୁ ଖାଇବା ଦ୍ଵାରା ସ୍ୱାସ୍ଥ୍ୟ ପାଇଁ ଉପକାର:
– କାଜୁ ଆମର ହଜମ ପ୍ରକ୍ରିୟାକୁ ଶକ୍ତିଶାଳୀ କରିଥାଏ। ଏଥିରେ ଆଣ୍ଟି-ଅକ୍ସିଡାଣ୍ଟ ଥାଏ, ଯାହା ହଜମ ପ୍ରକ୍ରିୟାକୁ ମଜବୁତ କରିବା ସହିତ ଓଜନକୁ ସନ୍ତୁଳିତ ରଖେ।
– ଦାନ୍ତ ଏବଂ ମାଢିକୁ ସୁସ୍ଥ ରଖିବା ପାଇଁ କାଜୁ ବାଦାମ ମଧ୍ୟ ଲାଭଦାୟକ ଅଟେ। ପ୍ରତିଦିନ ଖାଇବା ଦ୍ଵାରା ଏହା ଦାନ୍ତକୁ ମଜବୁତ କରିଥାଏ।
– ହୃଦୟକୁ ସୁସ୍ଥ ରଖିବା ପାଇଁ ପ୍ରତିଦିନ କାଜୁ ଖାଆନ୍ତୁ। ମୋନୋ-ସ୍ୟାଚୁରେଟେଡ୍ ଫ୍ୟାଟ୍ କାଜୁରେ ମିଳିଥାଏ, ଯାହା ହୃଦୟର ଯତ୍ନ ନିଏ। କାଜୁ କୋଲେଷ୍ଟ୍ରଲ ମୁକ୍ତ, ଯାହା ଆପଣଙ୍କ ପାଇଁ ଲାଭଦାୟକ ଅଟେ।
– ହାଡକୁ ଶକ୍ତିଶାଳୀ ରଖିବା ପାଇଁ ପ୍ରତିଦିନ କାଜୁ ଖାଇବା ଅଭ୍ୟାସ କରନ୍ତୁ। କାଜୁରେ ପ୍ରୋଟିନ୍ ଭରପୂର, ଯାହା ହୃଦରୋଗର ଆଶଙ୍କା ହ୍ରାସ କରିଥାଏ।
– ସୀମିତ ପରିମାଣରେ କାଜୁ ଖାଇବା ଶରୀର ପାଇଁ ଲାଭଦାୟକ ଅଟେ। ଖରାପ ମୁଡକୁ ଠିକ କରିବାକୁ ୨ ରୁ ୩ ଟି କାଜୁ ଖାଆନ୍ତୁ। ଏହା ଆପଣଙ୍କୁ ଶୀଘ୍ର ଆରାମ ଦେବ। ଏକ ଉତ୍ତମ ଶକ୍ତି ଉତ୍ସ ଭାବରେ କାଜୁକୁ ବିବେଚନା କରାଯାଏ।
– ଅନ୍ୟପକ୍ଷରେ, ଚେହେରାକୁ ବଢାଇବା ପାଇଁ କାଜୁ ବ୍ୟବହାର କରାଯାଇପାରିବ। କ୍ଷୀର କିମ୍ବା ଗୋଲାପ ପାଣିରେ ବଟା କାଜୁକୁ ମିଶାଇ ଲଗାଇବା ଦ୍ୱାରା ଚର୍ମରେ ଚମକ ଆସିଥାଏ। ଏହା ସହିତ ଚର୍ମ କୋମଳ ଏବଂ ନରମ ହୋଇଯାଏ। କାଜୁର ଦୈନନ୍ଦିନ ବ୍ୟବହାର କେଶକୁ ମଧ୍ୟ ଲାଭ ଦିଏ।
– କାଜୁରେ ସୋଡିୟମ୍ ଏବଂ ପୋଟାସିୟମ୍ ଭରପୂର ଅଟେ, ଯାହା ରକ୍ତଚାପକୁ ନିୟନ୍ତ୍ରଣ କରିବାରେ ସାହାଯ୍ୟ କରିଥାଏ। ଏହାର ବ୍ୟବହାର ଆପଣଙ୍କୁ ଅନେକ ଲାଭ ଦେଇପାରେ।
ନୂଆଦିଲ୍ଲୀ: ଭାରତ ଓ ରିପବ୍ଲିକ ଅଫ୍ କୋରିଆ ମଧ୍ୟରେ କୂଟନୈତିକ ସମ୍ପର୍କକୁ ୫୦ ବର୍ଷ ପୂର୍ତ୍ତି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କୋରିଆ ରାଷ୍ଟ୍ରପତି ୟୋନ୍ ସୁକ୍ ୟୋଲଙ୍କୁ ଶୁଭେଚ୍ଛା ଜଣାଇଛନ୍ତି। ପାରସ୍ପରିକ ସମ୍ମାନ, ସହଭାଗୀ ମୂଲୋବୋଧ ଏବଂ ଆଗେଇ ଚାଲିଥିବା ସହଭାଗିତାର ଯାତ୍ରାକୁ ଗୁରୁତ୍ୱ ଦେଇ ପ୍ରଧାନମନ୍ତ୍ରୀ କୋରିଆ ରାଷ୍ଟ୍ରପତି ୟୋନ୍ ସୁକ୍ ୟୋଲଙ୍କ ସହ ଘନିଷ୍ଠ ଭାବେ କାର୍ଯ୍ୟ କରିବାକୁ ଆଗ୍ରହ ପ୍ରକାଶ କରିଛନ୍ତି।
ପ୍ରଧାନମନ୍ତ୍ରୀ ଏକ୍ସରେ ପୋଷ୍ଟ କରି କହିଛନ୍ତି ଯେ, ‘ଆମେ ଆଜି ଭାରତ ଏବଂ ରିପବ୍ଲିକ ଅଫ୍ କୋରିଆ ମଧ୍ୟରେ କୂଟନୈତିକ ସମ୍ପର୍କର ୫୦ ବର୍ଷ ପୂର୍ତ୍ତି ଅବସରକୁ ପାଳନ କରୁଛୁ। ଏହା ପାରସ୍ପରିକ ସମ୍ମାନ, ସହଭାଗୀ ମୂଲ୍ୟବୋଧ ଏବଂ ଆଗେଇ ଚାଲିଥିବା ସହଭାଗିତାର ଯାତ୍ରା। ମୁଁ କୋରିଆ ରିପବ୍ଲିକ୍ର ରାଷ୍ଟ୍ରପତି ଶ୍ରୀ ୟୋନ୍ ସୁକ୍ ୟୋଲଙ୍କୁ ଶୁଭେଚ୍ଛା ଜଣାଉଛି ଏବଂ ଆମ ସ୍ୱତନ୍ତ୍ର ରଣନୀତିକ ଭାଗିଦାରୀକୁ ଗଭୀର ତଥା ବିସ୍ତାର କରିବା ପାଇଁ ତାଙ୍କ ସହ ମିଳିତ ଭାବେ କାର୍ଯ୍ୟ କରିବାକୁ ଆଗ୍ରହୀ ଅଛି।’
ନୂଆଦିଲ୍ଲୀ: ଧାରା-୩୭୦ ଉଚ୍ଛେଦ ପ୍ରକ୍ରିୟାକୁ ସୁପ୍ରିମକୋର୍ଟ ବଜାୟ ରଖିଛନ୍ତି। ସୋମବାର ରାୟ ଶୁଣାଇ ସୁପ୍ରିମକୋର୍ଟ କହିଛନ୍ତି ଯେ ଧାରା-୩୭୦ ଏକ ଅସ୍ଥାୟୀ ବ୍ୟବସ୍ଥା ଥିଲା। ସର୍ବୋଚ୍ଚ ନ୍ୟାୟାଳୟ କହିଛନ୍ତି ଯେ ସମ୍ବିଧାନ ସଭାର ସୁପାରିସ ରାଷ୍ଟ୍ରପତିଙ୍କ ପାଇଁ ବାଧ୍ୟତାମୂଳକ ନୁହେଁ। ଜମ୍ମୁ-କଶ୍ମୀର ସମ୍ବିଧାନ ସଭା ଭଙ୍ଗ ହେବା ପରେ ମଧ୍ୟ ଧାରା-୩୭୦ର ଅବସାନ ନେଇ ବିଜ୍ଞପ୍ତି ଜାରି କରିବାର ରାଷ୍ଟ୍ରପତିଙ୍କ କ୍ଷମତା ଜାରି ରହିଛି। ଧାରା-୩୭୦ ଅନୁଯାୟୀ ସ୍ୱତନ୍ତ୍ର ପରିସ୍ଥିତି ରହିଛି କି ନାହିଁ ସେ ନେଇ ରାଷ୍ଟ୍ରପତିଙ୍କ ନିଷ୍ପତ୍ତି ଉପରେ ଏହି ଅଦାଲତ ବିଚାର କରିପାରିବେ ନାହିଁ। ୫ ଜଣିଆ ସାମ୍ବିଧାନିକ ଖଣ୍ଡପୀଠ ୩ଟି ରାୟ ଦେଇଛନ୍ତି। ପ୍ରଧାନ ବିଚାରପତି ଡିୱାଇ ଚନ୍ଦ୍ରଚୂଡ଼ ଏହି ଖଣ୍ଡପୀଠର ମୁଖ୍ୟ ଥିଲେ।
ଖଣ୍ଡପୀଠରେ ପ୍ରଧାନ ବିଚାରପତିଙ୍କ ବ୍ୟତୀତ ଜଷ୍ଟିସ ସଞ୍ଜୟ କିଶନ କୌଲ, ଜଷ୍ଟିସ ସଞ୍ଜୀବ ଖାନ୍ନା, ଜଷ୍ଟିସ ବିଆର ଗବାଇ ଏବଂ ଜଷ୍ଟିସ ସୂର୍ଯ୍ୟକାନ୍ତ ମଧ୍ୟ ଉପସ୍ଥିତ ଥିଲେ। ପ୍ରଧାନ ବିଚାରପତି ଜଷ୍ଟିସ ଗବାଇ ଓ ଜଷ୍ଟିସ ସୂର୍ଯ୍ୟକାନ୍ତ ଏହି ରାୟ ଶୁଣାଇଛନ୍ତି। ଜଷ୍ଟିସ୍ ସଞ୍ଜୀବ ଖାନ୍ନା ଓ ଜଷ୍ଟିସ୍ ଏସ କେ କୌଲ ଏକ ଅଲଗା ରାୟ ଲେଖିଛନ୍ତି। ପଢନ୍ତୁ ଧାରା-୩୭୦କୁ ନେଇ ସୁପ୍ରିମକୋର୍ଟଙ୍କ ଐତିହାସିକ ରାୟର ବଡ଼ କଥା।
ଧାରା-୩୭୦କୁ ନେଇ ସୁପ୍ରିମକୋର୍ଟଙ୍କ ରାୟ
ଡିସେମ୍ବର ୨୦୧୮ରେ ଜମ୍ମୁ-କଶ୍ମୀରରେ ଲାଗୁ ହୋଇଥିବା ରାଷ୍ଟ୍ରପତି ଶାସନର ବୈଧତା ଉପରେ ରାୟ ଦେବାକୁ ସୁପ୍ରିମକୋର୍ଟ ମନା କରିଦେଇଛନ୍ତି। ସୁପ୍ରିମକୋର୍ଟ କହିଛନ୍ତି ଯେ ଏହାକୁ ଆବେଦନକାରୀ ବିଶେଷଭାବେ ଚ୍ୟାଲେଞ୍ଜ କରିନାହାନ୍ତି।
ଯେତେବେଳେ ରାଷ୍ଟ୍ରପତି ଶାସନ ଲାଗୁ କରାଯାଏ, ସେତେବେଳେ ରାଜ୍ୟଗୁଡ଼ିକରେ କେନ୍ଦ୍ରର କ୍ଷମତା ଉପରେ ସୀମା ରହିଥାଏ। ଧାରା-୩୫୬ ଅନୁଯାୟୀ କ୍ଷମତା ପ୍ରୟୋଗ ପାଇଁ ଯଥାର୍ଥ କାରଣ ରହିବା ଆବଶ୍ୟକ।
ସାମ୍ବିଧାନିକ ବ୍ୟବସ୍ଥା ଜମ୍ମୁ-କଶ୍ମୀର ନିଜର ସାର୍ବଭୌମତ୍ୱକୁ ବଜାୟ ରଖିଛି ବୋଲି ସୂଚାଉ ନାହିଁ। ଜମ୍ମୁ-କଶ୍ମୀର ରାଜ୍ୟ ଭାରତର ଅବିଚ୍ଛେଦ୍ୟ ଅଙ୍ଗ ପାଲଟିଛି ତାହା ଭାରତୀୟ ସମ୍ବିଧାନର ଧାରା-୧ ଓ ୩୭୦ରୁ ସ୍ପଷ୍ଟ ହୋଇଛି।
ଧାରା-୩୭୦ ଏକ ଅସ୍ଥାୟୀ ବ୍ୟବସ୍ଥା: ପ୍ରଧାନ ବିଚାରପତି
ଜମ୍ମୁ-କଶ୍ମୀର ସମ୍ବିଧାନ ସଭା ଭଙ୍ଗ ହେବା ପରେ ମଧ୍ୟ ଧାରା-୩୭୦(୩) ଅନୁଯାୟୀ ବିଜ୍ଞପ୍ତି ଜାରି କରିବାର ରାଷ୍ଟ୍ରପତିଙ୍କ କ୍ଷମତା ଜାରି ରହିଛି ବୋଲି ପ୍ରଧାନ ବିଚାରପତି କହିଛନ୍ତି। ଜମ୍ମୁ-କଶ୍ମୀରକୁ ଏକ କେନ୍ଦ୍ରଶାସିତ ଅଞ୍ଚଳରେ ପୁନର୍ଗଠନ ବୈଧ କି ନାହିଁ ତାହା ନିର୍ଦ୍ଧାରଣ କରିବା ଆମେ ଆବଶ୍ୟକ ମନେକରୁନାହୁଁ। ଲଦାଖକୁ କେନ୍ଦ୍ରଶାସିତ ଅଞ୍ଚଳଭାବେ ପୁନର୍ଗଠନ କରାଯାଇଛି କାରଣ ଧାରା-୩ ରାଜ୍ୟର ଏକ ଅଂଶକୁ କେନ୍ଦ୍ରଶାସିତ ଅଞ୍ଚଳରେ ପରିଣତ କରିବାକୁ ଅନୁମତି ଦେଇଥାଏ ବୋଲି ପ୍ରଧାନ ବିଚାରପତି କହିଛନ୍ତି।
ସଂସଦ ଏକ ରାଜ୍ୟକୁ କେନ୍ଦ୍ରଶାସିତ ଅଞ୍ଚଳରେ ପରିଣତ କରିପାରିବ କି ବୋଲି ଯେଉଁ ପ୍ରଶ୍ନ ଉଠିଛି ତାହା ଏବେବି ବଳବତ୍ତର ରହିଛି।
୩୦ ସେପ୍ଟେମ୍ବର ୨୦୨୪ ସୁଦ୍ଧା ଜମ୍ମୁ-କଶ୍ମୀର ବିଧାନସଭା ନିର୍ବାଚନ କରାଇବା ପାଇଁ ଭାରତର ନିର୍ବାଚନ ଆୟୋଗ ପଦକ୍ଷେପ ନେବାକୁ ଆମେ ନିର୍ଦ୍ଦେଶ ଦେଉଛୁ ବୋଲି ଖଣ୍ଡପୀଠ କହିଛନ୍ତି। ଖୁବଶୀଘ୍ର ରାଜ୍ୟର ମାନ୍ୟତା ପୁନରୁଦ୍ଧାର କରାଯିବ ବୋଲି ପ୍ରଧାନ ବିଚାରପତି କହିଛନ୍ତି।
ବିଦ୍ରୋହ କାରଣରୁ ଜନସଂଖ୍ୟାର ଏକ ବଡ଼ ଅଂଶ ପଳାୟନ କରିଛି ଏବଂ ପରିସ୍ଥିତି ଏପରି ଥିଲା ଯେ ସେନାକୁ ଡାକିବାକୁ ପଡ଼ିଥିଲା। ରାଜ୍ୟବାସୀଙ୍କୁ ବହୁ ମୂଲ୍ୟ ଦେବାକୁ ପଡ଼ୁଛି ଏବଂ ପିଢ଼ି ପରେ ପିଢ଼ି ଲୋକେ ଆଘାତ ଭୋଗୁଛନ୍ତି, ରାଜ୍ୟରେ ଏହାର ଚିକିତ୍ସାର ଆବଶ୍ୟକତା ରହିଛି।
ଜଷ୍ଟିସ୍ ସଞ୍ଜୀବ ଖାନ୍ନା କହିଛନ୍ତି, ଧାରା ୩୬୭ରେ ସଂଶୋଧନ ଆଇନରେ ଭୁଲ ଥିଲା କିନ୍ତୁ ସମାନ ଉଦ୍ଦେଶ୍ୟ ୩୭୦(୩) ମାଧ୍ୟମରେ ହାସଲ କରାଯାଇଥିଲା ଏବଂ ତେଣୁ ସିଓ ୨୭୩ ବୈଧ ବୋଲି ବିବେଚନା କରାଯାଏ।
ଏହି ଶୁଣାଣି ୧୬ ଦିନ ଧରି ଚାଲିଥିଲା
୫ ଜଣ ବିଚାରପତିଙ୍କୁ ନେଇ ଗଠିତ ଖଣ୍ଡପୀଠ ୧୬ ଦିନ ଧରି ଶୁଣାଣି କରି ରାୟ ସଂରକ୍ଷିତ ରଖିଛନ୍ତି। ଧାରା-୩୭୦ ଉଚ୍ଛେଦ ନେଇ କେନ୍ଦ୍ର ସରକାରଙ୍କ ନିଷ୍ପତ୍ତିକୁ ଚ୍ୟାଲେଞ୍ଜ କରି ୨୦ରୁ ଅଧିକ ପିଟିସନ ଦାଖଲ କରାଯାଇଥିଲା। ୫ ଅଗଷ୍ଟ ୨୦୧୯ ତାରିଖରେ ସରକାର ସମ୍ବିଧାନର ଧାରା-୩୭୦ ଉଚ୍ଛେଦ କରିଥିଲେ। ଏହା ତତ୍କାଳୀନ ଜମ୍ମୁ-କଶ୍ମୀର ରାଜ୍ୟକୁ ସ୍ୱତନ୍ତ୍ର ମାନ୍ୟତା ଦେଇଥିଲା। ରାଜ୍ୟକୁ ଦୁଇଟି କେନ୍ଦ୍ରଶାସିତ ଅଞ୍ଚଳଜମ୍ମୁ-କଶ୍ମୀର ଏବଂ ଲଦାଖରେ ବିଭକ୍ତ କରାଯାଇଛି।
ଧାରା-୩୭୦: ସୁପ୍ରିମକୋର୍ଟ ଓକିଲଙ୍କ ଯୁକ୍ତି ଶୁଣିଲେ
ଧାରା-୩୭୦ ଉପରେ ଶୁଣାଣିବେଳେ ସୁପ୍ରିମକୋର୍ଟ ଅନେକ ଜଣାଶୁଣା ଓକିଲଙ୍କ ଯୁକ୍ତି ଶୁଣିଥିଲେ। କେନ୍ଦ୍ର ପକ୍ଷରୁ ଆଟର୍ଣ୍ଣି ଜେନେରାଲ ଆର ଭେଙ୍କଟରମଣି, ସଲିସିଟର ଜେନେରାଲ ତୁଷାର ମେହେଟ୍ଟା, ବରିଷ୍ଠ ଆଇନଜୀବୀ ହରିଶ ସାଲଭେ, ରାକେଶ ଦ୍ୱିବେଦୀ, ଭି ଗିରି ଓ ଅନ୍ୟମାନେ ଯୁକ୍ତି ଉପସ୍ଥାପନ କରିଥିଲେ। ଆବେଦନକାରୀଙ୍କ ପକ୍ଷରୁ ବରିଷ୍ଠ ଆଇନଜୀବୀ କପିଲ ସିବଲ, ଗୋପାଳ ସୁବ୍ରମଣ୍ୟମ, ରାଜୀବ ଧୱନ, ଜାଫର ଶାହା, ଦୁଷ୍ମନ୍ତ ଦବେ ଏବଂ ଅନ୍ୟମାନେ ଯୁକ୍ତି ଉପସ୍ଥାପନ କରିଥିଲେ।
ଧାରା-୩୭୦: ସପକ୍ଷରେ ଓ ବିପକ୍ଷରେ ଦିଆଯାଇଥିବା ଯୁକ୍ତି
ଧାରା-୩୭୦ ଉଚ୍ଛେଦ କରାଯାଇପାରିବ ନାହିଁ ବୋଲି ଆବେଦନକାରୀମାନେ ଯୁକ୍ତି ବାଢ଼ିଥିଲେ। କେବଳ ଜମ୍ମୁ-କଶ୍ମୀର ସମ୍ବିଧାନ ସଭାର ସୁପାରିସ କ୍ରମେ ରାଷ୍ଟ୍ରପତି ଏହାକୁ ଉଚ୍ଛେଦ କରିପାରିବେ। ସମ୍ବିଧାନ ସଭା ୧୯୫୧ରୁ ୧୯୫୭ ପର୍ଯ୍ୟନ୍ତ ନିଷ୍ପତ୍ତି ନେଇପାରିଥାନ୍ତା, କିନ୍ତୁ ଏହାପରେ ଏହାକୁ ଉଚ୍ଛେଦ କରାଯାଇପାରିବ ନାହିଁ।
ବରିଷ୍ଠ ଆଇନଜୀବୀ ସିବଲ ସୁପ୍ରିମକୋର୍ଟଙ୍କୁ କହିଛନ୍ତି ଯେ ଜମ୍ମୁ-କଶ୍ମୀର ସମ୍ବିଧାନ ସଭାର କାର୍ଯ୍ୟକାଳ ଶେଷ ହୋଇଥିବାରୁ ୧୯୫୭ ପରେ ଏହାକୁ ଉଚ୍ଛେଦ କରାଯାଇପାରିବ ନାହିଁ। ଏହା କୌଣସି ସାମ୍ବିଧାନିକ କାର୍ଯ୍ୟ ନୁହେଁ।
କେନ୍ଦ୍ର ସରକାରଙ୍କ ସଲିସିଟର ଜେନେରାଲ କହିଥିଲେ ଯେ ଗୃହମନ୍ତ୍ରୀ ଜମ୍ମୁ-କଶ୍ମୀର ପୁନର୍ଗଠନ ବିଲ ଉପସ୍ଥାପନ କରିବା ସମୟରେ କହିଥିଲେ ଯେ ଉପଯୁକ୍ତ ସମୟରେ ରାଜ୍ୟର ମାନ୍ୟତା ଦିଆଯିବ। କେନ୍ଦ୍ରଶାସିତ ଅଞ୍ଚଳର ମାନ୍ୟତା ସ୍ଥାୟୀ ନୁହେଁ।
ସଲିସିଟର ଜେନେରାଲ ସୁପ୍ରିମକୋର୍ଟରେ କହିଥିଲେ ଯେ ସ୍ୱାଧୀନତାର ୭୫ ବର୍ଷ ପରେ ସେଠାକାର ଲୋକଙ୍କୁ ଏକ ଅଧିକାର ମିଳିଛି, ଯେଉଁଥିରୁ ସେମାନେ ବଞ୍ଚିତ ହୋଇଛନ୍ତି। ଏହାକୁ ଉଚ୍ଛେଦ କରାଯିବା ଦ୍ୱାରା ଦେଶର ଅନ୍ୟାନ୍ୟ ଲୋକଙ୍କୁ ବହୁ ସଂଖ୍ୟାରେ ମୌଳିକ ଅଧିକାର ଉପଲବ୍ଧ ହେଉଛି। ସେହି ଅଧିକାର ଜମ୍ମୁ-କଶ୍ମୀରବାସୀଙ୍କୁ ମଧ୍ୟ ମିଳିଥିଲା। ସେମାନଙ୍କର ଏକ ବ୍ୟାପକ ସାର୍ବଭୌମତ୍ୱ ମଧ୍ୟ ରହିଛି।
ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ରକ୍ତ ଜୁଡୁବୁଡୁ ଅବସ୍ଥାରେ ବୃଦ୍ଧ ବ୍ୟକ୍ତିଙ୍କ ମୃତଦେହ ଉଦ୍ଧାର କରାଯାଇଛି। ଟାଉନ୍ ଥାନା ଗାନ୍ଧି ନଗର ଦ୍ବିତୀୟ ଲାଇନ୍ରୁ ବୃଦ୍ଧ ବ୍ୟକ୍ତିଙ୍କ ମୃତଦେହ ଉଦ୍ଧାର ହୋଇଛି। ମୃତକ ବିଜିପୁର ଅମ୍ବିକା ନଗରର ବୋଲି ଜଣାପଡିଥିବା ବେଳେ ସେ ଭୋର୍ ୪ ଟାରୁ ଘରୁ ବାହାରିଥିଲେ। ତେବେ ସେହି ସମୟରେ ବେକ କାଟି ତାଙ୍କୁ କେହି ହତ୍ୟା କରିଥିବା ସନ୍ଦେହ କରାଯାଉଛି।
ନୂଆଦିଲ୍ଲୀ: ଜମ୍ମୁ କାଶ୍ମୀରକୁ ସ୍ଵତନ୍ତ୍ର ମାନ୍ୟତା ଦେଇଥିବା ଧାରା ୩୭୦ ରଦ୍ଦ କରିବାକୁ ସରକାରଙ୍କ ନିଷ୍ପତ୍ତିକୁ ଆଜି ସୁପ୍ରିମକୋର୍ଟ ସମର୍ଥନ କରିଛନ୍ତି ଏବଂ ଆସନ୍ତା ବର୍ଷ ସେପ୍ଟେମ୍ବର ୩୦ ତାରିଖ ସୁଦ୍ଧା ବିଧାନସଭା ନିର୍ବାଚନ କରିବାକୁ ନିର୍ଦ୍ଦେଶ ଦେଇଛନ୍ତି।
ଜଷ୍ଟିସ୍ ବି.ଆର ଗଭଇ ଏବଂ ସୂର୍ଯ୍ୟ କାନ୍ତଙ୍କ ସହ ପ୍ରଧାନ ବିଚାରପତି ଡି.ଇ ଚନ୍ଦ୍ରଚୁଡ କହିଛନ୍ତି ଯେ, ସମ୍ବିଧାନର ଧାରା ୩୭୦ ଏକ ସାମୟିକ ବ୍ୟବସ୍ଥା ଏବଂ ରାଷ୍ଟ୍ରପତି ଏହାକୁ ରଦ୍ଦ କରିବାର କ୍ଷମତା ରଖିଛନ୍ତି। ଅଗଷ୍ଟ ୨୦୧୯ ରେ ଜାମ୍ମୁ କାଶ୍ମୀରଠାରୁ କେନ୍ଦ୍ର ଶାସିତ ଅଞ୍ଚଳ ଲଦାଖକୁ ପୃଥକ କରିବା ନିଷ୍ପତ୍ତିର ବୈଧତାକୁ ମଧ୍ୟ ସର୍ବୋଚ୍ଚ ନ୍ୟାୟାଳୟ ସମର୍ଥନ କରିଛନ୍ତି। ଜଷ୍ଟିସ ଚନ୍ଦ୍ରଚୂଡ କହିଛନ୍ତି ଯେ, ଜମ୍ମୁ କାଶ୍ମୀର ପାଖରେ ଦେଶର ଅନ୍ୟାନ୍ୟ ରାଜ୍ୟ ଠାରୁ ଆଭ୍ୟନ୍ତରୀଣ ସାର୍ବଭୌମତ୍ଵ ନାହିଁ।
CJI କହିଛି ଯେ, ସମ୍ବିଧାନର ଧାରା ୩୭୦ ରଦ୍ଦ କରିବାକୁ ସାମ୍ବିଧାନିକ ଆଦେଶ ଜାରି କରିବାକୁ ରାଷ୍ଟ୍ରପତିଙ୍କ କ୍ଷମତାର ବ୍ୟବହାରକୁ ଆମେ ଆଇନଗତ ବୋଲି ବିବେଚନା କରୁଛୁ। ସେ କହିଛନ୍ତି ଯେ, ଜମ୍ମୁ-କଶ୍ମୀର ଭାରତର ଏକ ଅବିଚ୍ଛେଦ୍ୟ ଅଙ୍ଗ ହୋଇପାରିଛି ଏବଂ ଧାରା ୧ ଏବଂ ୩୭୦ ରୁ ଏହା ସ୍ପଷ୍ଟ ହୋଇଛି।
ସେ କହିଛନ୍ତି ଯେ, ଜମ୍ମୁ କାଶ୍ମୀରର ବିଧାନସଭାକୁ ସ୍ଥାୟୀ ସଂସ୍ଥା କରିବା ଉଦ୍ଦେଶ୍ୟ ନୁହେଁ। ଜମ୍ମୁ-କଶ୍ମୀରରେ ଯୁଦ୍ଧ ପରିସ୍ଥିତି ହେତୁ ସମ୍ବିଧାନର ଧାରା ୩୭୦ ମଧ୍ୟବର୍ତ୍ତୀକାଳୀନ ବ୍ୟବସ୍ଥା ବୋଲି ପ୍ରଧାନ ବିଚାରପତି କହିଛନ୍ତି। ସେ କହିଛନ୍ତି ଯେ, କେନ୍ଦ୍ରଶାସିତ ଅଞ୍ଚଳ ଜମ୍ମୁ କାଶ୍ମୀରକୁ ରାଜ୍ୟର ମାନ୍ୟତା ଯଥାଶୀଘ୍ର ପୁନଃ ସ୍ଥାପିତ ହେବ ବୋଲି ଆମେ ନିର୍ଦ୍ଦେଶ ଦେଉଛୁ।
ନୂଆଦିଲ୍ଲୀ: ବଳିଷ୍ଠ ଅଭିନୟ ହେତୁ ବଲିଉଡ ଅଭିନେତା ସନ୍ନି ଦେଓଲଙ୍କର ଲକ୍ଷ ଲକ୍ଷ ପ୍ରଶଂସକ ଅଛନ୍ତି। କିନ୍ତୁ ପୁଣି ଥରେ ପଞ୍ଜାବରେ ତାଙ୍କର ନିଖୋଜ ହେବାର ପୋଷ୍ଟର ଲଗାଯାଇଛି। କେବଳ ଏତିକି ନୁହେଁ, ସନ୍ନି ଦେଓଲଙ୍କୁ ଖୋଜି ଆଣିବା ବ୍ୟକ୍ତି ପାଇଁ ୫୦ ହଜାର ଟଙ୍କା ପୁରସ୍କାର ମଧ୍ୟ ରଖାଯାଇଛି। ଏହା ପ୍ରଥମ ଥର ନୁହେଁ ଯେ, ସନ୍ନି ଦେଓଲଙ୍କ ନିଖୋଜ ପୋଷ୍ଟର ଲଗାଯାଇଛି। ବାସ୍ତବରେ ସନ୍ନି ଦେଓଲ ଗୁରୁଦାସପୁର-ପଠାନକୋଟ ଲୋକସଭା ଆସନରୁ ବିଜେପି ସାଂସଦ ଅଟନ୍ତି। ଲୋକମାନେ କହିଛନ୍ତି ଯେ, ସନ୍ନି ଦେଓଲ ସାଂସଦ ହେବା ପରଠାରୁ ତାଙ୍କୁ ଉଭୟ ଜିଲ୍ଲାରେ ଆଉ ମିଳୁ ନାହିଁ କିମ୍ବା ସେ କୌଣସି ବିକାଶମୂଳକ କାର୍ଯ୍ୟ କରି ନାହାଁନ୍ତି।
ପଠାନକୋଟ ଜିଲ୍ଲାର ହଲକା ଭୋଆର ଲୋକମାନେ ସରନା ବସ୍ ଷ୍ଟାଣ୍ଡରେ ନିଖୋଜ ସନ୍ନି ଦେଓଲଙ୍କ ପୋଷ୍ଟର ଲଗାଇ ନିଜର କ୍ରୋଧ ପ୍ରକାଶ କରିଛନ୍ତି। ପଠାନକୋଟ ଜିଲ୍ଲାରେ ଏହି ନିଖୋଜ ପୋଷ୍ଟର ଲଗାଯିବା ପ୍ରଥମ ଘଟଣା ନୁହେଁ। ଏହାପୂର୍ବରୁ ଜିଲ୍ଲାର ହାଲକା, ପଠାନକୋଟ ଏବଂ ସୁଜନପୁରରେ ସନ୍ନି ଦେଓଲଙ୍କ ନିଖୋଜ ସମ୍ପର୍କରେ ପୋଷ୍ଟର ଲଗାଯାଇଥିଲା। କିନ୍ତୁ ଏହା ପରେ ମଧ୍ୟ ବିଜେପି ସାଂସଦ ଲୋକଙ୍କ ଯନ୍ତ୍ରଣା ବୁଝିବାକୁ ଚେଷ୍ଟା କରିନାହାଁନ୍ତି। ସେ କେବେ ବି ତାଙ୍କ ଲୋକସଭା ନିର୍ବାଚନମଣ୍ଡଳୀକୁ ଆସିନାହାଁନ୍ତି। ଏହି କାରଣରୁ ରବିବାର ଦିନ ପଠାନକୋଟ ଲୋକସଭା ନିର୍ବାଚନମଣ୍ଡଳୀରେ ଲୋକଙ୍କ କ୍ରୋଧ ଦେଖିବାକୁ ମିଳିଥିଲା। ବିକ୍ଷୋଭକାରୀ ଲୋକମାନେ ବସ୍ ଯୋଗେ ଯାତ୍ରା କରିଥିଲେ ଏବଂ ଲୋକଙ୍କ ମଧ୍ୟରେ ପୋଷ୍ଟର ବଣ୍ଟନ କରିଥିଲେ ଏବଂ ସେମାନଙ୍କୁ ବସ୍ ରେ ଲଗାଇଥିଲେ, ଯାହା ଦ୍ଵାରା ସେମାନଙ୍କ ବାର୍ତ୍ତା ସେମାନଙ୍କ ସାଂସଦଙ୍କ ନିକଟରେ ପହଞ୍ଚିପାରିବ।
ନୂଆଦିଲ୍ଲୀ: ଜମ୍ମୁ କାଶ୍ମୀରରୁ ଧାରା ୩୭୦ ରଦ୍ଦ ହେବା ବିରୋଧରେ ଆଜି ସୁପ୍ରିମକୋର୍ଟରେ ଶୁଣାଣି ହୋଇଛି। ଶୁଣାଣି ସମୟରେ କୋର୍ଟ କହିଛନ୍ତି ଯେ, ଧାରା ୩୭୦ର ଉଚ୍ଛେଦ ସାମ୍ବିଧାନିକ ବୈଧ ଅଟେ। ତେବେ ସୁପ୍ରିମକୋର୍ଟ କହିଛନ୍ତି ଯେ, ସେପ୍ଟେମ୍ବର ୩୦ ତାରିଖ ୨୦୨୪ ସୁଦ୍ଧା ଜମ୍ମୁ କାଶ୍ମୀରରେ ବିଧାନସଭା ନିର୍ବାଚନ ହେବା ଉଚିତ। ଜାମ୍ମୁ କାଶ୍ମୀରକୁ ରାଜ୍ୟ ଅଧିକାର ଫେରାଇବାକୁ କୋର୍ଟ ମଧ୍ୟ ନିର୍ଦ୍ଦେଶ ଦେଇଛନ୍ତି।
ଧାରା ୩୭୦ ଉପରେ ହୋଇଥିବା ଶୁଣାଣି ସମୟରେ ଭାରତର ପ୍ରଧାନ ବିଚାରପତି ଡିଏ ଚନ୍ଦ୍ରଚୁଡ ସଲିସିଟର ଜେନେରାଲଙ୍କୁ କହିଛନ୍ତି ଯେ, ଜମ୍ମୁ କାଶ୍ମୀରକୁ ରାଜ୍ୟ ଅଧିକାର ଫେରାଇ ଦିଆଯିବ। କିନ୍ତୁ ଲଦାଖ କେନ୍ଦ୍ର ଶାସିତ ଅଞ୍ଚଳ ହୋଇ ରହିବ। ଅଦାଲତ କହିଛନ୍ତି ଯେ, ନୂତନ ନିର୍ଦ୍ଦେଶ ଆଧାରରେ ନିର୍ବାଚନ ଆୟୋଗ ଜମ୍ମୁ କାଶ୍ମୀରରେ ବିଧାନସଭା ନିର୍ବାଚନ କରିବା ଉଚିତ। ସେପ୍ଟେମ୍ବର ୩୦ ତାରିଖ ୨୦୨୪ ସୁଦ୍ଧା ବିଧାନସଭା ନିର୍ବାଚନ କର।
ନୂଆଦିଲ୍ଲୀ: ଆଜି ଜମ୍ମୁ-କାଶ୍ମୀରରୁ ଅନୁଚ୍ଛେଦ ୩୭୦ ଉଚ୍ଛେଦର ଶୁଣାଣି ବେଳେ ସୁପ୍ରିମକୋର୍ଟର ସାମ୍ବିଧାନିକ ଖଣ୍ଡପୀଠ ଏକ ଐତିହାସିକ ରାୟ ଦେଇଛନ୍ତି। ସୁପ୍ରିମକୋର୍ଟ ଏହା ପୂର୍ବରୁ ସେପ୍ଟେମ୍ବର ୫ ତାରିଖରେ ୧୬ ଦିନ ବିତର୍କ ପରେ ଅନୁଚ୍ଛେଦ ୩୭୦କୁ ସଂରକ୍ଷଣ ରଖିଥିଲେ। ଏହି ନିଷ୍ପତ୍ତି ଭାରତର ପ୍ରଧାନ ବିଚାରପତି ଡି.ଇ ଚନ୍ଦ୍ରଚୂଡ, ଜଷ୍ଟିସ ସଞ୍ଜୟ କିଶନ କୌଲ, ଜଷ୍ଟିସ ସଞ୍ଜୀବ ଖାନ୍ନା, ବି.ଆର ଗଭଇ ଏବଂ ଜଷ୍ଟିସ ସୂର୍ଯ୍ୟ କାନ୍ତଙ୍କ ପାଞ୍ଚ ଜଣିଆ ସମ୍ବିଧାନ ବେଞ୍ଚ ଦେଇଛନ୍ତି।
କୋର୍ଟରେ ଆଟର୍ଣ୍ଣି ଜେନେରାଲ ଆର ଭେଙ୍କଟରାମଣି, ସଲିସିଟର ଜେନେରାଲ ତୁଷାର ମେହେତା, ବରିଷ୍ଠ ଓକିଲ ହରିଶ ସାଲଭେ, ରାକେଶ ଦ୍ୱିବେଦୀ, ଭି ଗିରି ଏବଂ ଅନ୍ୟମାନେ ଅନୁଚ୍ଛେଦ ୩୭୦ ରଦ୍ଦ କରିବାର କେନ୍ଦ୍ର ସରକାରଙ୍କ ନିଷ୍ପତ୍ତିକୁ ସମର୍ଥନ କରିଛନ୍ତି। ଏଥି ସହ କପିଲ ସିବଲ, ଗୋପାଳ ସୁବ୍ରମଣ୍ୟମ, ରାଜୀବ ଧାୱନ, ଜାଫର ଶାହା, ଦୁଷ୍ୟନ୍ତ ଦବେ ଏବଂ ଅନ୍ୟ ବରିଷ୍ଠ ଓକିଲମାନେ ଆବେଦନକାରୀଙ୍କ ପକ୍ଷରୁ ସେମାନଙ୍କ ଯୁକ୍ତି ଉପସ୍ଥାପନ କରିଥିଲେ।
କୋର୍ଟ କ’ଣ କହିଛନ୍ତି?:
ମୁଖ୍ୟ ପ୍ରଶ୍ନ ଉପରେ ସିଜେଆଇ କହିଛନ୍ତି ଯେ, ସେହି ସମୟ ମଧ୍ୟରେ ରାଜ୍ୟରେ ଲାଗୁ ହୋଇଥିବା ରାଷ୍ଟ୍ରପତିଙ୍କ ନିୟମ ଉପରେ ଆମେ କୌଣସି ନିଷ୍ପତ୍ତି ନେଇ ନାହୁଁ। ପରିସ୍ଥିତି ଅନୁଯାୟୀ ରାଷ୍ଟ୍ରପତିଙ୍କ ନିୟମ ଲାଗୁ କରାଯାଇପାରେ। ଧାରା ୩୫୬ ଅନୁଯାୟୀ ରାଷ୍ଟ୍ରପତିଙ୍କ କ୍ଷମତା ଅଛି। ଏହାକୁ ଚ୍ୟାଲେଞ୍ଜ କରାଯାଇପାରିବ ନାହିଁ, ସାମ୍ବିଧାନିକ ସ୍ଥିତି ହେଉଛି ଯେ ସେମାନଙ୍କୁ ଉପଯୁକ୍ତ ଭାବରେ ବ୍ୟବହାର କରାଯିବା ଉଚିତ୍। ରାଷ୍ଟ୍ରପତିଙ୍କ ଶାସନ କାଳରେ ରାଜ୍ୟ ସରକାରଙ୍କ ସ୍ଥାନରେ କେନ୍ଦ୍ର ନିଷ୍ପତ୍ତି ନେଇପାରେ। ରାଜ୍ୟ ବିଧାନସଭା ସ୍ଥାନରେ ସଂସଦ କାର୍ଯ୍ୟ କରିପାରିବ।
କୋର୍ଟ କହିଛନ୍ତି ଯେ, ଯେତେବେଳେ ରାଜ ହରି ସିଂ ଭାରତ ସହିତ ମିଶ୍ରଣ ଚୁକ୍ତି ସ୍ୱାକ୍ଷର କଲେ, ସେତେବେଳେ ଜମ୍ମୁ କାଶ୍ମୀରର ସାର୍ବଭୌମତ୍ଵ ସେଶ ହୋଇଯାଇଥିଲା। ଏହା ଭାରତ ଅଧୀନରେ ହେଲା। ଏଥିରୁ ସ୍ପଷ୍ଟ ଯେ ଜମ୍ମୁ କାଶ୍ମୀର ହେଉଛି ଭାରତର ଏକ ଅବିଚ୍ଛେଦ୍ୟ ଅଙ୍ଗ। ଜମ୍ମୁ କାଶ୍ମୀରର ସମ୍ବିଧାନଠାରୁ ଉଚ୍ଚରେ ଭାରତର ସମ୍ବିଧାନ ଅଟେ।
ନୂଆଦିଲ୍ଲୀ: ଉତ୍ତର ରେଳବାଇ (NR) ଦ୍ୱାରା ଏକ ନିଯୁକ୍ତି ବିଜ୍ଞପ୍ତି ଜାରି କରାଯାଇଛି। ଯାହା ଅନୁଯାୟୀ ରେଳବାଇରେ ଆପ୍ରେଣ୍ଟିସ୍ ପୋଷ୍ଟଗୁଡିକ ବହୁ ପରିମାଣରେ ପୂରଣ ହେବ। ଏହି ନିଯୁକ୍ତି ଅଭିଯାନ ପାଇଁ ଆବେଦନ ପ୍ରକ୍ରିୟା ଆରମ୍ଭ ହେବାକୁ ଯାଉଛି। ଯେଉଁଥି ପାଇଁ ଆଗ୍ରହୀ ଏବଂ ଯୋଗ୍ୟ ପ୍ରାର୍ଥୀମାନେ ଅଫିସିଆଲ୍ ସାଇଟ୍ rrcnr.org ପରିଦର୍ଶନ କରି ଆବେଦନ କରିପାରିବେ। ଏହି ଅଭିଯାନ ପାଇଁ ଆବେଦନ କରିବାକୁ ପ୍ରାର୍ଥୀମାନେ ଏଠାରେ ଦିଆଯାଇଥିବା ପଦକ୍ଷେପଗୁଡିକ ଅନୁସରଣ କରିପାରିବେ।
ବିଜ୍ଞପ୍ତି ଅନୁଯାୟୀ ଏହି ନିଯୁକ୍ତି ଅଭିଯାନ ମାଧ୍ୟମରେ ରେଳବାଇରେ ମୋଟ 3,093 ଟି ପଦବୀ ପୂରଣ ହେବ। ଯେଉଁଥି ପାଇଁ ଆବେଦନକାରୀ ପ୍ରାର୍ଥୀ ନିଶ୍ଚିତ ଭାବରେ ଦଶମ, ଦ୍ୱାଦଶ ପାସ୍ କରିବା ଆବଶ୍ୟକ। ଏହା ବ୍ୟତୀତ ପ୍ରାର୍ଥୀଙ୍କର ITI ପାସ୍ କରିବାର ପ୍ରମାଣପତ୍ର ମଧ୍ୟ ରହିବା ଉଚିତ୍।
ବୟସ ସୀମା:
ଏହି ନିଯୁକ୍ତି ଅଭିଯାନ ପାଇଁ ଆବେଦନ କରୁଥିବା ପ୍ରାର୍ଥୀଙ୍କ ବୟସ 15 ବର୍ଷରୁ 24 ବର୍ଷ ମଧ୍ୟରେ ହେବା ଉଚିତ୍।
ଆବେଦନ ଶୁଳ୍କ:
ନିଯୁକ୍ତି ପାଇଁ ଆବେଦନ କରୁଥିବା ପ୍ରାର୍ଥୀଙ୍କୁ ଆବେଦନ ଶୁଳ୍କ ଦେବାକୁ ପଡିବ। ଆବେଦନ ପାଇଁ ଆବେଦନ ଶୁଳ୍କ 100 ଟଙ୍କା ରଖାଯାଇଛି। ଯେଉଁଠାରେ ଏସସି, ଏସଟି, ପିଡବ୍ଲ୍ୟୁଡି ଏବଂ ମହିଳା ବର୍ଗର ପ୍ରାର୍ଥୀମାନେ ଦେୟ ପ୍ରଦାନରୁ ବଞ୍ଚିତ ହୋଇଛନ୍ତି।
ଚୟନ ପ୍ରକ୍ରିୟା:
ଏହି ପଦବୀ ପାଇଁ ପ୍ରାର୍ଥୀମାନେ ଯୋଗ୍ୟତା ଆଧାରରେ ଚୟନ କରାଯିବ। ଅଧିକ ସୂଚନା ପାଇଁ ପ୍ରାର୍ଥୀମାନେ ଅଫିସିଆଲ୍ ୱେବସାଇଟ୍ ର ସାହାଯ୍ୟ ନେଇପାରିବେ।
କିପରି ଆବେଦନ କରିବେ?:
1: ଆବେଦନ କରିବାକୁ, ପ୍ରାର୍ଥୀମାନେ ପ୍ରଥମେ ଅଫିସିଆଲ୍ ୱେବସାଇଟ୍ rrcnr.org କୁ ଯାଅନ୍ତୁ।
2: ଏହା ପରେ ପ୍ରାର୍ଥୀମାନେ ମୂଳପୃଷ୍ଠାରେ ଥିବା ଅନଲାଇନ୍ ଆବେଦନ ଲିଙ୍କରେ କ୍ଲିକ୍ କରନ୍ତୁ।
3: ତା’ପରେ ପ୍ରାର୍ଥୀଙ୍କ ସାମ୍ନାରେ ଏକ ଲିଙ୍କ୍ ଖୋଲିବ, ଯେଉଁଥିରେ ପ୍ରାର୍ଥୀ ପଞ୍ଜୀକୃତ ହୋଇପାରିବେ।
4: ପଞ୍ଜୀକରଣ ପରେ, ପ୍ରାର୍ଥୀମାନେ ଲଗଇନ୍ କରନ୍ତୁ ଏବଂ ଆବେଦନ ଫର୍ମ ପୂରଣ କରନ୍ତୁ।
5: ଫର୍ମ ପୂରଣ କରିବା ପରେ ପ୍ରାର୍ଥୀମାନେ ଆବେଦନ ଶୁଳ୍କ ଦେବା ଉଚିତ୍।
6: ତା’ପରେ ପ୍ରାର୍ଥୀମାନେ ଆବେଦନ ଫର୍ମ ଦାଖଲ କରନ୍ତୁ।
7: ବର୍ତ୍ତମାନ ପ୍ରାର୍ଥୀମାନେ ଆବେଦନ ଫର୍ମ ଡାଉନଲୋଡ୍ କରନ୍ତୁ।
8: ଶେଷରେ, ପ୍ରାର୍ଥୀମାନେ ଆବେଦନ ଫର୍ମରୁ ଏକ ପ୍ରିଣ୍ଟ୍ ବାହାର କରିନିଅନ୍ତୁ।
ନୂଆଦିଲ୍ଲୀ: ଭାରତ ବର୍ତ୍ତମାନ ସ୍ୱଦେଶୀ LCA ମାର୍କ 1 ଏ ତେଜସ୍ ମାଧ୍ୟମରେ ପାକିସ୍ତାନର ଚିନ୍ତା ବୃଦ୍ଧି କରିବାକୁ ଯାଉଛି। ଏହା ରାଜସ୍ଥାନର ବିକାନେରର ନାଲ ଏୟାର ବେସରେ ନିୟୋଜିତ ହେବ। 2024 ର ଆରମ୍ଭରେ ଭାରତୀୟ ବାୟୁସେନାରେ ସ୍ୱଦେଶୀ ମାର୍କ 1 ଏ ସାମିଲ ହେବ। ଅନ୍ୟପକ୍ଷରେ ଅବାବିଲ ଏବଂ ଶାହିନ୍ ଭଳି ବାଲିଷ୍ଟିକ୍ କ୍ଷେପଣାସ୍ତ୍ର ନାମରେ ପରମାଣୁ ଧମକ ଦେଉଥିବା ପାକିସ୍ତାନର ଏବେ ଟେନସନ ବୃଦ୍ଧି ପାଇବ। ସମ୍ପ୍ରତି ପାକିସ୍ତାନ ଏହାର ବାଲିଷ୍ଟିକ୍ କ୍ଷେପଣାସ୍ତ୍ର ଏସିଆ ଅବାବିଲ୍ ପରୀକ୍ଷା କରିଛି, ଯାହାର ଉଦ୍ଦେଶ୍ୟ ହେଉଛି ଭାରତୀୟ S-400 କ୍ଷେପଣାସ୍ତ୍ର ପ୍ରତିରକ୍ଷାକୁ ପ୍ରତିହତ କରିବା।
2024 ମସିହାରେ, ଭାରତୀୟ ବାୟୁସେନାରେ 83 ଟି LCA MK1A ତେଜସ ରହିବ, ଯାହାର ଚୁକ୍ତି 2021 ମସିହାରେ 6 ବିଲିୟନ ଡ଼ଲାରରେ ସ୍ୱାକ୍ଷରିତ ହୋଇଥିଲା। ଏହା ହିନ୍ଦୁସ୍ତାନ ଏରୋନେଟିକ୍ସ ଲିମିଟେଡ୍ (HAL) ଦ୍ୱାରା ଉତ୍ପାଦିତ ହେଉଛି ଏବଂ ବର୍ତ୍ତମାନ ଆହୁରି 97 ଟି LCA MK1A ତେଜସ କ୍ରୟ ଉପରେ ମଧ୍ୟ ବିଚାର କରାଯାଉଛି। ପାକିସ୍ତାନ ସୀମାରେ ବୃଦ୍ଧି ପାଉଥିବା କାର୍ଯ୍ୟକଳାପ ଯୋଗୁଁ ଭାରତ ଏହାର ଉପଯୁକ୍ତ ଜବାବ ଦେବାକୁ ସୀମାରେ ଏକରୁ ଅଧିକ କ୍ଷେପଣାସ୍ତ୍ର ନିୟୋଜିତ କରିବାକୁ ନିଷ୍ପତ୍ତି ନେଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ବେଙ୍ଗାଲୁରୁରେ LCA MK1A ତେଜସ୍ ଉଡାଇଛନ୍ତି। ପ୍ରଧାନମନ୍ତ୍ରୀ ମୋଦୀ ମଧ୍ୟ ଏହାକୁ ବହୁତ ପ୍ରଶଂସା କରିଥିଲେ। ବାୟୁସେନାରେ ଅନ୍ତର୍ଭୁକ୍ତ ତେଜସର ଏହା ହେଉଛି ଉନ୍ନତ ସଂସ୍କରଣ।
ପାକିସ୍ତାନର କ୍ଷେପଣାସ୍ତ୍ର କାର୍ଯ୍ୟକ୍ରମ କ’ଣ?:
ପାକିସ୍ତାନ ଯେଉଁଭଳି ସ୍ଥିତିରେ ଗତି କରୁଛି, ତଥାପି ଅସ୍ତ୍ରଶସ୍ତ୍ର ତିଆରିରେ ବ୍ୟସ୍ତ ରହିଛି। ଯେଉଁଠାରେ ମୁଦ୍ରାସ୍ଫୀତି ଆକାଶଛୁଆଁ ହେଉଛି ଏବଂ ଲୋକମାନେ ପ୍ରତ୍ୟେକ ପଇସା ଆବଶ୍ୟକ କରୁଛନ୍ତି, ପାକିସ୍ତାନର ସ୍ଥିତି ପ୍ରତି ଧ୍ୟାନ ଦେବା ପରିବର୍ତ୍ତେ ଅସ୍ତ୍ରଶସ୍ତ୍ରରେ ଟଙ୍କା ଖର୍ଚ୍ଚ କରିବାରେ ବ୍ୟସ୍ତ ଅଛି। ଗତ ଏକ ବର୍ଷ ମଧ୍ୟରେ ଏହା ଅନେକ କ୍ଷେପଣାସ୍ତ୍ରର ପରୀକ୍ଷଣ କରିଛି, ଯାହାର ଉଦ୍ଦେଶ୍ୟ ହେଉଛି ଭାରତର ସାମରିକ ଶକ୍ତିକୁ ଭେଦ କରିବା। ଏହି ଉଦ୍ଦେଶ୍ୟ ପାଇଁ ଅକ୍ଟୋବର 18 ତାରିଖରେ, ପାକିସ୍ତାନ ଏହାର ମଧ୍ୟମ ସୀମା ବାଲିଷ୍ଟିକ୍ କ୍ଷେପଣାସ୍ତ୍ର ଅବାବିଲର ଦ୍ୱିତୀୟ ପରୀକ୍ଷଣ କରିଥିଲା। ଏହାର ଉଦ୍ଦେଶ୍ୟ ହେଉଛି ଭାରତର S-400 ପ୍ରତିରକ୍ଷାକୁ ପ୍ରତିହତ କରିବା।
ନୂଆଦିଲ୍ଲୀ: ନମାଜକୁ ନେଇ ରାଜ୍ୟସଭାରେ ଏକ ବଡ଼ ନିଷ୍ପତ୍ତି ନିଆଯାଇଛି। ସଂସଦ ଅଧିବେଶନ ସମୟରେ ପ୍ରତି ଶୁକ୍ରବାର ଏଥିପାଇଁ ଅଧା ଘଣ୍ଟାର ବିରତିକୁ ଉଚ୍ଛେଦ କରାଯାଇଛି। ରାଜ୍ୟସଭା ଅଧ୍ୟକ୍ଷ ତଥା ଉପାଧ୍ୟକ୍ଷ ଜଗଦୀପ ଧନଖର ଏହି ରାୟ ଦେଇଛନ୍ତି। ଏହା ସହ ଜଡ଼ିତ ନିୟମରେ ପରିବର୍ତ୍ତନ କରିବାକୁ ମଧ୍ୟ ସେ ନିର୍ଦ୍ଦେଶ ଦେଇଛନ୍ତି। ବର୍ତ୍ତମାନ ପର୍ଯ୍ୟନ୍ତ ରାଜ୍ୟସଭାରେ ମଧ୍ୟାହ୍ନ ଭୋଜନ ବିରତି ପ୍ରତି ଶୁକ୍ରବାର ଅପରାହ୍ନ ୧ଟାରୁ ୨ଟା ୩୦ ପର୍ଯ୍ୟନ୍ତ ଥିଲା। ସେହିପରି ଲୋକସଭାରେ ମଧ୍ୟାହ୍ନ ଭୋଜନ ବିରତି ଅପରାହ୍ନ ୧ଟାରୁ ୨ଟା ପର୍ଯ୍ୟନ୍ତ ରହିଛି। ରାଜ୍ୟସଭାରେ ନମାଜ ପାଇଁ ଏହି ଅତିରିକ୍ତ ଅଧ ଘଣ୍ଟା ସମୟ ଦିଆଯାଉଥିଲା। ଏବେ ନିୟମରେ ପରିବର୍ତ୍ତନ କରି ଅଧ୍ୟକ୍ଷ ଏହାକୁ ଶେଷ କରିଛନ୍ତି।
ପୂରା ମାମଲା ୮ ଡିସେମ୍ବର ୨୦୨୩ ତାରିଖର। ସେତେବେଳେ ରାଜ୍ୟସଭାରେ ଶୂନ୍ୟକାଳ ଥିଲା। ସାଂସଦମାନେ ସେମାନଙ୍କ ପ୍ରଶ୍ନର ଉତ୍ତର ପଚାରୁଥିଲେ। ଏହାପରେ ଡିଏମକେ ସାଂସଦ ତିରୁଚି ଶିବା ହସ୍ତକ୍ଷେପ କରିଥିଲେ। ଏହି ସମୟରେ ରାଜ୍ୟସଭା ଅଧ୍ୟକ୍ଷ ଜୟଦୀପ ଧନଖର ଅଧ୍ୟକ୍ଷତା କରୁଥିଲେ। ତିରୁଚି ଶିବଙ୍କୁ ଅଧ୍ୟକ୍ଷ କହିବାକୁ ଅନୁମତି ଦେଇଥିଲେ। ଶୁକ୍ରବାର ସେ ରାଜ୍ୟସଭା କାର୍ଯ୍ୟର ସମୟସୀମା ସମ୍ପର୍କରେ ଏକ ପ୍ରଶ୍ନ ପଚାରିଥିଲେ।
ଡିଏମକେ ସାଂସଦ କହିଛନ୍ତି ଯେ ସାଧାରଣତଃ ଶୁକ୍ରବାର ମଧ୍ୟାହ୍ନ ଭୋଜନ ବିରତି ପରେ ଗୃହ ଅପରାହ୍ନ ୨.୩୦ରେ ଆରମ୍ଭ ହୋଇଥାଏ। ଏହା ଭିନ୍ନ କଥା ଯେ ସଂଶୋଧିତ କାର୍ଯ୍ୟକ୍ରମ ଅନୁଯାୟୀ ଏହା କେବଳ ୨ଟାରୁ ପୁଣି ଆରମ୍ଭ ହେବ। କେବେ ନିଆଗଲା ଏହି ନିଷ୍ପତ୍ତି? ଗୃହର ସଦସ୍ୟମାନେ ଏ ବିଷୟରେ ଜାଣନ୍ତି ନାହିଁ, କାହିଁକି ଏଭଳି ପରିବର୍ତ୍ତନ ଘଟିଲା?
ଏହାର ଜବାବରେ ଅଧ୍ୟକ୍ଷ କହିଛନ୍ତି ଯେ ଏହି ପରିବର୍ତ୍ତନ ଆଜିଠାରୁ ନୁହେଁ। ପୂର୍ବରୁ ସେ ଏହି ପରିବର୍ତ୍ତନ କରିସାରିଛନ୍ତି। ସେ ଏହାର କାରଣ ମଧ୍ୟ ବର୍ଣ୍ଣନା କରିଥିଲେ। ସେ କହିଛନ୍ତି ଯେ ଲୋକସଭାର କାର୍ଯ୍ୟ ଅପରାହ୍ନ ୨ଟାରୁ ଆରମ୍ଭ ହେବ। ଉଭୟ ଲୋକସଭା ଓ ରାଜ୍ୟସଭା ସଂସଦର ଅଂଶ ବିଶେଷ। ଉଭୟଙ୍କ କାର୍ଯ୍ୟ କାଳରେ ସମାନତା ରହିବା ଦରକାର। ସେଥିପାଇଁ ସେମାନେ ପୂର୍ବରୁ ଏ ନେଇ ନିୟମ ତିଆରି କରିସାରିଥିଲେ।
ଅଧ୍ୟକ୍ଷଙ୍କ ମନ୍ତବ୍ୟକୁ ନେଇ ଡିଏମକେ ମୁସଲମାନ ସାଂସଦ ଏମ ମହମ୍ମଦ ଅବଦୁଲ୍ଲା ଅସନ୍ତୋଷ ବ୍ୟକ୍ତ କରିଛନ୍ତି। ସେ କହିଛନ୍ତି ଯେ ପ୍ରତି ଶୁକ୍ରବାର ମୁସଲମାନ ସଦସ୍ୟମାନେ ନମାଜ ପଢ଼ିବାକୁ ଯାଆନ୍ତି। ତେଣୁ ଏହିଦିନ ଗୃହ ଆରମ୍ଭ ହେବାର ସମୟ ଅପରାହ୍ନ ସାଢ଼େ ୨ଟା ଧାର୍ଯ୍ୟ କରାଯାଇଛି। ଅଧ୍ୟକ୍ଷ ଅବଦୁଲ୍ଲାଙ୍କ କଥା ଶୁଣି ତାଙ୍କୁ ବସିବାକୁ କହିଥିଲେ। ଲୋକସଭା ସହିତ ସମାନତା ଆଣିବା ପାଇଁ ଏକ ବର୍ଷ ତଳେ ଗୃହର ସମୟ ପରିବର୍ତ୍ତନ କରାଯାଇଥିଲା ବୋଲି ସେ ଦୋହରାଇଥିଲେ। ଏଥିରେ କିଛି ନୂଆ ନାହିଁ।
ନୁଆଦିଲ୍ଲୀ: ଆଗାମୀ ଲୋକସଭା ନିର୍ବାଚନକୁ ଦୃଷ୍ଟିରେ ରଖି ଇଣ୍ଡି ମେଣ୍ଟର ଶେଷ ପର୍ଯ୍ୟାୟ ଆଲୋଚନାକୁ ଜୋରଦାର କରାଯାଇପାରେ। ଏହା ପୂର୍ବରୁ କଂଗ୍ରେସ ତା’ର ମେଣ୍ଟ ସହଯୋଗୀ ଦ୍ରାବିଡ ମୁନ୍ନେତ୍ର କଜଗମ (ଡିଏମକେ)କୁ ଭବିଷ୍ୟତରେ ବୟାନବାଜି ପ୍ରତି ସତର୍କ ରହିବାକୁ ପରାମର୍ଶ ଦେଇଛି। ବିଶେଷ କରି ସେହି ବୟାନକୁ ନେଇ ନିକଟରେ ‘ହିନ୍ଦୀ ବେଲ୍ଟ’ ରାଜ୍ୟରେ କଂଗ୍ରେସ ଦଳକୁ ବ୍ୟାପକ ରାଜନୈତିକ କ୍ଷତି ସହିବାକୁ ପଡ଼ିଛି।
ଆସନ୍ତା ବର୍ଷ ପ୍ରଥମାର୍ଦ୍ଧରେ ହେବାକୁ ଥିବା ଲୋକସଭା ନିର୍ବାଚନ ପାଇଁ ସମସ୍ତ ରାଜନୈତିକ ଦଳ ପ୍ରସ୍ତୁତିରେ ବ୍ୟସ୍ତ ଅଛନ୍ତି। ୫ଟି ରାଜ୍ୟର ବିଧାନସଭା ନିର୍ବାଚନ ପରେ ଏବେ ବିରୋଧୀ ଦଳର ‘ଇଣ୍ଡି ମେଣ୍ଟ’ ମଧ୍ୟ ସାଧାରଣ ନିର୍ବାଚନ ପାଇଁ ରଣନୀତି ପ୍ରସ୍ତୁତ କରିବା ଆରମ୍ଭ କରିଛି। ତେବେ ଏହା ପୂର୍ବରୁ ଦିଆଯାଇଥିବା ବୟାନ ଉପରେ ଭବିଷ୍ୟତରେ ଅଧିକ ସତର୍କ ରହିବାକୁ ଡିଏମକେକୁ ପରାମର୍ଶ ଦେଇଛି କଂଗ୍ରେସ।
ହିନ୍ଦୀ ବେଲ୍ଟ ରାଜ୍ୟରେ କଂଗ୍ରେସକୁ ମିଳିଲା ବଡ଼ ପରାଜୟର ସମ୍ମୁଖୀନ
ଏମକେ ଷ୍ଟାଲିନଙ୍କ ଦଳ ଡିଏମକେର ନେତାମାନେ, ଯାହାକି ଇଣ୍ଡି ମେଣ୍ଟର ଅଂଶ ବିଶେଷ ଦକ୍ଷିଣ ଭାରତ ରାଜ୍ୟରେ ଦୃଢ଼ ଦଖଲ ରଖିଛି, ସେମାନେ ଏପରି ଅନେକ ବୟାନ ଦେଇଛନ୍ତି, ଯାହାକୁ ନେଇ କଂଗ୍ରେସ ପ୍ରତିରକ୍ଷାମୂଳକ ମୋଡ଼ରେ ରହି ଆଗକୁ ବଢ଼ିଛି। କଂଗ୍ରେସ ୫ଟି ରାଜ୍ୟରେ ବିଧାନସଭା ନିର୍ବାଚନ ଲଢୁଥିବାବେଳେ ସେମାନଙ୍କ ନେତାଙ୍କଠାରୁ ଏହି ବୟାନ ଆସିଛି। ଫଳରେ କଂଗ୍ରେସକୁ ବଡ଼ ରାଜନୈତିକ କ୍ଷତି ସହିବାକୁ ପଡ଼ିଛି।
ଡିଏମକେର ବୟାନ କଂଗ୍ରେସକୁ ବ୍ୟାକଫୁଟରେ ପକାଇଛି
ରାଜନୈତିକ ବିଶେଷଜ୍ଞଙ୍କ ମତରେ ଡିଏମକେ ନେତା ତଥା ତାମିଲନାଡୁ ସରକାରଙ୍କ ମନ୍ତ୍ରୀ ଉଦୟନ ଧୀସ୍ତାଲନିଙ୍କ ‘ସନାତନ ଧର୍ମ’ ବିଷୟରେ ବୟାନ ନିର୍ବାଚନରେ, ବିଶେଷକରି ହିନ୍ଦୀ ବେଲ୍ଟ ରାଜ୍ୟଗୁଡ଼ିକରେ କଂଗ୍ରେସକୁ ବହୁତ କ୍ଷତି ପହଞ୍ଚାଇଛି।
‘ଇଣ୍ଡି ମେଣ୍ଟ’ର ସହଯୋଗୀ ଦଳ ଡିଏମକେ ସନାତନ ଧର୍ମର ଅନ୍ତ ଘଟାଇବା ପାଇଁ କଂଗ୍ରେସ ନିର୍ବାଚନୀ ରାଲିରେ ଦେଇଥିବା ବୟାନକୁ ନେଇ ବିଜେପି ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କଂଗ୍ରେସ ଉପରେ ବର୍ଷିଛନ୍ତି। ଦେଶରେ ସନାତନ ଧର୍ମ ଓ ହିନ୍ଦୁ ଧର୍ମ ବିରୋଧରେ କ୍ରମାଗତଭାବେ ବିଷ ଉଦଗାରୁ ଥିବା ଏଭଳି ଦଳର ସମର୍ଥକ ଓ ସହଯୋଗୀ ହେବା ପାଇଁ ପ୍ରଧାନମନ୍ତ୍ରୀ ମୋଦୀ ତାଙ୍କ ନିର୍ବାଚନୀ ଭାଷଣରେ କଂଗ୍ରେସ ଉପରେ ଆକ୍ରମଣ କରିଥିଲେ।
ଡିଏମକେ ସାଂସଦଙ୍କ ‘ଗୋମୂତ୍ର ରାଜ୍ୟ’ ମନ୍ତବ୍ୟରେ କଂଗ୍ରେସ ମଧ୍ୟ କ୍ଷତିଗ୍ରସ୍ତ
ହିନ୍ଦୀ ଅଞ୍ଚଳର ୩ଟି ରାଜ୍ୟରେ ପରାଜୟର ଯନ୍ତ୍ରଣା ଭୋଗୁଥିବା କଂଗ୍ରେସର କ୍ଷତକୁ ଡିଏମକେର ଧର୍ମପୁରୀ ଲୋକସଭା ଆସନ ସାଂସଦ ଏସ୍ ସେନ୍ଥିଲ କୁମାର ନିକଟରେ ସଂସଦରେ ଉତ୍ତର ଭାରତକୁ ‘ଗୋମୂତ୍ର ରାଜ୍ୟ’ ବୋଲି ଦେଇଥିବା ବୟାନରେ ହିନ୍ଦୁମାନଙ୍କୁ ଅସମ୍ମାନର ନବୀକରଣ କରିଥିଲେ। ଏ ନେଇ କଂଗ୍ରେସ ପକ୍ଷରୁ କୌଣସି ପ୍ରତିକ୍ରିୟା ମିଳିନଥିବାବେଳେ ତାମିଲନାଡୁ ମୁଖ୍ୟମନ୍ତ୍ରୀ ଏମକେ ଷ୍ଟାଲିନ ସେନ୍ଥିଲ କୁମାରଙ୍କୁ କଡ଼ା ସମାଲୋଚନା କରିଛନ୍ତି। ଏହି ବୟାନ ପାଇଁ ସାଂସଦ ଏକ ବିବୃତି ଜାରି କରି କ୍ଷମା ପ୍ରାର୍ଥନା କରିଛନ୍ତି। ଏହା ପୂର୍ବରୁ ମଧ୍ୟ ଆହୁରି ଅନେକ ବୟାନ ଯୋଗୁଁ କଂଗ୍ରେସକୁ ରାଜନୈତିକ କ୍ଷତି ସହିବାକୁ ପଡ଼ିଛି।
ଏହି ସବୁ ବୟାନକୁ ନେଇ କଂଗ୍ରେସ ଚୁପ୍ ରହିଥିଲା, ଯାହାକୁ ବିଜେପି ନିର୍ବାଚନୀ ଦଙ୍ଗାରେ ଫାଇଦା ଉଠାଇଥିଲା। ମାର୍ଚ୍ଚ ୩ତାରିଖରେ ୪ଟି ରାଜ୍ୟ (ମଧ୍ୟପ୍ରଦେଶ, ରାଜସ୍ଥାନ, ଛତିଶଗଡ଼ ଓ ତେଲେଙ୍ଗାନା)ର ନିର୍ବାଚନ ଫଳାଫଳରୁ ଫଳାଫଳ ସ୍ପଷ୍ଟ ହୋଇଥିଲା।
ତେଲେଙ୍ଗାନାବ୍ୟତୀତ ଅନ୍ୟ ସମସ୍ତ ହିନ୍ଦୀଭାଷୀ ରାଜ୍ୟରେ କଂଗ୍ରେସ ପରାଜୟ ବରଣ କରିଛି। ସବୁଠାରୁ ବଡ଼ କ୍ଷତି ହେଉଛି ରାଜସ୍ଥାନ ଓ ଛତିଶଗଡ଼ରେ, କଂଗ୍ରେସ ଏହି ଦୁଇ ରାଜ୍ୟରେ କ୍ଷମତା ହରାଇଛି।
ନୂଆଦିଲ୍ଲୀ: ନିକଟରେ ବିଧାନସଭା ନିର୍ବାଚନରେ କ୍ଷମତାଚ୍ୟୁତ ହେବାପରେ ବିଆରଏସ ନେତାଙ୍କୁ ହିନ୍ଦୁତ୍ୱ କଥା ମନେ ପଡ଼ିଛି। ତେଲେଙ୍ଗାନାର ପୂର୍ବତନ ମୁଖ୍ୟମନ୍ତ୍ରୀଙ୍କ ଝିଅ ତଥା ଭାରତ ରାଷ୍ଟ୍ର ସମିତିର ନେତା କଲଭାକୁନ୍ତଳା କବିତା ରବିବାର ଅଯୋଧ୍ୟାର ରାମ ମନ୍ଦିରକୁ ପ୍ରଶଂସା କରିଛନ୍ତି। କବିତା କହିଛନ୍ତି ଯେ ଏହି ମନ୍ଦିର ନିର୍ବାଣ ହେବା ପରେ ହିନ୍ଦୁମାନଙ୍କର ବହୁ ଦିନର ସ୍ୱପ୍ନ ସାକାର ହୋଇଛି। ଅଯୋଧ୍ୟାରେ ନିର୍ମାଣାଧୀନ ରାମ ମନ୍ଦିରର ଏକ ଭିଡିଓ ସହ ସେ ଏକ୍ସରେ ଲେଖିଛନ୍ତି, କୋଟି କୋଟି ହିନ୍ଦୁଙ୍କ ସ୍ୱପ୍ନ ସାକାର ହେବା ପାଇଁ ଅଯୋଧ୍ୟାରେ ଶ୍ରୀରାମ ଚନ୍ଦ୍ର ସ୍ୱାମୀଙ୍କ ପ୍ରତିମୂର୍ତ୍ତି ସ୍ଥାପନ ହେବା ଶୁଭ ସମୟରେ ଦେଶ ତେଲେଙ୍ଗାନା ସହିତ ଏହାକୁ ସ୍ୱାଗତ କରୁଛି।
ଯେଉଁ ମନ୍ଦିରରେ ଭଗବାନ ରାମଙ୍କ ମୂର୍ତ୍ତି ରଖାଯିବ ସେହି ମନ୍ଦିରର ଗର୍ଭଗୃହ ଶେଷ ହେବାକୁ ଯାଉଛି । ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟର ସାଧାରଣ ସମ୍ପାଦକ ଚମ୍ପତ ରାୟ ଶନିବାର ଏକ୍ସରେ ଗର୍ଭଗୃହର ଫଟୋ ଶେୟାର କରି କହିଛନ୍ତି, ଭଗବାନ ଶ୍ରୀରାମଲାଲାଙ୍କ ଗର୍ଭଗୃହ ପ୍ରାୟ ପ୍ରସ୍ତୁତ ହୋଇସାରିଛି। ନିକଟରେ ଲାଇଟ ଫିଟିଂ କାମ ମଧ୍ୟ ଶେଷ ହୋଇଛି। ଆପଣଙ୍କ ସହ କିଛି ଫଟୋ ସେୟାର କରୁଛନ୍ତି ବୋଲି ସେ ତାଙ୍କ ପୋଷ୍ଟର କ୍ୟାପସନରେ ଲେଖିଛନ୍ତି।
ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟ ଜାନୁଆରୀ ୨୨ ତାରିଖ ମଧ୍ୟାହ୍ନରେ ରାମଲଲାଙ୍କୁ ମନ୍ଦିରର ଗର୍ଭଗୃହରେ ପ୍ରବେଶ କରାଇବାକୁ ନିଷ୍ପତ୍ତି ନେଇଛି। ରାମ ମନ୍ଦିର ଉଦଘାଟନ ସମାରୋହ ପାଇଁ ଟ୍ରଷ୍ଟ ପକ୍ଷରୁ ସମସ୍ତ ସମ୍ପ୍ରଦାୟର ୪ ହଜାର ସନ୍ଥଙ୍କୁ ନିମନ୍ତ୍ରଣ କରାଯାଇଛି। ଆସନ୍ତା ବର୍ଷ ଅଯୋଧ୍ୟାରେ ମନ୍ଦିର ଉଦଘାଟନ ଉତ୍ସବରେ ମଧ୍ୟ ପ୍ରଧାନମନ୍ତ୍ରୀ ମୋଦୀ ଯୋଗ ଦେବେ।
ଜାନୁଆରୀ ୧୬ତାରିଖରୁ ଅଯୋଧ୍ୟାରେ ରାମଲଲାଙ୍କ ପବିତ୍ର ସମାରୋହ ପାଇଁ ବୈଦିକ ରୀତିନୀତି ଆରମ୍ଭ ହେବ ବୋଲି ଆଶା କରାଯାଉଛି। ଉତ୍ତରପ୍ରଦେଶର ରାମ ମନ୍ଦିରର ବହୁ ପ୍ରତୀକ୍ଷିତ ସମାପନ ସମାରୋହପାଇଁ ହଜାର ହଜାର ଶ୍ରଦ୍ଧାଳୁଙ୍କ ଆଗମନ କୁ ଦୃଷ୍ଟିରେ ରଖି ଅଯୋଧ୍ୟାରେ ଏକାଧିକ ଟେଣ୍ଟ ସିଟି ପ୍ରତିଷ୍ଠା କରାଯାଇଛି।
ନୂଆଦିଲ୍ଲୀ: କର୍ଣ୍ଣାଟକରେ କଂଗ୍ରେସ ସରକାର ପତନ ହୋଇପାରେ ବୋଲି ଜେଡିଏସ ନେତା ଏଚ. ଡି କୁମାରସ୍ୱାମୀ ରବିବାର ଦାବି କରିଛନ୍ତି। କୁମାରସ୍ୱାମୀ କହିଛନ୍ତି ଯେ ୫୦ରୁ ୬୦ ବିଧାୟକଙ୍କ ସମର୍ଥନ ଥିବା କଂଗ୍ରେସ ସରକାରରେ ଜଣେ ପ୍ରଭାବଶାଳୀ ମନ୍ତ୍ରୀ କଂଗ୍ରେସ ଦଳ ଛାଡ଼ି ବିଜେପିରେ ଯୋଗ ଦେଇପାରନ୍ତି। ଏଥିପାଇଁ ବିଜେପି ନେତାଙ୍କ ସହ ଆଲୋଚନା ଚାଲିଛି।
କର୍ଣ୍ଣାଟକରେ ହୋଇପାରେ ମହାରାଷ୍ଟ୍ର ଭଳି ସ୍ଥିତି
କର୍ଣ୍ଣାଟକରେ ଯେକୌଣସି ସମୟରେ ମହାରାଷ୍ଟ୍ର ଭଳି କିଛି ହୋଇପାରେ ବୋଲି ଜନତା ଦଳ ସେକ୍ୟୁଲାର (ଜେଡିଏସ୍) ରାଜ୍ୟ ସଭାପତି ପୂର୍ବାନୁମାନ କରିଛନ୍ତି। ବର୍ତ୍ତମାନର ରାଜନୈତିକ ବାତାବରଣକୁ ଦେଖିଲେ କିଛି ବି ହୋଇପାରେ।
କର୍ଣ୍ଣାଟକ କଂଗ୍ରେସରେ ସବୁକିଛି ଠିକ ଠାକ ନାହିଁ
ସାମ୍ବାଦିକମାନଙ୍କ ସହ କଥାବାର୍ତ୍ତା କରି ଜେଡିଏସ ନେତା କହିଛନ୍ତି ଯେ କର୍ଣ୍ଣାଟକରେ କଂଗ୍ରେସ ସରକାରରେ ସବୁକିଛି ଠିକ ନାହିଁ। ଏହି ସରକାର କେବେ ଭାଙ୍ଗିବ ମୁଁ ଜାଣେ ନାହିଁ। ଜଣେ ପ୍ରଭାବଶାଳୀ ମନ୍ତ୍ରୀ ତାଙ୍କ ବିରୋଧରେ ମାମଲାରୁ ବର୍ତ୍ତିବା ପାଇଁ ଅଣ୍ଟା ଭିଡ଼ିଛନ୍ତି। କୁମାରସ୍ୱାମୀ କହିଛନ୍ତି ଯେ କେନ୍ଦ୍ର ତାଙ୍କ ବିରୋଧରେ ମାମଲା ରୁଜୁ କରିଛି ଯେଉଁଥିରେ ଖସିଯିବାର କୌଣସି ସମ୍ଭାବନା ନାହିଁ।
ନେତାଙ୍କ ନାମ ପଚାରିବାରୁ କୁମାରସ୍ୱାମୀ କହିଛନ୍ତି ଯେ, ଛୋଟ ନେତାଙ୍କଠାରୁ ଏଭଳି ପଦକ୍ଷେପ ଆଶା କରାଯାଇପାରିବ ନାହିଁ। କେବଳ ପ୍ରଭାବଶାଳୀ ବ୍ୟକ୍ତି ହିଁ ଏଭଳି କାର୍ଯ୍ୟ କରିପାରିବେ।
ନୂଆଦିଲ୍ଲୀ: ମୁଦ୍ରାସ୍ଫୀତି ଯେପରି ଏବେ ଖାଦ୍ୟଶସ୍ୟ ଉପରେ ନ ପଡ଼ିବ ସେଥିପାଇଁ ସରକାର ସତର୍କ ଅଛନ୍ତି। ଅଟା ଦରକୁ ନିୟନ୍ତ୍ରଣରେ ରଖିବା ପାଇଁ ଉପଭୋକ୍ତା ବ୍ୟାପାର, ଖାଦ୍ୟ ଓ ସାଧାରଣ ବଣ୍ଟନ ମନ୍ତ୍ରାଳୟ ସୁଲଭ ଭାରତ ଅଟା ଯୋଗାଣ ବୃଦ୍ଧି କରିବାକୁ ପ୍ରସ୍ତୁତ ହୋଇଛି।
ଏଥିସହିତ ବଫର ଷ୍ଟକକୁ ସୁଦୃଢ଼ କରିବା ପାଇଁ ସରକାର ଉତ୍ତରପ୍ରଦେଶ, ରାଜସ୍ଥାନ ଓ ବିହାରରେ ଗହମ କ୍ରୟ କେନ୍ଦ୍ର ବୃଦ୍ଧି କରିବାକୁ ଯାଉଛନ୍ତି। ନିକଟରେ ଅନୁଷ୍ଠିତ ମନ୍ତ୍ରୀ କମିଟି ବୈଠକରେ ଏ ସଂକ୍ରାନ୍ତରେ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି। ବଡ଼ ଚେନ ରିଟେଲର ଏବଂ ଇ-କମର୍ସ ପ୍ଲାଟଫର୍ମ ମାଧ୍ୟମରେ ନାଫେଡ ଏବଂ ଏନସିସିଏଫ ଦ୍ୱାରା କିଲୋ ପିଛା ୨୭.୫୦ ଟଙ୍କାରେ ବିକ୍ରି ହେଉଥିବା ଭାରତ ଅଟାର ଯୋଗାଣ ବୃଦ୍ଧି କରିବାକୁ ସରକାର ଯୋଜନା କରିଛନ୍ତି।
ବଫର ଷ୍ଟକକୁ ସନ୍ତୁଳନ କରିବାକୁ ଚାହୁଁଛି ମନ୍ତ୍ରାଳୟ
ସରକାରୀ ବ୍ରାଣ୍ଡର ଏହି ଅଟା ଯୋଗାଣ ସତ୍ତ୍ୱେ ବଜାରରେ ଅଟା ଦର ବଢ଼ୁନଥିବାରୁ ଏଥିପାଇଁ ଖୋଲା ବଜାର ଉପରେ ମଧ୍ୟ ସରକାରଙ୍କ ନଜର ରହିଛି। ବର୍ତ୍ତମାନ ବଫର ଷ୍ଟକରୁ ବାହାର କରି ଓପନ ମାର୍କେଟ ସେଲ ସ୍କିମ (ଘରୋଇ) ଅଧୀନରେ ବିକ୍ରି ହେଉଥିବା ୩ ଲକ୍ଷ ମେଟ୍ରିକ ଟନ ଗହମର ପରିମାଣ ମଧ୍ୟ ବୃଦ୍ଧି କରାଯିବ ବୋଲି ନିଷ୍ପତ୍ତି ହୋଇଛି। ୨୦୨୩ ଡିସେମ୍ବର ୨୦ରୁ ସପ୍ତାହକୁ ୪ ଲକ୍ଷ ମେଟ୍ରିକ ଟନ ବିକ୍ରି ଲକ୍ଷ୍ୟ ରଖାଯାଇଛି। ଏହି ବିକ୍ରି ବଢ଼ାଇବା ସହ ମନ୍ତ୍ରାଳୟ ଏହାର ବଫର ଷ୍ଟକ୍କୁ ସନ୍ତୁଳିତ କରିବାକୁ ଚାହୁଁଛି।
ପ୍ରଚାର ଦାୟିତ୍ୱ ଏଫସିଆଇକୁ ଦିଆଯାଇଛି
ଏହି ସନ୍ତୁଳନକୁ ଦୃଷ୍ଟିରେ ରଖି ଭାରତୀୟ ଖାଦ୍ୟ ନିଗମ, ନାଫେଡ ଏବଂ ଏନସିସିଏଫ ଦ୍ୱାରା ଗହମ ଉତ୍ପାଦନକାରୀ ରାଜ୍ୟ ଉତ୍ତରପ୍ରଦେଶ, ରାଜସ୍ଥାନ ଏବଂ ବିହାରରେ ଚାଷୀଙ୍କଠାରୁ ସର୍ବନିମ୍ନ ସହାୟକ ମୂଲ୍ୟରେ ଗହମ କିଣିବା ପାଇଁ କ୍ରୟ କେନ୍ଦ୍ର ସଂଖ୍ୟା ବୃଦ୍ଧି କରାଯିବ ବୋଲି ନିଷ୍ପତ୍ତି ନିଆଯାଇଛି। ୨୦୨୪ ଫେବ୍ରୁଆରି ୧୫ତାରିଖରୁ ଧାନ କିଣା ଆରମ୍ଭ କରିବାକୁ ଲକ୍ଷ୍ୟ ରଖାଯାଇଛି। କୃଷକମାନଙ୍କ ମଧ୍ୟରେ ଏହାର ପର୍ଯ୍ୟାପ୍ତ ପ୍ରଚାର ପାଇଁ ଏଫସିଆଇକୁ ଦାୟିତ୍ୱ ଦିଆଯାଇଛି।
ନୂଆଦିଲ୍ଲୀ: ଡିସେମ୍ବର ୧୯ତାରିଖରେ ଦିଲ୍ଲୀରେ ହେବାକୁ ଥିବା ବିରୋଧୀ ଇଣ୍ଡି ମେଣ୍ଟର ପରବର୍ତ୍ତୀ ବୈଠକ ହେବ। ବୈଠକରେ ମୁଖ୍ୟ ଏଜେଣ୍ଡା ପ୍ରସ୍ତୁତ କରିବା, ଆସନ ବଣ୍ଟନ ଓ ମିଳିତ ରାଲି ଆୟୋଜନ ଉପରେ ଆଲୋଚନା ହେବାର ସମ୍ଭାବନା ରହିଛି। କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ ରବିବାର ‘ଏକ୍ସ’ରେ ଏକ ପୋଷ୍ଟରେ କହିଛନ୍ତି, ବିରୋଧୀ ଦଳ ଇଣ୍ଡି ମେଣ୍ଟର ନେତାମାନଙ୍କର ଚତୁର୍ଥ ବୈଠକ ୧୯ ଡିସେମ୍ବର ୨୦୨୩ ମଙ୍ଗଳବାର ଅପରାହ୍ନ ୩ଟାରେ ନୂଆଦିଲ୍ଲୀରେ ଅନୁଷ୍ଠିତ ହେବ। ନିକଟରେ ଶେଷ ହୋଇଥିବା ବିଧାନସଭା ନିର୍ବାଚନରେ କଂଗ୍ରେସର ଖରାପ ପ୍ରଦର୍ଶନ ପରେ ଏହି ବୈଠକ ଅନୁଷ୍ଠିତ ହେଉଛି। ରାଜସ୍ଥାନ, ଛତିଶଗଡ଼ ଓ ମଧ୍ୟପ୍ରଦେଶରେ କଂଗ୍ରେସକୁ ପରାଜୟର ସମ୍ମୁଖୀନ ହେବାକୁ ପଡ଼ିଛି। ଅପରପକ୍ଷରେ ଭାରତୀୟ ଜନତା ପାର୍ଟି (ବିଜେପି) କହିଛି ଯେ ଲୋକମାନେ ‘ମୋଦୀଙ୍କ ଗ୍ୟାରେଣ୍ଟି’ ଉପରେ ଆସ୍ଥା ପ୍ରକଟ କରିଛନ୍ତି ଏବଂ ୨୦୨୪ରେ ଲୋକମାନେ ପୁଣିଥରେ ତାଙ୍କ ସରକାରକୁ ନିର୍ବାଚିତ କରିବେ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟକ୍କର ଦେବା ପାଇଁ ଏକତା ବଜାୟ ରଖି ବିରୋଧୀ ଦଳଗୁଡ଼ିକ ‘ମୁଁ ନୁହେଁ, ଆମେ’ ସ୍ଲୋଗାନ ଦେଇ ଆଗକୁ ବଢ଼ିବାକୁ ଚାହୁଁଛୁ ବୋଲି କଂଗ୍ରେସର ଜଣେ ବରିଷ୍ଠ ନେତା କହିଛନ୍ତି। ଆଗାମୀ ସାଧାରଣ ନିର୍ବାଚନରେ ବିଜେପିକୁ ଟକ୍କର ଦେବା ପାଇଁ ବିକଳ୍ପ ସକାରାତ୍ମକ ଏଜେଣ୍ଡା ପ୍ରସ୍ତୁତ କରିବା ଏବେ ବିରୋଧୀଦଳମାନଙ୍କ ଆଗରେ ଚ୍ୟାଲେଞ୍ଜ ବୋଲି ସେ କହିଛନ୍ତି। ନିର୍ବାଚନ ଫଳାଫଳ ଏହି ପ୍ରଚାରରେ ଉଠାଯାଇଥିବା ପ୍ରସଙ୍ଗକୁ ପ୍ରତ୍ୟାଖ୍ୟାନ କରିବା ନୁହେଁ। ତେବେ ୨୦୨୪ରେ ବିଜେପିକୁ ଟକ୍କର ଦେବା ପାଇଁ ଦଳ ଚିନ୍ତା କରିବ ବୋଲି ସେ ସ୍ୱୀକାର କରିଛନ୍ତି। ମୋଦୀଙ୍କୁ ଟକ୍କର ଦେବା ପାଇଁ ବିରୋଧୀଦଳମାନେ ଯେଉଁ ସମ୍ଭାବ୍ୟ ସ୍ଲୋଗାନ ଉପରେ କାମ କରିବେ, ସେଥିମଧ୍ୟରୁ ‘ମୁଁ ନୁହେଁ ଆମେ’ ଅନ୍ୟତମ ବୋଲି ସେ କହିଛନ୍ତି।
ବିରୋଧୀ ଦଳମାନଙ୍କ ପାଇଁ ସବୁଠାରୁ ବଡ଼ ଚ୍ୟାଲେଞ୍ଜ ହେଉଛି ଇଣ୍ଡି ମେଣ୍ଟ ପାଇଁ ମୁଖ୍ୟ ସକାରାତ୍ମକ ଏଜେଣ୍ଡା ପ୍ରସ୍ତୁତ କରିବା, ଯାହା ସେମାନଙ୍କୁ ବିଜେପିକୁ ଟକ୍କର ଦେବାରେ ସହାୟକ ହେବ ବୋଲି ଦଳୀୟ ନେତା କହିଛନ୍ତି। ଏହି ବୈଠକରେ ବିରୋଧୀ ଦଳମାନେ ଆସନ ବୁଝାମଣା, ମିଳିତ ନିର୍ବାଚନୀ ରାଲି କରିବା ସହ ସେମାନଙ୍କ ପାଇଁ ଏକ ସାଧାରଣ କାର୍ଯ୍ୟକ୍ରମ ପ୍ରସ୍ତୁତ କରିବେ।
ସୂତ୍ରରୁ ପ୍ରକାଶ ଯେ ଇଣ୍ଡି ମେଣ୍ଟ ଜାତିଭିତ୍ତିକ ଗଣନା, ସର୍ବନିମ୍ନ ସହାୟକ ମୂଲ୍ୟ (ଏମଏସପି)ର ଆଇନଗତ ଗ୍ୟାରେଣ୍ଟି ଏବଂ ଶ୍ରମିକମାନଙ୍କ ପାଇଁ ସାମାଜିକ ନିରାପତ୍ତା ପ୍ରସଙ୍ଗ ଉପରେ ଗୁରୁତ୍ୱ ଦେଇପାରେ। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସ ସୁପ୍ରିମୋ ମମତା ବାନାର୍ଜୀ ଡିସେମ୍ବର ୧୭ରୁ ୧୯ ତାରିଖ ପର୍ଯ୍ୟନ୍ତ ଜାତୀୟ ରାଜଧାନୀରେ ରହିବେ ଏବଂ ଏହି ବୈଠକରେ ଯୋଗ ଦେବାର ସମ୍ଭାବନା ରହିଛି। ଅନ୍ୟ ବରିଷ୍ଠ ନେତାଙ୍କ ଉପସ୍ଥିତି ସୁନିଶ୍ଚିତ କରିବା ପାଇଁ କାମ ଚାଲିଛି ବୋଲି ସୂତ୍ରରୁ ପ୍ରକାଶ।