ଭୁବନେଶ୍ୱର: ରବିନ୍ଦ୍ର ମଣ୍ଡପରେ ଚାଲିଥିବା ଗୁରୁ କେଳୁ ଚରଣ ମହାପାତ୍ର ପୁରସ୍କାର ଉତ୍ସବର ଚତୁର୍ଥ ସଂଧ୍ୟା ବେଶ ଆକର୍ଷଣୀୟ ଥିଲା। ବହୁମୁଖୀ ତଥା ପ୍ରତିଭାଶାଳୀ କର୍ଣ୍ଣାଟକୀ କଣ୍ଠ ସଙ୍ଗୀତଜ୍ଞ ଗାୟକ ସିକ୍କିଲ ଗୁରୁଚରଣଙ୍କ କର୍ଣ୍ଣାଟକୀ ସଙ୍ଗୀତରୁ ଏହି ସଂଧ୍ୟାର ପ୍ରଥମ କାର୍ଯ୍ୟକ୍ରମ ଆରମ୍ଭ ହୋଇଥିଲା।
ତାଙ୍କର ପ୍ରଥମ ପ୍ରସ୍ତୁତିରେ ଥିଲା ରାଗ ମାଳେଶ୍ୱରସ ପରେ ପରେ ରାଗ ଗଙ୍ଗାଭୁଶଣ ସଂଗୀତ ପରିବେଷଣ କରିଥିଲେ। ତାଙ୍କ ସହ ବେହେଲାରେ ଶ୍ରୀଭିସଞ୍ଜୀବ ଏବଂ ମୃଦଙ୍ଗମରେ ଶ୍ରୀ ଏନ ସି ଭରଦ୍ୱାଜ ସହଯୋଗ କରିଥିଲେ। ଏକକ ସଂଗୀତକାର ତଥା ସାଥୀ କଳାକାର ଭାବରେ ସେମାନଙ୍କର ସମୃଦ୍ଧ ଅଭିଜ୍ଞତା ସିକ୍କିଲ ଗୁରୁଚରଣଙ୍କ ସଂଗୀତ ପ୍ରଦର୍ଶନରେ ସୁମଧୁର ବାତାବରଣ ସୃଷ୍ଟି କରିଥିଲା।
ଏହାପରେ ପଶ୍ଚିମବଙ୍ଗରୁ ଆସିଥିବା ବିଦୁଷୀ ପରମିତା ମିତ୍ର ଏବଂ ତାଙ୍କ ଅନୁଷ୍ଠାନ ନୃତ୍ୟାଙ୍ଗନମାନେ କଥକ ନୃତ୍ୟ ପରିବେଶଣ କରିଥିଲେ। ସେମାନେ ପ୍ରଥମେ ଅଭିନୟ ଶ୍ରୀମନ୍ଦିରାୟଣ ଯାହା ମହାମୃତ୍ୟୁଞ୍ଜୟ ମନ୍ତ୍ରରୁ ଉଦ୍ଧୃତ ତଥା ତିନି ଆଖି ଭଗବାନ ଶିବ କିମ୍ବା ରୁଦ୍ରଙ୍କୁ ସମ୍ବୋଧିତ କରିଥିଲା। ବ୍ୟକ୍ତିର ଭାବ ପ୍ରବଣ ତଥା ଶାରୀରିକ ସୁସ୍ଥତା ପାଇଁ ଜୀବନ ପ୍ରଦାନ କରୁଥିବା ଅମୃତଭଣ୍ଡାର ପ୍ରତୀକ ଏବଂ ଦୀର୍ଘାୟୁ ହେବାର କାରଣ ଏହି ମନ୍ତ୍ର କଥକ ନୃତ୍ୟରେ ଏକ ପ୍ରମୁଖ ଭୂମିକା ଗ୍ରହଣ କରିଥିଲା।
ଶ୍ରୀମନ୍ଦିରାୟଣଙ୍କୁ ସ୍ୱର୍ଗତ ଶ୍ରୀ ଦେବାଶିଷ ସାର୍କ ଗାଇଥିଲେ। ଶ୍ରୀ ବିଶ୍ୱଜିତ ପାଲ ଏବଂ ଶ୍ରୀଚନ୍ଦ୍ରଚୁର ଭଟ୍ଟାଚାର୍ଜ୍ୟ ଯଥାକ୍ରମେ ତବଲା ଓ ସୀତାରରେ ସହଯୋଗ ପ୍ରଦାନ କରିଥିଲେ। ନୃତ୍ୟ ସଂରଚନା ପରମିତାମିତ୍ର ଏବଂ ଅଭିନୟ କରୁଥିବା ଶିଳ୍ପୀମାନେ ହେଲେ ଶ୍ରୀତମାବାନାର୍ଜୀ, ରେଶମୀମିତ୍ର, ନିଲୋପାମିତ୍ର, ସତବଡିମାଜି, ସୁଜନ୍ତ ଘୋଷ, ଶୁଭ୍ରଦୀପ ଖାଁ, ବିଶାଲ ଦତ୍ତା ଏବଂ ନୀଲମରାଜରୟ। ନୃତ୍ୟାଙ୍ଗନ୍ କଥକ କେନ୍ଦ୍ରର ପରବର୍ତ୍ତୀ ଉପସ୍ଥାପନା ଥିଲା ଧାମର ଯାହା ୧୪ଟି ମାତ୍ରା ଚକ୍ରରେ କଥକ ନୃତ୍ୟର ଅଭିନ୍ନ ଦିଗଗୁଡିକ ପ୍ରଦର୍ଶନ କରୁଥିଲା।
ତା’ପରେ ସେମାନେ ଏକ ଅଭିନୟ ବା ଭାବପ୍ରବଣ ନୃତ୍ୟାଂଶ ଉପସ୍ଥାପନ କରିଥିଲେ। ସେମାନଙ୍କର ଅନ୍ତିମ ଉପସ୍ଥାପନା ଥିଲା ବାଦ୍ୟଚିତ୍ରାଏକ ମ୍ୟୁଜିକାଲ୍ ଡ୍ରମ୍ ଦ୍ୱାରା ଅଙ୍କିତ ଘୁଙ୍ଗୁର ଚିତ୍ରକୁ ଚିତ୍ରଣ କରିଥିଲା। ବାଦ୍ୟଚିତ୍ରା ୪ଟି ବାଦ୍ୟଯନ୍ତ୍ର ଯଥା ପଖୋଜ, ଖୋଳ, ତବଲା ଏବଂ ଢୋଲକୁ ସୁନ୍ଦର ଭାବରେ କଥକ ମାଧ୍ୟମରେ ଶିଳ୍ପିମାନେ ଉପସ୍ଥାପିତ କରିଥିଲେ।
ଆଜି ସନ୍ଧ୍ୟାର ସମ୍ମାନିତ ଅତିଥି ଭାବେ ଶିକ୍ଷାବିତ୍ ତଥା ସମାଜ ସେବିକା ଶ୍ରୀମତୀ ପ୍ରୀତିରାୟ ଚାନ୍ଦ, ବିଶିଷ୍ଟ ଓଡ଼ିଶୀ ସଙ୍ଗୀତଜ୍ଞ ଡ. ରାମହରୀ ଦାସ, କଳା ସମୀକ୍ଷକ ଶ୍ରୀମତୀ ତପତୀ ଚୌଧୁରୀ ଓ ଲେଖକ ତଥା କଳା ସମୀକ୍ଷକ ଶ୍ରୀ କେଦାର ମିଶ୍ର ଉପସ୍ଥିତ ଥିଲେ।
ସେପ୍ଟେମ୍ବର ୭ ରେ ସୃଜନ ୨୮ ତମ ଓ.ଏମ୍.ସି. ଗୁରୁ କେଳୁ ଚରଣ ମହାପାତ୍ର ପୁରସ୍କାର ଉତ୍ସବ ୨୦୨୨ ର ତୃତୀୟ ସନ୍ଧ୍ୟା ଆୟୋଜନ କରିଥିଲେ। ତୃତୀୟ ସନ୍ଧ୍ୟା ଦର୍ଶକଙ୍କ ପାଇଁ ଯନ୍ତ୍ର ସଂଗୀତର ପରିବେଷଣ ହୋଇଥିଲା। ଯାହାକୁ ଶିବାଗ୍ନି ଅନୁଷ୍ଠାନର ପ୍ରଖ୍ୟାତ ସଙ୍ଗୀତଜ୍ଞମାନେ ପରିବେଶଣ କରିଥଲେ।
ସୃଜନ ଅନୁଷ୍ଠାନର ଫେସବୁକ୍ ପେଜ୍ ଏବଂ ୟୁଟ୍ୟୁବ୍ ଚ୍ୟାନେଲରେ ଏହି ପୁରସ୍କାର ଉତ୍ସବର ସିଧା ପ୍ରସାରଣ କରାଯାଉଛି । ଏହି ଉତ୍ସବର ପରିକଳ୍ପନା ସୃଜନ ନିର୍ଦ୍ଦେଶକ ଗୁରୁରତିକାନ୍ତ ମହାପାତ୍ରଙ୍କ ଦ୍ୱାରା କରାଯାଇଥିବା ବେଳେ ଏହାକୁ କାର୍ଯ୍ୟକାରୀ ଶ୍ରୀ ଦେବୀପ୍ରସାଦ ମିଶ୍ରଙ୍କ କରିଛନ୍ତି। ଏହି କାର୍ଯ୍ୟକ୍ରମକୁ ଡଃ. ମୃତ୍ୟୁଞ୍ଜୟ ରଥ ଓ ଅନୁଜା ତାରିଣୀ ମିଶ୍ର ପରିଚାଳନା କରିଥିଲେ।
